Сей Константи́й град оте́чество имя́ше, роди́телю боголюбе́зну, и те́ма и́ноческое житие́ восприе́мшима, та́коже и бра́тии постри́гшимся. Па́влу же и Диони́су по ре́вности о́нех и по подо́бию, и той ку́пно с Плато́ном бра́том восприя́т по́стническаго по́двига. И толи́ко подвиза́ся е́же преити́ трудолю́бием све́рстники, я́ко в нача́ле о́браза такове́м приобрести́ свои́х, и про́чих всех и́хже бы́вшых о́нех красо́т препи́совати и прилага́ти к своему́ житию́. Сего́ доброде́тели ра́ди возлюби́ тогда́шний архиере́й Нико́ла и́же бя́ше Ита́льский, и тща́ние имя́ше того́ почести́ архиере́йством. О́ному же тогда́ сбыва́емым не хотя́щу, недосто́йна себе́ показу́ющу. К Па́влу же бра́ту вшед, утеше́нием и пре́ю архиере́я це́ркви Кори́нфстей поста́ви. Сам же ну́ждею отбега́я, прии́де к своему́ бра́ту в Кори́нф. И молча́нием пре́йде год еди́н, но не до конца́, приложи́вся к трудо́м. Отше́дшу же святы́х первоседа́льнику, приидо́ша са́ми вельмо́жие и кора́бленицы издале́ча мольбы́ творя́ще, е́же да́ти им архиере́я бра́та его́. И толи́ко ну́диму изнемо́же и бежа́ти помы́слив. Вре́мени же дово́льну мимоше́дшу зане́же бо́ле ну́димь бя́ше, вма́ле о́нех слез внят, и про́чее их восприя́т. Я́коже де́лу сбы́вшуся прилежа́ху благоуче́нию церко́вному. Прилежа́ше же е́же о́нех прилежа́нию. И натоли́ко простре́ ру́ку свою́ к ми́лостыни, я́ко ни саму́ ри́зу щаде́ти. Си́рыя пита́я, вдови́цам прилежа́. Ни́щых насыща́я, и подая́ им, и всем тре́бующим ми́лостыню ти́хо истоща́я. Я́коже не́когда ле́то пони́зи гла́дом одержи́мо мно́гия, 1000, препита́вшу не пощаде́нием рукопода́ния. Не́когда ма́ло бра́шна в пифа́ри оста́вшу, обре́те пифа́рь преиспо́лнен дово́лно, е́же бысть чрез год тре́бующим. И я́же о себе́ пле́нники избавля́я, и от кре́пльших рук влеко́мых. Отню́д же тех свобожда́ше, и отрокови́цу бесну́ющуся исцели́. И пело́пову страсть при́тчею проре́к, и свою́ кончи́ну проуве́дев. И у́же седми́десят лет быв, с ты́сящами пото́в доброде́телных, блаже́нную ду́шу свою́ отложи́. И́же по кончи́не явле́нием показова́ше соде́лования. Благоуха́ния точа́ от гро́ба своего́, и бе́сы прогоня́я, и боле́зни вся́кия исцеля́я, и объявля́я воспомина́ния, и́же от та́мо восприе́мших его́.