На плод послуша́ния взира́я бра́те, потща́хся писа́ти ти о не́мже повеле́л еси́. Се нача́ло бла́го е́же боя́тися Бо́га. Ста́рость же честна́ в души́ христолю́бне. А вне́мляй себе́ на вся́ком ме́сте спасе́тся. Любя́й ре́чи мирски́я, ми́ра несть возненави́дел, я́коже бо высека́я огнь воздви́гнет пла́мы. Та́ко и мирски́я бесе́ды воздви́жут стра́сти в се́рдцы мни́хове. По́льзу твори́ прилуча́ющимся у тебе́. Себе́ неврежда́я. Любя́й ре́чи же́нския, воздви́гнет на ся блу́днаго бе́са. Слы́шание бла́го слы́шавше о тебе́ роди́вшей тебе́. Па́че вина́ и пия́ньства возвеселя́тся. Любя́й пия́ньство, мно́го оттще́тится. Глаго́лет бо и де́лает, я́же не подо́бна суть. И кра́дый свое́ бога́тство, и подава́ет враго́м я́ко чу́жде, пия́ньство бо ему́ омрачи́ло есть ум.
Гове́ин бу́ди бра́те. Гове́ние бо ражда́ет ми́рное устрое́ние. Ми́рное же устрое́ние ражда́ет безстра́стие. Бу́ди же гове́ние твое́ прича́стно смире́ней му́дрости, я́ко да бу́деши и́стинен гове́ин. И насле́дствуеши любо́вь и целому́дрие. Многоре́чие же омрача́ет по́мысл. По́мысл же омраче́н веде́т к безсту́дию. Безсту́дие же ма́ти блу́дови. Любя́й же молча́ние, без сму́ты пребыва́ет. Но и бли́жняго же не поощря́ет. Смех же и де́рзость новонача́льна чернеца́. Я́ко страши́лище вреди́т мни́ха нетерпели́ва. Пла́чущая бо ся ны́не и рыда́ющая, блажи́т Госпо́дь. Побе́да есть мни́хови, слы́шатися на трапе́зе молчали́ву.
Люби́ молча́ние бра́те, да ти пребу́дет гове́ние. Храни́ же гове́ние, и соблюде́т тя от блуда́. Пререка́яй же игу́мену и не покоря́яся, не закосни́т впа́сти в зла́я. Послу́шаяй же наказа́ния дру́га своего́, возвесели́тся с пра́ведники. Хваля́йся о свое́й си́ле, отре́ет от себе́ по́мощь Бо́жию. А хваля́йся о Го́споде, да хва́лится. Любя́й молвы́, и ненави́дяй безмо́лвия, скорбе́ти и́мать мно́го, безмо́лствуяй же в смире́ней му́дрости, возвесели́тся о Го́споде. Не хотя́й же стоя́ти в собо́ре, оттщети́тся мно́го. А стоя́й с гове́нием, ско́ро услы́шан бу́дет. Леня́йся о славословеси́ во вре́мя собо́ра, сугу́бо порече́ние обря́щет. И́мже упраздни́ся от моли́твы и пе́ния. Е́же бесе́доваше ку́пно же и близ стоя́щеи его́. Любя́й черне́чество, благопротя́жен есть. Любя́й же пия́ньствие, ни в че́мже терпит. Ненави́дяй де́лати кова́рствен есть пра́здны (дни). Любя́й же де́лати, без печа́ли пребыва́ет. Хваля́йся о облаже́нии у жи́чстве, непотре́бен есть. Во ополче́нии бо бра́ни не по́льзуют ему́.
Почи́тай брате ма́лыя же и вели́кия, да Госпо́дь вознесе́т тя. Смиря́яйбо себе́ вознесе́тся. Смири́ главу́ свою́ игу́мену, и старе́йшей бра́тии покори́ся. Плод бо есть стра́ха Госпо́дня. Смире́ние же не е́же смиря́тися бо́льшим явля́ется, но и от ме́ньших не приима́ти честь. Пи́шет бо, прославля́ющая Мя просла́влю, а укаря́ющеи мя без че́сти бу́дут. Мы же у́бо сла́вим Бо́га, я́ко да и Сам просла́вит ны со все́ми святыми свои́ми. И в чем просла́вим И́? Еже соблюсти́ за́поведи Его́.
