А́ще бо и пра́здник мимои́де нас, оба́чеже е́же о нем глаго́лати николи́же мимои́дет, ниже́ у́бо ны́не ну́жно есть то́кмо, егда́ пра́здичная пое́м и прочита́ем глаго́лати о нем, но и по всему́ вре́мени ну́жно есть поле́зно глаго́лати и учи́тися нам о креще́нии и обновле́нии душ на́ших. И́бо креще́ние, бра́тие, обновле́нию и порожде́нию вина́ есть. Порожде́ние же глаѓолется вина́ зри́ма, очи́ма же неви́дима. Ниже́ бо ста́раго измени́ти и́мам во отроча́, или́ челове́ка возврати́м во чре́во ма́тере его́ ‐ но уя́звленаго грехми́ и злы́ми начина́нии обетша́вша, благода́тию Небе́снаго Царя́ возво́дим на младе́нческое безгре́шие.

Сие́ бо благодея́ние не вода́ да́рует, [была́ бы у́бо всея́ тва́ри превы́шша,] но Бо́жие повеле́ние и Ду́ха Свята́го схожде́ние, тай́но приходя́ще, да́рует благодея́ние и дар ‐ на́ше свобожде́ние. Вода́ же слу́жит на показа́ние очище́ния, поне́же бо навыко́хом скве́рною и тиме́нием те́ло пору́ганное, водо́ю омыва́юще, явля́ти чи́сто. Сего́ бо ра́ди и на духо́вном чи́ну сия́ прие́млем чу́вственою ве́щию, безпло́тною показа́юще красоты́.

Глаго́лет же Госпо́дь: «А́ще кто не роди́тся от воды́ и Ду́ха, не мо́жет вни́ти в Ца́рство Бо́жие». Почто́ ра́ди от воды́ и Ду́ха, а не то́кмо еди́н Дух дово́лен бя́ше на соверше́ние креще́ния? Сло́жен есть челове́к, от души́ и те́ла составля́емь, а не прост. Сего́ ра́ди и сугу́бая, и сопряже́нная, и соро́дная, и прили́чная врачева́ния на исцеле́ния прия́т – те́лу бо ви́димая вода́ чу́вственная, души́ же неви́димой ‐ Дух Неви́димый.

Отню́дуже не прези́раем божестве́ных ба́ни, ниже́ я́ко о́бщу сию́ похужа́ем прия́тия ра́ди воды́. Я́коже бо хлеб общь есть пре́жде благослове́ния, и я́коже и вино́. По освяще́нии же от Ду́ха хлеб ‐ у́бо Те́ло Христо́во, вино́ же ‐ Кровь, пои́стинне быва́ют и глаго́лются. Та́ко и вода́ ничто́же и́но есть ра́зве вода́, обновля́ет же челове́ка на мы́сленое порожде́ние свы́ше благода́ть благословя́щая.

Что́же ра́ди водо́ю очище́ния быва́ет? И по какову́ сло́ву три погруже́ния разуме́ются? Четы́ре составле́ния познава́ем, от ни́хже мир составле́ние и́мать: Огнь, возду́х, во́ду и зе́млю. Бог же наш и Спас е́же о нас устрое́ние соверша́я, четы́рем от сих сни́де на зе́млю, да́же отню́ду живота́ восия́ет. Мы же креще́ние прие́млюще, на подобле́ние Го́споду и сме́рти Его́, в земли́ у́бо погреба́емся, та́ко бо умерщвле́ному до конца́ те́лу быва́ет покро́в, не́мощь естества́ на́шего сопря́тающе. Сро́дному же соста́ву земно́му воде́ прихо́дим и во о́ну себе́ скрыва́ем, я́коже Христо́с в зе́млю. И трети́цею се сотваря́юще, тридне́вную себе́ образу́ет благода́ть. И се твори́м, не молча́нием прие́млюще та́инство, но тресвяты́м составле́нием глаго́лющимся на́ми, в ни́хже и ве́ровахом, на ни́хже упова́хом, от ни́хже и ны́не бы́ти есть и е́же п́аки бы́ти прилага́ется: креща́ем же ся во и́мя Отца́, поне́же Нача́ло всем есть; в Сы́на, поне́же Зижди́тель есть тва́ри; в Ду́ха Свята́го, поне́же сверши́тельно есть всем. Креще́нием бо прия́хом ча́да Бо́жия, а́ще в сих бу́дем, от ни́хже роди́выйся нас Бог познава́ется. А́ще ли же в супроти́вных пребыва́ем позна́ниих ‐ всу́е мо́лвим и приглаша́ем себе́ вы́шнее порожде́ние.

