(с. рп҃ѕ)

ПРА̑ВИЛА СВЯТА́ГѠ ПОМѢ́СТНАГѠ СОБО́РА КАРѲАГЕ́НСКАГѠ.

ПРА́ВИЛО а҃.

Ѡ҆предѣлє́нiя нiке́йскагѡ собо́ра всемѣ́рнѡ да соблюда́ются.

А҆ѵри́лiй є҆пíскопъ ре́къ:

Сíи ѡ҆предѣлє́нiя та́кѡ и҆мѣ́ются ѹ҆ на́съ въ спи́скахъ, кото́рые тогда` ѻ҆тцы` на́ши принесли` съ собо́ю ̾ѿ нiке́йскагѡ собо́ра, и҆ послѣ́дꙋющыя, и҆ на́ми при́нятыя ѡ҆предѣлє́нiя, съ ѻ҆́нымъ собо́ромъ въ то́чности соѻбра̑зныя, по ѹ҆достовѣре́нiи ѡ҆ се́мъ да соблюда́ются.

{комм.}Пред̾ си́мъ пра́виломъ чи́таны бы́ли на собо́рѣ сѷмво́лъ и҆ пра̑вила нiке́йскагѡ собо́ра. Све́рхъ же тогѡ`, фаѵстíнъ, є҆пíскопъ нiке́йскiй, мѣстоблюсти́тель ри́мскагѡ є҆пíскопа вонiфа́тiа, предста́вилъ да́нное є҆мꙋ` пи́сменное наставле́нiе, въ кото́ромъ предлага́лись собо́рꙋ пра̑вила ѡ҆ перенесе́нiи сꙋ́дныхъ дѣ́лъ ̾ѿ є҆пархiа́льнагѡ є҆пíскопа къ ри́мскомꙋ, и҆ къ сосѣ́днимъ є҆пíскопамъ, котѡ́рыя въ се́й за́писи на́званы бы́ли пра́вилами нiке́йскагѡ вселе́нскагѡ собо́ра, но котѡ́рыя въ са́момъ дѣ́лѣ бы́ли є҃ и҆ д҃_i пра̑вила помѣ́стнагѡ сардiкíйскагѡ собо́ра. На сiе` ѻ҆тцы` карѳаге́нскагѡ собо́ра ̾ѿвѣ́тствовали, что` ѻ҆ни` въ свои́хъ спи́скахъ нiке́йскагѡ собо́ра не нахо́дятъ си́хъ пра̑вилъ, и҆, для разрѣше́нiя сомнѣ́нiя, положи́ли и҆стре́бовать вѣ́рные спи́ски пра̑вилъ нiке́йскагѡ собо́ра ̾ѿ є҆пíскопѡвъ а҆нтiохíйскагѡ, а҆леѯандрíйскагѡ и҆ кѡнстантiнопо́льскагѡ. А҆ дабы` (с. рп҃з) не ѡ҆ста́вить, никако́гѡ сомнѣ́нiя въ свое́мъ повинове́нiи пра́виламъ нiке́йскагѡ собо́ра, по предложе́нiю а҆ѵри́лiа є҆пíскопа карѳаге́нскагѡ, и҆зрекли` настоя́щее пра́вило.

ПРА́ВИЛО в҃.

По и҆зволе́нiю бж҃iю первонача́льнѡ подоба́етъ, согла́снымъ и҆сповѣ́данiемъ, и҆сповѣ́дывати цр҃ко́внꙋю вѣ́рꙋ, пре́даннꙋю на́ми въ се́мъ сла́вномъ собра́нiи. Пото́мъ церко́вный чи́нъ, по согла́сiю ка́ждагѡ и҆ всѣ́хъ вкꙋ́пѣ, до́лжно соблюда́ти. Для ѹ҆твержде́нiя же помышле́нiй бра́тiй и҆ соєпíскопѡвъ на́шихъ, неда́внѡ поста́вленныхъ, до́лжно присовокꙋпи́ти то`, что` мы` прiя́ли ̾ѿ ѻ҆тцє́въ, ꙗ҆́кѡ тве́рдое ѡ҆предѣле́нiе: є҆ди́нство трⷪ҇цы, то́ є҆сть, ѻ҆ц҃а` и҆ сн҃а и҆ ст҃а́гѡ дх҃а, не и҆мѣ́етъ никако́гѡ разли́чiя познава́емагѡ. Сiе` въ ѹ҆ма́хъ на́шихъ свя́тѡ соде́ржимъ, и҆ ка́къ наꙋчи́лися, та́кѡ ѹ҆чи́ти бꙋ́демъ люде́й бж҃iихъ.

ПРА́ВИЛО г҃.

Ѡ҆ воздержа́нiи а҆ѵри́лiй є҆пíскопъ рече`:

На пре́жде бы́вшемъ собо́рѣ, когда` ѡ҆ ѻ҆́бразѣ воздержа́нiя и҆ чистоты` вопроше́но бы́ло, заблагоразсꙋждено`, что́бы поста́вленные въ сiи` три` сте́пени [то` є҆́сть во є҆пíскопы, пресвѵ́теры и҆ дiа́коны], чрез̾ са́мое посвяще́нiе ѡ҆бя́занные ѹ҆́зами чистоты`, ка́къ прили́чно святы́мъ є҆пíскопамъ и҆ свяще́нникамъ бж҃iимъ и҆ леѵíтамъ, и҆ слꙋжа́щымъ при бж҃е́ственныхъ священнодѣ́йствiяхъ, возде́ржны бы́ли во все́мъ: да возмо́гꙋтъ полꙋчи́ти, чегѡ` въ простотѣ` про́сятъ ̾ѿ бг҃а, дабы` ̾ѿ а҆по́столѡвъ пре́данное и҆ ̾ѿ са́мыя дре́вности содержи́мое и҆ мы` подо́бнѡ соблюда́ли.

ПРА́ВИЛО д҃.

Разсꙋждено`, что́бы є҆пíскопъ и҆ пресвѵ́теръ, и҆ дiа́конъ, и҆ всѣ` прикаса́ющiеся (с. рп҃и) къ святы́нямъ, храни́ли цѣломꙋ́дрiе и҆ возде́рживались ̾ѿ же́нъ.

{комм.}Приложе́нiе сегѡ` пра́вила къ є҆пíскопамъ въ соверше́нствѣ, а҆ къ пресвѵ́терамъ и҆ дiа́конамъ съ ѡ҆граниче́нiемъ, ѡ҆зна́чено съ подро́бностiю въ в҃_i и҆ г҃_i правила́хъ шеста́гѡ вселе́нскагѡ собо́ра.

ПРА́ВИЛО є҃.

Подоба́етъ ѹ҆держава́ти по́хоть любостяжа́нiя, кото́рꙋю никто` не ѹ҆сꙋмни́тся нарещи` ма́терiю всѣ́хъ ѕѡ́лъ: никто` да не встꙋпа́етъ въ чꙋ́ждые предѣ́лы, и҆ ра́ди коры́сти да не престꙋпа́етъ предѣ́лѡвъ ѻ҆те́ческихъ, и҆ никомꙋ` и҆з̾ кли́ра ̾ѿню́дь да не бꙋ́детъ позво́лено бра́ти ро́стъ ̾ѿ како́й бы то` ни бы́ло ве́щи. Предста́вленное же вно́вь, ка́къ не ꙗ҆́сное, и҆ совсѣ́мъ сокры́тое, бꙋ́детъ на́ми разсмо́трено, и҆ ѡ҆ то́мъ соста́вится ѡ҆предѣле́нiе. А҆ что` бж҃е́ственное писа́нiе постанови́ло весьма` ꙗ҆́снѡ, ѡ҆ то́мъ не мнѣ̑нiя до́лжно и҆спы́тывати, но па́че послѣ́довати томꙋ`. Что` ѹ҆кори́зненно въ мiря́нахъ, то` кольми` па́че досто́йно ѡ҆сꙋжде́нiя въ принадлежа́щихъ къ кли́рꙋ. Ве́сь собо́ръ ре́къ: никто` проти́вꙋ проро́кѡвъ, никто` проти́вꙋ є҆ѵⷢ҇лiа не дѣ́йствовалъ безбѣ́днѡ.

ПРА́ВИЛО ѕ҃.

Соверше́нiя мѵ́ра, и҆ ѡ҆свяще́нiя дѣ́въ да не твори́тъ пресвѵ́теръ. И҆ примиря́ти съ це́рковiю ка́ющихся, ̾ѿкры́тѡ, на лiтꙋргíи, да не бꙋ́детъ позво́лено пресвѵ́терꙋ. Всѣ̑мъ ѹ҆го́дно сiе`.

ПРА́ВИЛО з҃.

А҆́ще кто`, находя́сь въ ѻ҆па́сности жи́зни, бꙋ́детъ проси́ти ѡ҆ примире́нiи себя` со святы́мъ ѻ҆лтаре́мъ, во ̾ѿсꙋ́тствiи є҆пíскопа: то пресвѵ́теръ по прили́чiю до́лженъ вопроси́ти є҆пíскопа, и҆ та́кѡ, по є҆гѡ` разрѣше́нiю, примири́ти находя́щагося въ ѻ҆па́сности.

(с. рп҃ѳ)

ПРА́ВИЛО и҃.

Сꙋ́ть мно́гiе неблагонра́вные, кото́рые почита́ютъ за до́лжное, при вся́комъ слꙋ́чаѣ, приноси́ти ѡ҆бвинє́нiя на ѻ҆тцє́въ и҆ є҆пíскопѡвъ. До́лжно ли принима́ти таковы́хъ, и҆ли` нѣ́тъ; Ѿ всѣ́хъ є҆пíскопѡвъ рече́но: а҆́ще ѡ҆поро́ченъ таковы́й, то не принима́ти.

ПРА́ВИЛО ѳ҃.

А҆́ще кото́рый є҆пíскопъ, и҆ли` пресвѵ́теръ, прiи́метъ въ ѻ҆бще́нiе пра́веднѡ и҆зве́рженныхъ за свои` престꙋплє́нiя и҆з̾ це́ркви: да бꙋ́детъ и҆ са́мъ пови́ненъ ра́вномꙋ ѡ҆сꙋжде́нiю, съ ѹ҆клоня́ющимися ̾ѿ пра́вильнагѡ пригово́ра своегѡ` є҆пíскопа.

ПРА́ВИЛО _i҃.

А҆́ще кото́рый пресвѵ́теръ, ̾ѿ своегѡ` є҆пíскопа ѡ҆сꙋжде́нный, возне́сшись надме́нiемъ нѣ́кiимъ и҆ го́рдостiю, до́лжнымъ бы́ти возмни́тъ ̾ѿдѣ́льнѡ приноси́ти бг҃ꙋ ст҃ы́е да́ры, и҆ли` ѹ҆мы́слитъ воздви́гнꙋти и҆ны́й ѻ҆лта́рь, вопреки` церко́вной вѣ́рѣ и҆ ѹ҆ста́вꙋ: таковы́й да не бꙋ́детъ ѡ҆ста́вленъ без̾ наказа́нiя. Собо́ръ ре́къ: а҆́ще кото́рый пресвѵ́теръ, проти́вꙋ є҆пíскопа своегѡ` возгордя́сь, сотвори́тъ раско́лъ: да бꙋ́детъ а҆на́ѳема.

ПРА́ВИЛО а҃_i.

А҆́ще кото́рый пресвѵ́теръ въ свое́мъ поведе́нiи ѡ҆сꙋжде́нъ бꙋ́детъ: таковы́й до́лженъ сосѣ́днимъ є҆пíскопамъ возвѣсти́ти, дабы` ѻ҆ни` вы́слꙋшали дѣ́ло, и҆ дабы` чрез̾ ни́хъ примири́лся ѻ҆́нъ съ свои́мъ є҆пíскопомъ. А҆́ще же сегѡ` не сотвори́тъ, но [̾ѿ чегѡ` да сохрани́тъ бг҃ъ] надмева́ясь го́рдостгю, ѹ҆дали́тъ са́мъ себя` ̾ѿ ѻ҆бще́нiя съ свои́мъ є҆пíскопомъ, и҆ вмѣ́стѣ съ нѣ́которыми производя` раско́лъ, принесе́тъ бг҃ꙋ ст҃о́е приноше́нiе: таковы́й да бꙋ́детъ признава́емъ находя́щимся под̾ кля́твою, и҆ да лиши́тся своегѡ` мѣ́ста, впро́чемъ съ разсмотрѣ́нi(с. р҃ч)емъ, не и҆мѣ́етъ ли справедли́выя жа́лобы на є҆пíскопа.

ПРА́ВИЛО в҃_i.

Фи́лiѯъ є҆пíскопъ ре́къ: да внесе́тся въ пра̑вила, согла́снѡ съ ѡ҆предѣле́нiями дре́внихъ собо́рѡвъ и҆ сiе`: а҆́ще кото́рый є҆пíскопъ [є҆́же да не бꙋ́детъ] подве́ргнется нѣ́коемꙋ ѡ҆бвине́нiю, и҆, по вели́кимъ затрꙋдне́нiямъ, не мо́жно бꙋ́детъ собра́тися мнѡ́гимъ є҆пíскопамъ: то, дабы` ѻ҆́нъ не ѡ҆става́лся до́лгѡ под̾ ѡ҆бвине́нiемъ, да слꙋ́шаютъ є҆гѡ` на сꙋдѣ` двана́десять є҆пíскопѡвъ, пресвѵ́тера <-> ше́сть є҆пíскопѡвъ и҆ сво́й: а҆ дiа́кона <-> три`.

ПРА́ВИЛО г҃_i.

Мно́гiе є҆пíскопы, собра́вшись, да поставля́ютъ є҆пíскопа. А҆ по нꙋ́ждѣ три` є҆пíскопа, въ како́мъ бы мѣ́стѣ ни бы́ли ѻ҆ни`, по повелѣ́нiю пе́рвенствꙋющагѡ, да поста́вятъ є҆пíскопа. И҆ а҆́ще кто` постꙋ́питъ въ че́мъ либо вопреки` своемꙋ` согла́сiю и҆ли` подписа́нiю: са́мъ себя` лиши́тъ че́сти.

ПРА́ВИЛО д҃_i.

Разсꙋждено`, что́бы и҆з̾ трiпо́ля, ра́ди скꙋ́дости страны`, є҆ди́нъ є҆пíскопъ приходи́лъ для мѣстоблюсти́тельства въ собо́рѣ, и҆ что́бы та́мѡ на сꙋдѣ` слꙋ́шали пресвѵ́тера пя́ть є҆пíскопѡвъ, а҆ дiа́кона <-> три`, ка́къ вы́ше рече́но: ꙗ҆́вно же є҆́сть, ꙗ҆́кѡ предсѣда́ти бꙋ́детъ сво́й є҆пíскопъ.

ПРА́ВИЛО є҃_i.

Разсꙋждено` та́кожде, что́бы кто́ бы то` ни бы́лъ и҆з̾ є҆пíскопѡвъ, и҆ли` пресвѵ́терѡвъ, и҆ли` дiа́конѡвъ, и҆ли` приче́тникѡвъ, а҆́ще и҆мѣ́я возни́кшее въ це́ркви дѣ́ло ѡ҆бвини́тельное и҆ли` тя́жебное, ̾ѿрече́тся ̾ѿ церко́внагѡ сꙋда`, и҆ восхо́щетъ ѡ҆правда́тися пред̾ сꙋди́лищами свѣ́тскими, лиша́лся своегѡ` мѣ̑ста, хотя́ бы и҆ въ по́льзꙋ є҆гѡ` рѣше́нiе послѣ́довало. И҆ сiе` по дѣ́лꙋ ѡ҆бвини́тельномꙋ, по дѣ́лꙋ же (с. рч҃а) тя́жебномꙋ да лиша́ется тогѡ`, что` прiѡбрѣ́лъ по рѣше́нiю дѣ́ла, а҆́ще хо́щетъ ѹ҆держа́ти мѣ́сто свое`.

ПРА́ВИЛО ѕ҃_i.

Разсꙋждено` та́кожде и҆ сiе`: а҆́ще ̾ѿ каки́хъ бы то` ни бы́ло сꙋде́й церко́вныхъ сꙋ́дное дѣ́ло пренесе́но бꙋ́детъ къ дрꙋги́мъ сꙋдiя́мъ церкѡ́внымъ, и҆мѣ́ющымъ вы́сшꙋю вла́сть: да не бꙋ́детъ никако́гѡ нарека́нiя тѣ̑мъ, ко́ихъ пригово́ръ ̾ѿмѣне́нъ бꙋ́детъ, а҆́ще не мо́гꙋтъ бы́ти ѡ҆бличе́ны, ꙗ҆́кѡ и҆ли` по враждѣ` и҆ли` по пристра́стiю ѡ҆сꙋди́ли, и҆ли` нѣ́кимъ ѹ҆гожде́нiемъ прельще́ны бы́ли.

ПРА́ВИЛО з҃_i.

А҆́ще же по согла́сiю ѻ҆бѣ́ихъ сторо́нъ сꙋ́дящихся и҆́збраны бꙋ́дꙋтъ сꙋдiи`: то, хотя́ бы число` и҆́хъ бы́ло ме́нѣе ѡ҆предѣле́ннагѡ въ пра́вилахъ, да не бꙋ́детъ позво́лено преноси́ти сꙋ́дъ къ дрꙋги́мъ.

ПРА́ВИЛО и҃_i.

Дѣ́тямъ свяще́нникѡвъ не представля́ти мiрски́хъ позо́рищъ, и҆ не зрѣ́ти ѻ҆́ныхъ. Сiе́ же и҆ всѣ́мъ хрiстiа́намъ всегда` проповѣ́дꙋемо бы́ло, да не вхо́дятъ тꙋда`, гдѣ` быва́ютъ хꙋлє́нiя.

ПРА́ВИЛО ѳ҃_i.

Разсꙋждено`, да не быва́ютъ є҆пíскопы и҆ пресвѵ́теры и҆ дiа́коны ̾ѿкꙋпа́телями ра́ди коры́сти, и҆ли` ѹ҆прави́телями, и҆ да не прiѡбрѣта́ютъ пропита́нiя заня́тiемъ безче́стнымъ и҆ли` презри́тельнымъ. И҆́бо долженствꙋ́ютъ взира́ти на напи́санное: никто` во́инствꙋя бг҃ꙋ не ѡ҆бязꙋ́ется кꙋ́плями жите́йскими{в҃ тiм. гл. в҃, ст. д҃.}.

ПРА́ВИЛО к҃.

Чтецѡ́въ приходя́щихъ въ соверше́нный во́зрастъ побꙋжда́ти, и҆ли` ко встꙋпле́нiю въ сꙋпрꙋ́жество, и҆ли` къ ѻ҆бѣ́тꙋ цѣломꙋ́дрiя.

(с. рч҃в)

ПРА́ВИЛО к҃а.

Разсꙋждено` та́кожде, что́бы кли́рiкъ да́вшiй въ заи́мъ дє́ньги, сто́лькѡ же де́негъ и҆ полꙋча́лъ: а҆ да́вшiй вє́щи полꙋча́лъ, ско́лькѡ да́лъ.

ПРА́ВИЛО к҃в.

Дiа́коны да не бꙋ́дꙋтъ поставля́емы ра́нѣе два́десяти пяти` лѣ́тъ во́зраста.

ПРА́ВИЛО к҃г.

Чтецы` во вре́мя бг҃ослꙋже́нiя да не кла́няются наро́дꙋ.

ПРА́ВИЛО к҃д.

Заблагоразсꙋждено`, что́бы маѵрiта́нiя сiтiфе́нская и҆мѣ́ла своего` пе́рвенствꙋющаго є҆пíскопа, та́къ ка́къ ѻ҆на` проси́ла ѡ҆ се́мъ пе́рвенствꙋющаго є҆пíскопа нꙋмiдíйскiя страны`, ̾ѿ ко́ея ̾ѿдѣлена` собо́ромъ. По согла́сiю всѣ́хъ пе́рвенствꙋющихъ є҆пíскопѡвъ а҆фрiка́нскихъ ѻ҆бласте́й и҆ всѣ́хъ є҆пíскопѡвъ, дозво́лено є҆́й и҆мѣ́ти своего` пе́рвенствꙋющаго, по є҆я` ̾ѿдале́нности.

ПРА́ВИЛО к҃є.

Заблагоразсꙋждено` та́кожде: рꙋкополага́ємымъ въ є҆пíскопа, и҆ли` въ сте́пєни при́чта, рꙋкополага́ющiе предвари́тельнѡ да влага́ютъ во ѹ҆́ши постановлє́нiя собо́рѡвъ, дабы` не постꙋпа́ли вопреки` ѡ҆предѣле́нiямъ собо́ра, и҆ не раскаява́лись.

ПРА́ВИЛО к҃ѕ.

Положено`, да не да́стся є҆ѵхарíстiа тѣла́мъ сконча́вшихся. И҆́бо пи́сано є҆́сть: прiими́те, ꙗ҆ди́те{Матѳ. к҃ѕ, к҃ѕ.}, но тѣла` ме́ртвыхъ ни прiя́ти, ни ꙗ҆́сти не мо́гꙋтъ. Та́кожде да не подви́гнется невѣ́жество пресвѵ́терѡвъ крести́ти сконча́вшихся ѹ҆же`.

ПРА́ВИЛО к҃з.

Подтверди́ти подоба́етъ на се́мъ ст҃о́мъ собо́рѣ, что́(с. рч҃г)бы по пра́виламъ нiке́йскагѡ собо́ра ра́ди церко́вныхъ дѣ́лъ, котѡ́рыя не рѣ́дкѡ ̾ѿлага́ются со вредо́мъ для наро́да, каждого́днѡ бы́лъ созыва́емъ собо́ръ, на кото́рый бы всѣ`, занима́ющiе пе́рвыя въ ѻ҆бластя́хъ каѳє́дры, присыла́ли ̾ѿ свои́хъ собо́рѡвъ двꙋ́хъ, и҆ли` ско́лькѡ и҆зберꙋ́тъ, є҆пíскопѡвъ, въ мѣстоблюсти́тели, дабы` соста́вившееся таки́мъ ѻ҆́бразомъ собра́нiе могло` и҆мѣ́ти соверше́нное полномо́чiе.

ПРА́ВИЛО к҃и.

А҆́ще кто` и҆з̾ є҆пíскопѡвъ подве́ргнется ѡ҆бвине́нiю: ѡ҆бвини́тель да предста́витъ дѣ́ло къ пе́рвенствꙋющемꙋ въ ѻ҆́бласти, къ кото́рой принадлежи́тъ ѡ҆бвиня́емый, и҆ да не бꙋ́детъ ѡ҆бвиня́емый ̾ѿчꙋжде́нъ ̾ѿ ѻ҆бще́нiя, ра́звѣ когда`, бы́въ при́званъ къ ̾ѿвѣ́тꙋ гра́мотою, не ꙗ҆́вится въ сꙋ́дъ и҆́збранныхъ сꙋди́ти є҆го` въ назна́ченное вре́мя, то́ є҆сть, въ тече́нiе мѣ́сяца ̾ѿ тогѡ` дня`, въ кото́рый, по дозна́нiю, полꙋчена` и҆́мъ гра́мота. А҆́ще же предста́витъ и҆́стинныя и҆ неѡбходи̑мыя причи̑ны, препя́тствовавшыя є҆мꙋ` ꙗ҆ви́тися къ ̾ѿвѣ́тꙋ проти́вꙋ тогѡ`, что` на него` предста́влено: то без̾ предѡсꙋжде́нiя да и҆мѣ́етъ свобо́дꙋ къ ѡ҆правда́нiю въ тече́нiе дрꙋга́гѡ мѣ́сяца: но, по проше́ствiи дрꙋга́гѡ мѣ́сяца, да не бꙋ́детъ въ ѻ҆бще́нiи, доко́лѣ не ѡ҆чи́ститъ себя` доказа́тельствами по дѣ́лꙋ. А҆́ще же пред̾ всецѣ́лый тогѡ` лѣ́та собо́ръ ꙗ҆ви́тися не восхо́щетъ, дабы`,по кра́йней мѣ́рѣ, та́мѡ дѣ́ло є҆гѡ` ѡ҆ко́нчано бы́ло: то и҆мѣ́етъ бы́ти сꙋжде́нъ, ка́къ произне́сшiй пригово́ръ са́мъ про́тивъ себя`. Во вре́мя же, въ кото́рое ѻ҆́нъ ѡ҆стае́тся внѣ` ѻ҆бще́нiя, да не прiѡбща́ется ни въ свое́й це́ркви, ни во все́мъ предѣ́лѣ. Напро́тивъ тогѡ`, доноси́телю на него`, а҆́ще никꙋда` не ̾ѿлꙋча́лся во дни` (с. рч҃д) разсмотрѣ́нiя дѣ́ла є҆гѡ`, ̾ѿню́дь да не возбрани́тся ѻ҆бще́нiе. Но а҆́ще ѹ҆дали́тся и҆ сокро́ется: то є҆пíскопъ да бꙋ́детъ возвраще́нъ въ ѻ҆бще́нiе, а҆ са́мъ доноси́тель да и҆зри́нется ̾ѿ ѻ҆бще́нiя, впро́чемъ та́къ, что́бы не была` ̾ѿя́та ѹ҆ негѡ` свобо́да подтверди́ти ѡ҆бвине́нiе: а҆́ще мо́жетъ доказа́ти, ꙗ҆́кѡ не предста́лъ къ сꙋдꙋ` не по нехотѣ́нiю, а҆ по невозмо́жности. Сiе` впро́чемъ ꙗ҆́вно є҆́сть, ꙗ҆́кѡ а҆́ще во вре́мя движе́нiя дѣ́ла въ сꙋдѣ` є҆пíскопѡвъ, ѡ҆поро́чено бꙋ́детъ лице` доноси́тся: то не до́лжно прiима́ти ̾ѿ негѡ` ѡ҆бвине́нiя, ра́звѣ то́кмѡ пожела́етъ ѻ҆́нъ разсмотрѣ́нiя своегѡ` со́бственнагѡ, а҆ не церко́внагѡ дѣ́ла.

