Возлю́бленне, а́ще получи́ши предспея́ние, я́ко ста́ти на вы́шнем степе́ни, не забыва́й смире́ныя му́дрости, да а́ще когда́ прилучи́т ти ся соступи́ти со степе́ни, обря́щеши путь и не впаде́ши во грех ди́вен. Се бо приключи́тся кому́ от своего́ неразу́мия, поне́же не восхоте́ разуме́ти дарова́вшаго благода́ть. А́ще бо бы́ша разуме́ли благода́теля, то не бы́ша ослу́шалися повеле́ния его́. И а́ще бы́ша не ослу́шалися, то не бы́ша впа́ли в напа́сти. «Всяк бо вознося́йся, смири́тся, а смиря́яй себе́, вознесе́тся». Те́мже и во пса́лме глаго́лет: «Видех нечести́ваго превознося́щася и вы́сящася я́ко кедр Лива́нский. И мимоидо́х, и се не бе его́. И взыска́х его́, и не обре́теся ме́сто его́». И па́ки глаго́лет: «Госпо́дь го́рдым проти́вится, смире́нным же дае́т благода́ть». И апо́стол глаго́лет: «Не высо́кая му́дрствующе, но во смире́ние веду́щеся». И други́й и́нде глаго́лет: «Не вознеси́ себе́, да не низ спаде́шися, и наведе́ши души́ своей безче́стие. И покры́ет Госпо́дь та́йны твоя́, и посреде́ собо́рища сложи́т тя».

Те́мже потщи́мся бра́тие, смири́ти своя́ душа́ пред Бо́гом, я́ко да вознесе́т ны. Той бо есть вознося́й от земли́ ни́ща, и от гно́ища возводя́ убо́га. Иже бо не хот́яй себе́ смири́ти во́лею благода́ти ра́ди, той, нево́лею смири́тся. Пи́шет бо в И́ове: «От Того́ держа́ва и кре́пость, Той ми есть честь и ра́зум. Сведя́й сове́тники плене́ныя, судия́ землены́я ужаси́. Посажда́яй царя́ на престо́ле, и препоя́сая по́ясом чре́сла ему́. Посыла́яй свяще́нники плене́ныя, си́льны же земли́ опреврати́, измену́я устне́ ве́рных, ра́зум же ста́рец уве́дев, излива́яй бе́зчестие на старе́йшины, смире́нныя же исцели́». Возлю́бим у́бо смире́нную му́дрость, возлю́блении, я́ко Сам Госпо́дь рекл есть: «Возми́те яре́м Мой на себе́, и уве́дите от Мене́, я́ко кро́ток есмь и смире́н се́рдцем. И обря́щете поко́й душа́м ва́шым. Яре́м бо Мой благ есть, и бре́мя Мое́ легко́ есть». Ей Влады́ко Человеколю́бче, ей Ми́лостиве, зело́ яре́м Твой благ есть и бре́мя Твое́ легко́ есть, вся́кому приходя́щему рабо́тати Тебе́ и́стинным се́рдцем, я́ко Тебе́ подоба́ет вся́ка сла́ва, честь и поклоне́ние, ку́пно со Безнача́льным Отце́м, и со Святы́м Ду́хом, ны́не и пр́исно, и во ве́ки веко́в. Ами́нь.