Си́и святи́и от земли́ Пе́рсския бе́яху су́щии. Пе́рвейшая Саво́рием царе́м Пе́рсским терпя́ще, благоче́стие тве́рде стяжа́ша. Я́ти у́бо бы́вше и обе́шени и бие́ни и ре́бра их огне́м опаля́ема, и зане́же хули́ти царю́ поче́нше на Христа́, безгла́сна его́ показа́ша святи́и. И па́ки разреши́ша, на одре́х желе́зных раждеже́нных положе́ни бы́ша, и сше́дшу дождю́ вели́ку и погаси́вшу огнь; и тре́бище Ди́ево низложи́ша. И сего́ ра́ди вве́ржени бы́ша в ко́ноб о́лову клоко́чущу и неприкоснове́ни бы́ша. И́же и Авфо́ния к ве́ре Христо́ве привлеко́ша, и́же и внеза́пу главу́ ему́ отсеко́ша и в воло́вых толпи́гох вложи́ша в мо́ре вверго́ша, сохране́ни же бы́ша. И Елпидифо́ра, боля́рина су́ща, ко Христо́ве ве́ре приведо́ша. Та́ко со ине́ми людми́ седмию́ ты́сящь ве́ровавших, и́же и ти посе́чени бы́вше, и Акинди́н же и Пига́сие и Анемподи́ст в ров вве́ржени бы́вше, име́ющь гады лю́тыя, и невреди́ми пребы́ша. Ви́девши же царе́ва ма́ти, ве́рова и она́ во Христа́, и с не́ю мно́жество мно́го. Тем и в пещь о́гненую вве́ржена бы́вши и та́ко со святы́м Акинди́ном и Пига́сием и Анемподи́стом и ту прия́ша коне́ц страда́нию.