Брат иска́ше своего́ бра́та, и обре́т его́ и рече́ к нему́: «Где бе бра́те?». Он же отвещав́ рече́: «О́нсий брат скорбь имя́ше, и шед уте́ших его́». Отвеща́в же брат рече́ ему́: «А́ще Го́спода ра́ди шел еси́, мзду и́маши. Суть бо и друзи́и и́же мня́тся утеша́юще и спостра́ждуще, и не ве́дят я́ко паче оскорбля́ют и на тщету́ гряду́т». Брат же отвеща́в: «Да ка́ко то есть, и́же та́ко утеша́ет бра́та своего́ на тщету́?». Отвеща́в же брат: «А́ще есть духо́вно утеша́яй, не на тщету́ прихо́дит, но на по́льзу вели́ку. А́ще ли же и плотску́ю име́яй печа́ль, той не по́льзует». Брат же рече́: «Хоте́л бых уве́дати обоя́ вку́пе глаго́лы: еда́ ка́ко хотя́й по́льзовати бра́ту моему́ тщету́ ему́ сотворю́?». Рече́ же ему́ брат его́: «Пои́щеве о́ба вку́пе от Го́спода щедро́т Его́, я́ко да по́слет благода́ть Свою́ в сердца́ на́ша: без благода́ти бо Его́ не во́зможно есть челове́ку приити́ на исправле́ние де́тельное».
Послу́шай: Что у́бо благода́ти поспешеству́ющи, плотско́е помышле́ние име́яй, гряды́й на утеше́ние бра́ту сицева́я предложи́т: «Что и́маши бра́те мой?». Он же к нему́ рече́: «У иконо́ма проси́х тре́бования и не дасть ми». Или́ ино́го бра́та приведе́т, я́ко без правды́ опеча́лившаго и́. И сия́ слы́шав прише́д си на утеше́ние, возгласи́т глаго́ля: «Что ра́ди та́ко укаря́ет ны? И мне бо в другу́ю то́жде сотвори́, и без че́сти мя сотвори́. А на́ми чтомь и не разумева́ет, и не хо́щет себе́ содергну́ти. Или́ мня́тся игу́мени си зде, я́ко зде то́кмо еди́ни спаса́ются. Или́ зде со́лнце восхо́дит, или́ зде то́кмо спаса́ется челове́к. Отъиду́ у́бо отсю́ду и избу́ду челове́ка сего́». И па́че словесы́ си́ми бра́ту тщету́ сотвори́т. А́ще же обря́щутся и друзи́и тому́же по́мыслу рабо́тающе, па́че разслабля́т по́мысл бра́ту. Мно́жицею же приключит́ся и вину́ на блево́тины приити́. А до́ндеже упию́тся, не престаю́ще пию́т и словесы́ пререка́юще. Прилучи́т же ся я́ко и ру́ки возложа́т друг на дру́га сва́ром. Друзии же на местех почива́ют от мно́гаго пи́тия.
Брат же рече́: «Хоте́л бых уве́дати духо́вныя глаго́лы». Он же отвеща́: Духо́вны, егда́ хо́щет ити́ на утеше́ние бра́тови, пре́жде да́же не изы́дет из ке́лии своея́, и ста́нет на моли́тве я́ко да Госпо́дь упра́вит путь его́. И прише́д к двере́м бра́та своего́, толкну́в поклони́тся. И восклони́вся вни́де и ста́нет на моли́тве.
По сих же ся́дета молча́ща. Пото́м же глаго́лет господи́н келии к бра́ту: «До́бре прии́де, прише́л бо еси́ благослови́ти нас». И отвеща́ет брат: «Аз благословлю́ся гове́нием твои́м. Молю́тися благослове́не Го́сподом, что есть е́же и́маши?». Он же принесе́т словеса́, или́ бра́та кото́раго оскорби́вшаго и́, брат же у́бо то слы́шав глаго́лет: «Го́споди, помози́. Враг не хо́щет, да бы кто безмо́лствовал». Па́ки же отвеща́в глаго́лет:
Оба́че возлю́блене где несть ско́рби? Где несть труда́. Мирска́я чадь не тружда́ют ли ся? И во́ини во бране́х не стра́ждут ли? То ка́ко мы пренемога́ет? Я́ко еди́ни в ско́рбех су́ще. Мирска́я чадь о мирски́х тружда́ются. Духо́внии же, о духо́вных пеку́тся. Но мирска́я печа́ль смерть соде́ловает, а боже́ственая печа́ль, покая́ние прино́сит в жизнь ве́чную. И мы у́бо печа́льни су́ще не пренемога́ем. Пи́шет бо: «Печа́ль терпе́ние соде́ловает». И па́ки: «Печа́ль ва́ша на ра́дость преложи́тся». Еда́ когда́ услы́шим: «Наче́нше ду́хом, ны́не же плотска́я соверша́ете».