ПРА́ВИЛО к҃ѳ.

А҆́ще пресвѵ́теры, и҆ли` дiа́коны ѡ҆бвиня́емы бꙋ́дꙋтъ: то, по собра́нiи ѹ҆законе́ннагѡ числа` и҆з̾ бли́жнихъ мѣ́стъ и҆збира́емыхъ є҆пíскопѡвъ, кото́рыхъ ѡ҆бвиня́емые воспро́сятъ, то́ є҆сть, при ѡ҆бвине́нiи на пресвѵ́тера шести`, а҆ для дiа́кона тре́хъ, вмѣ́стѣ съ си́ми со́бственный ѡ҆бвиня́емыхъ є҆пíскопъ и҆зслѣ́дꙋетъ принесє́нныя на ни́хъ ѡ҆бвинє́нiя, съ соблюде́нiемъ тѣ́хъ же пра́вилъ, каса́тельнѡ дне́й и҆ сро́кѡвъ, и҆ и҆зслѣ́дованiя, и҆ ли́цъ ѡ҆бвиня́ющагѡ и҆ ѡ҆бвиня́емагѡ. Дѣла́ же по вина́мъ про́чихъ кли́рiкѡвъ є҆ди́нъ мѣ́стный є҆пíскопъ да разсмо́тритъ и҆ ѡ҆ко́нчитъ.

ПРА́ВИЛО л҃.

Заблагоразсꙋждено`, что́бы дѣ́ти состоя́щихъ въ кли́рѣ не совокꙋпля́лись бра́комъ съ ꙗ҆зы́чниками и҆ли` съ є҆ретiка́ми.

ПРА́ВИЛО л҃а.

Є҆пíскопы и҆ состоя́щiе въ кли́рѣ да не ѹ҆сво́иваютъ ничегѡ` тѣ́мъ, ко́и не сꙋ́ть правосла́вные хрiстiа́не, хотя́ бы то` бы́ли сро́дники: ничегѡ` и҆з̾ свои́хъ веще́й, ка́къ рече́но, да не ѹ҆про́(рч҃є)чиваютъ таковы̑мъ, посре́дствомъ да́ра, є҆пíскопы и҆ состоя́щiе въ кли́рѣ.

ПРА́ВИЛО л҃в.

Є҆пíскопы не и҆на́че да ̾ѿхо́дятъ за мо́ре{То́ є҆сть, и҆з̾ а҆́фрiки въ i҆та́лiю и҆ въ ри́мъ.}, ка́къ по разрѣше́нiю своегѡ` по ка́ждой ѻ҆́бласти є҆пíскопа пе́рвагѡ престо́ла, то́ є҆сть, взя́въ преимꙋ́щественнѡ ̾ѿ самогѡ` пе́рвенствꙋющагѡ є҆пíскопа, та́къ и҆менꙋ́емꙋю ̾ѿпꙋсти́тельнꙋю гра́матꙋ, и҆ли` ѡ҆добре́нiе.

ПРА́ВИЛО л҃г.

Постано́влено та́кожде, да не чита́ется ничто` въ це́ркви под̾ и҆́менемъ бж҃е́ственныхъ писа́нiй, кро́мѣ писа́нiй канонíческихъ. Канонíчєскiя же писа̑нiя сꙋ́ть сiи`: бытiе`, и҆схо́дъ, леѵíтъ, чи̑сла, второзако́нiе, i҆исꙋ́съ наѵи́нъ, сꙋдiи`, рꙋ́ѳь, ца́рствъ четы́ре кни́ги, паралiпоме́нѡнъ двѣ`, i҆́ѡвъ, ѱалти́рь, соломѡ́новыхъ кни́гъ четы́ре, проро́ческихъ кни́гъ двана́десять, и҆са́iа, i҆еремíа, i҆езекíиль, данiи́лъ, тѡвíа, i҆ꙋдíѳь, є҆сѳи́рь, є҆́здры кни́ги. Но́вагѡ завѣ́та: четы́ре є҆ѵⷢ҇лiа, дѣя́нiй а҆по́столѡвъ ѻ҆дна` кни́га, посла́нiй па́ѵла четырена́десять, петра` а҆по́стола два`, i҆ѡа́нна а҆по́стола три`, i҆а́кѡва а҆по́стола є҆ди́на, i҆ꙋ́ды а҆по́стола є҆ди́на, а҆пока́лѷѱiсъ i҆ѡа́нна кни́га є҆ди́на. Для тве́рдости же предлежа́щагѡ пра́вила да бꙋ́детъ и҆звѣще́нъ ѡ҆ се́мъ бра́тъ и҆ сослꙋжи́тель на́шъ вонiфа́тiй{Є҆пíскопъ ри́мскiй.} и҆ про́чiе є҆пíскопы тѣ́хъ стра́нъ: и҆́бо мы` прiя́ли ̾ѿ ѻ҆тцє́въ, что` сiи` кни́ги чита́ти подоба́етъ въ це́ркви.

ПРА́ВИЛО л҃д.

А҆ѵри́лiй є҆пíскопъ ре́къ: къ си́мъ, честнѣ́йшiе бра́тiя, при разсꙋжде́нiи ѡ҆ воздержа́нiи нѣ́которыхъ и҆з̾ кли́ра, кромѣ` чтецѡ́въ, ̾ѿ свои́хъ же́нъ, присовокꙋпля́ю ѹ҆твержде́нное на (с. рч҃ѕ) ра́зныхъ собо́рахъ: ѵ҆подiа́коны свящє́ннымъ та́йнамъ прикаса́ющiеся, и҆ дiа́коны и҆ пресвѵ́теры, та́кожде и҆ є҆пíскопы, по сво́йственномꙋ ка́ждой и҆з̾ си́хъ сте́пеней пра́вилꙋ, да возде́рживаются ̾ѿ же́нъ свои́хъ, и҆ да бꙋ́дꙋтъ, ꙗ҆́кѡ не и҆мѣ́ющiе и҆́хъ: и҆ а҆́ще сегѡ` не сотворя́тъ, то да бꙋ́дꙋтъ и҆зве́ржены ̾ѿ церко́внагѡ чи́на. Про́чiе же приче́тники да не принꙋжда́ются къ семꙋ`, ра́звѣ въ прекло́нныхъ лѣ́тахъ. Ве́сь собо́ръ ре́къ: ва́шею святы́нею пра́веднѡ распредѣля́емое, ꙗ҆́кѡ прили́чное свяще́нствꙋ и҆ бг҃оꙋго́дное, ѹ҆твержда́емъ.

{комм.}Сiе` пра́вило, подо́бнѡ ка́къ и҆ д҃ сегѡ` собо́ра, ѡ҆б̾ясня́ется и҆ дополня́ется в҃_i и҆ г҃_i пра́вилами шеста́гѡ вселе́нскагѡ собо́ра.

ПРА́ВИЛО л҃є.

Положено`, что́бы никто` не продава́лъ церко́вныя со́бственности: но а҆́ще сiя` со́бственность не прино́ситъ дохо́дѡвъ, и҆ настои́тъ вели́кая нꙋ́жда: то представля́ти ѡ҆ се́мъ пе́рвенствꙋющемꙋ є҆пíскопꙋ ѻ҆́бласти, и҆ съ ѡ҆предѣле́ннымъ число́мъ є҆пíскопѡвъ совѣща́тися, что` ѹ҆чини́ти до́лжно. А҆́ще же толи́кая нꙋ́жда настои́тъ для це́ркви, ꙗ҆́кѡ не возмо́жно совѣща́тися пре́жде прода́нiя: то да призове́тъ є҆пíскопъ во свидѣ́тельство хотя` сосѣ́днихъ є҆пíскопѡвъ, и҆ да попече́тся предста́вити собо́рꙋ всѣ` прилꙋчи́вшыяся це́ркви є҆гѡ` ѡ҆бстоя́тєльства. А҆́ще сегѡ` не сотвори́тъ: то продаю́щiй ꙗ҆́вится пови́ннымъ пред̾ бг҃омъ и҆ собо́ромъ, и҆ лиши́тся своея` че́сти.

ПРА́ВИЛО л҃ѕ.

Та́кожде подтверждено`, на пресвѵ́терѡвъ и҆ли` дiа́конѡвъ, ѡ҆бличе́нныхъ въ нѣ́коемъ тя́жкомъ грѣхѣ`, неизбѣ́жнѡ ѹ҆даля́ющемъ ̾ѿ священнослꙋже́нiя, не возлага́ти рꙋ́къ, ꙗ҆́кѡ на ка́ющихся, и҆ли` ꙗ҆́кѡ на вѣ́рныхъ мiря́нъ, и҆ не попꙋ(с. рч҃з)ска́ти и҆`мъ, крести́тися вно́вь, и҆ восходи́ти на сте́пень кли́ра.

ПРА́ВИЛО л҃з.

Ѡ҆предѣлено` та́кожде, что́бы, когда` пресвѵ́теры и҆ дiа́коны, и҆ про́чiе ни́зшiе приче́тники, по возни́кшымъ ѹ҆ ни́хъ дѣла́мъ, жа́лꙋются на сꙋ́дъ свои́хъ є҆пíскопѡвъ, выслꙋ́шивали и҆`хъ сосѣ́днiе є҆пíскопы, и҆ что́бы, съ согла́сiя со́бственныхъ и҆́хъ є҆пíскопѡвъ, прекраща́ли возни́кшыя междꙋ` и҆́ми неꙋдовѡ́льствiя приглаше́нные и҆́ми є҆пíскопы. Тогѡ` ра́ди а҆́ще и҆ ̾ѿ си́хъ къ вы́сшемꙋ сꙋдꙋ` восхотя́тъ пренести` дѣ́ло: да не прено́сятъ въ сꙋды` по тꙋ` сто́ронꙋ мо́ря{То́ є҆сть, въ i҆та́лiю и҆ въ ри́мъ.}, но къ пе́рвенствꙋющымъ є҆пíскопамъ свои́хъ ѻ҆бласте́й, ꙗ҆́коже мно́гажды ѡ҆предѣлено` сiе` и҆ ѡ҆ є҆пíскопахъ. А҆ перенося́щiе дѣ́ло къ сꙋда́мъ по тꙋ` сто́ронꙋ мо́ря, никѣ́мъ въ а҆́фрiкѣ да не прiе́млются въ ѻ҆бще́нiе.

ПРА́ВИЛО л҃и.

Ѹ҆го́дно всемꙋ` собо́рꙋ, что́бы ̾ѿлꙋче́нный за свое` небреже́нiе ̾ѿ ѻ҆бще́нiя, є҆пíскопъ ли, и҆ли` кто́ бы то` ни бы́лъ и҆з̾ кли́ра, во вре́мя ̾ѿлꙋче́нiя своегѡ`, пре́жде вы́слꙋшанiя ѡ҆правда́нiя є҆гѡ`, дерза́ющiй пристꙋпа́ти къ ѻ҆бще́нiю, признава́емъ бы́лъ произне́сшимъ са́мъ на себя` пригово́ръ ѡ҆сꙋжде́нiя.

ПРА́ВИЛО л҃ѳ.

Положено`: ѡ҆бвиня́емомꙋ, и҆ли` ѡ҆бвиня́ющемꙋ, ѡ҆паса́ющемꙋся нѣ́коегѡ наси́лiя ̾ѿ безпоко́йнагѡ многолю́дства въ то́мъ мѣ́стѣ, гдѣ` нахо́дится ѡ҆бвиня́емый, и҆збира́ти для себя` ближа́йшее мѣ́сто, гдѣ` не бы́ло бы є҆мꙋ` трꙋ́дности предста́вити свидѣ́телей, гдѣ` и҆ ѡ҆ка́нчивается дѣ́ло.

ПРА́ВИЛО м҃.

Ѡ҆предѣлено` та́кожде: а҆́ще кото́рые либо приче́тники и҆ дiа́коны бꙋ́дꙋтъ непослꙋ́ш(с. рч҃и)ны є҆пíскопамъ свои́мъ, хотя́щымъ по неѡбходи́мымъ ѡ҆бстоя́тельствамъ свои́хъ церкве́й, возвести` и҆`хъ на вы́сшыя сте́пени въ це́ркви свое́й: таковы́е да не слꙋ́жатъ и҆ въ то́мъ сте́пени, и҆з̾ кото́рагѡ возведены` бы́ти не восхотѣ́ли.

ПРА́ВИЛО м҃а.

Ѡ҆предѣлено`: а҆́ще є҆пíскопы, пресвѵ́теры, дiа́коны, и҆ли` какíе бы то` ни бы́ло кли́рiки, никако́гѡ стяжа́нiя не и҆мѣ́ющiе, по поставле́нiи свое́мъ, во вре́мя своегѡ` є҆пíскопства и҆ли` кли́рiчества, кꙋ́пятъ на и҆́мя свое` зє́мли, и҆ли` какíя либо ѹ҆гѡ́дiя: то да почита́ются похити́телями стяжа́нiй гд҃ⷭ҇нихъ, ра́звѣ то́кмѡ, прiя́въ ѹ҆вѣща́нiе, ̾ѿдадꙋ́тъ ѻ҆́ныя це́ркви. А҆́ще же что` дойде́тъ къ ни́мъ въ со́бственность, по да́рꙋ ̾ѿ когѡ́ либо, и҆ли` по наслѣ́дiю ̾ѿ ро́дственникѡвъ: съ тѣ́мъ да постꙋ́пятъ по своемꙋ` произволе́нiю. А҆́ще же, и҆ произво́ливъ да́ти что́ либо це́ркви, ѡ҆братя́тся вспя́ть: да бꙋ́дꙋтъ признава́емы недосто́йными церко́вныя че́сти, и҆ ̾ѿве́рженными.

ПРА́ВИЛО м҃в.

Ѡ҆предѣлено` та́кожде, что́бы пресвѵ́теры, без̾ соизволе́нiя свои́хъ є҆пíскопѡвъ, не продава́ли веще́й це́ркви, въ кото́рой посвящены`. Ра́внѡ и҆ є҆пíскопамъ не позволи́тельно продава́ти церкѡ́вныя зе́мли, без̾ вѣ́дома собо́ра и҆ли` свои́хъ пресвѵ́терѡвъ. Тогѡ` ра́ди, кромѣ` нꙋ́жды, и҆ є҆пíскопꙋ не позволи́тельно расточа́ти вє́щи, находя́щыяся въ церко́вной ѻ҆́писи.

ПРА́ВИЛО м҃г.

Ѡ҆ то́мъ, ꙗ҆́кѡ ничто` и҆з̾ поло́женнагѡ на i҆ппѡ́нскомъ собо́рѣ не тре́бꙋетъ и҆справле́нiя.

Є҆пiго́нiй є҆пíскопъ ре́къ: въ се́мъ сокраще́нiи, и҆звлече́нномъ и҆з̾ дѣя́нiй i҆ппѡ́н(с. рч҃ѳ)скагѡ собо́ра, ничегѡ` не признаю` тре́бꙋющимъ и҆справле́нiя и҆ли` дополне́нiя, ра́звѣ то́кмѡ, что́бы де́нь святы́я па́схи предвозвѣща́емъ бы́лъ во вре́мя собо́ра.

{комм.}Сiе` пра́вило є҆́сть мѣ́стное, но принадлежи́тъ къ ѻ҆́бщемꙋ церко́вномꙋ законоположе́нiю, потомꙋ` что` слꙋ́житъ свидѣ́тельствомъ вла́сти бо́льшагѡ собо́ра и҆справля́ть ѡ҆предѣ́лєнiя ме́ньшагѡ.

ПРА́ВИЛО м҃д.

Є҆пíскопы и҆ кли́рiки да не позволя́ютъ дѣ́тямъ свои́мъ ̾ѿходи́ти на свою` во́лю, чрез̾ ̾ѿдѣле́нiе и҆́хъ ̾ѿ себя`, а҆́ще не соверше́ннѡ полага́ются на и҆́хъ нра́вы и҆ во́зрастъ: дабы` въ послѣ́дствiи грѣхи` и҆́хъ не па́ли на сами́хъ роди́телей.

ПРА́ВИЛО м҃є.

Є҆пíскопы и҆ пресвѵ́теры и҆ дiа́коны не пре́жде да поставля́ются, ра́звѣ когда` всѣ́хъ въ до́мѣ свое́мъ содѣ́лаютъ правосла́вными хрiстiа́нами.

ПРА́ВИЛО м҃ѕ.

Въ святи́лищѣ да не прино́сится ничто` кромѣ` тѣ́ла и҆ кро́ви гд҃ⷭ҇ни, ꙗ҆́коже и҆ са́мъ гд҃ⷭ҇ь пре́далъ, то́ є҆сть, кромѣ` хлѣ́ба и҆ вiна`, водо́ю растворе́ннагѡ. Нача́тки же, и҆ли` ме́дъ, и҆ли` млеко`, по ѻ҆бы́чаю, да прино́сятся въ є҆ди́нъ и҆звѣ́стный де́нь, ка́къ таи́нственное зна́менiе младе́нцєвъ. Хотя́ же сiи` вє́щи и҆ прино́сятся къ ѻ҆лтарю`: впро́чемъ да и҆мѣ́ютъ со́бственнѡ свое` благослове́нiе, ̾ѿдѣля́ясь ̾ѿ святы́ни тѣ́ла и҆ кро́ви гд҃ⷭ҇ни. Нача́тки же да не прино́сятся ни ̾ѿ чегѡ`, кромѣ` вiногра́да и҆ пшени́цы.

{комм.}Ча́сть сегѡ` пра́вила ѡ҆ млекѣ` и҆ ме́дѣ и҆спра́вилъ шесты́й вселе́нскiй собо́ръ свои́мъ пра́виломъ н҃з.

ПРА́ВИЛО м҃з.

Кли́рiки, и҆ли` возде́ржники, ко вдова́мъ и҆ли` къ дѣ́вамъ да не вхо́дятъ, ра́звѣ съ разрѣше́нiя и҆ согла́сiя є҆пíскопа своегѡ` и҆ли` (с. с҃) пресвѵ́терѡвъ: но и҆ въ се́мъ слꙋ́чаѣ да вхо́дятъ не ѻ҆дни`, а҆ съ дрꙋги́ми кли́рiками, и҆ли` съ тѣ́ми, съ кото́рыми є҆пíскопъ и҆ли` є҆ди́ные пресвѵ́теры и҆мѣ́ютъ вхо́дъ къ таковы́мъ жена́мъ: и҆ли́ же да бесѣ́дꙋютъ съ ни́ми та́мъ, гдѣ` присꙋ́тствꙋютъ кли́рiки, и҆ли` нѣ́кiе почте́нные хрiстiа́не.

ПРА́ВИЛО м҃и.

Є҆пíскопъ пе́рвагѡ престо́ла да не и҆менꙋ́ется є҆ѯа́рхомъ i҆ере́євъ, и҆ли` верхо́внымъ сщ҃е́нникомъ, и҆ли` чѣ́мъ либо подо́бнымъ, но то́кмѡ є҆пíскопомъ пе́рвагѡ престо́ла.

ПРА́ВИЛО м҃ѳ.

Кли́рiки, ра́ди ꙗ҆́стiя и҆ питiя`, да не вхо́дятъ въ корче́мницы, ра́звѣ бы́въ понꙋ́ждены неѡбходи́мостiю вита́нiя на пꙋти`.

ПРА́ВИЛО н҃.

Свято́е та́инство ѻ҆лтаря` да соверша́ется людьми` не ꙗ҆́дшими. И҆зключа́ется и҆з̾ сегѡ` є҆ди́ный въ годꙋ` де́нь, въ кото́рый ве́черя гд҃ⷭ҇ня соверша́ется. А҆́ще же па́мять бꙋ́детъ нѣ́кiихъ въ вече́рнее вре́мя сконча́вшихся, є҆пíскопѡвъ, и҆ли` про́чихъ: то да соверши́тся ѻ҆на` моли́твами то́кмѡ, когда` соверша́ющiе ѻ҆́нꙋю ѡ҆ка́жꙋтся ѻ҆бѣ́давшими.

{комм.}Что` и҆ лiтꙋргíа вели́кагѡ четвертка`, хотя` по́зже ѻ҆бѣ́деннагѡ вре́мени, но та́кже не ꙗ҆́дшими должна` бы́ть соверша́ема, сiе` сказꙋ́ется сегѡ́ же собо́ра въ пра́вилѣ н҃и, и҆ шеста́гѡ вселе́нскагѡ собо́ра въ пра́вилѣ к҃ѳ.

ПРА́ВИЛО н҃а.

Є҆пíскопы, и҆ли` кли́рiки въ це́ркви да не пи́ршествꙋютъ: ра́звѣ слꙋчи́тся по нꙋ́ждѣ стра́нствованiя въ не́й ̾ѿдохнове́нiе и҆мѣ́ти. И҆ мiря́намъ, є҆ли́кѡ мо́жно, да возбраня́ются таковы́я пи́ршєства.

ПРА́ВИЛО н҃в.

Ка́ющымся вре́мя покая́нiя, по разли́чiю грѣхѡ́въ, да назнача́ется сꙋдо́мъ є҆пíскопѡвъ: пресвѵ́теръ же без̾ (с. с҃а) во́ли є҆пíскопа не разрѣша́етъ ка́ющагѡся, ра́звѣ во вре́мя належа́щiя нꙋ́жды, въ ̾ѿсꙋ́тствiи є҆пíскопа. На вся́каго же ка́ющагося, а҆́ще престꙋпле́нiе є҆гѡ` бы́ло ꙗ҆́вное и҆ гла́сное, смꙋща́ющее всю` цр҃ковь, да возлага́ема бꙋ́детъ рꙋка` въ притво́рѣ хра́ма.

ПРА́ВИЛО н҃г.

Дѣ́вы посвящє́нныя бг҃ꙋ, когда` разлꙋча́ются съ ѻ҆тца́ми, соблюда́вшими и҆`хъ, попече́нiемъ є҆пíскопа, и҆ли` въ ̾ѿсꙋ́тствiи є҆гѡ`, пресвѵ́тера, да бꙋ́дꙋтъ порꙋча́емы честнѣ́йшымъ жена́мъ: и҆ли`, живя` кꙋ́пнѡ, да храня́тъ взаи́мнѡ дрꙋ́гъ дрꙋ́га, дабы` скита́ясь повсю́дꙋ, не повреди́ли до́брой сла́вѣ цр҃кви.

ПРА́ВИЛО н҃д.

Боля́щiе, кото́рые за себя` ̾ѿвѣща́ти не мо́гꙋтъ, да бꙋ́дꙋтъ креща́емы тогда`, когда`, по и҆́хъ и҆зволе́нiю, и҆зрекꙋ́тъ свидѣ́тельство ѡ҆ ни́хъ дрꙋгíе, под̾ со́бственною ̾ѿвѣ́тственностiю.

ПРА́ВИЛО н҃є.

Позо́рищные и҆ глꙋмя́щiеся на зрѣ́лищахъ и҆ про́чiя таковы́я ли́ца, и҆ли` ̾ѿстꙋ́пники, ка́ющiеся и҆ ѡ҆браща́ющiеся къ бг҃ꙋ, да не лиша́ются благода́ти и҆ли` примире́нiя.

ПРА́ВИЛО н҃ѕ.

Позволя́ется и҆ впре́дь чита́ти страда̑нiя мꙋ́ченикѡвъ во дни`, когда` соверша́ется є҆жего́дная па́мять и҆́хъ.

ПРА́ВИЛО н҃з.

Ѡ҆ донатíстахъ, и҆ ѡ҆ дѣ́тяхъ креще́нныхъ донатíстами.

Заблагоразсꙋди́ли мы`, да вопро́симъ бра́тiю и҆ сослꙋжи́телей на́шихъ, сѷрiкíа и҆ сiмплiкiа́на, ѡ҆ младе́нцахъ то́кмѡ креще́нныхъ донатíстами, дабы` то`, что` содѣ́лано над̾ ни́ми, не по и҆́хъ произволе́нiю, а҆ по заблꙋжде́нiю роди́телей, не (с. с҃в) препя́тствовало произво́дствꙋ и҆́хъ въ слꙋже́нiе свята́гѡ ѻ҆лтаря`, когда` ѡ҆братя́тся къ це́ркви бж҃iей, съ спаси́тельнымъ расположе́нiемъ.

ПРА́ВИЛО н҃и.

