В то́йже день па́мять повеле́но нам твори́ти святы́ми и богоно́сными отцы́, всех от ве́ка Богу угоди́вших пра́ведных оте́ц, от Ада́ма да́же и до Ио́сифа обру́чника Пресвяты́я Богоро́дицы: та́кожде и проро́к и проро́чиц.
Восхва́лим у́бо му́жи сла́вныя, и отцы́ на́ши в бытии́. Мно́гу сла́ву созда́ Госпо́дь вели́чия Своего́, от ве́ка госпо́дствующе в ца́рствиих Свои́х. И му́жи имени́ти си́лою, совещава́ющии ра́зумом их, провеща́ющии во проро́цех, старе́йшины лю́дем в мы́слех, и ра́зумом кни́жества люде́й прему́дрости словеса́, наказа́нием их вопию́ще гла́сы я́ко мусики́йски, пове́дающе по́вести в кни́гах. Му́жи богатии дарова́ний кре́постию, ми́рно живу́ще в жили́щах свои́х, вси си́и в ро́дех просла́влени бы́ша, и во днех их похвала́. Суть в них, иже оста́виша и́мя испове́дати хвалы́. И суть, и́же не оста́виша па́мяти, и погибо́ша, я́ко не су́щии: и быша, я́ко не бы́ша, и ча́да их по них. Но си́и му́жи ми́лостивии, и́хже пра́вды не забве́ны бы́ша: с се́менем их пребу́дет добро́, насле́дие исча́дия их. В заве́те есть се́мя их, и ча́да их, их ради, до ве́ка пребу́дет се́мя их, и сла́ва их не потреби́тся. Телеса́ их в мире погребе́ны бы́ша, а имена́ их живу́т в ро́ды: прему́дрость их пове́дят лю́дие, похвалу́ их пропове́дует це́рковь.
И пе́рвый у́бо Ада́м родонача́льник пет да бу́дет, и́же жи́ти нам и умре́ти вино́вен. Не недоста́точен же к хвала́м па́мяти приснослову́щия и А́вель, и́же ро́ждьшийся от первозда́ннаго отца́ Бо́жиима дла́ньма, я́ко вопие́т к Бо́гу кровь его́ и кроме́ души́, пе́рваго в ме́ртвых, и пе́рваго во спасе́ных. Да не не пет же бу́дет и Сиф, и́же сый се́мя но́во роди́телем вме́сто А́веля бысть: челове́к же бе пра́веден, яко́в же и А́вель. Просла́вим у́бо и Ено́ха, и́же угоди́ Го́сподеви, и приложи́ о́браз покая́ния родо́м. Та́коже и Но́е, вторы́й родонача́льник да воспое́тся днесь, и́же обре́теся соверше́н и пра́веден, и во вре́мя гне́ва бысть измене́ние. Сего́ ра́ди бысть оста́нок земли́, егда́ бысть пото́п: и заве́ты ве́ка положе́ни бы́ша с ним, да не потреби́тся по том вся́ка плоть. Похва́лим же в па́мяти и Си́ма, сы́на Но́ева, я́ко просла́влен бысть в челове́цех: и оте́ческую наготу́ благоразу́мне покры́в, оте́ческия моли́твы в покро́в изобре́те. Та́коже просла́вим и Иа́фефа бра́та его́, я́ко не оста́вив оте́ческия срамоты́ просте́рты, жития́ широту́ прие́млет моли́твами о́тчими. И Авраа́м вели́кий, оте́ц мно́жеству язы́к да восхва́лится, я́ко не обре́теся то́чен ему́ во сла́ве, и́же соблю́д зако́н Вы́шняго, и [Той] бысть в заве́те с ним, и на пло́ти его́ поста́ви заве́т, и в напа́сти обре́теся ве́рен. Сего́ ра́ди кля́тву поста́ви с ним, благослови́тися язы́ком о се́мени его́, умно́жити его́ я́ко песо́к земли́, и я́ко зве́зды воздви́гнути се́мя его́, и облада́ти тем от мо́ря до мо́ря, и от рек до коне́ц земли́. И о Исаа́це положи́ си́це: Авраа́ма