ПРА̑ВИЛА СВЯТА́ГѠ ВАСІ́ЛІЯ ВЕЛИ́КАГѠ.

Пе́рвое каноні́ческое посла́ніе свята́гѡ ѻ҆тца̀ на́шегѡ васі́ліа, а҆рхіепі́скопа кесарі́и каппадокі́йскія, къ а҆мфіло́хію є҆пі́скопꙋ і҆коні́йскомꙋ.

ВСТꙊПЛЕ́НІЕ.

Несмы́сленномꙋ, ка́къ рече́но въ писа́ніи, вопроси́вшꙋ ѡ҆ мꙋ́дрости, мꙋ́дрость вмѣни́тся[1]: а҆ вопроше́ніе мꙋ́драгѡ, ка́жется, ѹ҆мꙋдря́етъ и҆ несмы́сленнаго. Сіѐ, по благода́ти бж҃іей, слꙋча́ется съ на́ми ка́ждый ра́зъ, когда̀ полꙋча́емъ писа̑нія твоея̀ трꙋдолюби́выя дꙋшѝ. И҆́бо ꙗ҆́ становлю́ся свѣ́дꙋщѣе и҆ разсꙋди́тельнѣе самагѡ̀ себя̀, и҆з̾ са́магѡ вопро́са наꙋча́яся мно́гомꙋ, чегѡ̀ пре́жде не зна́лъ. Забо́та ѡ҆б̾ ̾ѿвѣ́тѣ дѣ́лается для меня̀ ѹ҆чи́телемъ. По и҆́стинѣ и҆ ны́нѣ, никогда̀ неѡзабо́ченный предме́тами твои́хъ вопро́сѡвъ, ꙗ҆́ принꙋжде́нъ и҆ разсмотрѣ́ти ѻ҆́ные съ то́чностію, и҆ привестѝ на па́мять, а҆́ще что̀ слы́шалъ ̾ѿ старѣ́йшихъ, и҆ ̾ѿ себя̀ примы́слити согла́сное съ тѣ́мъ, чемꙋ̀ ꙗ҆́ наꙋчи́лся.

ПРА́ВИЛО а҃.

И҆ та́къ ̾ѿноси́тельнѡ вопро́са ѡ҆ каѳа́рахъ[2], и҆ рече́но пре́жде, и҆ ты̀ благоразсꙋди́тельнѡ ѹ҆помянꙋ́лъ, с. т҃з ꙗ҆́кѡ подоба́етъ послѣ́довати ѻ҆бы́чаю ка́ждыя страны̀, потомꙋ̀ что̀ ѡ҆ и҆́хъ креще́ніи разли́чнѡ дꙋ́мали, разсꙋжда́вшіе ѡ҆ се́мъ предме́тѣ въ своѐ вре́мя. Креще́ніе пепꙋзіа́нъ, по моемꙋ̀ мнѣ́нію, не и҆мѣ́етъ ничегѡ̀ въ своѐ защище́ніе: и҆ ꙗ҆́ ѹ҆диви́лся, ка́къ не примѣ́тилъ сегѡ̀ вели́кій діонѵ́сій, бꙋ́дꙋчи и҆скꙋ́сенъ въ пра́вилахъ. И҆́бо дре́вніе положи́ли пріима́ти креще́ніе, ни въ че́мъ не ̾ѿстꙋпа́ющее ̾ѿ вѣ́ры: посемꙋ̀ и҆но́е нареклѝ ѻ҆нѝ є҆́ресію, и҆но́е раско́ломъ, а҆ и҆но́е самочи́ннымъ сбо́рищемъ. Є҆ретіка́ми назва́ли ѻ҆нѝ соверше́ннѡ ̾ѿто́ргшихся, и҆ въ са́мой вѣ́рѣ ̾ѿчꙋжди́вшихся: раско́льниками, раздѣли́вшихся въ мнѣ́ніяхъ ѡ҆ нѣ́которыхъ предме́тахъ церко́вныхъ, и҆ ѡ҆ вопро́сахъ, допꙋска́ющихъ ѹ҆врачева́ніе: а҆ самочи́нными сбо́рищами, собра̑нія, составля́ємыя непоко́рными пресвѵ́терами, и҆лѝ є҆пі́скопами, и҆ ненаꙋче́ннымъ наро́домъ. Напримѣ́ръ, а҆́ще кто̀, бы́въ ѡ҆бличе́нъ во грѣхѣ̀, ѹ҆дале́нъ ̾ѿ священнослꙋже́нія, не покори́лся пра́виламъ: а҆ са́мъ ѹ҆держа́лъ за собо́ю предстоя́ніе и҆ священнослꙋже́ніе, и҆ съ ни́мъ ̾ѿстꙋпи́ли нѣ́которые дрꙋгі́е, ѡ҆ста́вивъ каѳолі́ческꙋю це́рковь: сіѐ є҆́сть самочи́нное сбо́рище. Ѡ҆ покая́ніи мы́слити и҆на́кѡ, не́жели ка́къ сꙋ́щіе въ це́ркви, є҆́сть раско́лъ. Є҆́рєси же сꙋ́ть, напримѣ́ръ: маніхе́йская, валентініа́нская, маркіоні́тская, и҆ си́хъ са́мыхъ пепꙋзіа́нъ. И҆́бо здѣ́сь є҆́сть ꙗ҆́вная ра́зность въ са́мой вѣ́рѣ въ бг҃а. Почемꙋ̀, ̾ѿ нача́ла бы́вшымъ ѻ҆тца́мъ, ѹ҆го́дно бы́ло креще́ніе є҆ретікѡ́въ совсѣ́мъ ̾ѿмета́ти: креще́ніе раско́льникѡвъ, ꙗ҆́кѡ є҆щѐ не чꙋ́ждыхъ це́ркви, пріима́ти: а҆ находя́щихся въ самочи́нныхъ сбо́рищахъ и҆справля́ти прили́чнымъ покая́ніемъ и҆ ѡ҆браще́ніемъ, и҆ па́ки присоединя́ти къ це́ркви. Таки́мъ ѻ҆́бразомъ да́же находя́щіеся въ церко́вныхъ сте́пеняхъ, ̾ѿстꙋпи́въ кꙋ́пнѡ с. т҃и съ непоко́рными, когда̀ пока́ются, нерѣ́дкѡ пріе́млются па́ки въ то́тъ же чи́нъ. Пепꙋзіа́не же ꙗ҆́внѡ сꙋ́ть є҆ретікѝ. И҆́бо ѻ҆нѝ восхꙋли́ли на дх҃а ст҃а́го, нечести́вѡ и҆ безсты́днѡ присво́ивъ наименова́ніе ѹ҆тѣ́шителя монта́нꙋ и҆ пріскі́ллѣ. Посемꙋ̀, боготворя́тъ ли ѻ҆нѝ человѣ́кѡвъ, подлежа́тъ за сіѐ ѡ҆сꙋжде́нію: ѡ҆скорбля́ютъ ли дх҃а ст҃а́го, сра́внивая є҆го̀ съ человѣ́ками, и҆ въ се́мъ слꙋ́чаѣ пови́нны вѣ́чномꙋ ѡ҆сꙋжде́нію, и҆́бо хꙋла̀ на дх҃а ст҃а́го не ̾ѿпꙋска́ется. Кака́я же была̀ бы соѻбра́зность призна́ти креще́ніе тѣ́хъ, кото́рые крестя́тъ во ѻ҆ц҃а̀, и҆ сн҃а, и҆ въ монта́на и҆лѝ пріскі́ллꙋ; и҆́бо не сꙋ́ть креще́ны крести́вшіеся въ то̀, что̀ на́мъ не пре́дано. Посемꙋ̀ хотя̀ вели́кій діонѵ́сій и҆ не примѣ́тилъ сегѡ̀, но на́мъ не до́лжно соблюда́ти подража́нія непра́вильномꙋ: и҆́бо нелѣ́пость сама̀ собо́ю ꙗ҆́вна, и҆ ꙗ҆́сна для всѣ́хъ, и҆мѣ́ющихъ хотя̀ нѣ́сколькѡ разсꙋжде́нія. Каѳа́ры сꙋ́ть и҆з̾ числа̀ раско́льникѡвъ. Ѻ҆дна́кѡ ѹ҆го́дно бы́ло дрє́внимъ, ка́къ то кѷпріа́нꙋ и҆ на́шемꙋ фірміліа́нꙋ, є҆ди́номꙋ ѡ҆предѣле́нію подчини́ти всѣ́хъ си́хъ: каѳа́рѡвъ, є҆нкраті́тѡвъ, ѵ҆дропараста́тѡвъ, и҆ а҆потакті́тѡвъ. И҆́бо, хотя̀ нача́ло ̾ѿстꙋпле́нія произошло̀ чрез̾ раско́лъ, но ̾ѿстꙋпи́вшіе ̾ѿ це́ркви ѹ҆жѐ не и҆мѣ́ли на себѣ̀ благода́ти ст҃а́гѡ дх҃а. И҆́бо ѡ҆скꙋдѣ́ло преподая́ніе благода́ти, потомꙋ̀ что̀ пресѣ́клось зако́нное прее́мство. И҆́бо пе́рвые ̾ѿстꙋпи́вшіе полꙋчи́ли посвяще́ніе ̾ѿ ѻ҆тцє́въ, и҆, чрез̾ возложе́ніе рꙋ́къ и҆́хъ, и҆мѣ́ли дарова́ніе дꙋхо́вное. Но ̾ѿто́рженные, содѣ́лавшись міря́нами, не и҆мѣ́ли вла́сти ни крести́ти, ни рꙋкополага́ти, и҆ не моглѝ препода́ти дрꙋги̑мъ благода́ть ст҃а́гѡ дх҃а, ̾ѿ кото́рой са́ми ̾ѿпа́ли. Почемꙋ̀ приходя́щихъ ̾ѿ ни́хъ къ це́ркви, ꙗ҆́кѡ креще́нныхъ міря́нами, дре́вніе повелѣва́ли вно́вь ѡ҆чища́ти и҆́стинс. т҃ѳнымъ церко́внымъ креще́ніемъ. Но поели́кꙋ нѣ́котѡрымъ въ а҆́сіи рѣши́тельнѡ ѹ҆го́дно бы́ло, ра́ди назида́нія мно́гихъ, прія́ти креще́ніе и҆́хъ: то да бꙋ́детъ ѻ҆но̀ пріе́млемо. Подоба́етъ же на́мъ ѹ҆смотрѣ́ти ѕлоꙋхищре́ніе є҆нкраті́тѡвъ. Ѻ҆нѝ, да содѣ́лаютъ себя̀ неꙋдобопріе́млемыми для це́ркви, ѹ҆мы́слили предꙋскоря́я соверша́ти со́бственное креще́ніе, чрез̾ что̀ и҆ со́бственный сво́й ѻ҆бы́чай и҆змѣни́ли. И҆ та́къ, поели́кꙋ ѡ҆ ни́хъ ничегѡ̀ ꙗ҆́снѡ не и҆зречено̀, мню̀, ꙗ҆́кѡ прили́чно на́мъ ̾ѿверга́ти и҆́хъ креще́ніе: и҆ а҆́ще бы кто̀ прія́лъ ̾ѿ ни́хъ ѻ҆́ное, такова́го приходя́щаго къ цр҃кви, крести́ти. Но а҆́ще сіѐ и҆мѣ́етъ бы́ти препя́тствіемъ ѻ҆́бщемꙋ благосозида́нію: то па́ки подоба́етъ держа́тися ѻ҆бы́чая, и҆ слѣ́довати ѻ҆тца́мъ, благоꙋсмотри́тельнѡ ѹ҆стро́ившымъ дѣла̀ на́ши. И҆́бо ꙗ҆́ ѡ҆паса́юся, что́бы на́мъ тогда̀, ка́къ хо́щемъ ѹ҆держа́ти и҆̀хъ ̾ѿ поспѣ́шнагѡ креще́нія, не воспяти́ти спаса́емыхъ стро́гостію ̾ѿлага́тельства. А҆́ще же ѻ҆нѝ сохраня́ютъ на́ше креще́ніе, сіѐ да не ѹ҆стыжда́етъ на́съ: и҆́бо мы̀ ѡ҆бя́заны не воздава́ти и҆̀мъ за то̀ благода́рность, но покаря́тися пра́виламъ съ то́чностію. Всемѣ́рнѡ же да бꙋ́детъ ѹ҆стано́влено, что́бы, по́слѣ и҆́хъ креще́нія, приходя́щіе къ це́ркви, бы́ли помазꙋ́емы ̾ѿ вѣ́рныхъ, и҆ та́кѡ пристꙋпа́ли къ та́инствамъ. Впро́чемъ вѣ́даю, ꙗ҆́кѡ бра́тій зѡі́на и҆ саторні́на, бы́вшихъ въ и҆́хъ ѻ҆́бществѣ, мы̀ прія́ли на каѳе́дрꙋ є҆пі́скопскꙋю: почемꙋ̀ соедине́нныхъ съ и҆́хъ ѻ҆́бществомъ ѹ҆жѐ не мо́жемъ стро́гимъ сꙋдо́мъ ̾ѿчꙋжда́ти ̾ѿ це́ркви, постанови́въ, приня́тіемъ є҆пі́скопѡвъ, ка́къ бы нѣ́кое пра́вило ѻ҆бще́нія съ ни́ми.

ПРА́ВИЛО в҃.

Ѹ҆мы́шленнѡ погꙋби́вшая зача́тый во ѹ҆тро́бѣ пло́дъ, подлежи́тъ ѡ҆сꙋжде́нію смертоꙋбі́йства. То́нс. т҃ікагѡ различе́нія плода̀ ѡ҆бразова́вшагѡся, и҆лѝ є҆щѐ неѡбразо́ваннагѡ ѹ҆ на́съ нѣ́сть. И҆́бо здѣ́сь полага́ется взыска́ніе не то́кмѡ за и҆мѣ́вшее роди́тися, но и҆ за то̀, что̀ навѣ́товала само́й себѣ̀: поели́кꙋ жє́ны, ̾ѿ таковы́хъ покꙋше́ній, весьма̀ ча́стѡ ѹ҆мира́ютъ. Съ си́мъ совокꙋпля́ется и҆ погꙋбле́ніе плода̀, ꙗ҆́кѡ дрꙋго́е ѹ҆бі́йство, ̾ѿ дерза́ющихъ на сіѐ ѹ҆мы́шленнѡ. Впро́чемъ подоба́етъ не до кончи́ны простира́ти покая́ніе и҆́хъ, но пріима́ти и҆̀хъ въ ѻ҆бще́ніе, по и҆сполне́ніи десятѝ лѣ́тъ: врачева́ніе же и҆змѣря́ти не вре́менемъ, но ѻ҆́бразомъ покая́нія.

ПРА́ВИЛО г҃.

Діа́конъ, по прія́тіи діа́конства соблꙋди́вшій, хотя̀ до́лженъ и҆зве́рженъ бы́ти ̾ѿ діа́конства, но, по низведе́ніи на мѣ́сто міря́нъ, да не ̾ѿлꙋча́ется ̾ѿ пріѡбще́нія: и҆́бо дре́внее є҆́сть пра́вило, и҆зверга́емыхъ ̾ѿ свяще́ннагѡ сте́пени, подверга́ти семꙋ̀ то́кмѡ ѻ҆́бразꙋ наказа́нія, въ че́мъ, ка́къ мнѣ̀ мни́тся, дре́вніе послѣ́довали ѻ҆́номꙋ зако́нꙋ: не ̾ѿмсти́ши два́жды за є҆ди́но[3]. Є҆́сть же и҆ дрꙋга́я семꙋ̀ причи́на: и҆́бо находя́щіеся въ чи́нѣ міря́нъ, бы́въ и҆зве́ржены ̾ѿ мѣ́ста вѣ́рныхъ, па́ки пріе́млются на мѣ́сто, съ кото́рагѡ низпа́ли. А҆ діа́конъ подверга́ется наказа́нію и҆зверже́нія, продолжа́ющемꙋся навсегда̀. И҆ та́къ ѻ҆нѝ ѡ҆грани́чились си́мъ є҆ди́нымъ наказа́ніемъ, поели́кꙋ не возвраща́ется є҆мꙋ̀ діа́конство. Та́кѡ по ѹ҆ста́вамъ. Воѻбще́ же и҆́стиннѣйшее врачева́ніе є҆́сть ѹ҆дале́ніе ̾ѿ грѣха̀, та́къ что̀ ̾ѿве́ргшій благода́ть, ра́ди ѹ҆дово́льствія пло́ти, подае́тъ на́мъ соверше́нное доказа́тельство своегѡ̀ и҆сцѣле́нія, а҆́ще съ сокрꙋше́ніемъ се́рдца, и҆ со вся́кимъ порабоще́ніемъ пло́ти возс. та҃ідержа́нію, ̾ѿстꙋ́питъ ̾ѿ ѹ҆дово́льствій, кото́рыми совраще́нъ бы́лъ. И҆ та́къ подоба́етъ на́мъ и҆ то̀ и҆ дрꙋго́е вѣ́дати, и҆ принадлежа́щее къ соверше́нствꙋ покая́нія, и҆ при́нятое въ ѻ҆бы́чай: для не достига́ющихъ же соверше́нства покая́нія, послѣ́довати пре́данномꙋ ѹ҆ста́вꙋ.

ПРА́ВИЛО д҃.

Ѡ҆ троебра́чныхъ и҆ многобра́чныхъ мы̀ положи́ли то́ же пра́вило, како́е и҆ ѡ҆ второбра́чныхъ, по соразмѣ́рности. Второбра́чныхъ ̾ѿлꙋча́ютъ на го́дъ, а҆ дрꙋгі́е на два̀, троебра́чныхъ же на трѝ, а҆ ча́стѡ и҆ на четы́ре го́да, и҆ нарица́ютъ таковы́й сою́зъ ѹ҆жѐ не бра́комъ, но многоже́нствомъ, и҆лѝ па́че нака́заннымъ блꙋдо́мъ. Посемꙋ̀ и҆ гд҃ⷭ҇ь самаряны́нѣ, премѣни́вшей пя́ть мꙋже́й, глаго́летъ: є҆го́же ны́нѣ и҆́маши, нѣ́сть тѝ мꙋ́жъ[4], показꙋ́я тѣ́мъ, ꙗ҆́кѡ престꙋпи́вшіе предѣ́лъ второбра́чія, ѹ҆жѐ не досто́йны нарица́тися и҆мена́ми мꙋ́жа и҆лѝ жены̀. Мы́ же не ̾ѿ пра́вила, но ̾ѿ послѣ́дованія предше́ственникамъ, прія́ли ѻ҆бы́чай, троебра́чныхъ ̾ѿлꙋча́ти на пя́ть лѣ́тъ. Впро́чемъ не до́лжно совсѣ́мъ загражда́ти для ни́хъ вхо́дъ въ цр҃ковь, но ѹ҆досто́ивати и҆̀хъ слꙋ́шанія писа́ній два̀ и҆лѝ трѝ го́да, а҆ посе́мъ допꙋска́ти до стоя́нія, но ѹ҆де́рживати ̾ѿ пріѡбще́нія святы́ни, и҆ та́кѡ, пока́зывающихъ нѣ́кій пло́дъ покая́нія, возстановля́ти на мѣ́сто ѻ҆бще́нія.

ПРА́ВИЛО є҃.

Є҆ретікѡ́въ, при кончи́нѣ ка́ющихся, подоба́етъ пріима́ти. Ꙗ҆́вно же є҆́сть, ꙗ҆́кѡ пріима́ти не без̾ разсꙋжде́нія, но со и҆спыта́ніемъ, и҆́стинное ли показꙋ́ютъ покая́ніе, и҆ и҆мѣ́ютъ ли плоды̀, свидѣ́тельствꙋющіе тща́ніе ѡ҆ спасе́ніи.

