(с. рѻ҃г)

ПРА̑ВИЛА СВЯТА́ГѠ ПОМѢ́СТНАГѠ СОБО́РА САРДIКÍЙСКАГѠ.

ПРА́ВИЛО а҃.

Ѻ҆сíй є҆пíскопъ гра́да кордꙋ́вы ре́къ: подоба́етъ и҆з̾ са́мыхъ ѡ҆снова́нiй и҆скорени́ти не сто́лькѡ хꙋдо́е ѡ҆быкнове́нiе ско́лькѡ вре́днѣйшее разстро́йство дѣ́лъ церко́вныхъ. Никомꙋ` и҆з̾ є҆пíскопѡвъ да не бꙋ́детъ позво́лено и҆з̾ ма́лагѡ гра́да преходи́ти въ и҆ны́й гра́дъ. И҆́бо въ се́мъ дѣ́лѣ ꙗ҆́вна причи́на, для ко́ей ѻ҆но` предпрiе́млется: потомꙋ` что` никогда` не мо́жно бы́ло ѡ҆брѣсти` ни є҆ди́наго є҆пíскопа, кото́рый бы и҆з̾ вели́кагѡ гра́да во гра́дъ ме́ньшiи переведе́нъ бы́ти тща́лся. Ѿсе́лѣ ꙗ҆́вствꙋетъ, что` таковы́е пла́менною стра́стiю многостяжа́нiя возжига́ются, и҆ го́рдости бо́лѣе рабо́таютъ, да полꙋ́чатъ бо́льшꙋю, по ви́димомꙋ, вла́сть. И҆та́къ, бꙋ́детъ ли ѹ҆го́дно всѣ̑мъ, да сꙋро́вѣе наказꙋ́ется толи́кое развраще́нiе; мню́ же, ꙗ҆́кѡ таковы̑мъ не до́лжно и҆мѣ́ти ѻ҆бще́нiя ниже` наравнѣ` съ мiря́нами. Всѣ` є҆пíскопы рекли`: ѹ҆го́дно всѣ̑мъ.

ПРА́ВИЛО в҃.

А҆́ще же ѡ҆бря́щется кто` толи́кѡ безꙋ́менъ и҆ли` дерзнове́нъ, ꙗ҆́кѡ возмни́тъ нѣ́кое и҆звине́нiе приноси́ти въ таково́мъ дѣ́лѣ, ѹ҆твер(с. рѻ҃д)жда́я, что` ̾ѿ наро́да при́слано къ немꙋ` посла́нiе: ꙗ҆́вно є҆́сть, ꙗ҆́кѡ могли` не мно́гiе нѣ́кiе, прельще́нные воздая́нiемъ и҆ цѣно́ю, ско́пище соста́вити въ це́ркви, а҆́кибы жела́я и҆мѣ́ти є҆го` є҆пíскопомъ. Посемꙋ` полага́ю, сiи` ѹ҆хищрє́нiя и҆ кѡ́зни всеконе́чнѡ нака́зывати, да никто` и҆з̾ таковы́хъ, ниже` при кончи́нѣ свое́й, не бꙋ́детъ ѹ҆досто́иваемъ ѻ҆бще́нiя, да́же наравнѣ` съ мiря́нами. Ѹ҆го́дно ли мнѣ́нiе сiе`; ̾ѿвѣща́йте. И҆ ̾ѿвѣща́ли: и҆зрече́нное прiе́млемъ.

ПРА́ВИЛО г҃.

Нꙋ́жно и҆ сiе` присовокꙋпи́ти, да никто` и҆з̾ є҆пíскопѡвъ не прихо́дитъ и҆з̾ своея` ѻ҆́бласти во и҆нꙋ́ю ѻ҆́бласть, въ кото́рой є҆́сть свои` є҆пíскопы, ра́звѣ то́кмѡ бꙋ́детъ по́званъ ̾ѿ бра́тiй находя́щихся въ ѻ҆́ной, да не возмни́мся затворя́ти двє́ри любви`. Подоба́етъ же и҆ сiе` предꙋсмотрѣ́ти: а҆́ще въ ко́ей ѻ҆́бласти, кто́ либо и҆з̾ є҆пíскопѡвъ и҆мѣ́етъ дѣ́ло съ бра́томъ свои́мъ и҆ соепíскопомъ: ни кото́рый и҆з̾ ни́хъ да не призыва́етъ въ посре́дники є҆пíскопѡвъ и҆з̾ и҆ны́я ѻ҆́бласти. А҆́ще же кто` и҆з̾ є҆пíскопѡвъ, въ нѣ́коемъ дѣ́лѣ, ѡ҆ка́жется ѡ҆сꙋжда́емымъ, но возмни́тъ себе` не непра́вое и҆мѣ́ти дѣ́ло, а҆ пра́ведное, да и҆ па́ки возѡбнови́тся сꙋ́дъ: то, а҆́ще ѹ҆го́дно ва́мъ, любо́вiю почти́мъ па́мять петра` а҆п҃ⷭ҇ла, и҆ да напи́шется ̾ѿ си́хъ сꙋди́вшихъ къ i҆ꙋ́лiю є҆пíскопꙋ ри́мскомꙋ, да возѡбнови́тся, а҆́ще потре́бно, сꙋ́дъ чрез̾ ближа́йшихъ къ то́й ѻ҆́бласти є҆пíскопѡвъ, и҆ да назна́читъ ѻ҆́нъ разсмотри́телей дѣ́ла. А҆́ще же ѡ҆бвиня́емый не возмо́жетъ предста́вити дѣ́ла своегѡ` тре́бꙋющымъ втори́чнагѡ сꙋжде́нiя: то є҆ди́ножды присꙋжде́нное да не нарꙋша́ется, но, что` сдѣ́лано, то` да бꙋ́детъ тве́рдо.

