Люби́мицы, бу́дем я́коже хра́брии во́ини, за Царя́ на́шего гото́ви умира́юще. Егда́ у́бо в ми́ре бе́хом, и в жите́йских ве́щех пожи́хом, сих не пострада́вше. Зави́дящу же нам искуша́ющему нас лука́вому, и обрати́ти хотя́щу от пути́ живо́тнаго, на сл́абость, и на пренемога́ние водя́щу нас, да не угоди́вше спасе́м себе́. И ели́ко же ны́не а́ще лука́вый на ны воста́нет, и мы у́бо обря́щемся в терпе́нии, хра́бри, и приле́жни, и готови, хотя́ще до сме́рти терпети Христо́ва ра́ди упова́ния, то вся ко́зни его́ разоря́тся. И́мамы бо Защи́тителя на́шего и Побо́рника Христа, И́же нам скорбя́щим, и упова́ющим Нань, терпе́ние подаст, и о́нех посрами́т, и нам победи́тельная пода́ст, е́же есть Царство Господа ради приемлемое.

Бу́дем я́ко и накова́льна бие́ми, не вдаю́ще себе́ ни во о́браз сла́бости, ни в пренемога́ние, ни в непра́вды, ра́ны и напа́сти на себе́ прие́млюще Го́спода ра́ди, да удо́бь победи́м проти́внаго диа́вола. И́бо Госпо́дь наш та́ко изы́де ве́ка сего́, бие́мь, заплева́емь, последи́ же укоре́ние, и смерть на Кресте́ беззако́нными му́чимь бысть, и вся претерпе на́шего ра́ди спасе́ния, нам оставля́я пи́смены жизнь. Да яце́м же путе́м ско́рбным, и напа́стным, и сме́ртным Сам пройде, таце́м же путе́м да про́йдут ве́рующии Вонь вои́стину, и соприча́стницы Ему́ хотя́щии бы́ти. Да я́коже и Сам мно́гих ра́ди щедро́т, по́слежде у́мер на Кресте́, распе́нся и у́мер победи́, и умертви́ и осуди́ грехи́, пло́тию потреби́в надлежа́щия си́лы. Я́коже рече́но есть: «Совле́кся нача́л и власте́й, и на Кресте́ умертви́, и обличи́в их на нем». Та́кожде и мы все его́ нападе́ние и ско́рби лука́ваго, хра́борски приле́жно и до сме́рти прише́дше, а́ще терпи́м, тогда́ победи́м сопроти́внаго, ве́ры ра́ди и терпе́ния, е́же ко Го́споду Иису́су Христу́ и́мамы. И та́ко иску́сни обре́тшеся, и отсю́ду избавле́нию сподо́бимся, и та́мо ве́чныя жи́зни насле́дницы бу́дем. И́бо на духо́вное подвиза́ние, или́ на сопроти́внаго побе́да, стра́стию и сме́ртию быва́ет, стра́ждуще и умерщвля́юще у́ды теле́с на́ших, Го́спода ра́ди единоду́шно, победи́м сопроти́внаго.

Те́мже вся ско́рби и напа́сти и воста́ния вся лука́ваго, не в боле́знех име́ти, но в добро́ вре́мя, терпе́ния жела́юще, и Госпо́дню смерть всегда́ пред очи́ма иму́ще, я́коже рече́но есть Го́сподем, по вся дни крест нося́ще еже есть смерть, и́дем во след Его́. И та́ко претерпи́м вся́ку скорбь, или́ сокрове́нную или́ явле́нную. Сме́рти бо ра́ди Госпо́дня терпе́ния ча́ем, и пред очи́ма и́мамы, и на то по́мысл всегда́ жела́ет. Христа́ бо жела́ет насле́довати, и е́же Зань пострада́ти, после́дуяй жела́нию Его́, я́коже и Христа́ лю́бящии сим явля́ются, егда́ вся́ку скорбь находя́щую им до́бле и единоду́шно претерпя́т Бо́жия ра́ди любве́. Молим же у́бо Го́спода да́ти нам ра́зум и сказа́ние во́ли Его́, и приле́жно соверши́ти вся́цем прилежа́нием, и долготерпе́нием с ра́достию, е́же то и Сам да́рует, укрепи́в нас на вся́ко благоугожде́ние, да иску́сни и досто́йни и терпели́ви обре́тшеся, спасе́ние ве́чное получи́м, о Христе́ Иису́се Го́споде на́шем. Ему́же сл́ава во ве́ки веко́в. Ами́нь.