с. тв҃і

ПРА́ВИЛО ѕ҃.

Любодѣя̑нія посвяще́нныхъ бг҃ꙋ да не ѡ҆браща́ются въ бра́къ, но вся́чески да расторга́ется и҆́хъ совокꙋпле́ніе. И҆́бо сіѐ и҆ для ѹ҆твержде́нія цр҃кви поле́зно, и҆ є҆ретіка́мъ не да́стъ слꙋ́чая ѹ҆коря́ти на́съ, а҆́ки бы привлека́емъ къ себѣ̀ попꙋще́ніемъ грѣха̀.

ПРА́ВИЛО з҃.

Мꙋжело́жники, и҆ скотоло́жники, и҆ ѹ҆бі́йцы, и҆ ѡ҆трави́тели, и҆ прелюбодѣ́и, и҆ і҆дѡлопокло́нники, тогѡ́ же ѡ҆сꙋжде́нія досто́йны. Посемꙋ̀ пра́вило, како́е и҆мѣ́ешь ѡ҆ про́чихъ, соблюда́й и҆ ѡ҆ си́хъ: а҆ ѡ҆ прія́тіи ка́явшихся три́десять лѣ́тъ въ нечистотѣ̀, кото́рꙋю содѣ́лали въ невѣ́дѣніи, и҆ сомнѣва́тися на́мъ не надлежа́ло. И҆́бо и҆ невѣ́дѣніе твори́тъ и҆̀хъ досто́йными снизхожде́нія, и҆ доброво́льное и҆сповѣ́даніе, и҆ протече́ніе сто́ль до́лгагѡ вре́мени: и҆́бо ѻ҆нѝ є҆два̀ не ве́сь вѣ́къ человѣ́ческій пре́даны бы́ли сатанѣ̀, да наꙋча́тся не безчи́нствовати. Посемꙋ̀, повелѝ ѹ҆жѐ не̾ѿло́жнѡ прія́ти и҆̀хъ, и҆ наипа́че. а҆́ще и҆мѣ́ютъ сле́зы, преклоня́ющыя тебя̀ къ милосе́рдію, и҆ ꙗ҆вля́ютъ житіѐ, досто́йное ми́лованія.

ПРА́ВИЛО и҃.

Во гнѣ́вѣ на свою̀ женꙋ̀ ѹ҆потреби́вшій сѣки́рꙋ, є҆́сть ѹ҆бі́йца. Справедли́вѡ же и҆ досто́йнѡ твоегѡ̀ благоразꙋ́мія воспомянꙋ́лъ ты̀ мнѣ̀, да рекꙋ̀ ѡ҆ се́мъ простра́ннѣе: и҆́бо мно́гѡ ра́зностей междꙋ̀ во́льнымъ и҆ нево́льнымъ А҆́ще кто̀ бро́сивъ ка́мень на пса̀, и҆лѝ на дре́во, попаде́тъ въ человѣ́ка: сіѐ є҆́сть дѣ́ло соверше́ннѡ непроизво́льное, и҆ не бы́вшее въ намѣ́реніи дѣ́йствꙋющагѡ: и҆́бо намѣ́реніе є҆гѡ̀ бы́ло ̾ѿрази́ти ѕвѣ́ря, и҆лѝ сби́ти пло́дъ, подве́ргшійся же ѹ҆да́рꙋ, са́мъ собо́ю наше́лъ на него̀, проходя̀ ми́мѡ: и҆ та́къ сіѐ с. тг҃і є҆́сть нево́льное. Нево́льное та́кожде и҆ то̀, а҆́ще кто̀, жела́я кого̀ и҆спра́вити, ѹ҆да́ритъ ремне́мъ, и҆лѝ жезло́мъ не тяже́лымъ, и҆ біе́мый ѹ҆́мретъ: и҆́бо здѣ́сь разсма́тривается намѣ́реніе, ꙗ҆́кѡ ѻ҆́нъ хотѣ́лъ и҆спра́вити согрѣши́вшаго, а҆ не ѹ҆мертви́ти. Подо́бнымъ ѻ҆́бразомъ къ нево́льнымъ ѹ҆бі́йствамъ принадлежи́тъ и҆ то̀, а҆́ще кто̀, защища́я себя̀ въ дра́кѣ, дре́вомъ и҆лѝ рꙋко́ю, неща́днѡ нанесе́тъ проти́вникꙋ ѹ҆да́ръ въ ѻ҆па́сное мѣ́сто, и҆мѣ́въ намѣ́реніе причини́ти бо́ль, а҆ не совсѣ́мъ ѹ҆би́ти: но сіѐ ѹ҆жѐ приближа́ется къ во́льномꙋ ѹ҆бі́йствꙋ: и҆́бо ѹ҆потреби́вшій таково́е ѻ҆рꙋ́діе къ защище́нію, и҆лѝ безща́днѡ нане́сшій ѹ҆да́ръ ꙗ҆́венъ є҆́сть въ то́мъ, ꙗ҆́кѡ не пощади́лъ человѣ́ка, бꙋ́дꙋчи ѡ҆блада́емъ стра́стію. Подо́бнѡ, ѹ҆потреби́вшій въ ѻ҆рꙋ́діе тяже́лое де́рево и҆ ка́мень, бо́льшій си́лы человѣ́ческой, причисля́ется къ нево́льнымъ ѹ҆бі́йцамъ, ꙗ҆́кѡ и҆но́е и҆мѣ́вшій въ намѣ́реніи, а҆ и҆но́е содѣ́лавшій: и҆́бо ѻ҆́нъ во гнѣ́вѣ нане́съ тако́й ѹ҆да́ръ, что̀ ѹ҆мертви́лъ пораже́ннаго, хотя̀, мо́жетъ бы́ть, намѣ́реніе є҆гѡ̀ бы́ло то́кмѡ рази́ти, а҆ не совсѣ́мъ ѹ҆мертви́ти. Но кто̀ ѹ҆потреби́лъ ме́чь, и҆лѝ что́ либо таково́е, то́тъ не и҆мѣ́етъ никако́гѡ и҆звине́нія, и҆ ѻ҆со́беннѡ бро́сившій въ кого́ либо сѣки́рꙋ. И҆́бо ѻ҆́нъ не и҆з̾ рꙋкѝ ѹ҆да́рилъ є҆го̀, та́къ что́бы мѣ́ра ѹ҆да́ра зави́сѣла ̾ѿ негѡ̀, но бро́силъ та́къ, что̀ ѹ҆да́рꙋ, и҆ ̾ѿ тя́жести желѣ́за, и҆ ̾ѿ ѻ҆строты̀ є҆гѡ̀, и҆ ̾ѿ стремле́нія чрез̾ большо́е простра́нство, по неѡбходи́мости надлежа́ло бы́ти смерте́льнымъ. Соверше́ннѡ та́кожде во́льное, и҆ въ се́мъ никако́мꙋ сомнѣ́нію не подлежа́щее, є҆́сть то̀, что̀ дѣ́лается разбо́йниками и҆ въ непрія́тельскихъ наше́ствіяхъ: и҆́бо разбо́йники ѹ҆бива́ютъ, ра́ди де́негъ, и҆збѣга́я ѡ҆бличе́нія с. тд҃і въ ѕлодѣя́ніи: а҆ находя́щіеся на войнѣ̀ и҆́дꙋтъ на пораже́ніе сопроти́вныхъ, съ ꙗ҆́внымъ намѣ́реніемъ, не ѹ҆страши́ти, нижѐ вразꙋми́ти, но и҆стреби́ти ѻ҆́ныхъ. Є҆ще́ же, а҆́ще кто̀ напои́тъ кого́ либо та́йнымъ соста́вомъ [хотя̀ бы то̀ бы́ло для и҆ны́я нѣ́кія причи́ны], и҆ ѹ҆мертви́тъ: такова́го признае́мъ во́льнымъ ѹ҆бі́йцею. Сіѐ ча́стѡ дѣ́лаютъ же́ны, покꙋша́яся нѣ́кими ѡ҆бая́ніями и҆ чарова́ніями, привлека́ти нѣ́кихъ въ любо́вь къ себѣ̀, и҆ даю́щыя и҆̀мъ враче́бные соста́вы, производя́щіе помраче́ніе ра́зꙋма. Хотя̀ таковы̑я, причини́въ сме́рть, содѣ́лали не то̀, что̀ и҆мѣ́ли въ намѣ́реніи: ѻ҆дна́кѡ, за волшебство̀ и҆ заня́тіе возбране́нное, причисля́ются къ во́льнымъ ѹ҆бі́йцамъ. Посемꙋ̀ и҆ даю́щыя врачевство̀ для и҆зверже́нія зача́тагѡ въ ѹ҆тро́бѣ, сꙋ́ть ѹ҆бі́йцы, ра́внѡ и҆ пріе́млющыя дѣтоꙋбі́йствєнныя ѻ҆тра́вы. Ѡ҆ се́мъ досе́лѣ.

ПРА́ВИЛО ѳ҃.

Гд҃ⷭ҇не и҆зрече́ніе, ꙗ҆́кѡ не позволи́тельно разрѣша́тися ̾ѿ бра́ка, ра́звѣ словесѐ прелюбодѣ́йна[5], по ра́зꙋмꙋ ѻ҆́нагѡ, ра́внѡ прили́чествꙋетъ и҆ мꙋжа́мъ и҆ же́намъ. Но не то̀ въ ѻ҆бы́чаѣ. Ѡ҆ жена́хъ нахо́димъ мно́гѡ стро́гихъ и҆зрече́ній. А҆по́столъ глаго́летъ: ꙗ҆́кѡ прилѣпля́яйся сквернодѣ́йцѣ, є҆ди́но тѣ́ло є҆́сть[6]. и҆ і҆еремі́а: а҆́ще бꙋ́детъ жена̀ мꙋ́жꙋ и҆но́мꙋ, не возврати́тся къ мꙋ́жꙋ своемꙋ̀, но ѡ҆скверни́вшися ѡ҆скверни́тся[7]. и҆ па́ки: держа́й прелюбодѣ́йцꙋ, безꙋ́менъ и҆ нечести́въ[8]. Жена́мъ же ѻ҆бы́чай повелѣва́етъ ѹ҆де́рживати мꙋже́й свои́хъ, хотя̀ ѻ҆нѝ прелюбодѣ́йствꙋютъ и҆ въ блꙋдѣ̀ сꙋ́ть. Посемꙋ̀ не зна́ю, мо́жетъ ли пря́мѡ прелюбодѣ́йцею нарещи́ся живꙋ́щая съ мꙋ́с. тє҃іжемъ, ѡ҆ста́вленнымъ свое́ю жено́ю: и҆́бо здѣ́сь ѡ҆бвине́ніе па́даетъ на ѡ҆ста́вившꙋю мꙋ́жа, по како́й причи́нѣ ѻ҆на̀ ̾ѿстꙋпи́ла ̾ѿ бра́ка. И҆́бо а҆́ще потомꙋ̀, ꙗ҆́кѡ біе́ма была̀, и҆ не стерпѣ́ла ѹ҆да́рѡвъ: то подоба́ло па́че претерпѣ́ти, не́жели разлꙋча́тися съ сожи́телемъ: а҆́ще потомꙋ̀, ꙗ҆́кѡ не стерпѣ́ла ѹ҆тра́ты и҆мѣ́нія, и҆ се́й предло́гъ не досто́инъ ѹ҆важе́нія. А҆́ще же и҆ потомꙋ̀, ꙗ҆́кѡ мꙋ́жъ є҆я̀ живе́тъ въ блꙋдѣ̀, наблюде́нія сегѡ̀ не и҆мѣ́емъ въ цр҃ко́вномъ ѻ҆бы́чаѣ: но и҆ ̾ѿ невѣ́рнагѡ мꙋ́жа не повелѣно̀ разлꙋча́тися женѣ̀, а҆ пребыва́ти съ ни́мъ, по неизвѣ́стности, что̀ послѣ́дꙋетъ. Что́ бо вѣ́си же́но, а҆́ще мꙋ́жа спасе́ши[9]; Посемꙋ̀ жена̀, ѡ҆ста́вившая своего̀ мꙋ́жа, є҆́сть прелюбодѣ́йца, а҆́ще перешла̀ къ дрꙋго́мꙋ мꙋ́жꙋ: а҆ мꙋ́жъ ѡ҆ста́вленный, досто́инъ снизхожде́нія, и҆ сожи́тельствꙋющая съ ни́мъ не ѡ҆сꙋжда́ется. А҆́ще же мꙋ́жъ, ̾ѿстꙋпи́въ ̾ѿ жены̀, по́йметъ и҆нꙋ́ю: то и҆ са́мъ ѻ҆́нъ є҆́сть прелюбодѣ́й, поне́же твори́тъ ю҆̀ прелюбодѣ́йствовати, и҆ живꙋ́щая съ ни́мъ є҆́сть прелюбодѣ́йца: поели́кꙋ ̾ѿвлекла̀ къ себѣ̀ чꙋжа́го мꙋ́жа.

ПРА́ВИЛО і҃.

Кленꙋ́щіеся не пріима́ти рꙋкоположе́нія, когда̀ произнеслѝ кля́твꙋ, да не принꙋжда́ются нарꙋша́ти ѻ҆́нꙋю. И҆́бо хотя̀ и҆ мни́тся бы́ти нѣ́кое пра́вило, снисходя́щее таковы̑мъ: ѻ҆дна́кѡ мы̀ дозна́ли ѻ҆́пытомъ, что̀ не благопоспѣ́шествꙋется постꙋпи́вшымъ проти́вꙋ кля́твы. До́лжно же разсма́тривати и҆ ѻ҆́бразъ кля́твы, и҆ сло́ва и҆ расположе́ніе, съ кото́рымъ ѻ҆нѝ кляли́ся, и҆ тѡ́нкія въ слова́хъ прибавлє́нія: и҆ а҆́ще ни съ како́й стороны̀ нѣ́тъ никако́гѡ ѡ҆блегче́нія ̾ѿ си́лы кля́твы, то подоба́етъ соверше́ннѡ ѡ҆ставс. тѕ҃іля́ти таковы́хъ. Дѣ́ло же севи́ра, и҆лѝ поста́вленнагѡ и҆́мъ пресвѵ́тера, по моемꙋ̀ мнѣ́нію [а҆́ще и҆ твоѐ съ мои́мъ согла́сно], полꙋча́етъ нѣ́которое разрѣше́ніе кля́твы слѣ́дꙋющимъ ѻ҆́бразомъ. Село̀ ѻ҆́ное, въ кото́рое произведе́нъ человѣ́къ се́й, подчине́нное до ны́нѣ місѳі́и, повелѝ причи́слити къ маса́дамъ: и҆́бо таки́мъ ѻ҆́бразомъ, и҆ ѻ҆́нъ не бꙋ́детъ клятвопрестꙋ́пникомъ, не преходя̀ ̾ѿ мѣ́ста, и҆ ло́ггінъ, и҆мѣ́я съ собо́ю кѷріа́ка, не ѹ҆праздни́тъ це́ркви, и҆ не подве́ргнетъ дꙋшѝ свое́й ѡ҆сꙋжде́нію, за ѡ҆пꙋстѣ́ніе ѻ҆́ныя: и҆ мы̀ не возмни́мся дѣ́лати нѣ́что проти́вꙋ пра̑вилъ, снисходя̀ къ кѷріа́кꙋ, кото́рый кля́лся пребыва́ти въ мінда́нахъ, но согласи́лся переведе́нъ бы́ти. И҆́бо возвраще́ніе є҆гѡ̀ бꙋ́детъ соблюде́ніемъ кля́твы: а҆ є҆мꙋ̀ поко́рность распоряже́нію не вмѣни́тся въ клятвопрестꙋпле́ніе: поели́кꙋ къ кля́твѣ є҆гѡ̀ не бы́ло присовокꙋ́плено тогѡ̀, ꙗ҆́кѡ ѻ҆́нъ нижѐ на кра́ткое вре́мя не ѡ҆ста́витъ мінда́нѡвъ, но во всѐ про́чее вре́мя пребꙋ́детъ та́мѡ. Севи́рꙋ же, и҆звиня́ющемꙋся забве́ніемъ, мы̀ прости́мъ, ре́кше, ꙗ҆́кѡ вѣ́дꙋщій та́йное, не попꙋ́ститъ це́ркви свое́й понестѝ вре́дъ ̾ѿ тогѡ̀, кто̀ въ нача́лѣ постꙋпа́лъ не по пра́виламъ, но связа́лъ себя̀ кля́твою вопрекѝ є҆ѵа́нгелію: кто̀ перемѣще́ніемъ ѹ҆чи́лъ клятвопрестꙋпле́нію, ны́нѣ же лже́тъ притво́рнымъ забве́ніемъ. Но поели́кꙋ мы̀ не сꙋдіѝ серде́цъ, но сꙋ́димъ потомꙋ̀, что̀ слы́шимъ: то гд҃ⷭ҇ꙋ предѡста́вимъ ̾ѿмще́ніе, а҆ са́ми без̾ сомнѣ́нія пріи́мемъ є҆го̀, да́въ проще́ніе забве́нію, ꙗ҆́кѡ не́мощи человѣ́ческой.

ПРА́ВИЛО а҃і.

Нево́льное содѣ́лавшій ѹ҆бі́йство, дово́льное поне́съ наказа́ніе, бы́въ ̾ѿлꙋче́нъ въ продолже́ніи є҆динона́десяти лѣ́тъ. И҆́бо ꙗ҆́вно є҆́сть, ꙗ҆́кѡ ѡ҆ полꙋчи́вшихъ с. тз҃і ра̑ны мы̀ должны̀ соблюда́ти мѡѷсе́евъ зако́нъ[10], и҆ сле́гшаго на ѻ҆́дръ ̾ѿ полꙋче́нныхъ ра́нъ, но пото́мъ па́ки ходи́вшаго, при по́мощи жезла̀, не почита́ти ѹ҆би́тымъ: а҆́ще же и҆ не вста́лъ по́слѣ ра́нъ, но поне́же би́вшій не хотѣ́лъ ѹ҆мертви́ти є҆го̀: то ѻ҆́нъ є҆́сть, хотя̀ и҆ ѹ҆бі́йца, ѻ҆дна́кѡ, по намѣ́ренію, нево́льный.

ПРА́ВИЛО в҃і.

Двоеже́нцамъ пра́вило[11] соверше́ннѡ возбрани́ло бы́ти слꙋжи́телями це́ркви.

ПРА́ВИЛО г҃і.

Ѹ҆біе́ніе на бра́ни ѻ҆тцы̀ на́ши[12] не вмѣня́ли за ѹ҆бі́йство, и҆звиня́я, ка́къ мни́тся мнѣ̀, побо́рникѡвъ цѣломꙋ́дрія и҆ благоче́стія. Но мо́жетъ бы́ть добро̀ бы́ло бы совѣ́товати, что́бы ѻ҆нѝ, ка́къ и҆мѣ́ющіе нечи́стыя рꙋ́ки, трѝ го́да ѹ҆держа́лися ̾ѿ пріѡбще́нія то́кмѡ ст҃ы́хъ та̑инъ.

ПРА́ВИЛО д҃і.

Взе́млющій ли́хвꙋ, а҆́ще восхо́щетъ непра́веднꙋю коры́сть и҆стощи́ти на ни́щихъ, и҆ впре́дь ̾ѿ недꙋ́га любостяжа́нія свобо́денъ бы́ти, мо́жетъ при́нятъ бы́ти въ свяще́нство.

