ПОСЛА́НІЕ ТАРА́СІА, СВЯТѢ́ЙШАГѠ ПАТРІА́РХА кѡнстантінопо́ля, но́вагѡ ри́ма, къ а҆дріа́нꙋ, па́пѣ дре́внягѡ ри́ма.

Святѣ́йшемꙋ и҆ блаже́ннѣйшемꙋ бра́тꙋ и҆ сослꙋжи́телю, господи́нꙋ а҆дріа́нꙋ, па́пѣ дре́внягѡ ри́ма, тара́сій ми́лостію бж҃іею є҆пі́скопъ кѡнстантінопо́ля, но́вагѡ ри́ма, ѡ҆ гд҃ⷭ҇ѣ ра́доватися.

Многоча́стнѡ и҆ многоѻбра́знѡ, ̾ѿ є҆ѵангелі́стѡвъ, ̾ѿ а҆по́столѡвъ и҆ ѻ҆тцє́въ, наꙋча́емся несребролюби́вый нра́въ и҆мѣ́ти при посвяще́ніи въ свяще́нство, и҆ не взима́ти сребра̀ и҆лѝ зла́та при поставле́ніи вся́кагѡ свяще́ннагѡ мꙋ́жа, ка́къ пока́жемъ въ приложе́нныхъ при се́мъ вы́пискахъ и҆з̾ бж҃е́ственныхъ и҆зрече́ній писа́нія и҆ ѹ҆че́ній ѻ҆тцє́въ. И҆́бо возлага́ющіе рꙋ́ки сꙋ́ть слꙋжи́тели дх҃а, а҆ не продая́тели дх҃а. Пріе́млющихъ тꙋ́не благода́ть дх҃а, тꙋ́не преподава́ти ѻ҆́нꙋю заи́мствꙋющымъ ̾ѿ ни́хъ, ѡ҆бяза́ли прія́вшіе сію̀ свобо́дꙋ ̾ѿ сло́ва гд҃ⷭ҇ня. А҆́ще же кто̀ ѡ҆бличе́нъ бꙋ́детъ, ꙗ҆́кѡ кꙋпи́вшій зла́томъ: такова́го ѡ҆б̾явля́ютъ и҆зве́рженнымъ ̾ѿ свяще́ннагѡ чи́на. Поели́кꙋ, хотя̀ ѻ҆́нъ и҆ полꙋчи́лъ свяще́нство по и҆́мени, ѻ҆дна́кѡ сло́во не согласꙋ́ется съ дѣ́с. ꙋ҃ломъ. Никто́же бо мо́жетъ бг҃ꙋ рабо́тати и҆ мамѡ́нѣ, ка́къ и҆з̾ є҆ѵа́нгеліа наꙋча́емся[1]. И҆ поели́кꙋ мы̀ слы́шимъ бг҃а вопію́щагѡ чрез̾ проро́ка: свяще́нницы, глаго́лите въ се́рдце і҆ерꙋсали́мꙋ[2], и҆ па́ки ѹ҆грожа́ющагѡ и҆ глаго́лющагѡ: стра́жъ, а҆́ще ѹ҆ви́дитъ ме́чь грядꙋ́щь и҆ не вострꙋ́битъ трꙋбо́ю, и҆ лю́діе не ѡ҆храня́тъ себѐ, и҆ наше́дъ ме́чь во́зметъ ̾ѿ ни́хъ дꙋ́шꙋ, кро́ве ̾ѿ рꙋкѝ стра́жа взыщꙋ̀[3]: то мы̀, страша́сь ѡ҆сꙋжде́нія за молча́ніе, возвѣща́емъ всѣ́мъ предстоя́телямъ на́шихъ церкве́й, дабы̀ со дерзнове́ніемъ, слова́ми бж҃е́ственнагѡ а҆по́стола, моглѝ мы̀ рещѝ: чи́сты є҆смы̀ ̾ѿ кро́ве[4] престꙋпа́ющихъ повелѣ́нное пра́вилами, и҆ ѻ҆со́беннѡ рꙋкоположи́вшихъ и҆лѝ рꙋкоположе́нныхъ на мздѣ̀. Бж҃е́ственный а҆по́столъ пе́тръ, ко́егѡ и҆ престо́лъ наслѣ́довала бра́тская ва́ша святы́ня, ̾ѿве́ргнꙋлъ таковы́хъ, ꙗ҆́кѡ сѵ́мѡна волхва̀. Посемꙋ̀ мы̀ не коле́блемся возвѣща́ти и҆́стинꙋ, сохраня́я и҆ содержа̀ препо́данное на́мъ въ пра́вилахъ святы́хъ а҆по́стѡлъ и҆ сла́вныхъ ѻ҆тє́цъ на́шихъ, и҆, а҆́ще что̀ и҆з̾ си́хъ нарꙋ́шили нѣ́кіе, ̾ѿ таковы́хъ ̾ѿвраща́емся. Бра́тское ва́ше священнолѣ́пное а҆рхіере́йство, и҆справля́я зако́ннѡ и҆ по во́лѣ бж҃іей священнонача́льственнꙋю до́лжность, стяжа́ло гро́мкꙋю сла́вꙋ. И҆́бо вели́кій и҆ пе́рвый