Пи́шет бо: Не словесе́м бо есть Ца́рствие Бо́жие, но си́лою. И па́ки: не всяк глаго́ляй ми: Го́споди, Го́споди, вни́дет в Ца́рствие небе́сное, но творя́й во́лю Отца́ Моего́, су́щаго на небесе́х. Пре́жде же всеѓо бра́те, бо́йся Бо́га во и́стину, и страх Его́ просвети́т ти о́чи у́мнеи. Люби́ же смире́ную му́дрость, смире́ние бо по Бо́жию стена́ есть нераздруши́ма от лица́ вра́жия, и ка́мень супроти́в бия и сокруша́я ко́зни вражия, и стре́лы неприя́знены раждеже́ныя. А́ще же положи́ши в по́мысле твое́м, е́же терпе́ти Го́спода ра́ди досажде́ние, тщеты́ же и уничиже́ние, бу́деши храбо́р боре́ц, оболче́н при́сно в броня́ на супроти́внаго. Тогда́ и врази́ зря́ще твоего́ толи́ка по́двига, отпаду́т от лица́ твоего́. А́ще хо́щеши тещи́ и не труди́тися, начни́ чистоту́ телеси́ твоего́ храни́ти. Любы́ ма́ти нари́чется де́телем. Чистота́ же свети́льник и утвержде́ние. Светильник и безмо́лвие, стена́ же сему́ – страх Госпо́день. Соблюде́те бра́тие чистоту́ тела ва́шего и любо́вь Бо́жию, да сочета́ет ны Госпо́дь со святы́ми а́нгелы. А лю́бящим чистоту́ весели́тся Дух Святы́й. И терпе́ние да́рует им. Чистота́ же исправля́ется воздержа́нием и кро́тостию, и в любви́ безмо́лвия.
Те́мже подоба́ет нам претерпе́ти, вся́кому бра́ту безчи́нну ходя́щу, еда́ ка́ко зазо́р да́мы нас зря́щим. Глаго́лет бо апо́стол: Поразуме́юще добре пред Бо́гом и пред челове́ки, а́ще ли кто безсту́ден есть, и мы такова́го обы́чая не и́мамы, ни Церкви Бо́жия. Послу́шай же его́ па́ки глаго́люща. Ты у́бо до́бре хо́диши, но ин не созида́ется. Почто́ бо свобо́да моя́ су́дится ино́го со́вестию? Отню́дуже до́бре приима́ти есть наказа́ние челове́ком боя́щимся Бо́га. И не се бе угаждати по глаго́лющему: но ко́ждо нас бли́жнему да угажда́ет в благо́е к созда́нию. И паки: Да посты́дится супроти́вный, ничто́же имы́й о нас зла. Рече́ бо Госпо́дь сла́вы: Та́ко да просвети́тся свет вашь пред челове́ки, яко да у́зрят ва́ша до́брая дела́ и прославят Отца́ ва́шего су́щаго на небесе́х. Вино́ю же подая́нием святы́ни да не погуби́м. Обы́чай бо есть врагу́, благи́м зло́е де́ловати. Согреша́яй бо, и мня́ся укры́ти прельща́ется. Ничто́же бо сокрове́но есть, е́же не яви́тся. И а́ще вложи́т ти враг похоте́ние пло́ти, рцы к нему́: не буди мне ктому́ оскорби́ти Ду́ха Бо́жия Свята́го, И́мже зн́аменан есмь в день избавле́ния. Довле́ет бо ми мимоше́дшее вре́мя. Пи́шет бо: Всяк грех и́же а́ще сотвори́т челове́к, кроме́ те́ла есть. Блудя́й же во свое́ те́ло согреша́ет. О бра́ни же по́мысльней подро́бну навыко́х.
Брат вопроше́н быв ине́м бра́том глаго́лющим: Скве́рнии по́мысли смуща́ют мя. Брат же отвеща́: Святи́и отцы́ та́ко повеле́ша, по́мыслы внутрь оста́вити вни́ти, и тогда́ победи́тися к ним. Не́мощнейшим же ни всем бесе́довати заповедаша. Еда́ когда́ па́мять ме́длящи, бу́дет страсть неисцелима. Тогда́ рече́ брат, что есть е́же внутрь оста́вити вни́ти помысло́м, и победи́тися к ним. Послу́шай рече. Внегда́ а́ще (не) наведе́т враг похоте́ние злое, и по́мыслы скве́рны, а́бие преди́ поста́вит жену́ доброли́чну, я́ко подо́бну прельща́ему на растле́ние. И сия́ ви́дя, в по́мысле боря́йся не смуща́ется от сицева́го по́мысла, но ста́нет хра́борски супроти́в им, прему́дре боря́йся с ни́ми. Пото́м же уве́рзет им, и затвори́т я́, и внутрь бы́вшим им, и греху́ борю́щуся с ним, тогда́ глаго́лет к нему: Се есть супроти́в стоя́ на ны и́мже стужа́ет ми, и приведе́ние твори́т ми по́мыслу. Хощу́ убо уве́дати изве́сто, что его потре́ба есть. И повели́т ножь си принести́ на по́мысл, е́же есть суд. И