Помы́сли я́ко ми́ра отве́рглся еси́, и во́ли своея́: и сло́ва не и́маши ктому́. То не уже́ ли своему чре́ву порабо́тился еси́ и свое́й во́ли? Та́ко ли похвала́ нам есть, я́ко благода́ти слове́сныя хо́щем монасты́рския отступи́ти? Но поне́же враг по́мыслы смире́ныя му́дрости укра́л есть. И сего́ ра́ди стра́сти зело́ востаю́т на ны. Не гне́вайся на глаго́лющаго и́стину к тебе́. Стражда́ бо за тебе́ сия́ глаго́лю. Отку́ду у́бо бысть вина́ вся́ко, бра́шна ли ра́ди или́ пи́ва я́зва си бысть, или́ е́же не удержа́ти сло́ва? Толи́ко обеща́лся еси́ да Христа́ приобря́щеши, и па́ки страстьми́ дре́вними хо́щеши погрузи́ти ума.
А́ще бо воздержа́ния не лю́бим и печа́ли не терпи́м, и своея́ во́ли не отсече́м: несть нам дерзнове́ния глаго́лати се мы оста́вихом вся и по Тебе́ идо́хом. Помы́сли, ка́ко бе егда́ прии́де ко врато́м монасты́рским, паля́ ду́хом на страх Бо́жий. Но ра́вно хо́щеши глаго́лати, я́ко челове́цы разврати́ша ум. Хо́щеши ли да ти покажу́ возлю́блене, я́ко от на́шего уны́ния вина́ бысть? Лот в Содо́мех живяше и не поги́бе с ними. Гио́зий же проро́ку Елисе́ю служа́ше, и той согреши́. Та́коже и Саму́ил у Илии́ пребыва́ние и со ча́дома его́ пожи́т, то́жде согреши́ста, сей же спасе́н бысть, я́ко возлюби́ Го́спода вои́стину. Иу́да же Искарио́тин со ученики́ Го́споду Бо́гу после́доваше, и преда́сть Учи́теля и Го́спода сла́вы .
Не прии́дем у́бо во вра́жию во́лю, вложи́вшаго без вины́ вину́ о отвраще́нии душ на́шых. И́мамы бо о́браз от боже́ственных писа́ний, е́же себе́ внима́ти кому́ждо. А́ще бо и с пра́ведными поживе́м, или́ с гре́шными. С пра́ведными бо живу́ще, пра́ведно и преподо́бно поживе́м. А́ще ли со гре́шники, то потщи́мся да на́ми и они извлеку́тся на путь спасе́ния, благода́ти споспешеству́ющи.
А́ще ли же хо́щеши глаго́лати, я́ко не́мощен есмь и изнемога́ю: послу́шаем боже́ственых Писа́ний, и поревну́им житию́ святы́х оте́ц, я́ко да исцеля́тся душа́ на́ша. И не то́кмо у́бо егда́ слы́шим прии́мем покая́ние, и пома́ле го́ршее сотвори́м. Та́ко бо прие́мляй сло́во, николи́же плодови́то бу́дет, не бо и́мут ко́рене в себе́. Вся́ко бо дре́во не творя́щее плода́ добра́, посека́емо и во огнь вмета́емо быва́ет, я́ко непотре́бно.