ра́ди отца́ его́, благослове́ние всем челове́ком завеща́, и преста́ на главе́ Иа́ковли. Позна́ его́ благослове́нии свои́ми, и даде́ его́ в насле́дие, и положи́ ча́сти его́ на коле́н двана́десять: раздели́ и́, и изведе́ от него́ му́жа ми́лости, обрета́юща благода́ть пред вся́кою пло́тию. Возлю́блена Бо́гом и челове́ки Моисе́я возвели́чим, ему́же па́мять в благослове́ниих: уподо́бил есть его́ сла́ве святы́х, и возвели́чи его́ во стра́се враго́в, в словесе́х его́ зна́мения уста́ви. Просла́ви его́ пред лице́м ца́рским, и запове́да ему́ к лю́дем его́: и показа́ ему́ сла́ву Свою́, ве́рою и кро́тостию освяти́ его́, и избра́ его́ от вся́кия пло́ти. Услы́шан сотвори́л есть ему́ глас Свой, и введе́ его́ во мглу, и даде́ ему́ пред лице́м люде́й зако́н жи́зни худо́жества, научи́ти Иа́кова заве́ту, и судьба́м его́ Изра́иля. И Ааро́на воздви́же свя́та, подо́бна ему́ от коле́на Леви́ина: поста́ви ему́ заве́т ве́ка, и даде́ ему́ иере́йство люде́й: ублажи́л его́ есть украше́нием, и препоя́са его́ оде́ждою сла́вы: облече́ его́ в соверше́ние хвале́ния: утверди́ его́ сосу́ды кре́пости, осте́гнми, и поди́рем, и епоми́дою: и окружи́ его́ шипки́ златы́ми, и звонцы́ мно́гими о́крест, глаша́ти глас ступа́ния его́. Кра́сна пре́жде его́ не бы́ша такова́я до ве́ка. Не облече́ся иноплеме́нник, то́чию сы́нове его́, и вну́чата его́ при́сно. Кре́пок на бра́нех Иису́с Навви́н, и в Моисе́я ме́сто бысть во проро́цех, и́же бысть по и́мени своему́ вели́к на спасе́ние избра́нных его́, мсти́ти востаю́щия нань враги́, я́ко да насле́дствит Изра́иля, и́же просла́влен бысть воздви́жением рук его́: и внегда́ простира́шеся копие́ на гра́ды, кто пре́жде его́ си́це ста? Супоста́ты его́ Сам Госпо́дь порази́. Не руко́ю ли его́ воспяти́ся со́лнце, и еди́н день бысть я́ко два? И во дни Моисе́овы сотвори́ ми́лость и Хале́в сын Иефонни́ин, ста́ти проти́ву врага́, удержа́ти лю́ди от грех, и оста́вити ро́пот лука́вства. И та два су́ща спасе́на бы́ста от шестисо́т ты́сящь пешце́в, ввести́ их в насле́дствия зе́млю источа́ющу мед и млеко́, и даде́ Госпо́дь кре́пость Хале́ву. И да́же до ста́рости пребы́сть у него́. Возлю́блен Го́сподем свои́м и Самуи́л проро́к Госпо́день, устро́ивый ца́рство, и пома́за царя́ над людьми́ его́, и позна́н бысть в ве́ре, ве́рен виде́нием. Та́ко и Дави́д от сыно́в Изра́илевых со львы игра́ я́ко с ко́злищи, и с медве́ди я́ко со а́гнцы в ю́ности свое́й. И уби́в исполи́на, и отъя́т поноше́ние от люде́й: и егда́ простре́ ру́це, пра́щею ка́менем низложи́ти горды́ню Голиа́фову: и призва́ у́бо Го́спода Вы́шняго, и даде́ в десни́цу его́ кре́пость, низложи́ти челове́ка си́льна на бра́ни, и воздви́гнути рог люде́й свои́х. И сей во тмах просла́влен бысть, и восхвали́ Го́спода о благослове́нии. Егда́ же носи́ти ему́ вене́ц славы, Госпо́дь потреби́ враги́ о́крест, и уничижи́ филисти́мляны проти́вники