Бра́тие, а́ще кто от гове́йныя бра́тии, стоя́ в собо́ре или́ ходя́, омраче́нием свои́м побежде́н паде́тся внеза́пу, не подоба́ет диви́тися о сем, ни чуди́тися. Подоба́ет же о сем Бо́га моли́ти от всего́ по́мысла, я́ко да покры́ет ны по вся́ческим. А́ще рабо́таем Ему́ и́стинным се́рдцем, не оста́вит нас искуша́тися па́че си́лы, ни иску́сны бы́вша оста́вит нас. Та́ко пи́шет: «Вы́шняго положи́л еси́ прибе́жище твое́. Не прии́дет к тебе́ зло, и ра́на не присту́пит к телеси́ твоему́, я́ко а́нгелом своим запове́сть о тебе́, сохрани́ти тя во всех путе́х твоих и на руках во́змут тя, да не когда́ преткне́ши о ка́мень ногу твою́, на а́спида и васили́ска насту́пиши, и попере́ши льва и зми́я, я́ко на мя упова́, избавлю́ и́ и покры́ю и́, я́ко позна и́мя мое́. Воззове́т ко Мне, и услы́шу и́. С ним есмь в скорби, изму́ и прославлю́ его́, и долготу́ дний испо́лню и́, и явлю́ ему́ спасе́ние мое́». И па́ки: «Наде́ющиися на Го́спода, я́ко гора́ Сио́н не подви́жится в век живы́й во Иерусали́ме». И па́ки: «Юн бех и состар́ехся, и не ви́дех праве́дника оста́влена». А́ще у́бо омраче́ние быва́ет от теплоты́, горьки́я кручи́ны , или́ гно́ем умно́жившемся, быва́ют же и от теле́сныя не́мощи пренемога́ния. Есть же егда́ и диа́вол пригото́вает что таково́, егда́ не возмо́жет дея́нием или словесе́м победи́ти бра́та. Но Го́сподь не оста́вит его́ искуше́ну бы́ти па́че си́лы, но искуше́нием утверди́т ему се́рдце его́. Но и се не про́сто есть, ния́коже получи́ прино́сит бра́ту, но егда́ вражды́ по́мыслы напо́лнит на бра́та своего́. Други́й же предае́тся в ру́ки вра́жия по Бо́жию попуще́нию, егда́ от горды́ни уве́рится свои́ми преле́стными по́мыслы врагу́, и рече́т: се бысть искуше́н собо́р , и несть подо́бен тебе́ никто́же на земли́. Друго́е же па́че притра́ннее сего́: ку́пно и́же напису́я своя́ исправле́ния, а не Бо́гу принося́й че́сти, я́ко от Бо́га по́мощь ему́ бысть. Таковы́й у́бо предае́тся в ру́ки искуша́ющых и́, да нака́зан быв, позна́ет свою́ не́мощь, и да не забыва́ет по́мощи ре́кшаго: «Я́ко егда́ вся сотвори́те, глаго́лите я́ко непотре́бни раби́ есмы́». «Вознося́й бо себе́, смири́тся». Невозмо́жно бо есть боящемуся Бога вои́стинну, побеждену бы́ти диа́волом. Диа́вол бо на́чнет позыбова́ти им , но искорени́ти его́ не мо́жет.

Я́коже бысть и при И́ове. Пре́дан бысть искуша́ющему, но не дерзну́ косну́тися ему́ Бо́жия ра́ди повеле́ния. И про́чее прии́м власть косну́тися ему́ я́коже восхоте́, кроме́ души́ пра́веднаго. Победи́ бо пра́ведный супроти́внаго то́кмо любо́вию, ю́же имя́ше к Бо́гу вои́стину. Да́стьжеся и апо́столу пострека́тель а́нгел сатани́н, но не победи́ его́ любве́ ра́ди возлюби́вшаго Иису́с Христа́, Его́же имя́ше в души́ соверше́ною любо́вию. И по не́мощи бо пло́тьстей есть побежде́ние, ни во тщети́ есть скорбь еже ти есть впа́сти в грех, но е́же во искуше́ниих обрести́ся неиску́сну быв́шу.

Ви́дим бо я́ко ни над свиния́ми вла́сти и́мать враг без Бо́жия повеле́ния. Аз бо ви́дех ино́го на столпе́ стоя́ща благода́ти ра́ди. А́ще же бы у́бо име́л власть, не бы́ ли в том часе́ раскопа́л его́ со столпо́м ? Те́мже уве́дехом я́ко сокрушена́ бысть кре́пость его́, си́лою Честна́го Креста́ Спа́са на́шего Иису́с Христа́.

Не убо́йся у́бо ра́бе Христо́в, ниже́ да смуща́ют тебе́ по́мысли твои́, ниже́ отступа́й ме́ста, в не́мже предспе́еши о Го́споде. Ве́руем же ре́кшему: «Ва́шы и власи́ главни́и изочте́ни суть. И се дах власть наступа́ти на зми́я и на скорпи́ю и на всю си́лу вра́жию, и ничто́же вас вредит́». «Стре́лы бо младе́нец бы́ша я́звы их. Изнемого́ша в них язы́цы их». Егда́ у́бо впаде́ши во мно́жество ско́рбей, не уныва́й, проро́ку глаго́лющу: «Го́споди, в печа́ли помяну́хом Тя». И па́ки: «Мно́ги ско́рби пра́ведным, и от всех их изба́вит я́ Госпо́дь». Темже и други́йжде глаго́лет: «Воззри́те на пе́рвыя ро́ды, и ви́дите, кто упова́ на Го́спода и оста́влен бысть, или́ кто призва́, и презре́н бысть, или́ кто пребы́в в стра́се Его́ и посра́млен бысть. Я́ко Щедр и Ми́лостив Госпо́дь, и оставля́ет грехи́ и спаса́ет во вре́мя ско́рби». Да а́ще у́бо страх Бо́жий столп есть кре́пок от лица́ вра́жия, не сни́ди у́бо уны́р , но и́нако преступи́ я́ко к Милосе́рдому, со проро́ком возопи́й к благосты́ни Его́: «На Тя Го́споди упова́х, да не постыжу́ся во ве́ки, пра́вдою твое́ю изба́ви мя и изми́ мя. Приклони́ ко мне у́хо Твое́ и ускори́ изъя́ти мя. Бу́ди ми Бог и Защи́титель, и в до́му прибе́жища спаси́ мя, я́ко держа́ва моя́ и прибе́жище мое́ еси́ Ты. И́мени ра́ди твоего́ Го́споди наста́виши мя и препита́еши мя, и изведе́ши мя от се́ти сея́ ю́же сокры́ша о мне. Я́ко Ты еси́ Господи Защи́титель мой, и в ру́це Твои́ предаю́ тебе́ дух мой. Изба́вил мя еси́ Го́споди Бо́же И́стинный». Я́ко да и Сам рече́ к тебе́ Писа́нием: «Та́ко есмь с тобо́ю и не оста́влю и не пре́зрю тебе́». Крепи́ся и мужа́йся глаго́лет Госпо́дь. Не убо́йся от лица́ Его́ и не устраши́ся пред Ним, я́ко с тобо́ю есмь глаго́лет Госпо́дь от зача́тия твоего́. Похвали́ у́бо человеколю́бие Его́, и припади́ к Нему глаголя: «Возринове́н преклони́хся па́сти, и Госпо́дь подъя́ мя. Кре́пость моя́ и пе́ние мое́ Го́сподь, и бысть мне во спасе́ние». Тому́ сла́ва во ве́ки. Ами́нь.