{комм.}Шесты́мъ пра́виломъ пе́рвагѡ вселе́нскагѡ собо́ра, по дре́внемꙋ (с. рѻ҃є) ѻ҆бы́чаю, предоста́влены въ подчине́нiе ри́мскомꙋ є҆пíскопꙋ мнѡ́гiя є҆па́рхiи на за́падѣ, подо́бнѡ ка́къ а҆леѯандрíйскомꙋ и҆ а҆нтiохíйскомꙋ мнѡ́гiя є҆па́рхiи на ю҆́гѣ и҆ восто́кѣ. Согла́снѡ съ си́мъ раздѣ́ленiемъ, ѻ҆сíй є҆пíскопъ i҆спа́нскагѡ го́рода кордꙋ́вы, принадлежа` къ ѻ҆́бласти ри́мскагѡ є҆пíскопа, предлага́етъ ̾ѿноси́ть на є҆гѡ` разсмотре́нiе сомни́тельные слꙋ́чаи за́падныхъ є҆па́рхiй: и҆ въ се́мъ смы́слѣ при́нялъ є҆гѡ` предложе́нiе помѣ́стный сардiкíйскiй собо́ръ, не ̾ѿстꙋпа́я ̾ѿ ѕ҃ пра́вила пе́рвагѡ вселе́нскагѡ собо́ра.

ПРА́ВИЛО д҃.

А҆́ще кото́рый є҆пíскопъ, сꙋдо́мъ є҆пíскопѡвъ въ сосѣ́дствѣ находя́щихся, и҆зве́рженъ бꙋ́детъ ̾ѿ са́на, и҆ рече́тъ, что` ѻ҆́нъ па́ки возлага́етъ на себя` до́лгъ ѡ҆правда́нiя: то не пре́жде поставля́ти дрꙋга́го на є҆гѡ` мѣ́сто, ра́звѣ когда` є҆пíскопъ ри́мскiй, дозна́въ дѣ́ло, произнесе́тъ свое` ѡ҆предѣле́нiе по ѻ҆́номꙋ.

ПРА́ВИЛО є҃.

А҆́ще бꙋ́детъ на кото́раго є҆пíскопа доно́съ, и҆ є҆пíскопы ѻ҆кре́стные собра́вшись низло́жатъ є҆го` съ є҆гѡ` сте́пени, а҆ ѻ҆́нъ, перенося` дѣ́ло, прибѣ́гнетъ къ блаже́ннѣйшемꙋ є҆пíскопꙋ ри́мскiя це́ркви, се́й же восхо́щетъ вня́ти є҆мꙋ`, и҆ призна́етъ пра́веднымъ возѡбнови́ти и҆зслѣ́дованiе дѣ́ла ѡ҆ не́мъ: то до́лжно и҆ сiе` положи́ти, да благоволи́тъ написа́ти къ сопредѣ́льнымъ то́й ѻ҆́бласти є҆пíскопамъ, дабы` ѻ҆ни` тща́тельнѡ и҆ съ подро́бностiю вни́кнꙋли во всѣ` ѡ҆бстоя́тєльства, и҆, по ѹ҆бѣжде́нiи въ и҆́стинѣ, произнесли` сꙋ́дъ ѡ҆ дѣ́лѣ. А҆́ще же кто` востре́бꙋетъ, что́бы дѣ́ло є҆гѡ` па́ки вы́слꙋшано бы́ло, и҆, по проше́нiю є҆гѡ`, заблагоразсꙋждено` бꙋ́детъ ри́мскимъ є҆пíскопомъ ̾ѿ себе` посла́ти пресвѵ́терѡвъ: да бꙋ́детъ во вла́сти сегѡ` є҆пíскопа, поколи́кꙋ за лꙋ́чшее и҆ до́лжное призна́етъ и҆ ѡ҆предѣли́тъ, для сꙋжде́нiя вмѣ́стѣ съ є҆пíскопами, посла́ти застꙋпа́ющихъ мѣ́сто посла́вшагѡ. (с. рѻ҃ѕ) И҆ли́ же а҆́ще доста́точнымъ призна́етъ бы́вшее разсмотре́нiе и҆ рѣше́нiе дѣ́ла ѡ҆ се́мъ є҆пíскопѣ: да ѹ҆чини́тъ, что` благоразꙋ́мнѣйшемꙋ є҆гѡ` разсꙋжде́нiю за бла́го возмни́тся. Ѿвѣща́ли є҆пíскопы: и҆зрече́нное прiе́млемъ.

