Блаже́н вои́стину и треблаже́н сохрани́вый воздержа́ние, я́ко се воздержа́ние вели́ко есть. Но послу́шайте бра́тие: До коли́ка и о чесо́м есть воздержа́ние, ли глаго́лите или́ су́дите, ли взы́щете. Есть у́бо воздержа́ние во язы́це, и не словесе́м мно́жайшим и тщим исходи́ти и́зо уст, и е́же держа́ти язы́к и не клевета́ти, е́же не осужда́ти, е́же не проклина́ти, е́же не праздносло́вити или́ глаго́лати невмести́мая, е́же удержа́ти язык, е́же не сва́живати ни в чем же, е́же не меша́ти бра́тии, ни открыва́ти та́ин, е́же не поуча́тися неподо́бным. Воздержа́ние е́же удержа́тися от слы́шания, и не мути́ти себе́ от слы́шания су́етнаго. Воздержа́ние же о́чию есть, е́же удержа́ти взор, и не возгля́дати, ни поразуме́ти добро́ты и красоты́ ея́же не подоба́ет. Воздержа́ние же есть, е́же удержа́ти гнев и я́рость, и не удо́бь раждиза́ти в ни́хже несть потре́бы. Есть воздержа́ние и от сла́вы, е́же удержа́ти помысл и не похоте́ти сла́виму бы́ти, и е́же не взыска́ти сла́вы и че́сти, е́же не превозноси́тися, е́же не навиде́ние твори́ти хвалы́ ра́ди. Воздержа́ние же от по́мысл и сия́ му́чити стра́хом Бо́жиим, е́же не положи́ти по́мысла влеко́му бы́ти к по́хоти. Воздержа́ние же от бра́шен, е́же удержа́тися и не иска́ти бра́шен многоце́нных и больших, е́же ни во вре́мя, ни в годи́ну я́сти, е́же не име́ти ду́ха неи́стовствена чре́ва, и е́же не насы́титися до́брых бра́шен, и е́же не похоте́ти ино́му бра́шну. Воздержа́ние же от пи́ва, е́же воздержа́тися и не впа́сти в пия́нство, и доброво́нна вина́ не иска́ти, ни в сласть его́ пи́ти, и е́же не жада́ти разли́чное пи́во, и на устрое́ное и растворе́ное пи́во, и е́же без ме́ры не прикаса́тися не то́кмо вину́, но а́ще бы мо́щно бы́ло, то ни воде́. Воздержа́ние же от по́хоти и жела́ния лука́ваго, е́же удержа́ти чу́вствия, и не впа́дати в приключи́вшаяся по́мыслы, е́же не положи́ти по́мысла влага́ющаго сла́дкия стра́сти, е́же не твори́ти, ели́ко же твори́т не́нависть, е́же не твори́ти во́ли плотски́я, но восхластова́ти стра́сти плотски́я стра́хом Бо́жиим. И́стинный бо воздержа́тель име́яй жела́ние о́но благо́е, та́мо озира́яся вельми́ сего́ отврати́т по́мысла. Смеше́ние ме́рзит ему́ я́ко сеть поля́чена. Лицу́ же́нску не ра́дуется, добро́те очи́ма не весели́тся, и не па́дается дыха́нии сла́дкими, не изнемага́ет словесы́ кро́ткими, но и страши́тся же́нска по́лу. Па́че же с нечи́стыми жена́ми не умно́жит в бесе́дах, ни уме́длит. И́стинный воздержа́тель и му́жественный, себе́ храня́й на он поко́й, о вся́ком жела́нии воздержи́тся и о вся́ком по́мысле, и жела́ет лу́чшая, и стра́ха бу́дущаго ве́ка.