Чу́дна правосла́вных торжества́, све́тлы му́ченическия па́мяти, непосты́дна благочести́вых весе́лия, вся́кого очища́ют досажде́ния на́шего. Не пра́зднуем ле́ту несоста́вно дви́жиму, не почита́ем годи́ну челове́ческия жи́зни истощи́тельницу, не покланя́емся ве́ку, в тлю нас влеку́щему, не слу́жим тва́ри, сорабо́тна бо бы́вшим, не слу́жим ти́не, от не су́щих бо предста́, я́коже бо бытие́ и́мут сия́, си́це и тле́ние подлежи́т кончи́не, не чтем не́бо, я́ко дым бо утверди́ся, не чтем твердь, от не су́щих бо ледови́дно сотворися, не почита́ем света, сло́вом бо соде́тельствовася, не чтем со́лнце, от све́та бо искова́ся, не чтем луну́, воображе́нием бо украси́ся, не чтем зве́зды, потре́бы бо ра́ди созда́шася, не чтем зе́млю, от воды́ бо призвана́ бысть, не слу́жим огню, веще́ствен бо соста́в, не чтем воду, теку́щаго бо естества́, не слу́жим годи́не, не стои́т бо, не чтем день, повеле́нием бо рабо́тает по вся ле́та, состарева́ет бо ся ле́то, со все́ми состаре́ется. Бог же еди́н ве́тхости вы́шьши и яви́т коне́чный день.

Е́ллини у́бо и иуде́и бра́тия безако́нна, диа́воля коры́сти, грехо́внии вну́цы, пре́лести пи́ща, нече́стия тма, гее́нны насле́дницы, гребцы́ неч́естия, сы́нове кля́твы. Си́и бо да пра́зднуют нечести́ве, поне́же му́дрствуют непреподо́бне, они́ у́бо пре́лесть да почита́ют, о́вы же зако́н да попира́ют, и друг дру́гу лука́вству да поуча́ют, согласи́ша бо ся: иуде́и от е́ллин навыко́ша идолослуже́ние, и е́ллины от иуде́й научи́шася проро́ки побива́ти, иуде́и бо в зако́не всю е́ллинскую изъяви́ша пре́лесть. Но или́ негоду́еши, о́ иуде́ю, сия́ слы́шав? Воспомяни́ соде́янная и не смуща́яйся о укори́зне. Где бо и́долом не послужи́л еси, рцы ми? В пусты́ни тельца́ излия́л еси́, победи́в, Веельфего́ру послужи́л еси, в Моави́тех Хамо́су поклони́лся еси, в Палести́не Даго́ну поже́рл еси́, в Вавило́ну Ви́лу же́ртву прине́сл еси́, в Финики́и Аста́рти послужи́в, в плене́нии о Хамо́се пла́кал еси́. Оскуде́ ме́сто, не оскуде́ же ме́рзость. Сего́ ра́ди и пра́здникы ва́ша ненави́дит Влады́ка: всяк бо твой пра́здник, о́ иуде́ю, уби́йство принесе́. Постя́ся, Науфе́я поби́л еси́ ка́мением; пра́зднуя, Иса́ию прете́рл еси́; торжеству́я, Иереми́ю в ров ка́лен вве́рже; в суды́ и сва́ры непреподо́бне пости́лся еси́, объяда́яся; при Илии́ киво́т пре́дал еси; Иоа́нну главу́ отъя́т. А́ще си́це пра́зднуеши, пла́кати тебе́ лу́чши есть.

Мы же днесь пра́зднуем боже́ственая и пресла́вная чудеса́, му́ченик страдан́ия, погребе́нных ра́ки, неви́димых мре́жа, разреше́нных врачева́ния, Стефа́нов каменноплетеный вене́ц, пресла́внаго Лавре́нтия я́же сме́ртию побе́ды, Ага́ино необурева́нно де́вство. О́ Тро́ице, тро́ическая про́поведи! О мо́щи святы́х, больны́х лечьбы́! О́ пра́ше, исто́чниче чудес! О море, небе́сныя добро́ты подо́бие! Обличи́в срабны́я, пропове́м и аз Влады́ку: не отяготева́ет мя стопа́ Созда́вшаго мя: освяща́ют мя но́зе Созда́телеве; Моисе́й раздели́, но Сей освяти́; Ио́ну поглоти́х, Сего́ же трепе́щу; Но́я обурева́х, но не дерза́ю возре́ти на Сего́, И́же челове́кы Созда́вшаго; нога́ма мене́ ше́ствовав освяти́; не́бо престо́лом просла́ви; зе́млю я́сльми просветли́; а́да гро́бом уясни́; и мене́ у́бо да освяти́т стопа́ми: несмь бо безу́мен или́ безду́шен; познава́ю, я́ко созда́ние Созда́вшаго; не глаго́лю со иуде́и: сей Челове́к несть от Бо́га; Сей – Бог мой, и просла́влю И́; покажу́ я́же моего́ естества́, обличи́в уби́йц нра́вы, пропове́м и по мне ходи́вшаго держа́ву; си́и клевре́ти, Он Влады́ка; не от стра́ха сих смуща́юся; Влады́ка у́бо в мо́ри немо́крено ше́ствова; о́ви же, пла́вающе в мо́ри, молву́ деяху; страх же бе́дствующих зва́ти творя́ше; человеколюби́вый же Па́стырь е́же дерза́ти повелева́ше, глаго́ля: Дерза́йте, ве́ры и́мате держа́ву, идолослуже́ния молва́ не потопи́т вас. Дерза́йте, иуде́йская неи́стовства не погрузя́т вас. Дерза́йте, ерети́ческия бу́ри не обурева́ют вас, Аз есмь Собезнача́льное Сло́во Отцу́, несозда́ннаго нача́ла Ветвь, мирска́го греха́ А́гнец, гра́дских обурева́ний Ко́рмчий, правосла́вныя ве́ры Сокро́вище, му́ченических по́двиг Мздода́тель. Аз есмь, не бо́йтеся: иде́же бо свет прихо́дит, отбега́ет тма, благода́тию и человеколю́бием Го́спода на́шего Иису́с Христа́, Ему́же сла́ва и держа́ва со Безнача́льным Отце́м и Пресвяты́м и Животворя́щим Ду́хом, ны́не и при́сно и во ве́ки веко́в. Ами́нь.