Нача́ло развраще́ния души́ мни́хове, смех и де́рзость. Егда́ же в сицевы́х ви́диши себе́ о́ мни́ше, веждь себе́ я́ко во глубине́ потопля́ема, и не преста́й моля́ся Бо́гови, я́ко да изба́вит тя от сме́рти сея́, смех бо и де́рзость, погубля́ет мни́ха. Рече́ бо не́кий от ста́рец о де́рзости, я́коже ветр зно́йный есть, растлева́я плоды́ мни́хом. О сме́се же ны́не послу́шай: Смех бо блаже́нство плаче́вное вон изго́нит. Смех не созида́ет и не храни́т, но и погубля́ет, и созида́ния разруша́ет. Смех Ду́ха Свята́го печа́лит, ду́ши не по́льзует, и те́ло растлева́ет. Смех доброде́тели прого́нит, не и́мать бо па́мяти сме́ртныя, ни поуче́ния му́кам. Отъими́ Го́споди от мене́ смех, и да́руй ми плачь и рыда́ние, его́же при́сно и́щеши от мене́. Нача́ло же есть пла́чу, еже све́дети кому́ждо себе́. Бу́ди же плачь наш не по челове́ку, ни е́же све́дати челове́ком, но по Бо́зе, Све́дущаго та́йны серде́чныя, я́ко да Тем Саме́м блажи́ми бу́дем. Бу́дем же у́бо све́тли лице́м, ра́дующеся о Ду́се Святе́м, и о дарова́ниих Госпо́дних пла́чущеся и рыда́юще, смы́слом Бо́га моля́ще, я́ко да соблюде́т нас от вся́кия злы́я вещи, и да не лиши́т нас Ца́рствия Своего́, и благи́х Его́ я́коже угото́вал есть лю́бящим Его́. Плачь созида́ет и храни́т. Плачь ду́шу омыва́ет и чи́сту соверша́ет. Плачь целому́дрие ражда́ет, похоте́ния же отсека́ет, доброде́тели же исправля́ет. И что про́чее ктому́ глаго́лю? Плачь Бо́гом блажи́мь есть, и а́нгелы утеша́емь быва́ет. Те́мже и глаго́лаше еди́н от учени́к Госпо́дних: Смех ваш в плачь да преложи́тся, и ра́дость ва́ша в жа́лость. Удержи́теся вседержи́мою руко́ю Бо́жиею, и вознесе́т вы.

Что же сотворю́ аз гре́шный, неради́в ни пла́кався с покая́нием? Глаго́лю бо а не творю́. О́ лю́те мне! О́ лю́те мне я́ко неражду́! О́ лю́те мне, ка́ко леню́ся о свое́м спасе́нии! О́ люте мне ка́ко све́дый согреш́аю! Вем твори́ти добро́, и не уклоня́юся от зла. О́ лю́те мне, я́ко аз безотве́тен есмь, помышля́ю предстоя́ния одесну́ю, дела же творю́ су́щих ошу́юю! Тебе́ Го́споди Еди́ному Благо́му и Незло́бивому, испове́даю вся моя́ грехи́. Мне у́бо Го́споди молча́щу, а Ты вся све́си. Но поне́же Ты рекл еси́ проро́ком: Глаго́ли ты пре́жде грехи́ своя́ да оправда́н бу́деши. Согреши́х Го́споди, согреши́х, и несмь досто́ин возре́ти и ви́дети высоту́ небе́сную, от мно́жества непра́вд мои́х. Я́ко еди́ныя ра́ди по́хоти, ве́чный огнь презре́х, и Ца́рства небе́снаго недосто́ин бых. Что у́бо аз сотворю́ лени́вый в челове́цех? Пла́чу себе день и нощь, до́ндеже вре́мя есть прия́тно слеза́м. Да́руй ми Го́споди сле́зы покая́ния, Еди́н Благ и Ми́лостив, я́ко да в них помоли́вся, очи́щу скве́рну се́рдца моего́. О́ лю́те мне, что сотворю́ гее́нне о́гненей, и тме кроме́шней, идеже плачь и скре́жет зубом? О люте мне, что сотворю́ окая́нный, грозе́ безконе́чней и му́це, и ядови́тым и неусыпа́ющим черве́м? О́ лю́те мне, согреши́в мно́го, что сотворю́ преще́нию а́нгельскому и́же над му́ками су́ть, я́ко стра́шни и безми́лостиви суть? Кто даст главе́ мое́й во́ду и очи́ма моима исто́чник слез, и сед пла́чуся день и нощь. И молю́ Бо́га Его́же прогне́вах. Согреши́ла еси́ душе́, но пока́йся, се бо дни́е на́ши прехо́дят я́ко стень. И еще́ ма́ло, и отъи́деши отсю́ду, и стр́ашная ме́ста хо́щеши доити́ душе́ моя́. И не полага́й день за день, но обрати́ся ко Го́споду Бо́гу своему́, Благо́му и Долготерпели́вому. О́ лю́те мне, прогне́вах святы́я а́нгелы, и храни́теля души́ моея́ скве́рными дея́нии мои́ми, не даждь себе́ поко́я душе́ моя́, да не у́мгнет зе́ница о́ка твоего́, припад́ающи Человеколю́бцу Бо́гу, да́ти тебе́ по́мощь свы́ше.

