Прии́де иногда́ прост люди́н ко отцу́ Сисо́ю, в го́ру отца́ Анто́ния и име́я сы́на у себе́, и той у́мре на пути́. И не смяте́ся, но несе́ его́ ко отцу́. И ве́руя припаде́ к нога́ма отца́ Сисо́я с те́лом сы́на своего́, я́ко поклоня́ние творя́ше, я́ко да и благослове́ние прии́мет от отца́. Воста́в же челове́к, а сы́на оста́вль при ногу́ ста́рца, и изле́зе вон из хи́жи. Ста́рец же мнев я́ко поклоня́яся ему́ лежи́т, и рече́ ему́ воста́ни и иди́ вон, не ве́дяше бо я́ко мертв бе. И а́бие воста́, и изы́де вон. И ви́дев оте́ц его́, и диви́ся. И влез поклони́ся отцу́ Сисо́ю до земли́, и возвести́ ему́ вещь ту. Слы́шав же оте́ц Сисо́й, и печа́лен бысть: не хотя́ше бо дабы́ то бы́ло. Запрети́ же ему́ и ученико́м его́ никому́же возвести́ти до уме́ртвия его́.