Блаже́н есть бра́тие таковы́й и́же терпе́ние стяжа́, я́ко терпе́ние упова́ние и́мать, упова́ние же не постыди́тся: блаже́н у́бо пои́стине и треблаже́н име́яй терпе́ние. «Претерпе́вый бо до конца́, той спасе́тся». И что сея́ за́поведи добре́е [есть]? Христо́с бо есть Госпо́дь терпя́щим. Терпе́ние же до коли́ка су́дится: Бра́тие, а́ще у́бо све́сте, подо́бно бы и нам о сем обрести́ сло́во, на утвержде́ние вам. Не бо есть еди́но терпе́ние, но вся́кой де́тели иско́мо есть. Терпе́ние бо стяжа́вый вся́кой де́тели каса́ется. Ра́дует бо ся в ско́рбех, и в беда́х благоиску́сен. В напа́стех весели́тся, на послуша́ние гото́в. В долготерпе́нии красе́н, в любви́ испо́лнен. В досажде́нии благодари́т и в кото́рах смиря́ется. В безмо́лвии му́жествен, и в пе́нии безле́ностив. В посте́х гото́в и в моли́твах терпели́в. В де́лех непоро́чен, и во отве́тех скор. В житии́ приле́жен, в слу́жбах ве́сел. В хожде́нии красе́н, и во о́бщей бра́тии благ. В сове́тех сла́док, в бде́ниих тих и тщали́в. На стра́нныя приле́жен, и немощны́м разуми́тель. На целова́ние пе́рвый притека́тель, и в поразуме́нии трезви́тель, и на вся́ку вещь востани́в. Терпе́ние бо стяжа́вый, стяжа́л есть упова́ние, и вся́ким де́лом благи́м укра́шен есть таковы́й. Те́мже со благи́м терпе́нием возопие́т сицевы́й ко Христу́, глаго́ля: «Терпя́ потерпе́х Го́спода, и внят ми».