Пове́да нам оте́ц Иоа́нн отше́льник, я́ко слы́шах рече́, пове́дающе отца́ Стефа́на, су́щу ми рече́, во о́бщем житии́ вели́каго отца́ Феодо́сия общежи́теля. Бе́ста та́мо два бра́та, сотво́рша обеща́ния, я́ко ни в животе́ ею́, ниже́ по сме́рти разлучи́тися и́ма дру́гу от дру́га, я́ко у́бо бя́ста в монастыре́ всех по́льзующа. Еди́н же ею́ нача́т ра́товатися от бе́са блу́днаго, и не возмо́г стерпе́ти бра́ни, глаго́ла бра́ту своему́: Отпусти́ мене́ бра́те, поне́же ра́туемь есмь блудо́м, и хощу́ ити́ в мир. Брат же нача́т моли́ти его́ глаго́ля: Ни бра́те, да не погуби́ши труда́ твоего́. Он же глаго́ла ему́: Гряди́ со мно́ю в ми́ре, да испо́лню жела́ние мое, или́ отпусти́ мене́ ити́. Брат же не хотя́ отпусти́ти его́, и́де с ним во град. Брат же ра́туемый вни́де в блуди́лище, други́й же вне стоя́, взем персть и посы́па главу́ свою́ слеза́ми омыва́я себе́ и сокруша́я. И я́ко у́бо изы́де от блуди́лища сотвори́вый де́ло блу́дное. Глаго́ла ему́ други́й брат: Что по́льзова бра́та себе́ от блуда́? Но и́дем про́чее в монасты́рь наш. Он же отвеща́ ему́: Ктому́ не могу́ ити́ в пусты́ню: Ты же а́ще хо́щеши иди́, понеже аз в ми́ре хощу́ пребыва́ти. И я́ко у́бо мно́го моли́ его́ брат, и не возмо́же умоли́ти его́, е́же после́довати с ним в пусты́ню, нача́т и той с ним пребыва́ти в ми́ре, и нае́м творя́ста о́ба я́ко да пита́ютася. В то же вре́мя, оте́ц Авра́мий монасты́рь зи́даше, и́же пре́жде в Константи́не гра́де монасты́рь созда́, е́же глаго́лется Авра́миев. Последи́ же во Ефес́а бысть епи́скоп добр и кро́ток зело́. Ше́дша у́бо о́ба бра́та та́мо творя́ста нае́м, и взе́мляста нарече́нную и́ма мзду. И ходя́ по вся ве́черы во град брат он, изнуря́я сия́ в блуде́. Други́й же брат по вся дни постя́шеся со вся́цем молча́нием, никому́же бесе́дуя. Де́лателие же зря́ще его́ по вся дни, ниже́ яду́ща, ниже́ к кому́ бесе́дующа, но со вся́цем молча́нием и смиреному́дрием внима́юще себе́. Пове́даше блаже́нному Авра́мию я́же о нем, и о пребыва́нии его́. Тогда́ вели́кий Авра́мий призва́ его́, и глаго́ла ему́: Отку́ду еси́ бра́те, и что есть де́ло твое́? Он же вся по́ряду испове́да ему́: я́ко бра́та ра́ди вся терплю́, я́ко да ви́дит Бог скорбь мою́, и спасе́т бра́та моего́. Сия́ же слы́шав блаже́нный Авра́мий, глаго́ла ему́: Госпо́дь дарова́ тебе́ ду́шу бра́та твоего́. И я́ко у́бо отпусти́ бра́та оте́ц Авра́мий, и изы́де от ке́ллии его́, и се брат его́ прии́де глаго́ла ему́: Бра́те люби́мый, поими́ мя в пусты́ню да спасу́ся. Он же а́бие пое́м его́, и веде́ и́ в пеще́ру близ свята́го Иорда́на, и затвори́ его́ та́мо. И по ма́лех днех мно́го по Бо́зе предуспе́в, и у́спе о Го́споде. Пребы́сть же брат по сме́рти в то́йже пеще́ре по обеща́нию, я́ко да и той сконча́ется ту. Сему́ же бра́ту седя́щу близ свята́го Иорда́на, по успе́нии бра́та: Прии́де к нему́ не́кий ста́рец от ла́вры свята́го Гера́сима, и глаго́ла ему́: рцы ми бра́те, в толи́ко лет безмо́лвия твоего́ и поще́ния, что испра́вил еси́? И глаго́ла ему́ брат: Иди́ в ке́ллию твою́ о́тче, и по десяти́х днех прииди́, и скажу́ ти. Ста́рец же по десяти́х днех прише́д, и обре́те бра́та преста́вльшася. И на зде обре́те напи́сано си́це: Прости́ мя а́вво, я́ко николи́же творя́щу ми пра́вило мое́, оста́вих на земли́ ум мой.