Па́мять святы́х и богоно́сных оте́ц трехсо́т и осмина́десяти и́же в Нике́и

Стихи́: Стра́нна Сы́на Оте́ческаго естества́ глаго́лет А́рий: Бысть чуждь боже́ственыя сла́вы.

Святы́й вселе́нский пе́рвый собо́р бысть во второ́е на́десять ле́то вели́каго и ра́внаго апо́столом Константи́на царя́. Пе́рвое в Нике́и на А́рия худоу́мнаго, и́же бысть от Ливи́и прише́дый во Александри́ю, и священному́чеником Петро́м поста́влен бысть диа́кон. Елма́ ху́лити нача́ на Сы́на Бо́жия, Cозда́ние Сего́ пропове́дая от небытия́ бы́ти и далеко́ бы́ти Бо́жия че́сти. Сего́ ра́ди повеле́нием ца́рским по всей вселе́нней прише́дших собо́ра оте́ц в Нике́и. И́же о А́рии преговори́вшим, прокля́тию той и его́ мудри́тельнии вси прелага́ются. Бо́жие же Сло́во Единоесте́ствено и Равноче́стно и Безнача́льно пропове́дается Отцу́ и Сы́ну и Свято́му Ду́ху. Поста́виша же си́и, и ве́ре проявле́ние списа́ша да́же и [до] «в Дух Святы́й…». Про́чее же что есть, и́же пото́м во вторы́й собо́р испо́лни. Бя́ху бо архиере́и от святы́х сих оте́ц бо́льшии: Селиве́стр Ри́мский, архиере́й Митрофа́н, и Алекса́ндр, Константи́ня гра́да, и други́й Алекса́ндр Александри́йский, и Мака́рий Иерусали́мский, и прочи́и. И́же всем бы́ти на вселе́нском пе́рвом собо́ре трехста́м и осемьна́десяти богоно́сных оте́ц, сше́дшим же ся на А́рия и на единому́дрствующих ему́: ре́кше Евсе́вия Никомиди́йскаго, и Тири́йскаго Павли́на, и Евсе́вия Александри́йскаго и ины́х мно́гих, те́хже прокля́ша, а Це́рковь боже́ственую оправди́ша.

В то́йже день па́мять преподо́бных и богоно́сных оте́ц и́же во вторе́м собо́ре.

Стихи́: Име́я боже́ственаго Ду́ха Бо́га не глаго́лати: Всезлы́й дух Македо́ниев рече́.

Святы́й вторы́й собо́р, в Константинопо́ли в ца́рство Феодо́сия вели́каго и архиере́я Ри́мскаго Дама́са, Некта́рия святи́теля Константи́ня гра́да, Тимофе́я Александри́йскаго, Меле́тия Антиохи́йскаго, Кири́лла Иерусали́мскаго и Богосло́ва Григо́рия, епи́скопа Наанзиа́нскаго. Бя́ше же всех святы́х оте́ц сто и о́семь собра́вшим бо ся на Македо́ния окая́ннаго и нечести́ваго, худохва́льнаго патриа́рха Константи́ня гра́да. О не́мже рече́ Феодори́т Анги́рский, я́ко той тле́нному естеству́ Христа́ причте́ бы́ти и безу́мно и безсту́дно и неду́шно те́ло прия́ти Христа́, пе́рво того́ изри́ну. Те́мже и вселе́нский собо́р собра́ся и прокля́ша его́ и со единомы́сленики его́: Аполина́рия Лаодики́йскаго и Саве́лия и́же от Ливи́и. И та́ко тех прокля́ша, а святу́ю ве́ру христиа́нскую извести́ша. И вме́сто Македо́ния утверди́ша Некта́рия. И ктому́ испо́лниша проявле́ние ве́ре. И по́слежде всех Феодо́сие вели́кий червле́ными утверди́ словесы́ свято́е ве́ре проявле́ние.

В то́йже день па́мять преподо́бных оте́ц, и́же в тре́тием собо́ре.