до дне́шняго дне, и сокруши́ им рог. Во вся́цем де́ле свое́м даде́ испове́дание Свято́му Вы́шнему глаго́лами сла́вы: всем се́рдцем Его́ восхвали́, и возлюби́ Сотво́ршаго и́. И поста́ви певцы́ пря́мо олтаря́, и зву́ком их услажда́ти глас. Даде́ пра́здником бла́гу ле́поту, и украси́ времена́ до кончи́ны, воспева́ти им и́мя свято́е Его́, и от у́тра краси́ти во святи́лищи. Госпо́дь отъя́т грехи́ его́, и вознесе́ рог его́ во ве́ки: и даде́ ему́ заве́т ца́рский, и престо́л сла́вы во Изра́или, и сего́ ра́ди обита́ в простра́нстве. Та́кожде и Соломо́н воцари́ся во дни ми́ра, я́ко Бог препоко́и о́крест, да сози́ждет дом во и́мя Его́. И Илия́ проро́к я́ко огнь, и сло́во его́ я́ко свеща́ горя́ше, и́же нанесе́ на ня глад, и рве́нием свои́м умили́ я́, сло́вом Госпо́дним удержа́ не́бо, изнесе́ та́ко три́жды огнь. Коль просла́вися чудесы́ свои́ми Илия́? И кто подо́бно ему́ восхва́лится? Та́коже и Елисе́й испо́лнивыйся ду́ха его́ да похва́лится, зане́ во дни своя́ не подвиза́ся ко князе́м, и не премо́же его́ никто́же. И в животе́ свое́м сотвори́ чудеса́, и на уме́ртвии бы́ша ди́вна дела́ его́. Пет да бу́дет и Езеки́я, сотвори́вый уго́дное Бо́гу, я́ко укрепи́ся на путе́х Дави́да отца́ еѓо. Да почти́тся же па́мять Иоси́ева в сложе́нии фимиа́ма, состро́енное де́ло мирова́рника, той упра́вився во обраще́ние люде́й, и отъя́т ме́рзость беззако́ния, и упра́ви пред Го́сподем се́рдце свое́. Ра́зве Дави́да, Езеки́и, и Иоси́и, вси прегреши́ша прегреше́нием. Похва́лим возвели́ченаго Бо́гом и Зорова́веля, та́коже и Иису́са сы́на Оседе́кова, я́же во дни их созда́ста дом, и воздвиго́ста це́рковь свя́ту Го́сподеви, и угото́вану во сла́ву ве́ка. Просла́вим же и Нееми́ю мно́гою па́мятию, я́ко воздви́г сте́ны падшыя, и поста́вль две́ри и заво́ры, и воздви́г до́му распа́лины. Пет да бу́дет Си́мон сын Ио́нин, иере́й вели́кий: я́ко во дни своя́ утверди́ це́рковь, и пеки́йся о лю́дех свои́х отпаде́ния, и про́чая показа́ до́брыя де́тели. Зело́ ми належи́т просла́вити па́мять и Мелхиседе́ка пра́веднаго, а́ще и писа́ние и́мать его́ кроме́ отца́ и ма́тере: но Христо́вы вообража́ющу ему́ о́бразы. Пет да бу́дет и И́ов, я́ко Вы́шняго обре́т досто́йне Похвали́теля, похваля́й ничто́же от земны́х. Да почте́тся в па́мяти и Нафа́н проро́к, грехо́в о́стрый обличи́тель, и согреши́х глаго́лющему, проще́ние пода́вый. Похва́лим же и Дании́ла проро́ка па́мять, зве́ри устраши́вшаго, дру́га су́ща доброде́тели: я́ко де́лы уве́ри то вели́кий, и́же виде́ния, и суд прише́ствия Сы́на Бо́жия в после́дний день всем челове́ком сказа́ я́ве. Не не пе́ты же да бу́дут и святи́и трие́ о́троцы, Ана́ния, Аза́рия и Мисаи́л, и́же огнь седмери́цею разжже́нный в ро́су прело́жше, и царя́ уве́ривше веровати в Бо́га небе́снаго. Восхва́лим же па́мять и Ио́сифа Обручника, ему́же Дух Святы́й пре́жде бра́ка Обру́чницу о́наго заче́ншу явля́ет.
