Блаже́ни возлюби́вшеи Бо́га и неради́вшеи о вся́ческих земны́х ве́щех любве́ Его́ ра́ди. Блаже́ни пла́чущеися день и нощь, я́ко ти́и изба́вятся от бу́дущаго гне́ва. Бла́жени смири́вшеи себе́ во́лею, я́ко та́мо вознесу́тся. Бл́ажени воздержа́щеися, я́ко пи́ща ра́йская угото́вася им. Бла́жени пострада́вшеи свои́ми телесы́ в бде́нии и воздержании, я́ко ра́дость а́нгельская ждет их. Блаже́ни очища́ющеи себе́ от по́мысла скверна́ва, я́ко Дух Святы́й живе́т в них. Блаже́ни возлюби́вшеи Бо́га от всего́ се́рдца паче всего́ ми́ра, я́ко ти́и дру́зи Бо́жии нареку́тся. Блаже́ни поно́шше и крест Его́ во́лею, и вои́стину Христа́ во след ше́дше, и я́ко ти́и приимут небе́сный Иеросали́м. Блаже́ни препоя́савшеи чре́сла своя́ вои́стину и иму́ще гото́вы свеща́ своя́, и ча́ющеи небе́снаго Жениха́, я́ко сца́рствуют Ему́ в небе́снем Ца́рствии. Блаже́н стяжа́вый у́мнеи о́чи, и разу́мен и некло́нен взор бу́дущих благ, я́ко да прии́мет я́. Блаже́н име́яй вы́ну пред очи́ма свои́ма день сме́ртный, и потща́выйся уго́ден обрести́ся пред Бо́гом. Блаже́н рыда́вый на земли́, я́ко возра́дуется на небесе́х со а́нгелы Бо́жии. Блаже́н потща́выйся на земли Бо́га ра́ди, я́ко пло́дове его́ на небесе́х процвету́т. Блаже́н не яды́й ту́ хле́ба, но в труде́ свое́ю руку́ по апо́столу и ине́м подава́я труды́ своя́, я́ко почи́ет на ло́не Авраа́мле.

Го́ре во гресе́х су́щему, и покая́ннаго вре́мени не ве́дущу, я́ко та́мо пока́ется всесму́тне и неуте́шимо во ве́ки. Го́ре от ю́ности в стра́сти плотски́я вда́вшу себе́, и до ста́рости не восклони́вшуся до конца́, яќо сицевы́й му́чимь бу́дет. Го́ре глаго́лющему, я́ко ны́не да косну́ся пло́ти, на ста́рость же пока́юся, я́ко сицево́му внеза́пу смерть прихо́дит, и ча́яние его́ поги́бнет. Го́ре согреша́ющему во́лею, и глаго́лющу: У́тро пока́юся, не све́дый, что роди́т полу́нощие. Го́ре даю́щему ру́ку свою́ неприя́зни, и све́дущему бла́гое и не творя́щу, я́ко неприя́знени а́нгели прии́мут и в день исхо́да его́. Го́ре полага́ющему собла́зны бли́жнему, свои́ми лука́выми дея́нии, я́ко сло́во возда́ст в день Су́дный, зане́же и ины соблазни́л есть свои́ми лука́выми начина́нии. Го́ре отре́кшемуся ми́ра и па́ки мирски́ми пеку́щеся, я́ко при́тча глаго́ланая прии́дет нань. Го́ре ходя́щему во след похотений плотски́х, и нерадя́щу ле́ностию о души́ свое́й, я́ко разде́ется на земли́ наде́жда его́. Го́ре нетща́щемуся все́ю кре́постию свое́ю, отсю́ду угото́вати отве́т та́мо благоприя́тен, и причета́ти си живо́т свой благи́х. Го́ре погуби́вшим терпе́ние, и что сотворя́т, егда́ посети́т Господь всея твари?

Потщи́теся в ма́лое се вре́мя себе́ помощи́, и покая́нием и слеза́ми умоли́те Долготерпели́ваго и Ми́лостиваго Бо́га, жду́щаго на́шего обраще́ния и подаю́щаго жизнь. Не пре́зрим на́шего спасе́ния, не насле́дим себе́ мирски́х похоте́ний, я́ко в час суть, и по́следь покая́ние творя́т, и па́ки та́яжде творя́т. И вся сла́ва ми́ра сего́ погиба́ет, и ничто́же и́но по́йдет пред на́ми, то́кмо еди́н грех и су́щия му́ки от него́. И ни́чтоже нам помощи́ мо́жет в день он, ни друг, ни у́жика, ни сердобо́ля, но то́кмо же отсю́да во́льное покая́ние и сего́ споспе́шныя де́тели, и́стина нелицеме́рна, смире́ная му́дрость по Бо́жию, послуша́ние нетщесла́вно, воздержа́ние, и вся́ко духо́вно житие. Сия́ де́тели исхо́дят с на́ми от жития́, сия́ супроти́вятся супроти́вным си́лам, хотя́щим име́ти ны во исхо́де на́шем от жития́ сего́. Сия́ поста́вят ны пред Спа́сом на́шим Христо́м, кла́няющася и сла́вяща с на́ми Отца́ и Сы́на и Свята́го Ду́ха, ны́не и присно и во ве́ки веко́в. Ами́нь.