а҆рхіере́й хр҃ⷭ҇то́съ бг҃ъ на́шъ ре́къ чрез̾ проро́ка: живꙋ̀ а҆́зъ, то́кмѡ прославля́ющыя мя̀ просла́влю[5]. Вѣ́даешь, мꙋ́жъ жела́ній дꙋхо́вныхъ, что̀ нечести́вая є҆́ресь македо́ніа, и҆ є҆гѡ̀ послѣ́дователей дꙋхобо́рцєвъ, ме́нѣе нестерпи́ма. И҆́бо сіѝ пꙋстосло́вятъ, а҆́ки бы ст҃ы́й дх҃ъ є҆́сть творе́ніе и҆ ра́бъ бг҃а и҆ ѻ҆ц҃а̀: а҆ тѣ̀, ка́къ мни́тся, дѣ́лаютъ є҆го̀ свои́мъ рабо́мъ. Поели́кꙋ с. ꙋ҃а вся́кій господи́нъ всѐ, что̀ и҆мѣ́етъ, а҆́ще восхо́щетъ, продае́тъ, раба́ ли, и҆лѝ и҆но́е что̀ и҆з̾ стяжа́ній свои́хъ: та́кожде и҆ покꙋпа́ющій, жела́я бы́ти господи́номъ покꙋпа́емагѡ, цѣно́ю сребра̀ пріѡбрѣта́етъ ѻ҆́ное. Таки́мъ ѻ҆́бразомъ творя́щіе беззако́нное сіѐ дѣ́ло ѹ҆ничижа́ютъ дх҃а ст҃а́го, согрѣша́я ра́внѡ съ тѣ́ми, ко́и бг҃охꙋ́льнѡ говори́ли, а҆́ки бы хр҃ⷭ҇то́съ и҆згоня́лъ де́монѡвъ ѡ҆ веельзевꙋ́лѣ, и҆лѝ справедли́вѣе рещѝ, ѹ҆подобля́ются і҆ꙋ́дѣ преда́телю, прода́вшемꙋ хр҃ⷭ҇та̀ бг҃оꙋбі́йцємъ і҆ꙋде́ямъ за цѣ́нꙋ сребра̀. Поели́кꙋ же дх҃ъ ст҃ы́й є҆диносꙋ́щенъ є҆́сть хр҃ⷭ҇тꙋ̀ бг҃ꙋ на́шемꙋ: то для вся́кагѡ ꙗ҆́вно є҆́сть, ꙗ҆́кѡ и҆ сіѝ подве́ргнꙋтся то́й же ѹ҆́части, ка́къ сіѐ дока́зано. И҆ а҆́ще не продае́тся [и҆́бо ꙗ҆́вно, ꙗ҆́кѡ ̾ѿню́дь нѣ́тъ]: то несомнѣ́нно, ꙗ҆́кѡ нѣ́тъ въ ни́хъ благода́ти ст҃а́гѡ дх҃а, то́ є҆сть святы́ни свяще́нства, и҆ ѻ҆нѝ не прія́ли и҆ не и҆мѣ́ютъ ѻ҆́ной[6]. И҆́бо да воспомя́нꙋтъ свята́го петра̀, кото́рый къ покꙋси́вшемꙋся на такꙋ́ю кꙋ́плю глаго́летъ та́кѡ: нѣ́сть тѝ ча́сти, ни жре́бія въ словесѝ се́мъ[7]. И҆́бо а҆́ще продае́тся досто́инство свяще́нства: то коне́чнѡ и҆зли́шни для ни́хъ благочести́вый ѻ҆́бразъ житія̀ и҆ пребыва́ніе въ чистотѣ̀ и҆ добродѣ́тели. И҆зли́шенъ для ни́хъ и҆ па́ѵелъ, бж҃е́ственный а҆по́столъ, наꙋча́ющій, ꙗ҆́кѡ подоба́етъ є҆пі́скопꙋ бы́ти непоро́чнꙋ, цѣломꙋ́дрꙋ, че́стнꙋ, ѹ҆чи́тельнꙋ, воздержа́тельнꙋ, тре́звенꙋ, держа́щемꙋся и҆́стиннагѡ словесѐ, по ѹ҆че́нію, да си́ленъ бꙋ́детъ и҆ ѹ҆тѣша́ти во здра́вомъ ѹ҆че́ніи, и҆ проти́вящыяся ѡ҆блича́ти[8]. Сіѐ всѐ стано́вится ненꙋ́жнымъ, а҆́ще продае́тся и҆ покꙋпа́ется свяще́нство. Нижеслѣ́дꙋющыя святои́збранныя мѣста̀ показꙋ́ютъ, ꙗ҆́кѡ то́тъ во́все чꙋ́ждъ свяще́нства, кто̀ когда́ либо дае́тъ и҆лѝ взима́етъ мздꙋ̀, въ како́е с. ꙋ҃в бы то̀ ни бы́ло вре́мя, пре́жде ли рꙋкоположе́нія, и҆лѝ по́слѣ рꙋкоположе́нія. И҆́бо взима́ти всегда̀ є҆́сть взима́ти. А҆ та́кже воспреща́ютъ и҆ всѣ̀ церкѡ́вныя произвѡ́дства за дая́ніе де́негъ.