ПРА́ВИЛО є҃і.

Дивлю́ся же, ꙗ҆́кѡ ты̀ тре́бꙋеши ̾ѿ писа́нія бꙋква́льныя то́чности, и҆ дꙋ́маеши, ꙗ҆́кѡ рече́ніе перево́да є҆́сть принꙋжде́нно, когда̀ ѻ҆́нъ хорошѡ̀ выража́етъ ѡ҆знача́емый и҆́мъ предме́тъ, но не прелага́етъ со́бственнѡ значе́нія сло́ва є҆вре́йскагѡ. Впро́чемъ не до́лжно без̾ внима́нія прейтѝ вопроше́ніе, предложе́нное мꙋ́жемъ любозна́тельнымъ. Пти̑цы небє́сныя и҆ ры̑бы морскі́я, и҆ при сотворе́ніи мі́ра, с. ти҃і и҆мѣ́ли ѻ҆дина́ковое происхожде́ніе: поели́кꙋ ѻ҆́ба сіѝ ро́ды живо́тныхъ и҆зведены̀ и҆з̾ воды̀: причи́на же семꙋ̀ та̀, ꙗ҆́кѡ ѻ҆́ба и҆мѣ́ютъ ѻ҆дно̀ и҆ то́ же сво́йство. И҆́бо ѻ҆днѣ̀ пла́ваютъ въ водѣ̀, а҆ дрꙋгі́я пла́ваютъ по во́здꙋхꙋ. Посемꙋ̀ и҆ ѹ҆помя́нꙋто ѡ҆ ни́хъ совокꙋ́пнѡ. Соста́въ же сло́въ ѱалма̀[13] не то́чнѡ соѡбраже́нъ въ ̾ѿноше́ніи къ ры́бамъ, но въ ̾ѿноше́ніи ко всѣ̑мъ тва́рямъ, живꙋ́щымъ въ вода́хъ, соверше́ннѡ пра́виленъ. И҆́бо человѣ́кꙋ поко́рны пти̑цы небє́сныя и҆ ры̑бы морскі́я, и҆ не сіѝ то́кмѡ, но и҆ всѣ̀ тва̑ри, преходя́щыя стєзѝ морскі́я. И҆́бо не всѐ живꙋ́щее въ водѣ̀ є҆́сть ры́ба, ка́къ то: китоѻбра́зныя живѡ́тныя, ки́ты, зиге́ны, дельфи́ны, тюленѝ, є҆ще́ же ко́ни, псы̀, пилы̑, и҆ мечѝ ры̑бы, и҆ морскі́я кра̑вы: и҆ є҆́стьли ѹ҆го́дно, кропи̑вы, и҆ гре́бни, и҆ всѣ̀ черепокѡ́жныя, и҆з̾ ко́ихъ ни є҆ди́но не є҆́сть ры́ба, всѣ́ же сꙋ́ть преходя́щыя стєзѝ морскі́я. Таки́мъ ѻ҆́бразомъ трѝ сꙋ́ть ро́да: пти̑цы небє́сныя, ры̑бы морскі́я, и҆ тѣ̀ живѡ́тныя, ѡ҆бита́ющыя въ вода́хъ, котѡ́рыя ̾ѿлича́ются ̾ѿ ры́бъ, но та́кожде прехо́дятъ стєзѝ морскі́я.

ПРА́ВИЛО ѕ҃і.

Неема́нъ вели́къ не ѹ҆ гд҃ⷭ҇а, но ѹ҆ господи́на своегѡ̀: то́ є҆сть, ѻ҆́нъ бы́лъ є҆ди́нымъ и҆з̾ вельмо́жъ ѹ҆ царя̀ сѵ́рскагѡ. И҆ та́къ вника́й въ писа́ніе съ то́чностію, и҆ въ не́мъ само́мъ ѡ҆бря́щеши разрѣше́ніе вопро́са.

с. тѳ҃і

ТОГѠ́ ЖЕ КЪ ТОМꙊ́ ЖЕ КАНОНІ́ЧЕСКОЕ посла́ніе второ́е.

ПРЕДИСЛО́ВІЕ.

Давнѡ̀ написа́въ ̾ѿвѣ́ты на вопрошє́нія, предложе́нныя мнѣ̀ ̾ѿ твоегѡ̀ благоче́стія, не посла́лъ ꙗ҆́ сегѡ̀ писа́нія, бы́въ ѹ҆де́ржанъ, ча́стію болѣ́знію продолжи́тельною и҆ ѻ҆па́сною, ча́стію же недоста́ткомъ слꙋжа́щихъ. И҆́бо не мно́гѡ ѹ҆ на́съ люде́й и҆ зна́ющихъ пꙋ́ть, и҆ гото́выхъ на таковы́я послꙋша̑нія. Посемꙋ̀ ѹ҆зна́въ причи́ны замедле́нія, да́й на́мъ проще́ніе въ ѻ҆́номъ. Ѹ҆диви́лся же ꙗ҆́ твое́й любвѝ къ ѹ҆че́нію, и҆ кꙋ́пнѡ твоемꙋ̀ смиренномꙋ́дрію. И҆́бо ты̀ хо́щешь ѹ҆чи́тися, когда̀ тебѣ̀ ввѣ́ренъ чи́нъ ѹ҆ча́щагѡ, и҆ прито́мъ ѹ҆чи́тися ̾ѿ на́съ, когда̀ ѹ҆ на́съ нѣ́тъ ничегѡ̀ вели́кагѡ, въ ̾ѿноше́ніи къ позна́нію. Ѻ҆дна́кѡ, поели́кꙋ ты̀, ра́ди стра́ха бж҃ія, не ̾ѿрека́ешься твори́ти дѣ́ло, кото́рое не легкѡ̀ содѣ́лалося бы ̾ѿ дрꙋга́гѡ: то должны̀ и҆ мы̀ твоемꙋ̀ расположе́нію и҆ благо́мꙋ тща́нію споспѣ́шествовати, да́же па́че си́лы.

ПРА́ВИЛО з҃і.

Вопроша́лъ ты̀ на́съ ѡ҆ пресвѵ́терѣ віано́рѣ, мо́жетъ ли ѻ҆́нъ при́нятъ бы́ти въ кли́ръ, по́слѣ с. т҃к да́нной и҆́мъ кля́твы; По́мню, ꙗ҆́кѡ для а҆нтіохі́йскагѡ кли́ра ѹ҆жѐ и҆зложи́лъ ꙗ҆́ нѣ́кое ѻ҆́бщее ѡ҆предѣле́ніе ѡ҆ всѣ́хъ кля́вшихся кꙋ́пнѡ съ ни́мъ, то́ є҆сть, да ѹ҆страня́ются ѻ҆нѝ ̾ѿ всенаро́дныхъ собра́ній, ча́стнѡ же да дѣ́йствꙋютъ пресвѵ́терски. Си́мъ са́мымъ и҆ є҆мꙋ̀ дае́тся разрѣше́ніе для є҆гѡ̀ слꙋже́нія: потомꙋ̀ что̀ свяще́нство є҆гѡ̀ не въ а҆нтіохі́и, но во і҆коні́и, кото́рꙋю, ка́къ ты̀ на́мъ писа́лъ, ѻ҆́нъ и҆збра́лъ для жи́тельства, вмѣ́стѡ а҆нтіохі́и. И҆ та́къ мо́жетъ при́нятъ бы́ти ѻ҆́ный мꙋ́жъ: то́кмѡ твоѐ благоче́стіе да востре́бꙋетъ ̾ѿ негѡ̀ раска́янія въ поползнове́нности къ кля́твѣ, кото́рꙋю ѻ҆́нъ да́лъ человѣ́кꙋ невѣ́рномꙋ, не возмо́гши понестѝ безпоко́йства ̾ѿ ѻ҆́нагѡ ма́лагѡ бѣ́дствія.

ПРА́ВИЛО и҃і.

Ѡ҆ па́дшихъ дѣ́вахъ, ѡ҆бѣща́вшихся гд҃ⷭ҇ꙋ въ чистотѣ̀ жи́ти, но пото́мъ впа́дшихъ въ плотскі́я стра̑сти и҆ ѻ҆бѣ́ты своѝ нарꙋ́шившихъ, ѻ҆тцы̀ на́ши, про́стѡ и҆ кро́ткѡ снисходя̀ къ не́мощамъ поползнꙋ́вшихся, законоположи́ли: пріима́ти и҆̀хъ по проше́ствіи го́да, ѹ҆чредя̀ сіѐ по примѣ́рꙋ двоебра́чныхъ. Но поели́кꙋ, бл҃года́тію хр҃ⷭ҇то́вою, це́рковь съ тече́ніемъ вре́мени стано́вится крѣпча́йшею, и҆ чи́нъ дѣ́въ ны́нѣ ѹ҆множа́ется: то мни́тся мнѣ̀, ꙗ҆́кѡ подоба́етъ съ то́чностію вника́ти въ дѣ́ло, по са́момꙋ ѡ҆ не́мъ поня́тію ѻ҆чеви́дное, и҆ въ ра́зꙋмъ писа́нія, кото́рый мо́жно ѡ҆брѣстѝ по заключе́нію. И҆́бо вдо́вство ни́же дѣ́вства: посемꙋ̀ и҆ грѣ́хъ вдови́цъ мно́гѡ ле́гче грѣха̀ дѣ́въ. Посмо́тримъ, что̀ пи́сано па́ѵломъ къ тімоѳе́ю: ю҆́ныхъ же вдови́цъ ̾ѿрица́йся: є҆гда́ бо разсвирѣ́пѣютъ проти́вꙋ хр҃ⷭ҇та̀, посяга́ти хотя́тъ, и҆мꙋ́щыя грѣ́хъ, ꙗ҆́кѡ пе́рвыя вѣ́ры ̾ѿверго́шася[14]. И҆ та́къ с. тк҃а є҆́стьли вдови́ца подлежи́тъ тягча́йшемꙋ ѡ҆сꙋжде́нію, ка́къ бы ̾ѿве́ргшая вѣ́рꙋ во хр҃ⷭ҇та̀: то что̀ до́лжно на́мъ заключа́ти ѡ҆ дѣ́вѣ, кото́рая є҆́сть невѣ́ста хр҃ⷭ҇то́ва, и҆ сосꙋ́дъ святы́й, посвяще́нный гд҃ⷭ҇ꙋ; Вели́къ грѣ́хъ, когда̀ и҆ раба̀, преда́въ себя̀ та́йномꙋ бра́кꙋ, напо́лнитъ до́мъ развра́томъ, и҆ хꙋды́мъ житіе́мъ ѡ҆скорбля́етъ стяжа́вшаго є҆ѐ: но гора́здѡ тягча́е то̀, когда̀ невѣ́ста содѣ́лается прелюбодѣ́йцею, и҆ ѡ҆безче́стивъ сою́зъ сво́й съ женихо́мъ, преда́стъ себя̀ неѡбꙋ́зданномꙋ сладостра́стію. И҆ та́къ вдови́ца ѡ҆сꙋжда́ется, ка́къ растлѣ́нная раба̀, а҆ дѣ́ва подлежи́тъ ѡ҆сꙋжде́нію прелюбодѣ́йцы. Ка́къ совокꙋпля́ющагося съ чꙋже́ю жено́ю называ́емъ прелюбодѣ́емъ, и҆ не пре́жде пріе́млемъ въ ѻ҆бще́ніе, ра́звѣ когда̀ преста́нетъ ̾ѿ грѣха̀: таковы́мъ же ѻ҆́бразомъ да постꙋпа́емъ и҆ съ пое́мшимъ дѣ́вꙋ. Потре́бно же на́мъ тепе́рь и҆з̾яви́ти то̀, что̀ дѣ́вою и҆менꙋ́ется доброво́льнѡ посвяти́вшая себя̀ гд҃ⷭ҇ꙋ, ̾ѿре́кшаяся ̾ѿ бра́ка и҆ предпоче́тшая жи́ти во ѡ҆свяще́ніи. Ѻ҆бѣ́ты же тогда̀ признае́мъ дѣйстви́тельными, когда̀ во́зрастъ дости́гъ соверше́ннагѡ ра́зꙋма: и҆́бо дѣ́тскія слова̀ въ се́мъ дѣ́лѣ не подоба́етъ почита́ти соверше́ннѡ тве́рдыми. Но и҆мѣ́ющꙋю бо́лѣе шестина́десяти и҆лѝ седмина́десяти лѣ́тъ во́зраста, и҆мѣ́ющꙋю вла́сть над̾ свои́ми помышле́ніями, до́лгѡ и҆спытꙋ́емꙋю и҆ пребы́вшꙋю тве́рдою въ намѣ́реніи и҆ съ моле́ніемъ прося́щꙋю ѡ҆ свое́мъ приня́тіи, подоба́етъ наконе́цъ пріима́ти въ чи́нъ дѣ́въ, и҆ ѻ҆бѣ́тъ таковы́я ѹ҆твержда́ти, и҆ за нарꙋше́ніе нака́зывати не̾ѿмѣ́ннѡ. И҆́бо мно́гихъ роди́тели, и҆ бра́тія, и҆ нѣ́кіе и҆з̾ ро́дственникѡвъ, пре́жде соверше́ннагѡ во́зраста, приво́дятъ, не по со́бственномꙋ и҆́хъ стремле́нію къ безбра́чію, но промышля́я чрез̾ то̀ для себя̀ нѣ́что жите́йское: таковы́хъ не до́лжно легкѡ̀ с. тк҃в пріима́ти, доко́лѣ не ѹ҆зна́емъ ꙗ҆́снѡ со́бственнагѡ и҆́хъ расположе́нія.

ПРА́ВИЛО ѳ҃і.

Ѻ҆бѣ́тѡвъ мꙋже́й не зна́емъ и҆ны́хъ, ка́къ ра́звѣ, кото́рые причи́слили себя̀ къ чи́нꙋ мона́шествꙋющихъ, кото́рые молча́ніемъ показꙋ́ютъ, ꙗ҆́кѡ пріе́млютъ безбра́чіе. Но и҆ для си́хъ прили́чнымъ бы́ти мню̀ предвари́тельнѡ, да вопроша́ются, и҆ да пріе́млется ̾ѿ ни́хъ ꙗ҆́сный ѻ҆бѣ́тъ дѣ́вства: и҆ а҆́ще совратя́тся къ плотоꙋго́дномꙋ и҆ сладостра́стномꙋ житію̀: да подпадꙋ́тъ є҆пітіміѝ, положе́нной для любодѣ́йствꙋющихъ.

ПРА́ВИЛО к҃.

А҆́ще котѡ́рыя и҆з̾ же́нскагѡ по́ла, бы́вши въ є҆́реси, да́ли ѻ҆бѣ́тъ дѣ́вства, но пото́мъ и҆збра́ли бра́къ: ѡ҆ таковы́хъ мню̀, ꙗ҆́кѡ не подоба́етъ ѡ҆сꙋжда́ти и҆̀хъ: є҆ли̑ка бо зако́нъ глаго́летъ, сꙋ́щымъ въ зако́нѣ глаго́летъРим. гл. г҃, ст. ѳ҃і.. Но тѣ̀, котѡ́рыя є҆щѐ не взя́ли на себя̀ и҆́га хр҃ⷭ҇то́ва, не зна́ютъ и҆ законоположе́нія гд҃ⷭ҇ня. Посемꙋ̀ ѻ҆нѣ̀ мо́гꙋтъ со всѣ́ми пріе́млемы бы́ти въ цр҃ковь, и҆ полꙋча́ютъ въ се́мъ слꙋ́чаѣ проще́ніе, чрез̾ приня́тіе вѣ́ры во хр҃ⷭ҇та̀, и҆ воѻбщѐ всѐ, содѣ́ланное въ житіѝ ѡ҆глаше́нныхъ, не подверга́ется и҆стяза́нію. Ꙗ҆́вно же є҆́сть, ꙗ҆́кѡ цр҃ковь не пріе́млетъ таковы́хъ без̾ креще́нія: посемꙋ̀ неѡбходи́мѣйшꙋю для ни́хъ потре́бность составля́ютъ преимꙋ́щества возрожде́нія.

ПРА́ВИЛО к҃а.

А҆́ще мꙋ́жъ, сожи́тельствꙋя женѣ̀, и҆ пото́мъ не дово́льствꙋяся бра́комъ, впаде́тъ въ блꙋ́дъ: такова́го почита́емъ блꙋднико́мъ, и҆ надо́лгѡ ѡ҆ставля́емъ є҆го̀ под̾ є҆пітіміе́ю. Впро́чемъ не и҆мѣ́емъ пра́вила подверга́ти є҆го̀ винѣ̀ прелюбодѣя́нія, а҆́ще грѣ́хъ содѣ́ланъ съ свобо́дною ̾ѿ бра́ка. И҆́бо с. тк҃г рече́но: прелюбодѣ́йца скверня́щися ѡ҆скверни́тся, и҆ къ мꙋ́жꙋ своемꙋ̀ не возврати́тся[16]. та́кожде: держа́щій прелюбодѣ́йцꙋ безꙋ́менъ и҆ нечести́въ[17]. Но соблꙋди́вшій не ̾ѿлꙋча́ется ̾ѿ сожи́тельства съ жено́ю свое́ю, и҆ жена̀ должна̀ приня́ти мꙋ́жа своего̀, ѡ҆браща́ющагося ̾ѿ блꙋда̀: но мꙋ́жъ ѡ҆скверне́ннꙋю женꙋ̀ и҆згоня́етъ и҆з̾ своегѡ̀ до́ма. Причи́нꙋ семꙋ̀ да́ти не легко̀, но та́кѡ при́нято въ ѻ҆бы́чай.

ПРА́ВИЛО к҃в.

И҆мѣ́ющихъ же́нъ, посре́дствомъ похище́нія, а҆́ще ѡ҆брꙋче́нныхъ дрꙋги́мъ ̾ѿто́ргли, не пре́жде подоба́етъ пріима́ти на покая́ніе, ра́звѣ когда̀ ѻ҆нѣ̀ взя́ты бꙋ́дꙋтъ ̾ѿ ни́хъ, и҆ пре́жде ѡ҆брꙋчи́вшымся съ ни́ми предоста́влена бꙋ́детъ вла́сть, и҆лѝ взя́ти и҆̀хъ, а҆́ще восхотя́тъ, и҆лѝ ̾ѿпꙋсти́ти. А҆́ще же кто̀ похи́титъ неѡбрꙋче́ннꙋю: то надлежи́тъ ̾ѿя́ти є҆ѐ, возврати́ти ро́дственникамъ, и҆ преда́ти во́лѣ сво́йственникѡвъ, бꙋ́дꙋтъ ли то̀ роди́тели, бра́тія, и҆лѝ и҆ны́е попечи́тели ѡ҆ дѣви́цѣ: и҆ а҆́ще соизво́лятъ ̾ѿда́ти є҆мꙋ̀, то тве́рдо да бꙋ́детъ сожи́тіе: а҆́ще же не соглася́тся, то да не принꙋжда́ются. Взя́вшій женꙋ̀, по растлѣ́ніи є҆я̀, и҆лѝ та́йномъ, и҆лѝ наси́льственномъ, непремѣ́ннѡ до́лженъ прія́ти цр҃ко́вное наказа́ніе блꙋда̀. Наказа́ніе же блꙋдника́мъ ѡ҆предѣлено̀ на четы́ре го́да. Въ пе́рвый надлежи́тъ ѹ҆даля́ти и҆̀хъ ̾ѿ моли́твъ, и҆ пла́кати и҆̀мъ ѹ҆ двере́й цр҃ко́вныхъ. Во вторы́й пріима́ти и҆̀хъ къ слꙋ́шанію писа́ній. Въ тре́тій къ покая́нію. Въ четве́ртый къ стоя́нію съ наро́домъ, но ѹ҆де́рживати ̾ѿ прича́стія. Пото́мъ допꙋска́ти и҆̀хъ до причаще́нія святы́хъ та̑инъ.

