Ве́ра ма́ти есть вся́кому бла́гу де́лу. И то́ю стя́жет кто себе́ обетова́ние Спа́са на́шего Иису́са Христа́, я́коже пи́шет: «Без ве́ры невозмо́жно есть угоди́ти Бо́гу». Многоплодови́тое бо стяжа́ние диа́волу нари́чется безве́рие, е́же есть ма́ти вся́кому де́лу неприя́знену. От того́ же ражда́ется двоеду́шие, е́же есть неве́рствие. Мужь бо двоеду́шен, несоверше́н во всех путе́х его́. А́ще изы́дем вне пусты́ни, не почи́ют но́ги на́ша. И а́ще до́йдем жили́ща в пусты́ни живу́щих, то блажи́м их. Бра́тие, а́ще не се́ем, то ка́ко по́жнем, плодо́в Плодода́вцу не принося́ще? Многоплодови́ти ка́ко мо́жем бы́ти, ско́рби не терпя́ще? Ка́ко поко́й обря́щем, в пусты́ни не терпя́ще? Ка́ко прии́мем мзду стра́нствия на́шего, нищеты́ и тесноты́ не терпя́ще? И́стинное бога́тство ка́ко обря́щем, досажде́ния и язв и укоре́ния, не изво́ливше? Стопа́м Влады́чним, ка́ко и́мамы после́довати, в покоре́нии о Го́споде ста́рцем недержи́ми су́ще, но от ме́ста на ме́сто прехо́дим?
Пре́жде до́лжен есть ко́ждо уве́дати сие́ от свои́х по́мысл, что ра́ди и кото́рыя ра́ди вины́ хо́щет оста́вити свое́ ме́сто, в не́мже живе́т? Еда́ когда́ труда́ хотя́ убежа́ти, во вну́тренюю пусты́ню пожене́тся, хотя́ легча́е труд име́ти в пусты́ни? Еда́ когда́ па́ки добра́ ненави́дящих бесо́м, ре́вностию и за́вистию уя́звен бу́дет, я́ко не́коему бра́ту предспе́ющу, ви́димаго нача́ла не получи́вшу, и сего́ ра́ди хо́щет оста́вити ме́сто? Еда́ когда́ труда́ бе́гая де́тельнаго, и в поко́рстве недержи́мь сый, жили́ща ино́го и́щет? Еда́ когда́ насле́дований земны́х ища́, ме́сто свое́ хо́щет оста́вити? По́мыслы бо возвеща́ют сия́. А́ще утверди́мся и испыта́ем уве́давше окроче́ние на́шея стр́асти, сему́ не после́дуем, да не впаде́м в ру́ки неприя́зненых бесо́в. Пре́жде у́бо утверди́м себе́ кре́пце нерастле́нным умо́м, я́ко пои́стине ли по Бо́зе есть быва́емое, и нерастлева́емым умо́м? Творя́й бо вещь сию́ кроме́ сове́та, подо́бен есть му́жу гоня́щу пти́цы перна́ты свои́ма нога́ма, та́ко творя́й сове́т о себе́. Сове́т же благ, соблюда́ет за́поведи Бо́жия.
Что же ли есть глаго́лати к сим? Бди́те люби́мицы, до́ндеже потре́ба есть. Есть же я́ко и пра́вды де́ля воополча́ется враг. И а́ще обеща́ется брат отлучи́тися ме́ста, кова́рствует враг, улови́ти его́ хотя́ на ме́сте не́коем. А́ще же изжену́т вас челове́цы, го́рькия ра́ди за́висти, или́ ну́дяще приобщи́тися делесы́ чужди́ми, я́же не суть уго́дна Бо́гови, и пре́йдем на друго́е ме́сто, дерзнове́ние и́мамы к Бо́гу, Го́споду ре́кшу: «А́ще изжену́т вы из гра́да сего́, бе́гайте в други́й». О прехожде́нии же, и́же научи́ рек Спас: «Не преходи́те от до́му в дом». И па́ки: «Во́ньже град а́ще вни́дете, та́мо пребыва́йте».
А́ще ли же во́ли на́ша хо́щем твори́ти, ка́я де́тель се есть? А́ще ли же старе́йшины ва́ша отлуча́ют вас, дади́м ме́сто, сопроти́вим же ся диа́волу па́че. Та́ко бо творя́ше Дави́д со иноплеме́нники боря́ся, от лица́ же Сау́лова отлуча́шеся.
А́ще ли же безмо́лвствуеши до́бре в пусты́ни, и обы́дет тя по́мысл пре́йти в жите́йския? Отвеща́й ему́ брань мирску́ю, и «су́щая что суть в жите́йских?».
И а́ще во о́бщем житии́ безмо́лвствуеши до́бре, и обы́дет тя по́мысл в пусты́ню ити́? Отвеща́й ему́ брань и труд пусты́нный.
