Евсе́вий священному́ченик бе при Константи́не цари́, рве́нием горя́ по пра́вой ве́ре. Тольми́ же ему́ бе души́ му́жество и су́щих презре́ние, я́ко никому́же ино́му. Тогда́ Константи́ну претя́щу ему́ десну́ю ру́ку отсещи́, а́ще не от свята́го Меле́тия возбране́н бе, судо́м и́же сам име́яше. Он же преда́сть, просте́р ру́цы о́бе, я́ко в сласть прие́мля ею́ усече́ние или́ взыска́емаго преда́ти. Сего́ по Константи́не и Иулиа́не, Иуа́лий (Иуа́лент) царь, ариа́ньским злохи́трием неду́гуя, от престо́ла изгна́ и пребыва́ти во изгна́нии дале́че осуди. По уме́ртвии же Иуале́нтове, возврати́ся па́ки святы́й. И по мно́зех по́двизех муче́ние получи́ си́це: жене́ злове́рне, Ариева су́щи уче́ния, кереми́ду с покро́ва уро́ньшу, умертви́ и́, ю́же проще́ния сподо́би, своему́ Влады́це и первому́ченику подо́бяся.