Мни́ше, не си ли ся обеща́л Христу́ угоди́ти? То ка́ко напа́стей и скорбе́й находя́щых ти от супоста́та не терпи́ши хра́борски, ни старе́йшины своего́ наказа́ния не прие́млеши? Ка́ко хо́щеши спасе́н бы́ти, а́ще же есть без наказа́ния ему́же прича́стницы бы́ша вси: раби́ есте, а не сы́нове. Бие́н ли еси́? Ра́дуйся, я́ко бие́н еси: безако́нно ли еси́ бие́н? То и́злиха ти есть мзда.
Апо́столи бо спасе́ние ми́ру пропове́дающии, сквозе́ гра́ды я́ко злоде́и бие́ми быва́ху, и не гне́вахуся, ни ропта́ху, но па́че ра́довахуся я́ко сподо́бишася за и́мя Госпо́дне безче́стие прия́ти. Но проти́ву сему рече некто от нерадивых: Печа́лую, я́ко си́це приключи́ло ми ся есть по сицевы́х труде́х.
Се ли тя оскорбля́ет, ра́бе Госпо́день? То от сего́ уве́ждь себе́: А́ще си́це по сели́цех ле́тех страсте́м удоле́л еси́, или́ пора́довался еси́ наше́дшу досажде́нию, а не возне́сл еси́ себе́ о сла́ве бы́вшей? А́ще мнит кто быва́емо искуше́ния нивочто́же су́ще? Сам ся прельща́ет, искуше́ние бо ко́рмника во вре́мя бу́рное явля́ется. Велича́яйбося и глаго́ляй, толи́ко лет и́мам в черне́честем житии́, деле́с же запове́данных не показа́в, ни о́браза чи́стаго жития́ показа́в, таковы́й бо но́сит худо́жество, его́же хи́трости не навы́че.
Состаре́л ли ся еси́ во о́бразе? Я́ко хитр ко́рмчия пре́жде рече́ннаго жития́ сый, о́браз бу́ди юным и грубым. А́ще ли же новосажде́н еси, покори́ся ста́рцем: и́бо землена́го царя́ во́ини, старе́йшинам и князе́м повину́ются, не то́кмо стра́ха ра́ди, но и со́вести де́льма.
А́ще бо они́ по пло́ти нарече́нии во́ини, вся́ко тща́ние показу́ют я́ко да угодя́т повеле́вшым им, то ка́ко ты такову́ честь и жизнь отве́ргл еси́ ю́же име́, и влеко́мь еси́ таце́ми страстьми́ поги́бель небреже́нием и непокоре́нием и Христо́ва наказа́ния отмета́ешися? И то́кмо похвалы́ и сла́вы соверше́ных оше́лец и́щем, трудо́в же и́миже че́стни быва́ют убега́юще.
Почто́ толи́ка труда́ и безмо́лвия погуби́ еди́нем часо́м, е́же бе име́л? А́ще себе́ сам погуби́ши, то кто есть ми́луяй тя? Се ли ти есть похвала́? Се ли ти есть искуше́ние: да́ а́ще и ма́ла случи́ттися скорбь, да и о́браза отве́рглся еси́ и жития́ отлучи́тся, и вооружа́ешися уны́нием свои́м на врага́? Ни, бра́те, не даждь плещу́ супроти́вному, но проти́вися и бори́ся с ним и пробежи́т от тебе́. Мню бо я́ко прии́м заступле́ние, не ра́дуется о твое́м поро́це, сло́во за тя хотя́ да́ти Бо́гови.
Прииди́ у́бо в себе́ возлю́блене, и возврати́ся в поко́й свой, и облецы́ся в броня́ ве́ры и наложи́ шлем спасе́ния. И приими́ мечь духо́вный, е́же есть глаго́л Бо́жий. Бу́ди и о́браз кро́тцей страсти, подобноду́шней бра́тии, да почудя́тся и ме́ньшины твоя́ о твое́м неизрече́ннем беззло́бии и терпе́нии.
Пора́дуетжеся и Дух Святы́й живы́й в тебе́, о твое́м му́жестве блазе́м. И а́ще ма́лыя сия не терпи́ши напа́сти, ка́ко вели́кую понесе́ши? А́ще [ко отроча́те недово́лен еси́ ], то соверше́на му́жа ка́ко ся хо́щеши я́ти [и] бра́ти? И сло́ва не мо́жеши понести́, я́зву ка́ко претерпи́ши? За лани́ту ударе́ния и ра́ны не терпи́ши, ка́ко крест свой понесе́ши? Ка́ко ли и́маши насле́довати сла́ву на небесе́х со глаго́лющими: Сия́ вся приидо́ша на ны и не забы́хом Тебе́, и не непра́вдихом в заве́те Твое́м. И па́ки глаго́лет: Я́ко Тебе́ ра́ди умерщвя́еми есмы́ весь день, и вмени́ша ны я́ко овца́ на заколе́ние.
Хоте́х же умолча́ти возлю́блении студа́ ра́ди лица́ моего́, но боле́знь се́рдца моего́ ну́дит мя глаго́лати. Ей бра́те мой возлю́бленый, забы́хом ли е́же претерпе́ всех Влады́ка Госпо́дь нас ра́ди? Досажде́ние прия́т и уничиже́н бысть. Слы́шася: Бе́са и́маши, и не прогне́вася. Слы́шася льстец и зауше́н бысть, тро́стию биен бысть и ра́спят бысть, о́цта с же́лчию вкуси́, копие́ прия́т в ре́бра Си: сия́ вся претерпе́ на́шего ра́ди спасе́ния.
Го́ре мне, го́ре мне окая́нному и гре́шному, я́ко без отве́та есмь Что реку́ или́ что возглаго́лю, Тебе́ све́дущему та́йны се́рдца моего́? Очи́сти мя Бо́же недосто́йнаго, и́же весма́ с про́ста досажде́ния или́ сло́ва не хотя́ща за Тя слы́шати. Толи́ко претерпе́вый нас де́льма, кто ся не пла́чет по мне, гове́нию покро́в зло́бою стяжа́вшу? Словесы́ бо черне́ствую, де́лы же прогне́ваю. Вои́стину у́сше любы́ мно́гих душ.
Воспря́нем ко Го́споду молю́ вы, не отмета́ет же Госпо́дь хотя́щых спасти́ся, но поспе́шествует им. Рцем и мы с проро́ком: Обрати́ся душа́ моя́ в поко́й твой, я́ко Госпо́дь добро́ сотвори́ тебе́. Да и мы сподо́бимся услы́шати рече́нное Го́сподом: Се сын мой мертв бе и оживе́, изгы́бл бе и обре́теся. Тому́ Го́споду Бо́гу на́шему сла́ва во ве́ки. Ами́нь.