ПРА̑ВИЛА СВЯТА́ГѠ ПОМѢ́СТНАГѠ СОБО́РА КАРѲАГЕ́НСКАГѠ.

ПРА́ВИЛО а҃.

Ѡ҆предѣлє́нія ніке́йскагѡ собо́ра всемѣ́рнѡ да соблюда́ются.

А҆ѵри́лій є҆пі́скопъ ре́къ:

Сі́и ѡ҆предѣлє́нія та́кѡ и҆мѣ́ются ѹ҆ на́съ въ спи́скахъ, кото́рые тогда̀ ѻ҆тцы̀ на́ши принеслѝ съ собо́ю ̾ѿ ніке́йскагѡ собо́ра, и҆ послѣ́дꙋющыя, и҆ на́ми при́нятыя ѡ҆предѣлє́нія, съ ѻ҆́нымъ собо́ромъ въ то́чности соѻбра̑зныя, по ѹ҆достовѣре́ніи ѡ҆ се́мъ да соблюда́ются.

{комм.}Пред̾ си́мъ пра́виломъ чи́таны бы́ли на собо́рѣ сѷмво́лъ и҆ пра̑вила ніке́йскагѡ собо́ра. Све́рхъ же тогѡ̀, фаѵсті́нъ, є҆пі́скопъ ніке́йскій, мѣстоблюсти́тель ри́мскагѡ є҆пі́скопа воніфа́тіа, предста́вилъ да́нное є҆мꙋ̀ пи́сменное наставле́ніе, въ кото́ромъ предлага́лись собо́рꙋ пра̑вила ѡ҆ перенесе́ніи сꙋ́дныхъ дѣ́лъ ̾ѿ є҆пархіа́льнагѡ є҆пі́скопа къ ри́мскомꙋ, и҆ къ сосѣ́днимъ є҆пі́скопамъ, котѡ́рыя въ се́й за́писи на́званы бы́ли пра́вилами ніке́йскагѡ вселе́нскагѡ собо́ра, но котѡ́рыя въ са́момъ дѣ́лѣ бы́ли є҃ и҆ д҃і пра̑вила помѣ́стнагѡ сардікі́йскагѡ собо́ра. На сіѐ ѻ҆тцы̀ карѳаге́нскагѡ собо́ра ̾ѿвѣ́тствовали, что̀ ѻ҆нѝ въ свои́хъ спи́скахъ ніке́йскагѡ собо́ра не нахо́дятъ си́хъ пра̑вилъ, и҆, для разрѣше́нія сомнѣ́нія, положи́ли и҆стре́бовать вѣ́рные спи́ски пра̑вилъ ніке́йскагѡ собо́ра ̾ѿ є҆пі́скопѡвъ а҆нтіохі́йскагѡ, а҆леѯандрі́йскагѡ и҆ кѡнстантінопо́льскагѡ. А҆ дабы̀ с. рп҃з не ѡ҆ста́вить, никако́гѡ сомнѣ́нія въ свое́мъ повинове́ніи пра́виламъ ніке́йскагѡ собо́ра, по предложе́нію а҆ѵри́ліа є҆пі́скопа карѳаге́нскагѡ, и҆зреклѝ настоя́щее пра́вило.

ПРА́ВИЛО в҃.

По и҆зволе́нію бж҃ію первонача́льнѡ подоба́етъ, согла́снымъ и҆сповѣ́даніемъ, и҆сповѣ́дывати цр҃ко́внꙋю вѣ́рꙋ, пре́даннꙋю на́ми въ се́мъ сла́вномъ собра́ніи. Пото́мъ церко́вный чи́нъ, по согла́сію ка́ждагѡ и҆ всѣ́хъ вкꙋ́пѣ, до́лжно соблюда́ти. Для ѹ҆твержде́нія же помышле́ній бра́тій и҆ соєпі́скопѡвъ на́шихъ, неда́внѡ поста́вленныхъ, до́лжно присовокꙋпи́ти то̀, что̀ мы̀ прія́ли ̾ѿ ѻ҆тцє́въ, ꙗ҆́кѡ тве́рдое ѡ҆предѣле́ніе: є҆ди́нство трⷪ҇цы, то́ є҆сть, ѻ҆ц҃а̀ и҆ сн҃а и҆ ст҃а́гѡ дх҃а, не и҆мѣ́етъ никако́гѡ разли́чія познава́емагѡ. Сіѐ въ ѹ҆ма́хъ на́шихъ свя́тѡ соде́ржимъ, и҆ ка́къ наꙋчи́лися, та́кѡ ѹ҆чи́ти бꙋ́демъ люде́й бж҃іихъ.

ПРА́ВИЛО г҃.

Ѡ҆ воздержа́ніи а҆ѵри́лій є҆пі́скопъ речѐ:

На пре́жде бы́вшемъ собо́рѣ, когда̀ ѡ҆ ѻ҆́бразѣ воздержа́нія и҆ чистоты̀ вопроше́но бы́ло, заблагоразсꙋждено̀, что́бы поста́вленные въ сіѝ трѝ сте́пени [то̀ є҆́сть во є҆пі́скопы, пресвѵ́теры и҆ діа́коны], чрез̾ са́мое посвяще́ніе ѡ҆бя́занные ѹ҆́зами чистоты̀, ка́къ прили́чно святы́мъ є҆пі́скопамъ и҆ свяще́нникамъ бж҃іимъ и҆ леѵі́тамъ, и҆ слꙋжа́щымъ при бж҃е́ственныхъ священнодѣ́йствіяхъ, возде́ржны бы́ли во все́мъ: да возмо́гꙋтъ полꙋчи́ти, чегѡ̀ въ простотѣ̀ про́сятъ ̾ѿ бг҃а, дабы̀ ̾ѿ а҆по́столѡвъ пре́данное и҆ ̾ѿ са́мыя дре́вности содержи́мое и҆ мы̀ подо́бнѡ соблюда́ли.

ПРА́ВИЛО д҃.

Разсꙋждено̀, что́бы є҆пі́скопъ и҆ пресвѵ́теръ, и҆ діа́конъ, и҆ всѣ̀ прикаса́ющіеся с. рп҃и къ святы́нямъ, храни́ли цѣломꙋ́дріе и҆ возде́рживались ̾ѿ же́нъ.

{комм.}Приложе́ніе сегѡ̀ пра́вила къ є҆пі́скопамъ въ соверше́нствѣ, а҆ къ пресвѵ́терамъ и҆ діа́конамъ съ ѡ҆граниче́ніемъ, ѡ҆зна́чено съ подро́бностію въ в҃і и҆ г҃і правила́хъ шеста́гѡ вселе́нскагѡ собо́ра.

ПРА́ВИЛО є҃.

Подоба́етъ ѹ҆держава́ти по́хоть любостяжа́нія, кото́рꙋю никто̀ не ѹ҆сꙋмни́тся нарещѝ ма́терію всѣ́хъ ѕѡ́лъ: никто̀ да не встꙋпа́етъ въ чꙋ́ждые предѣ́лы, и҆ ра́ди коры́сти да не престꙋпа́етъ предѣ́лѡвъ ѻ҆те́ческихъ, и҆ никомꙋ̀ и҆з̾ кли́ра ̾ѿню́дь да не бꙋ́детъ позво́лено бра́ти ро́стъ ̾ѿ како́й бы то̀ ни бы́ло ве́щи. Предста́вленное же вно́вь, ка́къ не ꙗ҆́сное, и҆ совсѣ́мъ сокры́тое, бꙋ́детъ на́ми разсмо́трено, и҆ ѡ҆ то́мъ соста́вится ѡ҆предѣле́ніе. А҆ что̀ бж҃е́ственное писа́ніе постанови́ло весьма̀ ꙗ҆́снѡ, ѡ҆ то́мъ не мнѣ̑нія до́лжно и҆спы́тывати, но па́че послѣ́довати томꙋ̀. Что̀ ѹ҆кори́зненно въ міря́нахъ, то̀ кольмѝ па́че досто́йно ѡ҆сꙋжде́нія въ принадлежа́щихъ къ кли́рꙋ. Ве́сь собо́ръ ре́къ: никто̀ проти́вꙋ проро́кѡвъ, никто̀ проти́вꙋ є҆ѵⷢ҇ліа не дѣ́йствовалъ безбѣ́днѡ.

ПРА́ВИЛО ѕ҃.

Соверше́нія мѵ́ра, и҆ ѡ҆свяще́нія дѣ́въ да не твори́тъ пресвѵ́теръ. И҆ примиря́ти съ це́рковію ка́ющихся, ̾ѿкры́тѡ, на літꙋргі́и, да не бꙋ́детъ позво́лено пресвѵ́терꙋ. Всѣ̑мъ ѹ҆го́дно сіѐ.

ПРА́ВИЛО з҃.

А҆́ще кто̀, находя́сь въ ѻ҆па́сности жи́зни, бꙋ́детъ проси́ти ѡ҆ примире́ніи себя̀ со святы́мъ ѻ҆лтаре́мъ, во ̾ѿсꙋ́тствіи є҆пі́скопа: то пресвѵ́теръ по прили́чію до́лженъ вопроси́ти є҆пі́скопа, и҆ та́кѡ, по є҆гѡ̀ разрѣше́нію, примири́ти находя́щагося въ ѻ҆па́сности.

с. рп҃ѳ

ПРА́ВИЛО и҃.

Сꙋ́ть мно́гіе неблагонра́вные, кото́рые почита́ютъ за до́лжное, при вся́комъ слꙋ́чаѣ, приноси́ти ѡ҆бвинє́нія на ѻ҆тцє́въ и҆ є҆пі́скопѡвъ. До́лжно ли принима́ти таковы́хъ, и҆лѝ нѣ́тъ; Ѿ всѣ́хъ є҆пі́скопѡвъ рече́но: а҆́ще ѡ҆поро́ченъ таковы́й, то не принима́ти.

ПРА́ВИЛО ѳ҃.

А҆́ще кото́рый є҆пі́скопъ, и҆лѝ пресвѵ́теръ, пріи́метъ въ ѻ҆бще́ніе пра́веднѡ и҆зве́рженныхъ за своѝ престꙋплє́нія и҆з̾ це́ркви: да бꙋ́детъ и҆ са́мъ пови́ненъ ра́вномꙋ ѡ҆сꙋжде́нію, съ ѹ҆клоня́ющимися ̾ѿ пра́вильнагѡ пригово́ра своегѡ̀ є҆пі́скопа.

ПРА́ВИЛО і҃.

А҆́ще кото́рый пресвѵ́теръ, ̾ѿ своегѡ̀ є҆пі́скопа ѡ҆сꙋжде́нный, возне́сшись надме́ніемъ нѣ́кіимъ и҆ го́рдостію, до́лжнымъ бы́ти возмни́тъ ̾ѿдѣ́льнѡ приноси́ти бг҃ꙋ ст҃ы́е да́ры, и҆лѝ ѹ҆мы́слитъ воздви́гнꙋти и҆ны́й ѻ҆лта́рь, вопрекѝ церко́вной вѣ́рѣ и҆ ѹ҆ста́вꙋ: таковы́й да не бꙋ́детъ ѡ҆ста́вленъ без̾ наказа́нія. Собо́ръ ре́къ: а҆́ще кото́рый пресвѵ́теръ, проти́вꙋ є҆пі́скопа своегѡ̀ возгордя́сь, сотвори́тъ раско́лъ: да бꙋ́детъ а҆на́ѳема.

ПРА́ВИЛО а҃і.

А҆́ще кото́рый пресвѵ́теръ въ свое́мъ поведе́ніи ѡ҆сꙋжде́нъ бꙋ́детъ: таковы́й до́лженъ сосѣ́днимъ є҆пі́скопамъ возвѣсти́ти, дабы̀ ѻ҆нѝ вы́слꙋшали дѣ́ло, и҆ дабы̀ чрез̾ ни́хъ примири́лся ѻ҆́нъ съ свои́мъ є҆пі́скопомъ. А҆́ще же сегѡ̀ не сотвори́тъ, но [̾ѿ чегѡ̀ да сохрани́тъ бг҃ъ] надмева́ясь го́рдостгю, ѹ҆дали́тъ са́мъ себя̀ ̾ѿ ѻ҆бще́нія съ свои́мъ є҆пі́скопомъ, и҆ вмѣ́стѣ съ нѣ́которыми производя̀ раско́лъ, принесе́тъ бг҃ꙋ ст҃о́е приноше́ніе: таковы́й да бꙋ́детъ признава́емъ находя́щимся под̾ кля́твою, и҆ да лиши́тся своегѡ̀ мѣ́ста, впро́чемъ съ разсмотрѣ́ніс. р҃чемъ, не и҆мѣ́етъ ли справедли́выя жа́лобы на є҆пі́скопа.

ПРА́ВИЛО в҃і.

Фи́ліѯъ є҆пі́скопъ ре́къ: да внесе́тся въ пра̑вила, согла́снѡ съ ѡ҆предѣле́ніями дре́внихъ собо́рѡвъ и҆ сіѐ: а҆́ще кото́рый є҆пі́скопъ [є҆́же да не бꙋ́детъ] подве́ргнется нѣ́коемꙋ ѡ҆бвине́нію, и҆, по вели́кимъ затрꙋдне́ніямъ, не мо́жно бꙋ́детъ собра́тися мнѡ́гимъ є҆пі́скопамъ: то, дабы̀ ѻ҆́нъ не ѡ҆става́лся до́лгѡ под̾ ѡ҆бвине́ніемъ, да слꙋ́шаютъ є҆гѡ̀ на сꙋдѣ̀ двана́десять є҆пі́скопѡвъ, пресвѵ́тера — ше́сть є҆пі́скопѡвъ и҆ сво́й: а҆ діа́кона — трѝ.

ПРА́ВИЛО г҃і.

Мно́гіе є҆пі́скопы, собра́вшись, да поставля́ютъ є҆пі́скопа. А҆ по нꙋ́ждѣ трѝ є҆пі́скопа, въ како́мъ бы мѣ́стѣ ни бы́ли ѻ҆нѝ, по повелѣ́нію пе́рвенствꙋющагѡ, да поста́вятъ є҆пі́скопа. И҆ а҆́ще кто̀ постꙋ́питъ въ че́мъ либо вопрекѝ своемꙋ̀ согла́сію и҆лѝ подписа́нію: са́мъ себя̀ лиши́тъ че́сти.

ПРА́ВИЛО д҃і.

Разсꙋждено̀, что́бы и҆з̾ тріпо́ля, ра́ди скꙋ́дости страны̀, є҆ди́нъ є҆пі́скопъ приходи́лъ для мѣстоблюсти́тельства въ собо́рѣ, и҆ что́бы та́мѡ на сꙋдѣ̀ слꙋ́шали пресвѵ́тера пя́ть є҆пі́скопѡвъ, а҆ діа́кона — трѝ, ка́къ вы́ше рече́но: ꙗ҆́вно же є҆́сть, ꙗ҆́кѡ предсѣда́ти бꙋ́детъ сво́й є҆пі́скопъ.

ПРА́ВИЛО є҃і.

Разсꙋждено̀ та́кожде, что́бы кто́ бы то̀ ни бы́лъ и҆з̾ є҆пі́скопѡвъ, и҆лѝ пресвѵ́терѡвъ, и҆лѝ діа́конѡвъ, и҆лѝ приче́тникѡвъ, а҆́ще и҆мѣ́я возни́кшее въ це́ркви дѣ́ло ѡ҆бвини́тельное и҆лѝ тя́жебное, ̾ѿрече́тся ̾ѿ церко́внагѡ сꙋда̀, и҆ восхо́щетъ ѡ҆правда́тися пред̾ сꙋди́лищами свѣ́тскими, лиша́лся своегѡ̀ мѣ̑ста, хотя́ бы и҆ въ по́льзꙋ є҆гѡ̀ рѣше́ніе послѣ́довало. И҆ сіѐ по дѣ́лꙋ ѡ҆бвини́тельномꙋ, по дѣ́лꙋ же с. рч҃а тя́жебномꙋ да лиша́ется тогѡ̀, что̀ пріѡбрѣ́лъ по рѣше́нію дѣ́ла, а҆́ще хо́щетъ ѹ҆держа́ти мѣ́сто своѐ.

ПРА́ВИЛО ѕ҃і.

Разсꙋждено̀ та́кожде и҆ сіѐ: а҆́ще ̾ѿ каки́хъ бы то̀ ни бы́ло сꙋде́й церко́вныхъ сꙋ́дное дѣ́ло пренесе́но бꙋ́детъ къ дрꙋги́мъ сꙋдія́мъ церкѡ́внымъ, и҆мѣ́ющымъ вы́сшꙋю вла́сть: да не бꙋ́детъ никако́гѡ нарека́нія тѣ̑мъ, ко́ихъ пригово́ръ ̾ѿмѣне́нъ бꙋ́детъ, а҆́ще не мо́гꙋтъ бы́ти ѡ҆бличе́ны, ꙗ҆́кѡ и҆лѝ по враждѣ̀ и҆лѝ по пристра́стію ѡ҆сꙋди́ли, и҆лѝ нѣ́кимъ ѹ҆гожде́ніемъ прельще́ны бы́ли.

ПРА́ВИЛО з҃і.

А҆́ще же по согла́сію ѻ҆бѣ́ихъ сторо́нъ сꙋ́дящихся и҆́збраны бꙋ́дꙋтъ сꙋдіѝ: то, хотя́ бы число̀ и҆́хъ бы́ло ме́нѣе ѡ҆предѣле́ннагѡ въ пра́вилахъ, да не бꙋ́детъ позво́лено преноси́ти сꙋ́дъ къ дрꙋги́мъ.

ПРА́ВИЛО и҃і.

Дѣ́тямъ свяще́нникѡвъ не представля́ти мірски́хъ позо́рищъ, и҆ не зрѣ́ти ѻ҆́ныхъ. Сіе́ же и҆ всѣ́мъ хрістіа́намъ всегда̀ проповѣ́дꙋемо бы́ло, да не вхо́дятъ тꙋда̀, гдѣ̀ быва́ютъ хꙋлє́нія.

ПРА́ВИЛО ѳ҃і.

Разсꙋждено̀, да не быва́ютъ є҆пі́скопы и҆ пресвѵ́теры и҆ діа́коны ̾ѿкꙋпа́телями ра́ди коры́сти, и҆лѝ ѹ҆прави́телями, и҆ да не пріѡбрѣта́ютъ пропита́нія заня́тіемъ безче́стнымъ и҆лѝ презри́тельнымъ. И҆́бо долженствꙋ́ютъ взира́ти на напи́санное: никто̀ во́инствꙋя бг҃ꙋ не ѡ҆бязꙋ́ется кꙋ́плями жите́йскими[1].

ПРА́ВИЛО к҃.

Чтецѡ́въ приходя́щихъ въ соверше́нный во́зрастъ побꙋжда́ти, и҆лѝ ко встꙋпле́нію въ сꙋпрꙋ́жество, и҆лѝ къ ѻ҆бѣ́тꙋ цѣломꙋ́дрія.

с. рч҃в

ПРА́ВИЛО к҃а.

Разсꙋждено̀ та́кожде, что́бы кли́рікъ да́вшій въ заи́мъ дє́ньги, сто́лькѡ же де́негъ и҆ полꙋча́лъ: а҆ да́вшій вє́щи полꙋча́лъ, ско́лькѡ да́лъ.

ПРА́ВИЛО к҃в.

Діа́коны да не бꙋ́дꙋтъ поставля́емы ра́нѣе два́десяти пятѝ лѣ́тъ во́зраста.

ПРА́ВИЛО к҃г.

Чтецы̀ во вре́мя бг҃ослꙋже́нія да не кла́няются наро́дꙋ.

ПРА́ВИЛО к҃д.

Заблагоразсꙋждено̀, что́бы маѵріта́нія сітіфе́нская и҆мѣ́ла своего̀ пе́рвенствꙋющаго є҆пі́скопа, та́къ ка́къ ѻ҆на̀ проси́ла ѡ҆ се́мъ пе́рвенствꙋющаго є҆пі́скопа нꙋміді́йскія страны̀, ̾ѿ ко́ея ̾ѿдѣлена̀ собо́ромъ. По согла́сію всѣ́хъ пе́рвенствꙋющихъ є҆пі́скопѡвъ а҆фріка́нскихъ ѻ҆бласте́й и҆ всѣ́хъ є҆пі́скопѡвъ, дозво́лено є҆́й и҆мѣ́ти своего̀ пе́рвенствꙋющаго, по є҆я̀ ̾ѿдале́нности.

ПРА́ВИЛО к҃є.

Заблагоразсꙋждено̀ та́кожде: рꙋкополага́ємымъ въ є҆пі́скопа, и҆лѝ въ сте́пєни при́чта, рꙋкополага́ющіе предвари́тельнѡ да влага́ютъ во ѹ҆́ши постановлє́нія собо́рѡвъ, дабы̀ не постꙋпа́ли вопрекѝ ѡ҆предѣле́ніямъ собо́ра, и҆ не раскаява́лись.

ПРА́ВИЛО к҃ѕ.

Положено̀, да не да́стся є҆ѵхарі́стіа тѣла́мъ сконча́вшихся. И҆́бо пи́сано є҆́сть: пріими́те, ꙗ҆ди́те[2], но тѣла̀ ме́ртвыхъ ни прія́ти, ни ꙗ҆́сти не мо́гꙋтъ. Та́кожде да не подви́гнется невѣ́жество пресвѵ́терѡвъ крести́ти сконча́вшихся ѹ҆жѐ.

ПРА́ВИЛО к҃з.

Подтверди́ти подоба́етъ на се́мъ ст҃о́мъ собо́рѣ, что́с. рч҃гбы по пра́виламъ ніке́йскагѡ собо́ра ра́ди церко́вныхъ дѣ́лъ, котѡ́рыя не рѣ́дкѡ ̾ѿлага́ются со вредо́мъ для наро́да, каждого́днѡ бы́лъ созыва́емъ собо́ръ, на кото́рый бы всѣ̀, занима́ющіе пе́рвыя въ ѻ҆бластя́хъ каѳє́дры, присыла́ли ̾ѿ свои́хъ собо́рѡвъ двꙋ́хъ, и҆лѝ ско́лькѡ и҆зберꙋ́тъ, є҆пі́скопѡвъ, въ мѣстоблюсти́тели, дабы̀ соста́вившееся таки́мъ ѻ҆́бразомъ собра́ніе могло̀ и҆мѣ́ти соверше́нное полномо́чіе.

ПРА́ВИЛО к҃и.

