Вопро́с: Чим упражня́ется брань блу́дная, воздержа́нием ли бра́шенным или́ ни?
Отве́т: Не то́кмо воздержа́нием бра́шенным, но е́же воздержа́ти и о́чи не ви́дети су́етных. В разли́чне бо очесе́ нарече́тся прелюбодея́ние, е́же Госпо́дь сведе́тельствует глаго́ля: Ами́нь глаго́лю вам, я́ко всяк возревый на чужу́ жену́ по́хоти ради, уже́ прелюбы́ сотвори́л есть с не́ю в се́рдцы свое́м. Се прелюбодея́ние искорену́ется е́же до́лу име́ти о́чи, а ду́шу горе́ к Бо́гу. Удержа́вый утро́бу, удержи́т и взор. Лют бо преда́тель есть высо́кое о́ко: про́чая бо стра́сти вма́ле и́мут раждеже́ние иску́сное, о́чная же брань и пото́м не́мощь сотвори́т души́, и по́хотию рабо́тает ума́. Я́коже се что глаго́лю возлю́блении:
Слы́шав кто сла́дкий глас, глас мусики́йский, и мимои́дет. Пото́м же слы́шав глас во́пля и пла́ча и порази́т сла́дкий глас мусики́йския. Та́кожде па́ки вку́сит кто ме́ду, пото́м же вку́сит что горча́йша, и го́ресть порази́т сла́дость медвя́ную. Или́ паки возвоня́ет благоуха́нием каце́м, пото́м же возвоня́ет смра́дом злым, и злосмра́дие погаси́т благоуха́нную воню́. Или́ кто косну́ся сла́дости студеней, пото́м же косну́ся теплоте́ врю́щей, и теплота́ укро́пная притупи́т сту́день водну́ю. Высо́каго же очесе́ брань есть, и су́щий огнь сий и не су́щий попаля́ет ума́. Но и в снех привиде́ния творит помыслом. Бе́си бо пи́шут напа́сть в по́мыслех, и развраща́ют ум и преобразу́юще напа́сть пред очи́ма челове́ку. Сего́ ра́ди и проро́к мо́лится глаго́ля: Отврати́ о́чи мои́ да не ви́дита суеты́.
На мета́ние бо по́хотное смуща́ет ум беззло́бивым, побежде́нием оче́сным. Дея́ние бесо́вское преобража́ет напа́сти, впису́ет в по́мысле твое́м добро́ту же́нскую ю́же когда́ ви́дел буд́еши. Но ты что сицево́? Введи́ посреде́ страх Бо́жий, и помяни́ во гро́бе лежа́щая, воспомяни́ же и день исхо́да твоего́, егда́ хо́щет душа́ твоя́ разлучи́тися от те́ла, и поразуме́й стра́шный и тре́петный глас, и́же услы́шат о пра́веднем Судии́ неради́вшии и за́поведей Госпо́дних несоблю́дшии: Отлучи́теся от Мене про́клятии во огнь ве́чный, угото́ванный диа́волу и а́ггелом его́, и в безконе́чную му́ку. Сия́ помы́сли и помяни́, раста́ется жела́ние по́хотное по́мысла твоего́, я́коже раста́ется воск от лица огню́. И не мо́гут бо ста́ти проти́ву стра́ху Бо́жию иже ли у́бо несупроти́вится по́хоти. Но без возбране́ния оставля́ет на мета́ние очи́ма. Вся́ко я́ко и по́мысл ко страсте́м уклони́лся есть, и а́ще срам не бы был челове́ческий, мно́жицею убо растле́л бы те́ло свое́. И а́ще у́бо не воспря́нет таковы́й ни положи́т пред очи́ма свои́ма стра́ха Бо́жия, то не ме́длит и те́ло растле́ти. Се бо бе́су вложи́вшу на мета́ние очи́ма. Други́й же бес ходя́й во след, есте́ственый соде́ловает грех. А́ще бо ви́дит вторы́й пе́рваго, я́ко возмогло́ есть возвы́сити душу на мета́ние оче́сное, а́бие прии́дет сове́туяй грех пло́тию соде́лати. На́чнет бо глаго́лати к побежде́ному и́мени. Се предложе́нием то́кмо согреши́л еси́ и се́рдцем прелюбы́ сотвори́л еси́. Се же и за́поведи отпа́л еси́, и грех преступле́ния за́поведи вмени́ттися. Ны́не же у́бо соверши́ жела́ние свое́, то́жде бо есть е́же и похоте́ти. Наслади́ся у́бо своего́ жела́ния. Ты же у́бо возлюблене ве́ры не ими́ ему́, глаго́лет бо апо́стол: Не бо, но и ра́зум его́ вельми́ свем. Си́ми бо хо́щет улови́ти ду́шу твою́. Послу́шай же и при́тчи о том.
Ю́ноша не́кий бе в стране́ ко́ей, и сочта́в себе́ три де́вы, и отъи́де во страну́ дале́че. И уме́длившу ему́ та́мо, и поя́т еди́на деви́ца му́жа, и втора́я та́кожде блуд сотвори́. Тре́тия же рече́: А́ще ся бых челове́к не стыди́ла, то и аз бых му́жа поя́ла. И нача́т деви́ца му́читися сицевы́ми по́мыслы. И по сих па́ки воспомяну́ оше́ствие ю́ноши от него́же обруче́ние взят, и прии́мши покая́ние и пла́кася. Я́ко бо всем взы́де неприя́знено помышле́ние на се́рдце ея́, егда́ же прии́дет ю́ноша, от трие́х дев ка́я ему́ прия́тна бу́дет? Не после́дняя ли, помы́слившия, а не сотвори́вшия, но и пла́кавшися о неприя́зненем помышле́нии?
Сего́ ра́ди у́не есть рещи́ к поуча́ющему бе́су, о сотворе́нии гре́шнем. А́ще и о́ком отпадо́х и се́рдцем прелюбы́ сотвори́х, но се́рдце сотво́ршее прелюбы воздыха́ньми неизглаго́ланными струи́, и отпа́дшаго же очесе́ слеза́ми отмы́ю. Я́ко се́рдца сокруше́на и смире́на Бог не уничижи́т. Тому́ сла́ва во ве́ки. Ами́нь.