Доко́ле о́ дру́же держи́мь враго́м, соверша́еши ему́ уго́дная? Доко́ле о́ дру́же теле́сным рабо́таеши страсте́м, смертоно́сным су́щим? Приими́ мой сове́т, оживля́ющий тя. Очи́стив си ду́шу, ку́пно же и те́ло, приступи́ ко Спа́су исцеля́ющему вся припа́дающая к Нему́ в покая́ние. Вельми́ спасе́н бу́деши. Отню́дуже воспря́нув, не тщи́ся по днех па́ки согреша́ти, созида́я, потребля́я, теки́й, набира́я, избы́тки собира́я, де́тем уподо́бився, я́же мно́жицею клетца́ воздвиго́ша, и обрати́вшеся па́ки раскази́ша. Победи́ скорпи́ю, ея́же жа́ло позна́. Бежи́ зми́я, ея́же губи́тельство све́си. Преткну́выйбося о ка́мень втори́цею, слеп есть и неразу́мен. Се имы́й тща́ние, к покая́нию притецы́. Сей имы́й о́браз, мо́лим Созда́вшаго тя смире́но и умиле́но, и погорбле́н, и потре́бль воздыха́я бу́ди, веселя́ся о вари́вших тя, и ра́дуяся о после́дних. Та́ко бо иногда́ и Закхе́й мыта́рь спасе́ния, та́ко па́ки и Матфе́й Христо́в раб яви́ся. Та́ко и блу́дная жена́ друго́ицы гре́шне живу́щи, ви́девши Спа́сове но́зе, раздреши́вши плени́ца влас и оте́рши, от рва беззако́ния издра́ся.

Та́ко и ты, ве́жди положи́в ни́зу до́ле и я́влься умиле́н, да сам спасе́ши. Виждь гра́да Содо́мска и Гомо́рьска, ро́да непокори́ва и скверне́на, де́рза и нечи́ста, и одожди́в огне́м и мо́лниями, весь род сих пожже́. Виждь гра́да Ниневи́тьска, све́тла и красноцвету́ща, грехи́ же и зло́бами кипя́ща, и сокруши́ти запове́да, и опроврещи́ся до конца́ гра́ду. И ви́дев я́ па́ки во вре́тище и по́пеле ходя́ща, во алка́нии и в посте́, в пла́чи и в слеза́х, и жа́ждуща, побледе́вша, и трепе́щуща, и во страсе обдержи́мы всю́ду, пла́чущася и рыда́юща друг за дру́га, свобо́дныя и рабо́тныя, бога́тыя и ни́щая, кня́зи и старе́йшины, му́жеск пол и же́неск, ста́рцы с ю́нотами, и со младе́нцы – и ви́дев я́ вся смире́ны, и вся обре́т целому́дрены, уще́дри и поми́лова, спасе́ и пощаде́, суд преложи́в, е́же бе повеле́л прия́ти.

Та́ко бо гре́шницы непокори́выя му́чит, и не оставля́я покори́вшихся поги́бнути. Потщи́теся, помоли́теся, спаси́теся. Гото́в Бог на благоде́ть, на исцеле́ние скор, на по́мощь приле́жен и на избавле́ние. Дае́т прося́щим, отверза́ет толку́щим, моля́щимся подае́т проще́ние. Простира́ет дары тре́бующим, не щади́т и́щущим, не отрева́ет па́дшихся, на спасе́ние ру́це подае́т. Ра́дуется раздре́шению и́щущим, прети́т непокори́вым.

Соблазни́л ли ся еси́? Воспряни́. Пал ли ся еси́? Воста́ни. Моли́ся и мил ся дей, припади́, прослези́ся, проси́, ищи́, прие́мли покоре́ние, даждь кла́няние, умоли́ да́ти Могу́щаго сия́ вся и спасти́ Хотя́щаго. Спаси́ся и не впади́ себе́ в ти́ну. Па́дся, воста́ни. Низведе́н, испра́вися. Согреши́в, возрати́ся. Исцеле́в, пребыва́й здра́вствуя всегда́. И спасе́н быв, отврати́ неду́г и́мже бе побежде́н, и да не раждеже́т у́бо тебе́ огнь, и́же погаси́л еси́. И не впади́ в скве́рну, ея́же бе омы́лся. Не уподо́бися свиния́м, ра́дующимся скве́рне. Не поревну́й псом, поглота́ющим блево́тины. Никто́же бо отъинуд́ь возложи́в ру́цы на ра́ло, и обрати́вся вспять, Ца́рство обря́щет. И никто́же бо отну́дь омы́вся, скве́рне притече́.

Еди́н Христо́с, еди́на ве́ра, еди́н крест, еди́на смерть, еди́на благода́ть, еди́на страсть, еди́но воскресе́ние. Не подоба́ет па́ки заколе́ному же́ртвою бы́ти, ни избавле́ния за тя того́ да́ти. Изба́вился еси? Не бу́ди раб самово́лен. Омы́л ли ся еси́? Не оскверни́ся. Не бо и́маши тве́рды ба́ня на омове́ние па́ки предлежа́щаго. Бо́гу же на́шему сла́ва, ны́не и при́сно и во ве́ки веко́в. Ами́нь.