Стихи́: Му́жий и и́нок мно́жайшая твердь: Тогда́ же и Несто́рия сло́вом усеко́ша.

Святы́й вселе́нский тре́тий собо́р бысть во Ефе́се, пе́рвее в ца́рство Феодо́сия ма́лаго и Келести́на па́пы Ри́мскаго, Кири́лла первонача́льника Иерусали́мскаго, Иоа́нна Антиохи́йскаго и Ювена́лия Александри́йскаго и во Ефе́се Ме́мнон архиере́й. К ца́рскому же гра́ду причте́н, бысть Несто́рие злочести́вый и безу́мный. Я́ко той обре́т начерта́ния окая́ннаго Се́ргия и подо́бная ему́ на боже́ственую Це́рковь произвещева́ше. Те́мже соше́дшеся от вселе́нныя святи́и отцы́ и боже́ственнии [число́м] две́сте и отсеко́ша его́ от боже́ственыя ве́ры и всех подо́бных ему́: Диоско́ра, и Евти́хия и́хже прокля́ша, а святу́ю правосла́вную ве́ру тве́рдо укрепи́ша.

В то́йже день па́мять соверша́ется святы́м и боже́ственым отце́м и́же в четве́ртом собо́ре

Стихи́: Христа́ Бо́га Сло́ва воплоще́ние нело́жно: Весть изве́стна Евти́хия изве́рже.

Святы́й вселе́нский четве́ртый собо́р бысть в Халкидо́нской митропо́лии, при благочести́вом царе́ и боговенча́нем Маркиа́не и Льве па́пе Ри́ма вели́каго, и Анато́лии архиере́е Константи́ня гра́да, Макси́ме Антиохи́йском, и Ювена́лии Иерусали́мском. Во Александри́и же бысть вепрь ди́вий Диоско́р. Благода́тию бо Свята́го Ду́ха от вселе́нския вся собра́вшимся святы́м отце́м, шестию́ стам и три́десяти, и низложи́ша злочести́ваго Диоско́ра и его́ архимандри́та Евти́хия, и ины́х единомы́сленики их глаго́лющих, я́ко привиде́нием восприе́мша плоть Го́споду на́шему Иису́с Христу́: е́же Феодо́сия, от него́ нарица́еми феодосиа́ни, Иа́кова, и Севги́ра, от ни́хже нарица́ются иакови́ти, и севериа́ни глаго́лемии еретицы́, я́ко подо́бна пре́жде пи́саных ерети́к и ти́и прескве́рни быва́ют. Те́мже на тех и на ины́я еретики́ предста́ша святи́и и богоно́снии отцы́. И исторго́ша их я́ко пле́велы от правосла́вия села́. И ве́ру укрепи́ша.

В то́йже день па́мять соверша́ем святы́м и боже́ственым отце́м и́же в пя́том собо́ре, сто шестьдеся́т пять.

Стихи́: Словеса́ вра́жия Ориге́нсти глаго́лы: И́хже разори́ша поклони́телие Сло́ву.

Сий святы́й и вели́кий вселе́нский собо́р пя́тый, бысть в Константи́не гра́де при Юстиниа́не правосла́внем цари́. Бя́ше же ту Ви́глие архиере́й Ри́мский и Евти́хие ца́рствующаго гра́да, Аполина́рие Александри́йский святи́тель. Домн патриа́рх Антиохи́йский, Евти́хие архиере́й Иерусали́мский. Си́и вси бя́ху сто ше́стьдесять и пять, собра́вшимся на Ориге́на пребезу́мнаго. Его́же и прокля́ша, и всех единомы́сленых ему́: Ева́нгрия и Близнеца́ и ины́х, а святу́ю правосла́вную ве́ру утверди́ша и церко́вная извести́ша повеле́ния.

В то́йже день па́мять святы́х и богоно́сных оте́ц и́же в шесто́м собо́ре сто се́дмьдесять.

Стихи́: И челове́ка про́ста, а не Бо́га и Челове́ка Сло́ва: Всезла́я се́яния Христа́ раздреши́ сло́вом.