Пра́вило к҃ѳ ст҃ы́хъ а҆по́стѡлъ.

А҆́ще кто̀ є҆пі́скопъ, и҆лѝ пресвѵ́теръ, и҆лѝ діа́конъ, де́ньгами сіѐ досто́инство полꙋ́читъ: да бꙋ́детъ и҆зве́рженъ и҆ ѻ҆́нъ, и҆ поста́вившій, и҆ ̾ѿ ѻ҆бще́нія совсѣ́мъ да ̾ѿсѣче́тся, ꙗ҆́кѡ сі́мѡнъ во́лхвъ.

И҆з̾ дѣя́ній ст҃ы́хъ а҆по́стѡлъ.

Ви́дѣвъ же сі́мѡнъ, ꙗ҆́кѡ возложе́ніемъ рꙋ́къ а҆по́стольскихъ дае́тся дх҃ъ ст҃ы́й, принесѐ и҆̀мъ сребро̀, глаго́ля: дади́те и҆ мнѣ̀ вла́сть сію̀, да, на него́же а҆́ще положꙋ̀ рꙋ́цѣ, пріи́метъ дх҃а ст҃а́го. Пе́тръ же речѐ къ немꙋ̀: сребро̀ твоѐ съ тобо́ю да бꙋ́детъ въ поги́бель, ꙗ҆́кѡ да́ръ бж҃ій непщева́лъ є҆сѝ сребро́мъ стяжа́ти. Нѣ́сть тѝ ча́сти ни жре́бія въ словесѝ се́мъ: и҆́бо се́рдце твоѐ нѣ́сть пра́во пред̾ бг҃омъ. Пока́йся ѹ҆́бѡ ѡ҆ ѕло́бѣ твое́й се́й, и҆ моли́ся бг҃ꙋ, а҆́ще ѹ҆́бѡ ̾ѿпꙋ́стится тѝ помышле́ніе се́рдца твоегѡ̀: въ же́лчи бо го́рести и҆ сою́зѣ непра́вды зрю́ тя сꙋ́ща[9].