прии́м уве́рзет в чре́ве на мысль, глаголя: Хощу́ уведети что обрящу в нем, добро́ту ли, гной ли. И уве́рз чре́во его́, обря́щет внутрь, е́же и вси све́мы. И яви́тся подро́бну безсту́дие по́мысльное. Супроти́внии же у́бо уви́́девше, супроти́вную им побе́ду, возмо́лвят и спроврещи́ хотя́ще помысл бра́тови, да возмутя́т ум все́ми по́мыслы, и упразнят настоя́щий по́двиг. Страша́щее да когда́ яви́тся его́ коне́чнее безсту́дие. Брат же боря́ся глаго́лет им: Что во ине́х ме́сто приноси́ти хо́щете? Не оста́влю бо вас изы́ти, дондеже испыта́ю вся изве́сто о ве́щи той. А́ще такова́я досто́йна есть любве́, я́коже вы ю́ похвали́сте. Тогда́ затвори́т брат грех во вну́треней хра́мине, до трию́ дней или́ до четы́рь. И по сем отверзет ви́дети хотя́ грех. И пре́жде воше́ствия его́ внутрь, сря́щет и неизрече́нный он смрад. И заткну́в руко́ю уста́ с ноздре́ма, и показу́я по кончи́ну ве́щи помаа́ет супроти́вным помысло́м и споспе́шьствующим гре́хови. Пото́м глаго́лет к ним: Что отвеща́ете к сим? Они́ же стыдя́щеся, разы́дутся я́ко дым на ае́ре. И та́ко бу́дет брат в безстра́стии. Благода́ти споспешеству́ющи. И испове́даяся Гос́подеви глаго́лет: Хвалю́ Тя Го́споди Бо́же мой, я́ко не пре́дал еси мене́ в ру́ки враг мои́х, но спасл мя еси́ от се́ти ловя́щих. И Твоя́ благода́ть просвети́ла мя есть, е́же разуме́ти сия́. Не прему́дростию бо мое́ю спасо́хся от се́тей их, но благода́ть Твоя́ соблюде́ мя.
Име́им убо бра́тие страх Бо́жий пред очи́ма вы́ну, я́ко да и сам покры́ет ны. Кроме́ бо Бо́жия покро́ва челове́к ничто́же есть. Мно́га бо есть кознь зло́бная враг на́ших. И́злиха же по́мощь Бо́жия есть обходя́щия челове́ки. Да не отпу́стим ви́дети очи́ма на́шима суеты́.
Возлю́бим у́бо Бо́га, помага́ющаго нам и спаса́ющаго нас. И возлю́бим все́ю си́лою и бли́жняго, я́ко са́ми себе́. И име́й на уме́ си люби́миче день кончи́ны твоея́. Егда́ хо́щеши положе́н бы́ти на рого́зине твое́й зимо́ю раздра́не.
О́ лю́те мне! Како́в страх и тре́пет обдержи́т ду́шу в годи́ну о́ну. О́ лю́те мне! Какова́ бед́а возлю́бленый бра́те, а́ще у́бо кто что бла́го сотвори́л есть в жи́зни сей, в не́йже положи́л есть. Я́коже се что глаго́лю: А́ще скорбь и поноше́ние претерпе́л есть Го́спода ра́ди, и уго́дная пред Ним сотвори́л есть, с ра́достию вели́кою возво́дится на небеса́, от святы́х а́нгел наставля́емь. Я́коже де́латель тща́йся и де́лаяй весь день. Часть вторы́я на́десяте годи́ны, да со трудо́м прии́м мзду свою́ почи́ет. Та́ко и душа́ пра́ведных дне о́ного ча́ют. Гре́шных же душа́ стра́хом и тре́петом обдержи́ми суть в годину ону. И я́коже осу́жденик ят слуга́ми, и во дсцы ведо́мь на суди́ще, та́ко и душа́ гре́шных трепе́щут в годи́ну о́ну, взира́юще безконе́чную му́ку ве́чныя тмы. И а́ще кто рече́т: Оста́вите мя ити́ в мир он, я́коже про́чее да пока́юся, и несть отпуща́ющаго. Услы́шит бо таковы́й: Егда́ же име́ вре́мя не пока́яся, и ны́не ли прише́л еси пока́ятися, егда́ же бе отве́рст путь всем? Не пока́яся, ни подвиза́ся. И ны́не хо́щеши подвиза́тися, егда́ затвори́шася вся две́ри и вре́мя по́двига пре́йде? Не́си ли слы́шал глаго́лющаго: Бди́те у́бо, я́ко не ве́сте дне ни годи́ны?
Се у́бо ве́дуще, возлю́бленая бра́тия, до́ндеже вре́мя и́мамы пока́емся, я́ко да и́змет ны Госпо́дь от гне́ва гряду́щаго на сы́ны непокори́выя, и сподо́бит ны в ча́сти святы́х. Помоли́теся за мя гре́шнаго, глаго́люща, а не творя́ща. Пи́шет бо: Испове́дайте друг дру́гу грехи́ ва́ша, я́ко да исцеле́ете и́менем Го́спода на́шего Иису́с Христа́, Ему́же сла́ва во ве́ки веко́в. Ами́нь.