В ца́рствующем гра́де шесты́й собо́р пра́зднуем, и́же бысть при Константи́не брада́тем, вну́ка Иракли́ева. Ту бе Агафо́н па́па вели́каго Ри́ма и Гео́ргие архиере́й Констани́на гра́да, Феофа́н антиохи́йский патриа́рх, от Александри́и Петр мних, я́ко не име́ти предстоя́теля свяще́нству престол Александри́йский. Про́чих же всех святы́х оте́ц сто се́дмьдесять, собра́вшихся на подви́гнувшихся хуле́ния на святу́ю и собо́рную Церковь, е́же подви́гл Фео́дор Фара́нский, худоумный епископ, и Ону́рие Ри́мский, и Кири́лл Александри́йский, Се́ргие же и Пи́рро, Па́вел же и Петр гугни́вый, бы́вшим епи́скопом Констани́ня гра́да, и Мака́рие, у́ имени́вшися предста́тельству Антиохи́йскому, и Стефа́н его́ учени́к. Те́хже ра́ди собо́р собра́ся вселе́нский, на вы́ше пи́санных ерети́к и я́ко богобо́рцы тех прокля́ша и правосла́вную ве́ру извести́ша. И пре́жде бы́вших собо́р повеле́ния утверди́ша.

В то́йже день па́мять соверша́ем святы́х и боже́ственных оте́ц и́же в седмо́м собо́ре трехсо́т шести́десяти седми́.

Стихи́: Пресве́тлая свети́ла правосла́вных пра́вил Повеле́ния разори́ша борю́щихся е́ресь.

Святы́й вселе́нский седмы́й собо́р бысть в Константи́не гра́де, во дни при́сно помина́емыя цари́цы Ири́ны, супру́жницы Лвьа правосла́внаго царя́. Ему́же вско́ре премене́ния землена́я, возра́слию своему́ Константи́ну вручи́в ски́петра, и́же и повеле́ собо́ру седмо́му бы́ти в Конста́нтии и́же и в Нике́и Вифини́йской. Прише́дше же ту Андриа́н архиере́й вели́каго Ри́ма и Тара́сий Константи́ня гра́да, Политиа́н Александри́йский, Феодори́т Антиохи́йский, Илия́ Иерусали́мский. Си́и вси святи́тели и про́чих всех три́ста ше́стьдесят седмь. Собра́вшимся на иконобо́рцы и́хже и прокля́ша, а Правосла́вие утверди́ша.

Ве́домо же да есть, я́ко в седми́х собо́рех суть си́и: в пе́рвом собо́ре три́ста осемна́десять, во второ́м собо́ре сто и о́семь, в тре́тием собо́ре две́сте, в четве́ртом шесть со́т три́десять, в пя́том сто шестьдеся́т пять, в шесто́м сто се́дмьдесять, в седмо́м три́ста шестьдеся́т седмь, всех – две ты́сящи. Те́мже святы́х и богоно́сных вселе́нских седмь собо́ров после́дуем, я́коже и сосу́д избра́нный Па́вел глаго́лет (Гал. 1:8). Тех за́поведи и пра́вила да не оскуде́ем, я́ко ктому́ не приложи́ти ни уложи́ти, да не рече́нная тем прии́мем. И́ны мно́зи еликому́дренна учи́телие повеле́ша со прописа́нными тем словесе́, да не уста́в му́дрых и нему́дрыми измени́м. Но прие́млем и лобза́ем святы́х и вселе́нских седмь собо́ров: пе́рвый в Нике́и, вторы́й в Константи́не гра́де, тре́тий во Ефе́се, четве́ртый в Халкидо́не, пя́тый в Константинопо́лии, шесты́й в то́мже ца́рствующем гра́де, седмы́й в Нике́и Вифини́йской. Прие́млемо же и по боже́ственой благода́ти и благочести́вой ве́ре христиа́нской и ева́нгельскому испове́данию, я́коже боже́ственая и апо́столькая Це́рковь прия́т и утверди́ утвержда́емо.