Во о́бще с живу́щими ю́ными мни́хи, разли́чно бо́рется враг. Не́которому у́бо от них вложи́т во ум не́нависть на ручно́е де́ло. И которо́е глаго́лю де́ло? Благоде́ти быва́ющи и поспешеству́ющи, зау́тра воста́нет брат, и сотвори́т моли́твы в ке́лии свое́й, и пото́м во́змет ручно́е де́ло, тогда́ ненави́дяй добра́ де́мон приведе́т ему́ ум на уны́ние. А́ще у́бо терпи́т брат де́лая и поуча́яся, отжене́т уны́ние, благода́ти поспешеству́ющи, и не побежде́н быва́ет брат уны́нием. А́ще ли же прише́дшу уны́нию, и не подвиза́ется терпе́нием, но а́бие разслабе́в умо́м на́чнет глаго́лати в себе́: «Днесь я́ко еди́ною обленю́ себе́, не могу́ бо ничто́же. И что и́мам сотвори́ти? Но пребу́ду пра́здне днесь, да ся поко́ю, у́тро же пону́жду себе́ на де́ло, и сотворю́ проти́ву двема́ де́ньма де́ло». Та́же пра́здне пребу́дет брат пе́рвый день, и сотвори́т уже́ еди́наго дне де́ло. Та́кожде и на у́трений день, мно́жайшим уны́нием облени́т бра́та, я́коже и вчера́, и принесе́т ему́ па́мять настоя́щаго дне и мимоше́дшаго. Тогда́ про́чее обдержи́мь брат по́мыслы, воста́нет и оста́вит де́ло свое́, и на́чнет твори́ти де́ло я́ко не де́ло, я́ко мно́жицею и от ке́лии изведе́т его́, и сотвори́т его́ в похо́ды исходи́ти. И сим искуша́ет лука́вый мни́ха, от своея́ о́бласти.
Иногда́ же и и́нако побежда́ется со бра́том враг. Послу́шай же сея́ вины́ и прему́др бу́деши, и даждь сла́ву Бо́гови, и уве́дав соблюди́, я́ко уве́да ла́яние его́, я́ко лев бо рыка́я хо́дит, ища́ кого́ поглоти́ти. И не́коему бо бра́ту еди́ному си живу́щу, и седя́щу в ке́лии, и даст ему́ лука́вый прилежа́ние, единоду́щно на ручно́е де́ло его́, па́че же рещи́, отню́ду же ражда́ется страсть сребролю́бия. Тогда́ про́чее уя́звена бы́вши душа́, сотвори́т зло́е сребролю́бие, глаго́лю же, и пригото́вит мни́ха на у́тренее и вече́рнее рукоде́лание. Па́че же рещи́, я́коже возмо́жно и моли́твы и собо́ра не брещи́, но де́ло то́кмо еди́но име́ти сребролю́бия ра́ди. И егда́ воскле́плют в собо́р, по́слежде всех прии́дет брат в собо́р, и пре́жде всех изла́зит. Сия́ у́бо ве́дый возлю́бленне блюди́ себе́, да не злей льсти покори́в себе́, отпаде́ши своего́ утверже́ния. И да не продолжи́м сло́во се, разруши́в ему жи́лы сребролю́бием, и на́чнет поважда́ти его́. Брат же не разуме́в окроче́ния дия́воля и стра́сти, на́чнет глаго́лати пререку́я, де́ло толи́ко де́лах в благослове́нем сем де́ле, и мзды не и́мам, я́коже вам по́льза и труд и́мате безчи́слен. Оба́че лу́чше есть пра́здну бы́ти, не́жели зла́я де́лания брещи́, но иду́ и ино́й хи́трости научу́ся, от нея́же по́льзуюся, и нае́м дово́лен прииму́.
Подо́бно же и се искуша́ем быва́ет сатано́ю, свои́м неве́данием, мужь бо хитр вся в ме́ру де́лает, и́мже о́бразом, я́ко да бы моли́твою в собо́ре свое́м пребыва́л, и моли́тва ве́ры даст ему́ кре́пость и благода́ть, во вся́ком де́ле бла́зе. А́ще бо вино́ю де́ла, прии́дет в ду́шу чуждий по́мысл, и возвы́сит челове́к по́мысл свой, или сребролю́бием, или́ тщесла́вием, или́ смеховесе́лием, и гнусным волшве́нием, или́ неве́рствием, и чревообъяде́нием, и пия́нством и похотьми́, подо́бными сему́, и а́ще разсе́ет в души́ свое́й, о преждерече́нных страсте́х, а́бие порабо́тится челове́к страсте́м. Не бо есть тя́жко ручно́е де́ло мни́ху, гоня́щему дово́льная и подо́бная, но ему́же а́ще похо́щет душа́ кото́рым страсте́м, то на том челове́це сбу́дется пи́санное: И́мже бо кто побежде́н быва́ет, тому́ и порабо́тится. А́ще бо сребра́ ра́ди де́лаеши, побежде́н быва́еши. Егда́ же избы́точествуеши, дай неиму́щему ти́хостию, ти́ха бо да́теля лю́бит Бог. И па́ки: Ваш избы́ток, о́нех есть исполне́ние, я́ко да бу́дет ра́вно и то́чно име́ние. Я́коже пи́шет: Мно́гое не умно́жится, и ма́лое не ума́лится. Госпо́дь же да напра́вит сердца́ ва́ша на страх Свой. Я́ко Тому́ сла́ва во ве́ки веко́в. Ами́нь.