И҆з̾ тре́тіей кни́ги ца́рствъ.

И҆ не ѡ҆брати́ся і҆еровоа́мъ ̾ѿ ѕло́бы своея̀, и҆ возврати́ся, и҆ сотворѝ ̾ѿ ча́сти є҆ди́ныя люде́й, жерцы̀ высо́кихъ: и҆́же хотя́ше, и҆сполня́ше рꙋ́кꙋ свою̀, и҆ быва́ше жре́цъ на высо́кихъ. И҆ бы́сть глаго́лъ се́й въ прегрѣше́ніе до́мꙋ і҆еровоа́млю. и҆ на и҆спроверже́ніе, и҆ на и҆зчезнове́ніе ̾ѿ лица̀ землѝ[10].

И҆з̾ четве́ртыя кни́ги ца́рствъ.

И҆ возврати́ся неема́нъ къ є҆ліссе́ю са́мъ, и҆ всѐ ѡ҆полче́ніе є҆гѡ̀, и҆ пріи́де, и҆ ста̀ пред̾ ни́мъ, и҆ речѐ: сѐ ны́нѣ разꙋмѣ́хъ, ꙗ҆́кѡ нѣ́сть бг҃а во все́й землѝ, но то́кмѡ с. ꙋ҃г во і҆зра́или: и҆ ны́нѣ пріимѝ благослове́ніе ̾ѿ раба̀ твоегѡ̀. И҆ речѐ є҆ліссе́й: жи́въ гд҃ⷭ҇ь, є҆мꙋ́же предста́хъ пред̾ ни́мъ, а҆́ще пріимꙋ̀. И҆ понꙋжда́ше є҆го̀ взя́ти, и҆ не послꙋ́ша. И҆ спꙋстя̀ не мно́гѡ: и҆ речѐ гіезі́й, ѻ҆́трочищъ є҆ліссе́евъ: сѐ пощадѣ̀ господи́нъ мо́й неема́на сѵ́рянина сего̀, є҆́же не взя́ти ̾ѿ рꙋкѝ є҆гѡ̀, ꙗ҆̀же принесѐ: жи́въ гд҃ⷭ҇ь, ꙗ҆́кѡ и҆́мамъ тещѝ въ слѣ́дъ є҆гѡ̀, и҆ возмꙋ̀ ̾ѿ негѡ̀ нѣ́что. И҆ течѐ гіезі́й въ слѣ́дъ неема́новъ. И҆ не мно́гѡ ни́же: и҆ речѐ неема́нъ: возмѝ два̀ тала́нта сребра̀, и҆ взя̀ два̀ тала́нта сребра̀ во два̀ мѣшца̀, и҆ двѣ̀ премѣ́ны ри́зъ. И҆ да́лѣе: и҆ речѐ къ немꙋ̀ є҆ліссе́й: ̾ѿкꙋ́дꙋ прише́лъ є҆сѝ гіезі́е; и҆ речѐ гіезі́й: не и҆сходи́лъ ра́бъ тво́й ника́може. И҆ речѐ къ немꙋ̀ є҆ліссе́й: не ходи́ло ли се́рдце моѐ съ тобо́ю; И҆ ви́дѣхъ, є҆гда̀ возвраща́шеся мꙋ́жъ съ колесни́цы свое́й въ срѣ́теніе тебѣ̀: и҆ ны́нѣ взя́лъ є҆сѝ сребро̀, да кꙋ́пиши за нѐ вертогра́ды, и҆ віногра́ды, и҆ ма́слины, и҆ ѻ҆́вцы, и҆ волы̀, и҆ ѻ҆́троки и҆ ѻ҆трокови̑цы. И҆ прока́за неема́нова да прильпне́тъ къ тебѣ̀, и҆ къ сѣ́мени твоемꙋ̀ во вѣ́ки. И҆ и҆зы́де ̾ѿ лица̀ є҆гѡ̀ прокаже́нъ, ꙗ҆́кѡ снѣ́гъ[11].