А҆́ще кто̀ и҆з̾ є҆пі́скопѡвъ подве́ргнется ѡ҆бвине́нію: ѡ҆бвини́тель да предста́витъ дѣ́ло къ пе́рвенствꙋющемꙋ въ ѻ҆́бласти, къ кото́рой принадлежи́тъ ѡ҆бвиня́емый, и҆ да не бꙋ́детъ ѡ҆бвиня́емый ̾ѿчꙋжде́нъ ̾ѿ ѻ҆бще́нія, ра́звѣ когда̀, бы́въ при́званъ къ ̾ѿвѣ́тꙋ гра́мотою, не ꙗ҆́вится въ сꙋ́дъ и҆́збранныхъ сꙋди́ти є҆го̀ въ назна́ченное вре́мя, то́ є҆сть, въ тече́ніе мѣ́сяца ̾ѿ тогѡ̀ дня̀, въ кото́рый, по дозна́нію, полꙋчена̀ и҆́мъ гра́мота. А҆́ще же предста́витъ и҆́стинныя и҆ неѡбходи̑мыя причи̑ны, препя́тствовавшыя є҆мꙋ̀ ꙗ҆ви́тися къ ̾ѿвѣ́тꙋ проти́вꙋ тогѡ̀, что̀ на него̀ предста́влено: то без̾ предѡсꙋжде́нія да и҆мѣ́етъ свобо́дꙋ къ ѡ҆правда́нію въ тече́ніе дрꙋга́гѡ мѣ́сяца: но, по проше́ствіи дрꙋга́гѡ мѣ́сяца, да не бꙋ́детъ въ ѻ҆бще́ніи, доко́лѣ не ѡ҆чи́ститъ себя̀ доказа́тельствами по дѣ́лꙋ. А҆́ще же пред̾ всецѣ́лый тогѡ̀ лѣ́та собо́ръ ꙗ҆ви́тися не восхо́щетъ, дабы̀,по кра́йней мѣ́рѣ, та́мѡ дѣ́ло є҆гѡ̀ ѡ҆ко́нчано бы́ло: то и҆мѣ́етъ бы́ти сꙋжде́нъ, ка́къ произне́сшій пригово́ръ са́мъ про́тивъ себя̀. Во вре́мя же, въ кото́рое ѻ҆́нъ ѡ҆стае́тся внѣ̀ ѻ҆бще́нія, да не пріѡбща́ется ни въ свое́й це́ркви, ни во все́мъ предѣ́лѣ. Напро́тивъ тогѡ̀, доноси́телю на него̀, а҆́ще никꙋда̀ не ̾ѿлꙋча́лся во днѝ с. рч҃д разсмотрѣ́нія дѣ́ла є҆гѡ̀, ̾ѿню́дь да не возбрани́тся ѻ҆бще́ніе. Но а҆́ще ѹ҆дали́тся и҆ сокро́ется: то є҆пі́скопъ да бꙋ́детъ возвраще́нъ въ ѻ҆бще́ніе, а҆ са́мъ доноси́тель да и҆зри́нется ̾ѿ ѻ҆бще́нія, впро́чемъ та́къ, что́бы не была̀ ̾ѿя́та ѹ҆ негѡ̀ свобо́да подтверди́ти ѡ҆бвине́ніе: а҆́ще мо́жетъ доказа́ти, ꙗ҆́кѡ не предста́лъ къ сꙋдꙋ̀ не по нехотѣ́нію, а҆ по невозмо́жности. Сіѐ впро́чемъ ꙗ҆́вно є҆́сть, ꙗ҆́кѡ а҆́ще во вре́мя движе́нія дѣ́ла въ сꙋдѣ̀ є҆пі́скопѡвъ, ѡ҆поро́чено бꙋ́детъ лицѐ доноси́тся: то не до́лжно пріима́ти ̾ѿ негѡ̀ ѡ҆бвине́нія, ра́звѣ то́кмѡ пожела́етъ ѻ҆́нъ разсмотрѣ́нія своегѡ̀ со́бственнагѡ, а҆ не церко́внагѡ дѣ́ла.

ПРА́ВИЛО к҃ѳ.

А҆́ще пресвѵ́теры, и҆лѝ діа́коны ѡ҆бвиня́емы бꙋ́дꙋтъ: то, по собра́ніи ѹ҆законе́ннагѡ числа̀ и҆з̾ бли́жнихъ мѣ́стъ и҆збира́емыхъ є҆пі́скопѡвъ, кото́рыхъ ѡ҆бвиня́емые воспро́сятъ, то́ є҆сть, при ѡ҆бвине́ніи на пресвѵ́тера шестѝ, а҆ для діа́кона тре́хъ, вмѣ́стѣ съ си́ми со́бственный ѡ҆бвиня́емыхъ є҆пі́скопъ и҆зслѣ́дꙋетъ принесє́нныя на ни́хъ ѡ҆бвинє́нія, съ соблюде́ніемъ тѣ́хъ же пра́вилъ, каса́тельнѡ дне́й и҆ сро́кѡвъ, и҆ и҆зслѣ́дованія, и҆ ли́цъ ѡ҆бвиня́ющагѡ и҆ ѡ҆бвиня́емагѡ. Дѣла́ же по вина́мъ про́чихъ кли́рікѡвъ є҆ди́нъ мѣ́стный є҆пі́скопъ да разсмо́тритъ и҆ ѡ҆ко́нчитъ.

ПРА́ВИЛО л҃.

Заблагоразсꙋждено̀, что́бы дѣ́ти состоя́щихъ въ кли́рѣ не совокꙋпля́лись бра́комъ съ ꙗ҆зы́чниками и҆лѝ съ є҆ретіка́ми.

ПРА́ВИЛО л҃а.

Є҆пі́скопы и҆ состоя́щіе въ кли́рѣ да не ѹ҆сво́иваютъ ничегѡ̀ тѣ́мъ, ко́и не сꙋ́ть правосла́вные хрістіа́не, хотя́ бы то̀ бы́ли сро́дники: ничегѡ̀ и҆з̾ свои́хъ веще́й, ка́къ рече́но, да не ѹ҆про́(рч҃є)чиваютъ таковы̑мъ, посре́дствомъ да́ра, є҆пі́скопы и҆ состоя́щіе въ кли́рѣ.

ПРА́ВИЛО л҃в.

Є҆пі́скопы не и҆на́че да ̾ѿхо́дятъ за мо́ре[3], ка́къ по разрѣше́нію своегѡ̀ по ка́ждой ѻ҆́бласти є҆пі́скопа пе́рвагѡ престо́ла, то́ є҆сть, взя́въ преимꙋ́щественнѡ ̾ѿ самогѡ̀ пе́рвенствꙋющагѡ є҆пі́скопа, та́къ и҆менꙋ́емꙋю ̾ѿпꙋсти́тельнꙋю гра́матꙋ, и҆лѝ ѡ҆добре́ніе.

ПРА́ВИЛО л҃г.

Постано́влено та́кожде, да не чита́ется ничто̀ въ це́ркви под̾ и҆́менемъ бж҃е́ственныхъ писа́ній, кро́мѣ писа́ній каноні́ческихъ. Каноні́чєскія же писа̑нія сꙋ́ть сіѝ: бытіѐ, и҆схо́дъ, леѵі́тъ, чи̑сла, второзако́ніе, і҆исꙋ́съ наѵи́нъ, сꙋдіѝ, рꙋ́ѳь, ца́рствъ четы́ре кни́ги, параліпоме́нѡнъ двѣ̀, і҆́ѡвъ, ѱалти́рь, соломѡ́новыхъ кни́гъ четы́ре, проро́ческихъ кни́гъ двана́десять, и҆са́іа, і҆еремі́а, і҆езекі́иль, даніи́лъ, тѡві́а, і҆ꙋді́ѳь, є҆сѳи́рь, є҆́здры кни́ги. Но́вагѡ завѣ́та: четы́ре є҆ѵⷢ҇ліа, дѣя́ній а҆по́столѡвъ ѻ҆дна̀ кни́га, посла́ній па́ѵла четырена́десять, петра̀ а҆по́стола два̀, і҆ѡа́нна а҆по́стола трѝ, і҆а́кѡва а҆по́стола є҆ди́на, і҆ꙋ́ды а҆по́стола є҆ди́на, а҆пока́лѷѱісъ і҆ѡа́нна кни́га є҆ди́на. Для тве́рдости же предлежа́щагѡ пра́вила да бꙋ́детъ и҆звѣще́нъ ѡ҆ се́мъ бра́тъ и҆ сослꙋжи́тель на́шъ воніфа́тій[4] и҆ про́чіе є҆пі́скопы тѣ́хъ стра́нъ: и҆́бо мы̀ прія́ли ̾ѿ ѻ҆тцє́въ, что̀ сіѝ кни́ги чита́ти подоба́етъ въ це́ркви.

ПРА́ВИЛО л҃д.

А҆ѵри́лій є҆пі́скопъ ре́къ: къ си́мъ, честнѣ́йшіе бра́тія, при разсꙋжде́ніи ѡ҆ воздержа́ніи нѣ́которыхъ и҆з̾ кли́ра, кромѣ̀ чтецѡ́въ, ̾ѿ свои́хъ же́нъ, присовокꙋпля́ю ѹ҆твержде́нное на с. рч҃ѕ ра́зныхъ собо́рахъ: ѵ҆подіа́коны свящє́ннымъ та́йнамъ прикаса́ющіеся, и҆ діа́коны и҆ пресвѵ́теры, та́кожде и҆ є҆пі́скопы, по сво́йственномꙋ ка́ждой и҆з̾ си́хъ сте́пеней пра́вилꙋ, да возде́рживаются ̾ѿ же́нъ свои́хъ, и҆ да бꙋ́дꙋтъ, ꙗ҆́кѡ не и҆мѣ́ющіе и҆́хъ: и҆ а҆́ще сегѡ̀ не сотворя́тъ, то да бꙋ́дꙋтъ и҆зве́ржены ̾ѿ церко́внагѡ чи́на. Про́чіе же приче́тники да не принꙋжда́ются къ семꙋ̀, ра́звѣ въ прекло́нныхъ лѣ́тахъ. Ве́сь собо́ръ ре́къ: ва́шею святы́нею пра́веднѡ распредѣля́емое, ꙗ҆́кѡ прили́чное свяще́нствꙋ и҆ бг҃оꙋго́дное, ѹ҆твержда́емъ.

{комм.}Сіѐ пра́вило, подо́бнѡ ка́къ и҆ д҃ сегѡ̀ собо́ра, ѡ҆б̾ясня́ется и҆ дополня́ется в҃і и҆ г҃і пра́вилами шеста́гѡ вселе́нскагѡ собо́ра.

ПРА́ВИЛО л҃є.

Положено̀, что́бы никто̀ не продава́лъ церко́вныя со́бственности: но а҆́ще сія̀ со́бственность не прино́ситъ дохо́дѡвъ, и҆ настои́тъ вели́кая нꙋ́жда: то представля́ти ѡ҆ се́мъ пе́рвенствꙋющемꙋ є҆пі́скопꙋ ѻ҆́бласти, и҆ съ ѡ҆предѣле́ннымъ число́мъ є҆пі́скопѡвъ совѣща́тися, что̀ ѹ҆чини́ти до́лжно. А҆́ще же толи́кая нꙋ́жда настои́тъ для це́ркви, ꙗ҆́кѡ не возмо́жно совѣща́тися пре́жде прода́нія: то да призове́тъ є҆пі́скопъ во свидѣ́тельство хотя̀ сосѣ́днихъ є҆пі́скопѡвъ, и҆ да попече́тся предста́вити собо́рꙋ всѣ̀ прилꙋчи́вшыяся це́ркви є҆гѡ̀ ѡ҆бстоя́тєльства. А҆́ще сегѡ̀ не сотвори́тъ: то продаю́щій ꙗ҆́вится пови́ннымъ пред̾ бг҃омъ и҆ собо́ромъ, и҆ лиши́тся своея̀ че́сти.

ПРА́ВИЛО л҃ѕ.

Та́кожде подтверждено̀, на пресвѵ́терѡвъ и҆лѝ діа́конѡвъ, ѡ҆бличе́нныхъ въ нѣ́коемъ тя́жкомъ грѣхѣ̀, неизбѣ́жнѡ ѹ҆даля́ющемъ ̾ѿ священнослꙋже́нія, не возлага́ти рꙋ́къ, ꙗ҆́кѡ на ка́ющихся, и҆лѝ ꙗ҆́кѡ на вѣ́рныхъ міря́нъ, и҆ не попꙋс. рч҃зска́ти и҆̀мъ, крести́тися вно́вь, и҆ восходи́ти на сте́пень кли́ра.

ПРА́ВИЛО л҃з.

Ѡ҆предѣлено̀ та́кожде, что́бы, когда̀ пресвѵ́теры и҆ діа́коны, и҆ про́чіе ни́зшіе приче́тники, по возни́кшымъ ѹ҆ ни́хъ дѣла́мъ, жа́лꙋются на сꙋ́дъ свои́хъ є҆пі́скопѡвъ, выслꙋ́шивали и҆̀хъ сосѣ́дніе є҆пі́скопы, и҆ что́бы, съ согла́сія со́бственныхъ и҆́хъ є҆пі́скопѡвъ, прекраща́ли возни́кшыя междꙋ̀ и҆́ми неꙋдовѡ́льствія приглаше́нные и҆́ми є҆пі́скопы. Тогѡ̀ ра́ди а҆́ще и҆ ̾ѿ си́хъ къ вы́сшемꙋ сꙋдꙋ̀ восхотя́тъ пренестѝ дѣ́ло: да не прено́сятъ въ сꙋды̀ по тꙋ̀ сто́ронꙋ мо́ря[5], но къ пе́рвенствꙋющымъ є҆пі́скопамъ свои́хъ ѻ҆бласте́й, ꙗ҆́коже мно́гажды ѡ҆предѣлено̀ сіѐ и҆ ѡ҆ є҆пі́скопахъ. А҆ перенося́щіе дѣ́ло къ сꙋда́мъ по тꙋ̀ сто́ронꙋ мо́ря, никѣ́мъ въ а҆́фрікѣ да не пріе́млются въ ѻ҆бще́ніе.

ПРА́ВИЛО л҃и.

Ѹ҆го́дно всемꙋ̀ собо́рꙋ, что́бы ̾ѿлꙋче́нный за своѐ небреже́ніе ̾ѿ ѻ҆бще́нія, є҆пі́скопъ ли, и҆лѝ кто́ бы то̀ ни бы́лъ и҆з̾ кли́ра, во вре́мя ̾ѿлꙋче́нія своегѡ̀, пре́жде вы́слꙋшанія ѡ҆правда́нія є҆гѡ̀, дерза́ющій пристꙋпа́ти къ ѻ҆бще́нію, признава́емъ бы́лъ произне́сшимъ са́мъ на себя̀ пригово́ръ ѡ҆сꙋжде́нія.

ПРА́ВИЛО л҃ѳ.

Положено̀: ѡ҆бвиня́емомꙋ, и҆лѝ ѡ҆бвиня́ющемꙋ, ѡ҆паса́ющемꙋся нѣ́коегѡ наси́лія ̾ѿ безпоко́йнагѡ многолю́дства въ то́мъ мѣ́стѣ, гдѣ̀ нахо́дится ѡ҆бвиня́емый, и҆збира́ти для себя̀ ближа́йшее мѣ́сто, гдѣ̀ не бы́ло бы є҆мꙋ̀ трꙋ́дности предста́вити свидѣ́телей, гдѣ̀ и҆ ѡ҆ка́нчивается дѣ́ло.

ПРА́ВИЛО м҃.

Ѡ҆предѣлено̀ та́кожде: а҆́ще кото́рые либо приче́тники и҆ діа́коны бꙋ́дꙋтъ непослꙋ́шс. рч҃ины є҆пі́скопамъ свои́мъ, хотя́щымъ по неѡбходи́мымъ ѡ҆бстоя́тельствамъ свои́хъ церкве́й, возвестѝ и҆̀хъ на вы́сшыя сте́пени въ це́ркви свое́й: таковы́е да не слꙋ́жатъ и҆ въ то́мъ сте́пени, и҆з̾ кото́рагѡ возведены̀ бы́ти не восхотѣ́ли.

ПРА́ВИЛО м҃а.

Ѡ҆предѣлено̀: а҆́ще є҆пі́скопы, пресвѵ́теры, діа́коны, и҆лѝ какі́е бы то̀ ни бы́ло кли́ріки, никако́гѡ стяжа́нія не и҆мѣ́ющіе, по поставле́ніи свое́мъ, во вре́мя своегѡ̀ є҆пі́скопства и҆лѝ кли́річества, кꙋ́пятъ на и҆́мя своѐ зє́мли, и҆лѝ какі́я либо ѹ҆гѡ́дія: то да почита́ются похити́телями стяжа́ній гд҃ⷭ҇нихъ, ра́звѣ то́кмѡ, прія́въ ѹ҆вѣща́ніе, ̾ѿдадꙋ́тъ ѻ҆́ныя це́ркви. А҆́ще же что̀ дойде́тъ къ ни́мъ въ со́бственность, по да́рꙋ ̾ѿ когѡ́ либо, и҆лѝ по наслѣ́дію ̾ѿ ро́дственникѡвъ: съ тѣ́мъ да постꙋ́пятъ по своемꙋ̀ произволе́нію. А҆́ще же, и҆ произво́ливъ да́ти что́ либо це́ркви, ѡ҆братя́тся вспя́ть: да бꙋ́дꙋтъ признава́емы недосто́йными церко́вныя че́сти, и҆ ̾ѿве́рженными.

ПРА́ВИЛО м҃в.

Ѡ҆предѣлено̀ та́кожде, что́бы пресвѵ́теры, без̾ соизволе́нія свои́хъ є҆пі́скопѡвъ, не продава́ли веще́й це́ркви, въ кото́рой посвящены̀. Ра́внѡ и҆ є҆пі́скопамъ не позволи́тельно продава́ти церкѡ́вныя зе́мли, без̾ вѣ́дома собо́ра и҆лѝ свои́хъ пресвѵ́терѡвъ. Тогѡ̀ ра́ди, кромѣ̀ нꙋ́жды, и҆ є҆пі́скопꙋ не позволи́тельно расточа́ти вє́щи, находя́щыяся въ церко́вной ѻ҆́писи.

ПРА́ВИЛО м҃г.

Ѡ҆ то́мъ, ꙗ҆́кѡ ничто̀ и҆з̾ поло́женнагѡ на і҆ппѡ́нскомъ собо́рѣ не тре́бꙋетъ и҆справле́нія.

Є҆піго́ній є҆пі́скопъ ре́къ: въ се́мъ сокраще́ніи, и҆звлече́нномъ и҆з̾ дѣя́ній і҆ппѡ́нс. рч҃ѳскагѡ собо́ра, ничегѡ̀ не признаю̀ тре́бꙋющимъ и҆справле́нія и҆лѝ дополне́нія, ра́звѣ то́кмѡ, что́бы де́нь святы́я па́схи предвозвѣща́емъ бы́лъ во вре́мя собо́ра.

{комм.}Сіѐ пра́вило є҆́сть мѣ́стное, но принадлежи́тъ къ ѻ҆́бщемꙋ церко́вномꙋ законоположе́нію, потомꙋ̀ что̀ слꙋ́житъ свидѣ́тельствомъ вла́сти бо́льшагѡ собо́ра и҆справля́ть ѡ҆предѣ́лєнія ме́ньшагѡ.

ПРА́ВИЛО м҃д.

Є҆пі́скопы и҆ кли́ріки да не позволя́ютъ дѣ́тямъ свои́мъ ̾ѿходи́ти на свою̀ во́лю, чрез̾ ̾ѿдѣле́ніе и҆́хъ ̾ѿ себя̀, а҆́ще не соверше́ннѡ полага́ются на и҆́хъ нра́вы и҆ во́зрастъ: дабы̀ въ послѣ́дствіи грѣхѝ и҆́хъ не па́ли на сами́хъ роди́телей.

ПРА́ВИЛО м҃є.

Є҆пі́скопы и҆ пресвѵ́теры и҆ діа́коны не пре́жде да поставля́ются, ра́звѣ когда̀ всѣ́хъ въ до́мѣ свое́мъ содѣ́лаютъ правосла́вными хрістіа́нами.

ПРА́ВИЛО м҃ѕ.

Въ святи́лищѣ да не прино́сится ничто̀ кромѣ̀ тѣ́ла и҆ кро́ви гд҃ⷭ҇ни, ꙗ҆́коже и҆ са́мъ гд҃ⷭ҇ь пре́далъ, то́ є҆сть, кромѣ̀ хлѣ́ба и҆ віна̀, водо́ю растворе́ннагѡ. Нача́тки же, и҆лѝ ме́дъ, и҆лѝ млеко̀, по ѻ҆бы́чаю, да прино́сятся въ є҆ди́нъ и҆звѣ́стный де́нь, ка́къ таи́нственное зна́меніе младе́нцєвъ. Хотя́ же сіѝ вє́щи и҆ прино́сятся къ ѻ҆лтарю̀: впро́чемъ да и҆мѣ́ютъ со́бственнѡ своѐ благослове́ніе, ̾ѿдѣля́ясь ̾ѿ святы́ни тѣ́ла и҆ кро́ви гд҃ⷭ҇ни. Нача́тки же да не прино́сятся ни ̾ѿ чегѡ̀, кромѣ̀ віногра́да и҆ пшени́цы.

{комм.}Ча́сть сегѡ̀ пра́вила ѡ҆ млекѣ̀ и҆ ме́дѣ и҆спра́вилъ шесты́й вселе́нскій собо́ръ свои́мъ пра́виломъ н҃з.

ПРА́ВИЛО м҃з.

Кли́ріки, и҆лѝ возде́ржники, ко вдова́мъ и҆лѝ къ дѣ́вамъ да не вхо́дятъ, ра́звѣ съ разрѣше́нія и҆ согла́сія є҆пі́скопа своегѡ̀ и҆лѝ с. с҃ пресвѵ́терѡвъ: но и҆ въ се́мъ слꙋ́чаѣ да вхо́дятъ не ѻ҆днѝ, а҆ съ дрꙋги́ми кли́ріками, и҆лѝ съ тѣ́ми, съ кото́рыми є҆пі́скопъ и҆лѝ є҆ди́ные пресвѵ́теры и҆мѣ́ютъ вхо́дъ къ таковы́мъ жена́мъ: и҆ли́ же да бесѣ́дꙋютъ съ ни́ми та́мъ, гдѣ̀ присꙋ́тствꙋютъ кли́ріки, и҆лѝ нѣ́кіе почте́нные хрістіа́не.

ПРА́ВИЛО м҃и.

Є҆пі́скопъ пе́рвагѡ престо́ла да не и҆менꙋ́ется є҆ѯа́рхомъ і҆ере́євъ, и҆лѝ верхо́внымъ сщ҃е́нникомъ, и҆лѝ чѣ́мъ либо подо́бнымъ, но то́кмѡ є҆пі́скопомъ пе́рвагѡ престо́ла.

ПРА́ВИЛО м҃ѳ.

Кли́ріки, ра́ди ꙗ҆́стія и҆ питія̀, да не вхо́дятъ въ корче́мницы, ра́звѣ бы́въ понꙋ́ждены неѡбходи́мостію вита́нія на пꙋтѝ.

ПРА́ВИЛО н҃.

Свято́е та́инство ѻ҆лтаря̀ да соверша́ется людьмѝ не ꙗ҆́дшими. И҆зключа́ется и҆з̾ сегѡ̀ є҆ди́ный въ годꙋ̀ де́нь, въ кото́рый ве́черя гд҃ⷭ҇ня соверша́ется. А҆́ще же па́мять бꙋ́детъ нѣ́кіихъ въ вече́рнее вре́мя сконча́вшихся, є҆пі́скопѡвъ, и҆лѝ про́чихъ: то да соверши́тся ѻ҆на̀ моли́твами то́кмѡ, когда̀ соверша́ющіе ѻ҆́нꙋю ѡ҆ка́жꙋтся ѻ҆бѣ́давшими.

{комм.}Что̀ и҆ літꙋргі́а вели́кагѡ четвертка̀, хотя̀ по́зже ѻ҆бѣ́деннагѡ вре́мени, но та́кже не ꙗ҆́дшими должна̀ бы́ть соверша́ема, сіѐ сказꙋ́ется сегѡ́ же собо́ра въ пра́вилѣ н҃и, и҆ шеста́гѡ вселе́нскагѡ собо́ра въ пра́вилѣ к҃ѳ.

ПРА́ВИЛО н҃а.

Є҆пі́скопы, и҆лѝ кли́ріки въ це́ркви да не пи́ршествꙋютъ: ра́звѣ слꙋчи́тся по нꙋ́ждѣ стра́нствованія въ не́й ̾ѿдохнове́ніе и҆мѣ́ти. И҆ міря́намъ, є҆ли́кѡ мо́жно, да возбраня́ются таковы́я пи́ршєства.