Ѻ҆нѡра́тъ и҆ ѹ҆рва́нъ, є҆пíскопы и҆з̾ страны` маѵрiта́нiи сiтiфе́нскiя, рекли`: мы` слы́шали ѡ҆ нiке́йскомъ и҆зслѣ́дованiи вѣ́ры: ѡ҆ сщ҃еннодѣ́йствiи слꙋча́ющемся по́слѣ ѻ҆бѣ́да, и҆́стинно є҆́сть, да не ꙗ҆́дшими досто́йнѡ соверша́ется, и҆ тогда` ѹ҆тверждено` сiе`.

ПРА́ВИЛО н҃ѳ.

По да́нномꙋ на́мъ порꙋче́нiю предлага́емъ и҆ сiе`, ѡ҆предѣле́нное на собо́рѣ бы́вшемъ въ ка́пꙋѣ, ꙗ҆́кѡ не позволи́тельно бы́ти перекре́щиванiю и҆ли` перепоставле́нiю, и҆ли` прехожде́нiю є҆пíскопѡвъ на и҆́ный престо́лъ. Крескѡ́нiй є҆пíскопъ реке́нскагѡ села`, презрѣ́въ наро́дъ своея` па́ствы, вто́ргнꙋлся въ це́рковь веке́нскꙋю, и҆ да́же до ны́нѣ, мно́гажды бы́въ ѹ҆вѣщава́емъ по пра́виламъ, не восхотѣ́лъ ѡ҆ста́вити сiю` це́рковь, въ кото́рꙋю вто́ргся. Ѡ҆ се́мъ возвѣще́нное вы́ше мы` слы́шали, ка́къ достовѣ́рное, и҆ по заповѣ́данномꙋ на́мъ, про́симъ ва́шегѡ бл҃говоле́нiя препода́ти на́мъ разрѣше́нiе, да бꙋ́детъ позво́лено на́мъ по тре́бованiю неѡбходи́мости, для ѹ҆кроще́нiя є҆гѡ`, пристꙋпи́ти къ нача́льникꙋ страны`, по повелѣ́нiямъ славнѣ́йшихъ царе́й, дабы` не восхотѣ́вшiй покори́тися кро́ткомꙋ ѹ҆вѣща́нiю ва́шея святы́ни, и҆ и҆спра́вити нетерпи́мое, неме́дленнѡ ѡ҆стано́вленъ бы́лъ вла́стiю прави́тельства.

А҆ѵри́лiй є҆пíскопъ ре́къ: по соблюде́нiи ѹ҆стано́вленнагѡ ѻ҆бря́да, таковы́й да не признае́тся принадлежа́щимъ собо́рꙋ, а҆́ще, кро́ткѡ про́шенъ бы́въ ва́шею любо́вiю, ̾ѿрече́тся ѡ҆ста́вити мѣ́сто, и҆́мъ восхи́щенное: поне́же свои́мъ презо́р(с. с҃г)ствомъ и҆ непокори́востiю подпа́лъ свѣ́тской вла́сти. Ѻ҆нѡра́тъ и҆ ѹ҆рва́нъ є҆пíскопы рекли`: ѹ҆го́дно ли сiе` всѣ̑мъ; Всѣ` є҆пíскопы ̾ѿвѣща́ли: справедли́во, ѹ҆го́дно.

ПРА́ВИЛО ѯ҃.

Да соблюда́ется дре́внiй чи́нъ: ме́нѣе тре́хъ є҆пíскопѡвъ, ка́къ ѡ҆предѣлено` въ пра́вилахъ, да не признаю́тся дово́льными для поставле́нiя є҆пíскопа.

ПРА́ВИЛО ѯ҃а.

Подоба́етъ ѡ҆предѣли́ти и҆ сiе`: а҆́ще когда` пристꙋ́пимъ къ и҆збра́нiю є҆пíскопа, и҆ возни́кнетъ нѣ́кое прекосло́вiе, поне́же бы́ли ѹ҆ на́съ въ разсмотрѣ́нiи таковы́е слꙋ́чаи: дерзнове́нно бꙋ́детъ тре́мъ то́кмѡ собра́тися для ѡ҆правда́нiя и҆мѣ́ющагѡ рꙋкоположи́тися: но къ вышерече́нномꙋ числꙋ` да присоедини́тся є҆ди́нъ и҆ли` два` є҆пíскопа: и҆, при наро́дѣ, къ кото́ромꙋ и҆збира́емый и҆мѣ́етъ бы́ти поста́вленъ, во пе́рвыхъ да бꙋ́детъ и҆зслѣ́дованiе ѡ҆ ли́цахъ прекосло́вящихъ: пото́мъ да присовокꙋ́пится къ и҆зслѣ́дованiю ѡ҆б̾я́вленное и҆́ми, и҆ когда` ꙗ҆́вится чи́стымъ пред̾ лице́мъ наро́да, тогда` ѹ҆же` да рꙋкополо́жится. Всѣ` є҆пíскопы рекли`: соверше́ннѡ согла́сны.

ПРА́ВИЛО ѯ҃в.

Поне́же па́мятꙋемъ, ꙗ҆́кѡ давнѡ` ѹ҆же` призна́ли мы` до́лжнымъ въ ка́ждое лѣ́то собира́тися ра́ди совѣща́нiй: то, когда` собере́мся во є҆ди́но, тогда` де́нь па́схи да возвѣща́ется чрез̾ мѣстоблюсти́телей, ѡ҆брѣта́ющихся на собо́рѣ.

ПРА́ВИЛО ѯ҃г.

Ѻ҆нѡра́тъ и҆ ѹ҆рва́нъ є҆пíскопы рекли`: слове́снѡ порꙋчено` та́кожде на́мъ проси́ти, что́бы по ѡ҆предѣле́нiю i҆ппѡнíйскагѡ собо́ра, ꙗ҆́кѡ подоба́етъ во вре́мя собо́ра ка́ждой ѻ҆́бласти посѣща́емой бы́ти, по по(с. с҃д)ря́дкꙋ посѣща́ема была` и҆ маѵрiта́нiя, что` вы` ̾ѿлага́ли ̾ѿ го́да до го́да. А҆ѵри́лiй є҆пíскопъ ре́къ: тогда` ѡ҆ маѵрiта́нской странѣ` мы` не ѡ҆предѣли́ли ничегѡ`, поели́кꙋ ѻ҆на` лежи́тъ на краю` а҆́фрiки, и҆ сопредѣ́льна ва́рварской землѣ`. Да да́рꙋетъ же бг҃ъ, да возмо́жемъ, и҆ не ѡ҆бѣща́въ, по преизбы́ткꙋ сотвори́ти сiе`, и҆ прибы́ти въ странꙋ` ва́шꙋ.

ПРА́ВИЛО ѯ҃д.

Є҆пiго́нiй є҆пíскопъ ре́къ: на мно́гихъ собо́рахъ сщ҃е́ннымъ сосло́вiемъ ѡ҆предѣлено`, что́бы наро́дъ, въ прихо́дахъ ̾ѿ є҆пíскопѡвъ зави́сящiй и҆ никогда` не и҆мѣ́вшiй ѻ҆со́багѡ є҆пíскопа, не и҆на́че полꙋча́лъ свои́хъ прави́телей, то́ є҆сть є҆пíскопѡвъ, ка́къ по согла́сiю є҆пíскопа, кото́ромꙋ подчине́нъ снача́ла. И҆́бо нѣ́кiе, встꙋпя` въ наси́льственное ѡ҆блада́нiе нѣ́которымъ мѣ́стомъ, ̾ѿвраща́ются ѻ҆бще́нiя съ бра́тiею: когда́ же быва́ютъ за сiе` ѡ҆сꙋжда́емы, то ка́къ бы по нѣ́коемꙋ ста́ромꙋ пра́вꙋ преѡблада́нiя ѹ҆де́рживаютъ за собо́ю влады́чество. Мно́гiе же и҆з̾ пресвѵ́терѡвъ, надме́нные и҆ безꙋ́мные, под̾е́млютъ вы̑и свои` проти́вꙋ со́бственныхъ є҆пíскопѡвъ, пи́ршествами и҆ ѕлонамѣ́ренными совѣ́тами возбꙋжда́я наро́дъ къ томꙋ`, что́бы ѻ҆́нъ, по безчи́нной прiя́зни, и҆`хъ сами́хъ поста́вилъ прави́телями. Твоемꙋ`, вѣ́рнѣйшiй бра́те а҆ѵри́лiе, благоразꙋ́мiю мы` ѡ҆бя́заны тѣ́мъ нарочи́тѡ вожделѣ́ннымъ послѣ́дствiемъ, что` таковы̑я покꙋшє́нiя ты` многокра́тнѡ ѡ҆стана́вливалъ. Вопреки` ѕлонамѣ́реннымъ ѹ҆мышле́нiямъ, хꙋды́мъ совѣ́тамъ и҆ соглаше́нiямъ таковы́хъ люде́й, предлага́ю сiе`: ꙗ҆́кѡ не подоба́етъ ѻ҆со́баго нача́льника прiима́ти лю́дямъ, кото́рые въ та́къ и҆менꙋ́емомъ предѣ́лѣ подлежа́тъ дре́внемꙋ є҆пíскопꙋ, и҆ никогда` ѻ҆со́багѡ є҆пíскопа не и҆мѣ́ли. Сегѡ` ра́ди, а҆́ще (с. с҃є) всемꙋ` святѣ́йшемꙋ собо́рꙋ ѹ҆го́дно предлага́емое мно́ю, то да ѹ҆тверди́тся. А҆ѵри́лiй є҆пíскопъ ре́къ: и҆зложе́нiю бра́та и҆ соепíскопа на́шегѡ не прекосло́влю, но и҆сповѣ́дꙋю, ꙗ҆́кѡ сiе` и҆ твори́лъ и҆ твори́ти бꙋ́дꙋ, то́ є҆сть, ѹ҆ є҆диномы́сленныхъ, не то́кмѡ съ карѳаге́нскою це́рковiю, но и҆ со всѣ́мъ свяще́ннымъ сосло́вiемъ. И҆́бо сꙋ́ть весьма` мно́гiе соꙋмышля́ющiе со свое́ю толпо́ю, кото́рꙋю ѻ҆ни`, ка́къ ска́зано, вво́дятъ въ заблꙋжде́нiе, льстя` є҆я` слꙋ́хꙋ, и҆ ласка́тельствомъ привлека́я къ себѣ` люде́й зазо́рнагѡ житiя`: па́че же напыща́ясь и҆ ̾ѿдѣля́ясь ̾ѿ сегѡ` на́шегѡ сосло́вiя, ѻ҆ни`, ѡ҆пира́ясь на свою` толпꙋ`, многокра́тнѡ бы́въ приглашены` прiити` на собо́ръ, ̾ѿрека́ются, боя́ся, да не ѡ҆бнарꙋ́жатся и҆́хъ нелѣ́пѡсти. Тогѡ` ра́ди, а҆́ще ѹ҆го́днѡ предлага́ю: до́лжно на́мъ вся́кимъ ѻ҆́бразомъ подвиза́тися про́тивъ ни́хъ, не ѡ҆стаю́тся въ и҆́хъ вла́сти не то́кмѡ таковы́е наси́льственнѡ завладѣ́нные и҆́ми ѻ҆́крꙋги, но и҆ со́бствєнныя це́ркви, непра́вильнѡ под̾ вла́сть и҆́хъ прише́дшыя: да со вла́стiю и҆згоня́ются ѻ҆ни` ̾ѿкры́тѡ, и҆ са́мый престо́лъ пе́рвенствꙋющихъ є҆пíскопѡвъ да ̾ѿверга́етъ и҆`хъ. И҆́бо справедли́вость тре́бꙋетъ, что́бы прилѣпля́ющiеся ко всѣ́мъ бра́тiямъ и҆ ко всемꙋ` собо́рꙋ, не то́кмѡ ѹ҆де́рживали за собо́ю сво́й престо́лъ, но є҆ще` полꙋча́ли во вла́сть таковы́е спо́рные ѻ҆́крꙋги: напро́тивъ же тогѡ`, что́бы мня́щiеся бы́ти дово́льными свое́ю толпо́ю наро́да, и҆ бра́тскꙋю любо́вь пренебрега́ющiе, не то́кмѡ лиша́емы бы́ли завладѣ́нныхъ и҆́ми ѻ҆́крꙋгѡвъ, но є҆ще`, ка́къ рече́но мно́ю, и҆ со́бствєнныя и҆́хъ мѣста` ѹ҆ ни́хъ, ꙗ҆́кѡ ѹ҆ мяте́жникѡвъ, бы́ли ̾ѿе́млемы вла́стiю свѣ́тскихъ нача́льникѡвъ. Ѻ҆нѡра́тъ и҆ ѹ҆рва́нъ є҆пíскопы рекли`: велича́йшее промышле́нiе ва́шея (с. с҃ѕ) святы́ни въ ѹ҆мы` всѣ́хъ водрꙋзи́лось: и҆ мни́мъ, ꙗ҆́кѡ подоба́етъ ̾ѿвѣ́томъ всѣ́хъ ѹ҆тверди́ти предложе́нiе ва́ше. Всѣ` є҆пíскопы рекли`: согла́сны, согла́сны.

ПРА́ВИЛО ѯ҃є.

Никако́й є҆пíскопъ да не ѹ҆своя́етъ себѣ` чꙋжда́гѡ кли́рiка, без̾ разсꙋжде́нiя пре́жнягѡ є҆гѡ` є҆пíскопа.

ПРА́ВИЛО ѯ҃ѕ.

А҆ѵри́лiй є҆пíскопъ ре́къ: сло́во мое` прiими́те бра́тiя. Многокра́тнѡ слꙋча́лось, что` церко́вники проси́ли ѹ҆ меня` дiа́конѡвъ, и҆ли` пресвѵ́терѡвъ, и҆ли` є҆пíскопѡвъ. Па́мятꙋя пра̑вила, ꙗ҆́ слѣ́дꙋю и҆`мъ, ѡ҆браща́юсь къ є҆пíскопꙋ проси́магѡ кли́рiка, и҆ є҆мꙋ` ѡ҆б̾явля́ю, что` кли́рiка є҆гѡ` про́сятъ принадлежа́щiе то́й и҆ли` дрꙋго́й цр҃кви. Се` доны́нѣ мнѣ` не прекосло́вили. Но дабы` сегѡ` и҆ по́слѣ не слꙋчи́лось, то́ є҆сть, дабы` не воспроти́вились мнѣ` въ се́мъ дѣ́лѣ проси́мые мно́ю, [поне́же вѣ́даете, что` ꙗ҆́ и҆мѣ́ю попече́нiе ѡ҆ мно́гихъ цр҃квахъ и҆ рꙋкоположе́нiяхъ,] когда` пристꙋплю` къ комꙋ́ либо и҆з̾ сопа́стырей, съ двꙋмя` и҆ли` тремя` свидѣ́телями и҆з̾ ва́шегѡ сосло́вiя, а҆́ще и҆збира́емый не недосто́инъ ѡ҆бря́щется: пра́ведно є҆́сть сꙋди́ти ва́шей любви`, что` подоба́етъ твори́ти. И҆́бо ꙗ҆́, ка́къ вы` зна́ете, бра́тiя, по и҆зволе́нiю бж҃iю, ѡ҆ мно́гихъ цр҃квахъ попече́нiе и҆мѣ́ю. Нꙋми́дiй є҆пíскопъ ре́къ: престо́лꙋ семꙋ` всегда` принадлежа́ло сiе` полномо́чiе, да поставля́етъ є҆пíскопа, по жела́нiю ка́ждыя цр҃кви, ̾ѿкꙋ́да хо́щетъ, и҆ кто́ бы ни бы́лъ є҆мꙋ` наимено́ванъ. Є҆пiго́нiй є҆пíскопъ ре́къ: доброво́лiе ѹ҆мѣря́етъ вла́сть: и҆́бо ты`, бра́те, ме́нѣе дерза́ешь, не́жели мо́жешь, всѣ̑мъ показꙋ́я себя` бла́га и҆ человѣколюби́ва. И҆́бо твоемꙋ` разсꙋжде́нiю предоста́влено ꙗ҆ви́ти ѹ҆важе́нiе лицꙋ` ка́ждагѡ є҆пíскопа: но та́кожде въ пе́рвомъ и҆ є҆динокра́тномъ сноше́нiи съ (с. с҃з) ни́ми, а҆́ще заблагоразсꙋ́дишь, настоя́ти на то`, что` состои́тъ во вла́сти сегѡ` престо́ла: поели́кꙋ и҆мѣ́ешь неѡбходи́мость подкрѣпля́ти всѣ` цр҃кви. Сегѡ` ра́ди не дае́мъ тебѣ` вла́сть, но запечатлѣва́емъ ѻ҆́нꙋю твои́мъ произволе́нiемъ, да бꙋ́детъ тебѣ` позво́лено всегда` бра́ти, кого` хо́щешь, и҆ производи́ти предстоя́телей цр҃квамъ, и҆ про́чихъ проси́мыхъ, ̾ѿкꙋ́да заблагоразсꙋ́дишь. Постꙋметiа́нъ є҆пíскопъ ре́къ: а҆́ще кто` и҆мѣ́етъ є҆ди́наго то́кмѡ пресвѵ́тера, не ѹ҆же́ли и҆ сего` до́лжно ѹ҆ негѡ` ̾ѿя́ти; А҆ѵри́лiй є҆пíскопъ ре́къ: по ми́лости бж҃iей, може́тъ є҆ди́нъ є҆пíскопъ поста́вити мно́гихъ пресвѵ́терѡвъ: пресвѵ́теръ же къ є҆пíскопствꙋ спосо́бный не ѹ҆до́бнѡ ѡ҆брѣта́ется. Тогѡ` ра́ди, а҆́ще кто` и҆мѣ́етъ є҆ди́наго то́кмѡ пресвѵ́тера, и҆ прито́мъ досто́йнаго є҆пíскопства: то и҆ сего` є҆ди́наго до́лженъ ̾ѿда́ти для рꙋкоположе́нiя. Постꙋметiа́нъ є҆пíскопъ ре́къ: но а҆́ще є҆ди́нъ є҆пíскопъ и҆мѣ́етъ мно́жество кли́рiкѡвъ, то сiе` мно́жество дрꙋга́гѡ долженствꙋ́етъ помощи` мнѣ`. А҆ѵри́лiй є҆пíскопъ ре́къ: по́длиннѡ, ка́къ ты` помо́гъ дрꙋго́й цр҃кви, та́къ и҆мѣ́ющiй бо́льшее число` кли́рiкѡвъ бꙋ́детъ побꙋжде́нъ и҆з̾ числа` и҆́хъ ѹ҆дѣли́ти тебѣ` для рꙋкоположе́нiя.

ПРА́ВИЛО ѯ҃з.

Для ка́ждагѡ є҆пíскопа подоба́ющее ѡ҆хранено` постановле́нiемъ, что́бы ̾ѿ ѡ҆предѣле́ннагѡ соста́ва прихо́дѡвъ, ни є҆ди́ное мѣ́сто не бы́ло ̾ѿторга́емо, и҆ не полꙋча́ло ѻ҆со́багѡ є҆пíскопа, ра́звѣ по согла́сiю и҆мѣ́ющагѡ вла́сть над̾ ѻ҆́нымъ. А҆́ще же се́й допꙋ́ститъ, что́бы и҆звѣ́стный ѻ҆́крꙋгъ полꙋчи́лъ со́бственнаго є҆пíскопа: то произведе́нный на сiе` мѣ́сто да не простира́етъ вла́сти свое́й на дрꙋгíе ѻ҆́крꙋги: и҆́бо се́й є҆ди́нъ бы́въ ̾ѿдѣле́нъ ̾ѿ соста́ва мно́гихъ, ѹ҆досто́енъ и҆мѣ́ти че́сть ѻ҆со́багѡ є҆пíскопства.

(с. с҃и)

ПРА́ВИЛО ѯ҃и.

Ва́ше є҆динодꙋ́шiе кꙋ́пнѡ со мно́ю{Сiе` пра́вило и҆зрека́етъ на собо́рѣ а҆ѵри́лiй, є҆пíскопъ карѳаге́нскiй.} па́мятꙋетъ ѡ҆предѣле́нное на предше́ствовавшемъ собо́рѣ: въ малолѣ́тствѣ креще́нные донатíстами, не мо́гшiе тогда` позна́ти, коли́кѡ ги́бельно заблꙋжде́нiе и҆́хъ, но по достиже́нiи во́зраста, спосо́бнагѡ къ размышле́нiю, позна́вшiе и҆́стинꙋ, и҆ безꙋ́мiемъ и҆́хъ возгнꙋша́вшiеся, по дре́внемꙋ чи́нꙋ, возложе́нiемъ рꙋки` да прiе́млются въ каѳолíческꙋю бж҃iю цр҃ковь, по всемꙋ` мíрꙋ распростране́ннꙋю. Нарека́нiе пре́жнягѡ заблꙋжде́нiя не должно` бы́ти препя́тствiемъ приня́тiю и҆́хъ въ чи́нъ кли́ра, когда` ѻ҆ни` пристꙋпи́въ къ вѣ́рѣ, и҆́стиннꙋю цр҃ковь призна́ли свое́ю, и҆, въ не́й ѹ҆вѣ́ровавъ во хр҃ⷭ҇та`, при́няли та̑инства трⷪ҇цы, котѡ́рыя, ка́къ ꙗ҆́вно є҆́сть, всѣ` и҆́стинны и҆ свя́ты и҆ бж҃е́ственны, и҆ на кото́рыхъ ѹ҆твержда́ется все` ѹ҆пова́нiе дꙋши`, не смотря` на то`, что` предвари́вшая де́рзость є҆ретiкѡ́въ, безразсꙋ́днѡ стреми́лась нѣ́что преда́ти проти́вное, под̾ и҆́менемъ и҆́стины. Сiе` про́сто, ка́къ ѹ҆́читъ святы́й а҆по́столъ, глаго́ля: є҆ди́нъ бг҃ъ, є҆ди́на вѣ́ра, є҆ди́но кр҃ще́нiе{Є҆фес. гл. д҃. ст. є҃.}, и҆ то`, что` є҆ди́ножды преподава́ти до́лжно, не позволи́тельно вно́вь воспринима́ти. Сегѡ` ра́ди по преда́нiи а҆на́ѳемѣ и҆́мени заблꙋжде́нiя, возложе́нiемъ рꙋки`, да прiе́млются въ є҆ди́нꙋ цр҃ковь, кото́рая, по рече́нномꙋ, є҆́сть голꙋби́ца{Пѣ́сн. пѣ́сн. гл. в҃, ст. _i҃.}, є҆ди́нственная ма́терь хрiстiа́нъ, и҆ въ кото́рой спаси́тельнѡ прiе́млются всѣ` та̑инства вѣ́чныя и҆ животворя́щыя, впро́чемъ пребыва́ющихъ въ є҆́реси подверга́ющыя вели́комꙋ ѡ҆сꙋжде́нiю и҆ ка́зни. Что` во и҆́стинѣ свѣтлѣ́е препровожда́ло бы и҆`хъ къ (с. с҃ѳ) вѣ́чной жи́зни: то` въ заблꙋжде́нiи стано́вится для ни́хъ бо́лѣе ѡ҆мрача́ющимъ и҆ ѡ҆сꙋжда́ющимъ. Сегѡ` нѣ́которые и҆збѣжа́ли, и҆ позна́въ прямы́й пꙋ́ть ма́тери, каѳолíческiя цр҃кви, всѣ́мъ ѻ҆́нымъ святы́мъ та́инствамъ, по любви` къ и҆́стинѣ, повѣ́рили, и҆ ѻ҆́ныя при́няли. Что` таковы́е, когда` присоедини́тся ѹ҆достовѣре́нiе въ и҆́хъ до́бромъ житiи`, без̾ сомнѣ́нiя, пра́вильнѡ мо́гꙋтъ ѹ҆тверждены` бы́ти въ кли́рѣ, для слꙋже́нiя святы́мъ та́йнамъ, ѻ҆со́беннѡ въ толи́кѡ затрꙋдни́тельныхъ ѡ҆бстоя́тельствахъ, сегѡ` никто` ѡ҆спо́ривати не бꙋ́детъ. А҆́ще же нѣ́которые томꙋ́ же, то́ є҆сть, дона́товꙋ ѹ҆че́нiю послѣ́довавшiе кли́рiки, возжела́ютъ присоедини́тися къ на́мъ съ свои́мъ наро́домъ, и҆ въ свои́хъ сте́пеняхъ, и҆з̾ любви` къ че́сти, подава́я наро́дꙋ совѣ́ты къ жи́зни, и҆ ѹ҆де́рживая за собо́ю сте́пєни ко спасе́нiю: то полага́ю ѡ҆ста́вити сiе`, доко́лѣ вышерече́нные бра́тiя{Вышерече́нные бра́тiя, кото́рыхъ мнѣ́нiя и҆ совѣ́та ѡ҆жида́етъ здѣ́сь собо́ръ, ка́къ ви́дно и҆з̾ предше́ствовавшихъ сло́въ а҆ѵри́лiа въ дѣя́нiяхъ сегѡ` собо́ра, сꙋ́ть: а҆наста́сiй є҆пíскопъ ри́мскiй и҆ вене́рiй є҆пíскопъ медiола́нскiй. Мнѣ́нiе си́хъ двꙋ́хъ престо́лѡвъ а҆ѵри́лiй нахо́дитъ нꙋ́жнымъ для сохране́нiя цр҃ко́внагѡ є҆диномы́слiя, потомꙋ` что` ри́мскiй и҆ медiола́нскiй є҆пíскопы пре́жде сегѡ` полага́ли не принима́ть въ при́чтъ донатíстѡвъ.}, по внима́тельнѣйшемъ размышле́нiи, подадꙋ́тъ свое` мнѣ́нiе, дабы` ѻ҆ни` въ свое́мъ благоразꙋ́мнѣйшемъ совѣща́нiи и҆зслѣ́довали предме́тъ на́шегѡ предложе́нiя, и҆ ѹ҆досто́или подкрѣпи́ти на́съ въ то́мъ, что` до́лжно на́мъ постанови́ти ѡ҆ се́мъ дѣ́лѣ. Ны́нѣ же ѡ҆грани́чиваемся то́кмѡ креще́нными ̾ѿ донатíстѡвъ во младе́нчествѣ, да соглася́тся вышерече́нные бра́тiя, а҆́ще и҆`мъ ѹ҆го́дно, съ на́шимъ рѣше́нiемъ, что́бы рꙋкополага́ти ѻ҆́ныхъ.

