Блаже́н есть и́же за́висти и ре́вности не после́дствова. Име́яй бо еди́но от сею́, обое́ и́мать. За́висть бо и ре́вность друг дру́га ви́сит. И блаже́н вои́стину и́же не впаде́ в сих, ниже́ уя́звен бысть си́ми. Зави́дяй бо бра́ту своему́, в непра́вду с диа́волом осужда́ется. За́висть бо име́яй и не́нависть, и́мать и вражду́, и предспе́янию друг своего́ ревну́ет. Не име́яй же за́висти, ни ре́вности, николи́же предспе́ющу друг его́ не печа́лует: или́ ино́му почита́ему, сей не смуща́ется. Дру́гу его́ вознес́шуся, не стужа́ет си: всех бо хвали́т и всех почита́ет, себе́ же недосто́йнейша и ху́ждша всех вменя́ет, бо́льша и лу́чша вся па́че себе́ твори́т, славы николи́же себе́ не предлага́ет, и себе́ че́сти не восхища́ет. Незави́стивый, с ра́дующимися ра́дуется и с добро́ хотя́щими весели́тся, предспева́ющим помага́ет, и пра́во живу́щая похваля́ет. И а́ще ви́дит бра́та испра́влена, спо́ны не твори́т ему́, но оживля́ет па́че такова́го наказа́ньми, ре́кше укрепля́ет. И а́ще друга́го в поко́и ви́дит, не сове́тует о нем и не согласу́ет. И а́ще ви́дит бра́та в собла́зне, не потя́жет его́, но пра́во укроти́т и́. И а́ще ви́дит гне́вающася, не му́тит его́, но любо́вию устро́ит его́ и ми́ром уча́. И а́ще ви́дит печа́льна, не пре́зрит его́, но с ним поболи́т и уте́шит его́ словесы́ поле́зными. И а́ще ви́дит поселя́нина ре́кше гру́ба, тщи́тся уча́ его́, на любо́вь ве́дый и на пользу без за́висти. А́ще ви́дит неразу́мна, наста́вит его́ на до́брое. И а́ще ви́дит спя́ща во вре́мя пе́ния, со мно́гим тща́нием возбу́дит его́. И спро́ста рещи́: неревни́вый, кроме́ за́висти есть, и никако́ю же ве́щию оскорбля́ет бли́жняго си, но о вся́ком предспе́янии и му́жестве дру́га своего́ ра́дуется незав́истивый.