И҆з̾ толкова́нія свята́гѡ васі́ліа на и҆са́ію.

Зако́нъ да́лъ бг҃ъ въ по́мощь, да рекꙋ́тъ: нѣ́тъ сло́ва, ка́къ сіѐ, за кото́рое не мо́жно да́ти дарѡ́въ. Се́й зако́нъ не подо́бенъ глаго́лꙋ чревовѣща́теля. Поели́кꙋ не и҆зѡбрѣте́нъ, ка́къ се́й, для ѡ҆больще́нія, но є҆́сть ѹ҆чи́тель и҆́стины: прито́мъ таковы́е предвѣща́ютъ за сребро̀. И҆ сіѐ досто́йно смѣ́ха, ꙗ҆́кѡ ѡ҆больща́емые пла́тятъ и҆̀мъ и҆ сребро̀ въ награ́дꙋ за ло́жь. Глаго́лъ же зако́на не тако́въ, что́бы за ѻ҆́ный дава́ти да́ры: и҆́бо никто̀ не продае́тъ благода́ти. Тꙋ́не, глаго́летъ, прія́сте, тꙋ́не дади́те[12]. Ви́дишь, ка́къ вознегодова́лъ с. ꙋ҃д пе́тръ на сі́мѡна, прине́сшаго сребро̀ за благода́ть дх҃а. Сребро̀ твоѐ, глаго́летъ ѻ҆́нъ, съ тобо́ю да бꙋ́детъ въ поги́бель, ꙗ҆́кѡ непщева́лъ є҆сѝ да́ръ бж҃ій сребро́мъ стяжа́ти[13]. И҆ та́къ сло́во є҆ѵа́нгеліа не є҆́сть подо́бно продава́ємымъ глаго́ламъ чревовѣща́телей. И҆́бо како́е кто̀ да́стъ досто́йное возме́здіе за ѻ҆́ное; Слы́ши даві́да, недоꙋмѣва́ющагѡ и҆ глаго́лющагѡ: что̀ возда́мъ гд҃ⷭ҇еви ѡ҆ всѣ́хъ, ꙗ҆̀же воздаде́ ми[14]; Посемꙋ̀ не возмо́жно да́ти за сіѐ да́ры досто́йные подава́емыя тѣ́мъ благода́ти. Є҆ди́нъ да́ръ досто́йный: соблюде́ніе даро́ваннагѡ. Да́вшій тебѣ̀ сокро́вище тре́бꙋетъ не цѣны̀ за да́нное, но досто́йнагѡ хране́нія да́ннагѡ.

И҆з̾ є҆гѡ́же посла́нія къ подчине́ннымъ є҆мꙋ̀ є҆пі́скопамъ, пра́в. ч҃.

Мня́тъ, ꙗ҆́кѡ не согрѣша́ютъ, когда̀ берꙋ́тъ не при рꙋкоположе́ніи, а҆ по́слѣ: взя́ти же, когда́ бы то̀ ни бы́ло, є҆́сть взя́ти. И҆ та́къ молю̀, ѡ҆ста́вите се́й дохо́дъ, и҆лѝ па́че се́й вхо́дъ въ гее́ннꙋ, и҆ не дѣ́лайте себя̀ недосто́йными соверша́ти свящє́нныя та̑инства, ѡ҆скверня́я рꙋ́ки своѝ таковы́мъ лихоима́ніемъ.

И҆з̾ житія̀ свята́гѡ і҆ѡа́нна златоꙋ́стагѡ.