ПРА́ВИЛО ѕ҃.

А҆́ще въ є҆ди́ной ѻ҆́бласти, и҆мѣ́ющей мно́гихъ є҆пíскопѡвъ, слꙋчи́тся є҆ди́номꙋ є҆пíскопꙋ заме́длити, и҆ ѻ҆́нъ, по нѣ́коемꙋ небреже́нiю, не восхо́щетъ бы́ти въ собра́нiи и҆ согласи́тися на постановле́нiе є҆пíскопѡвъ, собра́вшееся же мно́жество люде́й бꙋ́детъ проси́ти, да поста́вится тре́бꙋемый и҆́ми є҆пíскопъ: подоба́етъ во пе́рвыхъ, чрез̾ посла́нiе є҆ѯа́рха ѻ҆́бласти [разꙋмѣ́ю є҆пíскопа митропо́лiи], воспомянꙋ́ти ѻ҆́номꙋ заме́длившемꙋ є҆пíскопꙋ, ꙗ҆́кѡ про́сятъ лю́дiе да́ти и҆`мъ па́стыря. За бла́го признаю` ѡ҆жида́ти, да прибꙋ́детъ и҆ ѻ҆́нъ. А҆́ще же, и҆ чрез̾ посла́нiе бы́въ про́шенъ, не прiи́детъ, и҆ ниже` ̾ѿпи́шетъ, то подоба́етъ ѹ҆довлетвори́ти жела́нiю наро́да. Но и҆ ̾ѿ бли́жнiя ѻ҆́бласти до́лжно призва́ти є҆пíскопѡвъ къ поставле́нiю є҆пíскопа митропо́лiи. Напро́тивъ тогѡ` ̾ѿню́дь да не бꙋ́детъ позво́лено поставля́ти є҆пíскопа въ како́е либо село` и҆ли` въ ма́лый го́родъ, для ко́егѡ довлѣ́етъ и҆ є҆ди́ный пресвѵ́теръ. И҆́бо не нꙋ́жно поставля́ти та́мѡ є҆пíскопѡвъ, да не ѹ҆ничижа́ется и҆́мя є҆пíскопа и҆ вла́сть. Но є҆пíскопы ѻ҆́бласти должны`, ка́къ и҆зрече́но мно́ю вы́ше, є҆пíскопѡвъ поставля́ти въ тѣ` гра́ды, въ кото́рыхъ и҆ пре́жде бы́ли є҆пíскопы. А҆́ще же ѡ҆бря́щется нѣ́кiй гра́дъ, мно́гимъ число́мъ люде́й толи́кѡ возра́стшiй, что` при́знанъ бꙋ́детъ досто́йнымъ и҆мѣ́ти є҆пíскопа: да прiи́метъ. Согла́сны ли на сiе` всѣ`; ̾ѿвѣща́ли всѣ`: согла́сны.

(с. рѻ҃з)

ПРА́ВИЛО з҃.

Ѻ҆сíй є҆пíскопъ ре́къ: безвре́мєнныя, весьма` ча̑стыя и҆ несправедли́выя прошє́нiя на́ши сдѣ́лали то`, что` мы` не и҆мѣ́емъ толи́кiя благода́ти и҆ дерзнове́нiя, каковы́я и҆мѣ́ти долженствꙋ́емъ. И҆́бо мно́гiе и҆з̾ є҆пíскопѡвъ не престаю́тъ приходи́ти въ во́инскiй ста́нъ, а҆ наипа́че а҆фрика́нскiе, кото́рые, ка́къ мы` ѹ҆вѣ́дали ̾ѿ возлю́бленнагѡ бра́та на́шегѡ и҆ соепíскопа гра́та, поле́зныхъ совѣ́тѡвъ не прiе́млютъ, но презира́ютъ та́къ, что` є҆ди́нъ человѣ́къ прино́ситъ въ во́инскiй ста́нъ прошє́нiя мно́жайшыя и҆ разли̑чныя, не могꙋ́щыя бы́ти на по́льзꙋ це́рквамъ, посо́бствꙋетъ и҆ покрови́тельствꙋетъ, не бѣ̑днымъ и҆ простолюди́намъ, и҆ли` вдови́цамъ, ка́къ бы́ло бы до́лжно и҆ прили́чно, но мiрски́хъ досто́инствъ и҆ должносте́й и҆́щетъ для нѣ́которыхъ. Таково́е невѣ́жество причиня́етъ на́мъ ѹ҆ще́рбъ, не без̾ собла́зна нѣ́коегѡ и҆ зазо́ра. Прили́чнѣйшимъ же почита́ю, что́бы є҆пíскопъ по́мощь свою` подава́лъ томꙋ`, кто` ̾ѿ когѡ́ либо ѹ҆тѣсня́ется, и҆ли` є҆́стьли кото́рая вдова` ѻ҆би́дꙋ претерпѣва́етъ, и҆ли` си́рый кто́ либо лиша́ется принадлежа́щагѡ є҆мꙋ`, є҆́стьли прито́мъ и҆ по си́мъ предме́тамъ проше́нiе бꙋ́детъ справедли́вое. А҆́ще ѹ҆`бо, возлю́бленные бра́тiя, ѹ҆го́дно сiе` всѣ̑мъ: то ѹ҆тверди́те, ꙗ҆́кѡ ни є҆ди́нъ є҆пíскопъ не до́лженъ приходи́ти въ во́инскiй ста́нъ, кромѣ` тѣ́хъ, кото́рыхъ благочести́вѣйшiй ца́рь на́шъ призове́тъ свои́мъ писа́нiемъ. Но поели́кꙋ многокра́тнѡ слꙋча́ется, что` нѣ́которые, за престꙋпле́нiя свои`, на заточе́нiе и҆ли` на ѻ҆́стровъ ѡ҆сꙋжде́нные, и҆ли` и҆но́мꙋ како́мꙋ либо ѡ҆сꙋжде́нiю подве́рженные, прибѣга́ютъ къ це́ркви, тре́бꙋя милосе́рдiя: таковы̑мъ не надлежи́тъ ̾ѿка́зывати въ по́мощи, но неме́дленнѡ (с. рѻ҃и) и҆ без̾ сомнѣ́нiя проси́ти для ни́хъ снисхожде́нiя. А҆́ще и҆ сiе` ѹ҆го́дно, препода́йте на сiе` согла́сiе всѣ`. Ѿвѣ́тствовали всѣ`: да бꙋ́детъ постано́влено и҆ сiе`.

