Жена́ не́кая имя́ше на сосце́ струп зол, реко́мый карки́н. Сия́ же слы́шавши о отце́ Лунги́не, и иска́ше глаго́лати с ним. И изше́дши жена́ от гра́да о девя́том часе́, и прилучи́ся блаже́нному тому́ ста́рцу собира́ти дрова́ при мо́ри, и обре́т его́ жена́ глаго́ля, о́тче где живе́т раб Бо́жий Лунги́н, неве́дущи я́ко той есть. Он же рече́ ей, что и́щеши лжи́ваго того́. Не иди́ у́бо к нему́, лжив есть, что есть е́же и́маши. Она́ же проуве́дев того́ бы́ти, показа́ ему́ струп свой. Ста́рец же пе́рстом свои́м зна́менав отпусти́ ю́ рек, Госпо́дь тя уврачу́ет. Лунги́н же никоея́ же по́льзы не мо́жет сотвори́ти. Жена́ же отъи́де ве́рующи словеси́ его́, и а́бие исцеле́. По сих же пове́да вещь зна́мения, и реко́ша ста́рцы, ве́си у́бо я́ко той есть а́вва Лунги́н.