ПРА́ВИЛО н҃в.

Ка́ющымся вре́мя покая́нія, по разли́чію грѣхѡ́въ, да назнача́ется сꙋдо́мъ є҆пі́скопѡвъ: пресвѵ́теръ же без̾ с. с҃а во́ли є҆пі́скопа не разрѣша́етъ ка́ющагѡся, ра́звѣ во вре́мя належа́щія нꙋ́жды, въ ̾ѿсꙋ́тствіи є҆пі́скопа. На вся́каго же ка́ющагося, а҆́ще престꙋпле́ніе є҆гѡ̀ бы́ло ꙗ҆́вное и҆ гла́сное, смꙋща́ющее всю̀ цр҃ковь, да возлага́ема бꙋ́детъ рꙋка̀ въ притво́рѣ хра́ма.

ПРА́ВИЛО н҃г.

Дѣ́вы посвящє́нныя бг҃ꙋ, когда̀ разлꙋча́ются съ ѻ҆тца́ми, соблюда́вшими и҆̀хъ, попече́ніемъ є҆пі́скопа, и҆лѝ въ ̾ѿсꙋ́тствіи є҆гѡ̀, пресвѵ́тера, да бꙋ́дꙋтъ порꙋча́емы честнѣ́йшымъ жена́мъ: и҆лѝ, живя̀ кꙋ́пнѡ, да храня́тъ взаи́мнѡ дрꙋ́гъ дрꙋ́га, дабы̀ скита́ясь повсю́дꙋ, не повреди́ли до́брой сла́вѣ цр҃кви.

ПРА́ВИЛО н҃д.

Боля́щіе, кото́рые за себя̀ ̾ѿвѣща́ти не мо́гꙋтъ, да бꙋ́дꙋтъ креща́емы тогда̀, когда̀, по и҆́хъ и҆зволе́нію, и҆зрекꙋ́тъ свидѣ́тельство ѡ҆ ни́хъ дрꙋгі́е, под̾ со́бственною ̾ѿвѣ́тственностію.

ПРА́ВИЛО н҃є.

Позо́рищные и҆ глꙋмя́щіеся на зрѣ́лищахъ и҆ про́чія таковы́я ли́ца, и҆лѝ ̾ѿстꙋ́пники, ка́ющіеся и҆ ѡ҆браща́ющіеся къ бг҃ꙋ, да не лиша́ются благода́ти и҆лѝ примире́нія.

ПРА́ВИЛО н҃ѕ.

Позволя́ется и҆ впре́дь чита́ти страда̑нія мꙋ́ченикѡвъ во днѝ, когда̀ соверша́ется є҆жего́дная па́мять и҆́хъ.

ПРА́ВИЛО н҃з.

Ѡ҆ донаті́стахъ, и҆ ѡ҆ дѣ́тяхъ креще́нныхъ донаті́стами.

Заблагоразсꙋди́ли мы̀, да вопро́симъ бра́тію и҆ сослꙋжи́телей на́шихъ, сѷрікі́а и҆ сімплікіа́на, ѡ҆ младе́нцахъ то́кмѡ креще́нныхъ донаті́стами, дабы̀ то̀, что̀ содѣ́лано над̾ ни́ми, не по и҆́хъ произволе́нію, а҆ по заблꙋжде́нію роди́телей, не с. с҃в препя́тствовало произво́дствꙋ и҆́хъ въ слꙋже́ніе свята́гѡ ѻ҆лтаря̀, когда̀ ѡ҆братя́тся къ це́ркви бж҃іей, съ спаси́тельнымъ расположе́ніемъ.

ПРА́ВИЛО н҃и.

Ѻ҆нѡра́тъ и҆ ѹ҆рва́нъ, є҆пі́скопы и҆з̾ страны̀ маѵріта́ніи сітіфе́нскія, реклѝ: мы̀ слы́шали ѡ҆ ніке́йскомъ и҆зслѣ́дованіи вѣ́ры: ѡ҆ сщ҃еннодѣ́йствіи слꙋча́ющемся по́слѣ ѻ҆бѣ́да, и҆́стинно є҆́сть, да не ꙗ҆́дшими досто́йнѡ соверша́ется, и҆ тогда̀ ѹ҆тверждено̀ сіѐ.

ПРА́ВИЛО н҃ѳ.

По да́нномꙋ на́мъ порꙋче́нію предлага́емъ и҆ сіѐ, ѡ҆предѣле́нное на собо́рѣ бы́вшемъ въ ка́пꙋѣ, ꙗ҆́кѡ не позволи́тельно бы́ти перекре́щиванію и҆лѝ перепоставле́нію, и҆лѝ прехожде́нію є҆пі́скопѡвъ на и҆́ный престо́лъ. Крескѡ́ній є҆пі́скопъ реке́нскагѡ села̀, презрѣ́въ наро́дъ своея̀ па́ствы, вто́ргнꙋлся въ це́рковь веке́нскꙋю, и҆ да́же до ны́нѣ, мно́гажды бы́въ ѹ҆вѣщава́емъ по пра́виламъ, не восхотѣ́лъ ѡ҆ста́вити сію̀ це́рковь, въ кото́рꙋю вто́ргся. Ѡ҆ се́мъ возвѣще́нное вы́ше мы̀ слы́шали, ка́къ достовѣ́рное, и҆ по заповѣ́данномꙋ на́мъ, про́симъ ва́шегѡ бл҃говоле́нія препода́ти на́мъ разрѣше́ніе, да бꙋ́детъ позво́лено на́мъ по тре́бованію неѡбходи́мости, для ѹ҆кроще́нія є҆гѡ̀, пристꙋпи́ти къ нача́льникꙋ страны̀, по повелѣ́ніямъ славнѣ́йшихъ царе́й, дабы̀ не восхотѣ́вшій покори́тися кро́ткомꙋ ѹ҆вѣща́нію ва́шея святы́ни, и҆ и҆спра́вити нетерпи́мое, неме́дленнѡ ѡ҆стано́вленъ бы́лъ вла́стію прави́тельства.

А҆ѵри́лій є҆пі́скопъ ре́къ: по соблюде́ніи ѹ҆стано́вленнагѡ ѻ҆бря́да, таковы́й да не признае́тся принадлежа́щимъ собо́рꙋ, а҆́ще, кро́ткѡ про́шенъ бы́въ ва́шею любо́вію, ̾ѿрече́тся ѡ҆ста́вити мѣ́сто, и҆́мъ восхи́щенное: поне́же свои́мъ презо́рс. с҃гствомъ и҆ непокори́востію подпа́лъ свѣ́тской вла́сти. Ѻ҆нѡра́тъ и҆ ѹ҆рва́нъ є҆пі́скопы реклѝ: ѹ҆го́дно ли сіѐ всѣ̑мъ; Всѣ̀ є҆пі́скопы ̾ѿвѣща́ли: справедли́во, ѹ҆го́дно.

ПРА́ВИЛО ѯ҃.

Да соблюда́ется дре́вній чи́нъ: ме́нѣе тре́хъ є҆пі́скопѡвъ, ка́къ ѡ҆предѣлено̀ въ пра́вилахъ, да не признаю́тся дово́льными для поставле́нія є҆пі́скопа.

ПРА́ВИЛО ѯ҃а.

Подоба́етъ ѡ҆предѣли́ти и҆ сіѐ: а҆́ще когда̀ пристꙋ́пимъ къ и҆збра́нію є҆пі́скопа, и҆ возни́кнетъ нѣ́кое прекосло́віе, поне́же бы́ли ѹ҆ на́съ въ разсмотрѣ́ніи таковы́е слꙋ́чаи: дерзнове́нно бꙋ́детъ тре́мъ то́кмѡ собра́тися для ѡ҆правда́нія и҆мѣ́ющагѡ рꙋкоположи́тися: но къ вышерече́нномꙋ числꙋ̀ да присоедини́тся є҆ди́нъ и҆лѝ два̀ є҆пі́скопа: и҆, при наро́дѣ, къ кото́ромꙋ и҆збира́емый и҆мѣ́етъ бы́ти поста́вленъ, во пе́рвыхъ да бꙋ́детъ и҆зслѣ́дованіе ѡ҆ ли́цахъ прекосло́вящихъ: пото́мъ да присовокꙋ́пится къ и҆зслѣ́дованію ѡ҆б̾я́вленное и҆́ми, и҆ когда̀ ꙗ҆́вится чи́стымъ пред̾ лице́мъ наро́да, тогда̀ ѹ҆жѐ да рꙋкополо́жится. Всѣ̀ є҆пі́скопы реклѝ: соверше́ннѡ согла́сны.

ПРА́ВИЛО ѯ҃в.

Поне́же па́мятꙋемъ, ꙗ҆́кѡ давнѡ̀ ѹ҆жѐ призна́ли мы̀ до́лжнымъ въ ка́ждое лѣ́то собира́тися ра́ди совѣща́ній: то, когда̀ собере́мся во є҆ди́но, тогда̀ де́нь па́схи да возвѣща́ется чрез̾ мѣстоблюсти́телей, ѡ҆брѣта́ющихся на собо́рѣ.

ПРА́ВИЛО ѯ҃г.

Ѻ҆нѡра́тъ и҆ ѹ҆рва́нъ є҆пі́скопы реклѝ: слове́снѡ порꙋчено̀ та́кожде на́мъ проси́ти, что́бы по ѡ҆предѣле́нію і҆ппѡні́йскагѡ собо́ра, ꙗ҆́кѡ подоба́етъ во вре́мя собо́ра ка́ждой ѻ҆́бласти посѣща́емой бы́ти, по пос. с҃дря́дкꙋ посѣща́ема была̀ и҆ маѵріта́нія, что̀ вы̀ ̾ѿлага́ли ̾ѿ го́да до го́да. А҆ѵри́лій є҆пі́скопъ ре́къ: тогда̀ ѡ҆ маѵріта́нской странѣ̀ мы̀ не ѡ҆предѣли́ли ничегѡ̀, поели́кꙋ ѻ҆на̀ лежи́тъ на краю̀ а҆́фріки, и҆ сопредѣ́льна ва́рварской землѣ̀. Да да́рꙋетъ же бг҃ъ, да возмо́жемъ, и҆ не ѡ҆бѣща́въ, по преизбы́ткꙋ сотвори́ти сіѐ, и҆ прибы́ти въ странꙋ̀ ва́шꙋ.

ПРА́ВИЛО ѯ҃д.

Є҆піго́ній є҆пі́скопъ ре́къ: на мно́гихъ собо́рахъ сщ҃е́ннымъ сосло́віемъ ѡ҆предѣлено̀, что́бы наро́дъ, въ прихо́дахъ ̾ѿ є҆пі́скопѡвъ зави́сящій и҆ никогда̀ не и҆мѣ́вшій ѻ҆со́багѡ є҆пі́скопа, не и҆на́че полꙋча́лъ свои́хъ прави́телей, то́ є҆сть є҆пі́скопѡвъ, ка́къ по согла́сію є҆пі́скопа, кото́ромꙋ подчине́нъ снача́ла. И҆́бо нѣ́кіе, встꙋпя̀ въ наси́льственное ѡ҆блада́ніе нѣ́которымъ мѣ́стомъ, ̾ѿвраща́ются ѻ҆бще́нія съ бра́тіею: когда́ же быва́ютъ за сіѐ ѡ҆сꙋжда́емы, то ка́къ бы по нѣ́коемꙋ ста́ромꙋ пра́вꙋ преѡблада́нія ѹ҆де́рживаютъ за собо́ю влады́чество. Мно́гіе же и҆з̾ пресвѵ́терѡвъ, надме́нные и҆ безꙋ́мные, под̾е́млютъ вы̑и своѝ проти́вꙋ со́бственныхъ є҆пі́скопѡвъ, пи́ршествами и҆ ѕлонамѣ́ренными совѣ́тами возбꙋжда́я наро́дъ къ томꙋ̀, что́бы ѻ҆́нъ, по безчи́нной прія́зни, и҆̀хъ сами́хъ поста́вилъ прави́телями. Твоемꙋ̀, вѣ́рнѣйшій бра́те а҆ѵри́ліе, благоразꙋ́мію мы̀ ѡ҆бя́заны тѣ́мъ нарочи́тѡ вожделѣ́ннымъ послѣ́дствіемъ, что̀ таковы̑я покꙋшє́нія ты̀ многокра́тнѡ ѡ҆стана́вливалъ. Вопрекѝ ѕлонамѣ́реннымъ ѹ҆мышле́ніямъ, хꙋды́мъ совѣ́тамъ и҆ соглаше́ніямъ таковы́хъ люде́й, предлага́ю сіѐ: ꙗ҆́кѡ не подоба́етъ ѻ҆со́баго нача́льника пріима́ти лю́дямъ, кото́рые въ та́къ и҆менꙋ́емомъ предѣ́лѣ подлежа́тъ дре́внемꙋ є҆пі́скопꙋ, и҆ никогда̀ ѻ҆со́багѡ є҆пі́скопа не и҆мѣ́ли. Сегѡ̀ ра́ди, а҆́ще с. с҃є всемꙋ̀ святѣ́йшемꙋ собо́рꙋ ѹ҆го́дно предлага́емое мно́ю, то да ѹ҆тверди́тся. А҆ѵри́лій є҆пі́скопъ ре́къ: и҆зложе́нію бра́та и҆ соепі́скопа на́шегѡ не прекосло́влю, но и҆сповѣ́дꙋю, ꙗ҆́кѡ сіѐ и҆ твори́лъ и҆ твори́ти бꙋ́дꙋ, то́ є҆сть, ѹ҆ є҆диномы́сленныхъ, не то́кмѡ съ карѳаге́нскою це́рковію, но и҆ со всѣ́мъ свяще́ннымъ сосло́віемъ. И҆́бо сꙋ́ть весьма̀ мно́гіе соꙋмышля́ющіе со свое́ю толпо́ю, кото́рꙋю ѻ҆нѝ, ка́къ ска́зано, вво́дятъ въ заблꙋжде́ніе, льстя̀ є҆я̀ слꙋ́хꙋ, и҆ ласка́тельствомъ привлека́я къ себѣ̀ люде́й зазо́рнагѡ житія̀: па́че же напыща́ясь и҆ ̾ѿдѣля́ясь ̾ѿ сегѡ̀ на́шегѡ сосло́вія, ѻ҆нѝ, ѡ҆пира́ясь на свою̀ толпꙋ̀, многокра́тнѡ бы́въ приглашены̀ пріитѝ на собо́ръ, ̾ѿрека́ются, боя́ся, да не ѡ҆бнарꙋ́жатся и҆́хъ нелѣ́пѡсти. Тогѡ̀ ра́ди, а҆́ще ѹ҆го́днѡ предлага́ю: до́лжно на́мъ вся́кимъ ѻ҆́бразомъ подвиза́тися про́тивъ ни́хъ, не ѡ҆стаю́тся въ и҆́хъ вла́сти не то́кмѡ таковы́е наси́льственнѡ завладѣ́нные и҆́ми ѻ҆́крꙋги, но и҆ со́бствєнныя це́ркви, непра́вильнѡ под̾ вла́сть и҆́хъ прише́дшыя: да со вла́стію и҆згоня́ются ѻ҆нѝ ̾ѿкры́тѡ, и҆ са́мый престо́лъ пе́рвенствꙋющихъ є҆пі́скопѡвъ да ̾ѿверга́етъ и҆̀хъ. И҆́бо справедли́вость тре́бꙋетъ, что́бы прилѣпля́ющіеся ко всѣ́мъ бра́тіямъ и҆ ко всемꙋ̀ собо́рꙋ, не то́кмѡ ѹ҆де́рживали за собо́ю сво́й престо́лъ, но є҆щѐ полꙋча́ли во вла́сть таковы́е спо́рные ѻ҆́крꙋги: напро́тивъ же тогѡ̀, что́бы мня́щіеся бы́ти дово́льными свое́ю толпо́ю наро́да, и҆ бра́тскꙋю любо́вь пренебрега́ющіе, не то́кмѡ лиша́емы бы́ли завладѣ́нныхъ и҆́ми ѻ҆́крꙋгѡвъ, но є҆щѐ, ка́къ рече́но мно́ю, и҆ со́бствєнныя и҆́хъ мѣста̀ ѹ҆ ни́хъ, ꙗ҆́кѡ ѹ҆ мяте́жникѡвъ, бы́ли ̾ѿе́млемы вла́стію свѣ́тскихъ нача́льникѡвъ. Ѻ҆нѡра́тъ и҆ ѹ҆рва́нъ є҆пі́скопы реклѝ: велича́йшее промышле́ніе ва́шея с. с҃ѕ святы́ни въ ѹ҆мы̀ всѣ́хъ водрꙋзи́лось: и҆ мни́мъ, ꙗ҆́кѡ подоба́етъ ̾ѿвѣ́томъ всѣ́хъ ѹ҆тверди́ти предложе́ніе ва́ше. Всѣ̀ є҆пі́скопы реклѝ: согла́сны, согла́сны.

ПРА́ВИЛО ѯ҃є.

Никако́й є҆пі́скопъ да не ѹ҆своя́етъ себѣ̀ чꙋжда́гѡ кли́ріка, без̾ разсꙋжде́нія пре́жнягѡ є҆гѡ̀ є҆пі́скопа.

ПРА́ВИЛО ѯ҃ѕ.

А҆ѵри́лій є҆пі́скопъ ре́къ: сло́во моѐ пріими́те бра́тія. Многокра́тнѡ слꙋча́лось, что̀ церко́вники проси́ли ѹ҆ меня̀ діа́конѡвъ, и҆лѝ пресвѵ́терѡвъ, и҆лѝ є҆пі́скопѡвъ. Па́мятꙋя пра̑вила, ꙗ҆́ слѣ́дꙋю и҆̀мъ, ѡ҆браща́юсь къ є҆пі́скопꙋ проси́магѡ кли́ріка, и҆ є҆мꙋ̀ ѡ҆б̾явля́ю, что̀ кли́ріка є҆гѡ̀ про́сятъ принадлежа́щіе то́й и҆лѝ дрꙋго́й цр҃кви. Сѐ доны́нѣ мнѣ̀ не прекосло́вили. Но дабы̀ сегѡ̀ и҆ по́слѣ не слꙋчи́лось, то́ є҆сть, дабы̀ не воспроти́вились мнѣ̀ въ се́мъ дѣ́лѣ проси́мые мно́ю, [поне́же вѣ́даете, что̀ ꙗ҆́ и҆мѣ́ю попече́ніе ѡ҆ мно́гихъ цр҃квахъ и҆ рꙋкоположе́ніяхъ,] когда̀ пристꙋплю̀ къ комꙋ́ либо и҆з̾ сопа́стырей, съ двꙋмя̀ и҆лѝ тремя̀ свидѣ́телями и҆з̾ ва́шегѡ сосло́вія, а҆́ще и҆збира́емый не недосто́инъ ѡ҆бря́щется: пра́ведно є҆́сть сꙋди́ти ва́шей любвѝ, что̀ подоба́етъ твори́ти. И҆́бо ꙗ҆́, ка́къ вы̀ зна́ете, бра́тія, по и҆зволе́нію бж҃ію, ѡ҆ мно́гихъ цр҃квахъ попече́ніе и҆мѣ́ю. Нꙋми́дій є҆пі́скопъ ре́къ: престо́лꙋ семꙋ̀ всегда̀ принадлежа́ло сіѐ полномо́чіе, да поставля́етъ є҆пі́скопа, по жела́нію ка́ждыя цр҃кви, ̾ѿкꙋ́да хо́щетъ, и҆ кто́ бы ни бы́лъ є҆мꙋ̀ наимено́ванъ. Є҆піго́ній є҆пі́скопъ ре́къ: доброво́ліе ѹ҆мѣря́етъ вла́сть: и҆́бо ты̀, бра́те, ме́нѣе дерза́ешь, не́жели мо́жешь, всѣ̑мъ показꙋ́я себя̀ бла́га и҆ человѣколюби́ва. И҆́бо твоемꙋ̀ разсꙋжде́нію предоста́влено ꙗ҆ви́ти ѹ҆важе́ніе лицꙋ̀ ка́ждагѡ є҆пі́скопа: но та́кожде въ пе́рвомъ и҆ є҆динокра́тномъ сноше́ніи съ с. с҃з ни́ми, а҆́ще заблагоразсꙋ́дишь, настоя́ти на то̀, что̀ состои́тъ во вла́сти сегѡ̀ престо́ла: поели́кꙋ и҆мѣ́ешь неѡбходи́мость подкрѣпля́ти всѣ̀ цр҃кви. Сегѡ̀ ра́ди не дае́мъ тебѣ̀ вла́сть, но запечатлѣва́емъ ѻ҆́нꙋю твои́мъ произволе́ніемъ, да бꙋ́детъ тебѣ̀ позво́лено всегда̀ бра́ти, кого̀ хо́щешь, и҆ производи́ти предстоя́телей цр҃квамъ, и҆ про́чихъ проси́мыхъ, ̾ѿкꙋ́да заблагоразсꙋ́дишь. Постꙋметіа́нъ є҆пі́скопъ ре́къ: а҆́ще кто̀ и҆мѣ́етъ є҆ди́наго то́кмѡ пресвѵ́тера, не ѹ҆же́ли и҆ сего̀ до́лжно ѹ҆ негѡ̀ ̾ѿя́ти; А҆ѵри́лій є҆пі́скопъ ре́къ: по ми́лости бж҃іей, може́тъ є҆ди́нъ є҆пі́скопъ поста́вити мно́гихъ пресвѵ́терѡвъ: пресвѵ́теръ же къ є҆пі́скопствꙋ спосо́бный не ѹ҆до́бнѡ ѡ҆брѣта́ется. Тогѡ̀ ра́ди, а҆́ще кто̀ и҆мѣ́етъ є҆ди́наго то́кмѡ пресвѵ́тера, и҆ прито́мъ досто́йнаго є҆пі́скопства: то и҆ сего̀ є҆ди́наго до́лженъ ̾ѿда́ти для рꙋкоположе́нія. Постꙋметіа́нъ є҆пі́скопъ ре́къ: но а҆́ще є҆ди́нъ є҆пі́скопъ и҆мѣ́етъ мно́жество кли́рікѡвъ, то сіѐ мно́жество дрꙋга́гѡ долженствꙋ́етъ помощѝ мнѣ̀. А҆ѵри́лій є҆пі́скопъ ре́къ: по́длиннѡ, ка́къ ты̀ помо́гъ дрꙋго́й цр҃кви, та́къ и҆мѣ́ющій бо́льшее число̀ кли́рікѡвъ бꙋ́детъ побꙋжде́нъ и҆з̾ числа̀ и҆́хъ ѹ҆дѣли́ти тебѣ̀ для рꙋкоположе́нія.

ПРА́ВИЛО ѯ҃з.

Для ка́ждагѡ є҆пі́скопа подоба́ющее ѡ҆хранено̀ постановле́ніемъ, что́бы ̾ѿ ѡ҆предѣле́ннагѡ соста́ва прихо́дѡвъ, ни є҆ди́ное мѣ́сто не бы́ло ̾ѿторга́емо, и҆ не полꙋча́ло ѻ҆со́багѡ є҆пі́скопа, ра́звѣ по согла́сію и҆мѣ́ющагѡ вла́сть над̾ ѻ҆́нымъ. А҆́ще же се́й допꙋ́ститъ, что́бы и҆звѣ́стный ѻ҆́крꙋгъ полꙋчи́лъ со́бственнаго є҆пі́скопа: то произведе́нный на сіѐ мѣ́сто да не простира́етъ вла́сти свое́й на дрꙋгі́е ѻ҆́крꙋги: и҆́бо се́й є҆ди́нъ бы́въ ̾ѿдѣле́нъ ̾ѿ соста́ва мно́гихъ, ѹ҆досто́енъ и҆мѣ́ти че́сть ѻ҆со́багѡ є҆пі́скопства.