ПРА́ВИЛО ѯ҃ѳ.

Подоба́етъ проси́ти благочести́вѣйшихъ царе́й, да повеля́тъ совсѣ́мъ и҆скоре(с. с҃_i)ни́ти ѡ҆ста́нки i҆́дѡлѡвъ по все́й а҆́фрiкѣ. [И҆́бо во мно́гихъ мѣста́хъ примо́рскихъ, и҆ въ ра́зныхъ владѣ́нiяхъ, є҆ще` сохраня́етъ непра́веднѡ си́лꙋ сiе` заблꙋжде́нiе.] Да бꙋ́детъ заповѣ́дано, и҆ i҆́дѡлѡвъ и҆стреби́ти, и҆ ка̑пища и҆́хъ, въ се́лахъ и҆ въ сокрове́нныхъ мѣста́хъ без̾ вся́кiя благови́дности стоя́щыя, вся́кимъ ѻ҆́бразомъ разрꙋша́ти.

ПРА́ВИЛО ѻ҃.

Подоба́етъ проси́ти благочести́вѣйшихъ царе́й, да благоволя́тъ ѹ҆зако́нити и҆ сiе`: а҆́ще нѣ́которые пожела́ютъ по како́мꙋ либо дѣ́лꙋ и҆мѣ́ти сꙋ́дъ въ це́ркви, по пра́вꙋ а҆по́стольскомꙋ принадлежа́щемꙋ цр҃квамъ, и҆, мо́жетъ бы́ть, рѣше́нiемъ кли́рiкѡвъ ѻ҆дна` сторона` бꙋ́детъ не дово́льна: то да не бꙋ́детъ позво́лено призыва́ти въ сꙋ́дъ къ свидѣ́тельствꙋ того` кли́рiка, кото́рый пре́жде сiе` са́мое дѣ́ло разсма́тривалъ, и҆ли` при разсмотрѣ́нiи ѻ҆́нагѡ присꙋ́тствовалъ: и҆ да́же никто` и҆з̾ дома́шнихъ лица` церко́внагѡ да не вво́дится въ сꙋ́дъ, съ ѡ҆бя́занностiю свидѣ́тельствовати.

ПРА́ВИЛО ѻ҃а.

Та́кожде подоба́етъ проси́ти хрiстiа́нскихъ царе́й и҆ ѡ҆ се́мъ: поели́кꙋ вопреки` бж҃е́ственнымъ за́повѣдямъ во мно́гихъ мѣста́хъ ̾ѿ ꙗ҆зы́ческагѡ заблꙋжде́нiя привнесе́нныя пи́ршєства соверша́ются, та́къ что` и҆ хрiстiа́не та́йнѡ привлека́ются ꙗ҆зы́чниками къ ѹ҆ча́стiю въ ѻ҆́ныхъ: то да повеля́тъ воспрети́ти таковы̑я пи́ршєства, и҆ въ города́хъ, и҆ въ се́лахъ, и҆ наипа́че, поели́кꙋ въ нѣ́которыхъ города́хъ не страша́тся си́мъ ѻ҆́бразомъ согрѣша́ти, да́же во дни` па́мяти блаже́нныхъ мꙋ́ченикѡвъ, и҆ да́же въ свяще́нныхъ мѣста́хъ. Въ сíи дни`, что` и҆ и҆зрещи` сты́дъ є҆́сть, соверша́ютъ на поля́хъ и҆ на сто́гнахъ непристѡ́йныя пляса̑нiя, и҆ (с. са҃_i) непотре́бными слова́ми ѡ҆скорбля́ютъ че́сть ма́терей семе́йствъ, и҆ цѣломꙋ́дрiе дрꙋги́хъ безчи́сленныхъ благочести́выхъ же́нъ, собира́ющихся во святы́й де́нь, та́къ что` ̾ѿ прибѣ́жища са́мыя святы́я вѣ́ры почти` ѹ҆бѣга́ти нꙋ́жно быва́етъ.

ПРА́ВИЛО ѻ҃в.

Подоба́етъ проси́ти та́кожде и҆ ѡ҆ се́мъ, да воспрети́тся представле́нiе позо́рищныхъ и҆́гръ въ де́нь воскре́сный, и҆ въ про́чiе свѣ́тлые дни` хрiстiа́нскiя вѣ́ры: тѣ́мъ па́че, что` въ продолже́нiе ѻ҆сми` дне́й святы́я па́схи, наро́дъ бо́лѣе собира́ется на конериста́лище, не́жели въ цр҃ковь. До́лжно премѣни́ти ѡ҆предѣле́нные для позо́рищь дни`, когда` ѻ҆ни` встрѣча́ются съ пра́здничными, и҆ никого` и҆з̾ хрiстiа́нъ не до́лжно принꙋжда́ти къ си́мъ зрѣ́лищамъ.

ПРА́ВИЛО ѻ҃г.

Подоба́етъ проси́ти и҆ ѡ҆ се́мъ, да благоволя́тъ ѹ҆зако́нити, что́бы кли́рiка, въ како́мъ бы ѻ҆́нъ ни бы́лъ сте́пени, ѡ҆сꙋжде́ннаго за како́е либо престꙋпле́нiе сꙋдо́мъ є҆пíскопѡвъ, не бы́ло позво́лено защища́ти ̾ѿ наказа́нiя ни то́й цр҃кви, въ кото́рой ѻ҆́нъ слꙋжи́лъ, ниже` како́мꙋ либо человѣ́кꙋ: а҆ что́бы въ наказа́нiе за сiе` поло́жено бы́ло де́нежное взыска́нiе, и҆ли` лише́нiе че́сти, и҆ да повеля́тъ, что́бы къ и҆звине́нiю въ то́мъ не бы́лъ принима́емъ ни во́зрастъ, ни по́лъ.

ПРА́ВИЛО ѻ҃д.

Подоба́етъ проси́ти є҆ще` и҆ ѡ҆ се́мъ: а҆́ще кто` восхо́щетъ ̾ѿ нѣ́коегѡ и҆гра́лищнагѡ ѹ҆пражне́нiя пристꙋпи́ти къ благода́ти хрiстiа́нства, и҆ пребыва́ти свобо́днымъ ̾ѿ ѻ҆́ныхъ нечисто́тъ: то да не бꙋ́детъ позво́лено никомꙋ` склоня́ти, и҆ли` принꙋжда́ти такова́го па́ки къ тѣ́мъ же заня́тiямъ.

(с. св҃_i)

ПРА́ВИЛО ѻ҃є.

Ѡ҆ провозглаше́нiи въ цр҃кви ̾ѿпꙋще́нiя на свобо́дꙋ, а҆́ще до́знано бꙋ́детъ, ꙗ҆́кѡ сiе` творя́тъ на́ши сослꙋжи́тели въ i҆та́лiи: то, по довѣ́рiю къ ни́мъ, и҆ мы` да послѣ́дꙋемъ без̾ сомнѣ́нiя и҆́хъ чи́нꙋ, по ̾ѿкры́томъ предоставле́нiи сегѡ` дозна́нiя посыла́емомꙋ мѣстоблюсти́телю: и҆ что` то́кмѡ мо́жетъ соверша́тися, ка́къ соѻбра́зное съ вѣ́рою, ко благоꙋстро́йствꙋ цр҃кви и҆ ко спасе́нiю дꙋ́шъ: все` то` и҆ мы` съ похвале́нiемъ да прiи́мемъ пред̾ лице́мъ гд҃ⷭ҇нимъ.

ПРА́ВИЛО ѻ҃ѕ.

А҆ѵри́лiй є҆пíскопъ ре́къ: полага́ю та́кожде, ꙗ҆́кѡ посыла́емомꙋ въ i҆та́лiю мѣстоблюсти́телю не до́лжно ѡ҆ста́вити без̾ внима́нiя дѣ́ла є҆кѵ́тiа, давнѡ` ѡ҆предѣле́нiемъ є҆пíскопѡвъ по справедли́вости ѡ҆сꙋжде́ннагѡ. А҆́ще слꙋчи́тся посыла́емомꙋ найти` є҆го` въ тѣ́хъ мѣста́хъ: то се́й бра́тъ на́шъ да попече́тся въ защи́тꙋ церко́внагѡ благоꙋстро́йства дѣ́йствовати про́тивъ негѡ` ка́къ до́лжно и҆ гдѣ` возмо́жно. Всѣ` є҆пíскопы ̾ѿвѣща́ли: весьма` согла́сны на сiе` предложе́нiе.

ПРА́ВИЛО ѻ҃з.

Ѡ҆ кро́ткомъ ѡ҆браще́нiи съ донатíстами.

По дозна́нiи и҆ и҆зслѣ́дованiи всегѡ`, по́льзѣ церко́вной споспѣшествова́ти могꙋ́щагѡ, по манове́нiю и҆ внꙋше́нiю дх҃а бж҃iя, мы` и҆збра́ли за лꙋ́чшее, постꙋпа́ти съ вышеꙋпомя́нꙋтыми людьми` кро́ткѡ и҆ ми́рнѡ, хотя` ѻ҆ни` безпоко́йнымъ свои́мъ разномы́слiемъ и҆ весьма` ѹ҆даля́ются ̾ѿ є҆ди́нства тѣ́ла гд҃ⷭ҇ня. Таки́мъ ѻ҆́бразомъ, по возмо́жности на́шей, да содѣ́лается соверше́ннѡ и҆звѣ́стнымъ для всѣ́хъ, по всѣ́мъ а҆фрiка́нскимъ ѻ҆́бластямъ, ѹ҆ловле́нныхъ и҆́хъ ѡ҆бще́нiемъ и҆ прiя́знiю, каки́мъ жа́лост(с. сг҃_i)нымъ заблꙋжде́нiемъ ѻ҆ни` себя` связа́ли. Мо́жетъ бы́ть тогда`, ка́къ мы` съ кро́тостiю собира́емъ разномы́слящихъ, по сло́вꙋ а҆п҃ⷭ҇тола, да́стъ и҆`мъ бг҃ъ покая́нiе въ ра́зꙋмъ и҆́стины, и҆ возни́кнꙋтъ ̾ѿ дiа́вольскiя сѣ́ти, бы́въ ѹ҆ловлены` ̾ѿ негѡ` въ свою` є҆гѡ` во́лю{в҃ тiм. гл. в҃, ст. к҃є, к҃ѕ.}.

ПРА́ВИЛО ѻ҃и.

Заблагоразсꙋждено` посла́ти ̾ѿ на́шегѡ собо́ра гра́маты къ нача́льствꙋющымъ въ а҆́фрiкѣ, и҆ прили́чнымъ при́знано проси́ти и҆`хъ ѡ҆ вспомоществова́нiи ѻ҆́бщей ма́тери каѳолíческой цр҃кви въ то́мъ слꙋ́чаѣ, когда` вла́сть є҆пíскопѡвъ быва́етъ пренебрега́ема во гра́дахъ, то́ є҆сть, что́бы ѻ҆ни` съ нача́льственнымъ полномо́чiемъ и҆ попечи́тельностiю, и҆ съ ѹ҆се́рдiемъ къ хрiстiа́нской вѣ́рѣ, сдѣ́лали и҆зслѣ́дованiе ѡ҆ произше́дшемъ во всѣ́хъ мѣста́хъ, въ кото́рыхъ маѯiмiанíсты ѡ҆владѣ́ли цр҃квами, та́кожде и҆ ѡ҆ тѣ́хъ, кото́рые и҆́ми ̾ѿто́ржены: и҆ что́бы достовѣ́рное для всѣ́хъ свѣдѣ́нiе ѡ҆ си́хъ происше́ствiяхъ не̾ѿмѣ́ннѡ повелѣ́ли внести` въ за́писи наро́дныхъ дѣ́лъ.

ПРА́ВИЛО ѻ҃ѳ.

Ѡ҆ прiя́тiи кли́рiкѡвъ донатíстѡвъ, въ кли́ръ каѳолíческiя цр҃кви.

Напослѣ́докъ заблагоразсꙋждено` посла́ти гра́маты къ бра́тiямъ и҆ соепíскопамъ на́шымъ, и҆ наипа́че къ а҆по́стольскомꙋ престо́лꙋ, на кото́ромъ предсѣда́тельствꙋетъ помянꙋ́тый досто́йнѡ чти́мый бра́тъ и҆ сослꙋжи́тель на́шъ а҆наста́сiй, ѡ҆ то́мъ, что́бы по и҆звѣ́стной є҆мꙋ` вели́кой нꙋ́ждѣ а҆́фрiки, ра́ди ми́ра и҆ по́льзы цр҃кви, и҆ и҆з̾ са́мыхъ донатíстѡвъ кли́рiкѡвъ, расположе́нiе свое` и҆спра́вившихъ и҆ возжела́вшихъ прiити` къ каѳолíческомꙋ соедине́нiю, по (с. сд҃_i) разсꙋжде́нiю и҆ и҆зволе́нiю ка́ждагѡ каѳолíческагѡ є҆пíскопа, ѹ҆правля́ющагѡ цр҃ковiю въ то́мъ мѣ́стѣ, прiима́ти въ свои́хъ сте́пеняхъ свяще́нства, а҆́ще сiе` ѡ҆ка́жется содѣ́йствꙋющимъ къ ми́рꙋ хрiстiа́нъ. И҆звѣ́стно, что` и҆ въ предше́ствовавшее вре́мя та́къ постꙋпа́емо бы́ло съ си́мъ раско́ломъ: ѡ҆ че́мъ свидѣ́тельствꙋютъ примѣ́ры мно́гихъ и҆ почти` всѣ́хъ а҆фрiка́нскихъ цр҃квей, въ кото́рыхъ возни́кло сiе` заблꙋжде́нiе. Сiе` дѣ́лается не въ нарꙋше́нiе собо́ра, бы́вшагѡ ѡ҆ се́мъ предме́тѣ въ страна́хъ лежа́щихъ за мо́ремъ, но что́бы сiе` сохранено` бы́ло въ по́льзꙋ жела́ющихъ, си́мъ ѻ҆́бразомъ прейти` къ каѳолíческой цр҃кви, дабы` не бы́ло поставля́емо никакíя прегра́ды и҆́хъ є҆дине́нiю. Кото́рые въ мѣста́хъ своегѡ` жи́тельства ѹ҆смо́трены бꙋ́дꙋтъ вся́чески содѣ́йствꙋющими и҆ споспѣшествꙋ́ющими каѳолíческомꙋ є҆дине́нiю, къ ѻ҆чеви́дной по́льзѣ дꙋ́шъ бра́тiй: тѣ́мъ да не бꙋ́детъ препо́ною ѡ҆предѣле́нiе, постано́вленное про́тивъ сте́пеней и҆́хъ на собо́рѣ за мо́ремъ, и҆́бо спасе́нiе не заграждено` ни ̾ѿ како́гѡ лица`. То́ є҆сть, рꙋкоположе́нные донатíстами, а҆́ще и҆спра́вясь, восхотя́тъ пристꙋпи́ти къ каѳолíческой вѣ́рѣ, да не бꙋ́дꙋтъ лиша́емы приня́тiя въ свои́хъ сте́пеняхъ, по ѡ҆предѣле́нiю бы́вшагѡ за мо́ремъ собо́ра, но па́че да прiе́млются тѣ`, чрез̾ кото́рыхъ ѡ҆ка́зывается споспѣшествова́нiе каѳолíческомꙋ соедине́нiю.

ПРА́ВИЛО п҃.

Ѡ҆ назначе́нiи посо́льства къ донатíстамъ ра́ди соглаше́нiя къ ми́рꙋ.

Пото́мъ разсꙋждено`, что́бы, по си́хъ дѣя́нiяхъ, для возвѣще́нiя ми́ра и҆ є҆дине́нiя, без̾ кото́рагѡ не мо́жетъ состоя́тися спасе́нiе хрiстiа́нъ, и҆з̾ среды` на́съ посла́ти мѣстоблюсти́телей къ є҆пíскопамъ са́мыхъ дона(с. сє҃_i)тíстѡвъ, а҆́ще каки́хъ ѻ҆ни` и҆мѣ́ютъ, и҆ли` къ и҆́хъ мiря́намъ. Чрез̾ си́хъ мѣстоблюсти́телей да содѣ́лается и҆звѣ́стнымъ всѣ̑мъ, что` донатíсты не и҆мѣ́ютъ ничегѡ` благосло́внагѡ проти́вꙋ каѳолíческiя цр҃кви. Наипа́че да бꙋ́детъ, ра́ди достовѣ́рнагѡ доказа́тельства, ꙗ҆́вно всѣ̑мъ, чрез̾ за́писи гра́дскихъ дѣ́лъ, ка́къ са́ми ѻ҆ни` постꙋпи́ли съ маѯiмiанíстами, свои́ми ̾ѿщепе́нцами. Въ се́мъ слꙋ́чаѣ, а҆́ще восхотя́тъ ѹ҆смотрѣ́ти, ̾ѿ бг҃а пока́зано и҆`мъ, ꙗ҆́кѡ ѻ҆ни` толи́кѡ же непра́веднѡ ̾ѿпа́ли тогда` ̾ѿ є҆дине́нiя церко́внагѡ, коли́кѡ непра́веднѡ, ка́къ ѻ҆ни` вопiю́тъ, ̾ѿпа́ли ны́нѣ ̾ѿ ни́хъ маѯiмiанíсты. И҆з̾ числа` тѣ́хъ, кото́рыхъ ѻ҆ни` ѡ҆сꙋди́ли, ꙗ҆́вною вла́стiю со́бственнагѡ совѣ́та, по́слѣ тогѡ` нѣ́которыхъ принима́ли въ и҆́хъ сте́пеняхъ свяще́нства, и҆ признава́ли креще́нiе, кото́рое соверши́ли ѡ҆сꙋжде́нные и҆ и҆зве́рженные и҆́ми. Си́мъ дока́зывается, ско́ль безꙋ́мнымъ се́рдцемъ сопротивля́ются ѻ҆ни` ми́рꙋ цр҃кви, по всемꙋ` мíрꙋ распростране́нныя, постꙋпа́я та́къ въ по́льзꙋ стороны` дона́товой, и҆ не почита́я сами́хъ себя` ѡ҆скверне́нными ѡ҆бще́нiемъ съ тѣ́ми, кото́рыхъ ѻ҆ни` таки́мъ ѻ҆́бразомъ по нꙋ́ждѣ при́няли съ ми́ромъ, а҆ междꙋ` тѣ́мъ препира́ясь съ на́ми, то́ є҆сть съ каѳолíческою цр҃ковiю, простира́ющеюся да́же до послѣ́днихъ предѣ́лѡвъ земли`, и҆ не мо́гши вразꙋми́ти себя` чрез̾ нечи́стое ѡ҆бще́нiе съ тѣ́ми, кото́рыхъ пре́жде са́ми всѣ` ѡ҆сꙋжда́ли.

ПРА́ВИЛО п҃а.

Заблагоразсꙋждено`, да є҆пíскопы и҆ пресвѵ́теры и҆ дiа́коны, по пра́виламъ сво́йственнымъ и҆́хъ сте́пенямъ, возде́рживаются ̾ѿ же́нъ, кото́рыхъ ѹ҆же` и҆мѣ́ютъ: а҆́ще же не сотворя́тъ сегѡ`, да бꙋ́дꙋтъ ѹ҆даля́емы ̾ѿ цр҃ко́внагѡ чи́на, про́чiе же приче́тники да не принꙋжда́ются къ семꙋ`. Но (с. сѕ҃_i) подоба́етъ соблюда́ти ѻ҆бы́чай ка́ждыя цр҃кви.

{комм.}Послѣ́днiя сло́ва сегѡ` пра́вила ꙗ҆́снѡ пока́зываютъ, что` произне́сшiй є҆го` собо́ръ са́мъ не признава́лъ ѻ҆́нагѡ ѻ҆́бщимъ пра́виломъ для всѣ́хъ цр҃кве́й. Бо́лѣе ꙗ҆́сное и҆ то́чное востановле́нiе вселе́нскiя цр҃кви ѡ҆ се́мъ предме́тѣ нахо́дится въ в҃_i и҆ г҃_i пра́вилахъ шеста́гѡ вселе́нскагѡ собо́ра.

ПРА́ВИЛО п҃в.

Заблагоразсꙋждено`, да не бꙋ́детъ позво́лено никако́мꙋ є҆пíскопꙋ ѡ҆ставля́ти гла́вное мѣ́сто своея` каѳе́дры, и҆ ̾ѿходи́ти къ како́й либо цр҃кви, въ є҆гѡ` є҆па́рхiи состоя́щей, и҆ли` бо́лѣе надлежа́щагѡ ѹ҆пражня́тися въ со́бственномъ дѣ́лѣ, и҆ ѡ҆ставля́ти попече́нiе и҆ прилежа́нiе ѡ҆ свое́мъ престо́лѣ.

ПРА́ВИЛО п҃г.

Ѡ҆ младе́нцахъ, когда` не ѡ҆брѣта́ются достовѣ́рные свидѣ́тели, сказꙋ́щiе, ꙗ҆́кѡ без̾ сомнѣ́нiя креще́ны сꙋ́ть, и҆ са́ми ѻ҆ни` по своемꙋ` во́зрастꙋ, не мо́гꙋтъ ѹ҆довлетвори́тельнѡ ̾ѿвѣща́ти ѡ҆ препо́данномъ и҆`мъ та́инствѣ, разсꙋждено`, ꙗ҆́кѡ подоба́етъ без̾ вся́кагѡ сомнѣ́нiя крести́ти и҆`хъ, дабы` таково́е сомнѣ́нiе не лиши́ло и҆́хъ ѡ҆чище́нiя се́ю святы́нею. Сiе` бра́тiя на́ши мѣстоблюсти́тели маѵрiта́нскiе присовѣ́товали потомꙋ`, что` мно́гихъ таковы́хъ покꙋпа́ютъ ѹ҆ ва́рварѡвъ.

ПРА́ВИЛО п҃д.

Заблагоразсꙋждено` та́кожде, де́нь покланя́емыя па́схи возвѣща́ти всѣ̑мъ чрез̾ приписа́нiе под̾ ѡ҆предѣле́нiями собо́ра. Де́нь же собо́ра да соблюда́ется то́тъ са́мый, кото́рый назна́ченъ на i҆ппѡ́нскомъ собо́рѣ, то́ є҆сть два́десять пе́рвый а҆́ѵгꙋста. И҆ ѡ҆ се́мъ до́лжно написа́ти къ пе́рвенствꙋющымъ всѣ́хъ ѻ҆́бластей, дабы`, когда` созыва́ютъ собо́ръ ѹ҆ себя`, се́й де́нь ѡ҆ставля́ти неприкоснове́ннымъ.

ПРА́ВИЛО п҃є.

Та́кожде ѡ҆предѣлено`, да не бꙋ́детъ позво́лено ни(с. сз҃_i)како́мꙋ вре́меннѡ ѹ҆правля́ющемꙋ є҆пíскопꙋ ѹ҆де́рживати за собо́ю престо́лъ, кото́рый є҆мꙋ` порꙋче́нъ, ꙗ҆́кѡ вре́меннѡ ѹ҆правля́ющемꙋ, по причи́нѣ разногла́сiя и҆ ра́спрей въ наро́дѣ: но да тщи́тся ѻ҆́нъ въ тече́нiи го́да и҆збра́ти є҆мꙋ` є҆пíскопа. А҆́ще же вознеради́тъ ѡ҆ се́мъ: то по ѡ҆конча́нiи го́да и҆́ный вре́меннѡ ѹ҆правля́ющiй да и҆збере́тся.

ПРА́ВИЛО п҃ѕ.

Заблагоразсꙋди́ли всѣ`, по причи́нѣ притѣсне́нiя ѹ҆бо́гихъ, кото́рые непреста́ннѡ стꙋжа́ютъ цр҃кви жа́лобами, проси́ти ̾ѿ царе́й, да и҆збира́ются для ни́хъ, под̾ смотре́нiемъ є҆пíскопѡвъ, защи́тники ̾ѿ наси́лiя бога́тыхъ.

ПРА́ВИЛО п҃з.

