Бра́те, егда́ кле́плет ти брат но́щию, я́ко да воста́неши на славосло́вие Бо́жие, воста́ни приле́жно, я́ко да и леня́яйся ви́дев твое́ прилежа́ние и единоду́шие, воздви́гнет свою́ ду́шу на воспрянове́ние, по рече́нному: Предвари́сте о́чи мои́ ко у́тру, поучити́мися словесе́м Твои́м. А́ще ли же прилучи́т ти ся сном тя́жким побежде́ну бы́ти, привиде́нием де́монским, и воспряну́в не лени́ся воста́ти и ити́ в собо́р. Се у́бо све́дый, я́ко гряду́щий на зло, стопе́ же и словеси́ пра́здне, отве́т да́ти и́мут в день Су́дный. Та́кожде и о еди́ном словеси́ бла́зе и стопе́, мзду прии́мет. Востеки́й на благо́е, не облени́ся у́бо возлю́бленне, но воста́ни. И не глаго́ли в себе́: Ны́не упусти́л есмь собо́р, ре́кше бра́тия отпе́ли суть, и аз ка́мо иду́? Лени́вых бо есть сло́во се: но па́че воста́ни, сверг с себе посте́льную оде́жду со тща́нием, и воздви́г ру́це к Бо́гу, поклони́ся престо́лу Его́ и благода́ти. И отве́рз ке́лию свою́, тецы́ в собо́р я́ко беду́ прии́м, и я́ко се́рна от тенята́ избе́гши, а́ще и после́днюю моли́тву пости́гнеши, то́кмо не облени́ся, но воста́ни, мо́жеши бо и по отпе́тии пе́ти псалмы́ в ке́лии свое́й, я́же оста́ви де́монское привиде́ние. Ни вины́ облене́нию восприемли, еже лишену быти моли́твы возлю́бленне, но в настоя́щую готов да ся обря́щеши на де́ло Госпо́дне. А́ще ли же оста́виши без ну́жды или без боле́зни, и услы́шиши рече́нное во псалме: Усну́ша сном свои́м, и не обрето́ша ничто́же. Себе́ веждь возлю́бленне, я́ко ели́ко поко́иши плоть свою́, толи́ко мно́жиши в ней стра́сти. И про́чее отягчи́вши душа́ от теле́снаго обы́чая, безпло́дна бу́дет. Те́мже глаго́лет Спас: Блюди́теся, да не отягча́ют сердца́ ва́ша объяде́нием и пия́нством и печа́льми жите́йскими. Те́мже и апо́стол глаго́лет: Но удержу́ си те́ло и порабощу́ е́, да не ка́ко ине́м пропове́дав, сам непотре́бен бу́ду. И ели́коже понужда́етеся са́ми на де́ло Госпо́дне, толи́ко же и те́лом здра́ви бу́дете, и душа́ми просвеща́етеся. Я́коже бо страда́лец обнажа́ет себе́, да счета́ет те́ло к хи́трости подви́жней, та́ко и благоче́стия подви́жник, до́лжен есть обнажи́ти себе́, на вся́ко де́ло бла́го, апо́столу глаго́лющу: Поуча́й себе́ ко благоче́стию. Теле́сное бо наказа́ние в ма́ле есть поле́зно, благоче́стия же поуче́ние ко всем есть поле́зно, заве́т имы́й ны́нешния жи́зни и бу́дущия. Госпо́дь же да воздви́гнет душа́ на́ша на страх свой. Тому́ сла́ва, во ве́ки. Ами́нь.