с. с҃и

ПРА́ВИЛО ѯ҃и.

Ва́ше є҆динодꙋ́шіе кꙋ́пнѡ со мно́ю[6] па́мятꙋетъ ѡ҆предѣле́нное на предше́ствовавшемъ собо́рѣ: въ малолѣ́тствѣ креще́нные донаті́стами, не мо́гшіе тогда̀ позна́ти, коли́кѡ ги́бельно заблꙋжде́ніе и҆́хъ, но по достиже́ніи во́зраста, спосо́бнагѡ къ размышле́нію, позна́вшіе и҆́стинꙋ, и҆ безꙋ́міемъ и҆́хъ возгнꙋша́вшіеся, по дре́внемꙋ чи́нꙋ, возложе́ніемъ рꙋкѝ да пріе́млются въ каѳолі́ческꙋю бж҃ію цр҃ковь, по всемꙋ̀ мі́рꙋ распростране́ннꙋю. Нарека́ніе пре́жнягѡ заблꙋжде́нія не должно̀ бы́ти препя́тствіемъ приня́тію и҆́хъ въ чи́нъ кли́ра, когда̀ ѻ҆нѝ пристꙋпи́въ къ вѣ́рѣ, и҆́стиннꙋю цр҃ковь призна́ли свое́ю, и҆, въ не́й ѹ҆вѣ́ровавъ во хр҃ⷭ҇та̀, при́няли та̑инства трⷪ҇цы, котѡ́рыя, ка́къ ꙗ҆́вно є҆́сть, всѣ̀ и҆́стинны и҆ свя́ты и҆ бж҃е́ственны, и҆ на кото́рыхъ ѹ҆твержда́ется всѐ ѹ҆пова́ніе дꙋшѝ, не смотря̀ на то̀, что̀ предвари́вшая де́рзость є҆ретікѡ́въ, безразсꙋ́днѡ стреми́лась нѣ́что преда́ти проти́вное, под̾ и҆́менемъ и҆́стины. Сіѐ про́сто, ка́къ ѹ҆́читъ святы́й а҆по́столъ, глаго́ля: є҆ди́нъ бг҃ъ, є҆ди́на вѣ́ра, є҆ди́но кр҃ще́ніе[7], и҆ то̀, что̀ є҆ди́ножды преподава́ти до́лжно, не позволи́тельно вно́вь воспринима́ти. Сегѡ̀ ра́ди по преда́ніи а҆на́ѳемѣ и҆́мени заблꙋжде́нія, возложе́ніемъ рꙋкѝ, да пріе́млются въ є҆ди́нꙋ цр҃ковь, кото́рая, по рече́нномꙋ, є҆́сть голꙋби́ца[8], є҆ди́нственная ма́терь хрістіа́нъ, и҆ въ кото́рой спаси́тельнѡ пріе́млются всѣ̀ та̑инства вѣ́чныя и҆ животворя́щыя, впро́чемъ пребыва́ющихъ въ є҆́реси подверга́ющыя вели́комꙋ ѡ҆сꙋжде́нію и҆ ка́зни. Что̀ во и҆́стинѣ свѣтлѣ́е препровожда́ло бы и҆̀хъ къ с. с҃ѳ вѣ́чной жи́зни: то̀ въ заблꙋжде́ніи стано́вится для ни́хъ бо́лѣе ѡ҆мрача́ющимъ и҆ ѡ҆сꙋжда́ющимъ. Сегѡ̀ нѣ́которые и҆збѣжа́ли, и҆ позна́въ прямы́й пꙋ́ть ма́тери, каѳолі́ческія цр҃кви, всѣ́мъ ѻ҆́нымъ святы́мъ та́инствамъ, по любвѝ къ и҆́стинѣ, повѣ́рили, и҆ ѻ҆́ныя при́няли. Что̀ таковы́е, когда̀ присоедини́тся ѹ҆достовѣре́ніе въ и҆́хъ до́бромъ житіѝ, без̾ сомнѣ́нія, пра́вильнѡ мо́гꙋтъ ѹ҆тверждены̀ бы́ти въ кли́рѣ, для слꙋже́нія святы́мъ та́йнамъ, ѻ҆со́беннѡ въ толи́кѡ затрꙋдни́тельныхъ ѡ҆бстоя́тельствахъ, сегѡ̀ никто̀ ѡ҆спо́ривати не бꙋ́детъ. А҆́ще же нѣ́которые томꙋ́ же, то́ є҆сть, дона́товꙋ ѹ҆че́нію послѣ́довавшіе кли́ріки, возжела́ютъ присоедини́тися къ на́мъ съ свои́мъ наро́домъ, и҆ въ свои́хъ сте́пеняхъ, и҆з̾ любвѝ къ че́сти, подава́я наро́дꙋ совѣ́ты къ жи́зни, и҆ ѹ҆де́рживая за собо́ю сте́пєни ко спасе́нію: то полага́ю ѡ҆ста́вити сіѐ, доко́лѣ вышерече́нные бра́тія[9], по внима́тельнѣйшемъ размышле́ніи, подадꙋ́тъ своѐ мнѣ́ніе, дабы̀ ѻ҆нѝ въ свое́мъ благоразꙋ́мнѣйшемъ совѣща́ніи и҆зслѣ́довали предме́тъ на́шегѡ предложе́нія, и҆ ѹ҆досто́или подкрѣпи́ти на́съ въ то́мъ, что̀ до́лжно на́мъ постанови́ти ѡ҆ се́мъ дѣ́лѣ. Ны́нѣ же ѡ҆грани́чиваемся то́кмѡ креще́нными ̾ѿ донаті́стѡвъ во младе́нчествѣ, да соглася́тся вышерече́нные бра́тія, а҆́ще и҆̀мъ ѹ҆го́дно, съ на́шимъ рѣше́ніемъ, что́бы рꙋкополага́ти ѻ҆́ныхъ.

ПРА́ВИЛО ѯ҃ѳ.

Подоба́етъ проси́ти благочести́вѣйшихъ царе́й, да повеля́тъ совсѣ́мъ и҆скорес. с҃іни́ти ѡ҆ста́нки і҆́дѡлѡвъ по все́й а҆́фрікѣ. [И҆́бо во мно́гихъ мѣста́хъ примо́рскихъ, и҆ въ ра́зныхъ владѣ́ніяхъ, є҆щѐ сохраня́етъ непра́веднѡ си́лꙋ сіѐ заблꙋжде́ніе.] Да бꙋ́детъ заповѣ́дано, и҆ і҆́дѡлѡвъ и҆стреби́ти, и҆ ка̑пища и҆́хъ, въ се́лахъ и҆ въ сокрове́нныхъ мѣста́хъ без̾ вся́кія благови́дности стоя́щыя, вся́кимъ ѻ҆́бразомъ разрꙋша́ти.

ПРА́ВИЛО ѻ҃.

Подоба́етъ проси́ти благочести́вѣйшихъ царе́й, да благоволя́тъ ѹ҆зако́нити и҆ сіѐ: а҆́ще нѣ́которые пожела́ютъ по како́мꙋ либо дѣ́лꙋ и҆мѣ́ти сꙋ́дъ въ це́ркви, по пра́вꙋ а҆по́стольскомꙋ принадлежа́щемꙋ цр҃квамъ, и҆, мо́жетъ бы́ть, рѣше́ніемъ кли́рікѡвъ ѻ҆дна̀ сторона̀ бꙋ́детъ не дово́льна: то да не бꙋ́детъ позво́лено призыва́ти въ сꙋ́дъ къ свидѣ́тельствꙋ того̀ кли́ріка, кото́рый пре́жде сіѐ са́мое дѣ́ло разсма́тривалъ, и҆лѝ при разсмотрѣ́ніи ѻ҆́нагѡ присꙋ́тствовалъ: и҆ да́же никто̀ и҆з̾ дома́шнихъ лица̀ церко́внагѡ да не вво́дится въ сꙋ́дъ, съ ѡ҆бя́занностію свидѣ́тельствовати.

ПРА́ВИЛО ѻ҃а.

Та́кожде подоба́етъ проси́ти хрістіа́нскихъ царе́й и҆ ѡ҆ се́мъ: поели́кꙋ вопрекѝ бж҃е́ственнымъ за́повѣдямъ во мно́гихъ мѣста́хъ ̾ѿ ꙗ҆зы́ческагѡ заблꙋжде́нія привнесе́нныя пи́ршєства соверша́ются, та́къ что̀ и҆ хрістіа́не та́йнѡ привлека́ются ꙗ҆зы́чниками къ ѹ҆ча́стію въ ѻ҆́ныхъ: то да повеля́тъ воспрети́ти таковы̑я пи́ршєства, и҆ въ города́хъ, и҆ въ се́лахъ, и҆ наипа́че, поели́кꙋ въ нѣ́которыхъ города́хъ не страша́тся си́мъ ѻ҆́бразомъ согрѣша́ти, да́же во днѝ па́мяти блаже́нныхъ мꙋ́ченикѡвъ, и҆ да́же въ свяще́нныхъ мѣста́хъ. Въ сі́и днѝ, что̀ и҆ и҆зрещѝ сты́дъ є҆́сть, соверша́ютъ на поля́хъ и҆ на сто́гнахъ непристѡ́йныя пляса̑нія, и҆ с. са҃і непотре́бными слова́ми ѡ҆скорбля́ютъ че́сть ма́терей семе́йствъ, и҆ цѣломꙋ́дріе дрꙋги́хъ безчи́сленныхъ благочести́выхъ же́нъ, собира́ющихся во святы́й де́нь, та́къ что̀ ̾ѿ прибѣ́жища са́мыя святы́я вѣ́ры почтѝ ѹ҆бѣга́ти нꙋ́жно быва́етъ.

ПРА́ВИЛО ѻ҃в.

Подоба́етъ проси́ти та́кожде и҆ ѡ҆ се́мъ, да воспрети́тся представле́ніе позо́рищныхъ и҆́гръ въ де́нь воскре́сный, и҆ въ про́чіе свѣ́тлые днѝ хрістіа́нскія вѣ́ры: тѣ́мъ па́че, что̀ въ продолже́ніе ѻ҆смѝ дне́й святы́я па́схи, наро́дъ бо́лѣе собира́ется на конериста́лище, не́жели въ цр҃ковь. До́лжно премѣни́ти ѡ҆предѣле́нные для позо́рищь днѝ, когда̀ ѻ҆нѝ встрѣча́ются съ пра́здничными, и҆ никого̀ и҆з̾ хрістіа́нъ не до́лжно принꙋжда́ти къ си́мъ зрѣ́лищамъ.

ПРА́ВИЛО ѻ҃г.

Подоба́етъ проси́ти и҆ ѡ҆ се́мъ, да благоволя́тъ ѹ҆зако́нити, что́бы кли́ріка, въ како́мъ бы ѻ҆́нъ ни бы́лъ сте́пени, ѡ҆сꙋжде́ннаго за како́е либо престꙋпле́ніе сꙋдо́мъ є҆пі́скопѡвъ, не бы́ло позво́лено защища́ти ̾ѿ наказа́нія ни то́й цр҃кви, въ кото́рой ѻ҆́нъ слꙋжи́лъ, нижѐ како́мꙋ либо человѣ́кꙋ: а҆ что́бы въ наказа́ніе за сіѐ поло́жено бы́ло де́нежное взыска́ніе, и҆лѝ лише́ніе че́сти, и҆ да повеля́тъ, что́бы къ и҆звине́нію въ то́мъ не бы́лъ принима́емъ ни во́зрастъ, ни по́лъ.

ПРА́ВИЛО ѻ҃д.

Подоба́етъ проси́ти є҆щѐ и҆ ѡ҆ се́мъ: а҆́ще кто̀ восхо́щетъ ̾ѿ нѣ́коегѡ и҆гра́лищнагѡ ѹ҆пражне́нія пристꙋпи́ти къ благода́ти хрістіа́нства, и҆ пребыва́ти свобо́днымъ ̾ѿ ѻ҆́ныхъ нечисто́тъ: то да не бꙋ́детъ позво́лено никомꙋ̀ склоня́ти, и҆лѝ принꙋжда́ти такова́го па́ки къ тѣ́мъ же заня́тіямъ.

с. св҃і

ПРА́ВИЛО ѻ҃є.

Ѡ҆ провозглаше́ніи въ цр҃кви ̾ѿпꙋще́нія на свобо́дꙋ, а҆́ще до́знано бꙋ́детъ, ꙗ҆́кѡ сіѐ творя́тъ на́ши сослꙋжи́тели въ і҆та́ліи: то, по довѣ́рію къ ни́мъ, и҆ мы̀ да послѣ́дꙋемъ без̾ сомнѣ́нія и҆́хъ чи́нꙋ, по ̾ѿкры́томъ предоставле́ніи сегѡ̀ дозна́нія посыла́емомꙋ мѣстоблюсти́телю: и҆ что̀ то́кмѡ мо́жетъ соверша́тися, ка́къ соѻбра́зное съ вѣ́рою, ко благоꙋстро́йствꙋ цр҃кви и҆ ко спасе́нію дꙋ́шъ: всѐ то̀ и҆ мы̀ съ похвале́ніемъ да пріи́мемъ пред̾ лице́мъ гд҃ⷭ҇нимъ.

ПРА́ВИЛО ѻ҃ѕ.

А҆ѵри́лій є҆пі́скопъ ре́къ: полага́ю та́кожде, ꙗ҆́кѡ посыла́емомꙋ въ і҆та́лію мѣстоблюсти́телю не до́лжно ѡ҆ста́вити без̾ внима́нія дѣ́ла є҆кѵ́тіа, давнѡ̀ ѡ҆предѣле́ніемъ є҆пі́скопѡвъ по справедли́вости ѡ҆сꙋжде́ннагѡ. А҆́ще слꙋчи́тся посыла́емомꙋ найтѝ є҆го̀ въ тѣ́хъ мѣста́хъ: то се́й бра́тъ на́шъ да попече́тся въ защи́тꙋ церко́внагѡ благоꙋстро́йства дѣ́йствовати про́тивъ негѡ̀ ка́къ до́лжно и҆ гдѣ̀ возмо́жно. Всѣ̀ є҆пі́скопы ̾ѿвѣща́ли: весьма̀ согла́сны на сіѐ предложе́ніе.

ПРА́ВИЛО ѻ҃з.

Ѡ҆ кро́ткомъ ѡ҆браще́ніи съ донаті́стами.

По дозна́ніи и҆ и҆зслѣ́дованіи всегѡ̀, по́льзѣ церко́вной споспѣшествова́ти могꙋ́щагѡ, по манове́нію и҆ внꙋше́нію дх҃а бж҃ія, мы̀ и҆збра́ли за лꙋ́чшее, постꙋпа́ти съ вышеꙋпомя́нꙋтыми людьмѝ кро́ткѡ и҆ ми́рнѡ, хотя̀ ѻ҆нѝ безпоко́йнымъ свои́мъ разномы́сліемъ и҆ весьма̀ ѹ҆даля́ются ̾ѿ є҆ди́нства тѣ́ла гд҃ⷭ҇ня. Таки́мъ ѻ҆́бразомъ, по возмо́жности на́шей, да содѣ́лается соверше́ннѡ и҆звѣ́стнымъ для всѣ́хъ, по всѣ́мъ а҆фріка́нскимъ ѻ҆́бластямъ, ѹ҆ловле́нныхъ и҆́хъ ѡ҆бще́ніемъ и҆ прія́знію, каки́мъ жа́лостс. сг҃інымъ заблꙋжде́ніемъ ѻ҆нѝ себя̀ связа́ли. Мо́жетъ бы́ть тогда̀, ка́къ мы̀ съ кро́тостію собира́емъ разномы́слящихъ, по сло́вꙋ а҆п҃ⷭ҇тола, да́стъ и҆̀мъ бг҃ъ покая́ніе въ ра́зꙋмъ и҆́стины, и҆ возни́кнꙋтъ ̾ѿ діа́вольскія сѣ́ти, бы́въ ѹ҆ловлены̀ ̾ѿ негѡ̀ въ свою̀ є҆гѡ̀ во́лю[10].

ПРА́ВИЛО ѻ҃и.

Заблагоразсꙋждено̀ посла́ти ̾ѿ на́шегѡ собо́ра гра́маты къ нача́льствꙋющымъ въ а҆́фрікѣ, и҆ прили́чнымъ при́знано проси́ти и҆̀хъ ѡ҆ вспомоществова́ніи ѻ҆́бщей ма́тери каѳолі́ческой цр҃кви въ то́мъ слꙋ́чаѣ, когда̀ вла́сть є҆пі́скопѡвъ быва́етъ пренебрега́ема во гра́дахъ, то́ є҆сть, что́бы ѻ҆нѝ съ нача́льственнымъ полномо́чіемъ и҆ попечи́тельностію, и҆ съ ѹ҆се́рдіемъ къ хрістіа́нской вѣ́рѣ, сдѣ́лали и҆зслѣ́дованіе ѡ҆ произше́дшемъ во всѣ́хъ мѣста́хъ, въ кото́рыхъ маѯіміані́сты ѡ҆владѣ́ли цр҃квами, та́кожде и҆ ѡ҆ тѣ́хъ, кото́рые и҆́ми ̾ѿто́ржены: и҆ что́бы достовѣ́рное для всѣ́хъ свѣдѣ́ніе ѡ҆ си́хъ происше́ствіяхъ не̾ѿмѣ́ннѡ повелѣ́ли внестѝ въ за́писи наро́дныхъ дѣ́лъ.

ПРА́ВИЛО ѻ҃ѳ.

Ѡ҆ прія́тіи кли́рікѡвъ донаті́стѡвъ, въ кли́ръ каѳолі́ческія цр҃кви.

Напослѣ́докъ заблагоразсꙋждено̀ посла́ти гра́маты къ бра́тіямъ и҆ соепі́скопамъ на́шымъ, и҆ наипа́че къ а҆по́стольскомꙋ престо́лꙋ, на кото́ромъ предсѣда́тельствꙋетъ помянꙋ́тый досто́йнѡ чти́мый бра́тъ и҆ сослꙋжи́тель на́шъ а҆наста́сій, ѡ҆ то́мъ, что́бы по и҆звѣ́стной є҆мꙋ̀ вели́кой нꙋ́ждѣ а҆́фріки, ра́ди ми́ра и҆ по́льзы цр҃кви, и҆ и҆з̾ са́мыхъ донаті́стѡвъ кли́рікѡвъ, расположе́ніе своѐ и҆спра́вившихъ и҆ возжела́вшихъ пріитѝ къ каѳолі́ческомꙋ соедине́нію, по с. сд҃і разсꙋжде́нію и҆ и҆зволе́нію ка́ждагѡ каѳолі́ческагѡ є҆пі́скопа, ѹ҆правля́ющагѡ цр҃ковію въ то́мъ мѣ́стѣ, пріима́ти въ свои́хъ сте́пеняхъ свяще́нства, а҆́ще сіѐ ѡ҆ка́жется содѣ́йствꙋющимъ къ ми́рꙋ хрістіа́нъ. И҆звѣ́стно, что̀ и҆ въ предше́ствовавшее вре́мя та́къ постꙋпа́емо бы́ло съ си́мъ раско́ломъ: ѡ҆ че́мъ свидѣ́тельствꙋютъ примѣ́ры мно́гихъ и҆ почтѝ всѣ́хъ а҆фріка́нскихъ цр҃квей, въ кото́рыхъ возни́кло сіѐ заблꙋжде́ніе. Сіѐ дѣ́лается не въ нарꙋше́ніе собо́ра, бы́вшагѡ ѡ҆ се́мъ предме́тѣ въ страна́хъ лежа́щихъ за мо́ремъ, но что́бы сіѐ сохранено̀ бы́ло въ по́льзꙋ жела́ющихъ, си́мъ ѻ҆́бразомъ прейтѝ къ каѳолі́ческой цр҃кви, дабы̀ не бы́ло поставля́емо никакі́я прегра́ды и҆́хъ є҆дине́нію. Кото́рые въ мѣста́хъ своегѡ̀ жи́тельства ѹ҆смо́трены бꙋ́дꙋтъ вся́чески содѣ́йствꙋющими и҆ споспѣшествꙋ́ющими каѳолі́ческомꙋ є҆дине́нію, къ ѻ҆чеви́дной по́льзѣ дꙋ́шъ бра́тій: тѣ́мъ да не бꙋ́детъ препо́ною ѡ҆предѣле́ніе, постано́вленное про́тивъ сте́пеней и҆́хъ на собо́рѣ за мо́ремъ, и҆́бо спасе́ніе не заграждено̀ ни ̾ѿ како́гѡ лица̀. То́ є҆сть, рꙋкоположе́нные донаті́стами, а҆́ще и҆спра́вясь, восхотя́тъ пристꙋпи́ти къ каѳолі́ческой вѣ́рѣ, да не бꙋ́дꙋтъ лиша́емы приня́тія въ свои́хъ сте́пеняхъ, по ѡ҆предѣле́нію бы́вшагѡ за мо́ремъ собо́ра, но па́че да пріе́млются тѣ̀, чрез̾ кото́рыхъ ѡ҆ка́зывается споспѣшествова́ніе каѳолі́ческомꙋ соедине́нію.

ПРА́ВИЛО п҃.

Ѡ҆ назначе́ніи посо́льства къ донаті́стамъ ра́ди соглаше́нія къ ми́рꙋ.

Пото́мъ разсꙋждено̀, что́бы, по си́хъ дѣя́ніяхъ, для возвѣще́нія ми́ра и҆ є҆дине́нія, без̾ кото́рагѡ не мо́жетъ состоя́тися спасе́ніе хрістіа́нъ, и҆з̾ среды̀ на́съ посла́ти мѣстоблюсти́телей къ є҆пі́скопамъ са́мыхъ донас. сє҃іті́стѡвъ, а҆́ще каки́хъ ѻ҆нѝ и҆мѣ́ютъ, и҆лѝ къ и҆́хъ міря́намъ. Чрез̾ си́хъ мѣстоблюсти́телей да содѣ́лается и҆звѣ́стнымъ всѣ̑мъ, что̀ донаті́сты не и҆мѣ́ютъ ничегѡ̀ благосло́внагѡ проти́вꙋ каѳолі́ческія цр҃кви. Наипа́че да бꙋ́детъ, ра́ди достовѣ́рнагѡ доказа́тельства, ꙗ҆́вно всѣ̑мъ, чрез̾ за́писи гра́дскихъ дѣ́лъ, ка́къ са́ми ѻ҆нѝ постꙋпи́ли съ маѯіміані́стами, свои́ми ̾ѿщепе́нцами. Въ се́мъ слꙋ́чаѣ, а҆́ще восхотя́тъ ѹ҆смотрѣ́ти, ̾ѿ бг҃а пока́зано и҆̀мъ, ꙗ҆́кѡ ѻ҆нѝ толи́кѡ же непра́веднѡ ̾ѿпа́ли тогда̀ ̾ѿ є҆дине́нія церко́внагѡ, коли́кѡ непра́веднѡ, ка́къ ѻ҆нѝ вопію́тъ, ̾ѿпа́ли ны́нѣ ̾ѿ ни́хъ маѯіміані́сты. И҆з̾ числа̀ тѣ́хъ, кото́рыхъ ѻ҆нѝ ѡ҆сꙋди́ли, ꙗ҆́вною вла́стію со́бственнагѡ совѣ́та, по́слѣ тогѡ̀ нѣ́которыхъ принима́ли въ и҆́хъ сте́пеняхъ свяще́нства, и҆ признава́ли креще́ніе, кото́рое соверши́ли ѡ҆сꙋжде́нные и҆ и҆зве́рженные и҆́ми. Си́мъ дока́зывается, ско́ль безꙋ́мнымъ се́рдцемъ сопротивля́ются ѻ҆нѝ ми́рꙋ цр҃кви, по всемꙋ̀ мі́рꙋ распростране́нныя, постꙋпа́я та́къ въ по́льзꙋ стороны̀ дона́товой, и҆ не почита́я сами́хъ себя̀ ѡ҆скверне́нными ѡ҆бще́ніемъ съ тѣ́ми, кото́рыхъ ѻ҆нѝ таки́мъ ѻ҆́бразомъ по нꙋ́ждѣ при́няли съ ми́ромъ, а҆ междꙋ̀ тѣ́мъ препира́ясь съ на́ми, то́ є҆сть съ каѳолі́ческою цр҃ковію, простира́ющеюся да́же до послѣ́днихъ предѣ́лѡвъ землѝ, и҆ не мо́гши вразꙋми́ти себя̀ чрез̾ нечи́стое ѡ҆бще́ніе съ тѣ́ми, кото́рыхъ пре́жде са́ми всѣ̀ ѡ҆сꙋжда́ли.