Послу́шаим наказа́ния муж боя́щыхся Бо́га, и́же на здра́вие наставля́ют душа́. И не уподо́бимся тем и́же своея́ во́ли хотя́т послу́шати, то́кмо да зле постра́ждем всу́е, прилепи́вшеся [в] зломы́сленем по́мысле. Рече́ бо еди́н от святы́х ста́рец: А́ще ви́диши ю́наго свое́ю во́лею восходя́ща на не́бо, удержи́ его́: по́льза бо бу́дет ему. Веждь же и се: А́ще и ве́тха су́ща вре́мены, ю́на же смы́слом. Глаго́лет бо в при́тчах: «Путие́ несмы́сленых пра́ви пред ни́ми, му́дрый же прии́мет сове́т». Послу́шаим же глаго́лющаго: «Ю́нии покаря́йтеся ста́рцем. Вси же вку́пе смире́ною му́дростию облецы́теся, я́ко Госпо́дь гордым противля́ется, смире́ным же благода́ть дае́т». Суть бо н́ецыи и целя́ще мудри су́ще, и не хотя́ще покори́тися су́щым мудреце́м, иму́щым разу́м Бо́жий. Сих апо́стол суеслове́сникы и ум погуби́вшых нарече́т глаго́ля: «Суеслове́сницы бо непокори́ви и уму́ погуби́теле». Друга́го же мно́жицею пону́дит по́мысл глаго́ля: «Юн еси́ на ста́рость пока́ешися». И а́ще пости́гнет и ста́рость, па́ки принесе́т ему́ по́мысл глаго́ля: Ны́не состаре́лся еси́ поко́я тре́буеши.
Те́мже до́бре есть возлю́блене, со стра́хом и трепе́том рабо́тати Го́сподеви по вся дни. Кто бо ны ся испоручи́т, я́ко состаре́емся или́ я́ко обря́щем ум благ, а́ще отсе́ле не ради́м о свое́м спасе́нии.
Послу́шаим у́бо Бо́га глаго́люща: «Бди́те и моли́теся, я́ко не ве́сте дне ни часа́». Мы же свои́м уны́нием, тя́жко помышля́ем си благи́й яре́м Госпо́день. Коли́ко ти ся мнит возлю́блене, в ми́ре разли́чно воздыха́ющых и своя́ ча́да под стре́хою помета́ющых? Други́х же си́льных ча́да в плен впа́дша и в рабо́ту про́даны, и рабо́тающым ме́ньшым их на земли́ чужде́й? Друзи́и же зно́ем и ины́ми скорбьми́? А нам несть ли се вели́ко, я́ко и́мамы покро́в сей и́же Госпо́дь нам дарова́ и безпеча́лие земны́х веще́й? Та помина́ем, и не отве́рземся благода́ти Бо́жия и благи́х дел его́. Я́ко сподо́бил ны есть благо́му Его́ и́гу. Почто́ проси́хом и не дасть ны? И кто весть, я́ко на по́льзу се нам бысть?
Рцем же и се: и еще́ у́бо ели́коже весть кто нас самого́ ослу́шавшася Бо́га, и па́ки пока́явшася. И ви́дев Госпо́дь смире́ние его́, то не милосе́рдова ли?
О игу́менех же, и́же Го́споду оста́вим я́: вси бо предста́нем на суди́щи Христо́ве. Бог бо лицеме́р несть. Воста́ни у́бо и препоя́шися, и не впади́ в по́мыслы. Послу́шай глаго́лющаго: «Да не бу́деши побежде́н злом, но победи́ благи́м зло́е».
Го́ре мне гре́шному люби́миче мой, коли́ко претерпе́ за ны Госпо́дь сла́вы . Что мо́жем досто́йная принести́ Его́ страсте́м, я́же претерпе́ нас де́льма? Припаде́м у́бо к Нему́ от всего́ по́мысла. Терпе́ния прося́ще от благосты́ни Его́. Мно́гими скорбьми́ подоба́ет нам вни́ти в Ца́рство небе́сное.
Рече́ бо Спас ученико́м Свои́м: «Яќо вы воспла́четеся и возрыда́ете, а мир возра́дуется. Вы же печа́льни бу́дете, но печа́ль ва́ша в ра́дость бу́дет. Жена́ егда́ ражда́ет печа́ль и́мать, я́ко прии́де годи́на ея́. Егда́ же роди́т отроча́, ктому́ не по́мнит ско́рби за ра́дость, я́ко роди́ся челове́к в мир. И вы же у́бо ны́не печа́льни бу́дете». Па́ки же: «Узрю́ вы и возра́дуется с́ердце ва́ше, и ра́дости ва́шея никто́же не во́змет от вас».
И утверди́в бра́та сло́во и́стинны по да́ру благода́ти, и о́ба вку́пе похвали́та Бо́га. А́ще ли же и лучи́тся вку́пе я́сти и пи́ти со вся́кою чистото́ю удержа́ния ра́ди плотска́го, а не упива́ния ра́ди ви́ннаго, в не́мже есть блуд. И сотвори́в де́ло Госпо́дне, возврати́ся в ке́лию свою́, сла́вя Бо́га о по́льзе бра́та своего́. Тому́ сла́ва во ве́ки веко́в. Ами́нь.