Бра́тие, стра́шно и тре́петно хо́щем путе́м тем проити́. Никто́же бо та́мо помощи́ нам мо́жет, ни роди́тели, ни бра́тия, ни дру́зи, ни ужики, ни бога́тство, ни сла́ва. Не лени́мся у́бо о благи́х деяниих, я́же обря́щем во вре́мя беды́. Воспря́нем в ны́нешнем веце, да не по разлуче́нии те́ла на́шего, причастя́тся нам кня́зи тмы. И кто мо́жет изба́вити нас от рук их, аще нази обря́щемся, кроме́ Бо́жия покро́ва? Лю́ти суще, и безми́лостиви кня́зи те́мнии, ни царя́ боя́тся, ни мучителя чтут, ни ма́ла, ни вели́ка, но то́кмо благоче́стием живущих, от лица их устраша́тся, и отлуча́тся пристра́шни суще. Путь же преходя́ще со мн́огим тща́нием. Я́коже пи́шет: Я́ко благода́ть и ми́лость на избра́нных Его́. И па́ки глаго́лет: Пра́ведных у́бо ду́ши в ру́це Бо́жии, и не прико́снется их му́ка, преди́ бо и́дет пред ни́ми пра́вда их, и сла́ва Бо́жия осен́ит их. Тогда́ возопию́т, и Бог услы́шит их, И еще́ глаго́лющим им, рече́т, се ту есмь, ве́рен бо есть запове́давый. Блаже́н и́же обря́щется свобо́ден, в час разлуче́ния теле́снаго. Не лени́мся у́бо бра́тия моя́ возлю́бленная, ниже́ влеце́м к себе́ чужди́х на иска́зу, путь бо той вся разруша́ет. Пости́гшу бо ча́су тому́ разлу́чному, по́хоти увяда́ют, пи́ща и тщесла́вие почи́ет, бога́тство и сребролю́бие исче́знет. Прише́дшу бо ча́су разлуче́ния телесе́, сия́ вся разсы́плются, и подо́бная сим. Час у́бо он прии́м во уме́, припа́даю к Твое́й благосты́ни Ѓосподи, не преда́ждь мене́ оби́дящим мя. Да не похва́лятся врази́ мои́, на раба́ Твоего́ Благи́й Го́споди, скре́гчуще зубы́, и устраша́юще гре́шную мою́ ду́шу, и да не реку́т, в ру́ки на́ша прише́л еси, и нам пре́дан еси́. Ни Го́споди мой ни, не даждь ми по беззако́нию моему́, и не отврати́ лица́ Твоего́ от мене́, да не рече́ши и мне когда́: Ами́нь, ами́нь глаго́лю тебе́, не ве́де тебе́. Ты же Го́споди покажи́ мя щедро́тами Твои́ми, и враг мой да не пора́дует ми ся. Но угаси́ его́ преще́ния, и вся ко́зни его́ упраздни́. И дай же ми к Тебе́ путь непосра́млен, и не возвра́тен Благи́й Го́споди, непра́вды ра́ди моея́. Но щедро́т ра́ди Твои́х, и мно́гия благосты́ни, спаси́ ду́шу скорбя́щу от сме́ртных двере́й. Не прибего́х бо ко ино́му врачу́, и не воздвигох руку́ мое́ю к бо́гу чужде́му, но к Твое́й бла́гости. Ты Го́споди всех Бо́же, име́яй власть над вся́ким дыха́нием. Ты бо рекл еси́ Го́споди: Проси́те и да́стся вам. Очи́сти мя Го́споди пре́жде кончи́ны от вся́кого греха́, и не отри́ни моле́ния моего́ Благи́й Го́споди, уста́ не досто́йна вопию́ к Тебе́, и се́рдце нечи́сто, и душа́ грехи́ оскве́рншаяся. Послу́шай мене́ Го́споди благосты́ни Твоея́ ра́ди, не бо отме́щеши моли́твы ка́ющихся вои́стину, мое́ же покая́ние ничто́же есть, но растли́мо, еди́ною бо ка́юся, а два́жды прогне́ваю Тя. Утверди́ ми се́рдце Благи́й Го́споди в Твое́м стра́се, и поста́ви но́зе мои́ на ка́мени испове́дания, да победи́т благосты́ня Твоя́, мою́ зло́бу Го́споди, да победи́т свет благода́ти Твоея́ тму, я́же есть во мне. Го́споди, Го́споди, отве́рзый о́чи слепо́му, отве́рзи омраче́ннии о́чи се́рдца моего́. Сло́вом очища́яй прокаже́нныя, очи́сти скве́рну души́ моея́. Да бу́дет рука́ Твоя́ на мне Го́споди, я́ко огнь распала́я по́мыслы нечи́стыя, су́щыя во мне. Ты бо Го́споди светле́е еси всего́ све́та, и благода́ть Твоя́ па́че вся́кия благода́ти, и поко́й, па́че вся́кого поко́я, Живо́т И́стинный, и Спасе́ние пребыва́ющее во ве́ки. К Тебе́ Еди́ному припа́даю моля́ся аз окая́нный, вся́кой вине́ пови́нен сый и му́це. Тебе́ Изба́вителя молю́, да не до конца́ мене́ низложи́т сопроти́вный. Но Ты Го́споди я́ко Благ и Ми́лостив, не помяни́ зло́бы моея́, воздви́гни мя его́же пове́рже грех, и жи́ву сотвори́ ду́шу мою́, ю́же умертви́ беззако́ние мое́. И просвети́ ми се́рдце, е́же омрачи́ похоте́ние. И изми́ мя от вся́кого де́ла лука́ваго, и напиши́ мя в кни́гах живо́тных, и сподо́би мя насле́дника бы́ти ве́чнаго Ца́рствия Твоего́ со святы́ми Твои́ми, и́же вы́ну возлю́бльшими и́мя Твое́, и ходи́вшими во след Твои́х повеле́ний. Я́ко Ты Еди́н Человеколю́бец, и Тебе сла́ву возсыла́ем, Отцу́ и Сы́ну и Святому Ду́ху, ны́не и при́сно и во ве́ки веко́в. Ами́нь.