По́дробну созида́ется град, и по соверше́нии быва́ет брань. Не мо́жет недоуме́яй я́коже уме́яй держа́ти лук, и не мо́жет отроча́ тещи́ то́чно му́жеви. И а́ще возложи́ши отроча́те бре́мя вы́ше си́лы, вреди́т е́. И а́ще не ради́ши наказу́я его́, не потре́бно бу́дет. Тако́жде у́бо и новона́чальнаго подоба́ет с разсужде́нием стро́ити, а не тщесла́вием налага́ти тя́гости. Ниже́ па́ки не ради́ти о души́ его́, но я́ко прему́др сый помы́сли, ка́ко покори́лся есть бо́льшу себе́: и та́ко по́дробну наста́виши черне́честву. Но ни на страсть сребролю́бную, но поучи́ бра́та на де́ло. Зане́ Сердцеве́дец есть Бог, я́ко от Бо́га хотя́ возда́ния упова́ния прия́ти, научи́ его́ страсте́м де́тельным и чи́стому житию́ хожде́нием. А́ще у́бо по сконча́нии обы́чных пра́вилех и по бде́нии, хо́щеши побде́ти сам, покори́вый же ся поспа́ти ма́ло ‐ даждь ему́ поко́й, не бо мо́жет отроча́ я́коже есть рече́но, то́чно му́жеви тещи́. А́ще и бо́ле есть телесе́м, не отмещи́ его́, но потруди́ся с ним долготерпя́ о нем, я́ко прему́др де́латель насади́в сад благ в виногра́де свое́м. Тща́нием вся́цем да бу́дет ти поста́вити те́ло его́ же́ртву жи́ву и уго́дну Бо́гови.
Блюди́ же ся и сам от сроди́тель, покори́вшихся Го́спода ра́ди, еда́ когда́ дома́шняя своя́ возненави́девше, чужа́я погуби́м. Но поста́вим телеса́ на́ша же́ртву жи́ву и уго́дну Бо́гови, да не осужде́ни бу́дем. И́мже апо́стол препри́т глаго́ля: «Иму́ще о́браз благоче́стия, си́лу же свою́ иму́ще отме́тну». Вся́кому у́бо благо́му де́ланию научи́ повину́вшагося, и́мже пи́сано есть: «А́ще изведе́ши честно́е от недосто́инства, я́ко уста́ Моя́ еси́». Наста́вницы бо ве́ка сего́ не гнуша́ются гну́сия млады́х, ни оскверня́ются со детьми́ живу́ще, воздая́ния ра́ди челове́ча. Кольми́ па́че подоба́ет соверше́ным име́ти боля́щаго Бо́га ра́ди. Пи́шет бо: «Та́ко глаго́лет Госпо́дь, блаже́н име́яй в Сио́не се́мя, и дома́шняя во Иерусали́ме». И ты у́бо возлю́блене, не гнуша́йся наказа́ния оте́ц твои́х, роди́вшых тя о Го́споде. Глаго́лет бо апо́стол: «Повину́йтеся игу́меном ва́шым и покаря́йтеся: ти́и бо бдят о душа́х ва́шых, я́ко сло́во возда́ти хотя́ще, да с ра́достию се творя́т, а не воздыха́юще, неполе́зно бо се есть вам». Те́мже и во пса́лме глаго́лет: «Пока́жет мя пра́ведник ми́лостию свое́ю и обличи́т мя, еле́й же гре́шник да не нама́стит главы́ моея́».
Боля́щеи бо по пло́ти, ну́дят свое́ естество́ соблюсти́, та́кожде и вра́чеве повелева́ют. То кольми́ па́че подоба́ет нам послу́шати, здра́вие душа́м на́шим извести́вшым. Восхо́щем же уве́дети за́поведи Христо́вы, ра́ди Свята́го Духа. Ми́ра бо сего́ испове́дницы, приле́жно тре́буют чте́ний не су́щая му́дрости. То кольми́ па́че подоба́ет нам учи́тися и уве́дети словеса́ Бо́жия, на спасе́ние душ на́шых: «И́бо блажи́т Дух Святы́й пыта́ющых сведе́ния Его́, и всем се́рдцем и́щущым Его́». И па́ки глаго́лет: «Блаже́ни лю́дие ве́дущеи воскликнове́ние». Послу́шай же апо́стола глаго́люща: «Вся́ко у́бо наказа́ние ко мне, ны́не не мни́ши ра́дости су́щая, но печа́ль: напосле́док же плод ми́рен, те́мже обнаже́нием, возда́ст ти ся пра́вда». Ами́нь.