Вре́мя же есть ева́нгельских глаго́л сказа́ние нача́ти, и́хже богогла́сный Матфе́й днесь веща́ет глаго́ля:

Во вре́мя о́но, услы́шав Иису́с я́ко Иоа́нн пре́дан бысть и отъи́де в Галиле́ю. И оста́вль Назаре́та, прише́д всели́ся в Капернау́ме Примо́рском, в преде́лех Неффали́мских.

Отхо́дит Иису́с, наказа́я нас дава́ти ме́сто гне́ву, а не, предваря́ющеся и в беды́ себе́ вмета́юще, входи́ти в покуше́ния. А́ще ли же Христо́с бежи́т и отхо́дит теле́сно, И́же бо и вся можа́ше, коль мно́жае и нам подоба́ет бе́гати напа́сти и искуше́ния. Несть бо грех е́же бе́гати, но е́же впа́дшим в напа́сти и не супроти́вльшимся кре́пко и хра́бро подвиза́тися. Отхо́дит Госпо́дь отту́ду в Галиле́ю, за́висти ра́ди зави́стник И́родовых, утеше́ние дая́ им, наставля́ющеся от зло́бы и ско́рби. Зави́дящим бо ве́лия бо́лесть, и го́ресть, и притуже́ние есть. И е́же то́кмо зрим быва́ти зави́димый, отхо́дит же Госпо́дь в Галиле́ю, да́же апо́столы и ученики́ улови́т: Первозва́ннаго Андре́я, и Петра́, и двои́х сын Зеведе́ов ‐ Иоа́нна Богосло́ва и Иа́кова. Та́мо сих обре́т, сотвори́ их после́довати Ему́.

Две же Галиле́и бе́ша – еди́на у́бо иуде́йская, друга́я язы́чная, сего́ ра́ди евангели́ст глаго́лет:

Я́ко оста́вльшу Назаре́та, прише́д всели́ся в Капернау́ме Примо́рском, в преде́лех Завуло́нех и Неффали́мских, да́же сверши́тся рече́нное проро́ком Иса́ием, глаго́люще: «Земля́ Завуло́нска и земля́ Неффали́мска, пути́ морска́го, Галиле́я язы́чная, лю́дие седя́щия во тме и се́ни сме́ртней, свет возсия́ им».

Разделя́ет проро́к и спря́тает Галиле́ю язы́чную от иуде́йския Галиле́и. Сего́ ра́ди и прилага́ет пути́ морска́го пря́мо Иорда́на. Племена́ бо де́вятера Изра́илева и пол пле́мене Вениами́нова пря́мо Иорда́на всели́шася, зане́же бо бя́ше скотопа́житно ме́сто о́но. Ели́цы бо бога́тии во иуде́ох, бога́тство е́же име́яху ‐ се от скот име́яху сие́: сего́ ра́ди пря́мо Иорда́на хожда́ху. Галиле́ю же язы́чну ме́сто о́но нарица́ет, поне́же бо Сенахири́м царь Аси́рский, Иудею плени́в и держи́тель ме́сту о́ному быв, язы́чники не́кия в Галиле́и вме́сто иуде́й посади́, и́же самаря́не нарица́хуся. Друга́я у́бо есть сия́ Галиле́я язы́чная, и друга́я есть иуде́йская, иде́же Госпо́дь по воскресе́нии яви́ся ученико́м.

