Муж дни своя́ в ле́ности живы́й, сам ся прельща́ет, и отъину́дь не помышля́ющу ему́ о благи́х, я́же угото́вал есть Бог пра́ведным, ниже́ мук помина́я, я́же угото́вал есть Госпо́дь гре́шником, но и без стра́ха себе́ пасы́й. В такове́м соде́ловает лука́вый, вся́ко жела́ние плотско́е, и не мо́жет разуме́ти таковы́й, яце́м же о́бразом и врата́ гра́дная входя́щых и́ми: по́хоть бо вше́дши в по́мысл его́, покры́ет о́чи ему́.
С подви́жники же разли́чно бо́рется враг. Пе́рвое же, е́же сконча́ти беззако́ние. Ума́лит беззако́ние лука́вый пред очи́ма его́, па́че же по́хоть жела́емую. Толма́ ума́лит ю́ пред очи́ма его́, яце́м же о́бразом пролие́т кто ча́шу студены́ воды́ на зе́млю. По сконча́нии же безако́ннем, та́ко разжже́т лука́вый беззако́ние пред очи́ма его́, впа́дшаго в ру́ки его́, зело́ воста́вив нань во́лны неча́емыя. Мно́жицею же и при́тчами ополчае́тся нань. Сицева́я вложи́т ему́ в по́мысл, и рече́т ему́: «Что сотвори́л еси́, вотще́ тружда́яся? Ны́не же скаж́у ти кому́ уподо́бишася дела́ твоя́. Яце́м же о́бразом кто виногра́д насади́в, и отре́бл сохрани́т и до́ндеже сотвори́т плод. Но обыма́в и напол́нит де́львы вина́, и посе́м воста́в напра́сно, и взем се́чиво сокруши́т де́львы и проли́то быв ви́но поги́бнет. Сему уподо́билася суть дела твоя». Сия́ вложи́т лука́вый бра́ту, хотя́ его́ воврещи́ во глубину́ неча́яния.
Сия́ у́бо ты разуме́й, возлю́бленне. Бежи́ от греха́. А́ще ли же и уя́т бу́деши грехо́м, то не лени́ся, воспряни́, воста́ни и обрати́ся к Бо́гу всем, я́ко да спасе́шися. Рцы же и к лука́вому по́мыслу: «А́ще и де́львы сокруши́х и вино́ пролия́х и погуби́х е́, но и виногра́д есть и еще́, и Влады́ка Долготерпели́в и Ми́лостив есть. И упова́ю на благосты́ню Его́. И поспеше́ствующу ми благода́ти Его́, па́ки потреблю́ виногра́д и напо́лню де́лвы его́, я́коже и пре́жде». Глаго́лет бо Сам проро́ком Иса́ием: «А́ще бу́дут греси́ ва́ши я́ко оброще́ни , я́ко снег убелю́ я́. И а́ще суть я́ко багряни́ца, я́ко руно́ убелю́ я́. А́ще хо́щете и послу́шаете мене́, блага́я земли́ сне́сте. А́ще ли не хо́щете, ни послу́шаете мене́, ору́жие вы поя́ст. Уста́ бо Госпо́дня глаго́лаша сия́». Тому слава во ве́ки веко́в. Ами́нь.