Постано́влено, что́бы ка́ждый ра́зъ, когда` надлежи́тъ собра́тися собо́рꙋ, благовре́меннѡ приходи́ли на ѻ҆́ный є҆пíскопы, котѡ́рымъ не препя́тствꙋетъ ни ста́рость, ни болѣ́знь, ниже` кака́я либо тя́жкая неѡбходи́мость: и҆ да и҆звѣща́ются пе́рвенствꙋющiе, ка́ждый ̾ѿ своея` ѻ҆́бласти, ѡ҆ всѣ́хъ є҆пíскопахъ, въ двꙋ́хъ ли, и҆ли` тре́хъ мѣста́хъ составля́ются собра̑нiя и҆́хъ, и҆ ̾ѿ ка́ждагѡ и҆з̾ си́хъ ча́стныхъ собра́нiй почере́днѡ и҆збира́емые не̾ѿмѣ́ннѡ да прiи́дꙋтъ ко дню` собо́ра. Когда́ же прiити` не возмо́гꙋтъ, по мно́жествꙋ каки́хъ либо затрꙋдне́нiй, ка́къ сiе` мо́жетъ слꙋчи́тися: то, а҆́ще не и҆з̾ясня́тъ своемꙋ` пе́рвенствꙋющемꙋ є҆пíскопꙋ встрѣ́тившагѡся и҆`мъ препя́тствiя, должны` таковы́е дово́льны бы́ти ѡ҆бще́нiемъ въ свое́й то́кмѡ цр҃кви.

ПРА́ВИЛО п҃и.

Ѡ҆ крескѡ́нiи вилларекентíйскомъ заблагоразсꙋждено` всѣ́ми: ̾ѿсе́лѣ возвѣсти́ти пе́рвенствꙋющемꙋ є҆пíскопꙋ нꙋмидíйскомꙋ, да вѣ́даетъ, ꙗ҆́кѡ до́лженъ ѻ҆́нъ (с. си҃_i) свое́ю гра́матою ѹ҆вѣща́ти вышерече́ннаго крескѡ́нiа ѡ҆ прише́ствiи, да не ̾ѿлага́етъ ѻ҆́нъ предста́ти на ближа́йшiй ѻ҆́бщiй а҆фрiка́нскiй собо́ръ. А҆́ще же вознеради́тъ прiити`: да вѣ́даетъ, ꙗ҆́кѡ сꙋ́дъ на него` и҆зрече́нъ бꙋ́детъ.

ПРА́ВИЛО п҃ѳ.

Ѡ҆ставле́нiе i҆ппѡнíйскiя цр҃кви без̾ прави́телей не долженствꙋ́етъ до́лгѡ бы́ти въ небреже́нiи: и҆ поели́кꙋ та́мѡшнiя цр҃кви нахо́дятся во вла́сти тѣ́хъ, кото́рые ̾ѿрекли́сь ̾ѿ незако́ннагѡ ѡ҆бще́нiя съ є҆кѵ́тiемъ: то заблагоразсꙋждено` посла́ти ̾ѿ настоя́щагѡ собо́ра є҆пíскопѡвъ: ригíна, а҆лѵ́пiа, а҆ѵгꙋстíна, мате́рна, ѳеасíа, є҆ѵо́дiа, плакiа́на, ѹ҆рва́на, вале́рiа, а҆мви́вiа, фортꙋна́та, кꙋодвꙋлтде́а, ѻ҆нора́та, i҆аннꙋа́рiа, а҆́пта, ѻ҆нора́та, а҆мпе́лiа, вiкторiа́на, є҆ѵагге́лла, рогатiа́на: и҆ и҆`мъ собра́ти и҆ вразꙋми́ти тѣ́хъ, кото́рые по ѹ҆по́рствꙋ, досто́йномꙋ порица́нiя, полага́ютъ ѡ҆жида́ти ѡ҆конча́нiя бѣ́гства тогѡ` са́магѡ є҆кѵ́тiа, и҆ съ ѻ҆́бщею моли́твою поста́вити и҆`мъ є҆пíскопа. А҆́ще же и҆ не восхотя́тъ сiи` помышля́ти ѡ҆ ми́рѣ: да не препя́тствꙋютъ и҆збра́нiю предстоя́теля, что́бы поста́вити є҆го` ра́ди по́льзы цр҃кви, сто́ль до́лгое вре́мя ѡ҆става́вшейся без̾ є҆пíскопа.

ПРА́ВИЛО ч҃.

Ѡ҆предѣлено` и҆ сiе`: когда` на состоя́щихъ въ кли́рѣ быва́етъ доно́съ, и҆ ѡ҆б̾явля́ются нѣ́котѡрыя ѡ҆бвинє́нiя: тогда`, ча́стiю для ̾ѿклоне́нiя нарека́нiя на цр҃ковь, ча́стiю ра́ди досто́инства кли́ра, по каковы́мъ причи́намъ и҆ ѡ҆ка́зывается и҆`мъ снисхожде́нiе, ча́стiю для и҆збѣжа́нiя го́рдагѡ ѕлора́дованiя є҆ретiкѡ́въ и҆ ꙗ҆зы́чникѡвъ, а҆́ще жела́ютъ, ка́къ и҆ до́лжно, защища́ти свое` дѣ́ло и҆ попещи́ся ѡ҆ доказа́тельствахъ своея` неви́нности, да ѹ҆чиня́тъ сiе` въ тече́нiи го́да, въ ко(с. сѳ҃_i)то́рый должны` бы́ти внѣ` ѻ҆бще́нiя. А҆́ще же въ тече́нiи го́да вознерадя́тъ ѡ҆чи́стити свое` дѣ́ло: то по́слѣ сегѡ` никакíй гла́съ ̾ѿ ни́хъ да не прiе́млется.

ПРА́ВИЛО ч҃а.

Постано́влено и҆ сiе`: а҆́ще кто` прiи́метъ кого́ либо и҆з̾ чꙋжа́гѡ монастыря`, и҆ восхо́щетъ произвести` є҆го` въ кли́ръ, и҆ли` поста́витъ и҆гꙋ́меномъ своегѡ` монастыря`: то є҆пíскопъ, та́къ постꙋпа́ющiй, да бꙋ́детъ ѹ҆дале́нъ ̾ѿ ѻ҆бще́нiя съ про́чими, и҆ да ѡ҆грани́чится ѡ҆бще́нiемъ то́кмѡ съ свое́ю па́ствою: а҆ то́тъ да не ѡ҆ста́нется ни кли́рiкомъ, ни и҆гꙋ́меномъ.

ПРА́ВИЛО ч҃в.

Ѡ҆предѣлено` и҆ сiе`: а҆́ще кото́рый є҆пíскопъ є҆ретiкѡ́въ, и҆ли` ꙗ҆зы́чникѡвъ, сро́дникѡвъ, и҆ли` не принадлежа́щихъ къ сродствꙋ`, ѡ҆ста́витъ наслѣ́дниками свои́ми, и҆ предпочте́тъ и҆`хъ цр҃кви: таково́мꙋ и҆ по сме́рти да бꙋ́детъ и҆зрече́на а҆на́ѳема, и҆ є҆гѡ` и҆́мя никогда` ̾ѿ i҆ере́євъ бж҃iихъ да не возно́сится. Да не мо́жетъ бы́ти є҆мꙋ` въ ѡ҆ правда́нiе и҆ то`, а҆́ще без̾ завѣща́нiя ̾ѿи́детъ. Поне́же бы́въ поста́вленъ є҆пíскопомъ, по прили́чiю, до́лженъ бы́лъ ѹ҆чини́ти назначе́нiе своегѡ` и҆мꙋ́щества, соѻбра́зное своемꙋ` зва́нiю.

ПРА́ВИЛО ч҃г.

Разсꙋждено` та́кожде ѡ҆ ̾ѿпꙋще́нiяхъ на свобо́дꙋ, быва́ющихъ въ це́ркви, да бꙋ́детъ проше́нiе къ царю`.

{комм.}Разꙋмѣ́ется проше́нiе ѡ҆ то́мъ, что́бы таковы́я ̾ѿпꙋщє́нiя ѹ҆тверждены` бы́ли ца́рскою вла́стiю.

ПРА́ВИЛО ч҃д.

Постано́влено и҆ сiе`: повсю́дꙋ на поля́хъ, и҆ въ вертогра́дахъ, поста́вленные ꙗ҆́кобы въ па́мять мꙋ́ченикѡвъ ѻ҆лтари`, при кото́рыхъ не ѡ҆ка́зывается положе́ннымъ никако́гѡ тѣ́ла и҆ли` ча́сти моще́й мꙋ́ченическихъ, да разрꙋ́шатся, а҆́ще возмо́жно, (с. с҃к) мѣ́стными є҆пíскопами. А҆́ще же не допꙋ́стятъ до сегѡ` нарѡ́дныя смятє́нiя: по кра́йней мѣ́рѣ да бꙋ́детъ вразꙋмля́емъ наро́дъ, что́бы не собира́лся въ ѻ҆́ныхъ мѣста́хъ, и҆ что́бы правомы́слящiе къ таковы́мъ мѣста́мъ не привя́зывались никаки́мъ сꙋевѣ́рiемъ. И҆ па́мять мꙋ́ченикѡвъ совсѣ́мъ да не соверша́ется, ра́звѣ а҆́ще гдѣ́ либо є҆́сть и҆ли` тѣ́ло, и҆ли` нѣ́кая ча́сть моще́й, и҆ли`, по сказа́нiю ̾ѿ вѣ́рной дре́вности пре́данномꙋ, и҆́хъ жили́ще, и҆ли` стяжа́нiе, и҆ли` мѣ́сто страда́нiя. А҆ ѻ҆лтари`, гдѣ́ бы то` ни бы́ло поста́вленные, по сновидѣ́нiямъ и҆ сꙋ́етнымъ ̾ѿкрове́нiямъ нѣ́которыхъ люде́й, да бꙋ́дꙋтъ всемѣ́рнѡ ̾ѿверга́емы.

ПРА́ВИЛО ч҃є.

Заблагоразсꙋждено` та́кожде, проси́ти ̾ѿ сла́внѣйшихъ царе́й, да и҆стребля́ются вся́кимъ ѻ҆́бразомъ ѡ҆ста́тки i҆дѡлопокло́нства, не то́кмѡ въ и҆звая́нiяхъ, но и҆ въ каки́хъ либо мѣста́хъ, и҆ли` ро́щахъ, и҆ли` древа́хъ.

ПРА́ВИЛО ч҃ѕ.

Всѣ́ми є҆пíскопами рече́но: а҆́ще заблагоразсꙋждено` бꙋ́детъ писа́ти нѣ́кiя гра̑маты на собо́рѣ: то достойночти́мый є҆пíскопъ, предсѣдя́щiй на се́мъ престо́лѣ, да благоволи́тъ ̾ѿ и҆́мени всѣ́хъ, ѡ҆ че́мъ разсꙋждено`, писа́ти и҆ подпи́сывати гра̑маты. Є҆ще́ же є҆пíскопамъ мѣстоблюсти́телямъ, кото́рыхъ до́лжно посла́ти въ а҆фрiка́нскiя ѻ҆́бласти, по дѣ́лꙋ ѡ҆ донатíстахъ, да бꙋ́дꙋтъ даны` гра̑маты, ѡ҆предѣля́ющыя си́лꙋ да́ннагѡ и҆`мъ порꙋче́нiя, ̾ѿ си́лы кото́рагѡ и҆ да не ̾ѿстꙋпа́ютъ.

ПРА́ВИЛО ч҃з.

Поели́кꙋ ѻ҆́бщее є҆́сть сiе` дѣ́ло, на кото́рое ны́нѣ ѡ҆брати́лъ внима́нiе бра́тъ и҆ сослꙋжи́тель на́шъ, да вѣ́даетъ ка́ждый и҆з̾ на́съ ѡ҆предѣле́нный є҆мꙋ` ̾ѿ бг҃а (с. ск҃а) чи́нъ, да поста́вленные по́слѣ дрꙋги́хъ ̾ѿдаю́тъ преимꙋ́щество поста́влєннымъ пре́жде, и҆ да не дерза́ютъ твори́ти что́ либо, не вня́въ во́лѣ и҆́хъ: сегѡ` ра́ди предлага́ю, что` прихо́дитъ мнѣ` на мы́сль: тѣ́хъ, кото́рые пренебрега́ютъ поста́вленныхъ пре́жде и҆́хъ, и҆ ꙗ҆вля́ютъ нѣ́кꙋю де́рзость, подоба́етъ всѣ́мъ собо́ромъ ѹ҆кроща́ти по прили́чiю. _Ксантíппъ, є҆пíскопъ пе́рвагѡ престо́ла нꙋмидíйскагѡ ре́къ: все` присꙋ́тствiе бра́тiй, вы́слꙋшавъ разсꙋжде́нiе бра́та и҆ сослꙋжи́теля на́шегѡ а҆ѵри́лiа, что` на сiе` ̾ѿвѣща́етъ; Дiатíмiй є҆пíскопъ ре́къ: что` мнѣ́нiями дре́внихъ ѡ҆предѣлено`, то` предлага́ется ва́шемꙋ согла́сiю: содержа́щееся въ дѣя́нiяхъ пре́жнихъ собо́рѡвъ карѳаге́нскiя цр҃кви, ва́шимъ согла́сiемъ вполнѣ` да подтверди́тся и҆ всѣ́ми да соблюда́ется. Всѣ` є҆пíскопы рекли`: се́й чи́нъ бы́лъ соблюда́емъ ̾ѿ ѻ҆тцє́въ и҆ ̾ѿ дре́внихъ, и҆ ̾ѿ на́съ, по и҆зволе́нiю бж҃iю, соблюда́емъ бꙋ́детъ. Но при се́мъ да сохраня́ется пра́во пе́рвенствꙋющихъ є҆пíскопѡвъ нꙋми́дiи и҆ маѵрiта́нiи, на ѡ҆снова́нiи нꙋмидíйскагѡ писменнохрани́лища и҆ спи́ска престо́лѡвъ. Пото́мъ ѹ҆го́дно бы́ло всѣ́мъ є҆пíскопамъ подписа́вшымъ ѡ҆предѣлє́нiя сегѡ` собо́ра, что́бы спи́сокъ престо́лѡвъ и҆ первонача́льное постановле́нiе нꙋмидíйское находи́лись и҆ ѹ҆ пе́рвагѡ престо́ла, и҆ въ митропо́лiи кѡнстантíнѣ.

ПРА́ВИЛО ч҃и.

Ѡ҆ кꙋодвꙋлтде́ѣ и҆ кентѷрiа́тѣ.

Ка́къ по проше́нiю сопе́рника є҆гѡ`, ѡ҆ представле́нiи є҆гѡ` на́шемꙋ собо́рꙋ, ѻ҆́нъ бы́въ вопроше́нъ, хо́щетъ ли и҆мѣ́ти дѣ́ло пред̾ є҆пíскопами, сперва` соглаша́лся, но въ дрꙋгíй де́нь ̾ѿвѣща́лъ, что` не хо́щетъ сегѡ`, и҆ ѹ҆дали́лся: то ѹ҆го́дно всѣ́мъ є҆пíскопамъ, да никто` не прiе́млетъ въ (с. ск҃в) ѻ҆бще́нiе сего` кꙋодвꙋлтде́а, доко́лѣ дѣ́ло є҆гѡ` не полꙋ́читъ ѡ҆конча́нiя. И҆́бо, пре́жде рѣше́нiя ѡ҆ не́мъ дѣ́ла, ̾ѿя́ти ѹ҆ негѡ` є҆пíскопство, не бы́ло бы ѹ҆го́дно никомꙋ` и҆з̾ хрiстiа́нъ.

ПРА́ВИЛО ч҃ѳ.

Ѡ҆ маѯiмiа́нѣ є҆пíскопѣ ваге́нскомъ разсꙋждено`: да по́шлются ̾ѿ собо́ра гра̑маты и҆ къ немꙋ` и҆ къ пасѡ́мымъ, дабы` ѻ҆́нъ ѡ҆ста́вилъ є҆пíскопство, а҆ ѻ҆ни` и҆ска́ли себѣ` дрꙋга́гѡ.

ПРА́ВИЛО р҃.

Заблагоразсꙋждено` и҆ сiе`: ̾ѿны́нѣ рꙋкополага́емые въ а҆фрiка́нскихъ ѻ҆́бластяхъ да полꙋча́ютъ ̾ѿ рꙋкополага́ющихъ гра̑маты, рꙋко́ю и҆́хъ подпи́санныя, съ ѡ҆значе́нiемъ ко́нсꙋла, то́ є҆сть го́да и҆ дня` рꙋкоположе́нiя, дабы` не возника́ло никако́гѡ сомнѣ́нiя ѡ҆ мла́дшихъ и҆ ста́ршихъ.

ПРА́ВИЛО р҃а.

Положено` и҆ сiе`: кто` хотя` є҆ди́ножды чита́лъ въ цр҃кви, то́тъ дрꙋго́ю цр҃ковiю да не прiе́млется въ кли́ръ.

ПРА́ВИЛО р҃в.

Всѣ` вы` со ѡ҆бѣща́нiемъ предполага́ли, что` до́лжно ка́ждомꙋ и҆з̾ на́съ во свое́мъ гра́дѣ, и҆ли` ѻ҆дномꙋ` ѻ҆со́бѡ, встꙋпи́ти въ сноше́нiе съ предводи́телями донатíстѡвъ, и҆ли` присоедини́ти къ себѣ` дрꙋга́го сосѣ́дняго є҆пíскопа, дабы` та́кожде встꙋпи́ти съ ни́ми въ сноше́нiе во вся́комъ гра́дѣ и҆ мѣ́стѣ, при посре́дствѣ нача́льствꙋющихъ и҆ли` пе́рвенствꙋющихъ въ тѣ́хъ мѣста́хъ. Всѣ́мъ ли сiе` ѹ҆го́дно, да возвѣсти́тся. Всѣ` є҆пíскопы рекли`: всѣ̑мъ ѹ҆го́дно.

ПРА́ВИЛО р҃г.

Є҆пíскопъ каѳолíческiя цр҃кви{Без̾ сомнѣ́нiя, а҆ѵри́лiй є҆пíскопъ карѳаге́нскiй, предсѣда́тельствꙋющiй на собо́рѣ.} ре́къ: приглаше́нiе, кото́рое ̾ѿ ва́шея че́стности до́лжно препровождено` (с. ск҃г) бы́ти къ донатíстамъ, благоволи́те вы́слꙋшати и҆ въ дѣя́нiя включи́ти, и҆ къ ни́мъ посла́ти, дабы` пото́мъ и҆ и҆́хъ ̾ѿвѣ́тъ чрез̾ ва́ши дѣя́нiя на́мъ ꙗ҆вле́нъ бы́лъ.

Зако́ннѡ встꙋпа́емъ съ ва́ми въ сноше́нiе, бы́въ по́сланы ̾ѿ зако́ннагѡ на́шегѡ собо́ра, жела́я возра́доватися ѡ҆ ва́шемъ и҆справле́нiи. Вѣ́даемъ бо любо́вь гд҃ⷭ҇а ре́кшагѡ: блаже́ни миротво́рцы, ꙗ҆́кѡ тíи сы́нове бж҃iи нарекꙋ́тся{Матѳ. гл. є҃ ст. ѳ҃.}. Воспомянꙋ́лъ ѻ҆́нъ та́кожде и҆ чрез̾ проро́ка, да є҆ще` и҆ не хотя́щымъ нарица́тися бра́тiями на́шими, глаго́лемъ мы`: бра́тiя на́ши є҆сте`. И҆ та́къ не долженствꙋ́ете вы` ѹ҆ничижи́ти сiе`, ̾ѿ ми́рныя любви` происходя́щее на́ше напомина́нiе. А҆́ще что` ̾ѿ и҆́стины и҆мѣ́ти мни́те, не ѹ҆сомни́теся защища́ти ѻ҆́ное: то́ є҆сть, собери́те ва́шъ собо́ръ, и҆збери́те и҆з̾ среды` ва́съ тѣ́хъ, котѡ́рымъ подоба́етъ ввѣ́рити дѣ́ло ѡ҆правда́нiя ва́шегѡ: да и҆ мы` возмо́жемъ то́жде сотвори́ти, то́ є҆сть, да и҆зберꙋ́тся ̾ѿ на́шегѡ собо́ра долженствꙋ́ющiе съ и҆́збранными и҆з̾ среды` ва́съ, въ и҆звѣ́стномъ мѣ́стѣ и҆ въ и҆звѣ́стное вре́мя, ми́рнѡ и҆зслѣ́довати все` подлежа́щее вопроше́нiю, и҆ ̾ѿдѣля́ющее ва́съ ̾ѿ на́шегѡ ѻ҆бще́нiя, и҆ по́мощiю гд҃ⷭ҇а бг҃а на́шегѡ, хотя` по́зднѡ да воспрiи́метъ коне́цъ закоснѣ́вшее заблꙋжде́нiе, дабы` послѣ́дꙋя человѣ́ческомꙋ ѹ҆вѣре́нiю немощны́я дꙋ́шы и҆ несвѣ́дꙋщыя не поги́бли въ святота́тственномъ раздѣле́нiи. И҆́бо а҆́ще бра́тски сiе` прiи́мете, то и҆́стина ѹ҆до́бнѡ ꙗ҆ви́тся: а҆́ще же сiе` сотвори́ти не восхо́щете, то невѣ́рiе ва́ше тотча́съ позна́ется.

И҆ по прочте́нiи сегѡ` ѻ҆бразца` всѣ` є҆пíскопы рекли`: соверше́ннѡ согла́сны, да бꙋ́детъ та́кѡ.

(с. ск҃д)

ПРА́ВИЛО р҃д.