ПРА́ВИЛО и҃.

Поели́кꙋ бы́ло разсꙋжда́емо, дабы` кто` и҆з̾ є҆пíскопѡвъ не подпа́лъ ѡ҆сꙋжде́нiю, приходя` въ во́инскiй ста́нъ: сегѡ` ра́ди, а҆́ще кото́рые и҆з̾ ни́хъ и҆мѣ́ютъ такíя прошє́нiя, ѡ҆ каковы́хъ мы` вы́ше ѹ҆помянꙋ́ли, да препосыла́ютъ и҆`хъ чрез̾ своего` дiа́кона. И҆́бо слꙋже́бное лице` не подлежи́тъ ѹ҆коре́нiю и҆ скорѣ́е мо́жетъ донести` то`, что` є҆мꙋ` порꙋчено` бꙋ́детъ. Ѿвѣ́тствовали всѣ`: и҆ сiе` да бꙋ́детъ постано́влено.

ПРА́ВИЛО ѳ҃.

А҆́ще кото́рыя ѻ҆́бласти є҆пíскопы, бра́тꙋ и҆ соепíскопꙋ своемꙋ`, доста́вятъ прошє́нiя: то пребыва́ющiй въ бо́льшемъ гра́дѣ, то́ є҆сть въ митропо́лiи, да препрово́дитъ и҆ дiа́кона и҆́хъ и҆ прошє́нiя, да́въ є҆мꙋ` и҆ представи́тєльныя пи́сьма, то́ є҆сть писа́въ послѣ́довательнѡ къ бра́тiямъ и҆ соепíскопамъ на́шымъ, пребыва́ющымъ въ то` вре́мя въ тѣ́хъ мѣста́хъ и҆ли` гра́дахъ, въ кото́рыхъ благочести́вѣйшiй ца́рь ли́чнѡ распоряжа́етъ ѻ҆бще́ственными дѣла́ми. А҆́ще же кто` и҆з̾ є҆пíскопѡвъ и҆мѣ́етъ дрꙋгѡ́въ во дворѣ` царе́вѣ, и҆ восхо́щетъ ѡ҆ че́мъ либо подоба́ющемъ проси́ти: то да не возбрани́тся є҆мꙋ`, чрез̾ своего` дiа́кона и҆ проси́ти и҆ заповѣ́дати и҆`мъ, да подадꙋ́тъ є҆мꙋ` въ є҆гѡ` проше́нiи благꙋ́ю по́мощь. Приходя́щiе же въ ри́мъ, ка́къ вы́ше рече́но мно́ю, прошє́нiя, котѡ́рыя и҆мѣ́ютъ принести` ца́рю, должны` представля́ти возлю́бленномꙋ бра́тꙋ на́шемꙋ и҆ соепíскопꙋ i҆ꙋ́лiю, да пе́рвѣе разсмо́тритъ, не сꙋ́ть ли нѣ́кiя и҆з̾ ни́хъ безсты́дны, и҆ пото́мъ по́слетъ ѻ҆́ныя въ во́инскiй ста́нъ, при(с. рѻ҃ѳ)совокꙋпля́я и҆ свое` предста́тельство и҆ попече́нiе. Всѣ` є҆пíскопы ̾ѿвѣ́тствовали, ꙗ҆́кѡ ѹ҆го́дно и҆`мъ сiе`, и҆ прили́чнѣйшiй є҆́сть совѣ́тъ се́й.

ПРА́ВИЛО _i҃.