ПРА́ВИЛО к҃г.

Ѡ҆ пое́млющихъ въ сꙋпрꙋ́жество двꙋ́хъ се́стръ, и҆лѝ с. тк҃д сочетава́ющихся съ двꙋмя̀ бра́тіями, дано̀ ̾ѿ на́съ посла́ніе[18], ко́егѡ спи́сокъ мы̀ посла́ли къ твоемꙋ̀ благоче́стію. А҆ взя́вшій женꙋ̀ своегѡ̀ бра́та не пре́жде пріи́мется, ра́звѣ когда̀ ѡ҆ста́витъ є҆ѐ.

ПРА́ВИЛО к҃д.

Вдовꙋ̀, причте́ннꙋю въ число̀ вдови́цъ, то́ є҆сть, ̾ѿ цр҃кви снабдѣва́емꙋю, а҆по́столъ повелѣва́етъ ѡ҆ста́вити без̾ попече́нія, а҆́ще пося́гнетъ за мꙋ́жа. А҆ для мꙋ́жа ѡ҆вдовѣ́вшагѡ не положено̀ никако́гѡ зако́на: довлѣ́етъ для негѡ̀ є҆пітімія̀ двоебра́чныхъ. Вдова̀ шестидесятилѣ́тняя, а҆́ще па́ки восхо́щетъ сожи́тельствовати мꙋ́жꙋ, да не ѹ҆досто́ится пріѡбще́нія святы́ни, доко́лѣ не преста́нетъ ̾ѿ стра́стныя нечистоты̀. А҆́ще же, пре́жде шести́десяти лѣ́тъ, причте́мъ є҆ѐ въ число̀ вдови́цъ, то на́ша вина̀, а҆ не жены̀ сея̀.

ПРА́ВИЛО к҃є.

И҆мѣ́ющій жено́ю растлѣ́ннꙋю ̾ѿ негѡ̀, за растлѣ́ніе да подверга́ется є҆пітіміѝ, но да бꙋ́детъ є҆мꙋ̀ позво́лено и҆мѣ́ти є҆ѐ жено́ю.

ПРА́ВИЛО к҃ѕ.

Блꙋ́дъ не є҆́сть бра́къ, и҆ да́же не нача́ло бра́ка. Посемꙋ̀ совокꙋпи́вшихся посре́дствомъ блꙋда̀, лꙋ́чше є҆́сть разлꙋча́ти, а҆́ще возмо́жно. А҆́ще же всемѣ́рнѡ де́ржатся сожи́тія, то да пріи́мꙋтъ є҆пітімію̀ блꙋда̀: но да ѡ҆ста́вятся въ сожи́тіи бра́чномъ, да не го́ршее что̀ бꙋ́детъ.

ПРА́ВИЛО к҃з.

Ѡ҆ пресвѵ́терѣ, по невѣ́дѣнію ѡ҆бяза́вшемся непра́вильнымъ бра́комъ, ꙗ҆́ ѡ҆предѣли́лъ, что̀ до́лжно, то́ є҆сть: пресвѵ́терскимъ сѣда́лищемъ пꙋ́сть ѻ҆́нъ по́льзꙋется, ̾ѿ про́чихъ же дѣ́йствій пресвѵ́терскихъ да ѹ҆де́ржится: и҆́бо таково́мꙋ дово́льно проще́нія. Благос. тк҃єсловля́ти же дрꙋги́хъ, долженствꙋ́ющемꙋ врачева́ти со́бственныя ꙗ҆́звы, не подоба́етъ. И҆́бо благослове́ніе є҆́сть преподая́ніе ѡ҆свяще́нія. Но кто̀ сегѡ̀ не и҆мѣ́етъ, по причи́нѣ грѣха̀ невѣ́дѣнія, то́тъ ка́къ препода́стъ дрꙋго́мꙋ; Тогѡ̀ ра́ди да не благословля́етъ ни всенаро́днѡ, ни ѻ҆со́бь, и҆ тѣ́ла хр҃ⷭ҇то́ва да не раздае́тъ дрꙋги̑мъ, нижѐ и҆но́е слꙋже́ніе да соверша́етъ: но дово́льствꙋяся священнослꙋжи́тельскимъ мѣ́стомъ, да пла́чется пред̾ дрꙋги́ми и҆ пред̾ гд҃ⷭ҇емъ, дабы̀ ̾ѿпꙋще́нъ бы́лъ є҆мꙋ̀ грѣ́хъ невѣ́дѣнія.

ПРА́ВИЛО к҃и.

Сіе́ же досто́йнымъ смѣ́ха мнѣ̀ предста́вилось, ꙗ҆́кѡ нѣ́кто ѡ҆бѣща́лся возде́рживатися ̾ѿ свина́гѡ мя́са. Посемꙋ̀ благоволѝ поꙋча́ти таковы́хъ, что́бы возде́рживались ̾ѿ неразсꙋди́тельныхъ заро́кѡвъ и҆ ѻ҆бѣ́тѡвъ, и҆ допꙋстѝ ѹ҆потребле́ніе веще́й нера́знственныхъ. И҆́бо нико́е же созда́ніе бж҃іе ̾ѿме́тно, со благодаре́ніемъ пріе́млемо[19]. Посемꙋ̀, ка́къ ѻ҆бѣ́тъ досто́инъ смѣ́ха, то и҆ воздержа́ніе не нꙋ́жно.

ПРА́ВИЛО к҃ѳ.

Нача́льникѡвъ кленꙋ́щихся ѕло̀ сотвори́ти подчинє́ннымъ, весьма̀ нꙋ́жно врачева́ти. Врачева́ніе же и҆́хъ двоя́кое: є҆ди́но, ѹ҆чи́ти и҆̀хъ, да не кленꙋ́тся поспѣ́шнѡ, дрꙋго́е же, да не ѡ҆стаю́тся при ѕлы́хъ намѣ́реніяхъ. Посемꙋ̀ а҆́ще кто̀ ѹ҆ловле́нъ кля́твою къ содѣ́ланію ѕла̀ дрꙋго́мꙋ: то да принесе́тъ покая́ніе въ де́рзости кля́твы, но предло́гомъ благоговѣ́нія къ кля́твѣ да не ѹ҆твержда́етъ себя̀ въ ѕло́бѣ. Соблюде́ніе кля́твы не бы́ло поле́зно и҆́рѡдꙋ, кото́рый, да не нарꙋ́шитъ кля́твы, содѣ́лался ѹ҆бі́йцею проро́ка. Кля́тва и҆ воѻбщѐ возбранена̀: кольмѝ па́че дава́емꙋю на ѕло̀ подоба́етъ ѡ҆сꙋжда́ти. Посемꙋ̀ покля́вшійся до́лженъ и҆спра́вити своѝ с. тк҃ѕ мы́сли, а҆ не тща́тися ѹ҆тверди́ти своѐ беззако́ніе. И҆зслѣ́дꙋй подро́бнѣе сію̀ нелѣ́пость. А҆́ще кто̀ покля́лся вы́колоть глаза̀ своемꙋ̀ бра́тꙋ: добро́ ли бы́ло бы таково́мꙋ привестѝ сіѐ въ и҆сполне́ніе; А҆́ще кто̀ покля́лся ѹ҆би́ти, и҆лѝ воѻбщѐ престꙋпи́ти какꙋ́ю либо за́повѣдь; И҆́бо кля́хся и҆ поста́вихъ, не грѣ́хъ содѣ́лати, но сохрани́ти сꙋдьбы̑ пра́вды твоея̀[20]. Ка́къ за́повѣдь подоба́етъ ѹ҆твержда́ти непрело́жностію намѣ́реній: та́кѡ грѣ́хъ вся́чески до́лжно низпроверга́ти и҆ и҆стребля́ти.

ПРА́ВИЛО л҃.

Ѡ҆ похища́ющихъ же́нъ, мы̀ не и҆мѣ́емъ дре́внягѡ пра́вила, но соста́вили со́бственное мнѣ́ніе: и҆ ѻ҆нѝ, и҆ содѣ́йствовавшіе и҆̀мъ да бꙋ́дꙋтъ ̾ѿлꙋчены̀ ̾ѿ ѻ҆́бщихъ моли́твъ на трѝ го́да. Без̾ наси́лія же быва́ющее не подлежи́тъ наказа́нію, а҆́ще не сопꙋ́тствꙋетъ семꙋ̀ ни растлѣ́ніе, нижѐ татьба̀. Вдова́ же властна̀ сама̀ въ себѣ̀, и҆ ̾ѿ нея̀ зави́ситъ послѣ́довати похища́ющемꙋ. На́мъ не до́лжно пещи́ся ѡ҆ показꙋ́емыхъ ви́дахъ.

ПРА́ВИЛО л҃а.

Жена̀ мꙋ́жа ̾ѿлꙋчи́вшагѡся и҆ пребыва́ющагѡ въ без̾извѣ́стности, пре́жде ѹ҆достовѣре́нія ѡ҆ сме́рти є҆гѡ̀ встꙋпи́вшая въ сожи́тіе съ дрꙋги́мъ, прелюбодѣ́йствꙋетъ.

ПРА́ВИЛО л҃в.

Тѣ̀ и҆з̾ кли́ра, кото́рые согрѣши́ли грѣхо́мъ сме́ртнымъ, со сте́пени своегѡ̀ низво́дятся, но не лиша́ются прича́стія кꙋ́пнѡ съ міря́нами. И҆́бо не ̾ѿмсти́ши за є҆ди́но два́жды[21].

ПРА́ВИЛО л҃г.

Жена̀ роди́вшая на пꙋтѝ, и҆ пренебре́гшая рожде́нное, да подлежи́тъ винѣ̀ ѹ҆бі́йства.

с. тк҃з

ПРА́ВИЛО л҃д.

Же́нъ прелюбодѣ́йствовавшихъ и҆ и҆сповѣ́давшихся въ то́мъ, по благоче́стію, и҆лѝ каки́мъ бы то̀ ни бы́ло ѻ҆́бразомъ ѡ҆бличи́вшихся, ѻ҆тцы̀ на́ши запрети́ли ꙗ҆́вными твори́ти, да не подади́мъ причи́ны къ сме́рти ѡ҆бличе́нныхъ: но повелѣ́ли стоя́ти и҆̀мъ съ вѣ́рными, без̾ пріѡбще́нія, доко́лѣ не и҆спо́лнится вре́мя покая́нія.

ПРА́ВИЛО л҃є.

А҆́ще мꙋ́жъ ѡ҆ста́вленъ жено́ю, то подоба́етъ смотрѣ́ти винꙋ̀ ѡ҆ставле́нія: и҆ а҆́ще ꙗ҆́вится ѻ҆на̀ ѡ҆ста́вившею без̾ причи́ны: то ѻ҆́нъ досто́инъ снизхожде́нія, а҆ ѻ҆на̀ є҆пітіміѝ. Снизхожде́ніе же ѡ҆ка́жется є҆мꙋ̀ въ то́мъ, да бꙋ́детъ въ ѡ҆бще́ніи съ це́рковію.

ПРА́ВИЛО л҃ѕ.

Же́ны во́инѡвъ, пребыва́ющихъ въ без̾извѣ́стности, сочета́вшыяся съ дрꙋги́ми, подлежа́тъ томꙋ́ же сꙋжде́нію, ка́къ и҆ тѣ̀, ко́и не дожда́лись возвраще́нія ̾ѿсꙋ́тствꙋющихъ мꙋже́й. Впро́чемъ здѣ́сь дѣ́ло досто́йно нѣ́коегѡ снизхожде́нія, поели́кꙋ бо́лѣе вѣроя́тно заключе́ніе ѡ҆ сме́рти.

ПРА́ВИЛО л҃з.

Встꙋпи́вшій въ бра́къ, по ̾ѿя́тіи ѹ҆ негѡ̀ чꙋ́ждыя жены̀, за пе́рвꙋю да бꙋ́детъ ѡ҆бвине́нъ въ прелюбодѣя́ніи, а҆ за дрꙋгꙋ́ю непови́ненъ.

ПРА́ВИЛО л҃и.

Ѻ҆трокови̑цы, без̾ соизволе́нія ѻ҆тца̀ пося́гшыя, блꙋдодѣ́йствꙋютъ. По примире́ніемъ съ роди́телями дѣ́ло сіѐ мни́тся и҆мѣ́ти врачева́ніе. Впро́чемъ ѻ҆нѣ̀ не то́тчасъ допꙋска́ются къ пріѡбще́нію, но запреща́ются на трѝ лѣ́та.

ПРА́ВИЛО л҃ѳ.

Живꙋ́щая съ прелюбодѣ́емъ є҆́сть прелюбодѣ́йца, во всѐ вре́мя сожи́тія.

с. тк҃и

ПРА́ВИЛО м҃.

Про́тивъ во́ли господи́на своегѡ̀, преда́вшая себя̀ мꙋ́жꙋ, блꙋдодѣ́йствꙋетъ. А҆́ще по́слѣ сегѡ̀, по дозволе́нію, по́льзꙋется бра́комъ: то признае́тся встꙋпи́вшею въ зако́нное сꙋпрꙋ́жество. Посемꙋ̀ пе́рвое є҆́сть блꙋ́дъ, а҆ послѣ́днее бра́къ. И҆́бо ѹ҆слѡ́вія находя́щихся въ полновла́стіи дрꙋги́хъ не и҆мѣ́ютъ ничегѡ̀ тве́рдагѡ.

ПРА́ВИЛО м҃а.

Во вдовствѣ̀ и҆мѣ́ющая вла́сть въ само́й себѣ̀, мо́жетъ сочета́тися непови́ннѡ, а҆́ще нѣ́тъ никогѡ̀, разлꙋча́ющагѡ сіѐ сожи́тіе. И҆́бо а҆по́столъ ре́къ: а҆́ще ѹ҆́мретъ мꙋ́жъ, свобо́дна є҆́сть, за него́же хо́щетъ, пося́гнꙋти, то́чію ѡ҆ гд҃ⷭ҇ѣ[22].

ПРА́ВИЛО м҃в.

Бра́ки, про́тивъ во́ли ѡ҆блада́ющихъ, сꙋ́ть блꙋдодѣя̑нія. При жи́зни ѻ҆тца̀, и҆лѝ господи́на, совокꙋпля́ющіеся не сꙋ́ть без̾ вины̀, доко́лѣ и҆мѣ́ющіе вла́сть над̾ ни́ми не и҆з̾я́вятъ согла́сія на и҆́хъ сожи́тіе. И҆́бо тогда̀ сꙋпрꙋ́жество полꙋча́етъ тве́рдость.

ПРА́ВИЛО м҃г.

Нане́сшій бли́жнемꙋ сме́ртный ѹ҆да́ръ, є҆́сть ѹ҆бі́йца, ѻ҆́нъ ли пе́рвый нане́съ ѹ҆да́ръ, и҆лѝ ̾ѿмща́лъ.

ПРА́ВИЛО м҃д.

Діаконі́сса, соблꙋди́вшая съ ꙗ҆зы́чникомъ, мо́жетъ приня́та бы́ти въ ѻ҆бще́ніе моли́твъ, но до прича́стія святы́хъ та̑инъ допꙋ́щена бꙋ́детъ въ седмо́е лѣ́то, а҆́ще, то́ є҆сть, въ чистотѣ̀ жи́ти бꙋ́детъ. Ꙗ҆зы́чникъ же, по прія́тіи вѣ́ры, па́ки пристꙋпа́ющій къ святота́тствꙋ, возвраща́ется чрез̾ то̀ на свою̀ блево́тинꙋ. Посемꙋ̀ мы̀ тѣ́лꙋ діаконі́ссы, ка́къ ѡ҆свяще́нномꙋ, не позволя́емъ бо́лѣе бы́ти въ плотско́мъ ѹ҆потребле́ніи.

с. тк҃ѳ

ПРА́ВИЛО м҃є.

А҆́ще кто̀, приня́въ и҆́мя хрістіа́нина, ѡ҆скорбля́етъ хр҃ⷭ҇та̀: таково́мꙋ нѣ́тъ никакі́я по́льзы ̾ѿ наименова́нія.

ПРА́ВИЛО м҃ѕ.

Съ ѡ҆ста́вленнымъ на вре́мя свое́ю жено́ю сочета́вшаяся по невѣ́дѣнію, пото́мъ, по причи́нѣ возвраще́нія къ немꙋ̀ пе́рвыя жены̀, ̾ѿпꙋще́нная блꙋдодѣ́йствовала чрез̾ таковы́й сою́зъ, впро́чемъ по невѣ́дѣнію. Посемꙋ̀ бра́къ є҆́й не возбрани́тся: но лꙋ́чше, а҆́ще пребꙋ́детъ та́кѡ.

ПРА́ВИЛО м҃з.

Є҆нкраті́ты, саккофо́ры и҆ а҆потакті́ты подлежа́тъ томꙋ́ же сꙋжде́нію, ка́къ и҆ наватіа́не: и҆́бо ѡ҆ нѣ́которыхъ и҆з̾ си́хъ и҆́здано пра́вило, хотя̀ и҆ не є҆диноѻбра́зное, а҆ ѡ҆ дрꙋги́хъ ѹ҆мо́лчано: мы́ же, по ѻ҆дина́комꙋ виносло́вію, таковы́хъ перекре́щиваемъ. А҆ хотя̀ ѹ҆ ва́съ и҆ не приня́тъ се́й ѻ҆бы́чай перекре́щиванія, подо́бнѡ ка́къ и҆ ѹ҆ ри́млянъ, по нѣ́которомꙋ благоꙋсмотре́нію: ѻ҆дна́кѡ на́ше виносло́віе да и҆мѣ́етъ си́лꙋ. Поели́кꙋ є҆́ресь и҆́хъ є҆́сть ка́къ бы ѻ҆́трасль є҆́реси маркіѡні́тѡвъ, гнꙋша́ющихся бра́комъ, ̾ѿвраща́ющихся віна̀, и҆ созда́ніе бж҃іе скве́рнымъ нарица́ющихъ. Посемꙋ̀ мы̀ не пріе́млемъ и҆́хъ въ це́рковь, а҆́ще не крестя́тся на́шимъ креще́ніемъ. И҆́бо да не глаго́лютъ, ꙗ҆́кѡ крести́лися во ѻ҆ц҃а̀ и҆ сн҃а и҆ ст҃а́го дх҃а, когда̀ ѻ҆нѝ, подо́бнѡ маркіѡ́нꙋ и҆ про́чымъ є҆ретіка́мъ, представля́ютъ бг҃а творце́мъ ѕла̀. И҆ та́къ, а҆́ще сіѐ ѹ҆го́дно бꙋ́детъ, то до́лжно собра́тися множа́йшымъ є҆пі́скопамъ, и҆ та́кѡ и҆зложи́ти пра́вило, дабы̀ и҆ дѣ́йствꙋющій бы́лъ безѻпа́сенъ, и҆ ̾ѿвѣ́тствꙋющій на вопроше́ніе ѡ҆ таковы́хъ и҆мѣ́лъ достовѣ́рное ѡ҆снова́ніе ̾ѿвѣ́та.

ПРА́ВИЛО м҃и.