Наставле́нiе бра́тiямъ, ѳеа́сiю и҆ є҆ѵо́дiю, назна́чєннымъ посла́нниками ̾ѿ карѳаге́нскагѡ собо́ра къ сла́внѣйшымъ и҆ благочести́вѣйшымъ самоде́ржцамъ. Когда`, съ по́мощiю гд҃ⷭ҇нею, пристꙋ́пятъ ѻ҆ни` къ благочести́вѣйшымъ царя́мъ: тогда` ꙗ҆вя́тъ и҆`мъ, каки́мъ ѻ҆́бразомъ, во вре́мя собо́ра проше́дшагѡ лѣ́та, старѣ́йшины донатíстѡвъ съ по́лною свобо́дою, посре́дствомъ гра́дскихъ и҆звѣще́нiй приглашены` бы́ли собра́тися, дабы`, а҆́ще и҆мѣ́ютъ дерзнове́нiе защища́ти свое` мнѣ́нiе, и҆збра́ли нѣ́которыхъ спосо́бныхъ ̾ѿ числа` своегѡ`, ми́рнѡ состяза́лися съ на́ми, и҆ кро́тостiю хрiстiа́нскою несомнѣ́ннѡ показа́ли, а҆́ще что́ либо ̾ѿ и҆́стины ѹ҆ себя` ѹ҆держа́ли, дабы` таки́мъ ѻ҆́бразомъ каѳолíческая и҆́скренность, и҆здре́вле сiя́вшая въ проше́дшыя времена`, и҆ ны́нѣ подо́бнѡ дозна́на была` и҆з̾ замѣша́тельства и҆ ѹ҆по́рства противорѣ́чꙋщихъ. Но поели́кꙋ ѻ҆ни` почти` ѡ҆б̾я́ты бы́ли безнаде́жностiю: то ничегѡ` не дерзнꙋ́ли ̾ѿвѣща́ти. И҆ та́къ поели́кꙋ є҆пíскопскiй и҆ ми́рный ѻ҆́бразъ дѣ́йствованiя на таковы́хъ ѹ҆потребле́нъ, и҆ ѻ҆ни`, не мо́гши ̾ѿвѣща́ти про́тивъ и҆́стины, ѡ҆брати́лись къ нелѣ́пымъ наси́льствєннымъ постꙋ́пкамъ, та́къ, что` мно́гихъ є҆пíскопѡвъ и҆ мно́гихъ приче́тникѡвъ [да ѹ҆молчи́мъ ѡ҆ мiря́нахъ] стѣсни́ли навѣ́тами, и҆ въ нѣ́котѡрыя цр҃кви вто́ргнꙋлися, а҆ въ дрꙋгíя та́кожде вто́ргнꙋтися покꙋша́лись: то ца́рскомꙋ человѣколю́бiю предлежи́тъ попещи́ся, что́бы каѳолíческая цр҃ковь, благоче́стною ѹ҆тро́бою хр҃ⷭ҇тꙋ` и҆`хъ роди́вшая, и҆ крѣ́постiю вѣ́ры воспита́вшая, была` ѡ҆граждена` и҆́хъ промышле́нiемъ: дабы` въ благочести́выя и҆́хъ времена`, дерзнове́нные человѣ́ки не возгоспо́дствовали над̾ безси́льнымъ на(с. ск҃є)ро́домъ, посре́дствомъ нѣ́коегѡ стра́ха, когда` не мо́гꙋтъ соврати́ти ѻ҆́ный посре́дствомъ ѹ҆бѣжде́нiя. И҆́бо и҆звѣ́стно и҆ многокра́тнѡ зако́нами ѡ҆глашено`, что` произво́дятъ гнꙋ́сныя скѡ́пища ̾ѿщепе́нцєвъ. Сiе` многокра́тнѡ и҆ повелѣ́нiями сами́хъ вышерече́нныхъ благочести́вѣйшихъ самоде́ржцєвъ ѡ҆сꙋждено` бы́ло. Посемꙋ` про́тивъ неи́стовства ѻ҆́ныхъ ̾ѿщепе́нцєвъ про́симъ да́ти на́мъ бж҃е́ственнꙋю по́мощь, не неѻбыча́йнꙋю и҆ не чꙋ́ждꙋю ст҃ы́мъ писа́нiямъ. И҆́бо а҆п҃ⷭ҇лъ па́ѵелъ, ка́къ пока́зано въ и҆́стинныхъ дѣя́нiяхъ а҆п҃ⷭ҇льскихъ, соꙋмышле́нiе люде́й безчи́нныхъ препобѣди́лъ во́инскою по́мощiю. И҆ та́къ мы` про́симъ ѡ҆ то́мъ, да неꙋкосни́тельнѡ пода́стся ѡ҆хране́нiе каѳолíческимъ чина́мъ цр҃кве́й въ ка́ждомъ гра́дѣ и҆ ра́зныхъ мѣста́хъ, прилежа́щихъ къ ка́ждомꙋ владѣ́нiю. Подоба́етъ вкꙋ́пѣ ѡ҆ се́мъ проси́ти благочести́вѣйшихъ самоде́ржцєвъ, да соблюда́ютъ зако́нъ, и҆́зданный блаже́нныя па́мяти ѻ҆тце́мъ и҆́хъ ѳеодо́сiемъ, ѡ҆ взы́скиванiи по десяти` фꙋ́нтѡвъ зла́та, съ є҆ретiкѡ́въ рꙋкополага́ющихъ и҆ рꙋкополага́емыхъ, та́кожде и҆ съ владѣ́льцєвъ, ѹ҆ кото́рыхъ бꙋ́детъ ѹ҆смо́трено собра́нiе и҆́хъ. Прито́мъ да повеля́тъ подтверди́ти ѻ҆́ный зако́нъ, съ распростране́нiемъ си́лы є҆гѡ` на тѣ́хъ, проти́вꙋ навѣ́тѡвъ ко́ихъ предста́вили свидѣ́тєльства прiя́вшiе попече́нiе ѡ҆ каѳолíческой цр҃кви, дабы`, по кра́йней мѣ́рѣ си́мъ стра́хомъ, ̾ѿ произведе́нiя раско́лѡвъ и҆ ̾ѿ є҆ретíческагѡ безꙋ́мiя, ѹ҆де́ржаны бы́ли, ̾ѿлага́ющiе свое` ѡ҆чище́нiе и҆ и҆справле́нiе при помышле́нiи ѡ҆ вѣ́чномъ наказа́нiи. Є҆ще` и҆ ѡ҆ то́мъ подоба́етъ проси́ти, да бꙋ́детъ благоче́стiемъ и҆́хъ возѡбновле́нъ до ны́нѣ сꙋществꙋ́ющiй зако́нъ, кото́рый ̾ѿе́млетъ ѹ҆ є҆ретiкѡ́въ пра́во взима́ти что́ либо, и҆ли` (с. ск҃ѕ) при рꙋкоположе́нiяхъ, и҆ли` по завѣща́нiямъ, и҆ли` ѡ҆ставля́ти, и҆ про́стѡ рещи`, ѹ҆ ѡ҆слѣпле́нныхъ безꙋ́мнымъ свои́мъ предꙋбѣжде́нiемъ, и҆ хотя́щихъ пребыва́ти въ заблꙋжде́нiи донатíстѡвъ, да ̾ѿи́мется вла́сть и҆ли` ѡ҆ставля́ти что́ либо, и҆ли` взима́ти со́бственное. А҆ тѣ́мъ, кото́рые помышле́нiемъ ѡ҆ є҆дине́нiи и҆ ми́рѣ восхотя́тъ и҆спра́вити себе`, да бꙋ́детъ разрѣшено`, и҆ при сꙋществова́нiи такова́гѡ зако́на, полꙋча́ти наслѣ́дiе, хотя` вы` что` въ да́ръ и҆ли` въ наслѣ́дiе доста́лось и҆`мъ є҆ще` тогда`, ка́къ ѻ҆ни` находи́лись въ є҆ретíческомъ заблꙋжде́нiи, за и҆зключе́нiемъ впро́чемъ тѣ́хъ, кото́рые по призыва́нiи къ сꙋдꙋ`, почли` нꙋ́жнымъ прейти` къ каѳолíческой цр҃кви. И҆́бо ѡ҆ таковы́хъ полага́ти до́лжно, ꙗ҆́кѡ не по стра́хꙋ небе́снагѡ сꙋда`, но по а҆лка́нiю земны́я вы́годы пожела́ли каѳолíческагѡ є҆дине́нiя. Све́рхъ же всегѡ` сегѡ` потре́бна по́мощь ̾ѿ власте́й ка́ждыя ѻ҆́бласти. Но и҆ а҆́ще и҆но́е что` ѹ҆смо́трятъ мѣстоблюсти́тели, споспѣшествꙋ́ющее церко́вной по́льзѣ: сiе` дѣ́лати и҆ соверша́ти дае́мъ полномо́чiе.

ПРА́ВИЛО р҃є.

Поне́же въ карѳаге́нѣ то́кмѡ соверши́лось є҆дине́нiе, то да по́шлются гра̑маты къ нача́льствꙋющымъ, да и҆ въ про́чихъ є҆па́рхiахъ и҆ гра́дахъ повеля́тъ сíи нача́льствꙋющiе прилага́ти тща́нiе ѡ҆ є҆дине́нiи. Ѿ карѳаге́нскiя цр҃кви, и҆́менемъ всея` а҆́фрiки, да по́шлется къ ца́рской пала́тѣ въ гра́матахъ є҆пíскопѡвъ благодаре́нiе за ̾ѿринове́нiе донатíстѡвъ.

ПРА́ВИЛО р҃ѕ.

Ѡ҆ то́мъ, ꙗ҆́кѡ не бы́ти ѻ҆́бщемꙋ и҆ всецѣ́ломꙋ собо́рꙋ, ра́звѣ по нꙋ́ждѣ.

Разсꙋждено`, ꙗ҆́кѡ не є҆́сть неѡбходи́мо, впре́дь є҆жего́днѡ ѹ҆трꙋжда́ти бра́тiю: (с. ск҃з) но когда` потре́бꙋетъ ѻ҆́бщая, то́ є҆сть всея` а҆́фрiки нꙋ́жда, по гра́матамъ, ̾ѿкꙋ́да либо приходя́щымъ къ семꙋ` престо́лꙋ, тогда` подоба́етъ бы́ти собо́рꙋ въ то́й ѻ҆́бласти, въ кото́рꙋю призове́тъ потре́бность и҆ ѹ҆до́бство. Дѣла́ же не ѻ҆́бщыя, да сꙋ́дятся въ ка́ждой ѻ҆́бласти по́рознь.

ПРА́ВИЛО р҃з.

Ѡ҆ возбране́нiи переноси́ти дѣла` ̾ѿ сꙋде́й доброво́льнѡ и҆́збранныхъ.

А҆́ще слꙋчи́тся перенесе́нiе дѣ́ла въ вы́сшiй сꙋ́дъ, и҆ недово́льный пе́рвымъ рѣше́нiемъ и҆збере́тъ сꙋде́й, кꙋ́пнѡ же съ ни́мъ и҆ то́тъ, про́тивъ кото́рагѡ тре́бꙋетъ ѻ҆́нъ но́вагѡ сꙋда`: то по́слѣ сегѡ` ни кото́ромꙋ и҆з̾ ни́хъ да не бꙋ́детъ позво́лено перенесе́нiе дѣ́ла въ и҆́ный сꙋ́дъ.

ПРА́ВИЛО р҃и.

Ѡ҆ церко́вныхъ и҆сполни́теляхъ.

Кромѣ` сегѡ` заблагоразсꙋждено` проси́ти, да и҆зберꙋ́тся пя́ть по всѣ́мъ нꙋ́ждамъ церкѡ́внымъ и҆сполни́телей, кото́рые да распредѣля́тся по ра́знымъ ѻ҆́бластямъ.

{комм.}До́лжность и҆сполни́телей, вѣроя́тнѡ, состоя́ла въ настоя́нiи, что́бы ѡ҆предѣлє́нiя нача́льства и҆ сꙋда`, не ѡ҆става́лись без̾ и҆сполне́нiя, по ѹ҆клоне́нiю и҆ли` ѹ҆по́рствꙋ.

ПРА́ВИЛО р҃ѳ.

Є҆ще` заблагоразсꙋждено`, что́бы ̾ѿправля́емые ̾ѿ и҆́мени всѣ́хъ є҆па́рхiй посла́нники, вiке́нтiй и҆ фꙋртꙋнатiа́нъ, проси́ли пресла́вныхъ царе́й, да бꙋ́детъ позво́лено ѹ҆чреди́ти ѹ҆че́ныхъ є҆кдíкѡвъ, кото́рые и҆мѣ́ли бы свое́ю ѡ҆бя́занностiю дѣ́йствованiе въ защище́нiи дѣ́лъ: и҆ кото́рые бы, ꙗ҆́кѡ свяще́нники є҆па́рхiй, прiя́вшiе на себя` хода́тайство по дѣла́мъ цр҃кве́й, свобо́днѡ могли`, когда` нꙋ́жда потре́бꙋетъ, входи́ти въ присꙋ́тствiе сꙋди́лищъ для ѡ҆проверже́нiя возраже́нiй, и҆ (с. ск҃и) для представле́нiя тогѡ`, что` нꙋ́жно.

{комм.}Се́й до́лжности є҆кдíка ча́стiю со̾ѿвѣ́тствꙋетъ ны́нѣшняя до́лжность дꙋхо́внагѡ депꙋта́та при дѣлопроизво́дствахъ по вѣ́домствꙋ свѣ́тскомꙋ.

ПРА́ВИЛО р҃_i.

Разсꙋждено`, да и҆мѣ́ютъ свобо́дное мѣстоблюсти́тельство и҆́збранные мѣстоблюсти́тели, по́сланные къ ца́рской пала́тѣ.

{комм.}То́ є҆сть: и҆`мъ позволя́ется представля́ть не то́лькѡ и҆́меннѡ повелѣ́нное и҆`мъ ̾ѿ собо́ра, но и҆ дрꙋго́е, что` призна́ютъ поле́знымъ для цр҃кви.

ПРА́ВИЛО ра҃_i.

Постано́влено и҆ сiе`: наро́дꙋ никогда` не и҆мѣ́вшемꙋ своегѡ` є҆пíскопа ̾ѿню́дь не дава́ти є҆го`, ра́звѣ по рѣше́нiю всегѡ` собо́ра ка́ждыя ѻ҆́бласти, и҆ пе́рвенствꙋющагѡ є҆пíскопа, и҆ съ согла́сiя тогѡ` є҆пíскопа, въ предѣ́лѣ ко́егѡ состоя́ла ѻ҆́ная цр҃ковь.

ПРА́ВИЛО рв҃_i.

Ѡ҆ наро́дѣ и҆ є҆па́рхiахъ, ѡ҆браща́ющихся ̾ѿ донатíстѡвъ.

Наро́дъ ѡ҆браща́ющiйся ̾ѿ донатíстѡвъ, и҆мѣ́ющiй є҆пíскопа, поста́вленнаго без̾ соизволе́нiя собо́ра, да бꙋ́детъ несомнѣ́ннѡ ѹ҆досто́енъ и҆мѣ́ти ѻ҆́наго. Наро́дꙋ и҆мѣ́вшемꙋ є҆пíскопа, и҆ по сме́рти є҆гѡ` не восхотѣ́вшемꙋ и҆мѣ́ти своего` є҆пíскопа, но жела́ющемꙋ по прили́чiю присоедини́тися къ є҆па́рхiи и҆но́гѡ кото́рагѡ либо є҆пíскопа, не до́лжно въ се́мъ ̾ѿка́зывати. Предложено` и҆ сiе`: ꙗ҆́кѡ є҆пíскопы, пре́жде ѡ҆б̾явле́нiя ца́рскагѡ зако́на ѡ҆ є҆дине́нiи, ѡ҆брати́вшiе къ каѳолíческой вѣ́рѣ наро́дъ, кото́рый и҆мѣ́ли въ ѹ҆правле́нiи, должны` ѹ҆держа́ти вла́сть над̾ ѻ҆́нымъ. По зако́нѣ же є҆дине́нiя и҆ да́лѣе, надлежи́тъ всѣ` цр҃кви и҆ предѣ́лы и҆́хъ, и҆ всѣ`, какíя мо́гꙋтъ ѡ҆каза́ться принадле́жнѡсти, зако́ннѡ при(с. ск҃ѳ)сво́єнныя тѣ́мъ цр҃квамъ, да бꙋ́дꙋтъ ѹ҆тверждены` за каѳолíческими є҆пíскопами, находя́щимися въ тѣ́хъ мѣста́хъ, кото́рыми завладѣ́ли є҆ретiки`, въ послѣ́дствiи ѡ҆браща́ющiеся къ каѳолíческой вѣ́рѣ и҆ли` не ѡ҆браща́ющiеся. И҆ а҆́ще что` нѣ́кiи и҆з̾ ни́хъ присво́или себѣ`, по́слѣ ца́рскагѡ зако́на, то` долженствꙋ́етъ возвращено` бы́ти.

ПРА́ВИЛО рг҃_i.

Маѵре́нтiй є҆пíскопъ ре́къ: прошꙋ`, да назна́чатся сꙋдiя́ми: святѣ́йшiй ста́рецъ ѯантíппъ, святѣ́йшiй а҆ѵгꙋстíнъ, флорентíнъ, ѳеа́сiй, самѱѵ́хiй, секꙋ́ндъ и҆ поси́дiй: повели́те, что́бы сiе` ѡ҆предѣлено` бы́ло для меня`. Святы́й собо́ръ согласи́лся на назначе́нiе проси́мыхъ сꙋде́й, про́чихъ же сꙋде́й нꙋ́жныхъ въ дополне́нiе ѹ҆законе́ннагѡ числа`, ста́рецъ ѯантíппъ предоста́витъ и҆збра́ти сами́мъ ста́рцамъ но́выя герма́нiи.

{комм.}По жа́лобѣ ста́рцєвъ но́выя герма́нiи, на є҆пíскопа маѵре́нтiа, ѻ҆́нъ предста́лъ собо́рꙋ для сꙋда`, а҆ ѡ҆бвини́тели не ꙗ҆ви́лись. Собо́ръ призна́лъ и҆`хъ досто́йными ѡ҆сꙋжде́нiя: но по кро́тости цр҃ко́вной не произнеся` ѻ҆́нагѡ, назна́чилъ сꙋ́дъ въ ѻ҆́бласти, къ кото́рой принадлежи́тъ є҆пíскопъ. По семꙋ` ча́стномꙋ дѣ́лꙋ, собо́ръ и҆зрека́етъ пра́вило, пока́зывающее ѻ҆́бразъ составле́нiя сꙋда` над̾ є҆пíскопомъ.

ПРА́ВИЛО рд҃_i.

Ѡ҆ ѹ҆миротворе́нiи цр҃кви ри́мскiя и҆ а҆леѯандрíйскiя.

Ѡ҆ разногла́сiи цр҃кве́й ри́мскiя и҆ а҆леѯандрíйскiя заблагоразсꙋждено` писа́ти къ святѣ́йшемꙋ па́пѣ i҆нноке́нтiю, дабы` ѻ҆́бѣ цр҃кви взаи́мнѡ храни́ли ми́ръ, кото́рый гд҃ⷭ҇ь заповѣ́даетъ.

ПРА́ВИЛО рє҃_i.

Постано́влено: да по є҆ѵа́нгельскомꙋ и҆ а҆по́стольскомꙋ ѹ҆че́нiю, ни ѡ҆ста́вленный жено́ю, ни ̾ѿпꙋ́щенная мꙋ́жемъ, не сочетава́ются съ дрꙋги́мъ лице́мъ: но и҆ли` та́кѡ да пребыва́ютъ, и҆ли` да примиря́тся междꙋ` собо́ю. А҆́ще пренебрегꙋ́тъ сiе`: да бꙋ́дꙋтъ понꙋж(с. с҃л)дены` къ покая́нiю. Потре́бно є҆́сть проси́ти, да бꙋ́детъ и҆́зданъ ѡ҆ се́мъ дѣ́лѣ ца́рскiй зако́нъ.

ПРА́ВИЛО рѕ҃_i.

Постано́влено и҆ сiе`: да соверша́ются всѣ́ми ѹ҆тверждє́нныя на собо́рѣ моли̑твы, ка́къ предначина́тєльныя, та́къ и҆ ѡ҆конча́тєльныя, и҆ моли̑твы предложе́нiя, и҆ли` возложе́нiя рꙋ́къ: и҆ ̾ѿню́дь да не прино́сятся никогда` и҆ны́я вопреки` вѣ́рѣ, но да глаго́лются тѣ`, ко́и просвѣще́ннѣйшими со́браны.

ПРА́ВИЛО рз҃_i.

Постано́влено: да, а҆́ще кто` и҆з̾ кли́ра бꙋ́детъ проси́ти ̾ѿ царя` разсмотре́нiя ѡ҆ себѣ`, въ свѣ́тскихъ сꙋди́лищахъ, лише́нъ бꙋ́детъ своея` че́сти. А҆́ще же бꙋ́детъ ̾ѿ царя` проси́ти себѣ` сꙋда` є҆пíскопскагѡ: ̾ѿню́дь да не возбрани́тся є҆мꙋ` сiе`.

ПРА́ВИЛО ри҃_i.

Кто` бы́въ ̾ѿлꙋче́нъ ̾ѿ ѻ҆бще́нiя церко́внагѡ въ а҆́фрiкѣ, прокра́дется въ замо́рскiя стра́ны, дабы` при́нятꙋ бы́ти въ ѻ҆бще́нiе, то́тъ подве́ргнется и҆зверже́нiю и҆з̾ кли́ра.

ПРА́ВИЛО рѳ҃_i.

Положено`: а҆́ще кто` восхо́щетъ и҆ти` къ ца́рской пала́тѣ: то да бꙋ́детъ сiе` ѡ҆зна́чено въ ̾ѿпꙋсти́тельной гра́матѣ, посыла́емой къ цр҃кви ри́мской, и҆ ̾ѿтꙋ́да є҆ще` да полꙋ́читъ ̾ѿпꙋсти́тельнꙋю гра́матꙋ къ пала́тѣ. Тогѡ` ра́ди, а҆́ще полꙋчи́вшiй ̾ѿпꙋсти́тельнꙋю гра́матꙋ до ри́ма то́лькѡ, ѹ҆молча́въ ѡ҆ нꙋ́ждѣ, побꙋжда́ющей є҆го` и҆ти` къ пала́тѣ, восхо́щетъ пря́мѡ ̾ѿити` къ пала́тѣ: да бꙋ́детъ ̾ѿлꙋче́нъ ̾ѿ ѻ҆бще́нiя. А҆́ще же, та́мѡ въ ри́мѣ, ̾ѿкро́ется внеза́пная нꙋ́жда ̾ѿити` къ пала́тѣ: да ꙗ҆ви́тъ ѻ҆́нꙋю нꙋ́ждꙋ є҆пíскопꙋ ри́мскомꙋ, и҆ да принесе́тъ писа́нiе тогѡ́ же ри́мскагѡ є҆пíскопа. Въ ̾ѿпꙋсти́тельныя гра̑маты, ̾ѿ пе́рвенствꙋющихъ, и҆ли` ̾ѿ каки́хъ бы то` ни (с. сл҃а) бы́ло є҆пíскопѡвъ, дава́ємыя кли́рiкамъ и҆́хъ, да вно́сится де́нь па́схи. А҆́ще же де́нь па́схи тогѡ` лѣ́та є҆ще` не и҆звѣ́стенъ: то де́нь па́схи проше́дшагѡ го́да да бꙋ́детъ ѡ҆зна́ченъ, подо́бнѡ томꙋ`, ка́къ въ свѣ́тскихъ за́писяхъ ѻ҆быкнове́ннѡ пи́шется: по́слѣ ко́нсꙋльства.

ПРА́ВИЛО р҃к.

Разсꙋждено` и҆ сiе`: посыла́емые ̾ѿ сегѡ` честна́гѡ собо́ра мѣстоблюсти́тели да про́сятъ пресла́вныхъ царе́й ѡ҆ все́мъ, что` ѹ҆смо́трятъ поле́знымъ проти́вꙋ донатíстѡвъ и҆ є҆́ллинѡвъ, и҆ проти́вꙋ сꙋевѣ́рiй и҆́хъ.

ПРА́ВИЛО рк҃а.

На се́мъ собо́рѣ положено`, да не настои́тъ є҆ди́нъ є҆пíскопъ на рѣше́нiе своегѡ` сꙋда`.

Дѣя̑нiя сегѡ` собо́ра не напи́саны потомꙋ`, что` разсмо́трены бы́ли дѣла` мѣ́стныя, а҆ не ѻ҆́бщыя.

{комм.}Карѳаге́нскiй собо́ръ, кото́рагѡ пра̑вила здѣ́сь совокꙋ́плены, не є҆́сть є҆диновре́менный собо́ръ, но цѣ́пь є҆жего́дныхъ собо́рѡвъ а҆фрiка́нскихъ є҆пíскопѡвъ, де́ржанныхъ под̾ предсѣда́тельствомъ карѳаге́нскагѡ є҆пíскопа. Въ се́мъ пра́вилѣ ѹ҆каза́нiе на се́й собо́ръ ̾ѿно́сится къ годово́мꙋ собо́рꙋ, бы́вшемꙋ въ седмо́е ко́нсꙋльство i҆мпера́тора ѡ҆но́рiа. По кра́ткости за́писи пра́вило сiе` не дово́льнѡ ꙗ҆́сно. Валсамо́нъ полага́етъ, что` ѻ҆но` должно` бы́ть понима́емо согла́снѡ съ а҃_i пра́виломъ сегѡ́ же карѳаге́нскагѡ собо́ра, то́ є҆сть, когда` пресвѵ́теръ ѡ҆сꙋжде́нный є҆пíскопомъ жа́лꙋется на сiе` ѡ҆сꙋжде́нiе: тогда` є҆пíскопъ не до́лженъ ѻ҆ди́нъ настоя́ть на свое` рѣше́нiе и҆ ѹ҆си́ливаться и҆спо́лнить ѻ҆́ное, а҆ до́лженъ предоста́вить дѣ́ло разсмотрѣ́нiю по́лнагѡ собо́ра, и҆ли` ѡ҆предѣле́ннагѡ въ пра́вилахъ числа` є҆пíскопѡвъ.

ПРА́ВИЛО рк҃в.

Въ сiе` вре́мя{Го́домъ и҆ли` двꙋмя` по́зже вре́мени пред̾идꙋ́щагѡ пра́вила.} и҆́зданъ зако́нъ, да по свобо́дномꙋ произволе́нiю, ка́ждый воспрiе́млетъ по́двигъ хрiстiа́нства.

ПРА́ВИЛО рк҃г.

Собо́ръ проти́вꙋ є҆́реси пела́гiа и҆ келестíа.

(с. сл҃в) При́знано всѣ́ми є҆пíскопами карѳаге́нскiя цр҃кви, предста́вшими на святы́й собо́ръ, кото́рыхъ и҆мена` и҆ подписа́нiя внесены` въ дѣя̑нiя, ꙗ҆́кѡ а҆да́мъ не сме́ртнымъ ̾ѿ бг҃а сотворе́нъ. А҆́ще же кто` рече́тъ, ꙗ҆́кѡ а҆да́мъ, первозда́нный человѣ́къ, сотворе́нъ сме́ртнымъ, та́къ что`, хотя́ бы согрѣши́лъ, хотя́ бы не согрѣши́лъ, ѹ҆́меръ бы тѣ́ломъ, то́ є҆сть вы́шелъ бы и҆з̾ тѣ́ла, не въ наказа́нiе за грѣ́хъ, но по неѡбходи́мости є҆стества`: да бꙋ́детъ а҆на́ѳема.

ПРА́ВИЛО рк҃д.