Пристꙋпи́лъ ко всѣ́мъ є҆пі́скопамъ вино́вникъ протяже́нія сло́ва на́шегѡ, є҆ѵсе́вій, ѡ҆бвини́тель шестѝ про́чихъ є҆пі́скопѡвъ, прося̀ ѡ҆ приня́тіи є҆гѡ̀ въ ѡ҆бще́ніе. Нѣ́которые и҆з̾ є҆пі́скопѡвъ воспрекосло́вили, ꙗ҆́кѡ не до́лжно прія́ти є҆го̀, ꙗ҆́кѡ клеветника̀. На сіѐ ѻ҆́нъ, ѹ҆моля́я говори́лъ: поели́кꙋ дѣ́ло въ продолже́ніе двꙋ́хъ лѣ́тъ бо́льшею ча́стію и҆зслѣ́довано, и҆ дана̀ ̾ѿсро́чка для свидѣ́телей: то прошꙋ̀ ва́ше бг҃олю́біе, да бꙋ́детъ позво́лено мнѣ̀ предста́вити свидѣ́телей ны́нѣ, сегѡ́же часа̀. И҆́бо хотя̀ и҆ ѹ҆́меръ с. ꙋ҃є а҆нтѡні́нъ є҆пі́скопъ, взя́вшій зла́то и҆ рꙋкоположи́вшій, ѻ҆дна́кѡ ѡ҆стаю́тся въ живы́хъ да́вшіе и҆ рꙋкоположе́нные. Присꙋ́тствꙋющій собо́ръ призна́лъ справедли́вымъ встꙋпи́ти въ разсмотрѣ́ніе дѣ́ла. И҆ начина́ется разсмотрѣ́ніе дѣ́ла чте́ніемъ за́писи ѡ҆ то́мъ, что̀ произведено̀ пре́жде. Вошлѝ свидѣ́тели, вошлѝ и҆ ше́сть да́вшихъ и҆ рꙋкоположе́нныхъ. Сіѝ въ нача́лѣ не признава́лись: но ка́къ свидѣ́тели и҆ и҆з̾ міря́нъ и҆ и҆з̾ пресвѵ́терѡвъ, на кото́рыхъ ѻ҆нѝ по ви́димомꙋ полага́лися, тве́рдѡ стоя́ли въ свои́хъ показа́ніяхъ: то ѻ҆нѝ спе́рва ̾ѿрека́лись, а҆ когда̀ свидѣ́тели ѡ҆блича́ли, приводя̀ и҆̀мъ на па́мять мѣста̀ и҆ времена̀, и҆ сказꙋ́я ви́ды да́нныхъ веще́й и҆ коли́чество: тогда̀ со́вѣсть и҆́хъ возмꙋти́лась, и҆ ѻ҆нѝ доброво́льнѡ без̾ мно́гагѡ принꙋжде́нія призна́лись та́кѡ: признае́мся, что̀ да́ли, но мы̀ дꙋ́мали, ꙗ҆́кѡ тако́въ є҆́сть поря́докъ, дабы̀ на́мъ ѡ҆свобождє́ннымъ бы́ти ̾ѿ ѻ҆бще́ственныя слꙋ́жбы. И҆ ны́нѣ про́симъ: а҆́ще не є҆́сть благоче́стно пребы́ти на́мъ въ слꙋже́ніи церко́вномъ, то по кра́йней мѣ́рѣ да полꙋ́чимъ зла́то, кото́рое мы̀ да́ли: и҆́бо мы̀ да́ли нѣ́кія ве́щи же́нъ на́шихъ. На сіѐ і҆ѡа́ннъ да́лъ ѡ҆бѣща́ніе собо́рꙋ: ꙗ҆́ ѡ҆свобождꙋ̀ и҆̀хъ ̾ѿ свѣ́тскагѡ сꙋда̀ ѹ҆проси́въ царя̀: вы́ же повели́те и҆̀мъ взя́ти то̀, что̀ да́ли, ̾ѿ наслѣ́дникѡвъ а҆нтѡні́на. Собо́ръ повелѣ́лъ: зла́то взя́ти и҆̀мъ ̾ѿ наслѣ́дникѡвъ а҆нтѡні́на, причаща́тися и҆̀мъ внꙋтрѝ ѻ҆лтаря̀, но бы́ти внѣ̀ свяще́нства, дабы̀, а҆́ще прости́мъ сіѐ, не воше́лъ ѻ҆бы́чай і҆ꙋде́йскій, и҆лѝ є҆гѵ́петскій, продава́ти и҆ покꙋпа́ти свяще́нство. И҆́бо сказꙋ́ютъ, ꙗ҆́кѡ вреди́тель и҆ лжеиме́нный патріа́рхъ і҆ꙋде́йскій ка́ждый го́дъ и҆лѝ чрез̾ го́дъ перемѣня́етъ а҆рхісѷнаго́гѡвъ, для собира́нія сребра̀, подо́бнѡ и҆ є҆гѡ̀ подража́тель патріа́рхъ є҆гѵ́петскихъ і҆ꙋде́євъ, да и҆спо́лс. ꙋ҃ѕнится проро́ческое сло́во: жерцы̀ є҆гѡ̀ на мздѣ̀ ̾ѿвѣщава́хꙋ, и҆ проро́цы є҆гѡ̀ на сребрѣ̀ волхвова́хꙋ[15].