ПРА́ВИЛО п҃а.

Заблагоразсꙋждено̀, да є҆пі́скопы и҆ пресвѵ́теры и҆ діа́коны, по пра́виламъ сво́йственнымъ и҆́хъ сте́пенямъ, возде́рживаются ̾ѿ же́нъ, кото́рыхъ ѹ҆жѐ и҆мѣ́ютъ: а҆́ще же не сотворя́тъ сегѡ̀, да бꙋ́дꙋтъ ѹ҆даля́емы ̾ѿ цр҃ко́внагѡ чи́на, про́чіе же приче́тники да не принꙋжда́ются къ семꙋ̀. Но с. сѕ҃і подоба́етъ соблюда́ти ѻ҆бы́чай ка́ждыя цр҃кви.

{комм.}Послѣ́днія сло́ва сегѡ̀ пра́вила ꙗ҆́снѡ пока́зываютъ, что̀ произне́сшій є҆го̀ собо́ръ са́мъ не признава́лъ ѻ҆́нагѡ ѻ҆́бщимъ пра́виломъ для всѣ́хъ цр҃кве́й. Бо́лѣе ꙗ҆́сное и҆ то́чное востановле́ніе вселе́нскія цр҃кви ѡ҆ се́мъ предме́тѣ нахо́дится въ в҃і и҆ г҃і пра́вилахъ шеста́гѡ вселе́нскагѡ собо́ра.

ПРА́ВИЛО п҃в.

Заблагоразсꙋждено̀, да не бꙋ́детъ позво́лено никако́мꙋ є҆пі́скопꙋ ѡ҆ставля́ти гла́вное мѣ́сто своея̀ каѳе́дры, и҆ ̾ѿходи́ти къ како́й либо цр҃кви, въ є҆гѡ̀ є҆па́рхіи состоя́щей, и҆лѝ бо́лѣе надлежа́щагѡ ѹ҆пражня́тися въ со́бственномъ дѣ́лѣ, и҆ ѡ҆ставля́ти попече́ніе и҆ прилежа́ніе ѡ҆ свое́мъ престо́лѣ.

ПРА́ВИЛО п҃г.

Ѡ҆ младе́нцахъ, когда̀ не ѡ҆брѣта́ются достовѣ́рные свидѣ́тели, сказꙋ́щіе, ꙗ҆́кѡ без̾ сомнѣ́нія креще́ны сꙋ́ть, и҆ са́ми ѻ҆нѝ по своемꙋ̀ во́зрастꙋ, не мо́гꙋтъ ѹ҆довлетвори́тельнѡ ̾ѿвѣща́ти ѡ҆ препо́данномъ и҆̀мъ та́инствѣ, разсꙋждено̀, ꙗ҆́кѡ подоба́етъ без̾ вся́кагѡ сомнѣ́нія крести́ти и҆̀хъ, дабы̀ таково́е сомнѣ́ніе не лиши́ло и҆́хъ ѡ҆чище́нія се́ю святы́нею. Сіѐ бра́тія на́ши мѣстоблюсти́тели маѵріта́нскіе присовѣ́товали потомꙋ̀, что̀ мно́гихъ таковы́хъ покꙋпа́ютъ ѹ҆ ва́рварѡвъ.

ПРА́ВИЛО п҃д.

Заблагоразсꙋждено̀ та́кожде, де́нь покланя́емыя па́схи возвѣща́ти всѣ̑мъ чрез̾ приписа́ніе под̾ ѡ҆предѣле́ніями собо́ра. Де́нь же собо́ра да соблюда́ется то́тъ са́мый, кото́рый назна́ченъ на і҆ппѡ́нскомъ собо́рѣ, то́ є҆сть два́десять пе́рвый а҆́ѵгꙋста. И҆ ѡ҆ се́мъ до́лжно написа́ти къ пе́рвенствꙋющымъ всѣ́хъ ѻ҆́бластей, дабы̀, когда̀ созыва́ютъ собо́ръ ѹ҆ себя̀, се́й де́нь ѡ҆ставля́ти неприкоснове́ннымъ.

ПРА́ВИЛО п҃є.

Та́кожде ѡ҆предѣлено̀, да не бꙋ́детъ позво́лено нис. сз҃ікако́мꙋ вре́меннѡ ѹ҆правля́ющемꙋ є҆пі́скопꙋ ѹ҆де́рживати за собо́ю престо́лъ, кото́рый є҆мꙋ̀ порꙋче́нъ, ꙗ҆́кѡ вре́меннѡ ѹ҆правля́ющемꙋ, по причи́нѣ разногла́сія и҆ ра́спрей въ наро́дѣ: но да тщи́тся ѻ҆́нъ въ тече́ніи го́да и҆збра́ти є҆мꙋ̀ є҆пі́скопа. А҆́ще же вознеради́тъ ѡ҆ се́мъ: то по ѡ҆конча́ніи го́да и҆́ный вре́меннѡ ѹ҆правля́ющій да и҆збере́тся.

ПРА́ВИЛО п҃ѕ.

Заблагоразсꙋди́ли всѣ̀, по причи́нѣ притѣсне́нія ѹ҆бо́гихъ, кото́рые непреста́ннѡ стꙋжа́ютъ цр҃кви жа́лобами, проси́ти ̾ѿ царе́й, да и҆збира́ются для ни́хъ, под̾ смотре́ніемъ є҆пі́скопѡвъ, защи́тники ̾ѿ наси́лія бога́тыхъ.

ПРА́ВИЛО п҃з.

Постано́влено, что́бы ка́ждый ра́зъ, когда̀ надлежи́тъ собра́тися собо́рꙋ, благовре́меннѡ приходи́ли на ѻ҆́ный є҆пі́скопы, котѡ́рымъ не препя́тствꙋетъ ни ста́рость, ни болѣ́знь, нижѐ кака́я либо тя́жкая неѡбходи́мость: и҆ да и҆звѣща́ются пе́рвенствꙋющіе, ка́ждый ̾ѿ своея̀ ѻ҆́бласти, ѡ҆ всѣ́хъ є҆пі́скопахъ, въ двꙋ́хъ ли, и҆лѝ тре́хъ мѣста́хъ составля́ются собра̑нія и҆́хъ, и҆ ̾ѿ ка́ждагѡ и҆з̾ си́хъ ча́стныхъ собра́ній почере́днѡ и҆збира́емые не̾ѿмѣ́ннѡ да пріи́дꙋтъ ко дню̀ собо́ра. Когда́ же пріитѝ не возмо́гꙋтъ, по мно́жествꙋ каки́хъ либо затрꙋдне́ній, ка́къ сіѐ мо́жетъ слꙋчи́тися: то, а҆́ще не и҆з̾ясня́тъ своемꙋ̀ пе́рвенствꙋющемꙋ є҆пі́скопꙋ встрѣ́тившагѡся и҆̀мъ препя́тствія, должны̀ таковы́е дово́льны бы́ти ѡ҆бще́ніемъ въ свое́й то́кмѡ цр҃кви.

ПРА́ВИЛО п҃и.

Ѡ҆ крескѡ́ніи вилларекенті́йскомъ заблагоразсꙋждено̀ всѣ́ми: ̾ѿсе́лѣ возвѣсти́ти пе́рвенствꙋющемꙋ є҆пі́скопꙋ нꙋмиді́йскомꙋ, да вѣ́даетъ, ꙗ҆́кѡ до́лженъ ѻ҆́нъ с. си҃і свое́ю гра́матою ѹ҆вѣща́ти вышерече́ннаго крескѡ́ніа ѡ҆ прише́ствіи, да не ̾ѿлага́етъ ѻ҆́нъ предста́ти на ближа́йшій ѻ҆́бщій а҆фріка́нскій собо́ръ. А҆́ще же вознеради́тъ пріитѝ: да вѣ́даетъ, ꙗ҆́кѡ сꙋ́дъ на него̀ и҆зрече́нъ бꙋ́детъ.

ПРА́ВИЛО п҃ѳ.

Ѡ҆ставле́ніе і҆ппѡні́йскія цр҃кви без̾ прави́телей не долженствꙋ́етъ до́лгѡ бы́ти въ небреже́ніи: и҆ поели́кꙋ та́мѡшнія цр҃кви нахо́дятся во вла́сти тѣ́хъ, кото́рые ̾ѿрекли́сь ̾ѿ незако́ннагѡ ѡ҆бще́нія съ є҆кѵ́тіемъ: то заблагоразсꙋждено̀ посла́ти ̾ѿ настоя́щагѡ собо́ра є҆пі́скопѡвъ: ригі́на, а҆лѵ́піа, а҆ѵгꙋсті́на, мате́рна, ѳеасі́а, є҆ѵо́діа, плакіа́на, ѹ҆рва́на, вале́ріа, а҆мви́віа, фортꙋна́та, кꙋодвꙋлтде́а, ѻ҆нора́та, і҆аннꙋа́ріа, а҆́пта, ѻ҆нора́та, а҆мпе́ліа, вікторіа́на, є҆ѵагге́лла, рогатіа́на: и҆ и҆̀мъ собра́ти и҆ вразꙋми́ти тѣ́хъ, кото́рые по ѹ҆по́рствꙋ, досто́йномꙋ порица́нія, полага́ютъ ѡ҆жида́ти ѡ҆конча́нія бѣ́гства тогѡ̀ са́магѡ є҆кѵ́тіа, и҆ съ ѻ҆́бщею моли́твою поста́вити и҆̀мъ є҆пі́скопа. А҆́ще же и҆ не восхотя́тъ сіѝ помышля́ти ѡ҆ ми́рѣ: да не препя́тствꙋютъ и҆збра́нію предстоя́теля, что́бы поста́вити є҆го̀ ра́ди по́льзы цр҃кви, сто́ль до́лгое вре́мя ѡ҆става́вшейся без̾ є҆пі́скопа.

ПРА́ВИЛО ч҃.

Ѡ҆предѣлено̀ и҆ сіѐ: когда̀ на состоя́щихъ въ кли́рѣ быва́етъ доно́съ, и҆ ѡ҆б̾явля́ются нѣ́котѡрыя ѡ҆бвинє́нія: тогда̀, ча́стію для ̾ѿклоне́нія нарека́нія на цр҃ковь, ча́стію ра́ди досто́инства кли́ра, по каковы́мъ причи́намъ и҆ ѡ҆ка́зывается и҆̀мъ снисхожде́ніе, ча́стію для и҆збѣжа́нія го́рдагѡ ѕлора́дованія є҆ретікѡ́въ и҆ ꙗ҆зы́чникѡвъ, а҆́ще жела́ютъ, ка́къ и҆ до́лжно, защища́ти своѐ дѣ́ло и҆ попещи́ся ѡ҆ доказа́тельствахъ своея̀ неви́нности, да ѹ҆чиня́тъ сіѐ въ тече́ніи го́да, въ кос. сѳ҃іто́рый должны̀ бы́ти внѣ̀ ѻ҆бще́нія. А҆́ще же въ тече́ніи го́да вознерадя́тъ ѡ҆чи́стити своѐ дѣ́ло: то по́слѣ сегѡ̀ никакі́й гла́съ ̾ѿ ни́хъ да не пріе́млется.

ПРА́ВИЛО ч҃а.

Постано́влено и҆ сіѐ: а҆́ще кто̀ пріи́метъ кого́ либо и҆з̾ чꙋжа́гѡ монастыря̀, и҆ восхо́щетъ произвестѝ є҆го̀ въ кли́ръ, и҆лѝ поста́витъ и҆гꙋ́меномъ своегѡ̀ монастыря̀: то є҆пі́скопъ, та́къ постꙋпа́ющій, да бꙋ́детъ ѹ҆дале́нъ ̾ѿ ѻ҆бще́нія съ про́чими, и҆ да ѡ҆грани́чится ѡ҆бще́ніемъ то́кмѡ съ свое́ю па́ствою: а҆ то́тъ да не ѡ҆ста́нется ни кли́рікомъ, ни и҆гꙋ́меномъ.

ПРА́ВИЛО ч҃в.

Ѡ҆предѣлено̀ и҆ сіѐ: а҆́ще кото́рый є҆пі́скопъ є҆ретікѡ́въ, и҆лѝ ꙗ҆зы́чникѡвъ, сро́дникѡвъ, и҆лѝ не принадлежа́щихъ къ сродствꙋ̀, ѡ҆ста́витъ наслѣ́дниками свои́ми, и҆ предпочте́тъ и҆̀хъ цр҃кви: таково́мꙋ и҆ по сме́рти да бꙋ́детъ и҆зрече́на а҆на́ѳема, и҆ є҆гѡ̀ и҆́мя никогда̀ ̾ѿ і҆ере́євъ бж҃іихъ да не возно́сится. Да не мо́жетъ бы́ти є҆мꙋ̀ въ ѡ҆ правда́ніе и҆ то̀, а҆́ще без̾ завѣща́нія ̾ѿи́детъ. Поне́же бы́въ поста́вленъ є҆пі́скопомъ, по прили́чію, до́лженъ бы́лъ ѹ҆чини́ти назначе́ніе своегѡ̀ и҆мꙋ́щества, соѻбра́зное своемꙋ̀ зва́нію.

ПРА́ВИЛО ч҃г.

Разсꙋждено̀ та́кожде ѡ҆ ̾ѿпꙋще́ніяхъ на свобо́дꙋ, быва́ющихъ въ це́ркви, да бꙋ́детъ проше́ніе къ царю̀.

{комм.}Разꙋмѣ́ется проше́ніе ѡ҆ то́мъ, что́бы таковы́я ̾ѿпꙋщє́нія ѹ҆тверждены̀ бы́ли ца́рскою вла́стію.

ПРА́ВИЛО ч҃д.

Постано́влено и҆ сіѐ: повсю́дꙋ на поля́хъ, и҆ въ вертогра́дахъ, поста́вленные ꙗ҆́кобы въ па́мять мꙋ́ченикѡвъ ѻ҆лтарѝ, при кото́рыхъ не ѡ҆ка́зывается положе́ннымъ никако́гѡ тѣ́ла и҆лѝ ча́сти моще́й мꙋ́ченическихъ, да разрꙋ́шатся, а҆́ще возмо́жно, с. с҃к мѣ́стными є҆пі́скопами. А҆́ще же не допꙋ́стятъ до сегѡ̀ нарѡ́дныя смятє́нія: по кра́йней мѣ́рѣ да бꙋ́детъ вразꙋмля́емъ наро́дъ, что́бы не собира́лся въ ѻ҆́ныхъ мѣста́хъ, и҆ что́бы правомы́слящіе къ таковы́мъ мѣста́мъ не привя́зывались никаки́мъ сꙋевѣ́ріемъ. И҆ па́мять мꙋ́ченикѡвъ совсѣ́мъ да не соверша́ется, ра́звѣ а҆́ще гдѣ́ либо є҆́сть и҆лѝ тѣ́ло, и҆лѝ нѣ́кая ча́сть моще́й, и҆лѝ, по сказа́нію ̾ѿ вѣ́рной дре́вности пре́данномꙋ, и҆́хъ жили́ще, и҆лѝ стяжа́ніе, и҆лѝ мѣ́сто страда́нія. А҆ ѻ҆лтарѝ, гдѣ́ бы то̀ ни бы́ло поста́вленные, по сновидѣ́ніямъ и҆ сꙋ́етнымъ ̾ѿкрове́ніямъ нѣ́которыхъ люде́й, да бꙋ́дꙋтъ всемѣ́рнѡ ̾ѿверга́емы.

ПРА́ВИЛО ч҃є.

Заблагоразсꙋждено̀ та́кожде, проси́ти ̾ѿ сла́внѣйшихъ царе́й, да и҆стребля́ются вся́кимъ ѻ҆́бразомъ ѡ҆ста́тки і҆дѡлопокло́нства, не то́кмѡ въ и҆звая́ніяхъ, но и҆ въ каки́хъ либо мѣста́хъ, и҆лѝ ро́щахъ, и҆лѝ древа́хъ.

ПРА́ВИЛО ч҃ѕ.

Всѣ́ми є҆пі́скопами рече́но: а҆́ще заблагоразсꙋждено̀ бꙋ́детъ писа́ти нѣ́кія гра̑маты на собо́рѣ: то достойночти́мый є҆пі́скопъ, предсѣдя́щій на се́мъ престо́лѣ, да благоволи́тъ ̾ѿ и҆́мени всѣ́хъ, ѡ҆ че́мъ разсꙋждено̀, писа́ти и҆ подпи́сывати гра̑маты. Є҆ще́ же є҆пі́скопамъ мѣстоблюсти́телямъ, кото́рыхъ до́лжно посла́ти въ а҆фріка́нскія ѻ҆́бласти, по дѣ́лꙋ ѡ҆ донаті́стахъ, да бꙋ́дꙋтъ даны̀ гра̑маты, ѡ҆предѣля́ющыя си́лꙋ да́ннагѡ и҆̀мъ порꙋче́нія, ̾ѿ си́лы кото́рагѡ и҆ да не ̾ѿстꙋпа́ютъ.

ПРА́ВИЛО ч҃з.

Поели́кꙋ ѻ҆́бщее є҆́сть сіѐ дѣ́ло, на кото́рое ны́нѣ ѡ҆брати́лъ внима́ніе бра́тъ и҆ сослꙋжи́тель на́шъ, да вѣ́даетъ ка́ждый и҆з̾ на́съ ѡ҆предѣле́нный є҆мꙋ̀ ̾ѿ бг҃а с. ск҃а чи́нъ, да поста́вленные по́слѣ дрꙋги́хъ ̾ѿдаю́тъ преимꙋ́щество поста́влєннымъ пре́жде, и҆ да не дерза́ютъ твори́ти что́ либо, не вня́въ во́лѣ и҆́хъ: сегѡ̀ ра́ди предлага́ю, что̀ прихо́дитъ мнѣ̀ на мы́сль: тѣ́хъ, кото́рые пренебрега́ютъ поста́вленныхъ пре́жде и҆́хъ, и҆ ꙗ҆вля́ютъ нѣ́кꙋю де́рзость, подоба́етъ всѣ́мъ собо́ромъ ѹ҆кроща́ти по прили́чію. Ксанті́ппъ, є҆пі́скопъ пе́рвагѡ престо́ла нꙋмиді́йскагѡ ре́къ: всѐ присꙋ́тствіе бра́тій, вы́слꙋшавъ разсꙋжде́ніе бра́та и҆ сослꙋжи́теля на́шегѡ а҆ѵри́ліа, что̀ на сіѐ ̾ѿвѣща́етъ; Діаті́мій є҆пі́скопъ ре́къ: что̀ мнѣ́ніями дре́внихъ ѡ҆предѣлено̀, то̀ предлага́ется ва́шемꙋ согла́сію: содержа́щееся въ дѣя́ніяхъ пре́жнихъ собо́рѡвъ карѳаге́нскія цр҃кви, ва́шимъ согла́сіемъ вполнѣ̀ да подтверди́тся и҆ всѣ́ми да соблюда́ется. Всѣ̀ є҆пі́скопы реклѝ: се́й чи́нъ бы́лъ соблюда́емъ ̾ѿ ѻ҆тцє́въ и҆ ̾ѿ дре́внихъ, и҆ ̾ѿ на́съ, по и҆зволе́нію бж҃ію, соблюда́емъ бꙋ́детъ. Но при се́мъ да сохраня́ется пра́во пе́рвенствꙋющихъ є҆пі́скопѡвъ нꙋми́діи и҆ маѵріта́ніи, на ѡ҆снова́ніи нꙋмиді́йскагѡ писменнохрани́лища и҆ спи́ска престо́лѡвъ. Пото́мъ ѹ҆го́дно бы́ло всѣ́мъ є҆пі́скопамъ подписа́вшымъ ѡ҆предѣлє́нія сегѡ̀ собо́ра, что́бы спи́сокъ престо́лѡвъ и҆ первонача́льное постановле́ніе нꙋмиді́йское находи́лись и҆ ѹ҆ пе́рвагѡ престо́ла, и҆ въ митропо́ліи кѡнстанті́нѣ.

ПРА́ВИЛО ч҃и.

Ѡ҆ кꙋодвꙋлтде́ѣ и҆ кентѷріа́тѣ.

Ка́къ по проше́нію сопе́рника є҆гѡ̀, ѡ҆ представле́ніи є҆гѡ̀ на́шемꙋ собо́рꙋ, ѻ҆́нъ бы́въ вопроше́нъ, хо́щетъ ли и҆мѣ́ти дѣ́ло пред̾ є҆пі́скопами, сперва̀ соглаша́лся, но въ дрꙋгі́й де́нь ̾ѿвѣща́лъ, что̀ не хо́щетъ сегѡ̀, и҆ ѹ҆дали́лся: то ѹ҆го́дно всѣ́мъ є҆пі́скопамъ, да никто̀ не пріе́млетъ въ с. ск҃в ѻ҆бще́ніе сего̀ кꙋодвꙋлтде́а, доко́лѣ дѣ́ло є҆гѡ̀ не полꙋ́читъ ѡ҆конча́нія. И҆́бо, пре́жде рѣше́нія ѡ҆ не́мъ дѣ́ла, ̾ѿя́ти ѹ҆ негѡ̀ є҆пі́скопство, не бы́ло бы ѹ҆го́дно никомꙋ̀ и҆з̾ хрістіа́нъ.

ПРА́ВИЛО ч҃ѳ.

Ѡ҆ маѯіміа́нѣ є҆пі́скопѣ ваге́нскомъ разсꙋждено̀: да по́шлются ̾ѿ собо́ра гра̑маты и҆ къ немꙋ̀ и҆ къ пасѡ́мымъ, дабы̀ ѻ҆́нъ ѡ҆ста́вилъ є҆пі́скопство, а҆ ѻ҆нѝ и҆ска́ли себѣ̀ дрꙋга́гѡ.

ПРА́ВИЛО р҃.

Заблагоразсꙋждено̀ и҆ сіѐ: ̾ѿны́нѣ рꙋкополага́емые въ а҆фріка́нскихъ ѻ҆́бластяхъ да полꙋча́ютъ ̾ѿ рꙋкополага́ющихъ гра̑маты, рꙋко́ю и҆́хъ подпи́санныя, съ ѡ҆значе́ніемъ ко́нсꙋла, то́ є҆сть го́да и҆ дня̀ рꙋкоположе́нія, дабы̀ не возника́ло никако́гѡ сомнѣ́нія ѡ҆ мла́дшихъ и҆ ста́ршихъ.

