Блаже́н есть и треблаже́н, и́же язы́ка своего́ не отщети́т на дру́га своего́ клевето́ю. И язы́ком се́рдца не оскверни́, но разу́мно уве́де, я́ко вси есмы́ в запреще́ниих. И в клевете́ дру́жней не наслади́ся, но омерзе́ ему сицева́я страсть. Не оклевета́вый бо бра́та своего́, себе́ сохрани́л есть без поро́ка, и сицево́му собла́зна несть. И со́весть его́ не оскверни́ся. Убежа́вый клеве́тна ду́ха, себе́ свободи́л есть от одержания зла, си́речь сохрани́л есть, и победи́л есть полк де́монеск. Не стяжа́вый клеве́тна язы́ка, стяжа́л есть себе́ сокро́вище некра́домо. Не преклони́выйся на клевету́ бра́та своего́, сей братоуби́йства убежа́л есть. И ине́ми оклевета́н не бу́дет. Не послу́шавый ду́ха клеве́тна, сей вои́стину разуме себе́ челове́ка пло́тяна су́ща, и себе́ сохрани́ лесть чи́ста. Не седя́й со клеветнико́м, со а́нгелы водваря́ется. Не пома́завый язы́ка я́дом, и у́шию клевето́ю, таковы́й да́ра любо́внаго испо́лнь есть. Не оскверни́вый уст смра́дом клеве́тным, сего́ уста́ бла́зе уха́ют плод Свята́го Ду́ха. Блаже́н у́бо вои́стину, и па́ки блаже́н, сохрани́вый себе́ от клеветы́.