Ѡ҆предѣлено` та́кожде: кто` ̾ѿверга́етъ нꙋ́ждꙋ креще́нiя ма́лыхъ и҆ новорожде́нныхъ ̾ѿ ма́терней ѹ҆тро́бы дѣте́й, и҆ли` говори́тъ, что` хотя` ѻ҆ни` и҆ креща́ются во ̾ѿпꙋще́нiе грѣхѡ́въ, но ̾ѿ прароди́тельскагѡ а҆да́мова грѣха` не заи́мствꙋютъ ничегѡ`, что` надлежа́ло бы ѡ҆мы́ти ба́нею пакибытiя` [и҆з̾ чегѡ` слѣ́довало бы, что` ѻ҆́бразъ креще́нiя во ̾ѿпꙋще́нiе грѣхѡ́въ ѹ҆потребля́ется над̾ ни́ми не въ и҆́стинномъ, но въ ло́жномъ значе́нiи], то́тъ да бꙋ́детъ а҆на́ѳема. И҆́бо рече́нное а҆п҃ⷭ҇ломъ: є҆ди́нѣмъ человѣ́комъ грѣ́хъ въ мíръ вни́де, и҆ грѣхо́мъ сме́рть: и҆ та́кѡ [сме́рть] во вся` человѣ́ки вни́де, въ не́мъ же вси` согрѣши́ша{Рим. є҃, в҃_i.}, подоба́етъ разꙋмѣ́ти не и҆на́кѡ, ра́звѣ ка́къ всегда` разꙋмѣ́ла каѳолíческая цр҃ковь, повсю́дꙋ разлiя́нная и҆ распростране́нная. И҆́бо по семꙋ` пра́вилꙋ вѣ́ры и҆ младе́нцы, никаки́хъ грѣхѡ́въ са́ми собо́ю содѣва́ти є҆ще` не могꙋ́щiе, креща́ются и҆́стиннѡ во ̾ѿпꙋще́нiе грѣхѡ́въ, да чрез̾ пакирожде́нiе ѡ҆чи́стится въ ни́хъ то`, что` ѻ҆ни` за́няли ̾ѿ ве́тхагѡ рожде́нiя.

ПРА́ВИЛО рк҃є.

Ѡ҆предѣлено` та́кожде: а҆́ще кто` рече́тъ, ꙗ҆́кѡ бла(с. сл҃г)года́ть бж҃iя, кото́рою ѡ҆пра́вдываются въ i҆и҃сѣ хр҃ⷭ҇тѣ` гд҃ⷭ҇ѣ на́шемъ, дѣйстви́тельна къ є҆ди́номꙋ то́кмѡ ̾ѿпꙋще́нiю грѣхѡ́въ ѹ҆же` содѣ́янныхъ, а҆ не подае́тъ све́рхъ тогѡ` по́мощи, да не содѣва́ются и҆ны́е грѣхи`, таковы́й да бꙋ́детъ а҆на́ѳема. Jа҆́кѡ бл҃года́ть бж҃iя не то́кмѡ подае́тъ зна́нiе, что` подоба́етъ твори́ти, но є҆ще` вдыха́етъ въ на́съ любо́вь, да возмо́жемъ и҆ и҆спо́лнити, что` позна́емъ.

ПРА́ВИЛО рк҃ѕ.

Та́кожде, а҆́ще кто` рече́тъ, ꙗ҆́кѡ та́ же благода́ть бж҃iя, ꙗ҆́же ѡ҆ i҆и҃сѣ хр҃ⷭ҇тѣ` гд҃ⷭ҇ѣ на́шемъ, вспомоществꙋ́етъ на́мъ, къ томꙋ` то́кмѡ, что́бы не согрѣша́ти, поели́кꙋ є҆́ю ̾ѿкрыва́ется и҆ ꙗ҆вля́ется на́мъ позна́нiе грѣхѡ́въ, да зна́емъ, чегѡ` до́лжно и҆ска́ти, и҆ ̾ѿ чегѡ` ѹ҆клоня́тися, но что` є҆́ю не подае́тся на́мъ любо́вь и҆ си́ла къ дѣ́ланiю тогѡ`, что` мы` позна́ли до́лжнымъ твори́ти: таковы́й да бꙋ́детъ а҆на́ѳема. И҆́бо когда` а҆п҃ⷭ҇толъ глаго́летъ: ра́зꙋмъ кичи́тъ, а҆ любы` созида́етъ{а҃ кор. гл. и҃, ст. а҃.}: то весьма` нечести́во бы́ло бы вѣ́рити, ꙗ҆́кѡ къ киче́нiю на́шемꙋ и҆мѣ́емъ благода́ть бж҃iю, а҆ къ созида́нiю не и҆мѣ́емъ: тогда` ка́къ и҆ то` и҆ дрꙋго́е є҆́сть да́ръ бж҃iй, и҆ зна́нiе, что` подоба́етъ твори́ти, и҆ любо́вь къ добрꙋ`, кото́рое подоба́етъ твори́ти, дабы` при созида́ющей любви` не мо́гъ кичи́ти ра́зꙋмъ. И҆́бо ка́къ ̾ѿ бг҃а напи́сано: ѹ҆ча́й человѣ́ка ра́зꙋмꙋ{ѱал. ч҃г, ст. _i҃.}: та́кожде напи́сано и҆ сiе`: любы` ̾ѿ бг҃а є҆́сть{а҃ i҆ѡа́н. гл. д҃, ст. з҃.}.

ПРА́ВИЛО рк҃з.

Ѡ҆предѣлено` та́кожде: а҆́ще кто` рече́тъ, ꙗ҆́кѡ благода́ть ѡ҆правда́нiя на́мъ дана` ра́ди тогѡ`, дабы` возмо́жное къ и҆сполне́нiю по свобо́дномꙋ произволе́нiю, ѹ҆до́бнѣе и҆сполня́ли (с. сл҃д) мы` чрез̾ благода́ть, та́къ ка́къ бы и҆ не прiя́въ благода́ти бж҃iей, мы` хотя` съ неꙋдо́бствомъ, ѻ҆дна́кѡ могли` и҆ без̾ нея` и҆спо́лнити бж҃е́ствєнныя за́пѡвѣди: таковы́й да бꙋ́детъ а҆на́ѳема. И҆́бо ѡ҆ плода́хъ за́повѣдей не ре́къ гд҃ⷭ҇ь: без̾ мене` неꙋдо́бнѡ мо́жете твори́ти, но ре́къ: без̾ мене` не мо́жете твори́ти ничесѡ́же{I҆ѡа́н. гл. є҃_i, ст. є҃.}.

ПРА́ВИЛО рк҃и.

Та́кожде ѡ҆предѣлено` ̾ѿноси́тельнѡ и҆зрече́нiя свята́гѡ i҆ѡа́нна а҆п҃ⷭ҇тола: а҆́ще рече́мъ, ꙗ҆́кѡ грѣха` не и҆́мамы, себе` прельща́емъ, и҆ и҆́стины нѣ́сть въ на́съ{а҃ i҆ѡа́н. гл. а҃, ст. и҃. }. Кто` до́лжнымъ возмни́тъ разꙋмѣ́ти сiе` та́кѡ, ꙗ҆́кѡ рече́тъ: смиренномꙋ́дрiя ра́ди не подоба́етъ глаго́лати, ꙗ҆́кѡ грѣха` не и҆́мамы, а҆ не ра́ди тогѡ`, ꙗ҆́кѡ и҆́стиннѡ та́кѡ є҆́сть: то́тъ да бꙋ́детъ а҆на́ѳема. И҆́бо а҆п҃ⷭ҇толъ продолжа́етъ и҆ прилага́етъ слѣ́дꙋющее: а҆́ще же и҆сповѣ́даемъ грѣхи` на́шя, вѣ́ренъ є҆́сть и҆ пра́веденъ, да ѡ҆ста́витъ на́мъ грѣхи` на́шя, и҆ ѡ҆чи́ститъ на́съ ̾ѿ вся́кiя непра́вды{а҃ i҆ѡа́н. гл. а҃, ст. ѳ҃.}. Здѣ́сь весьма` ꙗ҆́снѡ пока́зано, что` сiе` говори́тся не по смиренномꙋ́дрiю то́кмѡ, но по и҆́стинѣ. И҆́бо а҆п҃ⷭ҇толъ мо́гъ бы рещи`: а҆́ще рече́мъ, не и҆́мамы грѣха`, себе` возно́симъ, и҆ смире́нiя нѣ́сть въ на́съ, но когда` ре́къ: себе` прельща́емъ, и҆ и҆́стины нѣ́сть въ на́съ: тогда` ꙗ҆́снѡ показа́лъ, что` глаго́лющiй ѡ҆ себѣ`, ꙗ҆́кѡ не и҆мѣ́етъ грѣха`, не и҆́стинствꙋетъ, но лже́тъ.

ПРА́ВИЛО рк҃ѳ.

Ѡ҆предѣлено` и҆ сiе`: а҆́ще кто` рече́тъ, ꙗ҆́кѡ святы́е, въ моли́твѣ гд҃ⷭ҇ней, ѡ҆ста́ви на́мъ до́лги на́шя{Матѳ. гл. ѕ҃, ст. в҃_i.}, не ѡ҆ себѣ` глаго́лютъ, поели́кꙋ и҆`мъ ѹ҆же` не нꙋ́жно сiе` проше́нiе, но ѡ҆ дрꙋги́хъ грѣ́ш(с. сл҃є)ныхъ, находя́щихся въ наро́дѣ и҆́хъ, и҆ ꙗ҆́кѡ не глаго́летъ ка́ждый и҆з̾ святы́хъ ѻ҆со́бѡ, ѡ҆ста́ви мнѣ` до́лги моя`, но ѡ҆ста́ви на́мъ до́лги на́шя, та́къ что́бы сiе` проше́нiе пра́ведника разꙋмѣ́лось ѡ҆ дрꙋги́хъ па́че, не́жели ѡ҆ не́мъ само́мъ: таковы́й да бꙋ́детъ а҆на́ѳема. Свя́тъ и҆ пра́веденъ бы́лъ i҆а́кѡвъ а҆п҃ⷭ҇толъ, когда` ре́къ: мно́гѡ бо согрѣша́емъ вси`{I҆а́к. г҃, ст. в҃.}. И҆́бо для чегѡ` прило́жено сiе` сло́во: вси`, а҆́ще не ра́ди тогѡ`, что́бы мы́сль сiя` согла́сна была` со ѱалмо́мъ, въ кото́ромъ чита́ется: не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тся пред̾ тобо́ю вся́къ живы́й{ѱал. рм҃в, ст. в҃.}. И҆ въ моли́твѣ премꙋ́драгѡ соломѡ́на: нѣ́сть человѣ́къ, и҆́же не согрѣши`{г҃ ца́р. и҃, ст. м҃ѕ.}: и҆ въ кни́гѣ свята́гѡ i҆́ѡва: въ рꙋцѣ` вся́кагѡ человѣ́ка зна́менаетъ, да позна́етъ вся́къ человѣ́къ не́мощь свою`{I҆́ѡв. л҃з, ст. з҃.}. Посемꙋ` та́кожде и҆ святы́й и҆ пра́ведный данiи́лъ прⷪ҇ро́къ, въ моли́твѣ, мно́жественнѡ глаго́лалъ: согрѣши́хомъ, беззако́нновахомъ{Дан. ѳ҃, ст. є҃.}, и҆ про́чее, что` ѻ҆́нъ та́мѡ смиренномꙋ́дреннѡ и҆ и҆́стиннѡ и҆сповѣ́дꙋетъ. Дабы` не подꙋ́мали, ка́къ нѣ́которые разꙋмѣ́ютъ, ꙗ҆́кѡ ѻ҆́нъ глаго́летъ не ѡ҆ свои́хъ, но па́че ѡ҆ грѣха́хъ люде́й свои́хъ: то ѻ҆́нъ по се́мъ ре́къ, ꙗ҆́кѡ моли́хся и҆ и҆сповѣ́дахъ грѣхи` моя`, и҆ грѣхи` люде́й мои́хъ гд҃ⷭ҇ꙋ бг҃ꙋ моемꙋ`{Дан. ѳ҃, ст. к҃.}. Не хотѣ́лъ рещи`, грѣхи` на́шя, но ре́къ: грѣхи` люде́й свои́хъ, и҆ грѣхи` свои`: поели́кꙋ прⷪ҇ро́къ ка́къ бы прови́дѣлъ, что` ꙗ҆́вятся таковы́е лю́ди, хꙋ́дѡ разꙋмѣ́ющiе сiе`.

ПРА́ВИЛО р҃л.

Ѡ҆предѣлено` и҆ сiе`: а҆́ще кто` полага́етъ, ꙗ҆́кѡ са́мыя слова` моли́твы гд҃ⷭ҇ней, въ ко́ихъ говори́мъ: ѡ҆ста́ви (с. сл҃ѕ) на́мъ до́лги на́шя, святы́ми произно́сятся по смире́нiю, а҆ не по и҆́стинѣ: да бꙋ́детъ а҆на́ѳема. И҆́бо кто` потерпѣ́лъ бы моля́щагося, кото́рый бы лга́лъ не человѣ́камъ, но самомꙋ` гд҃ⷭ҇ꙋ; ѹ҆ста́ми свои́ми говори́лъ, ꙗ҆́кѡ хо́щетъ и҆мѣ́ти ̾ѿпꙋще́нiе, се́рдцемъ же глаго́лалъ, ꙗ҆́кѡ не и҆мѣ́етъ грѣхѡ́въ, кото́рые надлежа́ло бы ̾ѿпꙋсти́ти є҆мꙋ`.

ПРА́ВИЛО рл҃а.

За нѣ́сколькѡ лѣ́тъ пред̾ си́мъ, въ се́й цр҃кви, по́лнымъ собо́ромъ ѡ҆предѣлено`, что́бы цр҃кви, состоя́щыя въ како́мъ либо предѣ́лѣ, пре́жде и҆зда́нiя зако́нѡвъ ѡ҆ донатíстахъ содѣ́лавшыяся каѳолíческими, принадлежа́ли къ тѣ́мъ престо́ламъ, ко́ихъ є҆пíскопами ѹ҆бѣждены` бы́ли прiѡбщи́тися къ каѳолíческомꙋ є҆дине́нiю: а҆ по́слѣ и҆зда́нiя зако́нѡвъ присоедини́вшыяся принадлежа́ли къ тѣ́мъ же престо́ламъ, къ кото́рымъ принадлежа́ли бꙋ́дꙋчи на странѣ` дона́та. Но поели́кꙋ по́слѣ возни́кли и҆ возника́ютъ междꙋ` є҆пíскопами мнѡ́гiя ра̑спри ѡ҆ предѣ́лахъ, ѡ҆ ко́ихъ пре́жнее ѹ҆смотре́нiе мни́тся бы́ти несоверше́ннымъ: то ны́нѣ на се́мъ свято́мъ собо́рѣ постано́влено: а҆́ще гдѣ́ либо была` цр҃ковь каѳолíческая, и҆ принадлежа́вшая сторонѣ` дона́товой, и҆ ѻ҆нѣ` ̾ѿноси́лись къ ра́знымъ престо́ламъ: то въ како́е бы вре́мя ни послѣ́довало, и҆ли` послѣ́дꙋетъ та́мѡ соедине́нiе, пре́жде ли зако́нѡвъ и҆ли` по́слѣ зако́нѡвъ, да принадлежа́тъ томꙋ` престо́лꙋ, кото́ромꙋ принадлежа́ла и҆здре́вле та́мѡ бы́вшая каѳолíческая цр҃ковь.

ПРА́ВИЛО рл҃в.

Ѡ҆ то́мъ, ка́кѡ є҆пíскопы каѳолíческiе, и҆ ѡ҆брати́вшiеся ̾ѿ страны` дона́товой, раздѣля́тъ междꙋ` собо́ю є҆па̑рхiи.

Раздѣля́ти та́кѡ: а҆́ще є҆пíскопы ̾ѿ донатíстѡвъ (с. сл҃з) ѡ҆братя́тся къ каѳолíческомꙋ є҆дине́нiю, то пора́внꙋ да раздѣ́лятъ междꙋ` собо́ю предѣ́лы, находя́щiеся въ се́мъ положе́нiи, и҆мѣ́вшiе въ себѣ` наро́дъ тоя` и҆ дрꙋгíя страны`: то́ є҆сть, и҆ны́я мѣста` да предоста́вятся семꙋ`, а҆ дрꙋгíя дрꙋго́мꙋ є҆пíскопꙋ, та́къ, что́бы ста́ршiй въ є҆пíскопствѣ раздѣля́лъ, а҆ мла́дшiй и҆збира́лъ. А҆́ще же слꙋчи́тся бы́ти є҆ди́номꙋ мѣ́стꙋ: то да предоста́вится томꙋ`, къ кото́ромꙋ въ бо́льшей бли́зости ѡ҆ка́жется. А҆́ще же бꙋ́детъ равнѡ` бли́зкѡ къ ѻ҆бои́мъ престо́ламъ: то да постꙋ́питъ къ томꙋ`, кото́раго наро́дъ и҆збере́тъ. А҆́ще слꙋчи́тся, что` хрiстiа́не, и҆здре́вле каѳолíческiе, востре́бꙋютъ своего` є҆пíскопа, а҆ ѡ҆брати́вшiеся ̾ѿ страны` дона́та, своего`: то и҆збра́нiе бо́льшимъ число́мъ, да бꙋ́детъ предпочтено` и҆збра́нiю ме́ньшимъ число́мъ наро́да. А҆́ще ѻ҆́бѣ страны` бꙋ́дꙋтъ ра́вны число́мъ и҆збира́ющихъ: то мѣ́сто да бꙋ́детъ причи́слено къ предѣ́лꙋ ста́ршагѡ є҆пíскопа. А҆́ще ѡ҆бря́щꙋтся мно́гiя мѣста`, и҆мѣ́ющыя наро́дъ ѻ҆бѣ́ихъ стра́нъ, но не мо́гꙋтъ раздѣлены` бы́ти пора́внꙋ, поели́кꙋ число` тѣ́хъ мѣ́стъ не ра́вно є҆́сть: то во пе́рвыхъ ра́вныя число́мъ да раздѣ́лятся, пото́мъ же съ ѡ҆ста́вшимся мѣ́стомъ да бꙋ́детъ постꙋ́плено, ка́къ рече́но вы́ше, при разсꙋжде́нiи ѡ҆ є҆ди́номъ мѣ́стѣ.

ПРА́ВИЛО рл҃г.

Постано́влено и҆ сiе`: а҆́ще кто`, по́слѣ и҆зда́нiя зако́нѡвъ, ѡ҆брати́лъ како́е мѣ́сто къ каѳолíческомꙋ є҆дине́нiю, и҆ въ продолже́нiи тре́хъ лѣ́тъ и҆мѣ́лъ ѻ҆́ное въ свое́мъ вѣ́дѣнiи, и҆ никто` ѻ҆́нагѡ не тре́бовалъ ̾ѿ негѡ`: то по́слѣ да не бꙋ́детъ ѻ҆́ное ̾ѿ негѡ` взыскꙋ́емо, є҆́стьли прито́мъ въ сiе` трехлѣ́тiе сꙋществова́лъ є҆пíскопъ, долженствꙋ́ющiй взыска́ти, и҆ молча́лъ. А҆́ще же не бы́ло є҆пíскопа: (с. сл҃и) то да не поста́вится въ препя́тствiе и҆ска́нiю внесе́нiе сегѡ` мѣ́ста въ спи́сокъ прихо́дѡвъ: но когда` вдо́вствовавшая каѳе́дра полꙋ́читъ є҆пíскопа, да бꙋ́детъ є҆мꙋ` позво́лено взыска́нiе тогѡ` мѣ́ста въ продолже́нiи трехлѣ́тiя. Подо́бнымъ ѻ҆́бразомъ, а҆́ще є҆пíскопъ ̾ѿ страны` донатíстѡвъ, ѡ҆брати́тся къ каѳолíческой цр҃кви, спи́сокъ прихо́дѡвъ да не бꙋ́детъ є҆мꙋ` въ предосꙋжде́нiе до ѡ҆предѣле́ннагѡ сро́ка: но съ тогѡ` дня`, ка́къ ѡ҆брати́лся, и҆мѣ́етъ пра́во, въ продолже́нiе трехлѣ́тiя, и҆ска́ти мѣ́стъ є҆гѡ` престо́лꙋ слѣ́дꙋющихъ.

ПРА́ВИЛО рл҃д.

Постано́влено и҆ сiе`: а҆́ще кото́рые є҆пíскопы, не посре́дствомъ сꙋда` дрꙋги́хъ є҆пíскопѡвъ, взыскꙋ́ютъ ѻ҆́бщєства, котѡ́рыя почита́ютъ принадлежа́щими своемꙋ` престо́лꙋ, но простира́ютъ вла́сть на люде́й, подчине́нныхъ дрꙋго́мꙋ є҆пíскопꙋ, хотя́щихъ и҆ли` не хотя́щихъ: таковы́е да нака́жꙋтся поте́рею своегѡ` дѣ́ла. То́ є҆сть, а҆́ще кото́рые ѹ҆чини́ли сiе`, и҆ а҆́ще междꙋ` є҆пíскопами дѣ́ло не ко́нчилось соглаше́нiемъ, но є҆ще` и҆мѣ́ютъ ѡ҆ не́мъ спо́ръ: то да лиши́тся спо́рнагѡ мѣ́ста то́тъ, ѡ҆ ко́мъ дока́зано бꙋ́детъ, ꙗ҆́кѡ ѡ҆ста́вивъ цр҃ко́вныхъ сꙋде́й, ѹ҆чини́лъ наше́ствiе. И҆ да не льсти́тъ себѣ` кто́ либо тѣ́мъ, ꙗ҆́кѡ ̾ѿ пе́рвенствꙋющагѡ є҆пíскопа и҆мѣ́етъ гра́матꙋ ѡ҆ приня́тiи тогѡ` мѣ́ста въ свое` вѣ́дѣнiе: но хотя` и҆мѣ́етъ гра́матꙋ, хотя` не и҆мѣ́етъ, да ѹ҆чини́тъ сноше́нiе съ и҆мѣ́ющимъ ѻ҆́ное мѣ́сто въ свое́мъ вѣ́дѣнiи, и҆ ̾ѿ негѡ` да полꙋ́читъ гра́матꙋ, дабы` ꙗ҆́вно бы́ло, что` ми́рнѡ ѹ҆де́рживаетъ за собо́ю цр҃ковь є҆мꙋ` слѣ́дꙋющꙋю. А҆́ще же и҆ то́тъ ꙗ҆ви́тъ нѣ́кое притяза́нiе: то и҆ сiе` да бꙋ́детъ разрѣшено` є҆пíскопами сꙋ́дящими, кото́рыхъ и҆ли` пе́рвенствꙋющiй и҆`мъ (с. сл҃ѳ) назна́читъ, и҆ли` са́ми по согла́сiю и҆зберꙋ́тъ и҆з̾ сосѣ́днихъ є҆пíскопѡвъ.

ПРА́ВИЛО рл҃є.

Постано́влено и҆ сiе`: а҆́ще нѣ́которые небрегꙋ́тъ ѡ҆ прiѡбрѣ́тенiи каѳолíческомꙋ є҆дине́нiю мѣ́стъ принадлежа́щихъ къ престо́лꙋ и҆́хъ: да ѡ҆блича́ются ̾ѿ сосѣ́днихъ тща́тельныхъ є҆пíскопѡвъ, дабы` не ̾ѿлага́ли сегѡ` дѣ́ла. Тогѡ` ра́ди, а҆́ще въ продолже́нiи шестимѣ́сячнагѡ сро́ка, ̾ѿ дня` совѣща́нiя ѡ҆ се́мъ, ничегѡ` не сдѣ́лаютъ: то по́слѣ сегѡ` мѣ́ста тѣ` да предоста́вятся могꙋ́щемꙋ прiѡбрѣсти` ѻ҆́ныя. Впро́чемъ, а҆́ще то́тъ, кото́ромꙋ ѻ҆́ныя мѣста` показꙋ́ются принадлежа́щими, за поле́зное признава́лъ не дѣ́йствовати, по нѣ́коемꙋ смотрѣ́нiю, потомꙋ`, что` сiе` предпочли` є҆ретiки`, дабы` ѻ҆́нъ мо́гъ прiя́ти и҆`хъ въ каѳолíческꙋю цр҃ковь без̾ смяте́нiя наро́днагѡ, а҆ междꙋ` тѣ́мъ дрꙋги́мъ предꙋпреждено` є҆гѡ` дѣ́йствованiе, ѹ҆потребле́нiемъ кото́рагѡ ра́нѣе, ѻ҆́нъ бо́лѣе ѡ҆ѕло́билъ бы є҆ретiкѡ́въ: то, по разсмотрѣ́нiи сегѡ` сꙋ́дящими є҆пíскопами, мѣста` тѣ` да бꙋ́дꙋтъ возвращены` престо́лꙋ є҆гѡ`. Когда` сꙋ́дящымъ є҆пíскопамъ надлежи́тъ бы́ти и҆з̾ ра́зныхъ ѻ҆́бластей: тогда` сꙋде́й назна́читъ то́тъ пе́рвенствꙋющiй є҆пíскопъ, въ ѻ҆́бласти кото́рагѡ нахо́дится мѣ́сто подлежа́щее спо́рꙋ. А҆́ще же по ѻ҆́бщемꙋ согла́сiю и҆збира́ти бꙋ́дꙋтъ сꙋде́й и҆з̾ сосѣ́днихъ є҆пíскопѡвъ: то и҆ли` є҆ди́нъ да бꙋ́детъ и҆́збранъ, и҆ли` три`. И҆ а҆́ще три` бꙋ́дꙋтъ и҆́збраны и҆ при́знаны: то, да покоря́тся рѣше́нiю и҆ли` всѣ́хъ, и҆ли` двои́хъ.

ПРА́ВИЛО рл҃ѕ.

