Рече́ святы́й Иса́к Си́рин, я́ко а́ще и́маши изли́ше дневны́я потре́бы, отда́ждь убо́гим, и иди́ со дерзнове́нием и принеси́ моли́тву свою́, е́же есть глаго́лати с Бо́гом, я́ко сын со Отце́м. Ничто́ же та́ко прибли́жит к Бо́гу, я́коже ми́лостыня. И ничто́же та́ко сотвори́т ти́хости уму́, я́коже нищета́ во́лная. У́не ти есть от мног про́звану бы́ти неве́жею простоты́ ра́ди, а не му́дру соверше́ну сла́вы ра́ди. А́ще кто и на коне́ е́здя простре́т ру́ку к тебе́ прия́ти ми́лостыню, не возбрани́ ему́, я́ко и той тре́буя есть прия́ти ми́лостыню я́ко еди́н от убо́гих. Егда́ же дае́ши, даждь все́ю душе́ю и ти́хим лице́м. И бо́ле ели́ка про́сит даждь ему́. Посли́ бо рече́ свой хлеб пред лице́м свои́м, и не по мно́зе вре́мени обря́щеши возда́ние. Не разлучи́ бога́та от убо́га, и не восхощи́ уве́дети досто́йна от недосто́йнаго. Но да бу́дут ти челове́цы вси на благонра́вие. Се́ю бо ве́щию и недосто́йных мо́жеши привести́ на благо́е. Поне́же ско́ро привлачи́тся душа́ от пло́тных в страх Бо́жий. И́бо и Госпо́дь мытаре́м причаща́яся трапе́зы, и не разлуча́ше досто́йных ра́ди, е́же приближа́ются духо́вных. Сего́ ра́ди добро́м и че́стию вся челове́ки уравня́й. А́ще и не ве́рен есть и уби́йца, но брат ти есть по естеству́, и па́че я́ко брат ти есть, и от естества́ твоего́, и кроме́ зна́ния заблуди́л есть от и́стины. И егда́ кому́ сотвори́ши бла́го, не ожида́й воздая́ния от него́. Но в ко́ейждо ве́щи возда́ст ти ся от Бо́га. А́ще же ти есть мо́щно е́же вложи́ти в ду́шу си уста́в нищеты́ благода́ти ра́ди Бо́жия, свободи́шися от печа́ли, и вы́ше ми́ра бу́деши свое́ю нището́ю. Блюди́ у́бо, да не нищелю́бием возлю́биши стяжа́ние, да от того́ сотвори́ши ми́лостыню, и вложи́ши ду́шу свою́ в смяте́ние, е́же восприя́ти от кого́, и да́ти ино́му, погуби́ши мзду свою́. И вино́ю проше́ния от челове́к, отпаде́ши своего́ смы́сла свобоже́ннаго печа́лей жите́йских. Поне́же стопы́ твоя́ вы́ше степе́ней ми́лостивых суть. Молю́тися не повини́ся. Ми́лостыня у́бо подо́бная детокормле́нию, безмо́лвие же коне́ц соверше́нию есть. А́ще и́маши стяжа́ния, сие́ еди́ною расточи́. А́ще ли не и́маши, не восхощи́ име́ти. Очи́сти свою́ ке́лию, и скудота́ веще́й твои́х научи́т тя воздержа́нию. Поне́же егда́ мно́жество веще́й прии́мем и изоби́луем, не мо́жем себе́ воздержа́ти. Се слы́шаще бра́тие попече́мся о свое́м спасе́нии.