ПРА́ВИЛО р҃а.

Положено̀ и҆ сіѐ: кто̀ хотя̀ є҆ди́ножды чита́лъ въ цр҃кви, то́тъ дрꙋго́ю цр҃ковію да не пріе́млется въ кли́ръ.

ПРА́ВИЛО р҃в.

Всѣ̀ вы̀ со ѡ҆бѣща́ніемъ предполага́ли, что̀ до́лжно ка́ждомꙋ и҆з̾ на́съ во свое́мъ гра́дѣ, и҆лѝ ѻ҆дномꙋ̀ ѻ҆со́бѡ, встꙋпи́ти въ сноше́ніе съ предводи́телями донаті́стѡвъ, и҆лѝ присоедини́ти къ себѣ̀ дрꙋга́го сосѣ́дняго є҆пі́скопа, дабы̀ та́кожде встꙋпи́ти съ ни́ми въ сноше́ніе во вся́комъ гра́дѣ и҆ мѣ́стѣ, при посре́дствѣ нача́льствꙋющихъ и҆лѝ пе́рвенствꙋющихъ въ тѣ́хъ мѣста́хъ. Всѣ́мъ ли сіѐ ѹ҆го́дно, да возвѣсти́тся. Всѣ̀ є҆пі́скопы реклѝ: всѣ̑мъ ѹ҆го́дно.

ПРА́ВИЛО р҃г.

Є҆пі́скопъ каѳолі́ческія цр҃кви[11] ре́къ: приглаше́ніе, кото́рое ̾ѿ ва́шея че́стности до́лжно препровождено̀ с. ск҃г бы́ти къ донаті́стамъ, благоволи́те вы́слꙋшати и҆ въ дѣя́нія включи́ти, и҆ къ ни́мъ посла́ти, дабы̀ пото́мъ и҆ и҆́хъ ̾ѿвѣ́тъ чрез̾ ва́ши дѣя́нія на́мъ ꙗ҆вле́нъ бы́лъ.

Зако́ннѡ встꙋпа́емъ съ ва́ми въ сноше́ніе, бы́въ по́сланы ̾ѿ зако́ннагѡ на́шегѡ собо́ра, жела́я возра́доватися ѡ҆ ва́шемъ и҆справле́ніи. Вѣ́даемъ бо любо́вь гд҃ⷭ҇а ре́кшагѡ: блаже́ни миротво́рцы, ꙗ҆́кѡ ті́и сы́нове бж҃іи нарекꙋ́тся[12]. Воспомянꙋ́лъ ѻ҆́нъ та́кожде и҆ чрез̾ проро́ка, да є҆щѐ и҆ не хотя́щымъ нарица́тися бра́тіями на́шими, глаго́лемъ мы̀: бра́тія на́ши є҆стѐ. И҆ та́къ не долженствꙋ́ете вы̀ ѹ҆ничижи́ти сіѐ, ̾ѿ ми́рныя любвѝ происходя́щее на́ше напомина́ніе. А҆́ще что̀ ̾ѿ и҆́стины и҆мѣ́ти мни́те, не ѹ҆сомни́теся защища́ти ѻ҆́ное: то́ є҆сть, собери́те ва́шъ собо́ръ, и҆збери́те и҆з̾ среды̀ ва́съ тѣ́хъ, котѡ́рымъ подоба́етъ ввѣ́рити дѣ́ло ѡ҆правда́нія ва́шегѡ: да и҆ мы̀ возмо́жемъ то́жде сотвори́ти, то́ є҆сть, да и҆зберꙋ́тся ̾ѿ на́шегѡ собо́ра долженствꙋ́ющіе съ и҆́збранными и҆з̾ среды̀ ва́съ, въ и҆звѣ́стномъ мѣ́стѣ и҆ въ и҆звѣ́стное вре́мя, ми́рнѡ и҆зслѣ́довати всѐ подлежа́щее вопроше́нію, и҆ ̾ѿдѣля́ющее ва́съ ̾ѿ на́шегѡ ѻ҆бще́нія, и҆ по́мощію гд҃ⷭ҇а бг҃а на́шегѡ, хотя̀ по́зднѡ да воспріи́метъ коне́цъ закоснѣ́вшее заблꙋжде́ніе, дабы̀ послѣ́дꙋя человѣ́ческомꙋ ѹ҆вѣре́нію немощны́я дꙋ́шы и҆ несвѣ́дꙋщыя не поги́бли въ святота́тственномъ раздѣле́ніи. И҆́бо а҆́ще бра́тски сіѐ пріи́мете, то и҆́стина ѹ҆до́бнѡ ꙗ҆ви́тся: а҆́ще же сіѐ сотвори́ти не восхо́щете, то невѣ́ріе ва́ше тотча́съ позна́ется.

И҆ по прочте́ніи сегѡ̀ ѻ҆бразца̀ всѣ̀ є҆пі́скопы реклѝ: соверше́ннѡ согла́сны, да бꙋ́детъ та́кѡ.

с. ск҃д

ПРА́ВИЛО р҃д.

Наставле́ніе бра́тіямъ, ѳеа́сію и҆ є҆ѵо́дію, назна́чєннымъ посла́нниками ̾ѿ карѳаге́нскагѡ собо́ра къ сла́внѣйшымъ и҆ благочести́вѣйшымъ самоде́ржцамъ. Когда̀, съ по́мощію гд҃ⷭ҇нею, пристꙋ́пятъ ѻ҆нѝ къ благочести́вѣйшымъ царя́мъ: тогда̀ ꙗ҆вя́тъ и҆̀мъ, каки́мъ ѻ҆́бразомъ, во вре́мя собо́ра проше́дшагѡ лѣ́та, старѣ́йшины донаті́стѡвъ съ по́лною свобо́дою, посре́дствомъ гра́дскихъ и҆звѣще́ній приглашены̀ бы́ли собра́тися, дабы̀, а҆́ще и҆мѣ́ютъ дерзнове́ніе защища́ти своѐ мнѣ́ніе, и҆збра́ли нѣ́которыхъ спосо́бныхъ ̾ѿ числа̀ своегѡ̀, ми́рнѡ состяза́лися съ на́ми, и҆ кро́тостію хрістіа́нскою несомнѣ́ннѡ показа́ли, а҆́ще что́ либо ̾ѿ и҆́стины ѹ҆ себя̀ ѹ҆держа́ли, дабы̀ таки́мъ ѻ҆́бразомъ каѳолі́ческая и҆́скренность, и҆здре́вле сія́вшая въ проше́дшыя времена̀, и҆ ны́нѣ подо́бнѡ дозна́на была̀ и҆з̾ замѣша́тельства и҆ ѹ҆по́рства противорѣ́чꙋщихъ. Но поели́кꙋ ѻ҆нѝ почтѝ ѡ҆б̾я́ты бы́ли безнаде́жностію: то ничегѡ̀ не дерзнꙋ́ли ̾ѿвѣща́ти. И҆ та́къ поели́кꙋ є҆пі́скопскій и҆ ми́рный ѻ҆́бразъ дѣ́йствованія на таковы́хъ ѹ҆потребле́нъ, и҆ ѻ҆нѝ, не мо́гши ̾ѿвѣща́ти про́тивъ и҆́стины, ѡ҆брати́лись къ нелѣ́пымъ наси́льствєннымъ постꙋ́пкамъ, та́къ, что̀ мно́гихъ є҆пі́скопѡвъ и҆ мно́гихъ приче́тникѡвъ [да ѹ҆молчи́мъ ѡ҆ міря́нахъ] стѣсни́ли навѣ́тами, и҆ въ нѣ́котѡрыя цр҃кви вто́ргнꙋлися, а҆ въ дрꙋгі́я та́кожде вто́ргнꙋтися покꙋша́лись: то ца́рскомꙋ человѣколю́бію предлежи́тъ попещи́ся, что́бы каѳолі́ческая цр҃ковь, благоче́стною ѹ҆тро́бою хр҃ⷭ҇тꙋ̀ и҆̀хъ роди́вшая, и҆ крѣ́постію вѣ́ры воспита́вшая, была̀ ѡ҆граждена̀ и҆́хъ промышле́ніемъ: дабы̀ въ благочести́выя и҆́хъ времена̀, дерзнове́нные человѣ́ки не возгоспо́дствовали над̾ безси́льнымъ нас. ск҃єро́домъ, посре́дствомъ нѣ́коегѡ стра́ха, когда̀ не мо́гꙋтъ соврати́ти ѻ҆́ный посре́дствомъ ѹ҆бѣжде́нія. И҆́бо и҆звѣ́стно и҆ многокра́тнѡ зако́нами ѡ҆глашено̀, что̀ произво́дятъ гнꙋ́сныя скѡ́пища ̾ѿщепе́нцєвъ. Сіѐ многокра́тнѡ и҆ повелѣ́ніями сами́хъ вышерече́нныхъ благочести́вѣйшихъ самоде́ржцєвъ ѡ҆сꙋждено̀ бы́ло. Посемꙋ̀ про́тивъ неи́стовства ѻ҆́ныхъ ̾ѿщепе́нцєвъ про́симъ да́ти на́мъ бж҃е́ственнꙋю по́мощь, не неѻбыча́йнꙋю и҆ не чꙋ́ждꙋю ст҃ы́мъ писа́ніямъ. И҆́бо а҆п҃ⷭ҇лъ па́ѵелъ, ка́къ пока́зано въ и҆́стинныхъ дѣя́ніяхъ а҆п҃ⷭ҇льскихъ, соꙋмышле́ніе люде́й безчи́нныхъ препобѣди́лъ во́инскою по́мощію. И҆ та́къ мы̀ про́симъ ѡ҆ то́мъ, да неꙋкосни́тельнѡ пода́стся ѡ҆хране́ніе каѳолі́ческимъ чина́мъ цр҃кве́й въ ка́ждомъ гра́дѣ и҆ ра́зныхъ мѣста́хъ, прилежа́щихъ къ ка́ждомꙋ владѣ́нію. Подоба́етъ вкꙋ́пѣ ѡ҆ се́мъ проси́ти благочести́вѣйшихъ самоде́ржцєвъ, да соблюда́ютъ зако́нъ, и҆́зданный блаже́нныя па́мяти ѻ҆тце́мъ и҆́хъ ѳеодо́сіемъ, ѡ҆ взы́скиваніи по десятѝ фꙋ́нтѡвъ зла́та, съ є҆ретікѡ́въ рꙋкополага́ющихъ и҆ рꙋкополага́емыхъ, та́кожде и҆ съ владѣ́льцєвъ, ѹ҆ кото́рыхъ бꙋ́детъ ѹ҆смо́трено собра́ніе и҆́хъ. Прито́мъ да повеля́тъ подтверди́ти ѻ҆́ный зако́нъ, съ распростране́ніемъ си́лы є҆гѡ̀ на тѣ́хъ, проти́вꙋ навѣ́тѡвъ ко́ихъ предста́вили свидѣ́тєльства прія́вшіе попече́ніе ѡ҆ каѳолі́ческой цр҃кви, дабы̀, по кра́йней мѣ́рѣ си́мъ стра́хомъ, ̾ѿ произведе́нія раско́лѡвъ и҆ ̾ѿ є҆реті́ческагѡ безꙋ́мія, ѹ҆де́ржаны бы́ли, ̾ѿлага́ющіе своѐ ѡ҆чище́ніе и҆ и҆справле́ніе при помышле́ніи ѡ҆ вѣ́чномъ наказа́ніи. Є҆щѐ и҆ ѡ҆ то́мъ подоба́етъ проси́ти, да бꙋ́детъ благоче́стіемъ и҆́хъ возѡбновле́нъ до ны́нѣ сꙋществꙋ́ющій зако́нъ, кото́рый ̾ѿе́млетъ ѹ҆ є҆ретікѡ́въ пра́во взима́ти что́ либо, и҆лѝ с. ск҃ѕ при рꙋкоположе́ніяхъ, и҆лѝ по завѣща́ніямъ, и҆лѝ ѡ҆ставля́ти, и҆ про́стѡ рещѝ, ѹ҆ ѡ҆слѣпле́нныхъ безꙋ́мнымъ свои́мъ предꙋбѣжде́ніемъ, и҆ хотя́щихъ пребыва́ти въ заблꙋжде́ніи донаті́стѡвъ, да ̾ѿи́мется вла́сть и҆лѝ ѡ҆ставля́ти что́ либо, и҆лѝ взима́ти со́бственное. А҆ тѣ́мъ, кото́рые помышле́ніемъ ѡ҆ є҆дине́ніи и҆ ми́рѣ восхотя́тъ и҆спра́вити себѐ, да бꙋ́детъ разрѣшено̀, и҆ при сꙋществова́ніи такова́гѡ зако́на, полꙋча́ти наслѣ́діе, хотя̀ вы̀ что̀ въ да́ръ и҆лѝ въ наслѣ́діе доста́лось и҆̀мъ є҆щѐ тогда̀, ка́къ ѻ҆нѝ находи́лись въ є҆реті́ческомъ заблꙋжде́ніи, за и҆зключе́ніемъ впро́чемъ тѣ́хъ, кото́рые по призыва́ніи къ сꙋдꙋ̀, почлѝ нꙋ́жнымъ прейтѝ къ каѳолі́ческой цр҃кви. И҆́бо ѡ҆ таковы́хъ полага́ти до́лжно, ꙗ҆́кѡ не по стра́хꙋ небе́снагѡ сꙋда̀, но по а҆лка́нію земны́я вы́годы пожела́ли каѳолі́ческагѡ є҆дине́нія. Све́рхъ же всегѡ̀ сегѡ̀ потре́бна по́мощь ̾ѿ власте́й ка́ждыя ѻ҆́бласти. Но и҆ а҆́ще и҆но́е что̀ ѹ҆смо́трятъ мѣстоблюсти́тели, споспѣшествꙋ́ющее церко́вной по́льзѣ: сіѐ дѣ́лати и҆ соверша́ти дае́мъ полномо́чіе.

ПРА́ВИЛО р҃є.

Поне́же въ карѳаге́нѣ то́кмѡ соверши́лось є҆дине́ніе, то да по́шлются гра̑маты къ нача́льствꙋющымъ, да и҆ въ про́чихъ є҆па́рхіахъ и҆ гра́дахъ повеля́тъ сі́и нача́льствꙋющіе прилага́ти тща́ніе ѡ҆ є҆дине́ніи. Ѿ карѳаге́нскія цр҃кви, и҆́менемъ всея̀ а҆́фріки, да по́шлется къ ца́рской пала́тѣ въ гра́матахъ є҆пі́скопѡвъ благодаре́ніе за ̾ѿринове́ніе донаті́стѡвъ.

ПРА́ВИЛО р҃ѕ.

Ѡ҆ то́мъ, ꙗ҆́кѡ не бы́ти ѻ҆́бщемꙋ и҆ всецѣ́ломꙋ собо́рꙋ, ра́звѣ по нꙋ́ждѣ.

Разсꙋждено̀, ꙗ҆́кѡ не є҆́сть неѡбходи́мо, впре́дь є҆жего́днѡ ѹ҆трꙋжда́ти бра́тію: с. ск҃з но когда̀ потре́бꙋетъ ѻ҆́бщая, то́ є҆сть всея̀ а҆́фріки нꙋ́жда, по гра́матамъ, ̾ѿкꙋ́да либо приходя́щымъ къ семꙋ̀ престо́лꙋ, тогда̀ подоба́етъ бы́ти собо́рꙋ въ то́й ѻ҆́бласти, въ кото́рꙋю призове́тъ потре́бность и҆ ѹ҆до́бство. Дѣла́ же не ѻ҆́бщыя, да сꙋ́дятся въ ка́ждой ѻ҆́бласти по́рознь.

ПРА́ВИЛО р҃з.

Ѡ҆ возбране́ніи переноси́ти дѣла̀ ̾ѿ сꙋде́й доброво́льнѡ и҆́збранныхъ.

А҆́ще слꙋчи́тся перенесе́ніе дѣ́ла въ вы́сшій сꙋ́дъ, и҆ недово́льный пе́рвымъ рѣше́ніемъ и҆збере́тъ сꙋде́й, кꙋ́пнѡ же съ ни́мъ и҆ то́тъ, про́тивъ кото́рагѡ тре́бꙋетъ ѻ҆́нъ но́вагѡ сꙋда̀: то по́слѣ сегѡ̀ ни кото́ромꙋ и҆з̾ ни́хъ да не бꙋ́детъ позво́лено перенесе́ніе дѣ́ла въ и҆́ный сꙋ́дъ.

ПРА́ВИЛО р҃и.

Ѡ҆ церко́вныхъ и҆сполни́теляхъ.

Кромѣ̀ сегѡ̀ заблагоразсꙋждено̀ проси́ти, да и҆зберꙋ́тся пя́ть по всѣ́мъ нꙋ́ждамъ церкѡ́внымъ и҆сполни́телей, кото́рые да распредѣля́тся по ра́знымъ ѻ҆́бластямъ.

{комм.}До́лжность и҆сполни́телей, вѣроя́тнѡ, состоя́ла въ настоя́ніи, что́бы ѡ҆предѣлє́нія нача́льства и҆ сꙋда̀, не ѡ҆става́лись без̾ и҆сполне́нія, по ѹ҆клоне́нію и҆лѝ ѹ҆по́рствꙋ.

ПРА́ВИЛО р҃ѳ.

Є҆щѐ заблагоразсꙋждено̀, что́бы ̾ѿправля́емые ̾ѿ и҆́мени всѣ́хъ є҆па́рхій посла́нники, віке́нтій и҆ фꙋртꙋнатіа́нъ, проси́ли пресла́вныхъ царе́й, да бꙋ́детъ позво́лено ѹ҆чреди́ти ѹ҆че́ныхъ є҆кді́кѡвъ, кото́рые и҆мѣ́ли бы свое́ю ѡ҆бя́занностію дѣ́йствованіе въ защище́ніи дѣ́лъ: и҆ кото́рые бы, ꙗ҆́кѡ свяще́нники є҆па́рхій, прія́вшіе на себя̀ хода́тайство по дѣла́мъ цр҃кве́й, свобо́днѡ моглѝ, когда̀ нꙋ́жда потре́бꙋетъ, входи́ти въ присꙋ́тствіе сꙋди́лищъ для ѡ҆проверже́нія возраже́ній, и҆ с. ск҃и для представле́нія тогѡ̀, что̀ нꙋ́жно.

{комм.}Се́й до́лжности є҆кді́ка ча́стію со̾ѿвѣ́тствꙋетъ ны́нѣшняя до́лжность дꙋхо́внагѡ депꙋта́та при дѣлопроизво́дствахъ по вѣ́домствꙋ свѣ́тскомꙋ.

ПРА́ВИЛО р҃і.

Разсꙋждено̀, да и҆мѣ́ютъ свобо́дное мѣстоблюсти́тельство и҆́збранные мѣстоблюсти́тели, по́сланные къ ца́рской пала́тѣ.

{комм.}То́ є҆сть: и҆̀мъ позволя́ется представля́ть не то́лькѡ и҆́меннѡ повелѣ́нное и҆̀мъ ̾ѿ собо́ра, но и҆ дрꙋго́е, что̀ призна́ютъ поле́знымъ для цр҃кви.

ПРА́ВИЛО ра҃і.

Постано́влено и҆ сіѐ: наро́дꙋ никогда̀ не и҆мѣ́вшемꙋ своегѡ̀ є҆пі́скопа ̾ѿню́дь не дава́ти є҆го̀, ра́звѣ по рѣше́нію всегѡ̀ собо́ра ка́ждыя ѻ҆́бласти, и҆ пе́рвенствꙋющагѡ є҆пі́скопа, и҆ съ согла́сія тогѡ̀ є҆пі́скопа, въ предѣ́лѣ ко́егѡ состоя́ла ѻ҆́ная цр҃ковь.

ПРА́ВИЛО рв҃і.

Ѡ҆ наро́дѣ и҆ є҆па́рхіахъ, ѡ҆браща́ющихся ̾ѿ донаті́стѡвъ.

Наро́дъ ѡ҆браща́ющійся ̾ѿ донаті́стѡвъ, и҆мѣ́ющій є҆пі́скопа, поста́вленнаго без̾ соизволе́нія собо́ра, да бꙋ́детъ несомнѣ́ннѡ ѹ҆досто́енъ и҆мѣ́ти ѻ҆́наго. Наро́дꙋ и҆мѣ́вшемꙋ є҆пі́скопа, и҆ по сме́рти є҆гѡ̀ не восхотѣ́вшемꙋ и҆мѣ́ти своего̀ є҆пі́скопа, но жела́ющемꙋ по прили́чію присоедини́тися къ є҆па́рхіи и҆но́гѡ кото́рагѡ либо є҆пі́скопа, не до́лжно въ се́мъ ̾ѿка́зывати. Предложено̀ и҆ сіѐ: ꙗ҆́кѡ є҆пі́скопы, пре́жде ѡ҆б̾явле́нія ца́рскагѡ зако́на ѡ҆ є҆дине́ніи, ѡ҆брати́вшіе къ каѳолі́ческой вѣ́рѣ наро́дъ, кото́рый и҆мѣ́ли въ ѹ҆правле́ніи, должны̀ ѹ҆держа́ти вла́сть над̾ ѻ҆́нымъ. По зако́нѣ же є҆дине́нія и҆ да́лѣе, надлежи́тъ всѣ̀ цр҃кви и҆ предѣ́лы и҆́хъ, и҆ всѣ̀, какі́я мо́гꙋтъ ѡ҆каза́ться принадле́жнѡсти, зако́ннѡ прис. ск҃ѳсво́єнныя тѣ́мъ цр҃квамъ, да бꙋ́дꙋтъ ѹ҆тверждены̀ за каѳолі́ческими є҆пі́скопами, находя́щимися въ тѣ́хъ мѣста́хъ, кото́рыми завладѣ́ли є҆ретікѝ, въ послѣ́дствіи ѡ҆браща́ющіеся къ каѳолі́ческой вѣ́рѣ и҆лѝ не ѡ҆браща́ющіеся. И҆ а҆́ще что̀ нѣ́кіи и҆з̾ ни́хъ присво́или себѣ̀, по́слѣ ца́рскагѡ зако́на, то̀ долженствꙋ́етъ возвращено̀ бы́ти.

ПРА́ВИЛО рг҃і.

Маѵре́нтій є҆пі́скопъ ре́къ: прошꙋ̀, да назна́чатся сꙋдія́ми: святѣ́йшій ста́рецъ ѯанті́ппъ, святѣ́йшій а҆ѵгꙋсті́нъ, флоренті́нъ, ѳеа́сій, самѱѵ́хій, секꙋ́ндъ и҆ поси́дій: повели́те, что́бы сіѐ ѡ҆предѣлено̀ бы́ло для меня̀. Святы́й собо́ръ согласи́лся на назначе́ніе проси́мыхъ сꙋде́й, про́чихъ же сꙋде́й нꙋ́жныхъ въ дополне́ніе ѹ҆законе́ннагѡ числа̀, ста́рецъ ѯанті́ппъ предоста́витъ и҆збра́ти сами́мъ ста́рцамъ но́выя герма́ніи.

{комм.}По жа́лобѣ ста́рцєвъ но́выя герма́ніи, на є҆пі́скопа маѵре́нтіа, ѻ҆́нъ предста́лъ собо́рꙋ для сꙋда̀, а҆ ѡ҆бвини́тели не ꙗ҆ви́лись. Собо́ръ призна́лъ и҆̀хъ досто́йными ѡ҆сꙋжде́нія: но по кро́тости цр҃ко́вной не произнеся̀ ѻ҆́нагѡ, назна́чилъ сꙋ́дъ въ ѻ҆́бласти, къ кото́рой принадлежи́тъ є҆пі́скопъ. По семꙋ̀ ча́стномꙋ дѣ́лꙋ, собо́ръ и҆зрека́етъ пра́вило, пока́зывающее ѻ҆́бразъ составле́нія сꙋда̀ над̾ є҆пі́скопомъ.

