Стихи́:

Седмь учени́к с Вади́мом посе́чени бы́ша,

И́бо не отбего́ша, я́ко ученицы́ Го́спода своего́.

Той святы́й му́ченик Вади́м, бе от пе́рсскаго гра́да Вифлапа́та, ро́да бога́та и сла́вна. Изво́ли же бы́ти мона́х, и бысть архимандри́т, и мно́га от е́ллин обраща́я к Бо́гу и креща́ше. И ят бысть с седмию́ учени́к его́, и в темни́цу вве́ржен бысть, царю́ Саво́рию пе́рсскому повеле́вшу. И пребы́сть в темни́це четы́ре дни. Посе́м изведо́ша его́ пе́рсяне из темни́цы и со ученики́ его́, и повеле́но бысть Ни́рсе не́коему слузе́ пе́рвое христиа́ну бы́вшу, и убоя́вшуся мук и отве́ргшуся Христа́, свята́го усе́кнути. И ви́дев святы́й Ни́рсу укори́ его́, я́ко не помяну́ воздая́ния бу́дущаго Суда́ и дне, во́ньже возда́ст ему́ Госпо́дь, Его́же отве́ржеся. Сей же трепе́ща, даде́ четы́ре ра́ны мечем свято́му. И та́ко с трудо́м мно́гим предаде́ святу́ю ду́шу свою́ Го́сподеви. Уби́йца же Ни́рса объя́т бысть мно́гими злы́ми, и мече́м сам себе́ погуби́, я́ко во отверже́нии пребы́сть.