Помышля́юще у́бо бра́тие Го́спода глаго́люща: Не суди́те и не осужде́ни бу́дете. И па́ки апо́стол учи́т: Мня́йся стоя́ти, блюде́т да не паде́тся. Блюди́ себе́ еда́ искуше́н бу́деши. Мно́зи бо я́ве согреши́ша, и та́же покая́вшеся получи́ша проще́ние, и Святы́й Дух прия́ша. А и́же на́ми мни́мы гре́шны су́ща пра́ведни суть у Бо́га: Грехи́ бо их ви́дехом, а покая́ния не разуме́хом. Я́коже бо он Филимо́н свире́льник и́же во Еги́пте: еди́но де́ло сотвори́ велие, в меру прии́де по́стника свята́го Мака́рия. Тем а́ще ви́диши и очи́ма согреша́юща не су́диши. Де́сять бо стоп отсту́пльше от лица́ на́шего, не ве́мы что сотвори́л бу́дет к Бо́́гу, или́ Бог с ним. Иу́да бо преда́тель свита́ющу четвертку́ со Христо́м и со ученики́ бе, разбо́йник же в злоде́ех бе с мужеуби́йцами. Прише́дшу же пятку́, Иу́да отъи́де во тму кроме́шную, разбо́йник же со Христо́м в рай всели́ся. Да того́ ра́ди не подоба́ет осужда́ти челове́ка ,до́ндеже Госпо́дь су́дит ему́. Суд бо весь дал Оте́ц Христо́ви. Те́мже судя́й согреша́ющаго, сан Христо́в восхища́ет. И есть таковы́й анти́христ. Укаря́еми зде от Бо́га, оставле́ние грехо́в прии́мут. Никто́же бо без греха́ токмо един Бог. Кто ли бы ве́дал мно́гое Бо́жие милосе́рдие, а́ще не бы Сам показа́л челове́ком, прие́мля гре́шники в покая́ние. Я́коже блудни́цу и мытаря́. Я́коже скве́рный он Манасси́й, и́же пятьдеся́ть и два ле́та и́долом служи́в, и вся лю́ди Израилевы беззако́нствовати сотвори́, и во еди́н час пока́явся проще́ние получи́. Затворе́н в сосу́де ме́дяне в Вавило́не, и внутрь сый песнь свою́ поя́ше, и а́нгел Госпо́день разве́рг медь принесе́ во Иерусали́м. И поживе́ про́чее в покая́нии. Бо́гу на́шему сла́ва, ны́не и при́сно и во ве́ки веко́в. Ами́нь.