ПРА́ВИЛО рд҃і.

Ѡ҆ ѹ҆миротворе́ніи цр҃кви ри́мскія и҆ а҆леѯандрі́йскія.

Ѡ҆ разногла́сіи цр҃кве́й ри́мскія и҆ а҆леѯандрі́йскія заблагоразсꙋждено̀ писа́ти къ святѣ́йшемꙋ па́пѣ і҆нноке́нтію, дабы̀ ѻ҆́бѣ цр҃кви взаи́мнѡ храни́ли ми́ръ, кото́рый гд҃ⷭ҇ь заповѣ́даетъ.

ПРА́ВИЛО рє҃і.

Постано́влено: да по є҆ѵа́нгельскомꙋ и҆ а҆по́стольскомꙋ ѹ҆че́нію, ни ѡ҆ста́вленный жено́ю, ни ̾ѿпꙋ́щенная мꙋ́жемъ, не сочетава́ются съ дрꙋги́мъ лице́мъ: но и҆лѝ та́кѡ да пребыва́ютъ, и҆лѝ да примиря́тся междꙋ̀ собо́ю. А҆́ще пренебрегꙋ́тъ сіѐ: да бꙋ́дꙋтъ понꙋжс. с҃лдены̀ къ покая́нію. Потре́бно є҆́сть проси́ти, да бꙋ́детъ и҆́зданъ ѡ҆ се́мъ дѣ́лѣ ца́рскій зако́нъ.

ПРА́ВИЛО рѕ҃і.

Постано́влено и҆ сіѐ: да соверша́ются всѣ́ми ѹ҆тверждє́нныя на собо́рѣ моли̑твы, ка́къ предначина́тєльныя, та́къ и҆ ѡ҆конча́тєльныя, и҆ моли̑твы предложе́нія, и҆лѝ возложе́нія рꙋ́къ: и҆ ̾ѿню́дь да не прино́сятся никогда̀ и҆ны́я вопрекѝ вѣ́рѣ, но да глаго́лются тѣ̀, ко́и просвѣще́ннѣйшими со́браны.

ПРА́ВИЛО рз҃і.

Постано́влено: да, а҆́ще кто̀ и҆з̾ кли́ра бꙋ́детъ проси́ти ̾ѿ царя̀ разсмотре́нія ѡ҆ себѣ̀, въ свѣ́тскихъ сꙋди́лищахъ, лише́нъ бꙋ́детъ своея̀ че́сти. А҆́ще же бꙋ́детъ ̾ѿ царя̀ проси́ти себѣ̀ сꙋда̀ є҆пі́скопскагѡ: ̾ѿню́дь да не возбрани́тся є҆мꙋ̀ сіѐ.

ПРА́ВИЛО ри҃і.

Кто̀ бы́въ ̾ѿлꙋче́нъ ̾ѿ ѻ҆бще́нія церко́внагѡ въ а҆́фрікѣ, прокра́дется въ замо́рскія стра́ны, дабы̀ при́нятꙋ бы́ти въ ѻ҆бще́ніе, то́тъ подве́ргнется и҆зверже́нію и҆з̾ кли́ра.

ПРА́ВИЛО рѳ҃і.

Положено̀: а҆́ще кто̀ восхо́щетъ и҆тѝ къ ца́рской пала́тѣ: то да бꙋ́детъ сіѐ ѡ҆зна́чено въ ̾ѿпꙋсти́тельной гра́матѣ, посыла́емой къ цр҃кви ри́мской, и҆ ̾ѿтꙋ́да є҆щѐ да полꙋ́читъ ̾ѿпꙋсти́тельнꙋю гра́матꙋ къ пала́тѣ. Тогѡ̀ ра́ди, а҆́ще полꙋчи́вшій ̾ѿпꙋсти́тельнꙋю гра́матꙋ до ри́ма то́лькѡ, ѹ҆молча́въ ѡ҆ нꙋ́ждѣ, побꙋжда́ющей є҆го̀ и҆тѝ къ пала́тѣ, восхо́щетъ пря́мѡ ̾ѿитѝ къ пала́тѣ: да бꙋ́детъ ̾ѿлꙋче́нъ ̾ѿ ѻ҆бще́нія. А҆́ще же, та́мѡ въ ри́мѣ, ̾ѿкро́ется внеза́пная нꙋ́жда ̾ѿитѝ къ пала́тѣ: да ꙗ҆ви́тъ ѻ҆́нꙋю нꙋ́ждꙋ є҆пі́скопꙋ ри́мскомꙋ, и҆ да принесе́тъ писа́ніе тогѡ́ же ри́мскагѡ є҆пі́скопа. Въ ̾ѿпꙋсти́тельныя гра̑маты, ̾ѿ пе́рвенствꙋющихъ, и҆лѝ ̾ѿ каки́хъ бы то̀ ни с. сл҃а бы́ло є҆пі́скопѡвъ, дава́ємыя кли́рікамъ и҆́хъ, да вно́сится де́нь па́схи. А҆́ще же де́нь па́схи тогѡ̀ лѣ́та є҆щѐ не и҆звѣ́стенъ: то де́нь па́схи проше́дшагѡ го́да да бꙋ́детъ ѡ҆зна́ченъ, подо́бнѡ томꙋ̀, ка́къ въ свѣ́тскихъ за́писяхъ ѻ҆быкнове́ннѡ пи́шется: по́слѣ ко́нсꙋльства.

ПРА́ВИЛО р҃к.

Разсꙋждено̀ и҆ сіѐ: посыла́емые ̾ѿ сегѡ̀ честна́гѡ собо́ра мѣстоблюсти́тели да про́сятъ пресла́вныхъ царе́й ѡ҆ все́мъ, что̀ ѹ҆смо́трятъ поле́знымъ проти́вꙋ донаті́стѡвъ и҆ є҆́ллинѡвъ, и҆ проти́вꙋ сꙋевѣ́рій и҆́хъ.

ПРА́ВИЛО рк҃а.

На се́мъ собо́рѣ положено̀, да не настои́тъ є҆ди́нъ є҆пі́скопъ на рѣше́ніе своегѡ̀ сꙋда̀.

Дѣя̑нія сегѡ̀ собо́ра не напи́саны потомꙋ̀, что̀ разсмо́трены бы́ли дѣла̀ мѣ́стныя, а҆ не ѻ҆́бщыя.

{комм.}Карѳаге́нскій собо́ръ, кото́рагѡ пра̑вила здѣ́сь совокꙋ́плены, не є҆́сть є҆диновре́менный собо́ръ, но цѣ́пь є҆жего́дныхъ собо́рѡвъ а҆фріка́нскихъ є҆пі́скопѡвъ, де́ржанныхъ под̾ предсѣда́тельствомъ карѳаге́нскагѡ є҆пі́скопа. Въ се́мъ пра́вилѣ ѹ҆каза́ніе на се́й собо́ръ ̾ѿно́сится къ годово́мꙋ собо́рꙋ, бы́вшемꙋ въ седмо́е ко́нсꙋльство і҆мпера́тора ѡ҆но́ріа. По кра́ткости за́писи пра́вило сіѐ не дово́льнѡ ꙗ҆́сно. Валсамо́нъ полага́етъ, что̀ ѻ҆но̀ должно̀ бы́ть понима́емо согла́снѡ съ а҃і пра́виломъ сегѡ́ же карѳаге́нскагѡ собо́ра, то́ є҆сть, когда̀ пресвѵ́теръ ѡ҆сꙋжде́нный є҆пі́скопомъ жа́лꙋется на сіѐ ѡ҆сꙋжде́ніе: тогда̀ є҆пі́скопъ не до́лженъ ѻ҆ди́нъ настоя́ть на своѐ рѣше́ніе и҆ ѹ҆си́ливаться и҆спо́лнить ѻ҆́ное, а҆ до́лженъ предоста́вить дѣ́ло разсмотрѣ́нію по́лнагѡ собо́ра, и҆лѝ ѡ҆предѣле́ннагѡ въ пра́вилахъ числа̀ є҆пі́скопѡвъ.

ПРА́ВИЛО рк҃в.

Въ сіѐ вре́мя[13] и҆́зданъ зако́нъ, да по свобо́дномꙋ произволе́нію, ка́ждый воспріе́млетъ по́двигъ хрістіа́нства.

ПРА́ВИЛО рк҃г.

Собо́ръ проти́вꙋ є҆́реси пела́гіа и҆ келесті́а.

с. сл҃в При́знано всѣ́ми є҆пі́скопами карѳаге́нскія цр҃кви, предста́вшими на святы́й собо́ръ, кото́рыхъ и҆мена̀ и҆ подписа́нія внесены̀ въ дѣя̑нія, ꙗ҆́кѡ а҆да́мъ не сме́ртнымъ ̾ѿ бг҃а сотворе́нъ. А҆́ще же кто̀ рече́тъ, ꙗ҆́кѡ а҆да́мъ, первозда́нный человѣ́къ, сотворе́нъ сме́ртнымъ, та́къ что̀, хотя́ бы согрѣши́лъ, хотя́ бы не согрѣши́лъ, ѹ҆́меръ бы тѣ́ломъ, то́ є҆сть вы́шелъ бы и҆з̾ тѣ́ла, не въ наказа́ніе за грѣ́хъ, но по неѡбходи́мости є҆стества̀: да бꙋ́детъ а҆на́ѳема.

ПРА́ВИЛО рк҃д.

Ѡ҆предѣлено̀ та́кожде: кто̀ ̾ѿверга́етъ нꙋ́ждꙋ креще́нія ма́лыхъ и҆ новорожде́нныхъ ̾ѿ ма́терней ѹ҆тро́бы дѣте́й, и҆лѝ говори́тъ, что̀ хотя̀ ѻ҆нѝ и҆ креща́ются во ̾ѿпꙋще́ніе грѣхѡ́въ, но ̾ѿ прароди́тельскагѡ а҆да́мова грѣха̀ не заи́мствꙋютъ ничегѡ̀, что̀ надлежа́ло бы ѡ҆мы́ти ба́нею пакибытія̀ [и҆з̾ чегѡ̀ слѣ́довало бы, что̀ ѻ҆́бразъ креще́нія во ̾ѿпꙋще́ніе грѣхѡ́въ ѹ҆потребля́ется над̾ ни́ми не въ и҆́стинномъ, но въ ло́жномъ значе́ніи], то́тъ да бꙋ́детъ а҆на́ѳема. И҆́бо рече́нное а҆п҃ⷭ҇ломъ: є҆ди́нѣмъ человѣ́комъ грѣ́хъ въ мі́ръ вни́де, и҆ грѣхо́мъ сме́рть: и҆ та́кѡ [сме́рть] во вся̀ человѣ́ки вни́де, въ не́мъ же всѝ согрѣши́шаРим. є҃, в҃і., подоба́етъ разꙋмѣ́ти не и҆на́кѡ, ра́звѣ ка́къ всегда̀ разꙋмѣ́ла каѳолі́ческая цр҃ковь, повсю́дꙋ разлія́нная и҆ распростране́нная. И҆́бо по семꙋ̀ пра́вилꙋ вѣ́ры и҆ младе́нцы, никаки́хъ грѣхѡ́въ са́ми собо́ю содѣва́ти є҆щѐ не могꙋ́щіе, креща́ются и҆́стиннѡ во ̾ѿпꙋще́ніе грѣхѡ́въ, да чрез̾ пакирожде́ніе ѡ҆чи́стится въ ни́хъ то̀, что̀ ѻ҆нѝ за́няли ̾ѿ ве́тхагѡ рожде́нія.

ПРА́ВИЛО рк҃є.

Ѡ҆предѣлено̀ та́кожде: а҆́ще кто̀ рече́тъ, ꙗ҆́кѡ блас. сл҃ггода́ть бж҃ія, кото́рою ѡ҆пра́вдываются въ і҆и҃сѣ хр҃ⷭ҇тѣ̀ гд҃ⷭ҇ѣ на́шемъ, дѣйстви́тельна къ є҆ди́номꙋ то́кмѡ ̾ѿпꙋще́нію грѣхѡ́въ ѹ҆жѐ содѣ́янныхъ, а҆ не подае́тъ све́рхъ тогѡ̀ по́мощи, да не содѣва́ются и҆ны́е грѣхѝ, таковы́й да бꙋ́детъ а҆на́ѳема. Ꙗ҆́кѡ бл҃года́ть бж҃ія не то́кмѡ подае́тъ зна́ніе, что̀ подоба́етъ твори́ти, но є҆щѐ вдыха́етъ въ на́съ любо́вь, да возмо́жемъ и҆ и҆спо́лнити, что̀ позна́емъ.

ПРА́ВИЛО рк҃ѕ.

Та́кожде, а҆́ще кто̀ рече́тъ, ꙗ҆́кѡ та́ же благода́ть бж҃ія, ꙗ҆́же ѡ҆ і҆и҃сѣ хр҃ⷭ҇тѣ̀ гд҃ⷭ҇ѣ на́шемъ, вспомоществꙋ́етъ на́мъ, къ томꙋ̀ то́кмѡ, что́бы не согрѣша́ти, поели́кꙋ є҆́ю ̾ѿкрыва́ется и҆ ꙗ҆вля́ется на́мъ позна́ніе грѣхѡ́въ, да зна́емъ, чегѡ̀ до́лжно и҆ска́ти, и҆ ̾ѿ чегѡ̀ ѹ҆клоня́тися, но что̀ є҆́ю не подае́тся на́мъ любо́вь и҆ си́ла къ дѣ́ланію тогѡ̀, что̀ мы̀ позна́ли до́лжнымъ твори́ти: таковы́й да бꙋ́детъ а҆на́ѳема. И҆́бо когда̀ а҆п҃ⷭ҇толъ глаго́летъ: ра́зꙋмъ кичи́тъ, а҆ любы̀ созида́етъ[15]: то весьма̀ нечести́во бы́ло бы вѣ́рити, ꙗ҆́кѡ къ киче́нію на́шемꙋ и҆мѣ́емъ благода́ть бж҃ію, а҆ къ созида́нію не и҆мѣ́емъ: тогда̀ ка́къ и҆ то̀ и҆ дрꙋго́е є҆́сть да́ръ бж҃ій, и҆ зна́ніе, что̀ подоба́етъ твори́ти, и҆ любо́вь къ добрꙋ̀, кото́рое подоба́етъ твори́ти, дабы̀ при созида́ющей любвѝ не мо́гъ кичи́ти ра́зꙋмъ. И҆́бо ка́къ ̾ѿ бг҃а напи́сано: ѹ҆ча́й человѣ́ка ра́зꙋмꙋ[16]: та́кожде напи́сано и҆ сіѐ: любы̀ ̾ѿ бг҃а є҆́сть[17].

ПРА́ВИЛО рк҃з.

Ѡ҆предѣлено̀ та́кожде: а҆́ще кто̀ рече́тъ, ꙗ҆́кѡ благода́ть ѡ҆правда́нія на́мъ дана̀ ра́ди тогѡ̀, дабы̀ возмо́жное къ и҆сполне́нію по свобо́дномꙋ произволе́нію, ѹ҆до́бнѣе и҆сполня́ли с. сл҃д мы̀ чрез̾ благода́ть, та́къ ка́къ бы и҆ не прія́въ благода́ти бж҃іей, мы̀ хотя̀ съ неꙋдо́бствомъ, ѻ҆дна́кѡ моглѝ и҆ без̾ нея̀ и҆спо́лнити бж҃е́ствєнныя за́пѡвѣди: таковы́й да бꙋ́детъ а҆на́ѳема. И҆́бо ѡ҆ плода́хъ за́повѣдей не ре́къ гд҃ⷭ҇ь: без̾ менѐ неꙋдо́бнѡ мо́жете твори́ти, но ре́къ: без̾ менѐ не мо́жете твори́ти ничесѡ́же[18].

ПРА́ВИЛО рк҃и.

Та́кожде ѡ҆предѣлено̀ ̾ѿноси́тельнѡ и҆зрече́нія свята́гѡ і҆ѡа́нна а҆п҃ⷭ҇тола: а҆́ще рече́мъ, ꙗ҆́кѡ грѣха̀ не и҆́мамы, себѐ прельща́емъ, и҆ и҆́стины нѣ́сть въ на́съ[19]. Кто̀ до́лжнымъ возмни́тъ разꙋмѣ́ти сіѐ та́кѡ, ꙗ҆́кѡ рече́тъ: смиренномꙋ́дрія ра́ди не подоба́етъ глаго́лати, ꙗ҆́кѡ грѣха̀ не и҆́мамы, а҆ не ра́ди тогѡ̀, ꙗ҆́кѡ и҆́стиннѡ та́кѡ є҆́сть: то́тъ да бꙋ́детъ а҆на́ѳема. И҆́бо а҆п҃ⷭ҇толъ продолжа́етъ и҆ прилага́етъ слѣ́дꙋющее: а҆́ще же и҆сповѣ́даемъ грѣхѝ на́шя, вѣ́ренъ є҆́сть и҆ пра́веденъ, да ѡ҆ста́витъ на́мъ грѣхѝ на́шя, и҆ ѡ҆чи́ститъ на́съ ̾ѿ вся́кія непра́вды[20]. Здѣ́сь весьма̀ ꙗ҆́снѡ пока́зано, что̀ сіѐ говори́тся не по смиренномꙋ́дрію то́кмѡ, но по и҆́стинѣ. И҆́бо а҆п҃ⷭ҇толъ мо́гъ бы рещѝ: а҆́ще рече́мъ, не и҆́мамы грѣха̀, себѐ возно́симъ, и҆ смире́нія нѣ́сть въ на́съ, но когда̀ ре́къ: себѐ прельща́емъ, и҆ и҆́стины нѣ́сть въ на́съ: тогда̀ ꙗ҆́снѡ показа́лъ, что̀ глаго́лющій ѡ҆ себѣ̀, ꙗ҆́кѡ не и҆мѣ́етъ грѣха̀, не и҆́стинствꙋетъ, но лже́тъ.

ПРА́ВИЛО рк҃ѳ.

Ѡ҆предѣлено̀ и҆ сіѐ: а҆́ще кто̀ рече́тъ, ꙗ҆́кѡ святы́е, въ моли́твѣ гд҃ⷭ҇ней, ѡ҆ста́ви на́мъ до́лги на́шя[21], не ѡ҆ себѣ̀ глаго́лютъ, поели́кꙋ и҆̀мъ ѹ҆жѐ не нꙋ́жно сіѐ проше́ніе, но ѡ҆ дрꙋги́хъ грѣ́шс. сл҃єныхъ, находя́щихся въ наро́дѣ и҆́хъ, и҆ ꙗ҆́кѡ не глаго́летъ ка́ждый и҆з̾ святы́хъ ѻ҆со́бѡ, ѡ҆ста́ви мнѣ̀ до́лги моя̀, но ѡ҆ста́ви на́мъ до́лги на́шя, та́къ что́бы сіѐ проше́ніе пра́ведника разꙋмѣ́лось ѡ҆ дрꙋги́хъ па́че, не́жели ѡ҆ не́мъ само́мъ: таковы́й да бꙋ́детъ а҆на́ѳема. Свя́тъ и҆ пра́веденъ бы́лъ і҆а́кѡвъ а҆п҃ⷭ҇толъ, когда̀ ре́къ: мно́гѡ бо согрѣша́емъ всѝ[22]. И҆́бо для чегѡ̀ прило́жено сіѐ сло́во: всѝ, а҆́ще не ра́ди тогѡ̀, что́бы мы́сль сія̀ согла́сна была̀ со ѱалмо́мъ, въ кото́ромъ чита́ется: не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тся пред̾ тобо́ю вся́къ живы́й[23]. И҆ въ моли́твѣ премꙋ́драгѡ соломѡ́на: нѣ́сть человѣ́къ, и҆́же не согрѣшѝ[24]: и҆ въ кни́гѣ свята́гѡ і҆́ѡва: въ рꙋцѣ̀ вся́кагѡ человѣ́ка зна́менаетъ, да позна́етъ вся́къ человѣ́къ не́мощь свою̀[25]. Посемꙋ̀ та́кожде и҆ святы́й и҆ пра́ведный даніи́лъ прⷪ҇ро́къ, въ моли́твѣ, мно́жественнѡ глаго́лалъ: согрѣши́хомъ, беззако́нновахомъДан. ѳ҃, ст. є҃., и҆ про́чее, что̀ ѻ҆́нъ та́мѡ смиренномꙋ́дреннѡ и҆ и҆́стиннѡ и҆сповѣ́дꙋетъ. Дабы̀ не подꙋ́мали, ка́къ нѣ́которые разꙋмѣ́ютъ, ꙗ҆́кѡ ѻ҆́нъ глаго́летъ не ѡ҆ свои́хъ, но па́че ѡ҆ грѣха́хъ люде́й свои́хъ: то ѻ҆́нъ по се́мъ ре́къ, ꙗ҆́кѡ моли́хся и҆ и҆сповѣ́дахъ грѣхѝ моя̀, и҆ грѣхѝ люде́й мои́хъ гд҃ⷭ҇ꙋ бг҃ꙋ моемꙋ̀Дан. ѳ҃, ст. к҃.. Не хотѣ́лъ рещѝ, грѣхѝ на́шя, но ре́къ: грѣхѝ люде́й свои́хъ, и҆ грѣхѝ своѝ: поели́кꙋ прⷪ҇ро́къ ка́къ бы прови́дѣлъ, что̀ ꙗ҆́вятся таковы́е лю́ди, хꙋ́дѡ разꙋмѣ́ющіе сіѐ.

ПРА́ВИЛО р҃л.

Ѡ҆предѣлено̀ и҆ сіѐ: а҆́ще кто̀ полага́етъ, ꙗ҆́кѡ са́мыя слова̀ моли́твы гд҃ⷭ҇ней, въ ко́ихъ говори́мъ: ѡ҆ста́ви с. сл҃ѕ на́мъ до́лги на́шя, святы́ми произно́сятся по смире́нію, а҆ не по и҆́стинѣ: да бꙋ́детъ а҆на́ѳема. И҆́бо кто̀ потерпѣ́лъ бы моля́щагося, кото́рый бы лга́лъ не человѣ́камъ, но самомꙋ̀ гд҃ⷭ҇ꙋ; ѹ҆ста́ми свои́ми говори́лъ, ꙗ҆́кѡ хо́щетъ и҆мѣ́ти ̾ѿпꙋще́ніе, се́рдцемъ же глаго́лалъ, ꙗ҆́кѡ не и҆мѣ́етъ грѣхѡ́въ, кото́рые надлежа́ло бы ̾ѿпꙋсти́ти є҆мꙋ̀.

ПРА́ВИЛО рл҃а.