Восхва́лим же и жены́ святоположи́вшыя в пре́жнем зако́не: Са́рру жену Авраа́мову, я́ко ма́нием Бо́жиим непло́дное ея́ побежда́ется естество́: и по свиде́теля Бо́га яви́вшагося гл́асу, боле́знию роди́ отроча́. Похва́лим и пра́ведную Реве́кку изря́днейшую в жена́х, жену́ Исаа́кову я́ко ло́же честне́йшее изобре́те к чадоро́дию моли́тв ра́ди му́жа своего́ Исаа́ка: зане́ послу́ша его́ Бог, зача́т во утро́бе свое́й, и роди́ Иса́ва и Иа́кова, в произше́ствие двои́м язы́ком и лю́дем от утро́бы ея́. Похва́лим же па́мять Ли́и, пе́рвыя жены́ Иа́ковли, и ра́вне сожи́тельницы: я́ко почуди́тися нам Иа́кову, ка́ко плода́ не удержа́. Просла́вим же па́мять днесь и Рахи́ли сожи́тельницы вторы́я Иа́ковли и я́же а́ще и бо́ги оте́ческия укра́де, но любо́вию, в после́дняя же Бо́жие возлюби́ сло́во. Да воспое́тся же па́мять и Мариа́мы днесь сестры́ Моисе́овы, я́же возмо́гши воспе́ти и рещи́ песнь Го́сподеви, ны́не же моли́твенный бию́щу тимпа́н. Похва́лим па́мять и Дево́ры мужеу́мныя, я́же суди́ Изра́илеви: я́ко па́че жен Дево́ра глубино́ю ума́ судя́щи лю́ди Госпо́дни. С не́юже почти́м Иаи́ль му́жествовавшую по Изра́или на Сиса́ру язы́ческаго кня́зя, дре́вом пробо́дшую сквозе́ обо́чие того́. Почти́т же ся па́мять днесь и саре́фтяныни, к не́йже Илия́ посла́ся: я́ко несе́янную пи́щу име́, во вре́мя поже́нши клас проро́ка Илии́. Просла́вим же па́мять пра́ведныя сомани́тиды странноприе́мницы Елиссе́овы, я́ко Елиссе́й ея́ ключи́ утро́бы глаго́лом отверза́ет, ему́же ключи́ сомани́тида отве́рзе до́ма. К про́чим же сим па́мять пра́ведныя Иуди́фы в хвала́х да воспое́тся, уби́вшия Олофе́рна, его́же всяк муж трепета́ше руки́ лю́таго ору́жника, и руко́ю жены́ му́дры убие́н бысть. Па́мять пра́ведныя Есфи́ри да воспое́тся днесь, изба́вльшися Изра́иля от сме́рти, я́ко спасе́ Есфи́рь му́жи изра́ильтеския, во а́дову сень хотя́щыя заити́ дре́вле. Па́мять пра́ведныя А́нны да похва́лим, я́ко моли́твы ра́ди ча́до ро́ждши Самуи́ла вели́каго, и побежда́ет Фенна́ну А́нна мно́гими чады. Па́мять пра́ведныя Суса́нны да пе́та бу́дет днесь, я́ко у́бо сия́ пра́вило предлежи́т целому́дрствующым в житии́, целому́дреннейшим житие́м свои́м.
Про́чее же свята́я Бо́жия Це́рковь па́мять пра́зднует днесь всех сих, предпомяну́тых имены́ и непомяну́тых, и́же от ве́ка богоуго́дно и свя́то пожи́вших, и к Нему́ ве́ру пра́ву и чи́сту сохра́нших. И́хже моли́твами Христе́ Бо́же наш поми́луй нас, ны́не и при́сно и во ве́ки веко́в. Ами́нь.