Галиле́я же сказа́ется «Валя́ние» и «Окаля́ние»: язы́цы бо, неве́дящии Бо́га, во гресе́ валя́хуся, си́речь окаля́хуся. Капернау́м же сказа́ется «Дом утеше́ния», да́же сотвори́м язы́ки дом Уте́шителя и спасе́т нас Христо́с: сего́ ра́ди прекло́нь небеса́ и сни́де на зе́млю. Завуло́нь же сказа́ется «Нощница», Неффал́им же «Разшире́ние»: язы́цы бо и нощь име́яху, и широту́ в животе́ свое́м ‐ не у́зким бо путе́м хожда́ху, веду́щим в живо́т су́щий, но широ́кий и простра́нный, веду́щий в поги́бель; путь же мо́ре глаго́лет, е́же рещи́ к пути́ морско́му лежа́щи. И «Свет ве́лий» нарица́ет Ева́нгелие, поне́же и зако́н свет нарица́ет, оба́че же мал: «Свети́льник бо нога́ма мои́ма зако́н твой и свет стезя́м мои́м». Сень же сме́рти ‐ грех есть: грех у́бо подо́бие и пресе́нно зна́мение сме́рти есть; я́коже бо смерть содержи́т те́ла, та́ко и грех содержи́т ду́шу. Возси́я же свет нам и не взыска́хом его́ мы, но свет яви́ся нам помраче́нным, я́коже погоня́я нас, си́речь иска́я.

Отто́ле нача́т Иису́с пропове́дати и глаго́лати: «Пока́йтеся, прибли́жи бо ся Ца́рство небе́сное».

Отне́леже свя́зан бысть Иоа́нн, нача́т то пове́дати Иису́с. Ожида́ше бо Иоа́нна пре́жде свиде́тельствовати о Нем и устро́ити Ему́ путь, и́мже хотя́ше приити́, [я́коже бо Влады́кам раби́ пре́жде угото́вают,] да́же и гла́си проро́честии соверша́тся. Малахи́ев бо глаго́лющий: «Се Аз посыла́ю а́нгела Моего́ пред лице́м Твои́м, и́же устро́ит путь Твой пред Тобо́ю». Иса́иев же: «Глас вопию́щаго в пусты́ни: Угото́вайте пути́ Госпо́дни, пра́вы твори́те стези́ Его́». Проро́ку же Заха́рии глаго́лющу к сы́ну своему́: «И ты, отроча́, проро́к Вы́шняго нарече́шися, предъи́деши бо пред лице́м Госпо́дним угото́вати пути́ Его́».

Пока́йтеся, глаго́лет, прибли́жи бо ся Ца́рство Небе́сное, Ца́рствие небе́сное глаго́люще ‐ ева́нгельское пропове́дание есть и пре́данное от него́ богоуго́дное житие́ и пребыва́ние. Ца́рство небе́сное ниже́ вре́менем приближа́ется, ниже́ ме́стом, но в завеща́нии чистоты́ души́ пребыва́ет. Ниже́ бо виде́нием прихо́дит, но внутрь нас есть Ца́рство небе́сное, а́ще бо тому́ хо́щет ‐ и́бо а́нгельски живу́ще и пребыва́юще в ми́ре сем небе́сни суть и Ца́рствие небе́сное в себе́ и́мут. Не бра́шно есть и пи́во Ца́рство небе́сное, но пра́вда, и поще́ние, и преподо́бие, и святы́ня, Ца́рствие небе́сное в себе́ иму́щи. И се есть вои́стинну Ца́рствие, е́же бы́ти во́ли Бо́жии и на земли́, и на небеси́, и жи́ти нам благоуго́дно, и ева́нгельски ходи́ти ‐ от жития́ бо ева́нгельскаго и бу́дущее небе́сное Ца́рствие прихо́дит. Ца́рство же небе́сное глаго́лется Христо́во прише́ствие, е́же бо Пресвята́го Ду́ха причаще́ние ‐ и на небеса́ восхожде́ние да́рует нам. Ца́рствие небе́сное и про́поведь ева́нгельская нарица́ется, и е́же по нему́ житие́ безгре́шное и спасе́ное пребыва́ние. Ца́рство Небе́сное я́же и по воскресе́нии нетле́нная блага́я нарица́ются, и буду́щая, и пребыва́ющая блага́я хвала́.