И҆з̾ пра́вилъ святы́хъ х҃л ѻ҆тє́цъ, въ халкидо́нѣ собра́вшихся.

А҆́ще кото́рый є҆пі́скопъ за де́ньги рꙋкоположе́ніе ѹ҆чини́тъ, и҆ непродае́мꙋю благода́ть ѡ҆брати́тъ въ прода́жꙋ, и҆ за де́ньги поста́витъ є҆пі́скопа, и҆лѝ хѡрепі́скопа, и҆лѝ пресвѵ́тера, и҆лѝ діа́кона, и҆лѝ и҆на́го ко́его ̾ѿ чи́слящихся въ кли́рѣ, и҆лѝ произведе́тъ за де́ньги во і҆коно́ма, и҆лѝ є҆кді́ка, и҆лѝ парамона́ріа, и҆лѝ воѻбщѐ въ какꙋ́ю либо церко́внꙋю до́лжность, ра́ди гнꙋ́снагѡ прибы́тка своегѡ̀: таковы́й бы́въ ѡ҆бличе́нъ, ꙗ҆́кѡ на сіѐ покꙋси́лся, да бꙋ́детъ подве́рженъ лише́нію со́бственнагѡ сте́пени: и҆ поста́вленный и҆́мъ ̾ѿню́дь да не по́льзꙋется кꙋ́пленнымъ рꙋкоположе́ніемъ, и҆лѝ произво́дствомъ: но да бꙋ́детъ чꙋ́ждъ досто́инства, и҆лѝ до́лжности, котѡ́рыя полꙋчи́лъ за де́ньги. А҆́ще же ꙗ҆́вится кто̀ и҆ посре́дствꙋющимъ въ толи́кѡ гнꙋ́сномъ и҆ беззако́нномъ мздопрія́тіи: то и҆ се́й, а҆́ще є҆́сть и҆з̾ кли́ра, да бꙋ́детъ низве́рженъ со своегѡ̀ сте́пени: а҆́ще же міряни́нъ, и҆лѝ мона́шествꙋющій, да бꙋ́детъ пре́данъ а҆на́ѳемѣ[16].

И҆з̾ ѡ҆крꙋ́жнагѡ посла́нія генна́діа святѣ́йшагѡ а҆рхіепі́скопа кѡнстантінопо́льскагѡ, и҆ съ ни́мъ собо́ра.

И҆ та́къ да бꙋ́детъ и҆ є҆́сть ̾ѿве́рженъ, и҆ вся́кагѡ свяще́ннагѡ досто́инства и҆ слꙋже́нія чꙋ́ждъ, и҆ подве́рженъ прокля́тію а҆на́ѳемы, ка́къ мня́щій стяжа́ти ѻ҆́ное свяще́нство за де́ньги, та́къ и҆ ѡ҆бѣща́ющій за де́ньги препода́ти ѻ҆́ное, кли́рікъ ли то̀ бꙋ́детъ и҆лѝ міряни́нъ, с. ꙋ҃з и҆зѡбличе́нъ ли бꙋ́детъ, и҆лѝ не и҆зѡбличе́нъ въ дѣ́лѣ се́мъ. И҆́бо не возмо́жно придтѝ когда́ либо въ є҆дине́ніе несоедини́момꙋ, и҆ мамѡ́нѣ согласи́тися съ бг҃омъ, и҆лѝ слꙋжа́щымъ є҆́й слꙋжи́ти бг҃ꙋ. Гд҃ⷭ҇не є҆́сть и҆ сіѐ и҆зрече́ніе непререка́емое: не мо́жете бг҃ꙋ рабо́тати и҆ мамѡ́нѣ[17].

