Пове́даше не́кто от святы́х оте́ц глаго́ля: я́ко в ски́те егда́ служа́ше иере́й в це́ркви, низходя́ше Святы́й Дух, во о́бразе о́рли, во вре́мя прича́стия, и никто́же его ви́дяше, то́кмо кли́рицы еди́ни. Во еди́н же день вопроси́ не́кто у бра́та диа́кона словесе́ поле́зна, и рече́ ему́: Несмь пра́зден ны́не. Егда́ же служа́щым им Литурги́ю, и не бысть подо́бию о́рля по обы́чаю. И рече́ поп диа́кону: Что есть вещь сия́? Или́ во мне есть согреше́ние, или́ в тебе́. Отступи́ у́бо от мене, и а́ще сни́дет оре́л, разу́мно бу́дет, я́ко тебе́ деля не сни́дет Святы́й Дух. И отсту́пльшу диа́кону: и а́бие сни́де оре́л. И сконча́вшися слу́жбе, рече́ поп диа́кону: Рцы ми, что еси́ сотвори́л? Он же извеща́я глаго́лаше: Не вем себе́ согре́шша, то́кмо пости́же мя брат иду́ща к це́ркви, и вопроси́ мя словесе́ поле́зна, и отвеща́х я́ко несть ми вре́мя. И рече́ ему́ поп: Я́ко тебе́ ра́ди у́бо не сни́де, бра́ту печ́аль прии́мшу от тебе́. И шед диа́кон к бра́ту пока́яся. Бо́гу на́шему сла́ва, ны́не и при́сно, и во ве́ки веко́в. Ами́нь.