Блаже́н муж име́яй любо́вь Бо́жию, я́ко Самого́ Бо́га в себе́ но́сит: я́ко Бог Любы́ есть, и пребыв́аяй в любви́, в Бо́зе пребыва́ет. Име́яй любо́вь Бо́жию, всегда́ с Бо́гом пребыва́ет: любы́ бо Бо́жия вон изго́нит страх. Име́яй любо́вь Бо́жию, ни еди́ного же возненави́дит когда́, ни ма́ла ни вели́ка, ни сла́ва и несла́вна, ни ни́ща ни бога́та, но всем в попра́ние бу́дет, все терпи́т и все престраду́ет. Име́яй любо́вь Бо́жию не возно́сится, ника́когоже не горди́тся, ни еди́ного же не оклевету́ет, но и оклевета́ющых отвраща́ется. Име́яй любовь, не ревну́ет, ни зави́дит, ни опла́зует и не ра́дуется о согреше́нии ине́х, не потаза́ет согреши́вшаго, но и печа́лует и заступает, не пре́зрит бра́та в напа́стех, но спостраду́ет и соумира́ет. Им́еяй любо́вь, не сумни́тся к бр́ату вни́ти, но я́ко с Бо́гом водворя́ется. Име́яй любо́вь, стра́нна не отри́нет, но я́ко свой уд окриля́ет рука́ма. Име́яй любо́вь, во́лю Бо́жию твори́т, и и́стинен есть учени́к Его́: Сам бо Влады́ка наш рече́: От сего́ уве́дят вси, я́ко Мои́ ученицы́ есте́, а́ще лю́бите друг дру́га. Име́яй любо́вь в себе́, николи́же не стро́ит себе́, ни глаго́лет своего́, себе́ ничто́же нари́ча, но все ели́ко е́же и́мать – о́бще всем предлага́ет. Име́яй любо́вь, никого́же чужда́го не помышля́ет, но вся своя́ твори́т. Име́яй любо́вь, не раздража́ется, не горди́тся, не возно́сит себе́ на гнев, не ра́дуется в непра́вде ни во лжи, не укаря́ет врага́ ни еди́ного же су́ща, токмо еди́наго диа́вола. Име́яй любо́вь, все терпи́т, блажи́т, все долгопретерпе́вает.

Блаже́н у́бо стяжа́вый любо́вь, и с нею́ отше́д ко Христу́, я́ко Той све́дый прии́мет и́ в не́дра Своя́: обе́щник бо а́нгелом есть и со Христо́м ца́рствует, любо́вный рачи́тель. То́ю бо и Бог Сло́во на зе́млю прии́де, то́ю бо и рай отве́рзеся нам, и вы́шний путь на небеса́ показа́ся всем. Врази́ су́ще и Бо́гови то́ю смири́хомся. Подо́бно у́бо ре́хом, я́ко Бог любы́ есть, и пребыва́яй в любви́, в Бо́зе пребыва́ет.