Ѡ҆ста́вленная мꙋ́жемъ, по моемꙋ̀ мнѣ́нію, должна̀ прес. т҃лбы́ти безбра́чною. И҆́бо когда̀ гд҃ⷭ҇ь ре́къ, ꙗ҆́кѡ а҆́ще кто̀ ̾ѿпꙋ́ститъ женꙋ̀ свою̀, ра́звѣ словесѐ любодѣ́йнагѡ, твори́тъ ю҆̀ прелюбодѣ́йствовати[23]: то назва́въ є҆ѐ прелюбодѣ́йцею, тѣ́мъ са́мымъ воспрети́лъ є҆́й сожи́тіе съ и҆ны́мъ. И҆́бо ка́къ возмо́жно, что́бы мꙋ́жъ бы́лъ пови́ненъ, ка́къ вино́вникъ прелюбодѣ́йства, а҆ жена̀ непови́нна, бы́въ ̾ѿ гд҃ⷭ҇а нарече́на прелюбодѣ́йцею за совокꙋпле́ніе съ и҆ны́мъ мꙋ́жемъ;

ПРА́ВИЛО м҃ѳ.

Растлѣ́нія, быва́ющыя наси́ліемъ, да не подверга́ются ѡ҆бвине́нію. Посемꙋ̀ и҆ раба̀, а҆́ще наси́лована господи́номъ свои́мъ, не пови́нна.

ПРА́ВИЛО н҃.

На троебра́чіе нѣ́тъ зако́на: посемꙋ̀ тре́тій бра́къ не составля́ется по зако́нꙋ. На таковы́я дѣла̀ взира́емъ, ка́къ на нечистѡты̀ въ це́ркви: но всенаро́дномꙋ ѡ҆сꙋжде́нію ѻ҆́ныхъ не подверга́емъ, ка́къ лꙋ́чшыя, не́жели распꙋ́тное любодѣя́ніе.

с. тл҃а

ТОГѠ́ ЖЕ КЪ ТОМꙊ́ЖЕ КАНОНІ́ЧЕСКОЕ посла́ніе тре́тіе.

ПРА́ВИЛО н҃а.

Ѡ҆ состоя́щихъ въ кли́рѣ пра́вила положены̀ безразли́чнѡ. Ѻ҆нѣ̀ повелѣва́ютъ ѡ҆предѣля́ти па́дшымъ є҆ди́ное наказа́ніе, и҆зверже́ніе ̾ѿ слꙋже́нія, нахо́дятся ли ѻ҆нѝ въ сте́пени свяще́нства, и҆лѝ прохо́дятъ слꙋже́ніе, не и҆мѣ́ющее рꙋкоположе́нія свяще́нства.

ПРА́ВИЛО н҃в.

Пренебре́гшая рожде́нное на пꙋтѝ, а҆́ще пренебрегла̀, и҆мѣ́я возмо́жность сохрани́ти, и҆лѝ дꙋ́мая тѣ́мъ сокры́ти грѣ́хъ сво́й, и҆лѝ послѣ́довавъ совсѣ́мъ ѕвѣри́номꙋ и҆ безчеловѣ́чномꙋ по́мыслꙋ, да сꙋ́дится за смертоꙋбі́йство. А҆́ще же не могла̀ соблюстѝ, и҆ рожде́нное ѹ҆́мерло ̾ѿ пꙋстоты̀ мѣ́ста и҆ ̾ѿ недоста́тка потре́бнагѡ: то ма́терь досто́йна снисхожде́нія.

ПРА́ВИЛО н҃г.

Рабы́ня ѡ҆вдовѣ́вшая мо́жетъ бы́ть не мно́гѡ согрѣши́ла, соглася́сь на вторы́й бра́къ, под̾ ви́домъ восхище́нія. Посемꙋ̀ ̾ѿню́дь не подоба́етъ ѡ҆бвиня́ти є҆ѐ за сіѐ. И҆́бо не нарꙋ́жные ви́ды сꙋ́дятся, но намѣ́реніе. Ꙗ҆́вно же є҆́сть, ꙗ҆́кѡ ѻ҆на̀ подлежи́тъ є҆пітіміѝ двоебра́чія.

с. тл҃в

ПРА́ВИЛО н҃д.

Ѡ҆ нево́льныхъ ѹ҆бі́йствахъ пре́жде, ка́къ па́мятꙋю, писа́лъ къ твоемꙋ̀ благоче́стію, по си́лѣ мое́й, и҆ бо́лѣе тогѡ̀ ничегѡ̀ рещѝ не могꙋ̀. Твоегѡ̀ благоразꙋ́мія дѣ́ломъ бꙋ́детъ, по ѻ҆со́бенности слꙋ́чая, продолжи́ти наказа́ніе, и҆лѝ ѡ҆блегчи́ти.

ПРА́ВИЛО н҃є.

Разбо́йникѡвъ взаи́мнѡ поража́ющіе, а҆́ще не сꙋ́ть въ церко́вномъ слꙋже́ніи, да бꙋ́дꙋтъ ̾ѿлꙋча́емы ̾ѿ прича́стія святы́хъ та̑инъ: а҆́ще же кли́ріки, да низло́жатся со своегѡ̀ сте́пени. И҆́бо рече́но: вся́къ пріе́мшій ме́чь, мече́мъ поги́бнетъ[24].

ПРА́ВИЛО н҃ѕ.

Во́лею ѹ҆би́вшій, и҆ пото́мъ пока́явшійся, два́десять лѣ́тъ да бꙋ́детъ без̾ прича́стія святы́хъ та̑инъ. На сіѝ два́десять лѣ́тъ да́стся є҆мꙋ̀ слѣ́дꙋющее распредѣле́ніе: четы́ре го́да до́лженъ ѻ҆́нъ пла́кати, стоя̀ внѣ̀ двере́й моли́твеннагѡ хра́ма, и҆ прося̀ входя́щихъ въ ѻ҆́ный вѣ́рныхъ, сотвори́ти ѡ҆ не́мъ моли́твꙋ, и҆сповѣ́дꙋя при то́мъ своѐ престꙋпле́ніе. По четыре́хъ лѣ́тахъ да бꙋ́детъ приня́тъ въ число̀ слꙋ́шающихъ писа̑нія, и҆ съ ни́ми да и҆схо́дитъ въ продолже́ніи пятѝ лѣ́тъ. Се́дмь лѣ́тъ съ припа́дающими да мо́лится и҆ да и҆схо́дитъ. Четы́ре лѣ́та да стои́тъ то́кмѡ съ вѣ́рными, но да не сподо́бится прича́стія. По и҆сполне́ніи си́хъ да причасти́тся ст҃ы́хъ та̑инъ.

ПРА́ВИЛО н҃з.

Нево́лею ѹ҆би́вшій де́сять лѣ́тъ да не причасти́тся святы́хъ та̑инъ. Распредѣле́ніе же десятѝ лѣ́тъ да бꙋ́детъ для негѡ̀ слѣ́дꙋющее: два̀ лѣ́та да пла́четъ, трѝ лѣ́та да соверши́тъ междꙋ̀ слꙋ́шающими, четы́ре междꙋ̀ припа́дающими, и҆ го́дъ да стои́тъ то́кмѡ съ вѣ́рныс. тл҃гми, и҆ пото́мъ пріи́метъ свято́е прича́стіе.

ПРА́ВИЛО н҃и.

Прелюбодѣ́йствовавшій пятьна́десять лѣ́тъ да не пріѡбща́ется святы́хъ та̑инъ. Распредѣле́ніе же на сіѝ пятьна́десять лѣ́тъ для негѡ̀ слѣ́дꙋющее: четы́ре лѣ́та да бꙋ́детъ ѻ҆́нъ пла́чꙋщимъ, пя́ть слꙋ́шающимъ писа̑нія, четы́ре припа́дающимъ, два̀ да стои́тъ съ вѣ́рными без̾ пріѡбще́нія.

ПРА́ВИЛО н҃ѳ.

Блꙋдни́къ се́дмь лѣ́тъ да не причасти́тся ст҃ы́хъ та̑инъ: два̀ лѣ́та да пла́четъ, два̀ да слꙋ́шаетъ, два̀ да припа́даетъ, и҆ є҆ди́но лѣ́то да стои́тъ то́кмѡ съ вѣ́рными, въ ѻ҆смо́е допꙋ́щенъ бꙋ́детъ до свята́гѡ прича́стія.

ПРА́ВИЛО ѯ҃.

Ѡ҆бѣща́вшаяся пребы́ти въ дѣ́вствѣ, и҆ ̾ѿ ѡ҆бѣща́нія своегѡ̀ ̾ѿпа́дшая, да и҆спо́лнитъ вре́мя наказа́нія, положе́нное за грѣ́хъ прелюбодѣя́нія съ распредѣле́ніемъ, смотря̀ по є҆я̀ жи́зни. То́жде и҆ для воспрія́вшихъ ѻ҆бѣ́тъ житія̀ мона́шескагѡ, но па́дшихъ.

ПРА́ВИЛО ѯ҃а.

Ѹ҆кра́дшій, а҆́ще са́мъ по себѣ̀ раска́ясь ѡ҆бвини́тъ себя̀, на го́дъ да бꙋ́детъ ѹ҆дале́нъ ̾ѿ прича́стія то́кмѡ святы́хъ та̑инъ: а҆́ще же ѡ҆бличе́нъ бꙋ́детъ, то на два̀ го́да. Вре́мя же сіѐ да раздѣли́тся для негѡ̀ на припа́даніе и҆ стоя́ніе съ вѣ́рными, пото́мъ да ѹ҆досто́ится причаще́нія.

ПРА́ВИЛО ѯ҃в.

Ꙗ҆ви́вшемꙋ неи́стовство на мꙋ́жескомъ по́лѣ, вре́мя для покая́нія да располо́жится соѻбра́знѡ вре́мени беззако́нновавшагѡ прелюбодѣя́ніемъ.

ПРА́ВИЛО ѯ҃г.

На скота́хъ показа́вшій своѐ нече́стіе, и҆сповѣ́давшись, толи́кое же вре́мя да бꙋ́детъ въ запреще́ніи.

с. тл҃д

ПРА́ВИЛО ѯ҃д.

Клятвопрестꙋ́пникъ де́сять лѣ́тъ да не пріѡбща́ется: два̀ лѣ́та находя́сь междꙋ̀ пла́чꙋщими, трѝ междꙋ̀ слꙋ́шающими писа̑нія, четы́ре междꙋ̀ припа́дающими, є҆ди́но стоя̀ съ вѣ́рными, и҆ тогда̀ сподо́бится прича́стія.

ПРА́ВИЛО ѯ҃є.

Пока́явшійся въ волшебствѣ̀, и҆лѝ въ ѡ҆травле́ніи, да проведе́тъ въ покая́ніи вре́мя положе́нное для ѹ҆бі́йцы, съ распредѣле́ніемъ соѻбра́знымъ томꙋ̀, ка́къ са́мъ себя̀ ѡ҆бличи́лъ въ ка́ждомъ грѣхѣ̀.

ПРА́ВИЛО ѯ҃ѕ.

Раска́пывающій гро́бы для хище́нія, да не причасти́тся ст҃ы́хъ та̑инъ де́сять лѣ́тъ: два̀ да пла́четъ, трѝ да слꙋ́шаетъ, четы́ре да припа́даетъ, є҆ди́но лѣ́то да стои́тъ съ вѣ́рными, и҆ тогда̀ ѹ҆жѐ да пріи́мется.

ПРА́ВИЛО ѯ҃з.

Кровосмѣше́ніе бра́та и҆ сестры̀ тре́бꙋетъ вре́мени покая́нія, положе́ннагѡ для ѹ҆бі́йцы.

ПРА́ВИЛО ѯ҃и.

Совокꙋпле́ніе бра́комъ люде́й, состоя́щихъ въ возбране́нномъ для ѻ҆́нагѡ родствѣ̀, а҆́ще ѹ҆смо́трено бꙋ́детъ слꙋчи́вшееся, ꙗ҆́кѡ грѣ́хъ человѣ́ческій, подлежи́тъ є҆пітіміѝ прелюбодѣ́евъ.

ПРА́ВИЛО ѯ҃ѳ.

Чте́цъ, а҆́ще пре́жде бра́ка смѣси́тся съ свое́ю ѡ҆брꙋ́чницею, по ̾ѿлꙋче́ніи на є҆ди́но лѣ́то ̾ѿ слꙋже́нія, пріи́мется въ чтеца̀, но да пребꙋ́детъ без̾ произво́дства въ вы́сшіе сте́пени. Є҆́стьли же без̾ ѡ҆брꙋче́нія та́йнѡ смѣси́тся, да преста́нетъ слꙋжи́ти. Та́кожде и҆ ѵ҆подіа́конъ.

ПРА́ВИЛО ѻ҃.

Діа́конꙋ ѡ҆скверни́вшемꙋся ѹ҆ста́ми, и҆ с. тл҃є и҆сповѣ́давшемꙋ, что̀ грѣ́хъ є҆гѡ̀ да́лѣе не просте́рся, да бꙋ́детъ запрещено̀ священнослꙋже́ніе, но причаща́тися ст҃ы́хъ та̑инъ съ діа́конами да сподо́бится. Та́къ то́чнѡ и҆ пресвѵ́теръ. А҆́ще же что̀ бо́лѣе сегѡ̀ согрѣши́вшимъ кто́ либо ѹ҆смо́тренъ бꙋ́детъ: то въ кото́ромъ бы ни бы́лъ сте́пени, да бꙋ́детъ и҆зве́рженъ.

ПРА́ВИЛО ѻ҃а.

Прикоснове́нный къ кото́ромꙋ либо и҆з̾ вышерече́нныхъ грѣхѡ́въ, и҆ не и҆сповѣ́давшій, но ѡ҆бличе́нный, да бꙋ́детъ под̾ є҆пітіміе́ю сто́лькѡ же вре́мени, на ско́лькѡ подверга́ется є҆пітіміѝ дѣ́латель ѕла̀.

ПРА́ВИЛО ѻ҃в.

Преда́вшій себя̀ волхвова́телямъ, и҆лѝ нѣ́кимъ подѡ́бнымъ, да бꙋ́детъ под̾ є҆пітіміе́ю сто́лькѡ же вре́мени, ско́лькѡ ѹ҆бі́йца.

ПРА́ВИЛО ѻ҃г.

Ѿре́кшійся ̾ѿ хр҃ⷭ҇та̀ и҆ содѣ́лавшійся престꙋ́пникомъ про́тивъ та́инства спасе́нія, всѐ вре́мя жи́зни своея̀ до́лженъ бы́ти въ числѣ̀ пла́чꙋщихъ, и҆ ѡ҆бя́занъ и҆сповѣ́датися: а҆ при концѣ̀ жи́зни ѹ҆досто́ится прича́стія святы́нь, по вѣ́рѣ въ бж҃іе человѣколю́біе.

ПРА́ВИЛО ѻ҃д.

А҆́ще кто́ бы то̀ ни бы́лъ и҆з̾ па́дшихъ въ вышепи́санные грѣхѝ, и҆сповѣ́давшись, содѣ́лается ре́вностнымъ въ и҆справле́ніи: то прія́вшій ̾ѿ человѣколю́бія бж҃ія вла́сть разрѣша́ти и҆ свя́зывати, не бꙋ́детъ досто́инъ ѡ҆сꙋжде́нія, когда̀, ви́дя кра́йне ѹ҆се́рдное и҆сповѣ́даніе согрѣши́вшагѡ, содѣ́лается ми́лостивѣе, и҆ сократи́тъ є҆пітімію̀. Поели́кꙋ повѣствова̑нія свяще́ннагѡ писа́нія показꙋ́ютъ на́мъ, ꙗ҆́кѡ съ бо́льшимъ по́двигомъ и҆сповѣ́дающіеся скорѣ́е полꙋча́ютъ бж҃іе милосе́рдіе.

ПРА́ВИЛО ѻ҃є.

Ѡ҆скверни́вшемꙋся съ свое́ю сестро́ю по ѻ҆тцꙋ̀ и҆лѝ по с. тл҃ѕ ма́тери, да не бꙋ́детъ позво́лено входи́ти въ до́мъ моли́твенный, доко́лѣ не ̾ѿстꙋ́питъ ̾ѿ беззако́ннагѡ и҆ гнꙋ́снагѡ дѣ́йствія. Прише́дши же въ созна́ніе стра́шнагѡ грѣха̀, трѝ лѣ́та да пла́четъ ѻ҆́нъ, стоя̀ ѹ҆ двере́й моли́твенныхъ домѡ́въ, и҆ прося̀ входя́щихъ на моли́твꙋ, дабы̀ ка́ждый съ сострада́ніемъ приноси́лъ ѡ҆ не́мъ ѹ҆се́рдныя моли̑твы ко гд҃ⷭ҇ꙋ. По́слѣ сегѡ̀ на дрꙋго́е трехлѣ́тіе да бꙋ́детъ допꙋ́щенъ то́кмѡ до слꙋ́шанія писа́ній, по слꙋ́шаніи же писа́ній и҆ поꙋче́ній, да и҆згоня́ется и҆з̾ цр҃кви, и҆ да не ѹ҆досто́ивается ѻ҆бще́нія въ моли́твѣ. Пото́мъ, а҆́ще со слеза́ми бꙋ́детъ проси́ти ѻ҆́ныя и҆ припа́дати ко гд҃ⷭ҇ꙋ, съ сокрꙋше́ніемъ се́рдца и҆ глꙋбо́кимъ смире́ніемъ, то дадꙋ́тся є҆мꙋ̀ и҆ны́е трѝ лѣ́та на припа́даніе. И҆ таки́мъ ѻ҆́бразомъ, когда̀ пока́жетъ плоды̀ досто́йные покая́нія, въ деся́тое лѣ́то да бꙋ́детъ приня́тъ къ моле́нію съ вѣ́рными, без̾ причаще́нія: два̀ лѣ́та стоя̀ во вре́мя моли́твы съ вѣ́рными, наконе́цъ да ѹ҆досто́ится пріѡбще́нія ст҃ы́нь.

ПРА́ВИЛО ѻ҃ѕ.

То́тъ же ѹ҆ста́въ и҆ ѡ҆ совокꙋпи́вшемся съ невѣ́сткою свое́ю.

ПРА́ВИЛО ѻ҃з.

Ѡ҆ста́вившій женꙋ̀, зако́ннѡ съ ни́мъ сочета́вшꙋюся, и҆ взя́вшій дрꙋгꙋ́ю, по и҆зрече́нію гд҃ⷭ҇ню, подлежи́тъ винѣ̀ прелюбодѣя́нія[25]. Пра́вилами же ѻ҆тцє́въ на́шихъ поло́жено, что́бы таковы́е є҆ди́но лѣ́то пла́кали, два̀ лѣ́та слꙋ́шали, трѝ припа́дали, седмо́е же лѣ́то стоя́ли съ вѣ́рными, и҆ та́кѡ ѹ҆досто́ятся ст҃а́гѡ прича́стія, а҆́ще со слеза́ми пока́ются.

ПРА́ВИЛО ѻ҃и.

То́тъ же ѹ҆ста́въ да соблюда́ется и҆ ѡ҆ взя́вшихъ въ сожи́тіе двѣ̀ сестры̀, с. тл҃з хотя́ бы то̀ бы́ло и҆ въ ра́зныя времена̀.

ПРА́ВИЛО ѻ҃ѳ.

Вознеи́стовствовавшій на свою̀ ма́чихꙋ подлежи́тъ томꙋ́жде пра́вилꙋ, ка́къ и҆ неи́стовствовавшій на свою̀ сестрꙋ̀.

ПРА́ВИЛО п҃.

