Госпо́дь наш и Влады́ка, вся от небытия́ в бытие́ Сотвори́вый, не́бо и зе́млю и всю тварь, и рай насади́в, и введе́ ту созда́ннаго Свои́ма рука́ма Ада́ма и сотворе́нную от него́ Е́ву. Но ви́дев диа́вол в че́сти Бо́жии челове́ка сия́юща, и в пре́лесть введе́, и́же вкуси́ти сме́рти и всем ражда́ющимся от него́. Тем ны́не святи́и трудо́м мно́гим и посто́м па́ки в рай вхо́дят. Сий ви́дев Человеколю́бец Бог от ле́сти погиба́ющь род челове́чь, восхоте́ сни́ти на зе́млю обнови́ти обетша́вший род челове́чь, и я́же восхоте́ и сотвори́. Пи́шет бо ся: «Бог же наш на небеси́ и на земли́…». Бог челове́к быва́ет, да обожи́т челове́ческое естество́, помяну́в Ада́ма во а́де и вся проро́ки с ним, его́же пло́тию оде́явся Спас наш, из а́да Ада́ма изводи́ти прии́де и вся святы́я с ним. Не бе бо ни еди́номуже их отлучи́тися Ада́ма, прилепи́вшися ему́ пло́тию. Труп бе Ада́м сме́ртною ко́жею облече́н, во гресе́ уме́р, орли́ же патриа́рси и проро́цы, а́ще и пра́ведно пожи́ша, но Ада́ма не отлучи́шася. И дасть [Бог] Свои́м рабо́м и прор́оком дар проро́чества, и́хже избра́, и вси провозвести́ша на зе́млю Его́ соше́ствие и от Де́вы рождество́. Прекло́нь небеса́ и сни́де Сын Бо́жий, и от Де́вы роди́ся, его́же пра́зднеству приспе́вшу, сотваря́ем па́мять пре́жде богоуго́дных на́ших пра́отец, от ни́хже пле́мене по пло́ти роди́ся Христо́с. Тем ны́не ра́дуется со Ада́мом и А́вель, и [с] Си́фом и Но́ем лик честны́х пра́отец, днесь помина́еми вели́ких патриа́рх и правове́рных собо́ри веселя́тся, и святы́х проро́к со́нмище, свои́х глаго́л веща́ния ви́девше сбытие́ прише́дша. Моля́ху бо ся проро́цы и патриа́рси, да бы́ша ви́дели во дни своя́ во пло́ти Бо́га. Рече́ бо Бог: «Рад бы Авраа́м, а́ще бы ви́дел день Мой». Но ви́дев, возра́довася преображе́ную Исаа́ком му́ку Госпо́дню и в Тро́ице Бо́га пригости́в, и́мже сподо́бися и но́ги умы́ти, и трапе́зу предста́вити.

Тем вси согла́сно рцем: Ра́дуйся Авраа́м, вели́кий в патриа́рсех, дру́же Бо́жий, Исаа́че освяще́нный, Иа́кове благословеный, роди́вый дван́адесять патриа́рха, в ни́хже ди́вен бысть Иу́да и Леви́й, его́же по род́у пле́мя ца́рскаго коле́на до́йде отца́ царе́м Иессе́я, от него́же жезл Христо́с. Ра́дуйся, царю́ Дави́де и богоо́тче, свое́ проро́чество ви́дев испо́лнено, е́же вписа́: «Рече́ Госпо́дь Го́сподеви моему́: Сын Мое́й еси ты, Аз днесь роди́х Тя». Весели́ся Иса́ве о глаголех уст свои́х, е́же рече́: «Се Де́вая прии́мет во чре́ве, и роди́т Сы́на Емману́ила». С ни́миже вси проро́цы возсия́ша. И Даниил, львов пасту́х, ку́пно с те́ми чте́ни суть, и трие́ о́троцы угаси́ша си́лу о́гнену моли́твою и посто́м, и́мже а́нгел пещь оброси́, и мучи́теля опали́в умертви́. Ра́дуйтеся с Моисе́ем и Ааро́ном вся судия́, му́жествовавше ве́рою, и Мелхиседе́к, Вы́шнняго Бо́га жрец, и Самуи́л прия́тныя моли́твы Бо́гу принося́. Днесь помина́ется и же́нское естество́ Богоро́дицы ра́ди, е́юже праба́бня потреби́ся кля́тва: Са́рра, Ли́я и Рахи́ль с прама́терию Е́вою, и вся му́дрыя жены́ честны́я. Ра́дуйся, Иоаки́ме и А́нно, таково́му Де́тищу бы́вша роди́теля, Богоро́дице Мари́и, со Ио́сифом Обру́чником.

Уже́ бо вся́ка лесть преста́ Христо́вым рождество́м, и злове́рие разыде́ся, и благове́рие непреста́нно возсия́. И не преста́йте моля́ся о нас, честни́и отцы́ и святи́и проро́цы, ро́ждьшагося Христа́ Бо́га на́шего, да ти́ху жизнь поживе́м моли́твами ва́шими, сла́вяще Святу́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.