Сий на мы́тнице седя́ и Го́споду ре́кшу к нему́: «После́дствуй Ми». И слы́шав, в том часе́ воста́в и после́дова Ему́ и, сотвори́в ве́черю ему́ ве́лию, я́коже и евангели́ст глаго́лет, и апо́столом учине́н быв. Той Свята́го Ду́ха силу восприе́м, и Боже́ственым нака́зан быв, е́же собо́ю Ева́нгелие евре́йским язы́ком написа́в, иуде́ом посла́. Па́рфяне же и ми́дяне научи́в, и це́рковь соста́вив, и мно́гая соде́лав чудеса́, посе́м от неве́рных огне́м сконча́ся.