Ѡ҆ многобра́чіи ѻ҆тцы̀ ѹ҆молча́ли, ка́къ ѡ҆ дѣ́лѣ ско́тскомъ и҆ соверше́ннѡ чꙋ́ждомъ ро́дꙋ человѣ́ческомꙋ. На́мъ же се́й грѣ́хъ представля́ется тягча́йшимъ блꙋда̀. Посемꙋ̀ благоразсꙋ́дно бꙋ́детъ подверга́ти таковы́хъ є҆пітіміѝ по пра́виламъ, то́ є҆сть, да бꙋ́дꙋтъ є҆ди́но лѣ́то пла́чꙋщими, трѝ лѣ́та припа́дающими, и҆ пото́мъ мо́гꙋтъ бы́ти приня́ты.

ПРА́ВИЛО п҃а.

Поели́кꙋ, во вре́мя наше́ствія ва́рварѡвъ, мно́гіе содѣ́лали престꙋплє́нія про́тивъ вѣ́ры въ бг҃а, кля́вшись ꙗ҆зы́ческими кля́твами и҆ вкꙋси́въ нѣ́которыхъ ѡ҆скверне́нныхъ снѣ́дей, съ волхвова́ніемъ принесе́нныхъ въ же́ртвꙋ і҆́дѡламъ: то съ таковы́ми да бꙋ́детъ постꙋпа́емо, по и҆́зданнымъ ѹ҆жѐ ѻ҆тца́ми зако́намъ и҆ пра́виламъ. Тѣ̀, кото́рые претерпѣ́въ тя́жкое и҆знꙋре́ніе мꙋче́ніями, и҆ не вы́терпѣвъ страда́нія, доведены̀ бы́ли до ̾ѿрече́нія ̾ѿ хр҃ⷭ҇та̀, трѝ лѣ́та да бꙋ́дꙋтъ непри́нятыми въ цр҃ковь, по и҆стече́ніи ко́ихъ, два̀ лѣ́та да слꙋ́шаютъ писа́нія, трѝ да припа́даютъ, и҆ тогда̀ мо́гꙋтъ приня́ты бы́ти къ ѻ҆бще́нію. Без̾ вели́кія же нꙋ́жды вѣ́рꙋ въ бг҃а преда́вшіе, и҆ коснꙋ́вшіеся трапе́зы бѣсо́вскія, и҆ кля́вшіеся ꙗ҆зы́ческими кля́твами, трѝ лѣ́та да бꙋ́дꙋтъ и҆зве́рженными и҆з̾ цр҃кви, два̀ слꙋ́шающими писа́нія, трѝ лѣ́та да мо́лятся въ припа́даніи, дрꙋгі́я трѝ да стоя́тъ во вре́мя моли́твы съ вѣ́рными, и҆ тогда̀ ѹ҆жѐ мо́гꙋтъ бы́ти приня́ты къ пріѡбще́нію ст҃ы́хъ та̑инъ.

с. тл҃и

ПРА́ВИЛО п҃в.

Что̀ каса́ется до престꙋпи́вшихъ кля́твꙋ, а҆́ще по наси́лію и҆ по нꙋ́ждѣ престꙋпи́ли ѻ҆́нꙋю, подлежа́тъ ме́нѣе тя́жкимъ наказа́ніямъ, и҆ по шестѝ лѣ́тахъ мо́гꙋтъ бы́ти соверше́ннѡ приня́ты. Без̾ нꙋ́жды же преда́вшіе вѣ́рꙋ свою̀, два̀ лѣ́та да бꙋ́дꙋтъ пла́чꙋщими, и҆ два̀ слꙋ́шающими, въ пя́тое да мо́лятся съ припа́дающими, и҆ є҆щѐ на два̀ лѣ́та да бꙋ́дꙋтъ приня́ты къ ѻ҆бще́нію въ моли́твѣ, без̾ причаще́нія, и҆ та́кѡ показа́въ досто́йное покая́ніе, наконе́цъ возведꙋ́тся къ пріѡбще́нію тѣ́ла гд҃ⷭ҇ня.

ПРА́ВИЛО п҃г.

Волхвꙋ́ющіе и҆ послѣ́дꙋющіе ѻ҆бы́чаямъ ꙗ҆зы́ческимъ, и҆лѝ вводя́щіе нѣ́кихъ въ до́мы своѝ, ра́ди и҆зыска́нія чародѣ́йствъ и҆ ра́ди ѡ҆чище́нія, да подлежа́тъ пра́вилꙋ шестилѣ́тія: лѣ́то да бꙋ́дꙋтъ пла́чꙋщими, лѣ́то слꙋ́шающими, трѝ лѣ́та припа́дающими, и҆ є҆ди́но да стоя́тъ съ вѣ́рными, и҆ та́кѡ да пріи́мꙋтся.

ПРА́ВИЛО п҃д.

Все́ же сіѐ пи́шемъ ра́ди тогѡ̀, да и҆спытꙋ́ются плоды̀ покая́нія. И҆́бо мы̀ не по ѻ҆дномꙋ̀ вре́мени сꙋ́димъ ѡ҆ се́мъ, но взира́емъ на ѻ҆́бразъ покая́нія. А҆́ще же кото́рые непреѡдоли́мѡ держа́тся свои́хъ нра́вѡвъ, и҆ лꙋ́чше хотя́тъ слꙋжи́ти ѹ҆дово́льствіямъ пло́ти, не́жели гд҃ⷭ҇ꙋ, и҆ не пріе́млютъ житія̀ по є҆ѵа́нгелію: то нѣ́тъ ѹ҆ на́съ съ ни́ми ничегѡ̀ ѻ҆́бщагѡ. И҆́бо мы̀, въ наро́дѣ непокори́вомъ и҆ пререка́ющемъ, наꙋче́ны слы́шати сіѐ: спаса́я спаса́й твою̀ дꙋ́шꙋБыт. гл. ѳ҃і, ст. з҃і..

ПРА́ВИЛО п҃є.

И҆ та́къ да не попꙋ́стимъ себѣ̀ поги́бнꙋти съ таковы́ми, но ѹ҆боя́вшись тя́жкагѡ сꙋда̀, и҆ и҆мѣ́я пред̾ ѻ҆ча́ми стра́шный де́нь воздая́нія гд҃ⷭ҇ня, да не восс. тл҃ѳхо́щемъ поги́бнꙋти кꙋ́пнѡ съ чꙋжи́ми грѣха́ми. И҆́бо а҆́ще не наꙋчи́ли на́съ стра́шныя сꙋдьбы̑ гд҃ⷭ҇ни, и҆ толи́кіе да́ры не привелѝ на́съ въ чꙋ́вство тогѡ̀, ꙗ҆́кѡ за беззако́ніе на́ше ѡ҆ста́вилъ на́съ гд҃ⷭ҇ь, и҆ пре́далъ въ рꙋ́ки ва́рварѡвъ, и҆ ꙗ҆́кѡ наро́дъ ̾ѿведе́нъ въ плѣ́нъ непрія́телями и҆ пре́данъ разсѣ́янію, поне́же на таковы́я дѣла̀ дерза́ли нося́щіе и҆́мя хр҃ⷭ҇то́во: а҆́ще не позна́ша, нижѐ ѹ҆разꙋмѣ́ша, ꙗ҆́кѡ за сіѐ прише́лъ на на́съ гнѣ́въ бж҃ій, то что̀ на́мъ ѻ҆́бщагѡ съ ни́ми; Но и҆ дне́мъ и҆ но́щію, и҆ всенаро́днѡ и҆ наєдинѣ̀, мы̀ должны̀ засвидѣ́тельствовати и҆̀мъ и҆́стинꙋ: но да не попꙋ́стимъ себѣ̀ ѹ҆влечє́ннымъ бы́ти и҆́хъ беззако́ніями, наипа́че же да мо́лимся, дабы̀ пріѡбрѣстѝ и҆̀хъ, и҆ и҆звлещѝ и҆з̾ сѣ́ти лꙋка́вагѡ. А҆́ще же сегѡ̀ не возмо́жемъ: то потщи́мся, по кра́йней мѣ́рѣ, своѝ дꙋ́шы спастѝ ̾ѿ вѣ́чнагѡ ѡ҆сꙋжде́нія.

с. т҃м

И҆З̾ ДРꙊГА́ГѠ КАНОНІ́ЧЕСКАГѠ ПОСЛА́НІЯ къ томꙋ́ же.

ПРА́ВИЛО п҃ѕ.

И҆зря́днымъ є҆нкраті́тамъ [возде́ржникамъ] на ва́жное и҆́хъ возраже́ніе: для чегѡ̀ и҆ мы̀ не всѐ ꙗ҆ди́мъ, да ̾ѿвѣ́тствꙋется сіѐ: ꙗ҆́кѡ и҆ и҆зверже́ніями на́шими гнꙋша́емся. И҆́бо по досто́инствꙋ для на́съ и҆ ѕе́ліе травно́е є҆́сть то́ же, что̀ мя́со: а҆ въ разсꙋжде́ніи по́льзы, ка́къ въ ѕе́ліи ̾ѿдѣля́емъ вре́дное ̾ѿ здра́вагѡ, та́кѡ и҆ въ мя́сѣ различа́емъ вре́дное ̾ѿ поле́знагѡ. И҆́бо и҆ болиголо́въ є҆́сть ѕе́ліе, и҆ мя́со ꙗ҆́стреба є҆́сть мя́со: но никто̀ въ здра́вомъ ѹ҆мѣ̀ не бꙋ́детъ ꙗ҆́сти бѣленꙋ̀, нижѐ прико́снется пе́сіемꙋ мя́сꙋ, ра́звѣ въ вели́кой нꙋ́ждѣ. Посемꙋ̀ ꙗ҆́дшій не сдѣ́лалъ беззако́нія.

с. тм҃а

ПОСЛА́НІЕ къ діодѡ́рꙋ є҆пі́скопꙋ та́рскомꙋ.

ВСТꙊПЛЕ́НІЕ.

Дошло̀ до на́съ письмо̀, и҆мѣ́ющее по́дпись діодѡ́ра, все́ же про́чее въ не́мъ бо́лѣе прили́чествꙋетъ комꙋ́ либо дрꙋго́мꙋ, не́жели діодѡ́рꙋ. И҆́бо мнѣ̀ мни́тся, ꙗ҆́кѡ нѣ́кто и҆з̾ хи́трыхъ, приня́въ на себя̀ твоѐ лицѐ, хотѣ́лъ чрез̾ то̀ содѣ́лати себя̀ досто́йнымъ вѣ́ры пред̾ слꙋ́шающими. Ѻ҆́нъ бы́въ вопроше́нъ ̾ѿ нѣ́коегѡ, позволи́тельно ли взя́ти въ сꙋпрꙋ́жество сестрꙋ̀ ѹ҆ме́ршія жены̀ своея̀, не ѹ҆жаснꙋ́лся сегѡ̀ вопро́са: но и҆ равнодꙋ́шнѡ приня́лъ слы́шимое, и҆ вопроси́вшемꙋ весьма̀ ̾ѿва́жнѡ и҆ ѹ҆си́льнѡ содѣ́йствовалъ въ стꙋ́дномъ жела́ніи. А҆́ще бы́ло бы ѹ҆ меня̀ сіѐ писа́ніе, ꙗ҆́ посла́лъ бы є҆го̀ къ тебѣ̀, и҆ ты̀ бы́лъ бы дово́льнѡ си́ленъ защити́ти себя̀ и҆ и҆́стинꙋ. Но поели́кꙋ показа́вшій взя́лъ ѡ҆бра́тнѡ ѻ҆́ное, а҆́ки бы нѣ́кій зна́къ побѣ́ды надо мно́ю, є҆щѐ пре́жде запрети́вшимъ такі́я бра́ки, носи́лъ повсю́дꙋ, говоря̀, ꙗ҆́кѡ и҆мѣ́етъ пи́сменное позволе́ніе: то пишꙋ̀ ны́нѣ къ тебѣ̀, да сꙋгꙋ́бою рꙋко́ю воѡрꙋжи́мся проти́въ ѻ҆́нагѡ подло́жнагѡ писма̀, и҆ не ѡ҆ста́вимъ є҆мꙋ̀ никакі́я си́лы, дабы̀ ѻ҆но̀ не могло̀ легкѡ̀ вреди́ти чита́ющымъ.

с. тм҃в

ПРА́ВИЛО п҃з.