А́ще ли же в пусты́ни безмо́лвствуеши до́бре, и обы́дет тя по́мысл, ити́ во о́бщее житие́ и мно́жайшую бра́тию? Отвеща́й ему́ по́двиг о́бщаго жития́, ку́пно же и воздая́ние.
Не покори́м же себе́ до конца́ свои́м помысло́м, не бо ве́мы что поле́зно бу́дет на́м, я́коже и Прему́дрость глаго́лет: «Не превознеси́ себе́ сове́том души́ своея́, да не расхи́щена бу́дет душа́ твоя́ я́ко юне́ц, и ли́ствие твое́ поя́ст, и плоды́ твоя́ погуби́т, и оста́вит тя я́ко дре́во су́хо». Спасе́ние же быва́ет во мно́зе сове́те.
И мно́жицею хо́щеши глаго́лати: «Собла́зна ра́ди и оглаго́лания хощу́ бежа́ти отсю́ду». Пожди́ у́бо да сове́тую ти глаго́л: хо́щеши ли убежа́ти собла́зн и клеве́т, положи́ две́ри усто́м твои́м о Го́споде, и о́чи твои́ отврати́ е́же не ви́дети су́етных, и сим победи́ши обое́ вку́пе: клевету́ у́бо молча́нием, собла́зны же хране́нием о́чию. А́ще ли же сих не победи́м, то а́може и́дем, в себе́ но́сим супоста́ты на́ша. Сия́ победи́ возлю́бленне, и и́маши поко́й име́ти, иде́же а́ще ся́деши.
Но мно́жицею хо́щеши глаго́лати: «Я́ко позна́но бысть житие́ мое́, и ле́ность моя́, все́ю бра́тиею, те́мже не могу́ жи́ти на ме́сте сем. А́ще ли же и аз жела́ю доброде́тели, но челове́цы си́и, с ни́ми же аз живу́, такови́ не суть». Послу́шай же возлю́бленне ны́не, ты у́бо благо́е твори́, и у́зриши я́ко Госпо́дь Бог угоди́т со́вести твое́й, и бра́тии твое́й я́же суть с тобо́ю. Ка́ко хо́щеши оста́вити ме́сто, и бра́тию соблазни́ти, я́же суть с тобо́ю? Бе́гаеши у́бо поноше́ния челове́ческаго, и гряде́ши во и́но ме́сто, иде́же сла́ву получи́в, помяне́ши ле́та пе́рваго ти недоста́тка, проро́ку вопию́щу: «Поноше́ние прича́я душа́ моя́ и страсть». Зело́ бо приключи́тся поноше́ние и укоре́ние, па́че челове́к Го́спода ра́ди, на очище́ние грехо́в быва́емое. И препира́ет нас проро́к глаго́ля: «Я́ко во смире́нии на́шем помяну́ ны Госпо́дь, и изба́вил ны есть от враг на́ших».
Но отню́ду же вложи́л есть сия́ сопроти́вный, воста́в победи́ся с ним, да и ра́зум твой ме́ньшее уве́дав исправле́ние, на́чнет име́ти е́, и сим прии́мет сла́ву вели́ку от Го́спода, Спа́су на́шему Иису́су Христу́ ре́кшу: «Бу́дут после́днии пе́рвии, и пе́рвии после́днии». Отне́леже бо оскверне́на ри́за, и омове́на бу́дет, не отлучи́тся со скверна́выми. А́ще же за́вистию или́ ре́вностию, нарече́т кто чи́стое скверна́во, ве́ры ему́ не и́мут, виде́ние бо ри́зное обличи́т его́. «Омы́еши мя, рече́, и па́че сне́га убелю́ся».
К предлежа́щим ти разруше́нием, возврати́ши си по́мысл па́ки на пе́рвая зла́я, глаго́лет бо Писа́ние: «Го́ре напая́ющему бли́жняго своего́, обра́щения му́тна». И па́ки: «Оста́вльше пути́ пра́выя, ходи́ти по путе́м те́мным, и веселя́щихся о злых, и ра́дующеся о совраще́нии зле, и́хже путие́ стро́потни, искривле́на колеса́ их, дале́че тя сотворя́т от пути́ пра́ваго, и чу́жда пра́ведныя мы́сли». Те́мже глаго́лет: «Не пости́гнут бо их ле́та живота́. А́ще бо бы́ша ходи́ли в пути́ бла́ги, обрета́ли бы́ша у́бо стези́ пра́ведных гла́дки, и бла́зи бу́дут жи́тели на земли́, и незло́бивии же оста́нут на ней. Путие́ же нечести́вых поги́бнут, беззако́ннии же попо́лзнутся им. Сы́не, мои́х зако́н не забыва́й, глаго́лы же моя́ да блюде́т твое́ се́рдце». Бо́гу на́шему сла́ва во ве́ки веко́в. Ами́нь.