Вложи́т по́мысл ста́рцу, се коли́ко лет и́маши во святе́м ме́сте сем, Бо́гови рабо́тая, ны́не уже́ состаре́лся еси, и не мо́жеши терпе́ти кано́н ме́ста сего́. И́бо и плоть твоя́ немощна́ бысть, и ктому́ несть в тебе́ си́лы, е́же сотвори́ти что. И хо́щеши уничиже́н бы́ти, ма́лыми же и вели́кими, но и поко́я тре́буеши ста́рости ра́ди твоея́. Гряди́ у́бо и изы́ди отсю́ду, и ся́ди на еди́ном ме́сте без молвы́ пребыва́я, то или́ от любве́, или́ от коея́ то́кмо вины́, Госпо́дь по́слет ти ко́рмлю. Ка́я бо беда́ належи́т ти, да стра́ждеши, и поноси́мь еси о пи́щи твое́й. Что же ли и бра́шно твое́ нари́чу? Я́ко та́ко по вся дни стра́ждеши, я́ко зол раб, и хо́щеши и ме́ньшим себе́ покори́тися. Сицева́я вложи́т во ум лука́вый ста́рцу, хотя́ его́ отлучи́ти от бра́тства по толи́цех ле́тех, и ме́ста, иде́же состаре́лся есть, и не терпели́ва пока́жет его́ на ста́рость свою́. А́ще же есть ста́рец ле́гким умо́м, а́бие в том часе́ повине́тся по́мыслу, и жено́мь бу́дет им я́ко ве́тром ли́ствие. А́ще ли же бу́дет ста́рец умом соверше́н, не преврати́т ему́ о́браза безмо́лвнаго, ни удоле́ют ему́ я́ко свя́зану в вери́гах. Не бо суть крепча́йша благочести́ваго по́мысла, вра́жия ла́яния. Противу глаго́лет к ним ста́рец глаго́ля: Не и́мате посмея́тися мое́й ста́рости лука́вии бе́сове, не бо не разуме́ю лука́вых по́мысл ва́ших. А́ще бо в ю́ности мое́й претерпева́х боле́зни терпели́во, кольми́ па́че ны́не терплю́. Яко вре́мя отше́ствия моего́ настои́т, е́же бы́ти ми со Христо́м, состаре́лбося есмь, я́коже и вы свиде́тельствуете ми, и плоть моя́ немощна бысть, и ка́мо ны́не иду? Старость бо иного ничесого чает, но то́кмо е́же отъити́ жития́ сего́, ку́пно же да и о́браз бу́ду уны́ния а не терпе́ния. И́бо благочести́вый ста́рец Елеаза́р, горя́щими му́ками скончава́емь, не преклони́ по́мысла. Те́мже и ю́ноши сего́ терпе́ние ви́девше, неради́ша о му́ках, седмь о́трок преподо́бных победиша мучи́теля. И си́ми у́бо словесы́ преврати́т бесо́вския по́мыслы, благода́ти споспешеству́ющи ему́, и скончава́ется на ме́сте, на не́мже состар́еся. И прие́мля вене́ц живо́тный, и слы́ша глас от Бо́га: Благи́й ра́бе и ве́рный, в ма́ле бе ве́рен, на́до мн́огими тя поста́влю, вни́ди в ра́дость Го́спода своего́. Тому́ сла́ва во ве́ки. Ами́нь.