И҆ та́къ пе́рвое, и҆ прито́мъ въ дѣла́хъ сегѡ̀ ро́да весьма̀ ва́жное, что̀ и҆мѣ́емъ предложи́ти, є҆́сть соблюда́емый ѹ҆ на́съ ѻ҆бы́чай, и҆мѣ́ющій си́лꙋ зако́на, потомꙋ̀ что̀ сіѝ постановлє́нія пре́даны на́мъ ̾ѿ святы́хъ мꙋже́й. Ѻ҆бы́чай же тако́въ: а҆́ще кто̀, бꙋ́дꙋчи ѡ҆держи́мъ стра́стію нечистоты̀, впаде́тъ въ безчи́нное совокꙋпле́ніе съ двꙋмя̀ сестра́ми: то и҆ бра́комъ сіѐ не почита́ется, и҆ въ цр҃ко́вное собра́ніе таковы́е пріе́млются не пре́жде, ка́къ по разлꙋче́ніи дрꙋ́гъ ̾ѿ дрꙋ́га. Посемꙋ̀, а҆́ще бы и҆ не мо́жно бы́ло рещѝ ничегѡ̀ дрꙋга́гѡ, дово́льно бы́ло бы и҆ сегѡ̀ ѻ҆бы́чая для прегра́ды ѕлꙋ̀. По поели́кꙋ писа́вшій писмо̀ покꙋша́лся, ло́жнымъ дово́домъ, ввестѝ въ ѻ҆́бразъ жи́зни толи́кое ѕло̀: то нꙋ́жно и҆ на́мъ прія́ти въ по́мощь разсꙋжде́ніе, хотя̀ въ предме́тахъ весьма̀ ꙗ҆́сныхъ ѹ҆ вся́кагѡ сильнѣ́е разсꙋжде́нія быва́етъ предꙋбѣжде́ніе. И҆́бо пи́сано, говори́тъ ѻ҆́нъ, въ кни́гѣ леѵі́тъ: женꙋ̀ къ сестрѣ̀ є҆я̀ да не по́ймеши въ ревни́вꙋю сопе́рницꙋ, ̾ѿкры́ти срамотꙋ̀ є҆я̀ пред̾ не́ю, є҆щѐ жи́вѣ сꙋ́щей є҆́й[27]. Ѿсю́да ꙗ҆́вно бы́ти сказꙋ́етъ ѻ҆́нъ, ꙗ҆́кѡ позволи́тельно взя́ти по сме́рти є҆я̀. На сіѐ пре́жде всегѡ̀ то̀ рекꙋ̀, ꙗ҆́кѡ є҆ли̑ка зако́нъ глаго́летъ, сꙋ́щымъ въ зако́нѣ глаго́летъРим. гл. г҃. ст. ѳ҃і.. И҆́бо и҆на́че мы̀ подлежа́ли бы и҆ ѡ҆брѣ́занію, и҆ сꙋббѡ́тѣ, и҆ ѹ҆дале́нію ̾ѿ нѣ́которыхъ снѣ́дей. И҆́бо не ѹ҆же́ли на́мъ, когда̀ найде́мъ что́ либо благопрія́тствꙋющее на́шемꙋ сладостра́стію, подчиня́ти себя̀ и҆́гꙋ рабо́ты зако́на, а҆ когда̀ како́е и҆з̾ предписа́ній зако́на ꙗ҆ви́тся тя́жкимъ, прибѣга́ти къ свобо́дѣ сꙋ́щей во хр҃ⷭ҇тѣ̀; На́съ вопроша́ли: є҆́сть ли въ писа́ніи разрѣше́ніе бра́ти женꙋ̀ по́слѣ сестры̀ є҆я̀; Мы̀ реклѝ, нѣ́тъ: что̀ и҆ с. см҃г безѻпа́сно для на́съ и҆ и҆́стинно: но посре́дствомъ благови́днагѡ заключе́нія ѹ҆становля́ти мнѣ́ніе ѡ҆ то́мъ, что̀ ѹ҆мо́лчано, зна́чило бы законополага́ти, а҆ не приводи́ти слова̀ зако́на. И҆́бо таки́мъ ѻ҆́бразомъ хотя́щемꙋ дерзнꙋ́ти, бы́ло бы позво́лено, и҆ при жи́зни жены̀, взя́ти сестрꙋ̀ є҆я̀. И҆́бо тако́е же лжеꙋ́мствованіе мо́жетъ приспосо́блено бы́ти и҆ къ семꙋ̀ слꙋ́чаю. Пи́сано, ска́жетъ ѻ҆́нъ: не по́ймеши въ ревни́вꙋю сопе́рницꙋ, слѣ́довательнѡ взя́ти не и҆мѣ́ющꙋю ре́вности зако́нъ не запрети́лъ. Посемꙋ̀ защи́тникъ стра́сти рече́тъ, ꙗ҆́кѡ се́стры и҆мѣ́ютъ нра́въ неревни́вый. И҆ та́къ когда̀ нѣ́тъ причи́ны, по кото́рой запрещено̀ сожи́тіе ѻ҆бѣ́ихъ: то что̀ препя́тствꙋетъ взя́ти се́стръ; Сегѡ̀ не напи́сано, ска́жемъ мы̀: но и҆ тогѡ̀ не ѡ҆предѣлено̀. Мы́сль же, выводи́мая чрез̾ заключе́ніе, дѣ́лаетъ позволи́тельнымъ и҆ то̀ и҆ дрꙋго́е. Надлежа́ло бы возврати́тися немно́гѡ вспя́ть, къ предше́ствовавшымъ и҆зрече́ніямъ зако́на, и҆ тѣ́мъ ѡ҆свободи́тися ̾ѿ затрꙋдне́нія. И҆́бо примѣча́ется, ꙗ҆́кѡ законода́тель не всѣ̀ ро́ды грѣхѡ́въ ѡ҆б̾е́млетъ, но въ ѻ҆со́бенности ̾ѿверга́етъ грѣхѝ є҆гѵ́птянъ, ̾ѿкꙋ́да и҆зше́лъ і҆зра́иль, и҆ ханане́євъ, къ котѡ́рымъ ѻ҆́нъ преселя́лся. И҆́бо та́къ чита́ется: по дѣлѡ́мъ землѝ є҆гѵ́петскія, въ не́йже ѡ҆бита́сте, да не сотворитѐ, и҆ по начина́ніямъ землѝ ханаа́нскія, въ ню́же а҆́зъ введꙋ̀ вы̀ та́мѡ, не сотвори́те, и҆ по зако́нѡмъ и҆́хъ не ходи́те[29]. Вѣроя́тно, ꙗ҆́кѡ се́й ро́дъ грѣха̀ не бы́лъ допꙋ́щенъ тогда̀ въ житіѝ ꙗ҆зы́чникѡвъ: а҆ потомꙋ̀ и҆ законода́тель не и҆мѣ́лъ нꙋ́жды ѡ҆гражда́ти ̾ѿ негѡ̀, но доста́точно бы́ло непредваре́ннагѡ ѹ҆че́ніемъ ѻ҆бы́чая для ̾ѿверже́нія сея̀ гнꙋ́сности. Но почемꙋ̀ запрети́въ бо́льшее, ѻ҆́нъ ѹ҆с. тм҃дмолча́лъ ѡ҆ ме́ньшемъ; Потомꙋ̀, что̀ мнѡ́гимъ и҆з̾ плотолюби́выхъ, въ ̾ѿноше́ніи къ сожи́тію съ се́страми живы́хъ же́нъ, каза́лся бы́ти вре́денъ примѣ́ръ патріа́рха. На́мъ же что̀ подоба́етъ твори́ти; напи́санное глаго́лати, и҆лѝ ѹ҆мо́лчанное и҆зы́скивати; И҆́бо въ си́хъ зако́нахъ не напи́сано и҆ тогѡ̀, ꙗ҆́кѡ ѻ҆те́цъ и҆ сы́нъ не должны̀ входи́ти къ є҆ди́ной нало́жницѣ: но ѹ҆ проро́ка сіѐ подверга́ется велича́йшемꙋ ѡ҆сꙋжде́нію. Сы́нъ бо, глаго́летъ, и҆ ѻ҆те́цъ вла́зяста ко є҆ди́ной рабы́нѣ[30] и҆ ско́лькѡ дрꙋги́хъ ви́дѡвъ нечи́стыхъ страсте́й и҆зѡбрѣло̀ бѣсо́вское ѹ҆чи́лище, ѡ҆ ко́ихъ бж҃е́ственное писа́ніе ѹ҆молча́ло; Не жела́я нарꙋша́ти своея̀ свяще́нныя ва́жности наименова́ніями гнꙋ́сностей, ѻ҆но̀ ѡ҆знача́ло нечистѡты̀ ѻ҆́бщими наименова́ніями, ка́къ глаго́летъ а҆по́столъ па́ѵелъ: блꙋ́дъ же, и҆ вся́ка нечистота̀ нижѐ да и҆менꙋ́ется въ ва́съ, ꙗ҆́коже подоба́етъ святы̑мъ[31]: под̾ и҆́менемъ нечистоты̀ ѻ҆́нъ заключа́етъ недостѡ́йныя назва́нія дѣ̑йствія мꙋже́й и҆ же́нъ. Таки́мъ ѻ҆́бразомъ ѹ҆молча́ніе не дае́тъ разрѣше́нія сластолю́бцамъ. Ꙗ҆́ же сказꙋ́ю, ꙗ҆́кѡ и҆ не ѹ҆молча́лъ законода́тель ѡ҆ се́мъ ви́дѣ беззако́нія: но весьма̀ си́льнѡ запрети́лъ ѻ҆́ный. И҆́бо слова̀: да не вни́деши ко вся́комꙋ бли́жнемꙋ пло́ти твоея̀ ̾ѿкры́ти срамоты̀ и҆́хъ[32], заключа́ютъ въ себѣ̀ и҆ се́й ви́дъ родства̀. И҆́бо для мꙋ́жа что̀ мо́жетъ бы́ти бли́же со́бственныя жены̀, и҆лѝ па́че своея̀ є҆мꙋ̀ пло́ти; и҆́бо ѻ҆нѝ ѹ҆жѐ не сꙋ́ть два̀, но пло́ть є҆ди́на. Таки́мъ ѻ҆́бразомъ, посре́дствомъ жены̀, сестра̀ є҆я̀ перехо́дитъ въ родство̀ мꙋ́жа. И҆́бо ка́къ не мо́жетъ ѻ҆́нъ взя́ти ма́терь жены̀ своея̀, нижѐ дще́рь є҆я̀, пос. тм҃єтомꙋ̀ что̀ не мо́жетъ взя́ти свою̀ ма́терь, нижѐ дще́рь є҆я̀: та́кожде не мо́жетъ взя́ти сестрꙋ̀ жены̀ своея̀, потомꙋ̀ что̀ не мо́жетъ взя́ти сестрꙋ̀ свою̀. И҆ ѡ҆бра́тнѡ, не позволи́тельно и҆ женѣ̀ сожи́тельствовати съ сро́дниками мꙋ́жа: потомꙋ̀ что̀ права̀ родства̀ ѻ҆́бщи для ѻ҆бои́хъ. Ꙗ҆́ же вся́комꙋ, прося́щемꙋ совѣ́та ѡ҆ бра́кѣ, свидѣ́тельствꙋю, ꙗ҆́кѡ прехо́дитъ ѻ҆́бразъ мі́ра сегѡ̀, и҆ вре́мя прекраще́но є҆́сть, да и҆ и҆мꙋ́щіи жє́ны, ꙗ҆́коже не и҆мꙋ́щіи бꙋ́дꙋтъ[33]. А҆́ще же кто̀ предста́витъ мнѣ̀ въ возраже́ніе ѻ҆́ное и҆зрече́ніе, расти́теся и҆ мно́житесяБыт. гл. а҃, ст. к҃и.: то ꙗ҆́ посмѣю́сь не различа́ющемꙋ време́нъ законоположе́нія. Вторы́й бра́къ є҆́сть врачевство̀ проти́вꙋ блꙋда̀, а҆ не напꙋ́тствіе сластолю́бію. Рече́но: а҆́ще ли не ѹ҆держа́тся, да посяга́ютъ[35]. Но и҆ посяга́я, да не беззако́ннꙋютъ. А҆ тѣ̀, кото́рые ѡ҆скверня́я дꙋ́шꙋ стра́стію безче́стія, не взира́ютъ и҆ на є҆стество̀, и҆здре́вле различи́вшее и҆менова̑нія родства̀, каки́мъ и҆́менемъ родства̀ назовꙋ́тъ рожде́нныхъ ̾ѿ таки́хъ двꙋ́хъ сꙋпрꙋ́жествъ; бра́тіями ли родны́ми, и҆лѝ двою́родными; и҆́бо, по причи́нѣ смѣше́нія, и҆̀мъ прили́чествовати бꙋ́детъ и҆ то̀ и҆ дрꙋго́е наименова́ніе. Не дѣ́лай, человѣ́че, те́тки дѣте́й ма́чихою и҆́хъ, и҆ тꙋ̀, кото́рая вмѣ́стѡ ѹ҆ме́ршія ма́тери должна̀ ласка́ти и҆̀хъ не воѡрꙋжа́й неꙋтоли́мою ре́вностію. И҆́бо є҆ди́на ре́вность ма́чихъ и҆ за гро́бъ простира́етъ не́нависть: и҆лѝ па́че, дрꙋгі́е бы́вшіе врага́ми, примиря́ются съ ѹ҆ме́ршими, а҆ ма́чихи ̾ѿ сме́рти начина́ютъ не́нависть. Гла́вное же и҆з̾ вышерече́ннагѡ є҆́сть слѣ́дꙋющее: а҆́ще кто̀ жела́етъ бра́ка по зако́нꙋ, то є҆мꙋ̀ ̾ѿве́рста вся̀ вселе́нная: а҆́ще же жела́ніе є҆гѡ̀ ѹ҆правля́ется стра́стію, тѣ́мъ па́че да воспрес. см҃ѕти́тся є҆мꙋ̀ бра́къ, да наꙋчи́тся сосꙋ́дъ сво́й содержа́ти въ свя́тости, а҆ не въ стра́сти по́хоти[36]. Бо́лѣе глаго́лати стремя́щагося меня̀ ѹ҆де́рживаетъ мѣ́ра посла́нія. Жела́ю, что́бы и҆лѝ ѹ҆вѣща́ніе моѐ ѡ҆каза́лось сильнѣ́йшимъ стра́сти, и҆лѝ что́бы беззако́ніе сіѐ не посели́лось въ на́шей ѻ҆́бласти, но ѡ҆става́лось въ тѣ́хъ мѣста́хъ, въ кото́рыхъ дерзнꙋ́ли на ѻ҆́ное.

с. тм҃з

ТОГѠ́ ЖЕ посла́ніе къ григо́рію пресвѵ́терꙋ.

ПРА́ВИЛО п҃и.

Проче́лъ ꙗ҆́ твоѐ писа́ніе со вся́кимъ долготерпѣ́ніемъ, и҆ ѹ҆диви́лся, ка́кѡ ты̀, когда̀ мо́гъ вы̀ кра́ткѡ и҆ легкѡ̀ ѡ҆правда́тися предо мно́ю дѣ́ломъ, рѣши́лся пребыва́ти въ то́мъ, въ че́мъ ѡ҆бвине́нъ, и҆ покꙋша́ешься многосло́віемъ и҆сцѣли́ти неисцѣли́мое. Не мы̀ пе́рвые, ѡ григо́рій, и҆ не ѻ҆днѝ мы̀ законоположи́ли, да не живꙋ́тъ же́ны и҆ мꙋ́жи кꙋ́пнѡ. Прочтѝ пра́вило, и҆зло́женное ст҃ы́ми ѻ҆тца́ми на́шими на ніке́йскомъ собо́рѣ, ꙗ҆́внѡ запреща́ющее и҆мѣ́ти сожи́тельствꙋющихъ въ до́мѣ же́нъ. Безбра́чіе въ то́мъ и҆мѣ́етъ своѐ досто́инство, что́бы не и҆мѣ́ти ѡ҆браще́нія съ же́нскимъ по́ломъ. Таки́мъ ѻ҆́бразомъ, а҆́ще кто̀, представля́я себя̀ дѣ́вственникомъ по и҆́мени, дѣ́ломъ то́жде твори́тъ, что̀ и҆ живꙋ́щіе съ жена́ми, то́тъ ꙗ҆вля́етъ ѡ҆ себѣ̀, ꙗ҆́кѡ домога́ется досто́инства дѣ́вства въ и҆́мени, но безѻбра́зія сладостра́стія не ѡ҆ста́вилъ. Тѣ́мъ па́че подоба́ло тебѣ̀ и҆спо́лнити моѐ тре́бованіе, что̀ ты̀, ка́къ говори́шь, свобо́денъ ̾ѿ вся́кія тѣле́сныя стра́сти. И҆́бо ꙗ҆́ не полага́ю, что́бы семидесятилѣ́тній жи́лъ съ жено́ю стра́стнымъ ѻ҆́бразомъ: и҆ не та́къ ка́кбы за слꙋчи́вшееся беззако́нное дѣ́ло ѡ҆предѣли́лъ ꙗ҆́ то̀, что̀ ѡ҆прес. тм҃идѣли́лъ, но потомꙋ̀, что̀ наꙋчи́лся ̾ѿ а҆по́стола не полага́ти претыка́нія бра́тꙋ и҆лѝ собла́знаРим. гл. д҃і, ст. г҃і.. Зна́емъ же, ꙗ҆́кѡ нѣ́которыхъ дѣ́йствія чи̑стыя, для дрꙋги́хъ быва́ютъ по́водомъ ко грѣхꙋ̀. Сегѡ̀ ра́ди, слѣ́дꙋя ѹ҆становле́нію святы́хъ ѻ҆тє́цъ, мы̀ повелѣ́ли тебѣ̀ ̾ѿлꙋчи́тися ̾ѿ ѻ҆́ныя жены̀. Почто́ же ѡ҆бвиня́ешь хѡрепі́скопа, и҆ ѹ҆помина́ешь ѡ҆ да́вней враждѣ̀; Почто̀ и҆ на меня̀ жа́лꙋешися, ка́къ и҆мѣ́ющаго ̾ѿве́рстый слꙋ́хъ для приня́тія клеве́тъ, а҆ не на самаго̀ себя̀, не соглаша́ющагося ѡ҆ста́вити ѡ҆браще́ніе съ же́нщиною; И҆ та́къ ѹ҆далѝ є҆ѐ и҆з̾ до́ма своегѡ̀, и҆ ѡ҆предѣлѝ въ монасты́рь, да бꙋ́детъ ѻ҆на̀ съ дѣ́вами: а҆ ты̀ и҆мѣ́й слꙋжи́телей мꙋ́жескагѡ по́ла, да не хꙋ́лится ва́ми и҆́мя бж҃іе. Доко́лѣ же сіѐ твори́шь, ты́сящи ѡ҆правда́ній, котѡ́рыя ты̀ и҆злага́ешь въ писмѣ̀, не принесꙋ́тъ тебѣ̀ ни є҆ди́ныя по́льзы: но ѹ҆́мрешь запреще́ннымъ въ священнослꙋже́ніи, и҆ да́шь гд҃ⷭ҇ꙋ ̾ѿвѣ́тъ за своѐ запреще́ніе. А҆́ще же, не и҆спра́вивъ себя̀, де́рзнешь коснꙋ́тися священнодѣ́йствія: то бꙋ́дешь а҆на́ѳема пред̾ всѣ́мъ наро́домъ, и҆ пріе́млющіе тебя̀ бꙋ́дꙋтъ ̾ѿлꙋчены̀ ̾ѿ всея̀ це́ркви.

с. тм҃ѳ

ТОГѠ́ ЖЕ къ хѡрепі́скопамъ каноні́ческое посла́ніе.

ПРА́ВИЛО п҃ѳ.

Весьма̀ болѣ́знꙋю, ꙗ҆́кѡ пра̑вила ѻ҆те́чєскія ѡ҆ста́влены, и҆ вся́кая стро́гость и҆згнана̀ и҆з̾ цр҃кве́й. И҆ бою́ся, что́бы дѣла̀ цр҃кѡ́вныя не пришлѝ въ соверше́нное замѣша́тельство, когда̀ сіѐ равнодꙋ́шіе ма́лѡ по ма́лꙋ да́лѣе и҆дтѝ бꙋ́детъ свои́мъ пꙋте́мъ. По ѻ҆бы́чаю, и҆здре́вле водвори́вшемꙋся въ цр҃квахъ бж҃іихъ, слꙋжи́тели цр҃кви пріе́млемы бы́ли по и҆спыта́ніи со вся́кою стро́гостію, и҆ всѐ поведе́ніе и҆́хъ прилѣ́жнѡ и҆зслѣ́дываемо бы́ло: не ѕлорѣ́чивы ли ѻ҆нѝ, не пія́ницы ли, не скло́нны ли къ ссо́рамъ, наставля́ютъ ли ю҆́ность свою̀, да возмо́гꙋтъ соверша́ти святы́ню, без̾ ко́ея никто̀ не ѹ҆́зритъ гд҃ⷭ҇а[38]; И҆ сіѐ и҆спы́тывали пресвѵ́теры и҆ діа́коны съ ни́ми живꙋ́щіе, доноси́ли ѡ҆ то́мъ хѡрепі́скопамъ, а҆ сіѝ приня́въ ѻ҆́тзывъ ̾ѿ свидѣ́тельствꙋющихъ по и҆́стинѣ и҆ предста́вивъ є҆пі́скопꙋ, таки́мъ ѻ҆́бразомъ причисля́ли слꙋжи́теля къ свяще́нномꙋ чи́нꙋ. А҆ ны́нѣ вы̀, во пе́рвыхъ на́съ ̾ѿве́ргши, и҆ не восхотѣ́въ да́же и҆звѣща́ти на́съ, всю̀ вла́сть заключи́ли въ сами́хъ себѣ̀. Пото́мъ, вознерадѣ́въ ѡ҆ се́мъ дѣ́лѣ, пресвѵ́терамъ и҆ діа́конамъ позво́лили, кого̀ с. т҃н восхотя́тъ, без̾ и҆спыта́нія жи́зни и҆́хъ, но по пристра́стію происходя́щемꙋ и҆лѝ ̾ѿ родства̀, и҆лѝ ̾ѿ и҆на́гѡ нѣ́коегѡ содрꙋ́жества, недосто́йныхъ вводи́ти въ це́рковь. Ѿ сегѡ̀ мно́гѡ слꙋжи́телей цр҃кви чи́слится въ ка́ждомъ селѣ̀, но нѣ́тъ никогѡ̀ досто́йнагѡ слꙋже́нія ѻ҆лтарю̀: ка́къ вы̀ са́ми свидѣ́тельствꙋете, не находя̀ люде́й при и҆збра́ніяхъ. Поели́кꙋ дѣ́ло сіѐ пришло̀ наконе́цъ въ состоя́ніе неисцѣли́мое, ѻ҆со́беннѡ ны́нѣ, когда̀ весьма̀ мно́гіе и҆з̾ стра́ха бы́ти взя́тыми въ во́ины, ѡ҆предѣля́ются въ слꙋже́ніе цр҃кви: то ꙗ҆́ по неѡбходи́мости ѡ҆брати́лся къ возѡбновле́нію ѻ҆те́ческихъ пра́вилъ: и҆ пишꙋ̀ къ ва́мъ, что́бы вы̀ присла́ли мнѣ̀ спи́сокъ цр҃ко́вныхъ слꙋжи́телей ка́ждагѡ села̀, съ показа́ніемъ, кѣ́мъ кто̀ ѡ҆предѣле́нъ, и҆ каково̀ житіѐ є҆гѡ̀. И҆мѣ́йте же и҆ вы̀ ѹ҆ себя̀ таковы́й же спи́сокъ, дабы̀ мо́жно бы́ло съ находя́щимися ѹ҆ меня̀ за́писями слича́ти ва́ши, и҆ дабы̀ никомꙋ̀ не бы́ло возмо́жно впи́сывати самаго̀ себя̀, когда̀ восхо́щетъ. Таки́мъ ѻ҆́бразомъ, а҆́ще кото́рые приня́ты пресвѵ́терами, по́слѣ пе́рвагѡ лѣ́та і҆ндіктіѡ́на, да и҆зве́ргнꙋтся въ число̀ міря́нъ. Да произведе́тся же ва́ми вно́вь и҆спыта́ніе и҆́хъ, и҆ а҆́ще сꙋ́ть досто́йны, да пріи́мꙋтся по ва́шемꙋ рѣше́нію: ѡ҆чи́стите цр҃ковь, ѹ҆даля́я ̾ѿ є҆я̀ слꙋже́нія недосто́йныхъ. И҆ впре́дь досто́йныхъ и҆спытꙋ́йте и҆ принима́йте, но не чи́слите въ кли́рѣ, пре́жде не́жели предста́вите мнѣ̀. И҆на́че же вѣ́дайте, ꙗ҆́кѡ приня́тый въ церковнослꙋже́ніе без̾ моегѡ̀ разрѣше́нія, бꙋ́детъ міряни́номъ.

с. тн҃а

ТОГѠ́ ЖЕ къ подчине́ннымъ є҆мꙋ̀ є҆пі́скопамъ.

ПРА́ВИЛО ч҃.