Подоба́етъ со вся́кою то́чностiю и҆ тща́нiемъ наблюда́ти, да бога́тый кто́ либо, и҆ли` ѹ҆че́ный, ̾ѿ свѣ́тскагѡ слꙋже́нiя, ѹ҆досто́иваемый є҆пíскопомъ бы́ти, не пре́жде поставля́ется, ра́звѣ когда` соверши́тъ слꙋжє́нiя чтеца` и҆ дiа́кона, и҆ пресвѵ́тера, дабы` проходя` чрез̾ ка́ждꙋю сте́пень, а҆́ще досто́йнымъ призна́нъ бꙋ́детъ, мо́гъ взы́ти на высотꙋ` є҆пíскопства. Ѻ҆чеви́дно же, что` для ка́ждой сте́пени чи́на до́лжно бы́ть предоста́влено не сли́шкомъ ма́лое вре́мя, въ продолже́нiе кото́рагѡ могли` бы ѹ҆смо́трены бы́ти є҆гѡ` вѣ́ра, благонра́вiе, постоя́нство и҆ кро́тость, и҆ ѻ҆́нъ, бы́въ при́знанъ досто́йнымъ бж҃е́ственнагѡ свяще́нства, полꙋчи́лъ бы велича́йшꙋю че́сть. И҆́бо не прили́чно, дерзнове́нно и҆ легкомы́сленно пристꙋпа́ти къ томꙋ`, что́бы поспѣ́шнѡ поставля́ти и҆ли` є҆пíскопа, и҆ли` пресвѵ́тера, и҆ли` дiа́кона: и҆ ни зна́нiе, ни поведе́нiе не дае́тъ на сiе` пра́ва. Поне́же такова́го по справедли́вости почли` бы весьма` но́вымъ{а҃ тiм. гл. г҃, ст. ѕ҃.}, и҆ не ѹ҆твержде́ннымъ, наипа́че, когда` и҆ блаже́ннѣйшiй а҆п҃ⷭ҇лъ, кото́рый ѹ҆чи́телемъ ꙗ҆зы́кѡвъ бы́лъ, ꙗ҆вля́ется возбраня́ющимъ ско́рыя поставлє́нiя въ церкѡ́вныя сте́пени: поели́кꙋ дозна́нiе въ должа́йшее вре́мя достовѣ́рнѣе показа́ти мо́жетъ и҆ поведе́нiе и҆ нра́въ ка́ждагѡ. Рекли` всѣ`, ꙗ҆́кѡ и҆`мъ сiе` ѹ҆го́дно, и҆ сегѡ` нарꙋша́ти ̾ѿню́дь не до́лжно.

ПРА́ВИЛО а҃_i.

Є҆пíскопъ, когда` ̾ѿ є҆ди́нагѡ гра́да прехо́дитъ въ дрꙋгíй гра́дъ, и҆ли` ̾ѿ є҆ди́ныя ѻ҆́бласти въ дрꙋгꙋ́ю (с. р҃п) ѻ҆́бласть, ра́ди тщесла́вiя подвиза́яся ѡ҆ со́бственной похвалѣ` и҆ли` ѡ҆ соверше́нiи бг҃ослꙋже́нiя съ вя́щшею ва́жностiю, и҆ хо́щетъ пребы́ти та́мѡ до́лгое вре́мя, тогда` ка́къ є҆пíскопъ тогѡ` гра́да не и҆скꙋ́сенъ въ ѹ҆че́нiи: да не пренебрега́етъ є҆гѡ` и҆ да не проповѣ́дꙋетъ ча́стѡ, тща́ся постыди́ти и҆ ѹ҆ничижи́ти лице` мѣ́стнагѡ є҆пíскопа. И҆́бо се́й предло́гъ ѻ҆быкнове́ннѡ произво́дитъ смятє́нiя, и҆ таково́ю хи́тростiю є҆пíскопъ стара́ется чꙋ́ждый престо́лъ себѣ` преѡбрꙋчи́ти и҆ восхи́тити, не коле́блясь ѡ҆ста́вити порꙋче́ннꙋю себѣ` це́рковь и҆ прейти` во и҆нꙋ́ю. И҆та́къ до́лжно на сiе` ѡ҆предѣли́ти и҆звѣ́стное вре́мя: поели́кꙋ и҆ не принима́ти є҆пíскопа показа́лось бы дѣ́ломъ не человѣколю́бнымъ и҆ жесто́кимъ. При се́мъ воспомяни́те, что` въ предше́ствовавшее вре́мя ѻ҆тцы` на́ши ѡ҆предѣли́ли: а҆́ще кто` мiряни́нъ, пребыва́я во гра́дѣ, въ три` воскре́сные дни`, въ продолже́нiе тре́хъ седми́цъ, не прiи́детъ въ собра́нiе, да бꙋ́детъ ѹ҆дале́нъ ̾ѿ ѻ҆бще́нiя церко́внагѡ. И҆та́къ а҆́ще сiе` постано́влено ѡ҆ мiря́нахъ, то не до́лжно, не прили́чно, и҆ не поле́зно є҆пíскопꙋ, не и҆мѣ́ющемꙋ никако́й ва́жной нꙋ́жды и҆ли` дѣ́ла трꙋ́днагѡ, ѡ҆ставля́ти це́рковь свою` на вре́мя бо́лѣе продолжи́тельное, и҆ ѡ҆горча́ти ввѣ́ренный є҆мꙋ` наро́дъ. Всѣ` є҆пíскопы рекли`: и҆ сiе` мнѣ́нiе весьма` прили́чно.

