В сих же себе́ уязви́вый окая́нен есть и соприча́стник диа́волу есть, и́мже смерть вни́де в мир. Име́яй бо за́висть и ре́вность, всем есть пререку́яй: себе́ па́че ино́го хо́щет почести́, благоволя́щих умаля́ет и до́бре ходя́щим собла́зны полага́ет, пря́мо ходя́щая потяза́ет, и гове́йный ме́рзит ему́: постя́щагося тщесла́вна нари́чет, и тща́щагося на пе́ние лю́бящася показу́ет: бли́жняго в слу́жбе оставля́ет, и воста́ниваго в де́лех славолю́бца нари́чет. В сласть стра́ждущаго в кни́гах, безде́льна твори́т. Изя́щнаго во отве́тех неи́стово чре́во иму́ща и́мать и́. И николи́же ра́дуется зави́стивый о предспе́янии дру́жне: а́ще ви́дит леня́щая кого́, не воздви́гнет и́, но и побежда́ет его на зло. И а́ще ви́дит спя́ща во вре́мя моли́твы, не возбоди́т и́, но еще́ и безмо́лствие подае́т. А́ще ви́дит бра́та почива́юща, а́бие сове́тует о нем. И а́ще ви́дит его́ в отпаде́нии, пред все́ми поно́сит ему́.

О́ го́ре зави́дящему! Я́ко всегда́ в нем се́рдце его́ изнемага́ет, и те́ло его́ в бле́дости тли́мо быва́ет, и си́ла его́ крати́тся, и ко всем есть го́рек, и всем враг нари́чется, и ко всем лицеме́рие твори́т, и лесть куе́т, и на лица́ лю́бится: и днесь о сем клеве́щет, а у́тро о друзе́м: и ко всем изменует ум свой, и коего́ждо сважда́ет. И пома́ле поразумеет, и на се влече́тся, и дру́га со друго́м сважда́ет. Лют бо яд есть за́висть и ре́вность, я́ко клевета́ и не́нависть от сего́ есть.

Те́мже у́бо дале́че бежите о не́нависти, су́щии небе́снаго жития́ во́ини. Дале́че сотвори́те от вас за́висть, да не со диа́волом осужде́ни бу́дете.