Рыда́ти у́бо подоба́ет и пла́катися о не иму́щим кро́тости, но лука́встве причета́ну, я́ко отве́ту лука́ву подлежи́т. Лука́вии бо рече́ поги́бнут. Святы́й же Спас наш сицевы́м досажда́ет глаго́ля: Лука́вый челове́к от лука́ваго сокро́вища се́рдца своего́ изно́сит лука́вая. И па́ки проро́ком прети́т глаго́ля: Лука́вых не послу́шает у́хо Мое́. Лю́то бо есть бесо́вское лука́вство, бра́тие.

Те́мже внемли́те, еда́ кто вас себе́ погуби́в, сам ся возненави́дит. Лука́вый бо николи́же смиря́ется, но всегда́ смуте́ет, всегда́ я́рости и гне́ва и льсти испо́лнь есть, всегда́ подблюда́ет су́щаго близ его́, всегда́ ро́пщет и всегда́ зави́дит, всегда́ ревну́ет и всегда́ про́сту ши́ю имать, сказу́ет и пререку́ет, и развраща́ет, и повелева́ет неполе́зная. Таковы́й бо кро́ткия отрева́ет, долготерпели́вым смее́тся, стра́нныя осужда́ет, и еди́наго со еди́нем сважда́ет, и ко еди́ному ко́ждо их проти́вится, и к кото́рам скор сва́дник, на поощре́ние воставляет, на возда́ние проти́вится, на клевету́ гото́в и на оглаго́лание скор, на многоре́чие му́жествен, на досажде́ние удо́бен, на соплете́ния пре́дний, на молву́ пе́рвый притека́тель, на пе́ние не́мощен, на пост разсла́блен, на вся́ко де́ло бла́го не́мощен и неразу́мичен, на словеса́ духо́вная неглаго́лив: вся́ко беззако́ние затче́ уста́ ему́, мно́гу у́бо рыда́нию и пла́чу досто́ин есть таковы́й. Те́мже молю́ вы бра́тие, е́же храни́тися от многослове́сия.