Про́клят и окая́н и́же послуша́ния не стяжа́, но ропта́ние. Сицевы́й в монастыри́ я́зва вели́ка, собла́зн о́бщей бра́тии, отвраще́ние любви́ и едине́нию прогони́тель, сму́тник ми́ру. Ропти́вый, повелева́емь пререку́ет, и в де́лех непотре́бен есть. Николи́же ра́дуется таковы́й.

То́жде есть и лени́вый: ле́ность бо ропта́нию припряжена́ есть. Всяк бо лени́вый впаде́т во зло́е. Святы́я кни́ги ре́ша: Лени́вый бо рече́ по́слан на путь, лев на путе́х и уби́йца на распу́тии. Сих вину́ твори́т ропти́вый всегда́: а́ще повеле́но ему́ да бу́дет де́ло сотвори́ти, ро́пщет, и а́бие отвраща́ется. Почто́ се и что ра́ди си́це? И несть поле́зно рече́т. И а́ще по́слан бу́дет, иска́зу глаго́лет на пути́ су́щу. А́ще его́ на пе́ние воздви́гнут, гне́вается. А́ще на бде́ние, сы́рище и главу́ предлага́ет боля́щу. И а́ще его́ наказу́еши, отвеща́ет ти реки́й: Себе́ наказу́й, а о мне я́коже Госпо́дь хо́щет. И а́ще учи́ши его́, рече́т ти: Еда́ и ты та́ко ве́дел я́коже аз ве́де? И николи́же де́ла еди́н сотвори́т. А́ще дру́га си не отто́ргнет. Ро́пчущий, на вся́ко неиску́сен и непотре́бен, и на вся́ку де́тель неуго́дну таковы́й подвиза́ется. Ропти́вый, в поко́их ра́дуется, в страсте́х весели́тся. Ропти́вый, трапе́зы глядает, и алка́ние ме́рзит ему́. Ропти́вый и лени́вый, шепта́ти све́ста, и лука́вствия свесть твори́ти. Сицевы́й многообра́зен и многоко́знен есть, и во мно́гих ре́чех не побежда́емь есть. Таковы́й всегда́ сважда́ет дру́га со друго́м. И в благотворе́нии ропти́в и дряхл есть. И восприя́тие стра́нным нестро́ин. В любви́ лицеме́рен, а в не́нависти му́жествен. Те́мже бра́тие моя́, не ро́пщем в за́поведех, ниже́ супроти́в веща́им, ни прекосло́вим, но правосло́вим.