ПРА́ВИЛО в҃_i.

Нѣ́которые и҆з̾ бра́тiй и҆ соепíскопѡвъ во гра́дахъ, въ кото́рые ѻ҆ни` поставля́ются во є҆пíскопы, и҆мѣ́ютъ, пови́димомꙋ, ѻ҆́чень ма́лꙋю со́бственность и҆`мъ принадлежа́щꙋю, а҆ въ дрꙋги́хъ мѣста́хъ стяжа̑нiя вели̑кiя, и҆з̾ кото́рыхъ мо́гꙋтъ вспомоществова́ти бѣ̑днымъ. Полага́ю, что`, є҆́стьли ѻ҆ни` восхотя́тъ прiити` въ свои` владѣ̑нiя, и҆ произвести` собра́нiе пло(с. рп҃а)дѡ́въ, то надлежи́тъ позво́лити и҆`мъ сiе` съ тѣ́мъ, что́бы ѻ҆ни` три` воскре́сные дни`, то́ є҆сть три` седми́цы пребыва́ли въ свои́хъ владѣ́нiяхъ, но что́бы въ ближа́йшей це́ркви, въ кото́рой соверша́етъ слꙋ́жбꙋ пресвѵ́теръ, присꙋ́тствовали и҆ слꙋжи́ли, да не ꙗ҆вя́тся ѡ҆стаю́щимися без̾ церко́внагѡ бг҃ослꙋже́нiя, и҆ что́бы не ча́стѡ приходи́ли во гра́дъ, въ кото́ромъ є҆́сть є҆пíскопъ. И҆́бо таковы́мъ ѻ҆́бразомъ и҆ со́бствєнныя и҆́хъ дѣла` не поте́рпятъ никако́гѡ вреда` ̾ѿ и҆́хъ ̾ѿсꙋ́тствiя, и҆ ѻ҆чеви́днѡ и҆збѣ́гнꙋтъ ѻ҆ни` ѡ҆бвине́нiя въ го́рдости и҆ тщесла́вiи. Всѣ` є҆пíскопы рекли`: ѹ҆го́дно и҆ сiе` постановле́нiе.

ПРА́ВИЛО г҃_i.

Ѻ҆сíй є҆пíскопъ ре́къ: а҆́ще кто`, дiа́конъ, и҆ли` пресвѵ́теръ, и҆ли` кто́ либо и҆з̾ приче́тникѡвъ бꙋ́детъ лише́нъ ѻ҆бще́нiя церко́внагѡ, и҆ прибѣ́гнетъ къ и҆но́мꙋ є҆пíскопꙋ зна́ющемꙋ є҆го`, зна́ющемꙋ и҆ то`, что` ѻ҆́нъ свои́мъ є҆пíскопомъ ѹ҆дале́нъ ̾ѿ ѻ҆бще́нiя: не подоба́етъ, съ ѻ҆би́дою для є҆пíскопа и҆ бра́та своегѡ`, подава́ти є҆мꙋ` ѻ҆бще́нiе. А҆́ще же де́рзнетъ сiе` сотвори́ти: да зна́етъ, что` подверга́етъ себе` ̾ѿвѣ́тꙋ пред̾ є҆пíскопами, когда` ѻ҆ни` соберꙋ́тся.

ПРА́ВИЛО д҃_i.

А҆́ще ѡ҆бря́щется нѣ́кiй є҆пíскопъ, скло́нный ко гнѣ́вꙋ [что` въ таково́мъ мꙋ́жѣ не должно` и҆мѣ́ти мѣ́ста], и҆ внеза́пнѡ бы́въ раздраже́нъ на пресвѵ́тера, и҆ли` дiа́кона, восхо́щетъ и҆зри́нꙋти нѣ́коего и҆з̾ цр҃кви: подоба́етъ предохране́нiе ѹ҆потреби́ти, да не то́тчасъ таковы́й бꙋ́детъ ѡ҆сꙋжда́емъ и҆ лиша́емъ ѻ҆бще́нiя. Всѣ` є҆пíскопы рекли`: и҆зверга́емый да и҆мѣ́етъ пра́во прибѣ́гнꙋти къ є҆пíскопꙋ митропо́лiи тоя́ же ѻ҆́бласти. А҆́ще же є҆пíскопа митропо́лiи нѣ́тъ на мѣ́стѣ, (с. рп҃в) прибѣ́гнꙋти къ сосѣ́дственномꙋ є҆пíскопꙋ и҆ проси́ти, да со тща́нiемъ и҆зслѣ́дꙋется дѣ́ло. И҆́бо не до́лжно загражда́ти слꙋ́ха ̾ѿ прося́щихъ. А҆ є҆пíскопъ ѻ҆́ный, пра́веднѡ и҆ли` непра́веднѡ и҆зве́ргшiй такова́го, благодꙋ́шнѡ сноси́ти до́лженъ, да бꙋ́детъ и҆зслѣ́дованiе дѣ́ла, и҆ пригово́ръ є҆гѡ` и҆ли` подтвержде́нъ бꙋ́детъ, и҆ли` полꙋ́читъ и҆справле́нiе. По пре́жде не́жели тща́тельнѡ и҆ вѣ́рнѡ и҆зслѣ́дованы всѣ` ѡ҆бстоя́тєльства, ̾ѿлꙋче́нный ̾ѿ ѻ҆бще́нiя до разсмотрѣ́нiя дѣ́ла, не до́лженъ присвоя́ти себѣ` ѡ҆бще́нiя. А҆́ще же соше́дшеся нѣ́которые и҆з̾ кли́ра ѹ҆ви́дятъ въ не́мъ пренебреже́нiе вла́сти и҆ надме́нность: то [поели́кꙋ не прили́чно попꙋска́ти ѻ҆би́дꙋ и҆ли` непра́ведное порица́нiе] долженствꙋ́ютъ нѣ́сколькѡ сꙋро́выми и҆ тя́жкими слова́ми ѡ҆браща́ти є҆го` къ поря́дкꙋ, да соблюда́ется поко́рность и҆ повинове́нiе повелѣва́ющемꙋ до́лжное. И҆́бо ка́къ є҆пíскопъ ѡ҆бя́занъ ꙗ҆вля́ти подчинє́ннымъ и҆́скреннюю любо́вь и҆ расположе́нiе: таковы́мъ же ѻ҆́бразомъ, и҆ слꙋжа́щiе ѡ҆бя́заны непритво́рнѡ и҆сполня́ти до́лгъ слꙋже́нiя є҆пíскопамъ.