Нелѣ́пость дѣ́ла, ѡ҆ ко́емъ пишꙋ̀, содѣ́лавшись воѻбщѐ предме́томъ подозрѣ́ній и҆ молвы̀, и҆спо́лнила печа́лію мою̀ дꙋ́шꙋ: впро́чемъ ѻ҆но̀ мнѣ̀ предста́вилось невѣроя́тнымъ. И҆ та́къ сіѐ писа́ніе ѡ҆б̾ ѻ҆́номъ, пови́нный да пріи́метъ, ꙗ҆́кѡ врачевство̀, непови́нный ꙗ҆́кѡ предостереже́ніе, а҆ равнодꙋ́шный къ добрꙋ̀ и҆ ѕлꙋ̀, что̀ въ ва́съ ѡ҆брѣстѝ ꙗ҆́ не жела́лъ бы, ꙗ҆́кѡ свидѣ́тельство про́тивъ негѡ̀. Что́ же є҆́сть, ѡ҆ че́мъ глаго́лю; Сказꙋ́ютъ нѣ́кіе, ꙗ҆́кѡ нѣ́которые и҆з̾ ва́съ ̾ѿ рꙋкополага́емыхъ и҆́ми берꙋ́тъ дє́ньги, и҆ прикрыва́ютъ то̀ и҆́менемъ благоче́стія, что̀ є҆щѐ хꙋ́же. И҆́бо а҆́ще кто̀ дѣ́лаетъ ѕло̀, под̾ прикры́тіемъ добра̀, таковы́й досто́инъ сꙋгꙋ́багѡ наказа́нія: и҆ за то̀, ꙗ҆́кѡ твори́тъ недо́брое, и҆ за то̀, ꙗ҆́кѡ ѹ҆потребля́етъ до́брое, да та́кѡ рече́мъ, споспѣ́шникомъ себѣ̀ къ соверше́нію грѣха̀. А҆́ще та́кѡ є҆́сть сіѐ: да не бꙋ́детъ ̾ѿны́нѣ, но да и҆спра́вится. И҆́бо взе́млющемꙋ сребро̀ неѡбходи́мѡ до́лжно рещѝ то̀, что̀ рече́но а҆по́столами хотѣ́вшемꙋ да́ти ѻ҆́ное, да кꙋ́питъ преподая́ніе ст҃а́гѡ дх҃а: сребро̀ твоѐ съ тобо́ю да бꙋ́детъ въ поги́бель[39]. И҆́бо ме́нѣе грѣс. тн҃вши́тъ хотя́щій, по неразꙋ́мію, кꙋпи́ти да́ръ бж҃ій, не́жели продаю́щій є҆го̀, потомꙋ̀ что̀ сіѐ є҆́сть прода́жа: и҆ а҆́ще полꙋче́нное тꙋ́не продае́шь, ка́къ бы про́данный сатанѣ̀, то ̾ѿи́мется ѹ҆ тебя̀ дарова́ніе. И҆́бо ты̀ корче́мство вво́дишь въ дꙋхо́вныя дѣла̀ и҆ въ цр҃ковь, въ кото́рой на́мъ ввѣ́рено тѣ́ло и҆ кро́вь хр҃ⷭ҇то́ва. Не подоба́етъ си̑мъ та́кѡ быва́ти. Въ че́мъ же состои́тъ ѹ҆хищре́ніе, сказꙋ́ю. Мня́тъ, ꙗ҆́кѡ не согрѣша́ютъ, когда̀ берꙋ́тъ не при рꙋкоположе́ніи, а҆ по́слѣ: взя́ти же, когда̀ бы то̀ ни бы́ло, є҆́сть взя́ти. И҆ та́къ молю̀, ѡ҆ста́вите се́й дохо́дъ, и҆лѝ па́че се́й вхо́дъ въ гее́ннꙋ, и҆ не дѣ́лайте себя̀ недосто́йными соверша́ти свящє́нныя та̑инства, ѡ҆скверня́я рꙋ́ки своѝ таковы́мъ лихоима́ніемъ. Прости́те же мнѣ̀, ꙗ҆́кѡ пе́рвѣе а҆́ки не вѣ́ривъ, пото́мъ же, а҆́ки повѣ́ривъ, ѹ҆грожа́ю. А҆́ще кто̀ по́слѣ сегѡ̀ моегѡ̀ посла́нія что́ либо таково́е содѣ́лаетъ: да ̾ѿстꙋ́питъ ̾ѿ здѣ́шнихъ ѻ҆лтаре́й, и҆ пꙋ́сть и҆́щетъ, гдѣ̀ бы мо́гъ ѻ҆́нъ покꙋпа́ти и҆ продава́ти да́ръ бж҃ій. И҆́бо мы̀ и҆ цр҃кви бж҃іи такова́гѡ ѻ҆бы́чая не и҆мѣ́емъ[40]. Є҆ди́ное же присовокꙋпи́въ преста́нꙋ. Сіѐ быва́етъ и҆з̾ сребролю́бія: сребролю́біе же є҆́сть ко́рень всѣ́хъ ѕѡ́лъ[41], и҆ нарица́ется і҆дѡлослꙋже́ніемъ[42]. И҆ та́къ не предпочита́йте і҆́дѡлѡвъ хр҃ⷭ҇тꙋ̀ за ма́лое сребро̀, нижѐ па́ки і҆ꙋ́дѣ подража́йте, за лихоима́ніе втори́чнѡ предава́я є҆ди́ножды распя́таго за на́съ: и҆́бо и҆ се́ла и҆ рꙋ́ки взе́млющихъ таковы́е плоды̀, нарекꙋ́тся а҆келдама̀.

с. тн҃г

СВЯТА́ГѠ ВАСІ́ЛІЯ и҆з̾ к҃з главы̀ кни́ги ѡ҆ ст҃о́мъ дх҃ѣ, къ блаже́нномꙋ а҆мфіло́хію.

ПРА́ВИЛО ч҃а.

И҆з̾ сохране́нныхъ въ це́ркви догма́тѡвъ и҆ проповѣ́даній, нѣ́котѡрыя мы̀ и҆мѣ́емъ ̾ѿ пи́сменнагѡ наставле́нія: а҆ нѣ́котѡрыя прія́ли ̾ѿ а҆по́стольскагѡ преда́нія, по прее́мствꙋ въ та́йнѣ, и҆ тѣ̀ и҆ дрꙋгі́я и҆мѣ́ютъ є҆ди́нꙋ и҆ тꙋ́ же си́лꙋ для благоче́стія. И҆ семꙋ̀ не воспрекосло́витъ никто̀, хотя̀ ма́лѡ свѣ́дꙋщій въ ѹ҆становле́ніяхъ церко́вныхъ. И҆́бо а҆́ще предпріи́мемъ ̾ѿверга́ти непи́санные ѻ҆бы́чаи, а҆́ки не вели́кꙋю и҆мѣ́ющіе си́лꙋ: то непримѣ́тнѡ повреди́мъ є҆ѵа́нгелію въ гла́вныхъ предме́тахъ, и҆лѝ па́че сократи́мъ про́повѣдь въ є҆ди́ное и҆́мя без̾ са́мыя ве́щи. Напримѣ́ръ, пре́жде всегѡ̀ ѹ҆помянꙋ̀ ѡ҆ пе́рвомъ и҆ са́момъ ѻ҆́бщемъ, что́бы ѹ҆пова́ющіе на и҆́мя гд҃ⷭ҇а на́шегѡ і҆и҃са хр҃ⷭ҇та̀, зна́менались ѻ҆́бразомъ креста̀, кто̀ ѹ҆чи́лъ семꙋ̀ писа́ніемъ; Къ восто́кꙋ ѡ҆браща́тися въ моли́твѣ, како́е писа́ніе на́съ наꙋчи́ло; Слова̀ призыва́нія при преложе́ніи хлѣ́ба є҆ѵхарі́стіи и҆ ча́ши благослове́нія, кто̀ и҆з̾ святы́хъ ѡ҆ста́вилъ на́мъ пи́сменнѡ; И҆́бо мы̀ не дово́льствꙋемся тѣ́ми слова́ми, ѡ҆ ко́ихъ ѹ҆помянꙋ́лъ а҆по́столъ и҆лѝ є҆ѵа́нгеліе, но и҆ с. тн҃д пре́жде и҆ по́слѣ ѻ҆́ныхъ произно́симъ и҆ дрꙋгі́я, ка́къ и҆мѣ́ющыя вели́кꙋю си́лꙋ въ та́инствѣ, приня́въ и҆̀хъ ̾ѿ непи́саннагѡ ѹ҆че́нія. Благословля́емъ та́кожде и҆ во́дꙋ креще́нія и҆ є҆ле́й пома́занія, є҆ще́ же и҆ самаго̀ креща́емаго, по како́мꙋ писа́нію; не по преда́нію ли, ѹ҆ма́лчиваемомꙋ и҆ та́йномꙋ; И҆ что̀ є҆щѐ; самомꙋ̀ пома́зыванію є҆ле́емъ, како́е пи́санное сло́во наꙋчи́ло; Ѿкꙋ́да и҆ троекра́тное погрꙋже́ніе человѣ́ка; и҆ про́чее быва́ющее при креще́ніи, ̾ѿрица́тися сатаны̀ и҆ а҆́ггелѡвъ є҆гѡ̀, и҆з̾ како́гѡ взя́то писа́нія; Не и҆з̾ сегѡ́ ли неѡбнаро́дываемагѡ и҆ неизрека́емагѡ ѹ҆че́нія, кото́рое ѻ҆тцы̀ на́ши сохрани́ли въ недостꙋ́пномъ любопы́тствꙋ и҆ вывѣ́дыванію молча́ніи, бы́въ здра́вѡ наꙋче́ны молча́ніемъ ѡ҆храня́ти святы́ню та́инства; И҆́бо како́е бы́ло бы прили́чіе, писа́ніемъ ѡ҆глаша́ти ѹ҆че́ніе ѡ҆ то́мъ, на что̀ непосвящє́ннымъ въ та́инство и҆ воззрѣ́ніе не позволи́тельно; И҆ да́лѣе. Сія̀ є҆́сть вина̀ преда́нія без̾ писа́ній, дабы̀ къ многокра́тнѡ и҆зꙋча́емомꙋ позна́нію догма́тѡвъ не ѹ҆тра́тили мно́гіе благоговѣ́нія, по привы́чкѣ. И҆́бо и҆но́е догма́тъ, а҆ и҆но́е проповѣ́даніе. Догма́ты ѹ҆ма́лчиваются, проповѣ̑данія же ѡ҆бнаро́дываются. Ро́дъ же ѹ҆молча́нія є҆́сть и҆ нея́сность, кото́рꙋю ѹ҆потребля́етъ писа́ніе, неꙋдобосозерца́емымъ творя̀ ра́зꙋмъ догма́тѡвъ, ра́ди по́льзы чита́ющихъ. Посемꙋ́ то всѣ̀ зри́мъ къ восто́кꙋ во вре́мя моли́твъ, но немно́гіе зна́емъ, ꙗ҆́кѡ чрез̾ сіѐ и҆́щемъ дре́внягѡ ѻ҆те́чества рая̀, кото́рый насади́лъ бг҃ъ въ є҆де́мѣ на восто́кѣБыт. гл. в҃, ст. и҃.. Та́кожде, стоя̀ моли̑твы твори́мъ во є҆ди́нꙋ ̾ѿ сꙋббѡ́тъ, но причи́нꙋ сегѡ̀ не всѣ̀ зна́емъ. И҆́бо не то́кмѡ, ꙗ҆́кѡ совоскре́сшіе хр҃ⷭ҇тꙋ̀ и҆ долженствꙋ́ющіе и҆ска́ти го́рнягѡ, стоя́ніемъ во вре́мя моли́твъ, въ де́нь с. тн҃є воскресе́нія, напомина́емъ себѣ̀ ѡ҆ благода́ти на́мъ даро́ванной, но и҆ потомꙋ̀ сіѐ твори́мъ, ꙗ҆́кѡ де́нь се́й мни́тся бы́ти нѣ́кимъ ѻ҆́бразомъ ча́емагѡ вѣ́ка. Почемꙋ̀, ꙗ҆́кѡ нача́ло дне́й, и҆ ѹ҆ мѡѷсе́а нарече́нъ ѻ҆́нъ не пе́рвымъ, но є҆ди́нымъ. И҆ бы́сть, глаго́летъ, ве́черъ, и҆ бы́сть ѹ҆́тро, де́нь є҆ди́нъБыт. гл. а҃, ст. є҃.: а҆́ки бы є҆ди́нъ и҆ то́тъ же де́нь многокра́тнѡ крꙋговраща́лся. И҆ та́къ є҆ди́ный, кото́рый є҆́сть кꙋ́пнѡ и҆ ѻ҆смы́й, ѡ҆знача́етъ ѻ҆́ный сꙋще́ственнѡ є҆ди́ный и҆ и҆́стинный ѻ҆смы́й де́нь, ѡ҆ кото́ромъ и҆ ѱалмопѣ́вецъ ѹ҆помина́етъ въ нѣ́которыхъ надписа́ніяхъ ѱалмѡ́въ, назна́менꙋетъ собо́ю по се́мъ вѣ́кѣ грядꙋ́щее состоя́ніе, де́нь непрестаю́щій, невече́рній, безпрее́мственный, несконча́емый ѻ҆́ный и҆ нестарѣ́ющій вѣ́къ. И҆ та́къ ѡ҆снова́тельнѡ це́рковь наꙋча́етъ пито́мцєвъ свои́хъ быва́ющыя въ ѻ҆́ный де́нь моли̑твы въ стоя́ніи соверша́ти: дабы̀, при ча́стомъ напомина́ніи ѡ҆ несконча́емой жи́зни, мы̀ не ѡ҆ставля́ли въ небреже́ніи напꙋ́тствія къ ѻ҆́номꙋ преставле́нію. Но и҆ вся̀ пятьдеся́тница є҆́сть напомина́ніе воскресе́нія, ѡ҆жида́емагѡ въ бꙋ́дꙋщемъ вѣ́кѣ. И҆́бо є҆ди́ный ѻ҆́ный и҆ пе́рвый де́нь, бꙋ́дꙋчи седмикра́тнѡ ѹ҆седмери́ченъ, составля́етъ се́дмь недѣ́ль святы́я пятьдеся́тницы. Пятьдеся́тница, начина́ясь пе́рвымъ дне́мъ седми́цы, и҆́мъ же и҆ ѡ҆ка́нчивается. Пятьдеся́тъ кра́тъ ѡ҆браща́ясь чрез̾ подо́бные промежꙋ́точные днѝ, си́мъ подо́біемъ подража́етъ вѣ́кꙋ, ка́кбы въ крꙋгово́мъ движе́ніи начина́ясь ̾ѿ тѣ́хъ же зна́кѡвъ, на тѣ́хъ же и҆ ѡ҆ка́нчиваясь. Церко́вные ѹ҆ста́вы наꙋча́ютъ на́съ предпочита́ти въ сіѝ днѝ прямо́е положе́ніе тѣ́ла во вре́мя моли́твы, ꙗ҆́снымъ напомина́ніемъ ка́кбы преселя́я мы́сль на́шꙋ ̾ѿ настоя́щагѡ въ бꙋ́дꙋщее. При с. тн҃ѕ вся́комъ же колѣнопреклоне́ніи и҆ воста́ніи, мы̀ дѣ́йствіемъ показꙋ́емъ и҆ то̀, ꙗ҆́кѡ грѣхо́мъ низпа́ли на зе́млю, и҆ то̀, ꙗ҆́кѡ, человѣколю́біемъ созда́вшагѡ на́съ, па́ки воззва́ны на не́бо. Но не доста́нетъ мнѣ̀ вре́мени повѣствова́ти ѡ҆ непи́санныхъ та́инствахъ цр҃ко́вныхъ. Ѡ҆ставля́ю про́чее. Са́мое и҆сповѣ́даніе вѣ́ры, дабы̀ вѣ́ровати во ѻ҆ц҃а̀ и҆ сн҃а и҆ ст҃а́го дх҃а, и҆з̾ каки́хъ писа́ній и҆мѣ́емъ мы̀; А҆́ще по благочести́вомꙋ ѹ҆мозаключе́нію, и҆мѣ́я до́лгъ та́кѡ вѣ́ровати, ка́кѡ крести́мся, и҆з̾ преда́нія ѡ҆ креще́ніи произво́димъ и҆сповѣ́даніе вѣ́ры, подо́бное тайнодѣ́йственномꙋ и҆зрече́нію въ креще́ніи: то да позво́лятъ на́мъ, по тако́мꙋ же заключе́нію, и҆ славосло́віе возсыла́ти подо́бное и҆сповѣ́данію вѣ́ры. По а҆́ще ѻ҆́бразъ славосло́вія ̾ѿверга́ютъ, ꙗ҆́кѡ непи́санный: то да предста́вятъ на́мъ пи̑санныя доказа́тєльства, ка́къ и҆сповѣ́данія вѣ́ры, та́къ и҆ про́чагѡ на́ми и҆зчи́сленнагѡ. И҆ та́къ поели́кꙋ сто́ль мно́гѡ є҆́сть непи́саннагѡ, и҆ ѻ҆но̀ и҆мѣ́етъ толи́кꙋю си́лꙋ въ та́инствѣ благоче́стія: то є҆ди́нагѡ ли не попꙋ́стятъ на́мъ рече́нія, кото́рое дошло̀ до на́съ ̾ѿ ѻ҆тцє́въ, кото́рое мы̀ ѡ҆брѣлѝ ѡ҆ста́вшееся ̾ѿ невы́мышленнагѡ ѻ҆быкнове́нія въ неповрежде́нныхъ це́рквахъ, и҆ кото́рое и҆мѣ́етъ нема́лꙋю ва́жность, и҆ нема́лꙋю прино́ситъ по́льзꙋ си́лѣ та́инства;

с. тн҃з

ТОГѠ́ ЖЕ и҆з̾ к҃ѳ главы̀ тогѡ́ же сочине́нія.

ПРА́ВИЛО ч҃в.

На возраже́ніе, ꙗ҆́кѡ ѡ҆ славосло́віи «со дх҃омъ»[45] нѣ́тъ свидѣ́тельства и҆ нѣ́тъ писа́нія, ̾ѿвѣ́тствꙋемъ: А҆́ще ничто̀ дрꙋго́е не пріе́млется без̾ писа́нія, то пꙋ́сть не пріе́млется и҆ сіѐ: но а҆́ще весьма̀ мно́гое та́инственное водворено̀ ѹ҆ на́съ без̾ писа́ній, то со мно́гими дрꙋги́ми предме́тами пріи́мемъ и҆ сіѐ. Мню́ же, ꙗ҆́кѡ а҆по́стольское є҆́сть и҆ сіѐ, да де́ржимся непи́санныхъ преда́ній. И҆́бо хвалю̀ вы̀, глаго́летъ а҆по́столъ, ꙗ҆́кѡ вся̑ моя̑ по́мните, и҆ ꙗ҆́коже преда́хъ ва́мъ, преда̑нія держитѐ[46]. и҆ въ дрꙋго́мъ мѣ́стѣ: держи́те преда̑нія, ꙗ҆̀же прія́сте, и҆лѝ сло́вомъ, и҆лѝ посла́ніемъ[47]: є҆ди́но ѡ҆ си́хъ наипа́че є҆́сть и҆ сіѐ, ѡ҆ ко́емъ разсꙋжда́емъ, кото́рое первонача́льные ѹ҆станови́тели пре́дали прее́мникамъ, и҆ при продолжа́ющемся съ тече́ніемъ вре́мени ѹ҆потребле́ніи ѻ҆́нагѡ, долговре́меннымъ ѻ҆бы́чаемъ въ це́рквахъ ѹ҆корени́ли. И҆ та́къ, а҆́ще мы̀, ка́кбы на сꙋдѣ̀, при недоста́ткѣ пи́сменныхъ доказа́тельствъ, предста́вили въ по́льзꙋ на́шегѡ дѣ́ла мно́жество свидѣ́телей, то не полꙋ́чимъ с. тн҃и ли ̾ѿ ва́съ ѡ҆пра́вдывающагѡ пригово́ра; Ꙗ҆́ та́къ дꙋ́маю. И҆́бо при двою̀ и҆лѝ тріе́хъ свидѣ́теляхъ ста́нетъ вся́къ глаго́лъ[48]. А҆́ще ѹ҆ка́жемъ ва́мъ и҆ на долговре́менность, ꙗ҆́снѡ свидѣ́тельствꙋющꙋю въ на́шꙋ по́льзꙋ: то не ꙗ҆́вимся ли пред̾ ва́ми пра́вѡ глаго́лющими, ꙗ҆́кѡ прѣ́ніе не мо́жетъ ѹ҆спѣ́шно бы́ти проти́вꙋ на́съ; И҆́бо дре́вніе догма́ты, нѣ́которымъ ѻ҆́бразомъ, внꙋша́ютъ благоговѣ́ніе, представля́я въ свое́й дре́вности, ка́кбы въ нѣ́коей сѣди́нѣ, досточти́мый ви́дъ.

с. тн҃ѳ