Научи́ся бра́те блюсти́ сам себе́, и чужа́я зла́я а́ки своя́ внима́й. Паде́нию ино́го не сме́йся, но пода́й ру́ку лежа́щему до́ле. И егда́ у́зриши врага́ твоего́ в руку́ твое́ю, не му́чи его́, но па́че поми́луй. Тогда́ бо ти подоба́ет пощади́ти врага́ своего́, егда́ ему́ господи́н бу́деши. Поми́ловав бо, и сам от Бо́га обря́щеши ми́лость. А́ще ли и ты когда́ впаде́ши в не́кую лю́тую напа́сть, с вели́ким дерзнове́нием, и сам испро́сиши от Бо́га отда́ние, па́чеже и ми́лость от Него́ получи́ши. Ему́же сла́ва, ны́не и при́сно и во ве́ки веко́в. [Ами́нь.]