ПРА́ВИЛО є҃_i.

А҆́ще кото́рый є҆пíскопъ, и҆з̾ и҆на́гѡ предѣ́ла чꙋжда́го слꙋжи́теля це́ркви восхо́щетъ поста́вити на какꙋ́ю либо сте́пень, без̾ соизволе́нiя є҆гѡ` є҆пíскопа: то таково́е поставле́нiе да почита́ется недѣйстви́тельнымъ и҆ нетве́рдымъ. А҆́ще же нѣ́которые сiе` позво́лятъ себѣ`: то ̾ѿ бра́тiй и҆ соепíскопѡвъ должны` бы́ти ѹ҆вѣщава́емы, и҆ и҆справля́емы. Рекли` всѣ`: и҆ сiе` ѡ҆предѣле́нiе да бꙋ́детъ непоколеби́мо.

ПРА́ВИЛО ѕ҃_i.

А҆е́тiй є҆пíскопъ ре́къ: не без̾извѣ́стно ва́мъ, какова` (с. рп҃г) и҆ ско́ль вели́ка ѳессалонiкíйская митропо́лiя. Ча́стѡ прихо́дятъ въ ѻ҆́нꙋю и҆з̾ и҆ны́хъ є҆па́рхiи пресвѵ́теры и҆ дiа́коны, и҆ недово́льствꙋясь кратковре́меннымъ пребыва́нiемъ ѡ҆стаю́тся, и҆ всегда́шнее жи́тельство та́мѡ и҆мѣ́ютъ, и҆ли` є҆два` по́слѣ весьма` до́лгагѡ вре́мени принꙋждены` быва́ютъ возбрати́тися къ свои́мъ це́рквамъ. И҆ та́къ и҆ ѡ҆ си́хъ ѡ҆предѣле́нiю бы́ти до́лжно. Ѻ҆сíй є҆пíскопъ сказа́лъ: тѣ` ѡ҆предѣлє́нiя, какíя постано́влены ̾ѿноси́тельнѡ є҆пíскопѡвъ, да сохраня́ются и҆ ̾ѿноси́тельнѡ си́хъ ли́цъ.

ПРА́ВИЛО з҃_i.

А҆́ще кото́рый є҆пíскопъ, претерпѣ́въ наси́лiе, непра́веднѡ и҆зве́рженъ бꙋ́детъ, и҆ли` за свои` позна̑нiя, и҆ли` за и҆сповѣ́данiе каѳолíческiя це́ркви, и҆ли` за то`, что` защища́лъ и҆́стинꙋ, и҆, и҆збѣга́я ѻ҆па́сности, бꙋ́дꙋчи неви́ненъ и҆ ѡ҆бвине́нiю подве́рженъ, прiи́детъ во и҆ны́й гра́дъ: то заблагоразсꙋждено`, да не возбраня́ется є҆мꙋ` пребыва́ти та́мѡ, доко́лѣ не возврати́тся, и҆ли` возмо́жетъ ѡ҆брѣсти` и҆збавле́нiе ̾ѿ нанесе́нныя є҆мꙋ` ѻ҆би́ды. И҆́бо же́стоко и҆ весьма` тя́жко бы́ло бы не прiима́ти на́мъ претерпѣ́вшагѡ непра́ведное и҆згна́нiе: напро́тивъ тогѡ` съ ѻ҆со́беннымъ благорасположе́нiемъ и҆ дрꙋжелю́бiемъ до́лжно прiима́ти такова́го.

ПРА́ВИЛО и҃_i.

