И́же во святы́х оте́ц наш Арсе́ний бе от простра́ннаго гра́да Тве́ри. И́же от млады́х наго́т, Христа́ возлюби́в, и Пречи́стую Богоро́дицу, и оста́вив мир, и я́же в нем су́етства и бога́тство, и высо́кую любо́вь роди́телей свои́х преоби́дев, и шед во еди́н от монастыре́й, и бысть мних. И до́бре подвиза́вся к Бо́гу, посто́м и бде́нием и моли́твами. И посе́м шед на ме́сто, и́же ны́не зове́тся Желтико́во, от гра́да я́ко в далее трех по́прищ или́ мно́жае, и возлюби́ ме́сто то. И па́ки на ме́сте том оби́тель соста́ви пречу́дну, во и́мя Пресвяты́я Богоро́дицы, и и́же во святы́х отца́ на́шего Никола́я чудотво́рца, и преподо́бных оте́ц Анто́ния и Феодо́сия Пече́рских. И и́ноков собра́в мно́го, Христу́ рабо́тати с собо́ю, и до́бре и́ноки возлюби́в я́ко чадолюби́вый оте́ц, наставля́я их на па́жити духо́вней. И посе́м за премно́гую его́ доброде́тель и чи́стое житие́, пону́жден бысть от князе́й, и от вельмо́жь в том же гра́де Тве́ри бы́ти епи́скопом, и вельми́ подвиза́ся к Бо́гу, и труды́ ко трудо́м приложи́в. И христолюби́вым князе́м и вельмо́жам тве́рдое быв защище́ние. И научи́в их пра́вей ве́ре, е́же суд твори́ти им пра́веден, и оша́ятися им грабле́ния, и на восхище́ние не жела́ти, си́речь чужа́го име́ния не и́мати оби́дою. И посе́м мно́ги це́ркви Бо́жия воздви́же во гра́де Тве́ри. И во окре́стных ме́стех, во сла́ву святы́х, и украси́в их чу́дно. И ни́щым и сирота́м и вдови́цам бысть корми́тель и засту́пник, я́ко отец чадолюби́вый. И до́бре упа́с це́ркви Бо́жия святы́й, лет девятьна́десять, и седмь ме́сяц, и ста́до Христо́во слове́сных овец. И в ста́рости до́бре ко Го́споду отъи́де, Его́же возлюби́. И присовокупи́ся к лико́м святи́тель. И уве́девше благочестив́ый князь Иоа́нн Тверски́й, и священнои́ноцы, и люби́мая ча́да свята́го отца́ оби́тели, и вси людие гра́да того́ стеко́шася. И взе́мше честное те́ло свята́го, со псалмопе́нием и с пе́сньми и с фимиа́мом, и положи́ша е́ че́стно в созда́ннем от него́ монастыре́, в це́ркви Пресвяты́я Богоро́дицы, иде́же и до ны́не чудеса́ твори́т, и исцеле́ние подае́т, с ве́рою приходя́щым к честне́й ра́це его́. Бо́гу на́шему сла́ва, ны́не и при́сно, и во ве́ки веко́в. Ами́нь.