Оба́че же я́ко да сия́ приобря́щем и прии́мем от рук Госпо́дних, и ликоству́ем со а́нгелы, и с Царе́м всех во ве́ки ца́рствуем ‐ приближа́ющееся и [е́же] внутрь нас есть Ца́рство небе́сное потщи́мся стяжа́ти: беззазо́рное житие́ и доброде́тельное глаго́лю, е́же от уничиже́ния и смире́ния, возноше́нное и блаже́нное безстра́стие. Кроме́ бо сего́ Ца́рствия, бу́дущее о́но Ца́рствие и блаже́нное, и ве́чное не дано́ бу́дет нам. Не прельща́йтеся, рече: ни блудни́цы, ни прелюбоде́и, ни пия́ницы, ни лихои́мцы Ца́рства Бо́жия не насле́дят. Па́чеже у́бо и во огнь кроме́шный, и в про́чая лю́тая муче́ния осужде́ни бу́дут и по́слани - та́мо бо есть плачь и скре́жет зубо́м.

Отто́ле бо нача́т Иису́с пропове́дати и глаго́лати: «Пока́йтеся, прибли́жи бо ся Ца́рство Небе́сное».

Прии́де бо Той, о Не́мже проро́цы проро́чествоваша, ‐ ча́емый и ве́руемый Христо́с, ‐ да́же устро́ит нас, су́щих на земли́, да́же на небеси́ жи́ти. Прибли́жи бо ся вои́стинну нам небе́сное Ца́рствие, бра́тие! На земли́ бо Бог яви́ся и с челове́ки поживе́. Показа́ нам путь спасе́ния и ве́дения и́стинны. Показа́ нам поле́зная и спасе́ная. Небе́сная двери́ отве́рзе, рай отвори́. Сы́ны сотвори́л есть враги́ и неразу́мныя. Ца́рству небе́сному насле́дники поста́ви. Ду́ха Свята́го излия́ на сердца́ на́ша. Освяти́ и просла́ви нас, не на́шия ра́ди пра́вды, но бога́тыя ра́ди Его́ ми́лости, е́же пролия́ на нас пребога́тно .

Очище́нием во Иорда́не очища́ется Христо́с, Еди́н Сый Чи́стый и Нетле́нный, да́же освяти́т нас и во́ды, и главы́ зми́евы сокруши́т в вода́х. Спасе́ и свободи́ нас Христо́с, и просвети́, и благода́ти дар пода́ нам святы́м креще́нием.

Да соблюде́м сия́ кре́пко и тве́рдо и сохрани́м неотъе́млему ‐ не у́бо, освяти́вшихся на́ших усте́н святы́м Причаще́нием, оскверня́ем ло́жными словесы́ и глаго́лы су́етными; ниже́ просвети́вшихся на́ших оче́с помрача́ем их блу́дными воззре́нии; ниже́ украси́вшееся на́ше се́рдце оскверня́ем лука́выми помышле́нии; ниже́ ца́рствует грех в ме́ртвенем на́шем телеси́, е́же послу́шати его́ о вожделе́ниих его́; ниже́ представля́ем от уд на́ших ору́жие непра́вде и греху́ ‐ но предста́вим себе́ Бо́гу я́коже от ме́ртвых жи́ви и удеса́ на́ша ‐ ору́жия пра́ведна Бо́гу. Грех бо на́ми не облада́ти и́мать, несть бо мы под зако́ном, но под благода́тию. В зако́не бо бя́ше грех облада́я, в благода́ти же пра́вда ца́рствует, избавля́я нас от вся́каго греха́, я́коже пи́сано есть, я́ко «Омы́стеся, и освяти́стеся, и оправди́стеся и́менем Бо́га Иису́са и Ду́хом Бо́га на́шего».