И҆з̾ пра́вилъ свята́гѡ шеста́гѡ собо́ра.

Во є҆пі́скопы, и҆лѝ въ какꙋ́ю бы то̀ ни бы́ло сте́пень кли́ра поставля́емыхъ за де́ньги, а҆ не по и҆спыта́нію и҆ и҆збра́нію за ѻ҆́бразъ жи́зни, повелѣва́емъ и҆зверга́ти, та́кожде и҆ тѣ́хъ, ко́ими ѻ҆нѝ поста́влены[18].

Ѹ҆слы́шимъ сіѐ всѣ̀, и҆ внꙋши́мъ себѣ̀ не то́кмѡ а҆рхіере́и, но и҆ счисля́ющіеся въ кли́рѣ, и҆ всѣ̀ живꙋ́щіе по вселе́ннѣй. И҆́бо подоба́етъ на́мъ ли́шше внима́ти слы̑шаннымъ, да не когда̀ ̾ѿпаде́мъ[19]. Ꙗ҆́кѡ не и҆стлѣ́ннымъ зла́томъ и҆лѝ сребро́мъ и҆скꙋ́плены мы̀ ̾ѿ сꙋ́етнагѡ, ѻ҆тца́ми пре́даннагѡ, житія̀, но честно́ю кро́вію, ꙗ҆́кѡ а҆́гнца непоро́чна и҆ пречи́ста хр҃ⷭ҇та̀[20]. Та́кѡ наꙋча́й и҆ на́съ, мꙋ́жъ свяще́ннѣйшій, послѣ́довати заповѣ́даніямъ писа́нія, и҆ є҆ѵа́нгеліа, и҆ а҆по́столѡвъ, и҆ свяще́нныхъ пра́вилъ и҆ ѻ҆тцє́въ. И҆́бо мы̀ преклоня́емся слова́ми ѹ҆́стъ ва́шихъ. Взы́ди на высотꙋ̀, возвы́си гла́съ тво́й въ крѣ́пости, ше́ствꙋй въ широтѣ̀, проповѣ́дꙋй со дерзнове́ніемъ, да и҆стреби́тся въ коне́цъ и҆ да ѹ҆ничто́жится рꙋкоположе́ніе мздои́мное, и҆ всѐ то̀, что̀, по сребролю́бію и҆ непра́вдѣ и҆ кꙋ́плѣ гнꙋснокоры́стной, сопꙋ́тствꙋетъ ѻ҆́номꙋ. И҆́бо когда̀ ѻ҆но̀ и҆ сро́дное ѻ҆́номꙋ и҆з̾я́то бꙋ́детъ ̾ѿ и҆́збраннагѡ наро́да, ̾ѿ и҆́мени хр҃ⷭ҇то́ва нарече́ннагѡ, и҆ тꙋ́не с. ꙋ҃и и҆скꙋпле́ніе полꙋчи́вшагѡ: тогда̀ всѣ̀ поро́кꙋ семꙋ̀ спослѣ́дꙋющыя сквє́рны и҆скореня́тся, и҆ свяще́нники, ꙗ҆́кѡ фі́ніѯъ процвѣтꙋ́тъ, вдыха́я хр҃ⷭ҇то́во благоꙋха́ніе спаса́ємымъ, и҆ воспѣва́я це́ркви побѣ́днꙋю пѣ́снь: ̾ѿя́тъ гд҃ⷭ҇ь ̾ѿ тебѐ непра̑вды твоя̀[21]: є҆ще́ же и҆ пожина́емые плоды̀ ѹ҆слажда́я, и҆ ѹ҆множа́я ѻ҆́ные въ ста́рости масти́тѣй, то́ є҆сть, показꙋ́я наслѣ́дниками блаже́нныя ѻ҆́ныя и҆ безсме́ртныя жи́зни.