Бра́те, поручи́л ли ся еси́ души́, препоя́ши чре́сла своя́ я́ко мужь, по́двиг бо прино́сит на ма́ле, соверше́ных душ де́ло приими́ и трезви́ся у́бо зело́, я́ко мно́га ме́рзость быва́ет ве́щию. Не пре́зри, но о всем естестве́ да бу́дет ва́ше житие́ вку́пе, еда́ когда́ от неудержа́ния ва́шего все́ет что свои́м де́лом враг ослуша́ния ра́ди благопослушли́вому: преступа́яй бо обы́чая чисто́тныя и целому́дреныя и послушли́выя от злостра́стия, я́ко без му́ки таковы́й не быва́ет. Виногра́д бо его́ от Содо́мы, и ро́зга его́ от Гомо́ры. Но ни послу́шай сицевы́я ве́щи, не и́мать бо спасе́ния от Бо́га, я́ко ни Ио́сифу уподобися, ни блаже́ней Суса́не поревнова́.
А́ще у́бо Ио́сиф и в рабо́ту про́дан бысть, то еги́птяныни не повину́яся льще́нию, ни сме́ртная преще́ния не устраши́ша боголю́бнаго. Овогда́ у́бо льстя́щи ю́ношу, запове́даше да́ти ему́ дая́ния мно́га, овогда́ же кро́ткими словесы́. Неповину́ющужеся ему́, сме́ртию преща́ше ему́ и му́ками. Он же ничто́же небрежа́ше па́че целому́дрия: послушли́в же сый по всему́, всего́ то́кмо еди́ного отве́ржеся, о́браз на́шего жити́я поло́жь.
Та́коже и блаже́ная Суса́на смерть испроси́ себе́ па́че, не́жели согреши́ти пред Бо́гом. Вели́ку же му́ку себе ́исхода́тайствова, оклевета́вый пра́ведную.
Те́мже и апо́стол глаго́лет: Со стра́хом и тре́петом свое́ спасе́ние соде́ловайте. Зело́ бо належи́т враг на правове́рныя, но попира́емь быва́ет ве́рными. Подоба́ет же бо́льшым о́браз бы́ти ме́ньшым вся́цем нра́вом, я́ко да не да́мы вины́ и́щущым вины́. А́ще бо мы бу́дем безчи́нни, то ка́ко послуша́нию научи́м други́я? А́ще бо мы бу́дем или́ лихоя́дцы, или́ пия́ницы, или́ сребролю́бцы, то ка́ко ме́ньшая научи́м воздержа́нию и терпе́нию? А́ще бо мы бу́дем облази́ви или многоречи́ви, или́ нестро́йни, то ка́ко и́ны научи́м чистоте́ и терпению?
Го́споду ре́кшу: «Блаже́н иже сотвори́т и научит, той велик нарече́тся в Ца́рствии небе́снем». И апо́стол па́ки глаго́лет: «О́браз бу́ди ве́рным». Рече́ши ми у́бо: «А́ще и аз не творю́, но бра́ту глаго́лю поле́зное», то ка́я се по́льза есть возлю́блене, а́ще мы ины́я наказу́ем, зла́я же твори́м? Го́споду глаго́лющу проро́ком Иезеки́илем: «Кому́ждо вас путе́м свои́м сужду́, глаго́лет Адонаи́ Госпо́дь». Не сотвори́хом, естество́м побежде́ни есмы́ ‐ ны́не да не побежде́ни бу́дем. Облени́хом себе ‐ но ны́не да не лени́мся, но про́чее да обрати́мся ко Го́споду о уче́нии же и наказа́нии. О еди́ном за́поведь и́мамы Ду́хом Святы́м: «Обрати́в бо, рече́, гре́шника от ле́стнаго пути́, спасе́т ду́шу от сме́рти и покрыва́ет мно́жество грехов.
Те́мже у́бо возлю́блении, ника́коже подоба́ет суди́ти нам ме́ньшым на́шым. Пи́шет бо: «Не суди́те, да не осужде́ни бу́дете». Име́йте о́браз смире́ныя му́дрости, бра́тие, проро́ка Само́иля: не вознесе́ бо ся се́рдцем на Илию́ иере́я, е́же бе слы́шал от Бо́га грех му́жеви. Запове́дает же и апо́стол Петр глаго́ля: «Не то́кмо еди́нем благи́м и послушли́вым покаря́йтеся, но и стропотли́вым». Се бо благода́ть есть, е́же со́вести ра́ди Бо́жия терпи́т кто печа́ль, стражда́й без пра́вды. Ка́я похвала́ есть согреша́юще и стра́ждуще терпе́ти! Се вы есть благода́ть, на се бо и зва́ни есте́, спасе́ние у́бо себе́ бу́дем возлю́блении, гото́ви су́ще о вся́ком словеси́, е́же а́ще услы́шим. Па́че же предстоя́щым рцем, е́же отпусти́ грехи́. Я́коже бо и вода́ угаша́ет огнь, та́ко и покая́ние чи́сто угаша́ет я́рость и гнев. И препри́т тя и́же при Илии́ ты́сящник, и́же смире́нием умоли́в проро́ка спасе́н бысть. Послуша́ние у́бо име́й возлю́блене вся́чески о Го́споде, я́ко ви́дев Госпо́дь него́рдый ум твой и вознесе́т тя. Храни́ же словеса́ Его́ до конца́ и не преступи́ рече́ния уст Его́, и бу́дет с ва́ми реки́й: «Иде́же еста́ два или́ трие́ со́брани во и́мя Мое́, ту есмь и Аз посреде́ их». Тому́ сла́ва во ве́ки. Ами́нь.