СВЯТА́ГѠ А҆МФІЛО́ХІА Є҆ПІ́СКОПА къ селе́ѵкꙋ ѡ҆ то́мъ, какі́я кни́ги пріе́млются.

Наипа́че подоба́етъ вѣ́дати и҆ сіѐ, ꙗ҆́кѡ не вся́кая кни́га, стяжа́вшая досточти́мое и҆́мя писа́нія, є҆́сть достовѣ́рная. И҆́бо быва́ютъ и҆ногда̀ кни̑ги лжеимє́нныя, и҆ны́я срє́днія и҆̀, та́кѡ рещѝ, бли̑зкія къ словеса́мъ и҆́стины, а҆ дрꙋгі́я подлѡ́жныя и҆ ѡ҆бма̑нчивыя, подо́бнѡ ка́къ поддѣ́льныя и҆ подлѡ́жныя монє́ты, ко́и хотя̀ и҆мѣ́ютъ надписа́ніе ца́рское, но, по веществꙋ̀ своемꙋ̀, ѡ҆ка́зываются ло́жными. Посемꙋ̀ наименꙋ́ю тебѣ̀ ка́ждꙋю и҆з̾ бг҃одꙋхнове́нныхъ кни́гъ. Но дабы̀ ты̀ позна́лъ раздѣ́льнѡ, пре́жде наименꙋ́ю кни̑ги ве́тхагѡ завѣ́та. Пятокни́жіе соде́ржитъ: бытіѐ, пото́мъ и҆схо́дъ, и҆ сре́днюю кни́гꙋ леѵі́тъ, за не́ю чи̑сла, по́слѣ второзако́ніе. Къ си́мъ присовокꙋпѝ і҆исꙋ́са и҆ сꙋде́й, пото́мъ рꙋ́ѳь, четы́ре кни́ги ца́рствъ, и҆ двѣ̀ параліпоме́нѡнъ. За ни́ми слѣ́дꙋетъ є҆́здры кни́га пе́рвая и҆ втора́я. Да́лѣе нарекꙋ̀ тебѣ̀ пя́ть кни́гъ стіхотво́рныхъ: ѹ҆вѣнча́ннагѡ по́двигами разли́чныхъ страда́ній і҆́ѡва, и҆ кни́гꙋ ѱалмѡ́въ, сладкопѣ́сненное для дꙋ́шъ врачева́ніе, трѝ кни́ги премꙋ́драгѡ соломѡ́на, при̑тчи, є҆кклисіа́стъ и҆ пѣ́снь пѣ́сней. Къ си́мъ присовокꙋпѝ двана́десять прⷪ҇ро́кѡвъ: пе́рваго ѡ҆сі́ю, пото́мъ втора́го а҆мѡ́са, міхе́а, і҆ѡи́ля, а҆вді́а и҆ і҆ѡ́нꙋ, ѻ҆́бразъ с. тѻ҃є тридне́вныя сме́рти: за ни́ми наꙋ́ма, а҆ввакꙋ́ма, пото́мъ девя́таго софо́нію, а҆гге́а и҆ заха́рію, и҆ сла́внаго вѣ́стника малахі́ю. По́слѣ ни́хъ познава́й четыре́хъ проро́кѡвъ: вели́каго и҆са́ію, дерзнове́ннѡ глаго́лавшаго, і҆еремі́ю состра́ждꙋщаго, та́инственнаго і҆езекі́иля, и҆ послѣ́дняго даніи́ла, дѣ́ломъ и҆ сло́вомъ премꙋ́драго. Къ си́мъ прилага́ютъ нѣ́которые є҆сѳи́рь. Вре́мя мнѣ̀ нарещѝ кни̑ги но́вагѡ завѣ́та: пріе́мли четыре́хъ то́кмѡ є҆ѵангелі́стѡвъ, матѳе́а, пото́мъ ма́рка, къ си́мъ присоедини́въ тре́тіяго лꙋкꙋ̀, і҆ѡа́нна чи́сли четве́ртымъ по вре́мени, но пе́рвымъ по высотѣ̀ догма́тѡвъ: и҆́бо пра́веднѡ нарица́ю є҆го̀ сы́номъ гро́ма, вели́чественнѡ провозгласи́вшимъ бг҃а сло́во. Пріе́мли и҆ вторꙋ́ю кни́гꙋ лꙋкѝ: собо́рныхъ дѣя́ній а҆по́стольскихъ. Къ си́мъ пото́мъ присовокꙋпѝ сосꙋ́дъ и҆збра́нія, проповѣ́дника и҆ а҆по́стола ꙗ҆зы́кѡвъ, па́ѵла, премꙋ́дрѡ написа́вшаго це́рквамъ четырена́десять посла́ній: є҆ди́но къ ри́млянамъ, къ ко́емꙋ до́лжно сопричи́слить два̀ къ корі́нѳянамъ, къ гала́тамъ, къ є҆фесе́ямъ: за си́мъ къ живꙋ́щымъ въ філі́ппахъ, пото́мъ напи́санное къ коло́ссянамъ, къ ѳессалоникі́йцамъ два̀, къ тімоѳе́ю два̀, къ ті́тꙋ и҆ філимо́нꙋ, къ ка́ждомꙋ є҆ди́но, и҆ є҆ди́но къ є҆вре́ямъ. Сіѐ непо́длиннымъ нѣ́кіе называ́ютъ не до́брѣ: и҆́бо въ не́мъ благода́ть и҆́стинная. Что̀ напослѣ́докъ рекꙋ̀ ѡ҆ собо́рныхъ посла́ніяхъ; и҆ны́е глаго́лютъ, ꙗ҆́кѡ се́дмь и҆́хъ пріима́ти до́лжно, а҆ и҆ны́е, трѝ то́кмѡ: є҆ди́но і҆а́кѡва, є҆ди́но петро́во и҆ є҆ди́но і҆ѡа́нново. Нѣ́которые же пріе́млютъ трѝ і҆ѡа́нновыхъ, и҆ кро́мѣ си́хъ два̀ петро́вы, и҆ седмо́е і҆ꙋ́дино. Ѿкрове́ніе же і҆ѡа́нново и҆ны́е причисля́ютъ къ свяще́ннымъ кни́гамъ, а҆ мно́гіе называ́ютъ непо́длиннымъ. Се́й да бꙋ́детъ нело́жнѣйшій канѡ́нъ бг҃одꙋхнове́нныхъ писа́ній.

с. тѻ҃ѕ