За нѣ́сколькѡ лѣ́тъ пред̾ си́мъ, въ се́й цр҃кви, по́лнымъ собо́ромъ ѡ҆предѣлено̀, что́бы цр҃кви, состоя́щыя въ како́мъ либо предѣ́лѣ, пре́жде и҆зда́нія зако́нѡвъ ѡ҆ донаті́стахъ содѣ́лавшыяся каѳолі́ческими, принадлежа́ли къ тѣ́мъ престо́ламъ, ко́ихъ є҆пі́скопами ѹ҆бѣждены̀ бы́ли пріѡбщи́тися къ каѳолі́ческомꙋ є҆дине́нію: а҆ по́слѣ и҆зда́нія зако́нѡвъ присоедини́вшыяся принадлежа́ли къ тѣ́мъ же престо́ламъ, къ кото́рымъ принадлежа́ли бꙋ́дꙋчи на странѣ̀ дона́та. Но поели́кꙋ по́слѣ возни́кли и҆ возника́ютъ междꙋ̀ є҆пі́скопами мнѡ́гія ра̑спри ѡ҆ предѣ́лахъ, ѡ҆ ко́ихъ пре́жнее ѹ҆смотре́ніе мни́тся бы́ти несоверше́ннымъ: то ны́нѣ на се́мъ свято́мъ собо́рѣ постано́влено: а҆́ще гдѣ́ либо была̀ цр҃ковь каѳолі́ческая, и҆ принадлежа́вшая сторонѣ̀ дона́товой, и҆ ѻ҆нѣ̀ ̾ѿноси́лись къ ра́знымъ престо́ламъ: то въ како́е бы вре́мя ни послѣ́довало, и҆лѝ послѣ́дꙋетъ та́мѡ соедине́ніе, пре́жде ли зако́нѡвъ и҆лѝ по́слѣ зако́нѡвъ, да принадлежа́тъ томꙋ̀ престо́лꙋ, кото́ромꙋ принадлежа́ла и҆здре́вле та́мѡ бы́вшая каѳолі́ческая цр҃ковь.

ПРА́ВИЛО рл҃в.

Ѡ҆ то́мъ, ка́кѡ є҆пі́скопы каѳолі́ческіе, и҆ ѡ҆брати́вшіеся ̾ѿ страны̀ дона́товой, раздѣля́тъ междꙋ̀ собо́ю є҆па̑рхіи.

Раздѣля́ти та́кѡ: а҆́ще є҆пі́скопы ̾ѿ донаті́стѡвъ с. сл҃з ѡ҆братя́тся къ каѳолі́ческомꙋ є҆дине́нію, то пора́внꙋ да раздѣ́лятъ междꙋ̀ собо́ю предѣ́лы, находя́щіеся въ се́мъ положе́ніи, и҆мѣ́вшіе въ себѣ̀ наро́дъ тоя̀ и҆ дрꙋгі́я страны̀: то́ є҆сть, и҆ны́я мѣста̀ да предоста́вятся семꙋ̀, а҆ дрꙋгі́я дрꙋго́мꙋ є҆пі́скопꙋ, та́къ, что́бы ста́ршій въ є҆пі́скопствѣ раздѣля́лъ, а҆ мла́дшій и҆збира́лъ. А҆́ще же слꙋчи́тся бы́ти є҆ди́номꙋ мѣ́стꙋ: то да предоста́вится томꙋ̀, къ кото́ромꙋ въ бо́льшей бли́зости ѡ҆ка́жется. А҆́ще же бꙋ́детъ равнѡ̀ бли́зкѡ къ ѻ҆бои́мъ престо́ламъ: то да постꙋ́питъ къ томꙋ̀, кото́раго наро́дъ и҆збере́тъ. А҆́ще слꙋчи́тся, что̀ хрістіа́не, и҆здре́вле каѳолі́ческіе, востре́бꙋютъ своего̀ є҆пі́скопа, а҆ ѡ҆брати́вшіеся ̾ѿ страны̀ дона́та, своего̀: то и҆збра́ніе бо́льшимъ число́мъ, да бꙋ́детъ предпочтено̀ и҆збра́нію ме́ньшимъ число́мъ наро́да. А҆́ще ѻ҆́бѣ страны̀ бꙋ́дꙋтъ ра́вны число́мъ и҆збира́ющихъ: то мѣ́сто да бꙋ́детъ причи́слено къ предѣ́лꙋ ста́ршагѡ є҆пі́скопа. А҆́ще ѡ҆бря́щꙋтся мно́гія мѣста̀, и҆мѣ́ющыя наро́дъ ѻ҆бѣ́ихъ стра́нъ, но не мо́гꙋтъ раздѣлены̀ бы́ти пора́внꙋ, поели́кꙋ число̀ тѣ́хъ мѣ́стъ не ра́вно є҆́сть: то во пе́рвыхъ ра́вныя число́мъ да раздѣ́лятся, пото́мъ же съ ѡ҆ста́вшимся мѣ́стомъ да бꙋ́детъ постꙋ́плено, ка́къ рече́но вы́ше, при разсꙋжде́ніи ѡ҆ є҆ди́номъ мѣ́стѣ.

ПРА́ВИЛО рл҃г.

Постано́влено и҆ сіѐ: а҆́ще кто̀, по́слѣ и҆зда́нія зако́нѡвъ, ѡ҆брати́лъ како́е мѣ́сто къ каѳолі́ческомꙋ є҆дине́нію, и҆ въ продолже́ніи тре́хъ лѣ́тъ и҆мѣ́лъ ѻ҆́ное въ свое́мъ вѣ́дѣніи, и҆ никто̀ ѻ҆́нагѡ не тре́бовалъ ̾ѿ негѡ̀: то по́слѣ да не бꙋ́детъ ѻ҆́ное ̾ѿ негѡ̀ взыскꙋ́емо, є҆́стьли прито́мъ въ сіѐ трехлѣ́тіе сꙋществова́лъ є҆пі́скопъ, долженствꙋ́ющій взыска́ти, и҆ молча́лъ. А҆́ще же не бы́ло є҆пі́скопа: с. сл҃и то да не поста́вится въ препя́тствіе и҆ска́нію внесе́ніе сегѡ̀ мѣ́ста въ спи́сокъ прихо́дѡвъ: но когда̀ вдо́вствовавшая каѳе́дра полꙋ́читъ є҆пі́скопа, да бꙋ́детъ є҆мꙋ̀ позво́лено взыска́ніе тогѡ̀ мѣ́ста въ продолже́ніи трехлѣ́тія. Подо́бнымъ ѻ҆́бразомъ, а҆́ще є҆пі́скопъ ̾ѿ страны̀ донаті́стѡвъ, ѡ҆брати́тся къ каѳолі́ческой цр҃кви, спи́сокъ прихо́дѡвъ да не бꙋ́детъ є҆мꙋ̀ въ предосꙋжде́ніе до ѡ҆предѣле́ннагѡ сро́ка: но съ тогѡ̀ дня̀, ка́къ ѡ҆брати́лся, и҆мѣ́етъ пра́во, въ продолже́ніе трехлѣ́тія, и҆ска́ти мѣ́стъ є҆гѡ̀ престо́лꙋ слѣ́дꙋющихъ.

ПРА́ВИЛО рл҃д.

Постано́влено и҆ сіѐ: а҆́ще кото́рые є҆пі́скопы, не посре́дствомъ сꙋда̀ дрꙋги́хъ є҆пі́скопѡвъ, взыскꙋ́ютъ ѻ҆́бщєства, котѡ́рыя почита́ютъ принадлежа́щими своемꙋ̀ престо́лꙋ, но простира́ютъ вла́сть на люде́й, подчине́нныхъ дрꙋго́мꙋ є҆пі́скопꙋ, хотя́щихъ и҆лѝ не хотя́щихъ: таковы́е да нака́жꙋтся поте́рею своегѡ̀ дѣ́ла. То́ є҆сть, а҆́ще кото́рые ѹ҆чини́ли сіѐ, и҆ а҆́ще междꙋ̀ є҆пі́скопами дѣ́ло не ко́нчилось соглаше́ніемъ, но є҆щѐ и҆мѣ́ютъ ѡ҆ не́мъ спо́ръ: то да лиши́тся спо́рнагѡ мѣ́ста то́тъ, ѡ҆ ко́мъ дока́зано бꙋ́детъ, ꙗ҆́кѡ ѡ҆ста́вивъ цр҃ко́вныхъ сꙋде́й, ѹ҆чини́лъ наше́ствіе. И҆ да не льсти́тъ себѣ̀ кто́ либо тѣ́мъ, ꙗ҆́кѡ ̾ѿ пе́рвенствꙋющагѡ є҆пі́скопа и҆мѣ́етъ гра́матꙋ ѡ҆ приня́тіи тогѡ̀ мѣ́ста въ своѐ вѣ́дѣніе: но хотя̀ и҆мѣ́етъ гра́матꙋ, хотя̀ не и҆мѣ́етъ, да ѹ҆чини́тъ сноше́ніе съ и҆мѣ́ющимъ ѻ҆́ное мѣ́сто въ свое́мъ вѣ́дѣніи, и҆ ̾ѿ негѡ̀ да полꙋ́читъ гра́матꙋ, дабы̀ ꙗ҆́вно бы́ло, что̀ ми́рнѡ ѹ҆де́рживаетъ за собо́ю цр҃ковь є҆мꙋ̀ слѣ́дꙋющꙋю. А҆́ще же и҆ то́тъ ꙗ҆ви́тъ нѣ́кое притяза́ніе: то и҆ сіѐ да бꙋ́детъ разрѣшено̀ є҆пі́скопами сꙋ́дящими, кото́рыхъ и҆лѝ пе́рвенствꙋющій и҆̀мъ с. сл҃ѳ назна́читъ, и҆лѝ са́ми по согла́сію и҆зберꙋ́тъ и҆з̾ сосѣ́днихъ є҆пі́скопѡвъ.

ПРА́ВИЛО рл҃є.

Постано́влено и҆ сіѐ: а҆́ще нѣ́которые небрегꙋ́тъ ѡ҆ пріѡбрѣ́теніи каѳолі́ческомꙋ є҆дине́нію мѣ́стъ принадлежа́щихъ къ престо́лꙋ и҆́хъ: да ѡ҆блича́ются ̾ѿ сосѣ́днихъ тща́тельныхъ є҆пі́скопѡвъ, дабы̀ не ̾ѿлага́ли сегѡ̀ дѣ́ла. Тогѡ̀ ра́ди, а҆́ще въ продолже́ніи шестимѣ́сячнагѡ сро́ка, ̾ѿ дня̀ совѣща́нія ѡ҆ се́мъ, ничегѡ̀ не сдѣ́лаютъ: то по́слѣ сегѡ̀ мѣ́ста тѣ̀ да предоста́вятся могꙋ́щемꙋ пріѡбрѣстѝ ѻ҆́ныя. Впро́чемъ, а҆́ще то́тъ, кото́ромꙋ ѻ҆́ныя мѣста̀ показꙋ́ются принадлежа́щими, за поле́зное признава́лъ не дѣ́йствовати, по нѣ́коемꙋ смотрѣ́нію, потомꙋ̀, что̀ сіѐ предпочлѝ є҆ретікѝ, дабы̀ ѻ҆́нъ мо́гъ прія́ти и҆̀хъ въ каѳолі́ческꙋю цр҃ковь без̾ смяте́нія наро́днагѡ, а҆ междꙋ̀ тѣ́мъ дрꙋги́мъ предꙋпреждено̀ є҆гѡ̀ дѣ́йствованіе, ѹ҆потребле́ніемъ кото́рагѡ ра́нѣе, ѻ҆́нъ бо́лѣе ѡ҆ѕло́билъ бы є҆ретікѡ́въ: то, по разсмотрѣ́ніи сегѡ̀ сꙋ́дящими є҆пі́скопами, мѣста̀ тѣ̀ да бꙋ́дꙋтъ возвращены̀ престо́лꙋ є҆гѡ̀. Когда̀ сꙋ́дящымъ є҆пі́скопамъ надлежи́тъ бы́ти и҆з̾ ра́зныхъ ѻ҆́бластей: тогда̀ сꙋде́й назна́читъ то́тъ пе́рвенствꙋющій є҆пі́скопъ, въ ѻ҆́бласти кото́рагѡ нахо́дится мѣ́сто подлежа́щее спо́рꙋ. А҆́ще же по ѻ҆́бщемꙋ согла́сію и҆збира́ти бꙋ́дꙋтъ сꙋде́й и҆з̾ сосѣ́днихъ є҆пі́скопѡвъ: то и҆лѝ є҆ди́нъ да бꙋ́детъ и҆́збранъ, и҆лѝ трѝ. И҆ а҆́ще трѝ бꙋ́дꙋтъ и҆́збраны и҆ при́знаны: то, да покоря́тся рѣше́нію и҆лѝ всѣ́хъ, и҆лѝ двои́хъ.

ПРА́ВИЛО рл҃ѕ.

Ѿ сꙋде́й же, по ѻ҆́бщемꙋ согла́сію и҆́збранныхъ, да не бꙋ́детъ позво́лено преноси́ти дѣ́ло въ вы́сшій сꙋ́дъ. А҆ ѡ҆ ко́мъ до́знано бꙋ́детъ, ꙗ҆́кѡ по ѹ҆по́рствꙋ не хо́щетъ повинова́тися с. с҃м сꙋдія́мъ: ѡ҆ то́мъ ѹ҆вѣ́давъ є҆пі́скопъ пе́рвагѡ престо́ла, дае́тъ гра́матꙋ, да никто̀ и҆з̾ є҆пі́скопѡвъ не пріе́млетъ є҆гѡ̀ въ ѡ҆бще́ніе, доко́лѣ не покори́тся.

ПРА́ВИЛО рл҃з.

А҆́ще є҆пі́скопъ нерадѣ́ти бꙋ́детъ ѡ҆ возвраще́ніи ̾ѿ є҆ретікѡ́въ принадлежа́щагѡ цр҃кви по спи́скамъ, и҆лѝ са́мыхъ каѳе́дръ: то да ѹ҆вѣща́ютъ є҆го̀ сосѣ́дніе тща́тельные є҆пі́скопы, и҆ да пока́жꙋтъ є҆мꙋ̀ є҆гѡ̀ небреже́ніе, дабы̀ не и҆мѣ́ти є҆мꙋ̀ и҆звине́нія. А҆́ще же въ тече́ніи шестѝ мѣ́сяцѡвъ, ̾ѿ дня̀ ѹ҆вѣща́нія, пребыва́я въ то́й же є҆па́рхіи не воз̾имѣ́етъ попече́нія ѡ҆ долженствꙋ́ющихъ возврати́тися къ каѳолі́ческомꙋ є҆дине́нію: съ таковы́мъ да не соѡбща́ются, доко́лѣ не и҆спо́лнитъ тогѡ̀. А҆́ще же не пріи́детъ въ ѻ҆́ныя мѣста̀ содѣ́йствователь[28]: то є҆пі́скопꙋ да не поста́вится въ винꙋ̀ недѣ́йствованіе.

ПРА́ВИЛО рл҃и.

А҆́ще же дока́зано бꙋ́детъ, ꙗ҆́кѡ таковы́й ло́жнѡ показа́лъ ѡ҆ ѡ҆бще́ніи ѻ҆́ныхъ, то́ є҆сть донаті́стѡвъ, говоря̀, что̀ ѻ҆нѝ пристꙋпи́ли къ ѡ҆бще́нію, тогда̀ ка́къ до́знано, что̀ ѻ҆нѝ не пристꙋпа́ли, и҆ ѻ҆́нъ зна́лъ ѡ҆ се́мъ: таковы́й да лиши́тся и҆ є҆пі́скопства.

ПРА́ВИЛО рл҃ѳ.

Постано́влено и҆ сіѐ: а҆́ще пресвѵ́теры, діа́коны, и҆ про́чіе ни́зшіе и҆з̾ кли́ра, по и҆мѣ́ющымся ѹ҆ ни́хъ дѣла́мъ, не дово́льны рѣше́ніемъ свои́хъ є҆пі́скопѡвъ: то сосѣ́дніе є҆пі́скопы да слꙋ́шаютъ и҆́хъ, и҆ прекослѡ́вія и҆́хъ да разрѣша́ютъ и҆́збранные и҆́ми, по согла́сію со́бственныхъ и҆́хъ є҆пі́скопѡвъ. А҆́ще же и҆ ̾ѿ ни́хъ восхотя́тъ пренестѝ дѣ́ло въ вы́сшій сꙋ́дъ: то да прено́сятъ то́кмѡ въ а҆фріка́нскіе собо́ры, и҆лѝ къ пе́рвенствꙋющымъ с. см҃а є҆пі́скопамъ свои́хъ ѻ҆́бластей. А҆ жела́ющій пренестѝ дѣ́ло за мо́ре[29], никѣ́мъ въ а҆́фрікѣ да не пріе́млется въ ѡ҆бще́ніе.

ПРА́ВИЛО р҃м.

Постано́влено и҆ сіѐ: а҆́ще кто̀ и҆з̾ є҆пі́скопѡвъ по нꙋ́ждѣ, въ ѻ҆па́сности ѹ҆грожа́ющей цѣломꙋ́дрію дѣ́вы, когда̀ є҆́сть подозрѣ́ніе и҆лѝ ѡ҆ люби́телѣ си́льномъ, и҆лѝ ѡ҆ како́мъ либо похити́телѣ, и҆лѝ когда̀ ѻ҆на̀ ѡ҆щꙋща́етъ себя̀ въ сокрꙋше́ніи ̾ѿ нѣ́кія ѻ҆па́сности смертоно́сныя, по проше́нію роди́телей є҆я̀, и҆лѝ и҆мѣ́ющихъ попече́ніе ѡ҆ не́й, покро́етъ и҆лѝ покры́лъ є҆ѐ ѡ҆дѣя́ніемъ посвяще́нныхъ бг҃ꙋ, пре́жде два́десяти пятѝ лѣ́тъ во́зраста, дабы̀ не ѹ҆мерла̀ без̾ и҆́ноческагѡ ѻ҆́браза: такова́го ничемꙋ̀ да не подве́ргнетъ собо́рное постановле́ніе, кото́рымъ ѡ҆предѣля́ется сіѐ число̀ лѣ́тъ для покрове́нія.

ПРА́ВИЛО рм҃а.

Ѹ҆го́дно всемꙋ̀ собо́рꙋ, ра́ди тогѡ̀, что́бы не бы́ли до́лгѡ ѹ҆де́рживаемы всѣ̀ є҆пі́скопы сше́дшіеся на собо́ръ, и҆збра́ти по трѝ сꙋдіѝ ̾ѿ ка́ждыя ѻ҆́бласти.

ПРА́ВИЛО рм҃в.

По ѡ҆конча́ніи нѣ́которыхъ дѣ́лъ, когда̀ на продолже́ніе засѣда́ній, для ѡ҆конча́нія про́чихъ дѣ́лъ, мно́гіе є҆пі́скопы сѣ́товали, и҆ не моглѝ сегѡ̀ понестѝ, поспѣша́я къ свои́мъ цр҃квамъ, ѹ҆го́дно бы́ло всемꙋ̀ собо́рꙋ, да и҆зберꙋ́тся и҆з̾ числа̀ всѣ́хъ, ̾ѿ ка́ждыя ѻ҆́бласти, долженствꙋ́ющіе пребы́ти, ра́ди ѡ҆конча́нія про́чихъ дѣ́лъ: и҆ сіѐ и҆спо́лнено.

ПРА́ВИЛО рм҃г.

Положено̀ всѣ́ми: поели́кꙋ въ пре́жнихъ постановле́ніяхъ собо́рѡвъ є҆́сть ѡ҆предѣлє́нія ѡ҆ ли́цахъ, ̾ѿ кото́рыхъ не до́лжно пріима́ти доно́сѡвъ, на состоя́с. см҃вщихъ въ кли́рѣ. но не ѡ҆зна́чено съ то́чностію ̾ѿ каки́хъ ли́цъ не до́лжно пріима́ти ѻ҆́ныхъ: тогѡ̀ ра́ди ѡ҆предѣля́емъ, ꙗ҆́кѡ пра́веднѡ не пріе́млется доно́съ ̾ѿ тогѡ̀, кто̀ бы́въ ̾ѿлꙋче́нъ ̾ѿ ѡ҆бще́нія, є҆щѐ ѡ҆стае́тся въ се́мъ ̾ѿлꙋче́ніи, кли́рікъ ли є҆́сть, и҆лѝ міряни́нъ, хотя́щій доноси́ти.

ПРА́ВИЛО рм҃д.

Положено̀ и҆ сіѐ: не пріима́ти доно́сѡвъ ̾ѿ всѣ́хъ рабѡ́въ, ̾ѿ ̾ѿпꙋ́щенникѡвъ тѣ́хъ са́мыхъ, на кото́рыхъ доноси́ти хотя́тъ, и҆ ̾ѿ всѣ́хъ, кото́рыхъ гражда́нскіе зако́ны не допꙋска́ютъ къ доно́самъ ѡ҆ престꙋпле́ніяхъ: та́кожде ̾ѿ всѣ́хъ, на ко́ихъ лежи́тъ пятно̀ безче́стія, то́ є҆сть, ̾ѿ позо́рищныхъ и҆ ̾ѿ ли́цъ, къ сра́мнымъ дѣла́мъ прикоснове́нныхъ: та́кожде ̾ѿ є҆ретікѡ́въ, и҆лѝ є҆́ллинѡвъ, и҆лѝ і҆ꙋде́євъ: впро́чемъ ѹ҆ всѣ́хъ, ̾ѿ кото́рыхъ не допꙋска́ется таково́е ѡ҆бвине́ніе, да не ̾ѿе́млется свобо́да приноси́ти жа́лѡбы по свои́мъ дѣла́мъ.

ПРА́ВИЛО рм҃є.

Постано́влено и҆ сіѐ: когда̀ на состоя́щихъ въ кли́рѣ, доноси́тели представля́ютъ мнѡ́гія ѡ҆бвинє́нія, и҆ ѻ҆дно̀ и҆з̾ ни́хъ, ѡ҆ кото́ромъ во пе́рвыхъ происходи́ло и҆зслѣ́дованіе, не могло̀ бы́ти дока́зано: по́слѣ сегѡ̀, про́чыя ѡ҆бвинє́нія да не пріе́млются.

ПРА́ВИЛО рм҃ѕ.

Свидѣ́телей же къ свидѣ́тельствꙋ не пріима́ти тѣ́хъ, ̾ѿ кото́рыхъ положено̀ не пріима́ти доно́сѡвъ: та́кожде и҆ тѣ́хъ, кото́рыхъ са́мъ доноси́тель предста́витъ и҆з̾ своегѡ̀ до́ма. Свидѣ́тельство и҆мѣ́ющагѡ ме́нѣе четырена́десяти лѣ́тъ во́зраста да не пріе́млется.

ПРА́ВИЛО рм҃з.

Постано́влено и҆ сіѐ: а҆́ще є҆пі́скопъ глаго́летъ, ꙗ҆́кѡ нѣ́кто є҆мꙋ̀ ѻ҆дномꙋ̀ и҆сповѣ́далъ своѐ престꙋпле́ніе, с. см҃г а҆ то́тъ не признае́тся: то є҆пі́скопъ да не ѡ҆браща́етъ себѣ̀ въ ѻ҆би́дꙋ тогѡ̀, что̀ не полага́ются въ се́мъ на него̀ є҆ди́наго. А҆́ще же рече́тъ, ꙗ҆́кѡ по возмꙋще́ніи со́вѣсти своея̀, не хо́щетъ и҆мѣ́ти ѻ҆бще́нія съ непризнаю́щимся: то, доко́лѣ ̾ѿлꙋче́ннагѡ по семꙋ̀ слꙋ́чаю не пріе́млетъ въ ѻ҆бще́ніе сво́й є҆пі́скопъ, дото́лѣ сегѡ̀ є҆пі́скопа да не пріе́млютъ въ ѻ҆бще́ніе про́чіе є҆пі́скопы: да тѣ́мъ па́че блюде́тся є҆пі́скопъ, да не глаго́летъ ѡ҆ ко́мъ либо, чегѡ̀ пред̾ дрꙋги́ми не мо́жетъ ѹ҆тверди́ти доказа́тельствами.

с. см҃д