Гаѵде́нтiй є҆пíскопъ ре́къ: зна́еши, бра́те а҆е́тiе, что` при поставле́нiи твое́мъ во є҆пíскопа процвѣта́лъ ми́ръ. Дабы` не ѡ҆ста́лось нѣ́кiихъ слѣдѡ́въ разномы́слiя ѡ҆ слꙋжи́теляхъ цр҃кви, бла́го бы́ти мни́тся, и҆ поста́вленныхъ мꙋсе́емъ и҆ є҆ѵтѷхiа́номъ, поели́кꙋ въ ѻ҆́ныхъ никакíя вины` не ѡ҆брѣта́лось, всѣ́хъ прiима́ти.

Ѻ҆сíй є҆пíскопъ ре́къ: моея` мѣ́рности мнѣ́нiе таково`: (с. рп҃д) поели́кꙋ долженствꙋ́емъ бы́ти миролюби́вы и҆ терпѣли́вы, и҆ дово́льное ко всѣ́мъ и҆мѣ́ти милосе́рдiе: то произведе́нныхъ ѻ҆дна́жды въ при́чтъ церко́вный нѣ́которыми бра́тiями на́шими, тогда` то́кмѡ не прiима́ти, когда` не восхотя́тъ возврати́тися къ це́рквамъ, къ кото́рымъ наречены` бы́ли. Є҆ѵтѷхiа́нъ же да не присвоя́етъ себѣ` ниже` и҆́мени є҆пíскопа: ниже` мꙋсе́й да не почита́ется є҆пíскопомъ. А҆́ще же ѻ҆бще́нiя въ чи́нѣ мiря́нъ проси́ти бꙋ́дꙋтъ: въ се́мъ не до́лжно и҆`мъ ̾ѿка́зывати. Рекли` всѣ`: согла́сны.

ПРА́ВИЛО ѳ҃_i.

Гаѵде́нтiй є҆пíскопъ ре́къ: сíи спаси́тельныя и҆ благоразсꙋ́дныя постановлє́нiя, и҆ на́шемꙋ свяще́нническомꙋ досто́инствꙋ прили̑чныя, и҆ ѹ҆гѡ́дныя бг҃ꙋ и҆ человѣ́камъ, не возмо́гꙋтъ ѹ҆держа́ти си́лы и҆ крѣ́пости своея`, а҆́ще произнесє́нныя рѣшє́нiя не бꙋ́дꙋтъ сопровождены` стра́хомъ. И҆́бо мы` и҆ са́ми зна́емъ, что` нерѣ́дкѡ по причи́нѣ безсты́дства немно́гихъ, бж҃е́ственное и҆ досточти́мое и҆́мя свяще́нства подверга́лось пренебреже́нiю. И҆ та́къ, а҆́ще кто`, въ проти́вность при́знанномꙋ всѣ́ми, де́рзнетъ что́ либо и҆но́е твори́ти, стара́ясь ѹ҆гожда́ти го́рдости и҆ тщесла́вiю па́че, не́жели бг҃ꙋ: то́тъ да зна́етъ ѹ҆же`, что` ѻ҆́нъ поставля́етъ себя` пови́ннымъ сꙋде́бномꙋ ̾ѿвѣ́тꙋ, и҆ теря́етъ че́сть и҆ досто́инство є҆пíскопа. Всѣ` ̾ѿвѣща́ли: сiе` мнѣ́нiе прили́чно, и҆ на́мъ ѹ҆го́дно.

ПРА́ВИЛО к҃.

Сiе́ же наипа́че до́знано и҆ и҆спо́лнено бꙋ́детъ таковы́мъ ѻ҆́бразомъ: є҆́стьли ка́ждый и҆з̾ на́съ, поста́вленныхъ є҆пíскопами на припꙋ́тiяхъ, и҆ли` на пꙋтя́хъ во́дныхъ, ѹ҆ви́дѣвъ є҆пíскопа, вопроша́ти бꙋ́детъ ѡ҆ причи́нѣ мимоше́ствiя, и҆ (с. рп҃є) кꙋда` направля́етъ ѻ҆́нъ пꙋ́ть. И҆ а҆́ще ѹ҆вѣ́даетъ, что` ѻ҆́нъ ше́ствꙋетъ въ во́инскiй ста́нъ: то да вопро́ситъ по разря́дамъ вы́ше постано́влєннымъ{Сегѡ́ же собо́ра пра̑вила з҃, и҃, ѳ҃.}. И҆ а҆́ще и҆́детъ бꙋ́дꙋчи зва́нъ: то и҆дꙋ́щемꙋ є҆мꙋ` никако́гѡ препя́тствiя да не бꙋ́детъ. А҆́ще же, по тщесла́вiю, ка́къ пре́жде рече́но любви` ва́шей, и҆ли` по про́сьбамъ нѣ́которыхъ, поспѣша́етъ въ во́инскiй ста́нъ: то ни на гра́матахъ є҆гѡ` да подпи́шетъ, ниже` да соѡбща́ется съ таковы́мъ. Всѣ` ̾ѿвѣ́тствовали: да бꙋ́детъ ѡ҆предѣлено` и҆ сiе`.