Усрами́мся уже́ от благода́ти, бра́тие, соблюде́м чистоту́, сохрани́м освяще́ние, не низво́дим себе́ на безче́стие, че́стни бы́вше; ниже́ прельща́емся и мним влады́ку бы́ти по́хоть, су́щую пои́стинне бо лесть сме́ртную: сла́дость бо есть диа́воля у́дица, сла́дость есть обава́ние и погубле́ние, сла́дость есть распале́ние ве́чнаго и негаси́маго огня́.

Не взима́емся уже́ ко греху́ я́ко раби́ пови́нны и облада́еми быва́ем от него́, но пока́емся, и пла́чем, и рыда́ем грех на́ших, поне́же при врате́х есть суди́ще. И́бо кого́ждаго коне́ц ждет, жития́ сконча́ния си́лу и́мать, и вре́мя состаре́вшееся ве́де умре́ти и́мать. И поне́же у́бо при врате́х суди́лище есть, вели́каго Па́вла услы́шим, глаго́люща: «Нощь мимои́де, день прибли́жися», си́речь, я́ко настоя́щее житие́ мимохо́дит е́же есть нощь, зане́же во тме мно́гим су́ще и зане́же покрове́на суть дела́ на́ша. Бу́дущая же жизнь приближа́ется, я́же есть све́та ра́ди пра́ведных и поне́же та́йная всех явля́тися тогда́ и́мут, прии́дет у́бо ве́де [день] гряду́щий, прии́дет и не заме́длит.

Сего́ ра́ди потщи́мся, бра́тие, и бдим, и трезви́мся, я́ко угоди́ти Бо́гу пра́вою на́шею ве́рою и благи́ми на́шими де́лы. Или́ па́че покая́нием и испове́данием: мно́жицею бо и покая́нием еди́нем то́кмо прие́млет нас Госпо́дь. И се я́ве есть от ниневи́тян, пи́сано бо есть о о́нех: «И ви́де Бог, я́ко пока́яся ко́ждо от злоб свои́х и отступи́ от пути́ лука́ваго, и раска́яся и Он от зло́бы, я́же хотя́ше сотвори́ти им».

Пока́емся у́бо и мы на всяк день, и от пу́ти на́шего у́бо лука́ваго отсту́пим, и спасе́наго покая́ния дар возлю́бим. И се вожделе́нно приобыма́ем, - и корми́тельницу, и ма́терь всем доброде́телем усе́рдно прии́мем в на́дрех, - и пла́чемся пред Го́сподем, сотво́ршим нас, да́же седя́щим нам во мра́це рыда́ния, в се́ни поуче́ния сме́ртнаго рыда́юще, упражня́ющимся, вели́кий свет пра́вде, незаходи́мое Со́лнце возсия́ет Христо́с, и, пристра́стную мглу разори́в, дале́че от на́ших душ отжене́т, и све́том доброде́тели просвети́т, и вы́шнее весе́лие да́рует нам. Свои́х у́бо грех ко́ждо нас уве́дающе го́рько воспла́чемся и Влады́ку умо́лим да́же пре́жде сме́рти на́шея прегреше́ния на́ша прости́т. Добро́ у́бо есть, и бла́го, и спасе́но ничто́же согреши́ти; но оба́че же, поне́же се несть, второ́е поне́ взы́щем ‐ покая́ние, и чу́вствуем себе́ согреша́юще, молюся и покае́мся, и исправля́ем вско́ре прегреше́ния на́ша. Та́ко у́бо возмощи́ и́мамы и бу́дущая му́ки убежа́ти, и небе́сному Ца́рствию сподо́битися, е́же бу́ди всем нам получи́ти, благода́тию и человеколю́бием Го́спода на́шего Иису́с Христа́, Ему́же сла́ва и держа́ва со Отце́м и Пресвяты́м Ду́хом, ны́не и при́сно и во ве́ки веко́в. Ами́нь.