Возлю́бленнии, поразуме́ем предстоя́щыя пред земны́м царе́м, и служа́щыя престо́лу тле́нному, ка́ко со вся́цем бде́нием, и со стра́хом предстоя́т царю́ их; то кольми́ па́че мы ве́рнии, до́лжни есмы́ стоя́ти пред небе́сным Царе́м, со стра́хом и тре́петом и со вся́кою чистото́ю. Те́мже не помышля́ем возлю́бленнии, до́бре су́ще и кро́тким о́ком, поразуме́ти боже́ственных Та́ин предлежа́щих, Те́ла и Кро́ве Го́спода на́шего Иису́с Христа́. И препира́ет нас боже́ственное Писа́ние глаго́ля: Пристра́шен же быв Моисе́й, не дерзня́ше разуме́ти. Пи́шет бо: Прославля́ющыя Мя просла́влю, и уничижа́яй Мя без че́сти бу́дет. Ты бо я́ко челове́к поразуме́еши, Сам же Той я́ко Бог весть глубину́ серде́чную, и помышле́ния твоя́ про́зрит. Ка́ко ли же и дерза́ем оставля́ти пе́ния, исходя́ще пре́жде конча́ния, без беды́ вели́ки? А́ще бо зван бу́деши на ве́черю му́жа бога́та, то дерзнул́ ли бы еси́ воста́ти из среды́ возлежа́щих, и ити́ в дом свой, а не пребыва́я ли пребыва́еши, до́ндеже вси воста́нут? Убои́мся возлю́бленнии и́мже пи́сано есть: Про́клят всяк творя́й дела́ Госпо́дня с небреже́нием. Потщи́мся у́бо отсе́ле в ма́лем сем ве́це и злем, уго́дни обрести́ся Бо́гови, я́ко да насле́дим ве́чное Ца́рство. Той бо Святы́й во святы́х почива́яй Госпо́дь, и круподу́шию кре́пость подае́т, Тому́ сла́ва во ве́ки. Ами́нь.