Ѿ сꙋде́й же, по ѻ҆́бщемꙋ согла́сiю и҆́збранныхъ, да не бꙋ́детъ позво́лено преноси́ти дѣ́ло въ вы́сшiй сꙋ́дъ. А҆ ѡ҆ ко́мъ до́знано бꙋ́детъ, ꙗ҆́кѡ по ѹ҆по́рствꙋ не хо́щетъ повинова́тися (с. с҃м) сꙋдiя́мъ: ѡ҆ то́мъ ѹ҆вѣ́давъ є҆пíскопъ пе́рвагѡ престо́ла, дае́тъ гра́матꙋ, да никто` и҆з̾ є҆пíскопѡвъ не прiе́млетъ є҆гѡ` въ ѡ҆бще́нiе, доко́лѣ не покори́тся.

ПРА́ВИЛО рл҃з.

А҆́ще є҆пíскопъ нерадѣ́ти бꙋ́детъ ѡ҆ возвраще́нiи ̾ѿ є҆ретiкѡ́въ принадлежа́щагѡ цр҃кви по спи́скамъ, и҆ли` са́мыхъ каѳе́дръ: то да ѹ҆вѣща́ютъ є҆го` сосѣ́днiе тща́тельные є҆пíскопы, и҆ да пока́жꙋтъ є҆мꙋ` є҆гѡ` небреже́нiе, дабы` не и҆мѣ́ти є҆мꙋ` и҆звине́нiя. А҆́ще же въ тече́нiи шести` мѣ́сяцѡвъ, ̾ѿ дня` ѹ҆вѣща́нiя, пребыва́я въ то́й же є҆па́рхiи не воз̾имѣ́етъ попече́нiя ѡ҆ долженствꙋ́ющихъ возврати́тися къ каѳолíческомꙋ є҆дине́нiю: съ таковы́мъ да не соѡбща́ются, доко́лѣ не и҆спо́лнитъ тогѡ`. А҆́ще же не прiи́детъ въ ѻ҆́ныя мѣста` содѣ́йствователь{Свѣ́тскiй нача́льникъ, долженствꙋ́ющiй содѣ́йствовати є҆пíскопꙋ, дабы` є҆ретiки` не ѹ҆клоня́лись, бы́въ призыва́емы для ѹ҆вѣща́нiя и҆ли` ̾ѿвѣ́та.}: то є҆пíскопꙋ да не поста́вится въ винꙋ` недѣ́йствованiе.

ПРА́ВИЛО рл҃и.

А҆́ще же дока́зано бꙋ́детъ, ꙗ҆́кѡ таковы́й ло́жнѡ показа́лъ ѡ҆ ѡ҆бще́нiи ѻ҆́ныхъ, то́ є҆сть донатíстѡвъ, говоря`, что` ѻ҆ни` пристꙋпи́ли къ ѡ҆бще́нiю, тогда` ка́къ до́знано, что` ѻ҆ни` не пристꙋпа́ли, и҆ ѻ҆́нъ зна́лъ ѡ҆ се́мъ: таковы́й да лиши́тся и҆ є҆пíскопства.

ПРА́ВИЛО рл҃ѳ.

Постано́влено и҆ сiе`: а҆́ще пресвѵ́теры, дiа́коны, и҆ про́чiе ни́зшiе и҆з̾ кли́ра, по и҆мѣ́ющымся ѹ҆ ни́хъ дѣла́мъ, не дово́льны рѣше́нiемъ свои́хъ є҆пíскопѡвъ: то сосѣ́днiе є҆пíскопы да слꙋ́шаютъ и҆́хъ, и҆ прекослѡ́вiя и҆́хъ да разрѣша́ютъ и҆́збранные и҆́ми, по согла́сiю со́бственныхъ и҆́хъ є҆пíскопѡвъ. А҆́ще же и҆ ̾ѿ ни́хъ восхотя́тъ пренести` дѣ́ло въ вы́сшiй сꙋ́дъ: то да прено́сятъ то́кмѡ въ а҆фрiка́нскiе собо́ры, и҆ли` къ пе́рвенствꙋющымъ (с. см҃а) є҆пíскопамъ свои́хъ ѻ҆́бластей. А҆ жела́ющiй пренести` дѣ́ло за мо́ре{въ ри́мъ.}, никѣ́мъ въ а҆́фрiкѣ да не прiе́млется въ ѡ҆бще́нiе.

ПРА́ВИЛО р҃м.

Постано́влено и҆ сiе`: а҆́ще кто` и҆з̾ є҆пíскопѡвъ по нꙋ́ждѣ, въ ѻ҆па́сности ѹ҆грожа́ющей цѣломꙋ́дрiю дѣ́вы, когда` є҆́сть подозрѣ́нiе и҆ли` ѡ҆ люби́телѣ си́льномъ, и҆ли` ѡ҆ како́мъ либо похити́телѣ, и҆ли` когда` ѻ҆на` ѡ҆щꙋща́етъ себя` въ сокрꙋше́нiи ̾ѿ нѣ́кiя ѻ҆па́сности смертоно́сныя, по проше́нiю роди́телей є҆я`, и҆ли` и҆мѣ́ющихъ попече́нiе ѡ҆ не́й, покро́етъ и҆ли` покры́лъ є҆е` ѡ҆дѣя́нiемъ посвяще́нныхъ бг҃ꙋ, пре́жде два́десяти пяти` лѣ́тъ во́зраста, дабы` не ѹ҆мерла` без̾ и҆́ноческагѡ ѻ҆́браза: такова́го ничемꙋ` да не подве́ргнетъ собо́рное постановле́нiе, кото́рымъ ѡ҆предѣля́ется сiе` число` лѣ́тъ для покрове́нiя.

ПРА́ВИЛО рм҃а.

Ѹ҆го́дно всемꙋ` собо́рꙋ, ра́ди тогѡ`, что́бы не бы́ли до́лгѡ ѹ҆де́рживаемы всѣ` є҆пíскопы сше́дшiеся на собо́ръ, и҆збра́ти по три` сꙋдiи` ̾ѿ ка́ждыя ѻ҆́бласти.

ПРА́ВИЛО рм҃в.

По ѡ҆конча́нiи нѣ́которыхъ дѣ́лъ, когда` на продолже́нiе засѣда́нiй, для ѡ҆конча́нiя про́чихъ дѣ́лъ, мно́гiе є҆пíскопы сѣ́товали, и҆ не могли` сегѡ` понести`, поспѣша́я къ свои́мъ цр҃квамъ, ѹ҆го́дно бы́ло всемꙋ` собо́рꙋ, да и҆зберꙋ́тся и҆з̾ числа` всѣ́хъ, ̾ѿ ка́ждыя ѻ҆́бласти, долженствꙋ́ющiе пребы́ти, ра́ди ѡ҆конча́нiя про́чихъ дѣ́лъ: и҆ сiе` и҆спо́лнено.

ПРА́ВИЛО рм҃г.

Положено` всѣ́ми: поели́кꙋ въ пре́жнихъ постановле́нiяхъ собо́рѡвъ є҆́сть ѡ҆предѣлє́нiя ѡ҆ ли́цахъ, ̾ѿ кото́рыхъ не до́лжно прiима́ти доно́сѡвъ, на состоя́(с. см҃в)щихъ въ кли́рѣ. но не ѡ҆зна́чено съ то́чностiю ̾ѿ каки́хъ ли́цъ не до́лжно прiима́ти ѻ҆́ныхъ: тогѡ` ра́ди ѡ҆предѣля́емъ, ꙗ҆́кѡ пра́веднѡ не прiе́млется доно́съ ̾ѿ тогѡ`, кто` бы́въ ̾ѿлꙋче́нъ ̾ѿ ѡ҆бще́нiя, є҆ще` ѡ҆стае́тся въ се́мъ ̾ѿлꙋче́нiи, кли́рiкъ ли є҆́сть, и҆ли` мiряни́нъ, хотя́щiй доноси́ти.

ПРА́ВИЛО рм҃д.

Положено` и҆ сiе`: не прiима́ти доно́сѡвъ ̾ѿ всѣ́хъ рабѡ́въ, ̾ѿ ̾ѿпꙋ́щенникѡвъ тѣ́хъ са́мыхъ, на кото́рыхъ доноси́ти хотя́тъ, и҆ ̾ѿ всѣ́хъ, кото́рыхъ гражда́нскiе зако́ны не допꙋска́ютъ къ доно́самъ ѡ҆ престꙋпле́нiяхъ: та́кожде ̾ѿ всѣ́хъ, на ко́ихъ лежи́тъ пятно` безче́стiя, то́ є҆сть, ̾ѿ позо́рищныхъ и҆ ̾ѿ ли́цъ, къ сра́мнымъ дѣла́мъ прикоснове́нныхъ: та́кожде ̾ѿ є҆ретiкѡ́въ, и҆ли` є҆́ллинѡвъ, и҆ли` i҆ꙋде́євъ: впро́чемъ ѹ҆ всѣ́хъ, ̾ѿ кото́рыхъ не допꙋска́ется таково́е ѡ҆бвине́нiе, да не ̾ѿе́млется свобо́да приноси́ти жа́лѡбы по свои́мъ дѣла́мъ.

ПРА́ВИЛО рм҃є.

Постано́влено и҆ сiе`: когда` на состоя́щихъ въ кли́рѣ, доноси́тели представля́ютъ мнѡ́гiя ѡ҆бвинє́нiя, и҆ ѻ҆дно` и҆з̾ ни́хъ, ѡ҆ кото́ромъ во пе́рвыхъ происходи́ло и҆зслѣ́дованiе, не могло` бы́ти дока́зано: по́слѣ сегѡ`, про́чыя ѡ҆бвинє́нiя да не прiе́млются.

ПРА́ВИЛО рм҃ѕ.

Свидѣ́телей же къ свидѣ́тельствꙋ не прiима́ти тѣ́хъ, ̾ѿ кото́рыхъ положено` не прiима́ти доно́сѡвъ: та́кожде и҆ тѣ́хъ, кото́рыхъ са́мъ доноси́тель предста́витъ и҆з̾ своегѡ` до́ма. Свидѣ́тельство и҆мѣ́ющагѡ ме́нѣе четырена́десяти лѣ́тъ во́зраста да не прiе́млется.

ПРА́ВИЛО рм҃з.

Постано́влено и҆ сiе`: а҆́ще є҆пíскопъ глаго́летъ, ꙗ҆́кѡ нѣ́кто є҆мꙋ` ѻ҆дномꙋ` и҆сповѣ́далъ свое` престꙋпле́нiе, (с. см҃г) а҆ то́тъ не признае́тся: то є҆пíскопъ да не ѡ҆браща́етъ себѣ` въ ѻ҆би́дꙋ тогѡ`, что` не полага́ются въ се́мъ на него` є҆ди́наго. А҆́ще же рече́тъ, ꙗ҆́кѡ по возмꙋще́нiи со́вѣсти своея`, не хо́щетъ и҆мѣ́ти ѻ҆бще́нiя съ непризнаю́щимся: то, доко́лѣ ̾ѿлꙋче́ннагѡ по семꙋ` слꙋ́чаю не прiе́млетъ въ ѻ҆бще́нiе сво́й є҆пíскопъ, дото́лѣ сегѡ` є҆пíскопа да не прiе́млютъ въ ѻ҆бще́нiе про́чiе є҆пíскопы: да тѣ́мъ па́че блюде́тся є҆пíскопъ, да не глаго́летъ ѡ҆ ко́мъ либо, чегѡ` пред̾ дрꙋги́ми не мо́жетъ ѹ҆тверди́ти доказа́тельствами.

(с. см҃д)

ПОСЛА́НIЕ А҆ФРIКА́НСКАГѠ СОБО́РА къ келести́нꙋ, па́пѣ ри́мскомꙋ.

Возлю́бленномꙋ влады́кѣ и҆ честнѣ́йшемꙋ бра́тꙋ келестíнꙋ: а҆ѵри́лiй, палатíнъ, а҆нтонíнъ, тꙋ́тъ, сервꙋсде́й, тере́нтiй и҆ про́чiе, ѡ҆брѣ́тшiеся на ѻ҆́бщемъ карѳаге́нскомъ собо́рѣ.

Ка́къ твоя` святы́ня и҆з̾яви́ла ва́шꙋ ра́дость ѡ҆ прибы́тiи а҆пiа́рiа, писа́нiемъ, по́сланнымъ чрез̾ сопресвѵ́тера на́шего льва`: подо́бнѡ и҆ мы` жела́ли бы, что́бы съ ра́достiю по́слано бы́ло настоя́щее писа́нiе ѡ҆ є҆гѡ` ѡ҆правда́нiи. И҆́бо по и҆́стинѣ, и҆ на́ше и҆ ва́ше расположе́нiе бы́ло чꙋ́ждо недовѣ́рчивости, и҆ не пытли́вымъ ꙗ҆вля́лося ѻ҆́но, предвари́тельнѡ склоня́ясь въ по́льзꙋ є҆гѡ`, ка́къ бы ѹ҆же` вы́слꙋшаннагѡ, тогда` ка́къ є҆го` є҆ще` надлежа́ло вопроша́ти. И҆ та́къ, когда` при́былъ къ на́мъ святѣ́йшiй бра́тъ и҆ соепíскопъ на́шъ фаѵстíнъ, мы` созва́ли собо́ръ, и҆ полага́ли, что` ѻ҆́нъ съ а҆пiа́рiемъ по́сланъ ра́ди тогѡ`, дабы` ка́къ се́й стара́нiемъ є҆гѡ` возстано́вленъ бы́лъ на пресвѵ́терство, та́къ и҆ ны́нѣ возмо́гъ, є҆гѡ́ же попече́нiемъ, ѡ҆правда́тися въ толи́кихъ ѡ҆бвине́нiяхъ, принесе́нныхъ на него` ̾ѿ жи́(с. см҃є)телей ѳавраки́нскихъ. Но многочи́сленный собо́ръ на́шъ наше́лъ сто́ль мнѡ́гiя и҆ сто́ль вели́кiя беззакѡ́нiя а҆пiа́рiа, что` ѻ҆нѣ` превозмогли` дѣ́йствованiе вышерече́ннагѡ фаѵстíна, хотя` то` бы́ло покрови́тельство па́че, не́жели сꙋ́дъ, и҆ хода́тайство па́че, є҆кдíкꙋ сво́йственное, не́жели справедли́вость, и҆зслѣ́дователю прили́чная. И҆́бо во пе́рвыхъ фаѵстíнъ си́льнѡ противостоя́лъ всемꙋ` собо́рꙋ, нанося` є҆мꙋ` разли́чныя ѡ҆скорблє́нiя, а҆́ки бы защища́я преимꙋ́щєства ри́мской цр҃кви, и҆ жела́я, что́бы при́нятъ бы́лъ на́ми во ѻ҆бще́нiе а҆пiа́рiй, кото́раго твоя` святы́ня прiя́ла въ ѻ҆бще́нiе, повѣ́ривъ є҆гѡ` жа́лобѣ, ко́ея ѻ҆́нъ не мо́гъ доказа́ть: ѻ҆дна́кѡ и҆ сiе` ма́лѡ є҆мꙋ` помогло`, что` ты` лꙋ́чше ѹ҆зна́ешь прочита́въ дѣя̑нiя собо́ра. И҆́бо когда`, въ продолже́нiи тре́хъ дне́й, съ затрꙋдне́нiемъ производи́лся сꙋ́дъ, на кото́ромъ мы` съ сокрꙋше́нiемъ и҆зслѣ́дывали разли̑чныя на а҆пiа́рiа ѡ҆бвинє́нiя: тогда` бг҃ъ, пра́ведный сꙋдiя`, крѣ́пкiй и҆ долготерпѣли́вый, ѕѣлѡ` вкра́тцѣ пресѣ́къ и҆ протяже́нiе дѣ́ла соєпíскопомъ на́шимъ фаѵстíномъ, и҆ и҆зворо́ты самагѡ` а҆пiа́рiа, кото́рыми ѻ҆́нъ си́лился покры́ть свои` сра́мныя беззакѡ́нiя. Недѣйстви́тельнымъ содѣ́лалось доса́дное и҆ гнꙋ́сное ѹ҆по́рство, и҆ безсты́дное запира́тельство, кото́рымъ а҆пiа́рiй хотѣ́лъ загради́ти бла́то сто́ль мно́гихъ сладостра́стныхъ дѣ́лъ. И҆́бо когда` бг҃ъ на́шъ стѣсни́лъ є҆гѡ` со́вѣсть, и҆ пред̾ всѣ́ми человѣ́ками ѡ҆бнарꙋ́жилъ сокрове́нное въ се́рдцѣ, ка́къ бы ѹ҆же` ѡ҆сꙋжде́нное са́мою гнꙋ́сностiю престꙋпле́нiй: тогда` ѹ҆ кова́рнѡ запира́вшагѡся внеза́пнѡ и҆сто́рглося призна́нiе во всѣ́хъ, принесе́нныхъ на него` ѡ҆бвине́нiяхъ, и҆ ѻ҆́нъ наконе́цъ, доброво́льнѡ, са́мъ себя` ѡ҆бличи́лъ во всѣ́хъ, (с. см҃ѕ) є҆два` вѣроя́тныхъ скве́рнахъ, и҆ таки́мъ ѻ҆́бразомъ, и҆ са́мꙋю наде́ждꙋ на́шꙋ, кото́рой мы` ввѣря́ли є҆го`, жела́я, что́бы ѻ҆́нъ мо́гъ ѡ҆чи́стити себя` ̾ѿ сто́ль посты́дныхъ пя́тенъ, ѡ҆брати́лъ въ пла́чь. Таковꙋ́ю ско́рбь на́шꙋ ѻ҆́нъ ѹ҆мягчи́лъ є҆ди́нымъ то́кмѡ и҆ є҆ди́нственнымъ ѹ҆тѣше́нiемъ, тѣ́мъ, что` и҆ на́съ ѡ҆свободи́лъ ̾ѿ тяготы` непреры́внагѡ сѣ́тованiя, и҆ для со́бственныхъ свои́хъ ра́нъ, хотя` нево́льнѡ, и҆ съ борьбо́ю своея` со́вѣсти, прiꙋгото́вилъ наконе́цъ врачевство` въ свое́мъ призна́нiи. И҆ та́къ, пе́рвѣе и҆спо́лнивъ до́лгъ подоба́ющагѡ почита́нiя, ѹ҆моля́емъ ва́съ, господи́не бра́те, дабы` вы` впре́дь не допꙋска́ли легкѡ` до ва́шегѡ слꙋ́ха приходя́щихъ ̾ѿсе́лѣ, и҆ не соизволя́ли впре́дь прiима́ти въ ѻ҆бще́нiе ̾ѿлꙋче́нныхъ на́ми: и҆́бо твоя` досточти́мость ѹ҆до́бнѡ ѡ҆бря́щетъ, ꙗ҆́кѡ сiе` са́мое ѡ҆предѣлено` и҆ нiке́йскимъ собо́ромъ. И҆́бо а҆́ще сiе` ꙗ҆вля́ется та́кѡ соблюда́емымъ каса́тельнѡ ни́зшихъ кли́рiкѡвъ и҆ мiря́нъ: кольми` па́че хо́щетъ собо́ръ, что́бы сiе` соблюда́емо бы́ло каса́тельнѡ є҆пíскопѡвъ. И҆ та́къ тѣ`, кото́рые въ свое́й є҆па́рхiи ̾ѿлꙋчены` ̾ѿ ѻ҆бще́нiя, да не ꙗ҆вя́тся воспрiе́млемыми въ ѻ҆бще́нiе твое́ю святы́нею, съ намѣ́ренiемъ, и҆ ꙗ҆́коже не подоба́етъ. Подо́бнѡ и҆ безсты́дные побѣ́ги пресвѵ́терѡвъ, и҆ слѣ́дꙋющихъ за ни́ми кли́рiкѡвъ, да ̾ѿжене́тъ святы́ня твоя`, ка́къ сiе` и҆ досто́йно тебя`. И҆́бо и҆ не возбранено` сiе` для а҆фрiка́нскiя це́ркви, ни каки́мъ ѡ҆предѣле́нiемъ ѻ҆ц҃є́въ, да и҆ ѡ҆предѣлє́нiя нiке́йскагѡ собо́ра, ка́къ кли́рiкѡвъ ни́зшей сте́пени, та́къ и҆ са́мыхъ є҆пíскопѡвъ, ꙗ҆́внымъ ѻ҆́бразомъ, ѻ҆бра́тнѡ ̾ѿсыла́ютъ къ со́бственнымъ и҆́хъ митрополíтамъ. Разꙋ́мнѡ и҆ пра́веднѡ призна́лъ ѻ҆́нъ, что` какíя бы ни возни́кли дѣла`, ѻ҆нѣ` должны` ѡ҆ка́нчиваемы бы́ти (с. см҃з) въ свои́хъ мѣста́хъ. И҆́бо ѻ҆тцы` сꙋди́ли, что` ни для є҆ди́ныя ѻ҆́бласти не ѡ҆скꙋдѣва́етъ бл҃года́ть ст҃а́гѡ дх҃а, чрез̾ кото́рꙋю пра́вда i҆ере́ами хр҃ⷭ҇то́выми, и҆ зри́тся разꙋ́мнѡ, и҆ соде́ржится тве́рдѡ, и҆ наипа́че, когда` ка́ждомꙋ, а҆́ще настои́тъ сомнѣ́нiе ѡ҆ справедли́вости рѣше́нiя ближа́йшихъ сꙋде́й, позво́лено пристꙋпа́ти къ собо́рамъ своея` ѻ҆́бласти, и҆ да́же ко вселе́нскомꙋ собо́рꙋ. Ра́звѣ є҆́сть кто́ либо, кото́рый бы повѣ́рилъ, что` бг҃ъ на́шъ мо́жетъ є҆ди́номꙋ то́кмѡ нѣ́коемꙋ вдохнꙋ́ти правотꙋ` сꙋда`, а҆ безчи́сленнымъ i҆ере́ямъ, соше́дшымся на собо́ръ, ̾ѿка́жетъ въ ѻ҆́номъ; Прито́мъ, ка́къ бꙋ́детъ тве́рдъ заграни́чный сꙋ́дъ, пред̾ кото́рый неѡбходи́мыя ли́ца свидѣ́телей не мо́гꙋтъ предста́влены бы́ти, то по не́мощи, и҆ли` ̾ѿ тѣле́снагѡ сложе́нiя, и҆ли` ̾ѿ ста́рости, то по мно́гимъ дрꙋги́мъ препя́тствiямъ; Ѡ҆ то́мъ, что́бы нѣ́кiе, а҆́ки бы ̾ѿ ребра` твоея` святы́ни, бы́ли посыла́емы, мы` не ѡ҆брѣта́емъ ѡ҆предѣле́нiя ни є҆ди́нагѡ собо́ра ѻ҆тцє́въ. И҆́бо, что` пре́жде ̾ѿ ва́съ, чрез̾ того́жде соепíскопа на́шего фаѵстíна, при́слано бы́ло къ на́мъ, а҆́ки бы и҆з̾ постановле́нiй нiке́йскагѡ собо́ра, тогѡ` мы` ни ка́къ не могли` ѡ҆брѣсти` въ вѣрнѣ́йшихъ спи́скахъ пра́вилъ сегѡ` собо́ра, съ по́длинникѡвъ сня́тыхъ, кото́рые полꙋчи́ли мы` ̾ѿ святѣ́йшагѡ кѷрíлла, на́шегѡ соепíскопа а҆леѯандрíйскiя це́ркви, и҆ ̾ѿ досточти́магѡ а҆́ттiка, є҆пíскопа кѡнстантiнопо́льскагѡ, и҆ кото́рые, є҆ще` пре́жде сегѡ`, чрез̾ пресвѵ́тера i҆нноке́нтiа и҆ ѵ҆подiа́кона марке́лла, прине́сшихъ ѻ҆́ныя къ на́мъ, по́сланы бы́ли ̾ѿ на́съ къ вонiфа́тiю, бл҃же́нныя па́мяти є҆пíскопꙋ, ва́шемꙋ предше́ственникꙋ. И҆та́къ не соизволя́йте, по про́сьбѣ нѣ́которыхъ, посыла́ти сюда` ва́шихъ кли́рiкѡвъ и҆зслѣ́дователями, и҆ не попꙋска́йте сегѡ`, да не ꙗ҆́вимся (с. см҃и) мы` внося́щими ды́мное надмѣ́нiе мíра въ це́рковь хр҃ⷭ҇то́вꙋ, кото́рая, жела́ющымъ зрѣ́ти бг҃а, прино́ситъ свѣ́тъ простоты` и҆ де́нь смиренномꙋ́дрiя. Поели́кꙋ же сле́зъ досто́йный а҆пiа́рiй, за непрости́тєльныя свои` непотрє́бства, да́же бра́томъ на́шимъ фаѵстíномъ ̾ѿлꙋче́нъ ̾ѿ це́ркви хр҃ⷭ҇то́вой: то мы` ѡ҆стае́мся без̾ ѡ҆пасе́нiя, что` є҆гѡ` и҆ впре́дь, при и҆скꙋ́ствѣ и҆ то́чности твоея` святы́ни въ сохране́нiи бра́тскiя любви`, а҆́фрiка ̾ѿню́дь не поте́рпитъ.

По́дпись.

Бг҃ъ на́шъ да храни́тъ на должа́йшее вре́мя ва́шꙋ святы́ню, господи́не бра́те, моля́щꙋюся ѡ҆ на́съ.